@##/ /rgya gar skad du/ ar+ya sA ga ra nA ga rA dza pa ri pr-i ts+tshA nA ma ma hA yA na sU tre/ bod skad du/ 'phags pa klu'i rgyal po rgya mtshos zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das klu'i rgyal po rgya mtsho'i 58-1-205b gnas na/ dge slong stong nyis brgya lnga bcu'i dge slong gi dge 'dun chen po dang / byang chub sems dpa' sems dpa' chen po rab tu mang po dang thabs cig tu bzhugs te/ de nas bcom ldan 'das kyis klu'i rgyal po rgya mtsho la bka' stsal pa/ klu'i bdag po chos kyi mdo bzhi po 'di dag brjod na gang dag brjod pas chos kyi phung po brgyad khri bzhi stong brjod par 'gyur ba rnams yin no/ /bzhi gang zhe na/ 'di lta ste/ 'du byed thams cad mi rtag par/ byang chub sems dpa' sems dpa' chen po rnams kyi bstan pa mi zad pa'i shes pa rab tu 'jug pa dang / zag pa dang bcas pa'i chos thams cad sdug bsngal bar/ byang chub sems dpa' sems dpa' chen po rnams kyi bstan pa mi zad pa'i shes pa rab tu 'jug pa dang / chos thams cad la bdag med par byang chub sems dpa' sems dpa' chen po rnams kyi bstan pa mi zad pa'i shes pa rab tu 'jug pa dang / mya ngan las 'das pa zhi bar byang chub sems dpa' sems dpa' chen po rnams kyi bstan pa mi zad pa'i shes pa rab tu 'jug pa ste/ klu'i bdag po chos kyi mdo bzhi po 'di dag brjod na gang dag brjod pas chos kyi phung po brgyad khri bzhi stong brjod par 'gyur ba rnams yin no/ /bcom ldan 'das kyis de skad ces bka' stsal nas/ dge slong de dag dang / byang chub sems dpa' de dag yi rangs te/ bcom ldan 'das kyis gsungs pa la mngon par bstod do// //'phags pa klu'i rgyal po rgya mtshos zhus pa zhes bya ba theg pa chen po'i mdo rdzogs so// //rgya gar gyi mkhan po su ren+d+ra bo d+hi dang / zhu chen gyi lots+tsha ba ban+de ye shes sdes bsgyur cing zhus te gtan la phab pa// // |