@#/ /rgya gar skad du/ mA yA dzA laM nA ma ma ha sU traM/ bod skad du/ mdo chen po sgyu ma'i dra ba zhes bya ba/dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal/ mgon med zas sbyin gyi kun dga' ra ba na bzhugs so/ /de nas bcom ldan 'das kyis dge slong rnams la bka' stsal pa/ dge slong dag lhag pa'i tshul khrims kyi bslab pa yod la/ lhag pa'i sems med cing / lhag pa'i shes rab med pa dang / lhag pa'i tshul khrims dang / lhag pa'i sems kyi bslab pa yod la/ lhag pa'i shes rab med pa yang yod de/ 'phags pa nyan thos lhag pa'i shes rab la brtson pa'i rjes su sbyor ba la gnas na lhag pa'i tshul khrims dang / lhag pa'i sems kyi bslab pa'i bsgom pa yongs su rdzogs par 'gyur te/ dge slong dag de ltar na/ 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /dge slong dag ji ltar na 'phags pa nyan thos lhag pa'i shes rab la sbyor bar rjes su zhugs pa la gnas pa/ shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni bdag sngon mig gis rnam par shes par bya ba'i gzugs yid bde ba'i gnas lta bu dag la ni rjes su chags shing gnas par gyur la/ mig gis rnam par shes par bya ba'i gzugs yid mi bde ba'i gnas lta bu dag la ni khong khro ba dang ldan zhing gnas par gyur/ mig gis rnam par shes par bya ba'i gzugs btang snyoms kyi gnas lta bu dag la ni so sor brtags pa ma yin/ so sor brtags pa ma yin pa'i btang snyoms su gnas par 'gyur te/ de ltar bdag yun ring bo nas 'di la rjes su slob cing rjes su byed pa na rga ba dang / 'chi ba nyams su myong zhing / sngon gyi mtha' mi mngon 71-1-230b par gyur pas/ bdag gis da ni mig gis rnam par shes par bya ba'i gzugs dag la sngon ji lta ba de ltar bslab par mi bya zhing / bdag gis mig gis rnam par shes par bya ba 'das pa dang / ma 'ongs pa dang / da ltar byung ba'i gzugs dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni mig gis rnam par shes par bya ba'i gzugs de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la/ de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de de ltar na 'di la sems can rnams yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing / nges par 'byung ba rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam/ bram ze gang dag kha cig mig gis rnam par shes par bya ba'i gzugs 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni mig gis rnam par shes par bya ba'i gzugs yid bde ba'i gnas lta bu dag la rjes su chags shing gnas te/ dge sbyong dang bram ze brnab sems kyi tshogs kyi mdud pas kun nas sun phyung ba/ 71-1-231a rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam bram ze gang dag kha cig mig gis rnam par shes par bya ba'i gzugs 'di dag nyid bden pa dang gnas pa'i sgo nas ma mthong zhing ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni mig gis rnam par shes par bya ba'i gzugs yid mi bde ba'i gnas lta bu dag la khong khro ba dang ldan par gnas te/ dge sbyong dang bram ze gnod sems kyi tshogs kyi mdud pas kun nas sun phyung ba/ khong khro ba'i kun du sbyor ba dang ldan pa de dag kyang bdud sdig can ji ltar 'dod pa bzhin du byed du 'jug pa yin no/ /dge slong dag dge sbyong ngam bram ze gang dag kha cig mig gis rnam par shes par bya ba'i gzugs 'di dag nyid bden pa dang gnas pa'i sgo nas ma mthong zhing ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni mig gis rnam par shes par bya ba'i gzugs btang snyoms kyi gnas lta bu dag la so so so sor brtags pa ma yin pa'i btang snyoms su gnas te/ dge sbyong ngam bram ze 'di bden no snyam du mngon par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na mi smyon pa sems g.yengs pa ni gcer bur de dang de dag tu 'khyam par byed cing / de des mngon par dga' bar byed la/ de la nyes dmigs su ma mthong ba las gang gi tshe des rang gi sems phyir thob pa de'i tshe de sngon gyi smyon pa'i spyod pa dang / sems g.yengs pa'i spyod pa dang / gcer bu'i spyod pa pa des gdung bar byed/ ngo tsha bar byed/ gnong bar byed cing / rnam par smod par byed do/ /dge slong dag de bzhin du 'phags pa nyan thos thos pa dang ldan pa 71-1-231b yang / 'phags pa'i 'jig rten las 'das pa'i shes rab 'di nyid thob nas sngon gyi byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing / rnam par smod par byed la/ de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar na bdag ni sngon mi rtag pa la rtag par 'du shes pa dang / sdug bsngal ba la bde bar 'du shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na sgyu ma mkhan nam sgyu ma mkhan gyi slob ma mkhas pa zhig lam po che'i bzhi mdor 'dug ste/ sgyu ma rnam pa bzhi po 'di lta ste/ glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs dag byas te/ rnam par bstan par gyur na/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs gang snang ba 'di ni bden pa dang gnas pa'i sgo nas yod do snyam du sems so/ /sems can byis pa'i rang bzhin can ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs dag snang ba 'di ni bden pa dang gnas pa'i sgo nas yod pa ma yin te/ sgyu mar byas pa 'di 'ba' zhig yod do/ /mig slu bar byed pa 'di 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang ldan pa yang bdag gi mig gis rnam par shes par bya ba 'das pa dang / ma 'ongs 71-1-232a pa dang / da ltar byung ba'i gzugs gang dag yin pa 'di dag la rtag pa nyid dam/ brtan pa nyid dam/ ther zug nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin nyid dam/ yang dag pa nyid dam/ bden pa nyid dam/ de kho na nyid dam/ ji lta ba bzhin nyid dam/ ma nor ba nyid dam/ phyin ci ma log pa nyid med de/ gsog kyang de nyid yin la/gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs kyi/ bcom ldan 'das kyis gsungs pa 'phags pa 'jig rten las 'das pa ni bden no zhes de ltar so sor rtog par byed do/ /des de ltar shes nas mig gis rnam par shes par bya ba 'das pa dang / ma 'ongs pa dang / da ltar byung ba'i gzugs nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /des mig gis rnam par shes par bya ba 'das pa dang / ma 'ongs pa dang / da ltar byung ba'i gzugs rnams nad du yang dag par rjes su mthong zhing / 'bras dang zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ba na de mig gis rnam par shes par bya ba 'das pa dang / ma 'ongs pa dang / da ltar byung ba'i gzugs dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing 71-1-232b mchog tu 'dzin pa'i tshogs kyi mdud pa gang dag yin pa de dag spong bar byed do/ /de dag spangs pa'i phyir bdud ldongs pa dang / yi chad pa dang / phyogs med par byas te gnas shing bdud sdig can gyis mi mthong bar song nas bdud dang bdud kyi 'khor bcom zhing g.yul chen po'i g.yul sprad de/ g.yul las rnam par rgyal ba dang / g.yul ngo de nyid mngon par pham par byas shing gnas te/ de ltar na 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ / dge slong dag yang ji ltar na 'phags pa nyan thos lhag pa'i shes rab la sbyor bar rjes su zhugs pa la gnas pa/ shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni/ bdag sngon rna bas rnam par shes par bya ba'i sgra yid bde ba'i gnas lta bu dag la ni rjes su chags shing gnas par 'gyur la/ rna bas rnam par shes par bya ba'i sgra yid mi bde ba'i gnas lta bu dag la ni khong khro ba dang ldan zhing gnas par gyur/ rna bas rnam par shes par bya ba'i sgra btang snyoms kyi gnas lta bu dag la ni so sor brtags pa ma yin/ so sor brtags pa ma yin pa'i btang snyoms su gnas par gyur te/ de ltar bdag yun ring po nas 'di la rjes su slob cing rjes su byed pa na rga ba dang / na ba dang / 'chi ba nyams su myong zhing / sngon gyi mtha' mi mngon par gyur pas/ bdag gis da ni rna bas rnam par shes par bya ba'i sgra dag la sngon ji lta ba de ltar bslab par mi bya zhing bdag gis rna bas rnam par shes par bya ba 'das pa dang / ma 'ongs pa dang / da ltar byung ba'i sgra dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen 71-1-233a cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing / de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni rna bas rnam par shes par bya ba'i sgra de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la/ de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de ltar na 'di la sems can rnams yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing nges par 'byung ba rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam/ bram ze gang dag kha cig rna bas rnam par shes par bya ba'i sgra 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni rna bas rnam par shes par bya ba'i sgra yid bde ba'i gnas lta bu dag la rjes su chags shing gnas te/ dge sbyong dang bram ze brnab sems kyi tshogs kyi mdud pas kun nas sun phyung ba/ rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam bram ze gang dag kha cig rna bas rnam par shes par bya ba'i sgra 'di dag nyid bden pa dang / gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni rna bas rnam par shes par bya ba'i sgra yid mi bde ba'i gnas lta bu dag la khong khro ba dang ldan par gnas te/ dge sbyong dang bram ze gnod sems kyi tshogs 71-1-233b kyi mdud pas kun nas sun phyung ba khong khro ba'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam bram ze gang dag kha cig rna bas rnam par shes par bya ba'i sgra 'di dag nyid bden pa dang / gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni rna bas rnam par shes par bya ba'i sgra btang snyoms kyi gnas lta bu dag las so sor brtags pa ma yin/ so sor brtags pa ma yin pa'i btang snyoms su gnas te/ dge sbyong dang / bram ze 'di bden no snyam du mngon par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na mi smyon pa'am/ chang gis ra ro bar gyur pa ni ma dang lhan cig nyal po byed cing / de des mngon par dga' bar byed la/ de la nyes dmigs su ma mthong ba las gang gi tshe de smyos pa'am/ ra ro ba sangs par gyur pa de'i tshe ma dang lhan cig nyal po byas pa des gdung bar byed/ ngo tsha bar byed/ gnong bar byed cing / rnam par smod par byed do/ /dge slong dag de bzhin du 'phags pa nyan thos thos pa dang ldan pa yang 'phags pa 'jig rten las 'das pa'i shes rab 'di nyid thob nas sngon gyi byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing / rnam par smod par byed la/ de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar na bdag ni sngon mi rtag pa la rtag par 'du shes pa dang / sdug bsngal ba la bde bar 'du 71-1-234a shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na chu klung gi 'gram mam yur po che'i 'gram na sgra brnyan gyi sgra grag par gyur na/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ gang las sgra 'di grag pa'i sems can de ni bden pa dang / gnas pa'i sgo nas yod do snyam du sems so/ /sems can byis pa'i rang bzhin ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ gang las sgra 'di grag pa'i sems can de ni bden pa dang / gnas pa'i sgo nas yod pa ma yin te/ sgra brnyan 'di 'ba' zhig yod de/ rna ba slu bar byed pa 'di 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang ldan pa yang bdag gis rna bas rnam par shes par bya ba 'das pa dang / ma 'ongs pa dang / da ltar byung ba'i sgra gang dag yin pa 'di dag la rtag pa nyid dam/ brtan pa nyid dam/ ther zug nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin nyid dam/ yang dag pa nyid dam/ bden pa nyid dam/ de kho na nyid dam/ ji lta ba de bzhin nyid dam/ ma nor ba nyid dam/phyin ci ma log pa nyid med de/ gsog kyang de nyid yin la/ gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs kyi/ bcom ldan 'das kyis gsungs pa 'phags pa 'jig rten las 'das pa ni bden no zhes de ltar so sor 71-1-234b rtog par byed do/ /des de ltar shes nas rna bas rnam par shes par bya ba 'das pa dang / ma 'ongs pa dang / da ltar byung ba'i sgra rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /des rna bas rnam par shes par bya ba 'das pa dang / ma 'ongs pa dang / da ltar byung ba'i sgra rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ba na/ de'i rna bas rnam par shes par bya ba 'das pa dang / ma 'ongs pa dang / da ltar byung ba'i sgra dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang yin pa de dag spong bar byed do/ /de dag spangs pa'i phyir bdud ldongs pa dang / yi chad pa dang / phyogs med par byas te/ gnas shing bdud sdig can gyis mi mthong bar song nas bdud dang bdud kyi 'khor bcom zhing g.yul chen po'i g.yul sprad de/ g.yul las rnam par rgyal ba dang / g.yul ngo de nyid mngon par pham par byas shing gnas te/ de ltar na 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /dge slong dag yang ji ltar na 'phags pa nyan thos lhag pa'i shes rab la sbyor bar rjes su zhugs pa la gnas pa/ shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni bdag sngon snas rnam par shes par bya ba'i dri yid bde ba'i gnas lta bu dag la ni 71-1-235a rjes su chags shing gnas par gyur la/ snas rnam par shes par bya ba'i dri yid mi bde ba'i gnas lta bu dag la ni khong khro ba dang ldan zhing gnas par gyur/ snas rnam par shes par bya ba'i dri btang snyoms kyi gnas lta bu dag la ni so sor brtags pa ma yin so sor brtags pa ma yin pa'i btang snyoms su gnas par gyur te/ de ltar bdag yun ring po nas 'di la rjes su slob cing / rjes su byed pa na/ rga ba dang / 'chi ba nyams su myong zhing / sngon gyi mtha' mi mngon par gyur pas bdag gis da ni snas rnam par shes par bya ba'i dri dag la sngon ji lta ba de ltar bslab par mi bya zhing / bdag gi snas rnam par shes par bya ba 'das pa dang / ma 'ongs pa dang / da ltar byung ba'i dri dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing / de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni snas rnam par shes par bya ba'i dri de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de ltar na 'di la sems can rnams yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing / nges par 'byung bar rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam bram ze gang dag kha cig snas rnam par shes par bya ba'i dri 'di dag nyid bden pa dang / gnas pa'i sgo nas ma 71-1-235b mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni snas rnam par shes par bya ba'i dri yid bde ba'i gnas lta bu dag la rjes su chags shing gnas te/ dge sbyong dang / bram ze brnab sems kyi tshogs kyi mdud pas kun nas sun phyung ba/ rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig snas rnam par shes par bya ba'i dri 'di dag nyid bden pa dang / gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni snas rnam par shes par bya ba'i dri yid mi bde ba'i gnas lta bu dag la khong khro ba dang ldan par gnas te/ dge sbyong dang / bram ze gnod sems kyi tshogs kyi mdud pas kun nas sun phyung ba/ khong khro ba'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ / dge slong dag dge sbyong ngam/ bram ze gang dag kha cig snas rnam par shes par bya ba'i dri 'di dag nyid bden pa dang / gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni snas rnam par shes par bya ba'i dri btang snyoms kyi gnas lta bu dag la so sor brtags pa ma yin pa'i btang snyoms su gnas te/ dge sbyong dang / bram ze 'di bden no snyam du mngon par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na mi zhig gi phyi thog thag tu gshed ma phyir rgol ba dgra bo zhig rjes su 'brang bar gyur cing / de de la mngon par 71-1-236a dga' bar byed la/ de la nyes dmigs su ma mthong ba las gang gi tshe de so sor rtog par byed pa na/ 'di ni bdag gi gshed ma phyir rgol ba dgra bo yin no zhes shes par gyur pa de'i tshe/ des de gdung bar byed/ ngo tsha bar byed/ gnong bar byed cing / rnam par smod par byed do/ /dge slong dag de bzhin du 'phags pa nyan thos thos pa dang ldan pa yang 'phags pa 'jig rten las 'das pa'i shes rab 'di nyid thob nas sngon byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing / rnam par smod par byed la/ de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar bdag ni sngon mi rtag pa la rtag par 'du shes pa dang / sdug bsngal ba la bde bar 'du shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na skyes bu mig dang ldan pa zhig gis me long gi dkyil 'khor shin tu yongs su dag pa blangs te/ rang gi bzhin gyi mtshan ma so sor rtog par byed pa na/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i sems can 'di ni bden pa dang / gnas pa'i sgo nas yod do snyam du sems so/ /sems can byis pa'i rang bzhin can ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i sems can 'di ni bden pa dang gnas pa'i sgo nas yod pa ma yin te/ gzugs brnyan 'di 'ba' zhig yod do/ /mig slu bar byed pa 'di 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang 71-1-236b ldan pa yang bdag gi snas rnam par shes par bya ba 'das pa dang / ma 'ongs pa dang / da ltar byung ba'i dri gang dag yin pa 'di dag la/ rtag pa nyid dam/ brtan pa nyid dam/ ther zug nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin nyid dam/ yang dag pa nyid dam/ bden pa nyid dam/ de kho na nyid dam/ ji lta ba bzhin nyid dam/ ma nor ba nyid dam/ phyin ci ma log pa nyid med de/ gsog kyang de nyid yin la/ gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs kyi/ bcom ldan 'das kyis gsungs pa 'phags pa 'jig rten las 'das pa ni bden no zhes de ltar so sor rtog par byed do/ /des de ltar shes nas snas rnam par shes par bya ba 'das pa dang / ma 'ongs pa dang / da ltar byung ba'i dri rnams nang du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /des snas rnam par shes par bya ba 'das pa dang / ma 'ongs pa dang / da ltar byung ba'i dri rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ba na/ de'i snas rnam par shes par bya ba 'das pa dang / ma 'ongs pa dang / da ltar byung ba'i dri dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i 71-1-237a tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spong bar byed do/ /de dag spangs pa'i phyir bdud ldongs pa dang / yi chad pa dang /phyogs med par byas te gnas shing / bdud sdig can gyis mi mthong bar song nas/ bdud dang bdud kyi 'khor bcom zhing g.yul chen po'i g.yul sprad de g.yul las rnam par rgyal ba dang / g.yul ngo de nyid mngon par pham par byas shing gnas te/ de ltar na 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /dge slong dag yang ji ltar na 'phags pa nyan thos lhag pa'i shes rab la sbyor bar rjes su zhugs pa la gnas pa/ shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni bdag sngon lces rnam par shes par bya ba'i ro yid bde ba'i gnas lta bu dag la ni rjes su chags shing gnas par gyur la/ lces rnam par shes par bya ba'i ro yid mi bde ba'i gnas lta bu dag la ni khong khro ba dang ldan zhing gnas par gyur/ lces rnam par shes par bya ba'i ro btang snyoms kyi gnas lta bu dag la ni so so so sor brtags pa ma yin pa'i btang snyoms su gnas par gyur te/ de ltar bdag yun ring po nas 'di la rjes su slob cing rjes su byed pa na rga ba dang / 'chi ba nyams su myong zhing sngon gyi mtha' mi mngon par gyur pas/ bdag gis da ni lces rnam par shes par bya ba'i ro dag la sngon ji lta ba de ltar bslab par mi bya zhing / bdag gis lces rnam par shes par bya ba 'das pa dang / ma 'ongs pa dang / da ltar byung ba'i ro dag la log par mos pa'am 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs 71-1-237b mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing / de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni lces rnam par shes par bya ba'i ro de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la/ de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de ltar na 'di la sems can rnams yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing / nges par 'byung ba rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam/ bram ze gang dag kha cig lces rnam par shes par bya ba'i ro 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni lces rnam par shes par bya ba'i ro yid bde ba'i gnas lta bu dag la rjes su chags shing gnas te/ dge sbyong dang / bram ze brnab sems kyi tshogs kyi mdud pas kun nas sun phyung ba/ rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig lces rnam par shes par bya ba'i ro 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni lces rnam par shes par bya ba'i ro yid mi bde ba'i gnas lta bu dag la khong khro ba dang ldan par gnas 71-1-238a te/ dge sbyong dang / bram ze gnod sems kyi tshogs kyi mdud pas kun nas sun phyung ba/ khong khro ba'i kun tu sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig lces rnam par shes par bya ba'i ro 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par shes par byas nas 'di nyid bden gyi gzhan ni don med pa'o zhes rjes su tha snyad 'dogs par byed pa de dag ni lces rnam par shes par bya ba'i ro btang snyoms kyi gnas lta bu dag la so sor brtags pa ma yin/ so sor brtags pa ma yin pa'i btang snyoms su gnas te/ dge sbyong dang / bram ze 'di bden no snyam du mngon par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na slob ma zhig gis slob dpon zas sbyin par bya'o zhes ba lang gi lci ba zar bcug cing / skom blud par bya'o zhes gcin 'thung du bcug la/ de des mngon par dga' bar byed cing de la nyes dmigs su ma mthong ba las/ gang gi tshe de so sor rtog par byed pa na bdag gis slob dpon zas sbyin par bya'o zhes ba lang gi lci ba zar bcug cing / skom blud par bya'o zhes gcin 'thung du bcug par shes par gyur pa de'i tshe/ de des gdung bar byed/ ngo tsha bar byed la/ gnong bar byed cing rnam par smod par byed do/ /dge slong dag de bzhin du 'phags pa nyan thos thos pa dang ldan pa yang 'phags pa 'jig rten las 'das pa'i shes rab 'di nyid thob nas sngon gyi byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing rnam par smod par byed la de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang 71-1-238b ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar na bdag ni sngon mi rtag pa la rtag par 'du shes pa dang / sdug bsngal ba la bde bar 'du shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na so ga'i zla ba tha ma la sprin med cing sprin dang bral ba'i nyi ma'i gung tshigs la bab pa'i tshe/ tsha bas smig rgyu dag g.yo bar gyur pa na/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i chu 'di ni bden pa dang gnas pa'i sgo nas yod do snyam du sems so/ /sems can byis pa'i rang bzhin can ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i chu 'di ni bden pa dang / gnas pa'i sgo nas yod pa ma yin te/ smig rgyu 'di 'ba' zhig yod do/ /mig slu bar byed pa 'di 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang ldan pa yang bdag gi lces rnam par shes par bya ba 'das pa dang / ma 'ongs pa dang / da ltar byung ba'i ro gang dag yin pa de dag la rtag pa nyid dam/ brtan pa nyid dam/ ther zug nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin nyid dam/ yang dag pa nyid dam/ bden pa nyid dam/ de kho na nyid dam/ ji lta ba bzhin nyid dam/ ma nor ba nyid dam/ phyin ci ma log pa nyid med de/ gsog kyang de nyid yin la/ gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya 71-1-239a bar mi rigs kyi bcom ldan 'das kyis gsungs pa 'phags pa 'jig rten las 'das pa ni bden no zhes de ltar so sor rtog par byed do/ /des de ltar shes nas lces rnam par shes par bya ba 'das pa dang / ma 'ongs pa dang / da ltar byung ba'i ro rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /des lces rnam par shes par bya ba 'das pa dang / ma 'ongs pa dang / da ltar byung ba'i ro rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ba na/ de'i lces rnam par shes par bya ba 'das pa dang / ma 'ongs pa dang / da ltar byung ba'i ro dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spong bar byed do/ /de dag spangs pa'i phyir bdud ldongs pa dang / yi chad pa dang / phyogs med par byas te gnas shing bdud sdig can gyis mi mthong bar song nas bdud dang bdud kyi 'khor bcom zhing g.yul chen po'i g.yul sprad de/ g.yul las rnam par rgyal ba dang / g.yul ngo de nyid mngon par pham par byas shing gnas te de ltar na 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /dge slong dag yang ji ltar na 'phags pa nyan thos lhag pa'i shes rab la sbyor bar rjes su zhugs pa la gnas pa/ shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar 71-1-239b rjes su zhugs pa la gnas pa ni bdag sngon lus kyis rnam par shes par bya ba'i reg bya yid bde ba'i gnas lta bu dag la ni rjes su chags shing gnas par gyur la/ lus kyis rnam par shes par bya ba'i reg bya yid mi bde ba'i gnas lta bu dag la ni khong khro ba dang ldan zhing gnas par gyur/ lus kyis rnam par shes par bya ba'i reg bya btang snyoms kyi gnas lta bu dag la ni so sor brtags pa ma yin/ so sor brtags pa ma yin pa'i btang snyoms su gnas par gyur te/ de ltar bdag yun ring po nas 'di la rjes su slob cing rjes su byed pa na rga ba dang / 'chi ba nyams su myong zhing sngon gyi mtha' mi mngon par gyur pas bdag gis da ni lus kyis rnam par shes par bya ba'i reg bya dag la sngon ji lta ba de ltar bslab par mi bya zhing / bdag gis lus kyis rnam par shes par bya ba 'das pa dang / ma 'ongs pa dang / da ltar byung ba'i reg bya dag la log par mos pa dang / 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing / de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni lus kyis rnam par shes par bya ba'i reg bya de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la/ de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de ltar na 'di la sems can rnams su yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing / nges par 'byung 71-1-240a ba rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam/ bram ze gang dag kha cig lus kyis rnam par shes par bya ba'i reg bya 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni lus kyis rnam par shes par bya ba'i reg bya yid bde ba'i gnas lta bu dag la rjes su chags shing gnas te/ dge sbyong dang / bram ze brnab sems kyi tshogs kyi mdud pas kun nas sun phyung ba/ /rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong dang / bram ze gang dag lus kyis rnam par shes par bya ba'i reg bya 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni don med pa'o zhes rjes su tha snyad 'dogs par byed pa de dag ni lus kyis rnam par shes par bya ba'i reg bya yid mi bde ba'i gnas lta bu dag la khong khro ba dang ldan par gnas te/ dge sbyong dang bram ze gnod sems kyi tshogs kyi mdud pas kun nas sun phyung ba/ khong khro ba'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig lus kyis rnam par shes par bya ba'i reg bya 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni lus kyis rnam par shes par bya ba'i reg bya btang snyoms kyi gnas lta bu dag la so sor brtags pa ma yin/ so sor brtags pa ma yin pa'i btang snyoms su gnas te/ dge sbyong dang / bram ze 'di bden no snyam du mngon 71-1-240b par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na mi zhig rkun po dag gis gtses pa na rang gi bu yin no snyam du sems shing gzhan gyi bu blangs te grong nas 'bros par byed cing / de des mngon par dga' bar byed la/ de la nyes dmigs su ma mthong ba las/gang gi tshe de so sor rtog par byed pa na 'di ni bdag gi bu ma yin gyi/ 'di ni gzhan gyi bu yin no zhes shes par gyur pa de'i tshe/ de des gdung bar byed/ ngo tsha bar byed/ gnong bar byed cing rnam par smod par byed do/ /dge slong dag de bzhin du/ 'phags pa nyan thos thos pa dang ldan pa yang 'phags pa 'jig rten las 'das pa'i shes rab 'di nyid thob nas sngon gyi byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing / rnam par smod par byed la/ de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar bdag ni sngon mi rtag pa la rtag par 'du shes pa dang / sdug bsngal ba la bde bar 'du shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na skyes bu gnyid kyis log pa'i rmi lam la 'dod pa'i yon tan lngas rtse zhing dga' la dga' mgur spyod par byed pa las phyis sad pa na cung zad kyang mi snang bar gyur pa'i tshe/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ gang dag bdag cag gis rmi lam na dga' mgur spyad pa'i 'dod pa'i yon tan lnga po de dag ni bden pa dang gnas pa'i sgo nas yod do snyam du 71-1-241a sems so/ /sems can byis pa'i rang bzhin can ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ gang dag bdag cag gis rmi lam na dga' mgur spyod pa'i 'dod pa'i yon tan lnga po de dag ni bden pa dang gnas pa'i sgo nas yod pa ma yin te/ rmi lam de 'ba' zhig yod do/ /sems slu bar byed pa de 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang ldan pa yang bdag gi lus kyis rnam par shes par bya ba 'das pa dang / ma 'ongs pa dang / da ltar byung ba'i reg bya gang dag yin pa 'di dag la rtag pa nyid dam/ brtan pa nyid dam/ ther zug pa nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin nyid dam/ yang dag pa nyid dam/ bden pa nyid dam/ de kho na nyid dam/ ji lta ba bzhin nyid dam/ ma nor ba nyid dam/ phyin ci ma log pa nyid med de/ gsog kyang de nyid yin la/ gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas/ de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs kyi/ bcom ldan 'das kyis gsungs pa/ 'phags pa 'jig rten las 'das pa ni bden no zhes de ltar so sor rtog par byed do/ /des de ltar shes nas lus kyis rnam par shes par bya ba 'das pa dang / ma 'ongs pa dang / da ltar byung ba'i reg bya rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /de lus kyis rnam par shes par bya ba 'das pa dang / ma 'ongs pa dang / da ltar byung ba'i reg bya rnams nad du yang dag par rjes su mthong zhing / 'bras dang / 71-1-241b zug rngu dang / sdig pa dang / mi rtag pa dang / sdug bsngal ba dang /stong pa dang / bdag med par yang dag par rjes su mthong ba na/ de'i lus kyis rnam par shes par bya ba 'das pa dang / ma 'ongs pa dang / da ltar byung ba'i reg bya dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spong bar byed do/ /de dag spangs pa'i phyir bdud ldongs pa dang yi chad pa dang / phyogs med par byas te gnas shing bdud sdig can gyis mi mthong bar song nas bdud dang bdud kyi 'khor bcom zhing g.yul chen po'i g.yul sprad de/ g.yul las rnam par rgyal ba dang / g.yul ngo de nyid mngon par pham par byas shing gnas te/ de ltar na 'di la 'phags pa nyan thos lhag pa'i shes rab la brtson pa'i rjes su sbyor ba la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /dge slong dag yang ji ltar na 'phags pa nyan thos lhag pa'i shes rab la sbyor bas rjes su zhugs pa la gnas pa shes rab kyis 'tsho ba rnams kyi nang na bla na med pas 'tsho ba yin zhe na/ dge slong dag 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni bdag sngon yid kyis rnam par shes par bya ba'i chos yid bde ba'i gnas lta bu dag la ni rjes su chags shing gnas par gyur la/ yid kyis rnam par shes par bya ba'i chos yid mi bde ba'i gnas lta bu dag la ni khong khro ba dang ldan zhing gnas par gyur/ yid kyis rnam par shes par bya ba'i chos btang snyoms kyi gnas lta bu dag la ni so sor brtags pa ma yin/ so sor brtags pa ma yin pa'i btang snyoms su gnas par gyur te/ de ltar bdag yun ring po nas 'di la rjes su slob cing rjes su byed pa na/ rga 71-1-242a ba dang / 'chi ba nyams su myong zhing / sngon gyi mtha' mi mngon par gyur pas bdag gis da ni yid kyis rnam par shes par bya ba'i chos dag la sngon ji lta ba de ltar bslab par mi bya zhing / bdag gis yid kyis rnam par shes par bya ba 'das pa dang / ma 'ongs pa dang / da ltar byung ba'i chos dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spang ba'i phyir bslab par bya zhing / de dag spangs par gyur cig ces de ltar so sor rtog par byed pa'i phyir ro/ /dge slong dag 'on kyang 'di na kha cig la ni yid kyis rnam par shes par bya ba'i chos de dag nyid yid du 'ong bar 'gyur la/ gzhan dag la ni de dag nyid yid du mi 'ong bar 'gyur ba yang yod la/ de dag la yang dus la lar ni yid bde ba'i gnas lta bu dag tu 'gyur zhing / dus la lar ni yid mi bde ba'i gnas lta bu dag tu 'gyur/ dus la lar ni btang snyoms kyi gnas lta bu dag tu 'gyur te/ dge slong dag de ltar na 'di la sems can rnams yun ring po nas sems kyis bsgribs shing / sems kyis brid/ sems kyis bslus nas nyes dmigs su mi mthong zhing / nges par 'byung ba rab tu mi shes te/ bdud sdig can ji ltar 'dod pa bzhin byed du 'jug go/ /dge slong dag dge sbyong ngam/ bram ze gang dag kha cig yid kyis rnam par shes par bya ba'i chos 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni yid kyis rnam par shes par bya ba'i chos yid bde ba'i gnas lta bu dag la rjes su chags shing gnas te/ 71-1-242b dge sbyong dang / bram ze brnab sems kyi tshogs kyi mdud pas kun nas sun phyung ba/ rjes su chags pa'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig yid kyis rnam par shes par bya ba'i chos 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad la 'dogs par byed pa de dag ni yid kyis rnam par shes par bya ba'i chos yid mi bde ba'i gnas lta bu dag la khong khro ba dang ldan par gnas te/ dge sbyong dang / bram ze gnod sems kyi tshogs kyi mdud pas kun nas sun phyung ba/ khong khro ba'i kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag dge sbyong ngam/ bram ze gang dag kha cig yid kyis rnam par shes par bya ba'i chos 'di dag nyid bden pa dang gnas pa'i sgo nas ma mthong zhing / ji ltar rang rang log par mos pa dag la nan gyis bzung ste/ mngon par zhen par byas nas 'di nyid bden gyi gzhan ni brdzun pa'o zhes rjes su tha snyad 'dogs par byed pa de dag ni yid kyis rnam par shes par bya ba'i chos btang snyoms kyi gnas lta bu dag la so sor brtags pa ma yin/so sor brtags pa ma yin pa'i btang snyoms su gnas te/ dge sbyong dang / bram ze 'di bden no snyam du mngon par zhen cing mchog tu 'dzin pa'i tshogs kyi mdud pas kun nas sun phyung ba/ nga rgyal gyi kun du sbyor ba dang ldan pa de dag kyang bdud sdig can ji ltar 'dod pa bzhin byed du 'jug pa yin no/ /dge slong dag 'di lta ste/ dper na skyes bu zhig gis rin po che'i za ma tog yin par sems shing sbrul gyi za ma tog blangs te grong khyer kun du 'bar ba nas 'bros par byed cing / de des mngon par dga' bar byed la de la nyes dmigs su ma mthong ba las gang gi tshe de so sor rtog par byed pa na 'di ni sbrul gyi za ma tog yin gyi/ 'di ni rin po che'i za ma 71-1-243a tog ma yin no zhes shes par gyur pa de'i tshe/ de des gdung bar byed/ ngo tsha bar byed/ gnong bar byed cing rnam par smod par byed do/ /dge slong dag de bzhin du/ 'phags pa nyan thos thos pa dang ldan pa yang 'phags pa'i 'jig rten las 'das pa'i shes rab 'di nyid thob nas sngon gyi byis pa'i spyod pa dang / rmongs pa'i spyod pa dang / shes rab 'chal pa'i spyod pa des gdung bar byed/ ngo tsha bar byed/ gnong bar byed cing rnam par smod par byed la/ de 'di snyam du sems te/ bdag gis ni sngon mi rtag pa kho na la rtag par bsams shing / bdag gis sdug bsngal ba kho na la ni bde bar bsams/ bdag gis mi gtsang ba kho na la ni gtsang bar bsams/ bdag gis bdag med pa kho na la ni bdag tu bsams te/ de ltar na bdag ni sngon mi rtag pa la rtag par 'du shes pa dang / sdug bsngal ba la bde bar 'du shes pa dang / mi gtsang ba la gtsang bar 'du shes pa dang / bdag med pa la bdag tu 'du shes par gyur to snyam du sems so/ /dge slong dag 'di lta ste/ dper na sgyu ma mkhan nam sgyu ma mkhan gyi slob ma mkhas pa zhig lam po che'i bzhi mdor 'dug ste/ sgyu ma sna tshogs 'di lta ste/ nor bu dag gam/ rna cha gdub kor dag gam/ mgul rgyan dag gam/ gdu bu rgyan can dag gam/ dpung rgyan dag gam/ lag rgyan dag gam/ rkang rgyan dag gam/ sor gdub rgyan dag gam/ gser dang dngul gyi phreng ba dag byas te rnam par bstan par gyur na/ de la sems can byis pa'i rang bzhin can dang / rmongs pa'i rang bzhin can dang / shes rab 'chal pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i nor bu dag gam/ rna cha gdub kor dag gam/ mgul rgyan dag gam/ gdu bu rgyan can dag gam/ dpung rgyan dag gam/ lag rgyan dag gam/ rkang rgyan dag gam/ sor gdub rgyan dag gam/ gser dang / dngul gyi phreng ba 'di dag ni bden pa dang / gnas pa'i sgo 71-1-243b nas yod do snyam du sems so/ /sems can byis pa'i rang bzhin can ma yin pa dang / rmongs pa'i rang bzhin can ma yin pa dang / shes rab dang ldan pa'i rang bzhin can gang dag yin pa de dag ni 'di snyam du sems te/ gang 'di ltar snang ba'i nor bu dag gam/ rna cha gdub kor dag gam/ mgul rgyan dag gam/ gdu bu rgyan can dag gam/ dpung rgyan dag gam/ lag rgyan dag gam/ rkang rgyan dag gam/ sor gdub rgyan dag gam/ gser dang dngul gyi phreng ba 'di dag ni bden pa dang gnas pa'i sgo nas yod pa ma yin te/ gyi na sgyu mar byas pa 'di 'ba' zhig yod do/ /mig slu bar byed pa 'di 'ba' zhig yod do snyam du sems so/ /dge slong dag de bzhin du 'phags pa nyan thos thos pa dang ldan pa yang bdag gis yid kyis rnam par shes par bya ba 'das pa dang / ma 'ongs pa dang / da ltar byung ba'i chos gang dag yin pa 'di dag la/ rtag pa nyid dam/ brtan pa nyid dam/ ther zug nyid dam/ de bzhin nyid dam/ ma nor ba de bzhin nyid dam/ gzhan ma yin pa de bzhin dam/ yang dag pa nyid dam/ bden pa nyid dam/ de kho na nyid dam/ ji lta ba bzhin nyid dam/ ma nor ba nyid dam/ phyin ci ma log pa nyid med de/ gsog kyang de nyid yin la/ gsob kyang de nyid yin/ snying po med pa yang de nyid yin/ brdzun pa yang de nyid yin/ slu ba'i chos kyang de nyid yin/ bdud kyang de nyid yin/ bdud kyi yo byad kyang de nyid yin/ ro yang de nyid yin/ ro'i gzugs kyang de nyid yin pas de la ni mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs kyi/ bcom ldan 'das kyis gsungs pa 'phags pa 'jig rten las 'das pa ni bden no zhes de ltar so sor rtog par byed do/ /des de ltar shes nas yid kyis rnam par shes par bya ba 'das pa dang / ma 'ongs pa dang / da ltar byung ba'i chos rnams nad du yang dag par rjes su mthong / 'bras dang / zug rngu dang / 71-1-244a sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ngo / /des yid kyis rnam par shes par bya ba 'das pa dang / ma 'ongs pa dang / da ltar byung ba'i chos rnams nad du yang dag par rjes su mthong zhing / 'bras dang / zug rngu dang / sdig pa dang / mi rtag pa dang / sdug bsngal ba dang / stong pa dang / bdag med par yang dag par rjes su mthong ba na/ de'i yid kyis rnam par shes par bya ba 'das pa dang / ma 'ongs pa dang / da ltar byung ba'i chos dag la log par mos pa'am/ 'du shes phyin ci log gam/ sems phyin ci log gam/ lta ba phyin ci log tu gyur pa 'di lta ste/ brnab sems kyi tshogs kyi mdud pa dang / gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di bden no snyam du mngon par zhen cing mchog tu 'dzin pa'i tshogs kyi mdud pa gang dag yin pa de dag spong bar byed do/ /de dag spangs pa'i phyir bdud ldongs pa dang / yi chad pa dang / phyogs med par byas te gnas shing / bdud sdig can gyis mi mthong bar song nas bdud dang / bdud kyi 'khor bcom zhing / g.yul chen po'i g.yul sprad de/ g.yul las rnam par rgyal ba dang / g.yul ngo de nyid mngon par pham par byas shing gnas te/ de ltar na 'di la 'phags pa nyan thos lhag pa'i shes rab la sbyor bar rjes su zhugs pa la gnas pa ni shes rab kyis 'tsho ba rnams kyi nang na bla na med pas 'tsho ba yin no/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do// //bar sdom ni/ /smyon pa dang ni sgyu ma dang / /ra ro ba dang sgra brnyan dang / /gshed ma dang ni me long dang / /zas sbyin pa dang smig rgyu dang / /rkun pos gtses pa grong nas dang / /rmi lam dga' spyod za ma tog /nor bu dpung rgyan rnam dag ni/ /sgyu ma'i dra ba kun bsdus pa'o/ /mdo chen po sgyu ma'i dra ba zhes bya ba rdzogs so// //rgya gar gyi mkhan po dzi na mi tra dang / pradz+nyA warma dang / zhu chen gyi lots+tsha ba ban de ye shes sde la sogs pas bsgyur cing zhus te gtan la phab pa// // |