@##/ /rgya'i skad du/ kwan ji li'u phu sa zhang sh+yan te'u shis th+yan kyi na/ bod skad du/ 'phags pa byang chub sems dpa' byams pa dga' ldan gnam du skye ba blangs pa'i mdo/ /sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod kyi yul rgyal bu rgyal byed kyi tshal/ mgon med zas sbyin gyi kun dga' ra ba na/ dge slong gi dge 'dun chen po dang / byang chub sems dpa' sems dpa' chen po rab tu mang po dang thabs cig tu bzhugs te/ de nas bcom ldan 'das mtshan mo'i thun dang po la/ sku las 'od zer gser gyi kha dog lta bu byung nas/ rgyal byed kyi tshal lan bdun bskor te/ khyim bdag su ta sha la sogs pa 'od kyis reg par byas nas/ 'od gser gyi kha dog lta bu nam mkha' la sprin bzhin du khyab par byas nas mnyan du yod pa'i yul kun tu gser gyi kha dog lta bu'i me tog char rab tu phab bo/ /'od gser gyi kha dog lta bu'i nang nas sprul pa'i de bzhin gshegs pa dpag tu med pa brgya stong snang ba thams cad kyis gsung 'thun par bskal pa 'di nyid du/ byang chub sems dpa' stong gi dang po log par dad sel sangs rgyas pa nas/ tha mar snang mdzad sangs rgyas pa'i don bka' stsal to/ /de skad ces bka' stsal nas/ tshe dang ldan pa kun shes kauN+Di n+ya ting nge 'dzin las langs nas 'khor nyis brgya lnga bcu dang / tshe dang ldan pa 'od srung chen po 'khor nyis brgya lnga bcu dang / tshe dang ldan pa maud gal gyi bu 'khor nyis brgya lnga bcu dang / tshe dang ldan pa shA ri'i bu 'khor nyis brgya lnga bcu dang / ma ha pa sha pa ti la sogs pa dge slong ma stong dang / khyim bdag su ta sha la sogs pa dge bsnyen pha sum stong dang / byi shwa khra 'pho ta la sogs pa dge bsnyen ma nyis stong dang / kun tu bzang po la sogs pa bskal pa bzang po'i byang chub sems dpa' bcu drug dang / chos kyi rgyal bu 'jam dpal gzhon nur gyur pa la sogs pa/ byang chub sems dpa' lnga brgya dang / lha dang / klu 61-1-297a dang / gnod sbyin dang / lha ma yin la sogs pa 'khor thams cad/ de bzhin gshegs pa'i 'od kyis bskul nas sprin bzhin du 'dus so/ /de nas bcom ldan 'das kyis/ ljags kyi dbang po las 'od zer stong phyung nas/ 'od zer re re kha dog stong stong / kha dog re re'i nang nas/ sprul pa'i de bzhin gshegs pa dpag tu med pa snyed snang ngo / /de bzhin gshegs pa de dag thams cad kyis gsung 'thun par/ byang chub sems dpa' chen po thams cad kyi chos thams cad rnam par dag pa zab mo'i gzungs bstan pa 'di lta ste/ a nan ta mu dra zhes bya ba'i gzungs dang / stong pa nyid kyi ye shes zhes bya ba'i gzungs dang / sgrib pa med pa'i dngos po zhes bya ba'i gzungs dang / mtshan ma med par rnam par grol ba chen po zhes bya ba'i gzungs la sogs pa/ sgra skad gcig gis brgya phrag bye ba'i gzungs kyi sgo bka' stsal to/ /gzungs kyi sgo bka' stsal ma thag tu/ 'khor 'dus pa'i nang nas/ byang chub sems dpa' byams pa zhes bya ba/ bcom ldan 'das kyis bka' stsal pa thos nas/ de ma thag tu bye ba brgya phrag khri'i gzungs kyi sgo thob nas/ stan las langs te gos tshags bcos nas thal mo sbyar te/ bcom ldan 'das kyi spyan sngar 'khod do/ /de nas tshe dang ldan pa u pA li stan las langs te/ gdong dang spyi bos phyag 'tshal lo/ /bcom ldan 'das la 'di skad ces gsol to/ /bcom ldan 'das bcom ldan 'das kyis sngon du yang mdzod kyi chos thams cad las/ ma pham pa ma 'ongs pa'i dus su sangs rgyas par gsungs na/ ma pham pa so so'i skye bo'i lus dang ma bral/ zag pa yang ma zad/ ma pham pa 'di nyid du rab tu byung yang / ting nge 'dzin mi bsgom/ nyon mongs pa ma spangs na/ bcom ldan 'das kyis nges par sangs rgyas par bka' stsal na/ ma pham pa de tshe'i dus byas nas/ khams gang du skye ba len par 'gyur/ de nas bcom ldan 'das kyis u pA li la bka' stsal pa/ u pA li gcig tu 61-1-297b gyis la nyon cig /de bzhin gshegs pa thams cad mkhyen pas 'khor 'di'i nang du/ byang chub sems dpa' sems dpa' chen po byams pa bla na med pa yang dag par rdzogs pa'i byang chub tu mngon par rdzogs par 'tshang rgyas par 'gyur bar lung bstan gyis/ dus 'di nas lo bcu gnyis kyi 'og tu tshe'i dus byas nas/ nges par dga' ldan gyi gnam du skye ba len par 'gyur ro/ /de nas dga' ldan gyi gnam gyi steng na/ lha'i bu bye ba khrag khrig phrag lnga brgya yod pa/ lha'i bu re res kyang sbyin pa'i pha rol tu phyin pa zab mo la spyod pas/ skye ba gcig gis thogs pa'i byang chub sems dpa' la mchod pa'i don du/ lha'i bsod nams kyi mthus/ gzhal med khang byas te/ rang rang gi lus kyi gos dang / tsan dan dang / rin po che'i dbu rgyan phud de/ pus mo btsugs nas thal mo sbyar te/ smon lam 'di skad ces btab bo/ / bdag gi rin thang med pa'i rin po che dang / lha'i dbu rgyan gyis/ byang chub sems dpa' chen po la mchod pa'i don du/ ma pham pa 'di ma 'ongs pa'i dus su ring po mi thogs par/ bla na med pa yang dag par rdzogs pa'i byang chub tu lung bstan pa thos nas/ bdag cag gi rin po che'i dbu rgyan 'di/ /sangs rgyas kyi zhing khams rgyan thams cad kyis brgyan pa'i mchod pa'i rdzas su gyur cig ces lha'i bu thams cad rang rang pus mo btsugs te/ smon lam de skad ces btab pa dang / de nas lha thams cad kyis smon lam btab ma thag tu/ rin po che'i dbu rgyan thams cad bye ba khrag khrig phrag lnga brgya'i gzhal med khang du gyur te/ rin po che'i gzhal med khang re re la yang skyed mos tshal bdun bdun/ skyed mos tshal re re yang / rin po che sna bdun bdun las grub pa/ rin po che re re las kyang bye ba phrag lnga brgya'i 'od kyi 'od zer re re las bye ba phrag brgya'i pad ma pad ma re re las bye ba phrag lnga brgya'i rin po che sna bdun gyi shing gi phreng ba/ shing re re'i lo ma las bye ba phrag lnga brgya'i rin po che'i kha dog /rin po che'i kha dog re re las kyang / bye ba phrag lnga brgya'i 'dzam bu'i gser gyi 61-1-298a 'od 'dzam bu'i gser gyi 'od re re'i nang nas kyang / bye ba phrag lnga brgya'i rin po che'i lha'i bu mo/ lha'i bu mo re re yang shing gi drung na 'dug nas/ lag na bye ba phrag lnga brgya'i rin po che grangs med pa'i do shal thogs/ ngo mtshar che ba'i glu dbyangs snyan pa len/ glu dbyangs snyan pa'i nang nas phyir mi ldog pa'i sa'i chos kyi 'khor lo spyod/ shing de dag las 'bras bu skyes pa'i kha dog bai dUr+ya bzhin du 'dug /kha dog de dag thams cad bai dUr+ya'i nang du 'dug pa/ 'od zer de dag thams cad g.yas phyogs su 'khor ba/ sgra snyan pa sna tshogs 'byung ba/ sgra thams cad las/ byams pa chen po dang / snying rje chen po'i chos 'chad pa/ re re'i pho brang mtho khyad ni dpag tshad drug cu rtsa gnyis/ rngams su dpag tshad bcu bzhi/ klu'i rgyal po bye ba phrag lnga brgyas ni pho brang bskor/ klu'i rgyal po re re yang bye ba phrag lnga brgya'i rin po che sna bdun gyi shing gi char phab pas pho brang gi steng brgyan/ rang bzhin rlung byung bas shing de dag bskyod pa dang / shing de las mi rtag pa dang / sdug bsngal ba dang / stong pa dang / bdag med pa dang / pha rol tu phyin pa thams cad kyi sgra byung bar gyur to/ /de nas pho brang de'i nang na/ rgyal po chen po le'u du pa ti zhes bya ba/ stan la 'dug pa las langs te/ phyogs bcu'i de bzhin gshegs pa thams cad la phyag 'tshal nas/ smon lam 'di skad ces btab bo/ /bdag gi bsod nams kyis/ byang chub sems dpa' byams pa'i chos kyi pho brang byed pa'i bsod nams dang ldan na/ bdag gi smin mtshams bar nas nor bu rin po che rang byung bar gyur cig /ces smon lam btab pa dang / de ma thag tu bye ba phrag brgya'i rin po che byung nas/ rin po che bai dUr+ya la sogs pa'i kha dog thams cad rdzogs par grub pa/ shel gyi kha dog bzhin phyi nang gsal ba/ rin po che de dag nam mkha' stong pa la 'khor zhing / ngo mtshar che ba'i rin po che'i pho brang rim pa bzhi bcu rtsa dgu sprul par gyur to/ /re re'i lan zhun re re 61-1-298b las kyang / bye ba 'bum phrag gi rin po che pad ma 'dis spras pa la grub pa/ lan zhun gyi bar thams cad na/ rdzu sa te skyes pa'i lha'i bu bye ba phrag dgu dang / lha'i bu mo bye ba phrag lnga brgya la/ lha'i bu re re'i lag nas rin po che sna bdun bdun las grub pa'i pad ma dpag tu med pa bye ba phrag bcu/ pad ma re re'i steng du 'od bye ba phrag dpag tu med pa 'od de dag gi nang na/ lha'i rol mo'i cha spyad ma dkrol bar sgra rang byung ba/ sgra de dag byung ba dang / bu mo thams cad langs nas/ rol mo'i cha spyad thogs te/ gar dang / glu dbyangs snyan pa len pa'i sgra las/ dge ba bcu dang / smon lam bzhi la sogs pa'i sgra/ lha thams cad kyis thos pas/ bla na med pa'i byang chub tu sems bskyed do/ /de nas skyed mos tshal thams cad kyi nang na/ skyed mos tshal kha dog brgyad kyi bai dUr+ya'i rdzing bu rdzing bu re re'i nang na/ bye ba phrag lnga brgya'i rin po che las grub pa/ rdzing bu re re'i nang na/ yan lag brgyad dang ldan pa'i chus gang ba/ chu de dag kyang gyen du 'bab pa/ sgo bzhi'i phyi rol na rdzus te skyes pa'i pad ma bzhi/ pad ma de dag las chu byung ba rin po che'i pad ma'i kha dog bzhin du 'bab pa/ pad ma re re'i steng du lha'i bu mo nyi shu rtsa bzhi bzhi/ lus kyi kha dog ngo mtshar che ba/ byang chub sems dpa' bzhin du brgyan pa/ lus mtshan dang ldan pa/ lag na rin po che'i rang bzhin gyi snod bye ba phrag lnga brgya sprul/ snod re re'i nang na/ lha'i bdud rtsi'i rang bzhin thams cad kyis gang ba/ phrag pa g.yon la thogs pa/ do shal dpag tu med pa/ phrag pa g.yas la thogs pa/ rol mo'i cha byad dpag tu med pa sprin bzhin du nam mkha' la 'dug pa/ chu las byung ba/ byang chub sems dpa' pha rol tu phyin pa drug brjod pa/ dga' ldan gyi gnam du skyes pa'i lha'i bu gang la la zhig /rang bzhin gyis lha'i bu mo rnams kyis g.yog byas pa/ rin po che sna bdun gyi seng ge'i khri 'phang du dpag tshad bzhi yod pa/ 'dzam bu'i gser dang / rin po che dpag tu 61-1-299a med pas brgyan pa zur bzhi la 'dug pa/ pad ma bzhi las skyes pa/ pad ma re re la yang rin po che phrag brgya las grub pa/ rin po che re re la yang bye ba phrag brgya'i 'od zer/ 'od zer de dag las/ ngo mtshar che ba sprul pa'i rin po che sna tshogs kyi me tog sprul pas brgyan pa/ rin po che'i yol ba bres pa de'i phyogs na tshangs pa'i rgyal po bye ba phrag stong gis/ rang rang gi tshangs pa'i lha'i ngo mtshar che ba'i dril bu khyer nas/ yol ba'i steng du spyangs pa/ tshangs pa'i rgyal po chung ngus kyang / rin po che sna tshogs pa'i dra bas yol ba'i steng du bres pa/ de nas lha'i bu dang / lha'i bu mo brgya stong grangs med pa'i 'khor gyis/ rin po che'i me tog pad ma thams cad khyer nas khri'i steng du bdal ba/ pad ma de dag thams cad rin po che'i rang bzhin gyi bu mo bye ba phrag lnga brgya byung ba de dag gi lag na rnga yab dkar po thogs pa/ yol ba'i nang na 'dug pa/ pho brang zur bzhi la rin po che'i ka ba bzhi yod pa/ rin po che'i ka ba re re la yang brgya phrag stong gi khang pa brtsegs pa/ bu mo 'di'i nor bu ni bres/ lan kan bar kun tu lha'i bu mo brgya stong yod/ kha dog ngo mtshar che ba/ dpag tu med pa'i rol mo'i cha spyad lag na thogs pa/ rol mo'i sgra'i nang nas sdug bsngal ba dang / stong pa dang / mi rtag pa dang / bdag med pa dang / pha rol tu phyin pa thams cad kyi sgra 'byung ba/ lha'i pho brang de dag nas rin po che'i kha dog dpag tu med pa bye ba phrag brgya yod pa/ bu mo re re kun kyang rin po che'i kha dog dang 'thun par sprul to/ /de nas phyogs bcu'i lha dpag tu med pa thams cad/ dga' ldan gyi lha'i pho brang du skye ba len par smon lam btab bo/ /de nas dga' ldan gyi pho brang na/ rgyal po chen po lnga po la/ rgyal po chen po dang po ni/ rin po che'i rgyal mtshan zhes bya ba/ lus la rin po che sna bdun gyi char 'bebs pas pho brang gi nang du 'thor ba/ rin po che'i nor bu re re yang / rol mo'i cha spyad dpag tu med par sprul pa/ nam mkha' la kun tu 61-1-299b 'phyang ba/ ma brdungs par sgra snyan pa dpag tu med pa rang 'byung ba/ sems can gyi yid rtog pa/ rgyal po gnyis pa me tog 'thor ba zhes bya ba/ lus la me tog sna tshogs kyi char 'bebs pa/ pho brang thams cad khyab par me tog gi gdugs sprul/ gdugs re re yang brgya phrag stong gi rgyal mtshan dang / 'phan gyis lam drangs pa/ rgyal po gsum pa ni/ spos kyi dbyangs zhes bya ba/ lus kyi ba spu'i khung bu'i nang nas/ ngo mtshar che ba'i rgya mtsho'i 'gram gyi tsan dan gyi spos kyi char 'bebs pa/ spos de dag sprin bzhin du chags pa/ kha dog brgya phrag gis pho brang lan bdun du bskor ba/ rgyal po chen po bzhi pa/ dga' ba bde ba zhes bya ba/ lus la yid bzhin gyi nor bu rin po che'i char 'bebs pa/ rin po che re re yang rang bzhin gyis rgyal mtshan dang / 'phan gyi steng du 'dug nas sangs rgyas la skyabs su 'gro ba dang / chos dang dge 'dun la skyabs su 'gro bar 'chad pa dang / yan lag lnga'i tshul khrims kyi sgra dang / dge ba'i chos dpag tu med pa dang / pha rol tu phyin pa thams cad dang / byams pa byang chub kyi yan lag gi sgra la 'dzud pa/ rgyal po chen po lnga pa/ sgra dbyangs drag po zhes bya ba/ lus kyi ba spu'i khung bu thams cad nas chu 'bebs pa/ chu re re'i steng du me tog pad ma bye ba phrag lnga brgya yod pa/ pad ma re re'i steng du shel gyi bu mo nyi shu rtsa lnga lnga/ shel gyi bu mo re re'i lus thams cad kyi ba spu'i bu ga re re'i nang nas/ lha'i bdud las rgyal ba'i sgra snyan pa 'byung ba sprul lo/ /bcom ldan 'das kyis u pA li la bka' stsal pa/ dga' ldan gyi lha'i gnas zhes bya bar/ dge ba bcu dang / rgyal ba la drin bsab pa dang / ngo mtshar che ba bskyed pa'i bsod nams ni/ ngas bskal pa chung ngu gcig gi bar du 'dug nas/ skye ba gcig gis thogs pa'i byang chub sems dpa' drin bsab pa dang / dge ba bcu'i 'bras bu bshad kyang rdzogs pa'i mtha' med de/ 'dir ngas khyed la sogs pa la mdo tsam zhig 61-1-300a bshad cing bstan par bya'o/ /u pA li dge slong ngam/ 'khor thams cad kyang rung ste/ gang la la zhig skye shi la mi skyo bar/ lha'i gnas su skye bar 'dod na/ bla na med pa'i byang chub tu sems bskyed pa/ byams pa'i zhabs 'bring byed 'dod par lta ba ni/ yan lag lnga'i khrims brgyad rdzogs pa/ lus sems kyi brtson 'grus rgyun mi 'chad pa/ dge ba bcu'i chos la spyod pa/ bde skyid phun sum tshogs par 'dod pa/ sems rtse gcig tu dga' ldan gyi gnas su skye bar 'dod pa de dag ni yang dag par lta ba zhes bya ste/ gzhan du lta ba ni/ log par lta ba zhes bya'o/ /de nas u pA li stan las langs te/ gos tshags bcos nas/ gdong dang spyi bos phyag 'tshal te/ bcom ldan 'das la 'di skad ces gsol to/ /bcom ldan 'das/ dga' ldan gyi gnam du de lta bu'i bde skyid phun sum tshogs pa der/ skyes bu chen po 'di dus ci tsam du 'dzam bu'i gling nas/ lha'i gnas de lta bur skye bar 'gyur/ bcom ldan 'das kyis bka' stsal pa/ dus 'di nas lo bcu gnyis lon nas/ dpyid zla 'bring po'i tshes bco lnga'i nyi ma la/ yul ba ra ni kra pa li'i grong khyer na bram ze chen po pa pa li zhes bya ba'i khyim nas skye ba blangs pa'i sa nas/ skyil mo krung bcas nas/ ting nge 'dzin la mnyam par bzhag pa bzhin du/ lus gser gyi kha dog dang / 'od zer dmar po nyi ma brgya stong bas lhag /stengagi dga' ldan gyi gnam du/ lus kyi sku gdung yang dper na/ gser gyi gzugs bzhin du/ mi g.yo mi 'gul bar/ lus kyi 'od zer gyi dkyil 'khor gyi nang nas/ rnam par thar pa gsum dang / shes rab kyi pha rol tu phyin pa'i yi ge gsal bar ston te/ de nas lha mi thams cad rjes su 'brang nas/ rin po che sku gdung gi mchod rten la mchod nas/ de nas dga' ldan gyi gnam du/ rin po che sna bdun gyi pho brang na 'di gzhal med khang seng ge'i pad ma'i steng du skyil mo krung bcas nas/ lus 'dzam bu 61-1-300b gser gyi kha dog bzhin du rdzus te skyes nas/ sku chur dpag tshad bcu drug /mtshan sum cu rtsa gnyis/ dpe byad bzang po brgyad cus rdzogs par brgyan pa/ dbu'i thor tshugs dang ldan/ dbu skra bai dUr+ya'i kha dog dang 'dra ba/ shi kra bi li kra dang / ma 'di dang / gyen shugs kyi rin po che sa lha'i dbu rgyan brgyan pa/ rin po che lha'i dbu rgyan de dag la/ bye ba phrag brgya'i rin po che'i kha dog re re'i nang nas/ sprul pa'i de bzhin gshegs pa dpag tu med pa brgya stong phrag khri'i sprul pa'i byang chub sems dpa' mang pos zhabs 'bring byas pa/ de nas zhing khams gzhan gyi byang chub sems dpa' thams cad/ cho 'phrul bco brgyad ston cing / lha'i dbu rgyan gyi nang na yid la smon pa'i rjes su 'thun par lha'i dbu rgyan gyi nang na gnas so/ /byams pa'i smin mtshams nas 'od zer dkar po byung ste/ 'od zer de dag las/ brgya phrag gi rin po che'i kha dog dang ldan pa'i mtshan sum cu rtsa gnyis/ mtshan re re'i nang nas bye ba phrag lnga brgya'i rin po che'i kha dog dpe byad bzang po/ dpe byad re re la yang / bye ba phrag lnga brgya'i rin po che'i mtshan dang / dpe byad kyi kha dog 'bar ba'i lha'i bu re re'i 'od zer brgya khri bzhi stong gi sprin thams cad pad ma las rang rang 'dug nas/ nyin mtshan rtag par phyir mi ldog pa'i sa'i chos kyi 'khor lo spyod pa/ bgrod pa gcig cing don grub par byed pa phrag lnga brgya'i lha'i bu de dag phyir mi ldog pa'i/ bla na med pa yang dag par rdzogs pa'i byang chub 'di dag tu/ dga' ldan gyi gnam du nyin mtshan rtag tu phyir mi ldog pa'i sa'i chos kyi 'khor lo la/ lha'i bu thams cad 'khod pa/ 'dzam bu'i gling gi tshe lo'i grangs bye ba 'bum phrag lnga bcu rtsa drug lon nas/ byams pa dga' ldan gyi gnam nas 'dzam bu'i gling du skye ba blangs pa'i mdo bshad par 'gyur ro/ /u pA li/ byang chub sems dpa' byams pa zhes bya ba/ 'dzam bu'i gling nas tshe 'phos nas/ dga' ldan gnam du skyes pa'i yon tan ni/ de bzhin gshegs pa mya ngan las 'das nas/ nga'i 'khor 61-1-301a nye gnas las gang la la zhig /brtson 'grus su bsod nams bsags pa/ sdom pa ma zhig cing mchod rten la phyag dar dang / maN+Dal byed pa dang / spos dri zhim pa dang / me tog gi mchod pa dang / rnam par thar pa gsum la spyod cing / zab cing drang ba'i chos la spyod pa dang / mdo sde klog cing / sems rtse gcig tu rgyun mi 'chad par yid la zlos pa dang / mngon par shes pa drug thob par byed pa dang / de bzhin gshegs pa'i sku gzugs byed pa dang / byams pa'i mtshan brjod pa de lta bu la sogs pa'i mi de dag ni 'di skad cig tsam du khrims brgyad mnos nas/ sdig pa thams cad byang bar byed cing / smon lam btab nas/ tshe'i dus byas pa'i 'og tu/ dper na skyes bu stobs dang ldan pa lag pa brkyang ba tsam du dga' ldan du skyes nas pad ma'i steng du skyil mo krung bcas nas/ brgya phrag stong gi lha'i bus/ lha'i rol mo byed cing / me tog man dA ra ba dang / man dA ra ba chen po 'thor zhing / legs so legs so/ /zhes bsngags pa brjod nas/ rigs kyi bu khyod ni 'dzam bu'i gling du bsod nams rgya chen po bsags nas/ 'chi 'pho ba'i 'og tu/ 'di ni dga' ldan gyi gnas zhes bya ba yin te/ 'dir lha'i rgyal po byams pa zhes bya ba la/ khyod skyabs su gsol/ phyag 'tshol cig dang / phyag 'tshal na/ smin mtshams kyi mdzod spu nas/ 'od zer dkar po reg par byas nas/ bskal pa dgu bcu'i skye shi las grol zhing sdig pa 'byang bar 'gyur ro/ /de nas byang chub sems dpa'i rjes su 'thun pa'i yon tan gyis/ ngo mtshar gyi chos bshad nas/ brtson pa mi 'dor ba phyir mi ldog pa'i 'khor lo dang / bla na med pa'i lam yid la sems pa de lta bu la sogs pa'i sems can sdig pa thams cad byang zhing / chos drug la spyod na/ the tsom med par nges par dga' ldan gyi gnam du skyes nas/ 'phags pa byams pa'i zhal mthong / byams pa'i zhabs 'bring byas nas/ 'dzam bu'i gling du dang por chos thos 61-1-301b nas/ ma 'ongs pa'i bskal pa 'di nyid kyi sangs rgyas dang / bskal pa skar ma lta bu'i sangs rgyas thams cad kyi yang zhal mthong nas/ sangs rgyas de dag thams cad kyi drung du byang chub tu lung ston pa thob par 'gyur ro/ /u pA li/ de bzhin gshegs pa mya ngan las 'das pa'i 'og tu/ dge slong dang / dge slong ma dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po la sogs pa 'khor thams cad las/ gang la la zhig byang chub sems dpa' sems dpa' chen po byams pa'i mtshan thos nas dga' ba dang / gus par phyag 'tshal ba'i mi de dag /tshe'i dus byas nas/ se gol gtogs pa tsam du gong ma ci lta ba bzhin du/ byams pa'i mtshan thos nas tshe'i dus byas pa'i 'og tu/ mun pa'i khams su mi ltung / mtha' 'khob kyi yul dang / log par lta ba dang / mi dge ba thams cad spyod par mi skye/ skye ba thams cad du drang por lta ba dang / 'khor phun sum tshogs pa dang / dkon mchog gsum la mi smod par skye'o/ /u pA li/ rigs kyi bu dang / rigs kyi bu mo gang la la zhig /sdom pa bshig pa dang / sdig pa mi dge ba'i las byas pas/ byang chub sems dpa' thugs rje chen po'i mtshan thos pas/ mtshan nas brjod cing / yan lag lnga gtugs te/ sems rtse gcig tu bshags na/ sdig pa thams cad myur du byang nas ma 'ongs pa'i dus kyi sems can thams cad/ byang chub sems dpa' thugs rje chen po'i mtshan brjod pa dang / sku gzugs bris nas/ spos dang / me tog dang / gos dang / gdugs dang / rgyal mtshan dang / ba dan dang / phyag 'tshal zhing / yid la zlos na/ mi de dag tshe'i dus byas pa'i tshe na/ byang chub sems dpa' byams pas/ mi chen po'i mtshan smin mtshams kyi mdzod spu nas/ 'od dang / lha'i bu thams cad kyis/ man dA ra ba'i char phab nas/ mi de dag bsus nas/ skad cig yud tsam 61-1-302a gyis lha'i gnas su skyes/ 'phags pa byams pa'i zhal mthong nas/ gdong dang spyi bos phyag 'tshal nas/ de ma thag tu chos thos pa dang / bla na med pa'i byang chub kyi lam thob pa dang / phyir mi ldog pa'i 'khor lo dang / ma 'ongs pa'i dus kyi tshe/ de bzhin gshegs pa gang gA'i klung gi bye ma snyed kyi de bzhin gshegs pa mthong bar 'gyur ro/ /u pA li/ khyod rtse gcig tu nyon la yid la gyis shig /byang chub sems dpa' byams pa zhes bya ba la/ ma 'ongs pa'i sems can thams cad skyabs su 'gro ba na/ gang la la zhig skyabs su 'gro ba'i mi de dag ni/ bla na med pa'i lam dang / phyir mi ldog pa'i 'khor lo 'thob nas/ byang chub sems dpa' byams pa/ de bzhin gshegs pa dgra bcom pa yang dag par rdzogs pa'i sangs rgyas pa'i dus kyi tshe/ mi de dag de bzhin gshegs pa'i 'od zer mthong nas/ lung bstan pa thob par 'gyur ro/ /u pA li/ de bzhin gshegs pa mya ngan las 'das pa'i 'og tu 'khor bzhi po dang / lha dang / klu dang / gnod sbyin la sogs pa gang la la zhig dga' ldan gyi gnas su skyes pa'i dus kyi tshe/ 'di ltar blta bar bya ste/ dga' ldan yid la byed pas/ de bzhin gshegs pa'i sdom pa blangs nas/ nyi ma gcig gam/ nyi ma bdun gyi bar du/ dge ba bcu yid la byed pa dang / dge ba bcu'i lam la spyod pa'i bsod nams de dag /byams pa'i mdun du bsngo zhing smon lam btab pa de dag ni/ lta ba de dag gi lha'i bu mthong ba dang / pad ma mthong bar 'gyur ro/ /gang la la zhig skad cig tsam byams pa'i ming nas brjod pa'i mi de dag ni/ bskal pa stong nyis brgya'i skye shi las grol zhing / sdig pa 'byang bar 'gyur ro/ /byams pa'i mtshan thos pas thal mo sbyar ba'i mi de dag ni/ bskal pa lnga bcu'i skye shi las thar bar 'gyur ro/ /gang la la zhig byams pa la gus par phyag 'tshal bas/ bskal pa bye ba brgya'i skye shi las grol thar zhing sdig pa byang bar 'gyur ro/ /lha'i gnas la mi chags shing / 61-1-302b ma 'ongs pa'i dus su klu'i sdong po byang chub kyi shing drung du/ bla na med pa'i byang chub kyi lam du sems bskyed pa yang thob par 'gyur ro/ /de skad ces bka' stsal pa dang / 'khor mang po dpag tu med pa stan las langs te/ bcom ldan 'das kyi zhabs la spyi bos phyag 'tshal nas/ byams pa'i zhabs la yang phyag 'tshal nas/ bcom ldan 'das dang / byams pa la lan brgya stong du bskor nas/ lam ma thob pa dag rang rang gi smon lam btab pa/ bdag cag la sogs pas/ lha dang / mi dang / sde brgyad po 'dir bcom ldan 'das kyi spyan sngar mos pas smon lam btab pas/ ma 'ongs pa'i dus su lus spangs nas/ 'phags pa byams pa'i zhal mthong ba dang / thams cad dga' ldan gyi gnam du skye ba thob par gyur cig /bcom ldan 'das kyis bka' stsal pa/ khyed la sogs pa ma 'ongs pa'i dus su bsod nams byed pa dang / tshul khrims bsrung ba dang / thams cad byang chub sems dpa' byams pa'i drung du skye ba blangs nas/ byang chub sems dpa' byams pas byin gyis rlob par 'gyur ro/ /bcom ldan 'das kyis u pA li la bka' stsal pa/ u pA li de lta bur lta ba ni/ yang dag par lta ba zhes bya'o/ /gzhan du lta ba ni/ log par lta ba zhes bya'o/ /de nas tshe dang ldan pa kun dga' bo stan la 'dug pa las langs te/ pus mo btsugs nas thal mo sbyar te/ bcom ldan 'das la 'di skad ces gsol to/ /legs so/ /bcom ldan 'das/ byams pa'i yon tan legs par bshad do/ /ma 'ongs pa'i dus kyi tshe/ bsod nams byed pa'i sems can 'bras bu thob pa bdag cag gis thob par 'tshal bas/ bcom ldan 'das chos kyi rnam grangs 'di'i mtshan ci lags/ bdag cag gis ci ltar gzung bar bgyi/ bcom ldan 'das kyis/ kun dga' bo la bka' stsal pa/ kun dga' bo/ /khyod kyis de bzhin gshegs pas gsungs pa ma brjed par zung la/ ma 'ongs 61-1-303a pa'i don du lha'i gnas su skye ba'i lam 'byed pa dang / byang chub kyi mtshan dang / de bzhin gshegs pa'i gdung rgyun mi gcod pas/ mdo sde'i ming / byang chub sems dpa' byams pa mya ngan las 'das pa zhes kyang bya/ byang chub sems dpa' byams pa dga' ldan gyi gnam du skye ba blangs nas/ byang chub kyi snying po la bskul ba zhes bya bar zung shig /bcom ldan 'das kyis de skad ces bka' stsal nas/ zhing khams gzhan nas 'ongs pa'i byang chub sems dpa' 'bum phrag bcu bzhi'i le'u brgyan pa'i ting nge 'dzin thob par gyur to/ /lha'i bu 'bum phrag brgyad kyis bla na med pa'i byang chub tu sems bskyed nas/ thams cad kyis byams pa'i rjes su 'brang nas/ 'dzam bu'i gling du skye bar smon lam btab bo/ /bcom ldan 'das kyis de skad ces bka' stsal nas/ 'khor bzhi po dang / lha dang / klu la sogs pa/ sde brgyad po/ bcom ldan 'das kyis bka' stsal nas/ thams cad mngon par dga' ste/ bcom ldan 'das la phyag 'tshal nas phyir dong ngo / /'phags pa byang chub sems dpa' byams pa dga' ldan gnam du skye ba blangs pa'i mdo rdzogs so// //zhu ba'i lots+tsha ba ban de pa ba tong dang / ban de shes rab seng ges rgya'i dpe las bsgyur// // |