@##/ /rgya gar skad du/Ar+ya ar+tha bi sta ra nA ma d+ha rma pa r+yA ya/ bod skad du/ 'phags pa don rgyas pa zhes bya ba'i chos kyi 72-1-188b rnam grangs/sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / de nas tshe dang ldan pa shA ri'i bus dge slong rnams la smras pa/ tshe dang ldan pa dag khyed la chos thog mar dge ba/ bar du dge ba/ tha mar dge ba/ don bzang po tshig 'bru bzang po/ ma 'dres pa yongs su rdzogs pa/ yongs su dag pa/ yongs su byang ba tshangs par spyod pa bstan par bya ste/ 'di lta ste/ don rgyas pa zhes bya ba'i chos kyi rnam grangs rab tu bshad kyis de legs par rab tu nyon la yid la zung shig dang bshad do/ /don rgyas pa'i chos kyi rnam grangs gang zhe na/ tshe dang ldan pa dag dal ba tshogs pa bcu gnyis po 'di dag ni 'phags pa'i chos thob par 'gyur ba ste/ 'di lta ste/ bdag gi 'byor pa dang / gzhan gyi 'byor pa dang / mi nyid dang / yul dbus su skyes pa dang / dbang po rnams ma tshang ba med pa dang / las kyi mtha' ma btang ba nyid dang / gnas la dad par 'gyur ba dang / sangs rgyas rnams byung ba dang / dam pa'i chos bstan pa dang / chos bstan pa rnams gnas pa dang / gnas pa rnams rjes su 'jug pa dang / gzhan la so sor snying bci ba ste/ de ltar na tshe dang ldan pa dag dal ba tshogs pa bcu gnyis po 'di dag ni 'phags pa'i chos 'thob par 'gyur ba yin no/ /tshe dang ldan pa dag smra ba'i dge slong gtam smra bas gzhan dag la rnam pa nyi shus gtam bya ste/ 'di lta ste/ dus su dang gus pa dang / 'tsham pa mtshams 'byor pa dang rjes su 'brel pa dang ri mo dang / 'dod pa dang mgu ba dang spro ba dang mi smod pa dang rigs pa dang 'brel pa dang ma 'chol ba dang ji lta ba bzhin gyi sems dang phan pa dang / phan pa'i sems dang snying brtse ba'i sems dang rnyed pa dang bkur sti 72-1-189a dang tshigs su bcad pa la mi brten par bya'o/ /gtam de dag smra ba na bdag la bstod par mi bya/ gzhan la smod par mi bya bar gtam bya'o/ /tshe dang ldan pa dag chos nyan par 'dod pas rnam pa bcu drug gis mnyan par bya ste/ 'di lta ste/ dus su chos mnyan par bya ba dang / bkur stir bya ba dang / gus par nyan pa dang / ma rangs pa med pa dang / bsgo ba bzhin nyan pa dang / klan ka mi tshol ba dang / chos la gus par bya ba dang / chos smra ba'i gang zag la gus par bya ba dang / chos la mi brnyas pa dang / chos smra ba'i gang zag la mi brnyas pa dang / bdag la mi brnyas pa dang / rtse gcig pa'i sems dang / kun shes par bya ba'i sems dang / rna ba blags te mnyan pa dang / sems bsdus te sems thams cad kyis bsams te chos la mnyan par bya'o/ /de de ltar chos yang dag par nyan pa na mya ngan las 'das pa gtsor bya ba la dad cing sems dang ba skye bar 'gyur ro/ /mya ngan las 'das pa gtsor bya ba sems mchog tu dga' ba dang / yi rangs pa skye bar 'gyur ro/ /mya ngan las 'das pa gtsor bya ba la zang zing med par dga' bar skye bar 'gyur ro/ /mya ngan las 'das pa gtsor bya ba la nye ba'i nyon mongs pa rnams spong zhing sems mnyam par 'jog pa dang / som nyi rnams sel ba dang lta ba drang por byed par 'gyur ro/ /mya ngan las 'das pa gtsor bya ba la sems rnal 'byor du 'gyur ba dang rtun pa dang rjes su brtson pa dang spong ba dang nang du yang dag 'jog dang don gyi mchog par 'gyur ro/ /mya ngan las 'das pa gtsor bya ba la 'du byed thams cad zhi ba dang / stong pa nyid du dmigs pa dang / sred pa zad pa dang 'dod chags dang bral ba dang 'gog pa dang mya ngan las 'das pa la sems rab tu 'jug cing dang ba dang / yang dag par gnas pa dang rnam par grol bar 'gyur ro/ /mya ngan las 'das pa gtsor bya ba la phung po mi rtag pa nyid dang phung po 72-1-189b gsog nyid dang phung po gso ba nyid dang phung po snying po med pa nyid dang / phung po 'jig pa nyid la sems rab tu 'jug cing dang ba dang yang dag par gnas pa dang rnam par grol bar 'gyur ro/ /mya ngan las 'das pa gtsor bya ba la 'phags pa'i bden pa bzhi shes par bya ba la mig rnam par dag par 'gyur ro/ /mya ngan las 'das pa gtsor bya ba la rnam par grol ba yongs su rdzogs par 'gyur ro/ /tshe dang ldan pa dag 'phags pa nyan thos de ltar chos yang dag par nyan na sgrogs pa la yang mtho mi 'tsham/ chos kyi gtam gyi ro yang myong bar 'gyur/ ston pa la yang chos nyid kyis rim gro byed/ bdag gi don yang rjes su 'thob/ mya ngan las 'das pa yang 'thob par 'gyur ro/ /chos 'di dag ni de'i shes rab yongs su smin par 'gyur ba ste/ 'di lta ste/ dge ba'i bshes gnyen la sten pa ngang dge ba'i ngang tshul can nyid dang / sems shes rab can nyid dang bka' blo bde ba nyid dang gus par nyan pa dang yongs su 'dri ba dang dam pa'i chos nyan pa dang dam pa'i chos rtag tu byed pa dang / skyo bar bya ba'i chos rnams la skyo ba dang / de bzhin du kun tu skyo ba la yang tshul bzhin du yid la byed pa dang / mi dge ba'i chos thams cad spong bas dge ba'i chos rnams la tshul bzhin du rab tu 'jog pa dang / de rnam par byang ba dang ting nge 'dzin la dbang thob cing tshul bzhin du yang yid la byed pa'o/ /tshe dang ldan pa dag 'phags pa nyan thos de ltar yang dag par tshul bzhin yid la byas pa'i bdag nyid kyis 'du shes bcu po 'di lta ste/ mi sdug pa'i 'du shes dang mi rtag pa'i 'du shes dang mi rtag pa la sdug bsngal ba'i 'du shes dang sdug bsngal la bdag med pa'i 'du shes dang zas la mi 'phrod pa'i 'du shes dang 'jig rten thams cad la mngon par mi dga' ba'i 'du shes dang / snang ba'i 'du shes dang 'dod chags dang bral ba'i 'du shes dang 'gog pa'i 'du shes dang 'chi ba'i 'du shes bsgom par bya'o/ /tshe dang ldan pa 72-1-190a dag mi sdug pa'i 'du shes kyi bar du gcod pa'i chos ni bcu bzhi ste/ 'di lta ste/ bud med dang lhan cig gnas pa dang dran pa g.yengs pas bud med la lta ba dang bag med pa dang 'dod chags shas che ba nyid dang / sdug pa'i mtshan ma'i rjes su brtson pa dang mi gtsang ba la so sor mi rtog pa dang las kyi mtha' la zhugs pa'i gang zag dang lhan cig sbyor ba dang / de dag dang 'thun par byed pa dang gus par mi nyan pa dang yongs su mi 'dri ba dang dbang po rnams kyi sgom bsrungs pa dang zas kyi tshod mi rig pa dang dben pa la mngon par mi dga' ba dang ji lta ba bzhin la so sor mi rtog pa'o/ /mi rtag pa'i 'du shes kyi bar du gcod pa ni 'du byed la rjes su chags pa'o/ /mi rtag pa la sdug bsngal ba'i'adu shes kyi bar du gcod pa'i chos ni drug ste/ 'di lta ste/ le lo dang 'gyod pa dang yal ba dang bag med pa dang mi brtson pa dang ji lta ba bzhin so sor mi rtog pa'o/ /sdug bsngal la bdag med pa'i 'du shes kyi bar du gcod pa ni bdag tu lta ba'o/ /zas la mi 'phrod pa'i 'du shes kyi bar du gcod pa ni ro la sred pa'o/ /'jig rten thams cad la mngon par mi dga' ba'i 'du shes kyi bar du gcod pa ni 'jig rten gyi sna tshogs dag la 'dun pa dang 'dod chags kyi rjes su chags pa'o/ /snang ba'i 'du shes kyi bar du gcod pa'i chos ni bcu gcig ste/ 'di lta ste/ the tshom dang yid la mi byed pa dang lus kyi gnas ngan len dang gnyid dang rmugs pa dang ha cang brtson 'grus drags pa dang / ha cang brtson 'grus zhan pa dang dga' ba dang spobs pa med pa dang 'du shes sna tshogs dang / ha cang smra ba mang ba dang gzugs rnams la nges par rtog pa nyid do/ /'dod chags dang bral ba'i 'du shes kyi bar du gcod pa ni kun tu 'dod chags pa'o/ /'gog pa'i 'du shes kyi bar du gcod pa ni chos la mtshan ma'i rjes su 'brang ba'o/ /'chi ba'i 'du shes kyi bar du gcod pa ni gson pa la 72-1-190b 'chums pa'o/ /tshe dang ldan pa dag chos gsum po gces spras byed pa dang / 'dun pa spong ba dang / de la mang du gnas pa ni bar du gcod pa ma bcom pa de dag yang dag par 'joms pa'o/ /tshe dang ldan pa dag chos bcu bzhi ni mi sdug pa'i 'du shes la gces spras byed pa ste/ 'di lta ste/ bud med dang lhan cig mi gnas pa dang dran pa nye bar gnas pas bud med la lta ba dang bag yod pa dang 'dod chags shas chung ba dang sdug pa'i mtshan ma'i rjes su mi brtson pa dang mi sdug pa la so sor rtog pa dang / las kyi mtha' la zhugs pa'i gang zag dang lhan cig mi sbyor ba dang / de dag dang 'thun par mi byed pa dang gus par nyan pa dang yongs su 'dri ba dang dbang po'i sgo rnams bsdams pa nyid dang zas kyi tshod rig pa nyid dang dben pa la mngon par dga' ba dang / ji lta ba bzhin la so sor rtog pa'o/ /tshe dang ldan pa dag mi sdug pa'i 'du shes kun tu bsten bsgoms lan mang du byas na 'dod pa'i 'dod chags spong bar 'gyur ro/ /mi rtag pa'i 'du shes kun tu bsten bsgoms lan mang du byas na 'du byed spong bar 'gyur ro/ /mi rtag pa la sdug bsngal ba'i 'du shes kun tu bsten bsgoms lan mang du byas na le lo dang / 'gyod pa spong bar 'gyur ro/ /sdug bsngal la bdag med pa'i 'du shes kun tu bsten bsgoms lan mang du byas na bdag tu lta ba spong bar 'gyur ro/ /zas la mi 'phrod pa'i 'du shes kun tu bsten bsgoms lan mang du byas na ro la sred pa spong bar 'gyur ro/ /'jig rten thams cad la mngon par mi dga' ba'i 'du shes kun tu bsten bsgoms lan mang du byas na 'jig rten gyi sna tshogs dag la 'dun pa dang / 'dod chags kyi rjes su chags pa spong bar 'gyur ro/ /snang ba'i 'du shes kun tu bsten bsgoms lan mang du byas na ye shes mthong bar 'gyur ro/ /'dod chags dang bral ba'i 'du shes kun tu bsten bsgoms lan mang du byas na kun tu 'dod chags spong bar 72-1-191a 'gyur ro/ /'gog pa'i 'du shes kun tu bsten bsgoms lan mang du byas na phung po zad par 'gyur ro/ /'chi ba'i 'du shes kun tu bsten bsgoms lan mang du byas na gson pa la 'chums pa spong bar 'gyur ro/ /tshe dang ldan pa dag 'phags pa nyan thos de ltar yang dag par tshul bzhin byed pa'i bdag nyid la bar du gcod pa'i chos nyi shu ste/ 'di lta ste/ mi brtson pa dang mi brtson pa dang 'grogs pa dang / yongs su mi 'dri ba dang mi 'thun pa'i lung dang lug ltar lkugs pa nyid dang sred pa can nyid dang bya ba mang ba nyid dang las kyi mtha' nyes par byas pa nyid dang / brtson pa btang ba nyid dang bar du gcod pa rnams thos na nyam nga ba dang / khengs pa dang mi 'thun par 'dzin pa nyid dang brjed ngas pa nyid dang bag med pa dang yul du ma gnas pa dang dbang po rnams kyi sgom bsrungs pa nyid dang zas kyi tshod mi rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su mi brtson pa nyid dang dben pa la mngon par mi dga' ba dang ji lta ba bzhin la so sor mi rtog pa'o/ /tshe dang ldan pa dag bar du gcod pa ma bcom pa de dag yang dag par 'joms par 'gyur ba'i gces spras byed pa'i chos ni bcu gcig ste/ 'di lta ste/ 'dun pa 'thob pa dang phan yon mthong ba nyid dang mngon par spro ba nyid dang / rnam par 'gyed pa dang rgyal ba dang chos rnams kyi mtshan ma'i rjes su 'brang ba dang / bdag la mi brnyas pa dang gus par nyan pa dang yongs su 'dri ba dang dben pa la mngon par dga' ba dang ji lta ba bzhin la so sor rtog pa'o/ /tshe dang ldan pa dag 'phags pa nyan thos de ltar yang dag par tshul bzhin yid la byed pa'i bdag nyid kyi gces spras byed pa'i chos nyi shu ste/ 'di lta ste/ brtson pa dang brtson pa dang 'grogs pa dang / yongs su 'dri ba dang 'thun pa'i lung dang lug ltar lkugs pa ma yin pa nyid dang sred pa can ma yin pa nyid dang bya ba 72-1-191b mi mang ba nyid dang las kyi mtha' legs par byas pa nyid dang brtson pa ma btang ba nyid dang bar du gcod pa rnams thos na nyam mi nga ba dang / ma khengs pa dang 'thun par 'dzin pa nyid dang / dran pa nye bar gzhag pa nyid dang bag yod pa dang yul du gnas pa dang dbang po rnams kyi sgo bsrungs pa nyid dang zas kyi tshod rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su brtson pa nyid dang dben pa la mngon par dga' ba dang ji lta ba bzhin la so sor rtog pa'o/ /tshe dang ldan pa dag gnas nyi shu rtsa gnyis po 'di dag ni rab tu byung bas yang dang yang du so sor brtag par bya ba ste/ bdag ni khyim pa'i rtags spangs pa ste mi sdug pa'o zhes gnas 'di rab tu byung bas yang dang yang du so sor brtag par bya'o/ /bdag ni mi 'dra ba khas blangs pa ste/ bdag gi cha byad dang bya ba gzhan yin no/ /bdag gi 'tsho ba ni gzhan la rag las pa ste/ ji srid 'tsho'i bar du bdag gi 'di lta ste/ chos gos dang bsod snyoms dang mal stan dang na ba'i gsos sman dang / yo byad pha rol las bcol dgos pa'o/ /bdag ni ji srid 'tsho'i bar du mi rnams kyi 'dod pa dag las ldog pa byas pa'o/ /bdag ni ji srid 'tsho'i bar du mi rnams kyi rtsed mo'i dga' ba dag las ldog pa byas pa'o/ /ci ga bdag gis bdag tshul khrims dag gis ma smad dam/ ci ga bdag la tshangs pa mtshungs par spyod pa mkhas pa rnams kyis chos nyid kyis ma smad dam/ ci ga bdag nyid ma smas pa dang ma nyams par spyod dam/ ci ga yul 'khor gyi bsod snyoms don yod par za'am/ ci ga gcig pu kun dga' ra ba stong par mngon par dga' 'am/ bdag ji lta bur gyur pas nyin mtshan 'da'/ ci ga 'du byed thams cad zhi ba/ stong pa nyid du dmigs pa/ sred pa zad pa/ 'dod chags dang bral ba'i mya ngan las 'das pa la bdag gi sems 72-1-192a rab tu 'jug pa dang/ dang ba dang / yang dag par gnas pa dang / rnam par grol bar gyur tam/ ci ga phung po mi rtag pa nyid dang / phung po gso ba nyid dang / phung po snying po med pa nyid la bdag gi sems rab tu 'jug pa dang / dang ba dang / yang dag par gnas pa dang / rnam par grol bar gyur tam/ ci ga bdag 'chi ba'i tshe tshangs pa mtshungs par spyod pa/ mkhas pa rnams kyis bdag la dris na yul yul po ma yin zhing / bag tsha ba med pa dang / 'jigs pa med par yang dag par lung ston par lung bstan par bya ba gang yin pa dge slong gi 'bras bu bzhi las 'bras bu gang yang rung ba zhig 'thob bam/ bdag ni skye ba'i chos can te/ skye ba'i chos nyid las ma 'das pa/ rga ba'i chos can/ na ba'i chos can/ 'chi ba'i chos can te/ bdag ni 'dod pa dang / sdug pa dang / phangs pa dang / yid du 'ong ba thams cad dang / 'bye ba dang / med pa dang bral ba dang mi ldan par 'gyur ba'o/ /bdag ni las bdag gir bya ba/ las kyi skye gnas dang / las kyi bgo skal la spyod pa las brtan par bya ba ste/ las dge ba'am/ mi dge ba gang dang gang byed pa las de dang de nyid kyi skal ba can du 'gyur ro snyam du gnas 'di rab tu byung bas yang dang yang du so sor brtag par bya'o/ /gnas nyi shu rtsa gnyis po 'di dag la yang dang yang du so sor rtog pa/ de'i dge sbyong gi 'du shes yongs su rdzogs par 'gyur ro/ /dge sbyong gi 'du shes yongs su rdzogs na/ 'du shes bdun yongs su rdzogs par 'gyur te/ rtag par rgyun du byed pa dang / rgyun du 'jug pa dang / brnab sems dang gnod sems med pa dang / yang dag pa'i dran pa dang / nga rgyal med pa dang / 'tsho ba'i yo byad rnams de'i ched dang ting nge 'dzin la dbang thob pa yongs su rdzogs pa'o/ /tshe dang ldan pa dag sems dang / yid dang / rnam par shes pa gang yun ring por gzugs la chags pa dang / sgra la chags pa dang / dri 72-1-192b la chags pa dang / ro la chags pa dang / reg bya la chags pa dang / gzugs dang / sgra dang / dri dang / ro dang / reg byadag gis kun du bsags pa/ nye bar bsags pa de ni so sor brtags pas/ 'di lta ste/ mi 'chi ba'i dbyings la nye bar rnam par gzhag pa ma yin par 'gyur ro/ /tshe dang ldan pa dag so so'i skye bos rnam pa nyi shus sems skyo bar bya ste/ bdag ni rtogs pas gsog yin no/ /ma dul bar 'chi bar 'gyur ro/ /g.yang sar ltung bar 'gyur ro/ /'jigs pa dang bcas pa'i phyogs su 'gro bar 'gyur ro/ / 'jigs pa med pa'i phyogs mi shes pa'o/ /las mi shes pa'o/ /ting nge 'dzin ma thob pa'o/ /yang srid pa ni sdug bsngal ba'o/ /dal ba phun sum tshogs pa ni rnyed dka' ba'o/ /'dod pa dag gsod par byed pas rtag tu rjes su bcings pa'o/ /bdag ni 'gro ba las ma 'das pa'o/ /bdag ni ngan song dag las yongs su ma grol ba'o/ /bdag ni lta bar gyur pa dpag tu med pa dang yang dag par ldan pa'o/ /bdag ni mtshams med pa'i las rnams mi bya ba'i phyir gegs ma byas pa'o/ /bdag ni skye ba'i 'khor ba thog ma dang tha ma med pa'i mthar ma byas pa'o/ /mthar ma byas na byed pa gzhan med do/ /ma byas na bde ba'i ngo bo med do/ /las byas pa rnams ni chud za ba med do/ /bdag ni ma rig par gyur cing mi mkhas la 'chi ba'i dus byed par 'gyur ro zhes so so'i skye bos sems skyo bar bya'o/ /de rnam pa nyi shu po de rnams kyis sems skyo shin tu skyo/ skrag shin tu skrag /bkag shin tu bkag na rnam pa gzhan nyi shus sems myur ba myur bar yang dag par gnas te/ de sems kyi mtshan ma yid la byed pa'i sems myur ba myur bar yang dag par gnas so/ /de sems bla na med pa'am/ sems rtse gcig pa'am/ ting nge 'dzin gyi mtshan ma'am/ ting nge 'dzin la gnas pa'i mtshan ma'am/ting nge 'dzin las ldang ba'i mtshan ma'am/ zhi gnas kyi mtshan ma 'am/ rab tu 'dzin pa'i mtshan ma'am/ btang snyoms kyi mtshan ma'am/ spyod yul ma yin pa spong 72-1-193a ba'am/ spyod yul la gus pa'am/ mdor bstan pa'am/ dmigs kyis bsal ba'am/ kun tu skyo ba mang ba'am/ bla ma la rten pa'am/ yang dag pa'i sbyor ba yid la byed pa'i sems myur ba myur bar yang dag par gnas so/ /de dbugs rngub pa dang 'byung ba dran pa sgom pa'i sems myur ba myur bar yang dag par gnas so/ /de dran pa nye bar gzhag pa rnams sgom pa'i sems myur ba myur bar yang dag par gnas so/ /tshe dang ldan pa dag 'phags pa nyan thos de ltar yang dag par tshul bzhin yid la byas pa'i bdag nyid kyi bar du gcod pa ni bcu gcig tu rig par bya ste/ 'di lta ste/ yang dang yang du tshogs par 'du ba dang / zas la gdu ba nyid dang las la dga' ba nyid dang smra ba la dga' ba nyid dang 'du 'dzi'i gtam la dga' ba nyid dang 'du 'dzi la dga' ba nyid dang bdag tu 'dzin pa dang / 'phyar ba dang bag med pa dang yul du mi gnas pa'o/ /tshe dang ldan pa dag bar du gcod pa ma bcom pa de dag yang dag par 'joms pa mkhas pa bcu la bslab par bya ste/ 'di lta ste/ ting nge 'dzin la mkhas pa dang ting nge 'dzin la gnas pa la mkhas pa dang / ting nge 'dzin las ldang ba la mkhas pa dang rab tu 'dzin pa la mkhas pa dang / btang snyoms la mkhas pa dang / skye mched la mkhas pa dang thabs la mkhas pa dang mngon par sgrub pa la mkhas pa'o/ /tshe dang ldan pa dag 'phags pa nyan thos de ltar mngon par sgrub pa la mkhas pa la mchog tu dga' ba'i dngos po bcu gsum skye ba na skye ste/ dad pa can de ston pa'am chos sam dge 'dun nam bdag gi tshul khrims sam gzhan gyi tshul khrims sam/ bdag gi sbyin par bya ba'i chos rnams sam bdag gi rtogs pa'am/ gzhan gyi rtogs pa yid la byed pa na/ mchog tu dga' ba skyed pa 'di ni dad pa can gyi mchog tu dga' ba'i dngos po yin no/ /bcom ldan 'das de bdag gi sdug bsngal gyi chos mang po sel ba'o zhes mchog tu dga' ba skye ba 'di ni dad pa can gyi 72-1-193b mchog tu dga' ba'i dngos po yin no/ /bcom ldan 'das de bdag gi bde ba'i chos mang po sgrub pa'o zhes mchog tu dga' ba skye ba 'di ni dad pa can gyi mchog tu dga' ba'i dngos po yin no/ /bcom ldan 'das de bdag gi sdig pa mi dge ba'i chos rnam pa du ma sel ba'o zhes mchog tu dga' ba skye ba 'di ni dad pa can gyi mchog tu dga' ba'i dngos po yin no/ /bcom ldan 'das de bdag gi dge ba'i chos rnam pa du ma sgrub pa'o zhes mchog tu dga' ba skye ba 'di ni dad pa can gyi mchog tu dga' ba'i dngos po yin no/ /tshe dang ldan pa dag 'phags pa nyan thos chos bzhi la brten na chos lnga bsgom pa yongs su rdzogs par 'gyur te/ 'dun pa dang brtson 'grus dang dben pa dang phyir mi zlog pa'o/ /chos lnga po gang dag bsgom pa yongs su rdzogs par 'gyur zhe na/ mchog tu dga' ba dang dga' ba dang shin tu sbyangs pa dang bde ba dang ting nge 'dzin to/ /tshe dang ldan pa dag de chos lnga po de dag kun tu bsags shing nye bar bsags na zug rngu brgyad med par 'gyur te/ 'di lta ste/ 'dod chags kyi zug rngu dang zhe sdang gi zug rngu dang gti mug gi zug rngu dang / nga rgyal gyi zug rngu dang sred pa'i zug rngu dang / lta ba'i zug rngu dang / the tshom dang som nyi'i zug rngu'o/ /zug rngu brgyad po de dag med par gyur na mi slob pa'i chos bcu thob par 'gyur te/ mi slob pa'i yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin dang / yang dag pa'i rnam par grol ba dang / yang dag pa'i ye shes so/ /mi slob pa'i chos bcu po de dag skyes shing thob ste ldan na 'phags pa yan lag lnga spangs pa/ yan lag drug dang ldan pa bsrung ba gcig pa/ rton pa bzhi dang ldan pa/ so so'i bden pa bsal ba/ bsal ba spangs pa/ kun tu rtog pa'i rnyog pa med par rnyed do// // |