@##/ /rgya gar skad du/ Ar+ya many+dzu shrI ni ra de sha nA ma ma hA yA na sU tra/ bod skad du/ 'phags pa 'jam dpal gyis bstan pa zhes bya ba theg pa chen po'i mdo/sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang / byang chub sems dpa' lnga stong tham pa dang thabs cig tu bzhugs te/ de'i tshe bcom ldan 'das 'khor 'bum phrag du mas yongs su bskor cing / mdun gyis bltas nas chos ston to/ /de nas 'jam dpal gzhon nur gyur pa rin po che'i gdugs dpag tshad bcus 'khor ba tsam thogs nas/ bcom ldan 'das kyi dbu'i gtsug gi steng gi drang thad na 'dzin cing 'dug go/ /de nas yongs su dga' ldan ris kyi lha'i bu mtshams bzangs zhes bya ba bla na med pa yang dag par rdzogs pa'i byang chub las phyir mi ldog pa 'khor dang bcas te/ 'khor de nyid du 'dus par gyur nas 'dug pa stan las langs te/ 'jam dpal gzhon nur gyur pa ga la ba der song nas phyin pa dang / 'jam dpal gzhon nur gyur pa la 'di skad ces smras so/ /'jam dpal khyod bcom ldan 'das la mchod pa mdzad pas da dung thugs ma tshim lags sam/ 'jam dpal gyis smras pa/ lha'i bu 'di ji snyam du sems/ rgya mtsho chen po chu zed pas chog par 'dzin par 'gyur snyam mam/ lha'i bus smras pa/ 'jam dpal de ni ma lags so/ /'jam dpal gyis smras pa/ lha'i bu de bzhin du thams cad mkhyen pa'i ye shes rgya mtsho chen po lta bu zab cing gting dpag dka' la/ dpag tu med pa yongs su tshol bar 'dod pa'i byang chub sems dpa' sems dpa' chen pos de bzhin gshegs pa la mchod pa bya bar 'dod pas gzhar yang chog par 'dzin par mi bya'o/ /lha'i bus smras pa/ 'jam dpal ci la dmigs nas/ de bzhin gshegs pa la mchod 60-1-240b par bgyi/ 'jam dpal gyis smras pa/ lha'i bu dmigs pa bzhis de bzhin gshegs pa la mchod par bya'o/ /bzhi gang zhe na/ 'di lta ste/ byang chub kyi sems la dmigs pa dang / sems can thams cad rab tu thar bar bya ba la dmigs pa dang / dkon mchog gsum gyi gdung rgyun mi 'chad par bya ba la dmigs pa dang / sangs rgyas kyi zhing thams cad yongs su dag par bya ba la dmigs pa ste/ lha'i bu dmigs pa bzhi po de dag gis de bzhin gshegs pa la mchod par bya'o/ /'jam dpal gyis de skad ces smras nas/ lha'i bu mtshams bzangs dang / dge slong de dag dang / dge slong ma de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang dri zar bcas pa'i 'jig rten yi rangs te/ 'jam dpal gzhon nur gyur pas smras pa la mngon par bstod do/ /'phags pa 'jam dpal gyis bstan pa zhes bya ba theg pa chen po'i mdo rdzogs so// //rgya gar gyi mkhan po su ren dra bo d+hi dang / zhu chen gyi lo ts+tsha ba ban de ye shes sdes bsgyur cing zhus te gtan la phab pa// |