@##/ /rgya gar skad du/ Ar+ya swa lpA k+Sha ra pradz+nyA pA ra mi tA nA ma ma hA yA na sU tra/ bod skad du/'phags pa shes rab kyi pha rol tu phyin pa yi ge nyung ngu zhes bya ba theg pa chen po'i mdo/ sangs rgyas dang/ byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la dge slong khri nyis stong lnga brgya'i dge slong gi dge 'dun chen po dang/ byang chub sems dpa' bye ba khrag khrig 'bum phrag du ma dang thabs cig tu bzhugs te/ brgya byin dang/ tshangs pa dang/ 'jig rten skyong ba la sogs pa lha bye ba khrag khrig 'bum gyis yongs su bskor cing mdun gyis bltas te/ dpal gyi snying po'i seng ge'i khri la bzhugs so/ /de nas byang chub sems dpa' sems dpa' chen po 'phags pa spyan ras gzigs dbang phyug stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ 'dzum mul te/ bcom ldan 'das la 'di skad ces gsol to/ /bcom ldan 'das shes rab kyi pha rol tu phyin pa yi ge nyung ngu la bsod nams che ba/ gang thos pa tsam gyis sems can thams cad kyi las kyi sgrib pa thams cad byang bar 'gyur ba dang/ byang chub la nges par gzhol bar 'gyur ba dang/ gang dag sngags sgrub par brtson pa de dag bgegs ma mchis par gsang sngags 'grub par 'gyur ba bshad du gsol/ / 34-1-146b de nas bcom ldan 'das kyis byang chub sems dpa' sems dpa' chen po 'phags pa spyan ras gzigs dbang phyug la legs so zhes bya ba byin te/ rigs kyi bu khyod yun ring por sems can thams cad la phan pa'i phyir brtson pa legs so legs so/ /de'i phyir rigs kyi bu legs par rab tu nyon la yid la zung shig dang/ shes rab kyi pha rol tu phyin pa yi ge nyung ngu la bsod nams che ba gang thos pa tsam gyis sems can thams cad kyi las kyi sgrib pa thams cad byang bar 'gyur ba dang/ byang chub la nges par gzhol bar 'gyur ba dang/ gang dag gsang sngags sgrub par brtson pa de dag bgegs med par sngags 'grub par 'gyur ba ngas khyod la bshad do/ /de nas byang chub sems dpa' sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ /sems can thams cad la sman pa'i slad du bshad du gsol/ de nas bcom ldan 'das kyis de'i tshe sems can thams cad dgrol ba zhes bya ba'i ting nge 'dzin la snyoms par zhugs so/ /mnyam par bzhag pa des smin mtshams kyi mdzod spu'i phrag nas 'od zer 'bum phrag du ma byung ste/ 'od zer de dag gis sangs rgyas kyi zhing thams cad khyab par gyur to/ /sems can gang dag 'od zer des reg pa sems can dmyal ba pa yan chad sems can de dag thams cad bla na med pa yang dag par rdzogs pa'i byang chub tu nges par gyur to/ /sangs rgyas kyi zhing thams cad kyang rnam pa drug tu g.yos so/ /de bzhin gshegs pa'i zhabs kyi drung du lha'i tsan dan gyi phye ma'i char yang phab bo/ /de nas bcom ldan 'das kyis de'i tshe shes rab kyi pha rol tu phyin pa gsungs pa 'di lta ste/ byang chub sems dpas mnyam pa'i sems dang byams pa'i sems dang byas pa gzo ba dang/ sdig pa thams cad dang bral ba'i sems su bya'o/ /shes rab kyi pha rol tu phyin pa'i snying po 'di yang gdon par bya'o/ /de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo/ /tad+ya thA/ oM mu ne mu ne ma hA mu na ye swA hA/ ngas shes rab kyi pha rol tu phyin pa 'di rnyed pas bla na med pa yang dag par rdzogs pa'i byang chub thob bo/ / 34-1-147a sangs rgyas thams cad kyang 'di las byung ngo/ /de bzhin gshegs pa shAkya thub pa chen po las khyod kyis 'di nyid thob pas de'i phyir byang chub sems dpa' sems dpa' chen po rnams kyi mchog tu gyur to/ /khyod de bzhin gshegs pa dgra bcom pa yang dag par rdzogs pa'i sangs rgyas 'od zer kun nas 'phags pa dpal brtsegs rgyal po zhes bya bar 'gyur ro zhes sangs rgyas nyid du lung yang bstan to/ /gang dag khyod kyi ming nyan pa dang/ 'dzin pa dang/ klog pa dang/ gzhan dag la yang rgya cher ston pa dang/ glegs bam du bris nas mchod pa byed pa de dag thams cad ma 'ongs pa'i dus na de bzhin gshegs par 'gyur ro/ /tad+ya thA/ dza ya dza ya/ pad+mA b+he/ a ba me sa ra sa ra Ni/ ng+hi ri d+hi ri/ d+hi ri d+hi ri/ de ba tA nu pA la ne/ bud+d+ha ut+ta ra Ni pU ra ya b+ha ga ba ti/ sarbA sha ma sha ma sarba sa twA nA~M/ sarba karmA ba ra Na bi sho d+ha ya/ bud d+ha a d+hi Sh+ThA ne na swA hA/ don dam par shes rab kyi pha rol tu phyin pa 'di ni sangs rgyas thams cad bskyed pa/ byang chub sems dpa'i yum 'phral du sdig pa 'phrog pa/ byang chub sbyin par byed pa ste/ 'di lta ste/ bskal pa bye ba brgyar yang sangs rgyas thams cad kyis phan yon brjod par mi nus so/ /'di bklags pas dkyil 'khor thams cad du dbang bskur bar 'gyur ro/ /gsang sngags thams cad kyang mngon du 'gyur ro/ /de nas byang chub sems dpa' sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ /bcom ldan 'das ci'i slad du 'di shes rab kyi pha rol tu phyin pa zhes bgyi/ /bcom ldan 'das kyis bka' stsal pa/ thabs sla ba'i phyir te/ sems can gang dag spro ba chung ba de dag shes rab kyi pha rol tu phyin pa 'dzin pa dang/ klog pa dang/ yi ger 'dri ba dang/ yi ger 'drir 'jug pa de dag thams cad thabs sla bas byang chub la gzhol bar 'gyur te/ de'i phyir shes rab kyi pha rol tu phyin pa zhes bya'o/ /de skad ces bka' stsal pa dang/ byang chub sems dpa' sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ /bcom ldan 'das 34-1-147b kyis ji tsam du sems can thams cad la sman pa dang/ sems can bsod nams chung ngu rnams kyi don dang/ sman pa dang/ bde ba'i slad du chos kyi rnam grangs 'di bka' stsal pa/ bcom ldan 'das ngo mtshar to/ /bde bar gshegs pa ngo mtshar to/ /bcom ldan 'das kyis de skad ces bka' stsal nas/ byang chub sems dpa' sems dpa' chen po 'phags pa spyan ras gzigs dbang phyug dang/ dge slong de dag dang/ byang chub sems dpa' de dag dang/ lha dang/ mi dang/ lha ma yin dang/ dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa shes rab kyi pha rol tu phyin pa yi ge nyung ngu zhes bya ba theg pa chen po'i mdo rdzogs so// |