@##//rgya gar skad du/ Ar+ya rA dza a ba bA da ka na ma ma ha yA na sU tra/ bod skad du/ 'phags pa rgyal po la gdams pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te/ de'i tshe yul ko sa la'i rgyal po gsal rgyal bcom ldan 'das la blta ba dang / phyag bya ba dang / mchod pa dang / bsnyen bkur bya ba dang / chos mnyan pa'i phyir rgyal po'i 'byor pa chen po dang / rgyal po'i mthu chen pos rol mo'i sil snyan len pa mang po dang / bram ze dang / khyim bdag brgya stong du mas yongs su bskor cing mnyan du yod pa nas byung ste/ rgyal bu rgyal byed kyi tshal mgon med zas sbyin gyi kun dga' ra ba ga la ba der song nas de bzhon du rung ba'i sa ji srid pa de srid du bzhon pa la zhon te/ bzhon pa las babs nas rkang gis kun dga' ra bar song ba dang / yul ko sa la'i rgyal po gsal rgyal gyis shing zhig gi drung na bcom ldan 'das mdzes pa/ blta na sdug pa/ dbang po zhi ba/ thugs zhi ba/ dul ba dang / zhi gnas mchog brnyes pa/ dul ba dang zhi ba'i mchog dang ldan pa/ bsrungs pa/ dbang po dul ba/ skyes bu glang po/ skyes bu seng ge /skyes bu khyu mchog /skyes bu cang mkhyen pa/ mtsho ltar dang zhing gsal la rnyog pa mi mnga' ba/ skyes bu chen po'i mtshan sum cu rtsa gnyis kyis sku legs par brgyan pa/ dpe byad bzang po brgyad cus sku rnam par mdzes pa/ gser gyi mchod sdong ltar mngon par 'phags pa dpal gyis 'bar zhing bzhugs par rgyang ring po nas mthong ngo / /mthong nas kyang ches yid dga' zhing sems mngon par dad nas des rgyal po rgyal rigs spyi bo nas dbang bskur ba/ yul la dbang ba'i mthu thob pa'i rgyal po'i mtshan ma lnga gang dag yin pa 63-1-78b 'di lta ste/ ze'u ka dang / gdugs dang / ral gri dang / bsil yab nor bu'i yu ba can dang / lham ri mo can de dag bor nas bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te/ bcom ldan 'das la lan gsum bskor ba byas nas bcom ldan 'das kyis gnang ste/ phyogs gcig tu 'dug go/ /de nas yul ko sa la'i rgyal po gsal rgyal gyis bcom ldan 'das la 'di skad ces gsol to/ /bcom ldan 'das ci nas bdag gi yun ring po'i don dang / sman pa dang / bde bar 'gyur ba de ltar bcom ldan 'das kyis bdag la gdams su gsol/ de ltar bde bar gshegs pas bdag la rjes su bstan du gsol/ de skad ces gsol pa dang / bcom ldan 'das kyis yul ko sa la'i rgyal po gsal rgyal la bka' stsal pa/ rgyal po chen po khyod de bzhin gshegs pa la don 'di 'dri bar sems pa legs so legs so/ /rgyal po chen po de'i phyir chos kyis rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par ni mi bya'o/ /de ci'i phyir zhe na/ rgyal po chen po rgyal po'am/ rgyal po'i blon po gang la la zhig chos spangs nas chos ma yin pas rgyal srid byed na de tshe 'di nyid la ya rabs kyis smad par bya ba yin no/ /phyis kyang 'gyod par 'gyur ro/ /lus zhig ste shi nas ngan song ngan 'gro log par ltung ba sems can dmyal ba rnams su skye bar 'gyur ro/ /rgyal po chen po rgyal po'am/ rgyal po'i blon po gang la la zhig chos ma yin pa spangs te/ chos kyis rgyal srid byed kyis/ chos ma yin pas ni mi byed na/ de tshe 'di nyid la ya rabs kyis bsngags par bya ba yin no/ /phyis 'gyod par yang mi 'gyur ro/ /lus zhig nas kyang bde 'gro mtho ris kyi 'jig rten du lha rnams kyi nang du skye bar 'gyur ro/ /rgyal po chen po 'di lta ste/ dper na pha ma ni bu la snying brtse bas rtag tu bde zhing 'tshe ba med par 'dod do/ /rgyal po chen po de bzhin du rgyal pos kyang bran pho dang / bran mo dang / las byed pa 63-1-79a dang / zho shas 'tsho ba dang / mdza' bshes dang / blon po dang / gnyen dang / grong khyer gyi skye bo dag rtag tu bsdu ba rnam bzhis bsdu bar bya'o/ /bzhi gang zhe na/ rgyal po chen po 'di lta ste/ sbyin pa dang / snyan par smra ba dang / don spyod pa dang / don 'thun pa'o/ /de ltar bran phodang / bran mo dang / las byed pa dang / zho shas 'tsho ba dang / mdza' bshes dang / blon po dang / gnyen dang / grong khyer gyi skye bo sdud pa'i rgyal po des don gnyis bsdus shing 'du bar 'gyur ro/ /gnyis gang zhe na/ tshe 'di'i dang / tshe phyi ma'i'o/ /rgyal po chen po de la rgyal po ni pha ma dang mtshungs so/ /bran pho dang / bran mo dang / las byed pa dang / zho shas 'tsho ba dang / mdza' bshes dang / blon po dang / gnyen dang / grong khyer gyi skye bo ni rgyal po'i bu dang / bu mo dang mtshungs so/ /rgyal po chen po 'di lta ste dper na skyes pa'am/ bud med gcig gnyid kyis log pa'i rmi lam na kun dga' ra ba nyams dga' ba dang / ri nyams dga' ba dang / nags tshal nyams dga' ba dang / chu klung nyams dga' ba dang / rdzing bu nyams dga' ba dang / yul nyams dga' ba dang / khang bzangs nyams dga' ba dag mthong ba las de sad na ci yang mi mthong ngo / /rgyal po chen po de bzhin du/ rgyal srid dang / srog dang / rgyal srid kyi bde ba dang / rgyal po'i dbang phyug gi bde ba dang / 'dod pa'i bde ba dang / 'dod pa'i longs spyod kyi bde ba gang yin pa dag kyang rmi lam dang 'dra'o/ /'di lta ste/ glang po che dang / rta dang / shing rta dang / dpung bu chung dang / bud med dang / khang khyim dang / chung ma dam pa dang / gzhon nu dang / blon po dang / rtsis pa dang / blon po chen po dang / sgo ba dang / 'khor dang / pha dang / ma dang / spun dang / sring mo dang / chung ma dang / bu dang / bu mo dang / na tshod dang / bran pho dang / bran mo dang / las byed pa dang / zho shas 'tsho ba dang / mdza' bshes dang / gnyen dang / grong khyer gyi skye bo dang / 'gron bu dang / gser dang / nor bu dang / rin po che dang / mu tig dang / bai dUr+ya dang / dung dang / man shel 63-1-79b dang / byi ru dang / sa le sbram dang / dngul dang / gos dang / rgyan dang / nor dang / 'bru dang / bang ba dang / mdzod la sogs pa de dag thams cad bor nas 'gro dgos so/ /de dag thams cad kyang mi rtag pa/ mi brtan pa/ yid brtan du mi rung ba/ 'gyur ba'i chos can/ yun thung ba/ mi gnas pa/ g.yo ba/ 'gul ba/ 'jig pa/ skad cig pa/ mthar sdig pa/ zad pa dang / dengs pa'i sgo/ mthar 'jig pa'i chos can/ mthar 'gyes pa/ 'jigs pa dang bcas pa/ gnod pa dang bcas pa/ mya ngan dang / 'khrug pa mang ba/ 'drul ba/ 'brul ba/ 'chad pa/ 'bye ba/ 'joms pa/ rnam par 'jig pa'i chos can te/ rgyal po chen po de lta bas na mi rtag par lta zhing zad pa dang dengs pa'i sgo yin par blta bar bya ste 'chi bas 'jigs skrag par bya'o/ /rgyal po chen po khyod chos kho nas rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par ni mi bya'o/ /de ci'i phyir zhe na/ rgyal po chen po 'di lta ste dper na shing rnams las me tog dag byung nas 'bras bu rnams 'byung bar 'gyur ro/ /'bras bu dag tu gyur nas 'bras bu dag kyang yal bar 'gyur ro/ /lo ma sngon por gyur pa las ser por 'gyur ro/ /ser por gyur nas yang thams cad du med par 'gyur ro/ /rgyal po chen po 'di lta ste dper na me'i phung po chen po 'bar ba/ rab tu 'bar ba/ kun tu rab tu mched cing 'bar ba me lce gcig tu gyur pa ji ltar yun ring yang 'bar nas zhi bar 'gyur ro/ /nyi ma dang zla ba 'di ltar rdzu 'phrul che ba/ 'di ltar mthu che ba/ 'di ltar dbang che bar grags pa/ rang gi gzi brjid kyis rnam par mdzes pa 'di gnyis kyang 'jig rten 'di snang bar byas nas nub par 'gyur ro/ /lha'i bu sprin sdud dam/ char 'bebs pa dag 'brug bsgrags/ sgra phyung ste/ nam mkha' khebs par byas nas char gyi rgyun phab kyang char pa tha mar mi snang bar 'gyur ro/ /rgyal po chen po de bzhin du rgyal srid kyi bde ba dang / rgyal po'i dbang phyug gi bde ba dang / 'dod pa'i bde ba dang / 'dod pa'i longs spyod kyi bde ba 63-1-80a rnams kyang rmi lam dang 'dra'o/ /'di lta ste/ glang po che dang / rta pa dang / shing rta dang / dpung bu chung dang / bud med dang / khang khyim dang / chung ma dam pa dang / gzhon nu dang / blon po dang / rtsis pa dang / blon po chen po dang / sgo ba dang / 'khor dang / pha dang / ma dang / spun dang / sring mo dang / chung ma dang / bu pho dang / bu mo dang / na tshod dang / bran pho dang / bran mo dang / las byed pa dang / zho shas 'tsho ba dang / mdza' bshes dang / blon po dang / gnyen dang / grong khyer gyi skye bo dang / 'gron bu dang / gser dang / nor bu dang / rin po che dang / mu tig dang / bai dUr+ya dang / dung dang / man shel dang / byi ru dang / sa le sbram dang / dngul dang / gos dang / rgyan dang / nor dang / 'bru dang / mdzod dang / bang ba la sogs pa de dag thams cad bor nas 'gro dgos so/ / de dag thams cad kyang mi rtag pa/ mi brtan pa/ yid brtan du mi rung ba/ 'gyur ba'i chos can/ yun thung ba/ mi gnas pa/ g.yo ba/ 'gul ba/ mthar 'jig pa/ skad cig pa/ mthar sdig pa/ zad pa dang dengs pa'i sgo/ mthar 'gyes pa'i chos can/ 'jig pa dang bcas pa/ gnod pa dang bcas pa/ mya ngan dang / 'khrug pa mang ba/ 'drul ba/ 'brul ba/ 'chad pa/ 'bye ba/ 'gyes pa/ 'jig pa'i chos can te/ rgyal po chen po khyod kyis mi rtag par blta zhing zad pa dang / dengs pa'i sgor blta bar bya ste/ 'chi bas 'jigs skrag par bya'o/ /chos kyi rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par mi bya'o/ /de ci'i phyir zhe na/ rgyal po chen po 'di lta ste dper na phyogs bzhi nas ri chen po sra ba/ brtan pa/ snying po dang ldan pa/ ma zhig pa/ ma gas pa/ 'phan med pa/ shin tu mkhregs pa/ gcig tu stug pa bzhi gnam la reg cing sa zlog ste/ rtswa dang / shing dang / shing gel pa dang / yal ga dang / lo ma thams cad dang / sems can srog chags 'byung 63-1-80b po thams cad phye mar 'thag cing 'ong ba de dag las ni mgyogs pas 'bros pa'am/ stobs kyis bzlog pa'am/ nor gyis bzlog pa'am/ sngags dang / rdzas dang / sman rnams kyis bzlog par bya bar sla ba ma yin no/ /rgyal po chen po de bzhin du 'jigs pa chen po bzhi po 'di dag 'ong ste/ de dag las mgyogs pas 'bros pa'am/ stobs kyis bzlog pa'am/ nor gyis bzlog pa'am/ rdzas dang / sngags dang / sman rnams kyis bzlog par bya bar sla ba ma yin no/ /bzhi gang zhe na/ rga ba dang / na ba dang / 'chi ba dang / rgud pa'o/ /rgyal po chen po rga ba ni dar la bab pa 'joms shing 'ong / na ba ni nad med pa 'joms shing 'ong / rgud pa ni phun sum tshogs pa thams cad 'joms shing 'ong / 'chi ba ni srog 'joms shing 'ong ste/ de dag las mgyogs pas 'bros pa'am/ stobs kyis bzlog pa'am/ nor gyis bzlog pa'am/ rdzas dang / sngags dang / sman rnams kyis zhi bar bya bar sla ba ma yin no/ /rgyal po chen po 'di lta ste/ dper na ri dgas kyi rgyal po seng ge ri dgas kyi tshogs kyi nang du zhugs nas ri dgas bzung ste/ ji ltar 'dod pa bzhin du bya ba byed do/ /ri dgas de ni stobs po che'i kha mi bzad pas bzung bas dbang med par 'gyur ro/ /rgyal po chen po de bzhin du 'chi bdag gi gsal shing gis zug ste/ rgyags pa dang ni bral/ mgon ni med/ skyabs ni med/ dpung gnyen ni med/ gshis ni 'jig /tshigs ni 'bye 'bral/ sha dang khrag ni skams/ lus ni nad kyis gdungs/ skom ni skom/ bzhin ni 'gyur/ rkang lag ni g.yo ba/ las ni mi nus/ mthu ni med/ kha chu dang / snabs dang / gcin dang / ngan skyugs kyis ni lus la gos/ mig dang / rna ba dang / sna dang / lce dang / lus dang / yid kyi dbang po dag ni 'gags/ skyigs bu ni 'byung / sgra ngar ngar po ni 'thon/ sman pas ni bor/ sman dang / kha zas dang / bza' ba dang / thug pa thams cad kyis ni gles la bor te/ 'gro ba gzhan dag tu 'gro bar mal gyi tha ma la ni nyal/ thog ma med pa'i skye ba dang / rga ba 63-1-81a dang / na ba dang / 'chi ba'i 'khor ba'i rgyud du ni nub/ srog ni cung zad cig las gshin rje'i mis ni 'jigs skrag /byur gyi dbang du ni song / dbugs rgyu ba ni chad/ kha dang sna ni gdangs/ so ni gtsigs/ sbyin pa sbyin no zhes de skad gsol ba ni 'debs/ las kyi srid pa nas yang srid pa la ni 'jug /gcig pu gnyis su med cing grogs ni med/ 'jig rten 'di ni 'dor/ 'jig rten pha rol du ni 'gro/ /skyas chen po ni 'degs/ mun pa chen por ni zhugs/ g.yang sa chen por ni lhung / khrod stug por ni 'jug /dgon pa chen por ni 'gro/ rgya mtsho chen pos ni khyer/ las kyi rlung gis ni bdas/ sa tshugs med pa'i phyogs su ni 'gro/ g.yul ngo chen por ni 'jug /gdon chen pos ni zin/ nam mkha' la ni 'chel/ pha ma dang / phu nu dang / sring mo dang / bu dang bu mos ni bskor/ dbugs ni 'chad/ nor bgo bsha' bya zhes ni zer/ kyi hud ma/ kyi hud pha/ kyi hud bu zhes ni zer/ skra ni zhig ste/ sbyin pa dang / dka' thub dang / chos 'ba' zhig grogs su gyur pa na/ chos ma gtogs par skyabs gzhan med/ mgon gzhan med/ gnas gzhan med/ dpung gnyen gzhan med do/ / rgyal po chen po de'i tshe de'i dus na chos ni gling dang / gnas dang / mgon dang / rton par 'gyur ro/ /rgyal po chen po 'di lta ste dper na grang bas nyen pa la me dang / mes rab tu gdungs par gyur pa la me gsod pa dang / tsha bas nyen pa la bsil ba dang / 'gron po ngal ba la ni grib ma dang / rlung bsil ba dang / skom pa la chu bsil ba dang / lam du zhugs pa la bzhon pa dang / nyal ba la mal 'jam po dang / skom pa la chu grang mo dang / shin tu bkres pa la zas bzang po dang / mya ngan gyis non pa la dbugs 'byin pa dang / gdungs pa la sim par byed pa dang / dgon par lam stor ba la lam mtshon pa dang / nad kyis btab pa la sman pa dang / sman dang / nad g.yog byed pa dang / chus khyer ba la gzings dang / 'dam du bying ba la 'jus dang / rgal dka' ba la zam pa dang / nyam nga ba la 'bab 63-1-81b stegs dang / mun khung na sgron ma dang / rgya mtsho chen po la gru dang / lhags pas nyen pa la rlung med pa'i gnas dang / yul gzhan du song ba la lam rgyags dang / dbul po la nor dang / byed par 'dod pa la grogs dang / gcad par 'dod pa la lag cha dang / gzhig par 'dod pa la rdo rje dang / g.yul ngor zhugs pa la go cha dang / 'jigs pa la stobs dang ldan pa'i grogs dang / 'thab pa la dpung gnyen dang / dog pa la go 'byed pa dang / mu ge la nor dang ldan pa dag mgon dang / skyabs dang / gnas dang / rten du gyur pa de bzhin du rgyal po chen po 'chi bdag gi gsal shing gis zug ste/ rgyags pa dang ni bral/ mgon ni med/ skyabs ni med/ dpung gnyen ni med/ gshis ni 'jig /tshigs ni 'bye 'bral/ sha dang khrag ni skams/ lus ni nad kyis gdungs/ skom ni skom/ bzhin ni 'gyur/ rkang lag ni g.yo ba/ las ni mi nus/ mthu ni med/ kha chu dang / gcin dang / ngan skyugs kyis ni lus la gos/ mig dang / rna ba dang / sna dang / lce dang / lus dang / yid kyi dbang po dag ni 'gags/ skyigs bu ni 'byung / sgra ngar ngar po ni 'thon/ sman pas ni bor/ sman dang / kha zas dang / bza' ba dang / zas dang / thug pa thams cad kyis ni gles la bor te/ 'gro ba gzhan du 'gro bar mal gyi tha ma la ni nyal/ thog ma med pa'i skye ba dang / rga ba dang / na ba dang / 'chi ba'i 'khor ba'i rgyud du ni nub/ srog ni cung zad cig las/ gshin rje'i mis ni 'jigs skrag /byur gyi dbang du ni song / dbugs rgyu ba ni 'chad/ kha dang sna ni gdangs/ so ni gtsigs/ sbyin pa sbyin no zhes de skad gsol ba ni 'debs/ las kyis srid pa nas yang srid pa la ni 'jug /gcig pu gnyis su med cing grogs ni med/ 'jig rten 'di ni 'dor/ 'jig rten pha rol du ni 'gro /skyas chen po ni 'degs/ mun pa chen por ni zhugs/ g.yang sa chen por ni lhung / khrod stug por ni 'jug /dgon pa chen por ni 'gro/ rgya mtsho chen pos ni 63-1-82a khyer/ las kyi rlung gis ni bdas/ sa tshugs med pa'i phyogs su ni+i 'gro ba na/ chos ma gtogs par mgon gzhan med/ skyabs gzhan med/ dpung gnyen gzhan med do/ /rgyal po chen po chos ni de'i tshe de'i dus na gling chen po dang / gnas dang / mgon dang / skyabs dang / dpung gnyen dang / rton par 'gyur ro/ /rgyal po chen po de'i tshe 'di snyam du sems te/ kyi hud gang du 'gro bar 'gyur/ phyogs gang du 'gro bar 'gyur/ gang du yongs su 'dzin par byed par 'gyur/ bdag gi mar ni su zhig 'gyur snyam pa las/ des sems can dmyal bar skye bar mthong bar gyur na/ 'di lta ste/ mnar med pa dang / tsha ba dang / rab tu tsha ba la sogs pa'i sems can dmyal ba rnams su lo mang po/ lo brgya phrag mang po/ lo stong phrag mang por sdug bsngal chen po/ sdug bsngal mi bzad pa/ drag po/ rtsub pa/ yid du mi 'ong ba'i tshor ba myong ste/ ji srid du sems can dmyal ba myong bar 'gyur ba'i sdig pa mi dge ba'i las yong thams cad du zad cing byang bar ma gyur pa/ de srid du 'chi ba'i dus byed par mi 'gyur ro/ /de dud 'gro'i skye gnas su skye bar mthong bar gyur na 'di lta ste/ rgya mtsho chen po'i nang du nya rlon dang / nya rlon mid la sogs pa srog chags gcig gis gcig gsod pa dang / 'tshe ba dang / dbang med par skye'o/ /bdag yi dgas kyi nang du skye bar mi 'gyur ram snyam na 'di lta ste/ lo mang po dang / lo brgya phrag mang po dang / lo stong phrag mang por chu'i sgra yang mi thos na mthong ba lta ci smos par 'gyur ro/ /rgyal po chen po de lta bas na khyod kyis mi rtag par blta zhing zad pa dang dengs par blta bar bya ste 'chi bas 'jigs skrag par bya'o/ /chos kyis rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par ni mi bya'o/ /de ci'i phyir zhe na/ rgyal po chen po khyod kyi lus 'di 'di ltar legs par yongs su bsrungs legs par yongs su btsas pa yang 'chi ba'i dus byed par 'gyur ro/ /yon tan thams cad dang ldan zhing shin tu yun ring por 63-1-82b bza' ba dang / bca' ba dang / myang ba dang / ngoms par 'gyur ba/ bsod pa gtsang ma mang pos tshim par byas te bskyed bskyed pa yang tha ma'i mal na 'dug pa'i tshe sman pas bor zhing / sman dang / kha zas dang / bza' ba dang / thug pas kyang gles la bor nas/ bkres pa dang / skom pas nyen cing yid mi bde bar 'chi ba'i dus byed par 'gyur ro/ /rgyal po chen po 'di ltar khyod kyis lus bkrus shing bskus te/ bdug pas bsgos/ me tog gi dri zhim po bsgos kyang gdon mi za bar dus su rang bzhin gyis lhan cig skyes pa'i dri nga ba 'byung bar 'gyur ro/ / rgyal po chen po 'di ltar yul ka shi ka'i ras dang / mon dar dang / du gu la'i ras dang / dar dang / 'dab ma dang / bal gos dang / sa ras la sogs pa'i gos kyi bye brag gis g.yogs kyang tha ma'i mal na 'dug pa'i tshe snum rnam pa mang po dang / chus reg cing gos dri ma can gyon cing 'chi ba'i dus byed par 'gyur ro/ /rgyal po chen po de ltar khyod khyim na bud med kyi nang na 'dug btsun mo'i 'khor gyi nang na 'dug ste/ bud med kyi tshogs kyis bskor cing / gar dang / glu dang / rol mo'i sil snyan byed/ pheg rdob pa dang / pi bang dang / gling bu len/ rnga brdung zhing yid bde bar rtse dga' ste/ dga' mgur spyod pa yang 'chi bas 'jigs skrag nas shin tu yid mi bde zhing 'chi ba'i dus byed par 'gyur ro/ /rgyal po chen po de ltar khyod khyim gyi nang na spos dri zhim po'i bsku bas ni bskus/ gtan pa ni bcug /skar khung ni legs par bcad/ byug pa mang pos ni byugs/ 'bru mar dri zhim po dang ldan pa'i mar me ni 'bar/ dar gyi lda ldi mang po ni bres/ me tog dri zhim po'i sil ma mang pos ni chal par bkang / pog por nas ni bdugs/ khri'i rtsa ba gser dang / dngul dang / bai dUr+ya las ni byas/ pa ti ka dang / dri'u rngog gi stan dang / stan nang tshangs can dang / za 'og gi stan dang / yul ka ling ka pa'i stan dang / steng du gding ba dang / de'i steng du gding bas ni bkab/ g.yas g.yon du dar dmar po'i sngas 63-1-83a ni bzhag pa'i khri la nyal ba yang bya rog dang / bya rgod dang / wa dang / ro dang / sha dang / rus pa dang / skra dang / khrag dang / zhag dang / chu ser dang / rnag gi gnas mchog tu 'jigs su rung ba'i dur sa chen por bor nas/ lus g.yo ba med cing sa la nyal du gdon mi za'o/ /rgyal po chen po 'di ltar yang khyod glang po che'i bya la kha'am/ rta'i rgyab bam/ shing rta la zhon te/ dung dang / rnga dang / rdza rnga dang / khar rnga dang / rol mo sil snyan gyi bye brag len pa dang / gdugs dang / rgyal mtshan dang / ba dan dang / rnam par rgyal ba'i ba dan ni bsgreng / bsil yab nor bu'i yu ba can dang / rnga yab dang / shing ta la las byas pa ni g.yob cing / glang po che dang / rta pa dang / dpung bu chung du ma ni phyi bzhin 'brang / rgyal bu dang / bram zes bslab pa phog pa'i blon po dang / mdun na 'don dang / skye bo thal mo sbyar ba brgya stong du mas ni phyag bya zhing rgyal b.rasbyon cig /rgyal bar spyon cig ces snyan par rjod de phyir 'byung ba yang ring po mi thogs par g.yo ba med cing mal du shi nas mi bzhis bteg ste/ pha dang / ma dang / phu nu dang / sring mo dang / chung ma dang / bu pho dang / bu mo dang / bran pho dang / bran mo dang / las byed pa dang / zho shas 'tsho ba dang / tshal za dang / blon po dang /grong khyer ba'i skye bo dag mya ngan gyi dbang du song ste/ lag pa btegs nas brang rdung zhing mchog tu snying rje bar kyi hud bu/ kyi hud mgon po/ kyi hud pho bo/ kyi hud jo bo zhes ngu zhing zhabs 'bring ba dang / grong khyer ba'i skye bo dag gis 'jigs pa dang bcas par mthong ste/ grong khyer gyi lho phyogs kyi sgor phyung nas sa'i 'og tu bcug gam/ 'brog dgon par sa'i 'og tu bcug kyang rung / bya rog dang / bya rgod dang / wa la sogs pas zos shing rus pa de dag mes bsregs sam/ chur skyur ram/ sa'i 'og tu bcug kyang rlung dang / nyi ma dang / char pas phye mar byas te/ phyogs phyogs su 'thor zhing / de nyid du rul bar 'gyur ro/ /rgyal po chen po de ltar sems can thams cad kyi lus kyang 'di bzhin du 'gyur ro/ /rgyal 63-1-83b po chen po 'du byed thams cad ni de ltar mi rtag pa/ de ltar mi brtan pa/ de ltar yid brtan du mi rung ba/ de ltar 'gyur ba'i chos can te/ yun thung ba/ mi gnas pa/ g.yo ba/ 'gul ba/ skad cig pa/ mthar sdig pa zad pa dang / dengs pa'i sgo/ mthar 'gyes pa/ 'jigs pa dang bcas pa/ gnod pa dang bcas pa/ mya ngan dang 'khrug pa mang ba/ 'drul ba/ 'brul ba/ 'chad pa/ 'bye ba/ 'thor ba/ rnam par 'jig pa'i chos can no/ /rgyal po chen po de lta bas na mi rtag par blta zhing zad pa dang / dengs pa'i sgor blta bar bya ste/ 'dod chags kyis ma chags pa dang / zhe sdang gis mi sdang ba dang / gti mug gis ma rmongs pa dang / rgyal srid kyi dbang phyug gi bde ba la ma chags pa dang / 'dod pa'i bde ba dang / 'dod pa'i longs spyod kyi bde ba la ma chags pa dang / mi rtag par lta ba dang / bag yod pa dang / ma chags pa dang / mi brkam pa dang / ma zhen pa dang / ma mos pa dang / srog snyems pa med par 'chi bas 'jigs skrag par bya'o/ /chos kho nas rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par ni mi bya'o/ /de ci'i phyir zhe na/ rgyal po chen po 'dod pa'i rnyed pa dang / rab tu rnyed pa dang / sogs pa dang / kun tu sogs pa dang / sten pas 'dod pa dag gis ngoms par nga mi smra ste/ gang dag 'phags pa'i shes rab kyis ngoms par 'gyur ba de dag ni ngoms so/ /rgyal po chen po 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 63-1-84a 'gyur te/ de ltar sdug bsngal gyi phung po chen po 'ba' zhig 'di yang 'byung bar 'gyur ro/ /de la ma rig pa 'gags pas 'du byed 'gag /'du byed 'gags pas rnam par shes pa 'gag /rnam par shes pa 'gags pas ming dang gzugs 'gag /ming dang gzugs 'gags pas skye mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag /sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag par 'gyur te/ de ltar sdug bsngal gyi phung po chen po 'ba' zhig 'di yang 'gag par 'gyur ro/ /rgyal po chen po de lta bas na/ 'dod chags kyis ma chags pa dang / zhe sdang gis mi sdang ba dang / gti mug gis ma rmongs pa dang / rgyal srid kyi dbang phyug dang / dbang gi dregs pa med par chos kho nas rgyal srid gyis shig /chos ma yin pas ni mi bya'o/ /khyod chos dang 'thun par gyis shig /chos ma yin pa dang 'thun par ni mi bya'o/ /de ci'i phyir zhe na/ rgyal po chen po 'dod pa rnams kyi rnyed pa dang / rab tu rnyed pa dang / ngoms par mi 'gyur ba'i bar dung smra ste/ rab tu ngoms par mi 'gyur ro/ /zhes nga smra'o/ /gang dag 'phags pa'i shes rab kyis ngoms par gyur pa de dag ni ngoms so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /mi nyid 'di ni 'gro bar 'gyur/ /'chi bdag rab tu mi bzad 'ong / /khyod kyi tshe 'di mi brtan gyis/ /rgyal po bag med ma byed cig /nor ni gtang gi lus ni bsrung bar bya/ /yan lag gtang gi srog ni bsrung bar bya/ /nor dang yan lag rnams dang de bzhin srog /thams cad gtang gi 'dir ni chos bsrung ngo / /chos spyod pa ni chos la srung bar byed/ /dper na dbyar dus gdugs chen bsrung ba bzhin/ /chos spyod pa yi phan yon 'di 63-1-84b yin te/ /chos spyod pa ni ngan 'gror mi 'gro'o/ /chos ma yin pa spyod cing bag med pa/ /'di nas shi 'phos ngan 'gro mi bzad 'gro/ /gang du gnas na 'chi bas mi tshugs pa/ /sa phyogs de ni yod pa ma yin te/ /bar snang ma yin rgya mtsho'i nang ma yin/ /ri yi phug tu zhugs kyang mi phan no/ /'chi bas 'jigs pa chen po de dag ni/ /phung po 'jig cing srog 'gag shes gyis la/ /'chi med thob par khyod ni mos par gyis/ /mya ngan 'das thob phyin chad 'chi mi 'gyur/ /bcom ldan 'das kyis de skad ces bka' stsal nas/ yul ko sa la'i rgyal po gsal rgyal dang / srog chags brgyad khri bzhi stong po de dag dang / lha dang / mi dang / lha ma yin dang / nam mkha' lding dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa rgyal po la gdams pa zhes bya ba theg pa chen po'i mdo/ rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo ts+tsha ba ban de ye shes sdes bsgyur cing zhus te/ skad gsar chad kyis kyang bcos nas gtan la phab pa// // |