@##/ /rgya gar skad du/ Ar+ya pra tI t+ya sa muta pA da nA ma ma hA yA na sU tra/ bod skad du/ 'phags pa rten cing 'brel par 'byung ba zhes bya ba theg pa chen po'i mdo/sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das sum cu rtsa gsum gyi lha'i nang na/ ar mo nig lta bu'i rdo leb la rta thul la sogs pa nyan thos chen po rnams dang / 'phags pa byams pa dang / 'phags pa spyan ras gzigs dbang phyug dang / lag na rdo rje la sogs pa byang chub sems dpa' sems dpa' chen po yon tan rin po che dpag tu med pas brgyan pa rnams dang / mi mjed kyi bdag po tshangs pa chen po dang / sred med kyi bu dang / dbang phyug chen po la sogs pa lha rnams dang / lha'i dbang po brgya byin dang / dri za'i rgyal po gtsug phud lnga pa dang thabs cig tu bzhugs te/ de nas byang chub sems dpa' sems dpa' chen po spyan ras gzigs dbang phyug stan las langs te/ bla gos phrag pa gcig tu gzar nas/ pus mo g.yas pa'i lha nga ri rab kyi rtse mo la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das lha 'di dag ni mchod rten bgyid par 'tshal ba sha stag ste/ 'khor gyi dkyil 'khor 'dir mchis na/ ci nas tshangs pa'i 62-1-125b bsod nams 'phel ba dang / lha dang bcas pa bdud dang bcas pa/ tshangs pa dang bcas pa'i 'jig rten na dge sbyong dang bram zer bcas pa'i skye dgu las dge slong dang /dge slong ma dang / dge bsnyen dang / dge bsnyen ma dag bsod nams shin tu mang du 'phel bar 'gyur ba de lta de ltar/ bcom ldan 'das kyis de dag la chos bstan du gsol/ de nas bcom ldan 'das kyis rten cing 'brel par 'byung ba'i tshigs su bcad pa bka' stsal pa/ ye d+harmA he tu pra b+ha bA he tun te ShAn ta thA ga to h+ya ba data/ te ShAny+tsa yo ni ro d+ha e bam bA dI ma hA shra ma NaH/ chos gang rgyu byung de dag gi/ /rgyu dang de 'gog gang yin pa'ang / /de bzhin gshegs pas bka' stsal te/ /dge sbyong chen pos de skad gsungs/ /spyan ras gzigs dbang phyug 'di lta ste/ rten cing 'brel par 'byung ba 'di ni de bzhin gshegs pa rnams kyi chos kyi sku yin te/ sus rten cing 'brel par 'byung ba mthong ba des/ de bzhin gshegs pa mthong ngo / /spyan ras gzigs dbang phyug rigs kyi bu'am/ rigs kyi bu mo dad pa can gang la la zhig gis mi gnas pa'i phyogs su mchod rten ni skyu ru ra'i 'bru tsam/ srog shing ni khab tsam/ gdugs ni ba ku la'i me tog tsam zhig byas la/ rten cing 'brel par 'byung ba chos kyi dbyings kyi tshigs su bcad pa nang du bcug na de tshangs pa'i bsod nams skyed par 'gyur te/'di nas shi 'phos shing 'chi ba'i dus byas nas tshangs pa'i 'jig rten dag tu skye bar 'gyur ro/ /de nas shi 'phos te 'chi ba'i dus byas nas gnas gtsang ma'i ris kyi lha rnams dang skal ba mnyam par skye bar 'gyur ro/ /bcom ldan 'das kyis de skad ces bka' stsal nas/ nyan thos de dag dang / byang chub sems dpa' de dag dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa rten cing 'brel par 'byung ba zhes bya ba theg pa chen po'i mdo rdzogs so// //rgya gar gyi mkhan po su ren+d+ra bo d+hi dang / zhu chen gyi lots+tsha ba ban de ye shes sdes bsgyur cing zhus te gtan la phab pa// // |