@##/ /rgya gar skad du/ Ar+ya dA nA nu shan+sa nirnge sha/ bod skad du/ 'phags pa sbyin pa'i phan yon bstan pa/sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyis dge slong rnams la bka' stsal pa/ dge slong dag mkhas pa rnams kyis rnam pa sum cu rtsa bdun sbyin pa sbyin no/ /sum cu rtsa bdun gang zhe na/ ser sna rnam par spang ba'i phyir dad pas sbyin pa sbyin no/ /dus su sbyin pa sbyin no/ /de bzhin gshegs pas gnang ba'i rung ba dngos po gsum yongs su dag par sbyin pa sbyin no/ /sems kyi 'khrug pa'i skyon thams cad spang ba'i phyir bsti stang du byas te sbyin pa sbyin no/ /snying po med pa'i lus las snying po blang ba'i phyir rang gi lag nas sbyin pa sbyin no/ /gzhan la mi gnod pa'i sbyin pa byin na rnam par smin pa gtong ba chen po rab tu 'thob par 'gyur ro/ /kha dog phun sum tshogs pa sbyin pa byin na rnam par smin pa kha dog mdzes pa rab tu 'thob par 'gyur ro/ / dri phun sum tshogs pa sbyin pa byin na rnam par smin pa grags pa'i dri rab tu 'thob par 'gyur ro/ /ro bro ba phun sum tshogs pa sbyin pa byin na rnam par smin pa ro bro ba mchog gi dpe byad bzang po rab tu 'thob par 'gyur ro/ /gya nom pa sbyin pa byin na rnam par smin pa longs spyod gya nom pa rab tu 'thob par 'gyur ro/ /rgya chen po sbyin pa byin na rnam par smin pa longs spyod rgya chen po rab tu 'thob par 'gyur ro/ /bza' ba sbyin pa byin na rnam par smin pa tshe rabs thams cad du bkres pa rnam par gcod pa rab tu 'thob par 'gyur ro/ /btung ba sbyin pa 61-1-96a byin na rnam par smin pa tshe rabs thams cad du skom pa rnam par gcod pa rab tu 'thob par 'gyur ro/ /bgo ba sbyin pa byin na rnam par smin pa gos kyi longs spyod sna tshogs rab tu 'thob par 'gyur ro/ /gnas kyi sbyin pa byin na rnam par smin pa pu shu dang khang pa brtsegs pa dang / khyams dang / khang pa dang / gzhal med khang dang / skyed mos tshal dang / kun dga' ra ba dang / yul rab tu 'thob par 'gyur ro/ /mal cha sbyin pa byin na rnam par smin pa rigs mthon po rab tu 'thob par 'gyur ro/ /bzhon pa sbyin pa byin na rnam par smin pa rdzu 'phrul gyi rkang pa bzhi rab tu 'thob par 'gyur ro/ /sman sbyin pa byin na rnam par smin pa rga shi med cing mya ngan dang kun nas nyon mongs pa 'gog pa'i mya ngan las 'das pa rab tu 'thob par 'gyur ro/ /chos sbyin pa byin na rnam par smin pa skye ba dran pa rab tu 'thob par 'gyur ro/ /me tog sbyin pa byin na rnam par smin pa byang chub kyi yan lag gi me tog rab tu 'thob par 'gyur ro/ /phreng ba sbyin pa byin na rnam par smin pa 'dod chags dang zhe sdang dang gti mug gi dri ma rnam par dag pa rab tu 'thob par 'gyur ro/ /bdug pa sbyin pa byin na rnam par smin pa nyon mongs pa'i dri nga ba thams cad med pa rab tu 'thob par 'gyur ro/ /gdugs sbyin pa byin na rnam par smin pa chos la dbang ba'i dbang phyug rab tu 'thob par 'gyur ro/ /dril bu sbyin pa byin na rnam par smin pa sgra dbyangs yid du 'ong ba rab tu 'thob par 'gyur ro/ /sil snyan sbyin pa byin na rnam par smin pa tshangs pa'i sgra dbyangs lta bu rab tu 'thob par 'gyur ro/ /mar me sbyin pa byin na rnam par smin pa lha'i mig sgrib pa med cing rnam par dag pa rab tu 'thob par 'gyur ro/ /dar sbyin pa byin na rnam par smin pa lha dang mi'i nang na rnam par grol ba'i dar gyis bcings pa rab tu 'thob par 'gyur ro/ /de bzhin gshegs pa'i mchod rten nam/ de bzhin gshegs pa'i sku gzugs la 'bru mar dri zhim po phul lam/ spos kyi khrus chu dbul ba phul na rnam par smin pa skyes bu chen po'i mtshan sum 61-1-96b cu rtsa gnyis dang / dpe byad bzang po brgyad cu rab tu 'thob par 'gyur ro/ /khrus kyi yo byad sbyin pa byin na rnam par smin pa tshe rabs thams cad du nad nyung ba dang / rigs kyi mchog tu skye zhing kun tu mdzes pa rab tu 'thob par 'gyur ro/ /snying po lnga sbyin pa byin na rnam par smin pa tshe rabs thams cad du mthu che zhing spro ba chen po mi thul ba rab tu 'thob par 'gyur ro/ /byams pa la gnas te sbyin pa byin na rnam par smin pa gnod sems med pa rab tu 'thob par 'gyur ro/ /snying rje la gnas te sbyin pa byin na rnam par smin pa 'tshe ba med pa rab tu 'thob par 'gyur ro/ /dga' ba la gnas te sbyin pa byin na rnam par smin pa mi 'jigs pa sbyin pa rab tu 'thob par 'gyur ro/ /btang snyoms la gnas te sbyin pa byin na rnam par smin pa mi dga' ba spong ba rab tu 'thob par 'gyur ro/ /rnam pa sna tshogs kyi sbyin pa byin na rnam par smin pa longs spyod sna tshogs rab tu 'thob par 'gyur ro/ /lan la mi re ba la gnas te sbyin pa byin na rnam par smin pa bla na med pa yang dag par rdzogs pa'i byang chub rab tu 'thob par 'gyur te/ dge slong dag mkhas pa rnams kyis rnam pa sum cu rtsa bdun po de dag sbyin pa sbyin no/ /bcom ldan 'das kyis de skad ces bka' stsal nas/dge slong de dag yi rangs te/ bcom ldan 'das kyis gsungs pa la mngon par bstod do/ /'phags pa sbyin pa'i phan yon bstan pa rdzogs so// //rgya gar gyi mkhan po su ren dra bo d+hi dang / zhu chen gyi lots+tsha ba ban de ye shes sdes bsgyur cing zhus te gtan la phab pa// |