@##/ /rgya gar skad du/ /Ar+ya pradz+nyA pA ra mi ta badzra pA Ni ma hA yA na sU tra/ bod skad du/ 'phags pa shes rab kyi pha rol tu phyin pa lag na rdo rje'i mdo theg pa chen po/sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bzhugs te/ de'i tshe 'khor der byang chub sems dpa' lag na rdo rje 'dug pa stan las langs nas bcom ldan 34-1-178b 'das la 'di skad ces gsol to/ /bcom ldan 'das byang chub sems dpas shes rab kyi pha rol tu phyin pa la ji ltar bslab par bgyi/ bcom ldan 'das kyis bka' stsal pa/ lag na rdo rje byang chub sems dpas shes rab kyi pha rol tu phyin pa la 'di ltar bslab par bya ste/ chos thams cad skye ba med pas shes rab kyi pha rol tu phyin pa la bslab par bya'o/ /gzhan yang gzugs la sogs pa'i chos thams cad rang bzhin ma mchis pa dang/ mtshan ma ma mchis pa dang dngos po dang bral ba dang/ mi dmigs pas na shes rab kyi pha rol tu phyin pa la bslab par bya'o/ /nang stong pa nyid dang/ dngos po med pa stong pa nyid kyi phyir na shes rab kyi pha rol tu phyin pa la bslab par bya'o/ /lag na rdo rje shes rab kyi pha rol tu phyin pa 'di ni dus gsum gyi sangs rgyas thams cad kyi yum ste/ rig pa chen po'i sngags kyi tshig ni 'di dag go/ /tad+ya thA/ oM mu ni mu ni/ ma hA mu na ye swA hA/ su zhig shes rab kyi pha rol tu phyin pa 'di 'dzin par byed na/ dus gsum gyi sangs rgyas rnams kyi chos rnams gzung bar 'gyur ro/ /de skye ba dran par 'gyur ro/ /mi khom pa thams cad spangs par 'gyur ro/ /bsod nams kyi 'bras bu tshad med pa thob par 'gyur ro/ /sangs rgyas bcom ldan 'das rnams dang dus rtag tu 'grogs par 'gyur ro/ /byang chub kyi sems dang ldan par 'gyur ro/ /bcom ldan 'das kyis de skad ces bka' stsal pa dang/ byang chub sems dpa' phyag na rdo rje dang/ lha dang/ mi dang/ lha ma yin dang/ dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa shes rab kyi pha rol tu phyin pa lag na rdo rje'i mdo theg pa chen po rdzogs so// // |