@##/ /rgya gar skad du/ tsa tur d+harma ka sU tra/ bod skad du/ chos bzhi pa'i mdo/sangs rgyas dang byang chub sems 66-1-60a dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te/ de nas bcom ldan 'das kyis brtan cing zab la snyan cing rgya che ba'i sgra dbyangs kyis dge slong rnams la bka' stsal pa/ dge slong dag rigs kyi bu mkhas pas ji srid 'tsho'i bar du gnas bzhi la yid brtan par mi bya'o/ /bzhi gang zhe na/ dge slong dag rigs kyi bu mkhas pas bdag ni bud med dag la dga' ba'o snyam du ji srid 'tsho'i bar du yid brtan par mi bya ba dang / dge slong dag rigs kyi bu mkhas pas bdag ni rgyal po'i pho brang 'khor la dga' ba'o snyam du ji srid 'tsho'i bar du yid brtan par mi bya ba dang / dge slong dag rigs kyi bu mkhas pas bdag ni gzugs bzang ba mdzes pa blta na sdug pa nad nyung ba'o snyam du ji srid 'tsho'i bar du yid brtan par mi bya ba dang / dge slong dag rigs kyi bu mkhas pas bdag ni phyug pa/ nor mang ba/ yo byad phun sum tshogs pa'o snyam du ji srid 'tsho'i bar du yid brtan par mi bya'o/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad ces bka' stsal to/ /bud med brten du ga la rung / /rgyal po'i pho brang ga la dga'/ /dbu ba'i snying po ga la yod/ /longs spyod rtag pa ga la yin/ /longs spyod dag ni 'bab chu bzhin/ /gru ci 'dra bar khyim de 'dra/ /me tog ci 'dra gzugs de bzhin/ /srog ni chu bur 'dra ba yin/ /bcom ldan 'das kyis de skad ces bka' stsal nas/ dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //chos bzhi pa'i mdo rdzogs so/ / |