@#/ /rgya gar skad du/ b+hi k+ShA pra re dzu sU tra nA ma/ bod skad du/ dge slong la rab tu gces pa'i 72-1-125b mdo zhes bya ba/thams cad mkhyen pa la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod kyi grong khyer chen po pad ma rgyas pa zhes bya ba'i gtsug lag khang na bzhugs te/ de nas dge slong gi dge 'dun 'khor stong phrag phyed dang bcu gsum dang thabs cig go/ /de nas de'i tshe bcom ldan 'das kyi 'khor 'dus pa de'i nang na 'phags pa nye bar 'khor zhes bya ba dbang po dul ba/ thos pa dang ldan pa/ shes rab zab pa/ bcom ldan 'das kyis legs par gsungs pa'i chos 'dul ba la lhag par mos shing mchog tu 'dzin par gnas pa rang gi stan las langs te/ /bla gos phrag pa gcig tu gzar te/ pus mo g.yas pa'i lha nga sa la btsugs nas/ lag pa gnyis kyi thal mo snying gar sbyar ba byas te/ 'dzum dmul nas bcom ldan 'das la 'di skad ces gsol to/ /'khor ba'i 'dam nas pad ma ltar byung ba'i/ /skyob mdzad ri bo lta bur mi bskyod thub pa'i sku/ /dpe byad rgyan gyis brgyan cing mtshan gyi me tog mdzes/ /blta bas mi ngoms rab mchog khyod la phyag 'tshal lo/ /khyod kyis bdag cag 'dir 'dus 'di dag la/ /dge slong 'ba' zhig gnas pas dge slong gi/ /ngo bo dbye dang sgra 'jug ched bya ba/ /bzhi po 'di dag thub pas gsung du gsol/ /de nas bcom ldan bde gshegs rab dgyes te/ / nye bar 'khor la spyan gzigs 'di skad gsungs/ /legs par nyon cig bu khyod nye bar 'khor/ /ngas ni khyod kyi sems rangs bya phyir dang / /dge slong rnams la phan phyir de bshad do/ /dge slong zhes bya chos kyi rgyal mtshan te/ /dge slong zhes bya rdo rje srog shing yin/ /dge slong zhes bya sdug bsngal spangs pa ste/ dge slong zhes bya rgyal ba'i sras po yin/ /dge slong zhes bya nyon mongs srog bcad de/ /dge slong zhes bya thar pa'i tshal 'gro'o/ /dge slong rang gi ngo bo bsdams pa ste/ /rtsa ba bzhi sogs nyis brgya lnga bcu 72-1-126a pa/ /ched du bya ba rnam dag tshul khrims yin/ /dbye ba ming gi dge slong gang yin dang / /rtags tsam 'dzin dang yang dag dge slong ste/ /sgra 'jug rnam par zad phyir dang / /dge ba slong dang zas slong dang / /zhi bar gnas dang lam zhugs dang / /legs par 'tsho dang chags spangs dang / /yid 'ong phyir na dge slong ngo / /dge slong zhes bya brgyan pa ste/ /rgyan spangs rgyan gyis legs par brgyan/ /chags spangs chags pa chen pos spyad/ /byug pa khrus dang bza' ba dang / /rgyan dang gos dang kha dog dang / / rta dang glang po khyogs sogs kyi/ /bzhon pa bla med de yang bzhon/ /de dag 'byor pa dge slong ste/ /de dag mi 'byor dge slong min/ /de nas nye bar 'khor de yis/ /bcom ldan 'das la 'di skad gsol/ /ci de bde bar gshegs pa yis/ /skad byings rtogs par dka' ba gsungs/ /de nyid bde bar gshegs pa yis/ /tshig gi mun pa tshig gi ni/ /mar mes gsal bar mdzad du gsol/ /bcom ldan 'das kyis bka' stsal pa/ /gser la sogs pa 'jig rten rgyan/ /rab tu spangs pas snying rje yi/ /rgyan gyi mchog gis brgyan par bya/ /'jig rten ma yin bslab pa yi/ /gos gyon gos mchog bzang po yin/ /ga pur la sogs ma yin pa'i/ /tshul khrims byug pa mchog gis byug /dkar dmar la sogs ma yin pa'i/ /dad pa'i kha dog rnam par mdzes/ /'jig rten ma yin brtson 'grus kyi/ /bzhon pa bla med mgyogs pa'i mchog /bsam gtan chos spyod zas mchog ni/ /'bras chan pas ni ro mchog ldan/ /dge 'dun tshogs kyi gzhal yas khang / /zhi gnas stan la rab tu spyad/ /de dag ldan zhing phyir mi ldog /de ni yang dag dge slong yin/ /gtso bo gsum dang 'khor lngar ldan/ /drang srong snod bcas 'khar gsil ldan/ /lus ngag yid gsum rnam par bsdams/ /rang gi spyod pa brtul zhugs bstan/ /de yang yang dag dge slong yin/ /de gnyis thar pa'i grong khyer 72-1-126b la/ bsnyen pas thar pa'i bde ba'i mchog /yang dag ma yin gnyis shos ni/ /lhung gzed la sogs rab 'bar bas/ /dmyal bar khro chu lta bur ni/ /bskal pa stong phrag bzhi ru 'tshed/ /la la'i tshul khrims bde ba ste/ /la la'i tshul khrims sdug bsngal rgyu/ /tshul khrims ldan pa bde ba'i mchog /tshul khrims 'chal ba sdug bsngal yin/ /shin tu legs par tshul khrims gang / /bsdams pas mi de mdzes pa'i gzugs/ /'dul ba la ni nye bar gnas/ /tshul khrims bslab pa rang yid ches/ /mi de nyi ma gcig la yang / /bsod nams phung po dpag med pa/ /sog cing sangs rgyas 'bras bu skrun/ /rang gis rang la bslus 'debs shing / /bslab pa la ni mi gnas shing / /bde bar gshegs pa'i rgyal mtshan 'dzin/ /gzugs tsam la ni brten nas su/ /nga ni dge slong yin zer ba/ /glang smyon sna ral btags pa'am/ /sbrum ma skyur rtsi 'thungs pa ltar/ /mi de nyi ma gcig la yang / /sdig pa'i sa bon dpag med dang / /rang la gnod pa sna tshogs pa/ /byed par 'gyur ba kho na yin/ /gang zhig bslab la mi gnas shing / /bder gshegs rgyal mtshan 'dzin pa bas/ /bslab pa mi gnas skad cig la/ /gzugs por khyim par gnas pa bzang/ /bslab pa mi gnas rtags 'dzin pa/ /'jig rten pa ni thams cad kyi/ /snying du sdug par mi 'gyur zhing / /kun gyi tshig gi ngan snod sa/ /dper na sdong po bzang po la/ /yun ring yal ga 'khrung ba bzhin/ /mi de rtags tsam yun ring na/ /kha na ma tho'i gtam 'phel dang / /sdig pa'i las rnams 'phel bar bshad/ /tshul khrims 'di ni bde ba'i mchog /tshul khrims 'di ni thar pa'i lam/ /tshul khrims 'di ni yon tan zhing / /tshul khrims 'di ni sangs rgyas rgyu/ /tshul khrims 'di ni rab mchog yin/ /mig gi 'bras bu bzhin du srungs/ /srog la bab kyang tshul khrims ni/ /gtong ba mi mkhas blun po yin/ /srog chad 72-1-127a phyi mar skye ba ste/ /tshul khrims phyi nas de ltar min/ /de bas nye bar 'khor sogs kyis/ /'di nyid la ni brtan par zung / /de skad ces bcom ldan 'das kyis bka' stsal te/ nye bar 'khor la sogs pa dge slong de de dag bcom ldan 'das kyis gsungs pa la mngon par bstod do/ /dge slong la rab tu gces pa'i mdo zhes bya ba rdzogs so// |