@#/ /rgya gar skad du/ nan+da pra bra dz+yA sU tra/ bod skad du/ dga' bo rab tu byung ba'i mdo/thams cad mkhyen pa la phyag 'tshal lo/ /'di skad bdag gis thos pa'i dus gcig na/ bcom ldan 'das ser skya'i gnas kyi n+ya gro d+ha'i kun dga'i ra ba na bzhugs so/ /de nas bcom ldan 'das snga dro chos gos dang sham thabs mnabs te/ lhung bzed bsnams nas phyi bzhin 'brang ba'i dge sbyong tshe dang ldan pa kun dga' bo dang / ser skya'i gnas su bsod snyoms la gshegs so/ /de nas bcom ldan 'das rigs kyi bu dga' bo'i khyim ga la ba der gshegs pa dang / rigs kyi bu dga' bos bcom ldan 'das rgyang ring po nas gshegs pa mthong ngo / /mthong nas kyang rings pa rings par bcom ldan 'das kyi ched du gdan bshams nas 'di skad ces gsol to/ /bcom ldan 'das tshur gshegs/ bcom ldan 'das gshegs pa legs so/ /bcom ldan 'das gdan bshams pa la bzhugs su gsol/ bcom ldan 'das bzhugs so/ /de nas rigs kyi bu dga' bos bcom ldan 'das kyi zhabs gnyis la phyag 'tshal te/ bcom ldan 'das kyi spyan sngar 'dug go/ /de nas bcom ldan 'das kyis rigs kyi bu dga' 72-1-255a bo la 'di skad ces bka' stsal to/ /dga' bo ci'i phyir rab tu mi 'byung / dga' bos gsol pa/ bcom ldan 'das rab tu 'byung ba zhes bya ba'i tshig gi don ci lags/ bcom ldan 'das kyis bka' stsal pa/ sdig pa thams cad yongs su spong ba yin no/ /'dod chags dang / zhe sdang dang / gti mug rab tu sel ba yin no/ /'thab pa dang / thab mo dang / mtshang 'dru ba dang / rtsod pa dang / 'gyed pa dang / sgyu dang / g.yo'i mun pas bsdus pa'i dri ma thams cad 'khru ba yin no/ /lo tog thams cad kyi sa gzhi lta bur yon tan thams cad kyi gzhi yin no/ /rin po che thams cad kyi 'byung gnas yin no/ /bde ba thams cad kyi yid bzhin gyi nor bu yin no/ /yon tan thams cad kyi go 'phang gi gnas yin no/ /sems can thams cad dbugs 'byin pa yin no/ /'byung po thams cad kyi yid brtan pa yin no/ /srog chags thams cad la mi 'jigs pa sbyin pa yin no/ /sems can dbul po thams cad kyi bum pa bzang po yin no/ /skyabs med pa rnams kyi dpung gnyen yin no/ /kun du tshol bas phongs pa dang sdug bsngal gyis nyam thag pa rnams kyi bsti sa yin no/ /sangs rgyas thams cad kyi ma 'dres pa yin no/ /sems can thams cad kyis mchod par bya ba yin no/ /mkhas pa rnams kyis bsngags pa yin no/ /thar par 'gro ba rnams kyi lam yin no/ /sems can dag pa rnams kyi bsnyen par bya ba yin no/ /snod du gyur pa rnams kyis bsten par bya ba yin no/ /ngan song gi sgo gcod pa yin no/ /mtho ris dang thar pa'i sgo 'byed pa yin no/ /lha'i 'gro ba rnams kun du 'gengs pa yin no/ /sdug bsngal thams cad kun du gcod pa yin no/ /sred pa'i 'ching bas bcings pa rnams rnam par grol bar byed pa yin te/ dga' bo de ni rab tu byung ba zhes bya'o/ /yang dag pa'i lta ba'i khyim yin no/ /thar pa'i yang dag par sdom pa yin no/ /mya ngan las 'das pa la bsnyen pa yin no/ /rgyun nye bar gcod pa yin 72-1-255b no/ /nyon mongs pa rnams sreg pa yin no/ /phra rgyas rnams 'byin pa yin no/ /lta ba ngan pa'i dra ba rnams 'jig par byed pa yin no/ /bdud kyi rgyal mtshan snyol ba yin no/ /bzod pa smra ba sgreng ba yin no/ /'khor ba'i 'khor lo ldog par byed pa yin no/ /chos kyi 'khor lo skor bar byed pa yin no/ /nu zho'i rgya mtsho skems pa yin no/ /rus pa'i ri 'jig par byed pa yin no/ /skye ba dang / rga ba dang / na ba dang / 'chi ba'i mtha' yin no/ /phung po'i khur 'jog pa yin no/ /nyon mongs pa'i 'dam du bying ba rnams 'byin pa yin no/ / khyim gyi gzeb tu bcings pa rnams rnam par grol bar byed pa yin no/ /gnod pa'i tshor ba rnams zad par byed pa yin no/ /the tshom rnams dang nyon mongs pa'i dri ma brtan por gyur pa rnams gcod pa yin no/ /rga shis 'jigs pa rnams dbugs 'byin pa yin no/ / sdug pa dang bral ba zad par byed pa yin no/ /'khor ba'i sdug bsngal gyis gtses pa rnams kyi bde ba dang mi 'jigs pa'i 'gram yin no/ /'dod pa'i khams las rgal bar byed pa yin no/ /gzugs kyi khams las yang dag par rgal bar byed pa yin no/ / gzugs med pa'i khams las rnam par rgal bar byed pa yin no/ /don dam par mya ngan las 'das pa mchog thob par byed pa yin te/ /dga' bo de ni rab tu byung ba zhes bya'o/ /'jig rten thams cad kyi mig lta bu yin no/ /gti mug gi mun pa'i sgron ma yin no/ /rgyud dag par byed pa yin no/ /nyon mongs pa'i nad thams cad rab tu zhi bar byed pa yin no/ /lam stor ba rnams la lam kun du ston pa yin no/ /chos thams cad kyi de kho na ston pa yin no/ /mdud pa thams cad rnam par grol bar byed pa yin no/ /ma rig pa'i mun pa thams cad sel bar byed pa yin no/ /mi shes pa'i rab rib kyi sgrib pa'i mun pa rnams 'dral bar byed pa yin no/ /le lo can rnams brtson 'grus la rtsom par byed pa yin no/ /tshul khrims la ltung ba rnams skyo bar byed pa yin no/ / 72-1-256a tshul khrims phun sum tshogs pa rnams rab tu dga' bar byed pa yin no/ /brtson 'grus brtsams pa rnams mchog tu dga' ba yin no/ /nang du yang dag 'jog la mngon par dga' ba rnams rab tu dga' ba yin no/ /rnal 'byor spyod pa rnams mchog tu chog shes par byed pa yin no/ /nyon mongs pa'i dgra 'joms par byed pa rnams kyi mtshon cha yin no/ /phyir mi 'ong ba rnams mchog tu rgyal bar byed pa yin no/ /gnas med pa rnams kyi gnas so/ /skyob pa med pa rnams kyi skyob pa yin no/ / 'jigs pas 'brel pa rnams kyi mi 'jigs par byed pa yin no/ /skyabs med pa rnams kyi skyabs yin no/ /sdug bsngal rnams kyi bde ba'i yo byad yin no/ /'khor ba'i 'ching bas bcings pa rnams 'grol bar byed pa yin te/ dga' bo de ni rab tu byung ba zhes bya'o/ /lha dang mi rnams kyis bkur sti byas pa yin no/ /mi'i dbang po rnams kyis mchod pa yin no/ /sangs rgyas thams cad kyis dgongs pa yin no/ /khyim gyi gnas yongs su gtong ba yin no/ /mya ngan las 'das pa'i lam 'dren pa yin no/ /skra'i khur 'dreg pa yin no/ /gos ngur smrig ni 'dod chags dang bral ba'i rtags yin no/ /rigs pa la brtson pa brtson 'grus kyi zhing yin no/ /'di ni drang srong rnams kyi rgyal mtshan yin no/ /bdud sdig to can rnams kyi grags pa 'joms pa yin no/ /lha dang mi rnams rab tu dga' bar byed pa yin te/ dga' bo rab tu byung ba ni de lta bu yin na ci'i phyir rab tu mi 'byung / dga' bo rab tu byung ba ni 'khor los sgyur ba'i rgyal srid kyi bde ba bas kyang ches khyad par du 'phags par bde ba yin na dga' bo gzhan yang dal ba thob pa ni bskal pa bye ba brgyar yang shin tu rnyed par dka' ba yin te/ sangs rgyas 'byung ba ni de bas kyang ches rnyed par dka' ba yin no/ /dga' bo thar par 'dod pa rgyal po'i drang srong rnams dang / gzhan yang 'khor los sgyur ba'i rgyal po rin po che sna bdun dang ldan 72-1-256b pa rnams kyang btsun mo'i 'khor dang bcas te sa bor nas rab tu byung ngo / /de bzhin du khyim bdag dang / bram ze'i tshogs gzhan rnams kyang khyim rnams bor nas rab tu byung ngo / /de nas bcom ldan 'das la rigs kyi bu dga' bos 'di skad ces gsol to/ /btsun pa bdag ni khyim par mchis la sbyin pa dag stsal/ bsod nams dag bgyi zhing / bcom ldan 'das nyan thos kyi dge 'dun dang bcas pa la yang bsnyen bkur bgyi zhing / chos gos dang / bsod snyoms dang / gzims cha dang / snyun gyi gsos sman dang / yo byad rnams kyang bsgrub par bgyi'o/ /bcom ldan 'das kyis bka' stsal pa/ de bzhin gshegs pa dgra bcom pa yang dag par rdzogs pa'i sangs rgyas rnams kyis khams gsum pa gang dag yin pa'i 'jig rten gang bar gyur la/ rigs kyi bu'am rigs kyi bu mo dad pa can la las lo brgyar 'di lta ste/ chos gos dang / bsod snyoms dang / mal stan dang / nad kyi gsos sman dang / yo byad rnams kyis bsnyen bkur byed na dga' bo de ni rab tu byung bar nges par 'byung ba'i sems kyi bcu drug gi char yang mi phod do/ / dga' bo khyod kyis rab tu byung / /dal ba shin tu rnyed dka' ste/ /dga' bo ston pa mngon gyur pa/ /nga la mi mnyes ma byed cig /dga' bo dper na sa chen po 'di chu gcig pur rgya mtshor gyur la/ de na ru sbal zhar ba gcig kyang yod/ de na gnya' shing bu ga gcig pa gcig kyang rgyu la ru sbal zhar ba de 'di skad du/ gnya' shing gi bu ga der mgrin pa chud par bya'o snyam du sems skye zhing / gnya' shing bu ga can de yang rlung gis bskyod nas phyogs phyogs su rgyug par byed pa na dga' bo brgya la rkyen zhig gis ru sbal zhar ba de'i mgrin pa gnya' shing gi bu ga der 'jug par 'gyur gyi/ dga' bo mi nyid thob pa ni ma yin no/ /dal ba phun sum tshogs pa yang de bzhin no/ /dga' bo khyod kyis mi nyid shin tu rnyed par dka' ba dang / de bzhin du dal ba phun sum tshogs pa yang rnyed na/ dga' bo khyod 72-1-257a kyis rab tu byung / /dal ba shin tu rnyed dka' rnyed/ /dga' bo ston pa mngon gyur na/ /nga la mi mnyes ma byed cig /dper na 'ga' zhig gis khab kyi mig gnam du bstan te yungs kar gyi 'bru rnams 'thor bar byed na dga' bo brgya la rkyen zhig gis der yungs kar gyi 'bru gang yin pa gcig chud par 'gyur gyi/ dga' bo mi nyid rnyed pa ni ma yin no/ /dal ba phun sum tshogs pa yang de bzhin no/ /dga' bo mi nyid shin tu rnyed par dka' ba dang / de bzhin du dal ba phun sum tshogs pa yang rnyed na/ dga' bo khyod kyis rab tu byung / /dal ba shin tu rnyed dka' rnyed/ /dga' bo ston pa mngon gyur pa/ /nga la mi mnyes ma byed cig /de ci'i phyir zhe na/ bskal pa bye ba stong dang ni/ /brgya dang khrag khrig dag tu yang / /sangs rgyas sgra ni mi thos na/ /sangs rgyas mthong ba ga la zhig /u dum ba ra'i me tog ni/ /shing las shin tu rnyed dka' ltar/ /de bzhin sangs rgyas rnyed dka' ste/ /khyed kyis nga ni rnyed gyur na/ /dga' bo khyod kyis rab tu byung / /dal ba shin tu rnyed dka' ste/ /dga' bo ston pa mngon gyur pa/ / nga la mi mnyes ma byed cig /de nas rigs kyi bu dga' bo skra dang kha spu bregs te gos ngur smrig bgos te/ rgyal ba'i bstan pa la yang dag par dad pa kho nas khyim nas khyim med par rab tu byung ngo / /bcom ldan 'das kyis de skad ces bka' stsal pa dang / tshe dang ldan pa kun dga' bo dang / rigs kyi bu dga' bo bcom ldan 'das kyis gsungs pa la mngon par bstod do/ /dga' bo rab tu byung ba'i mdo rdzogs so// //rtsangs de ben dra ra k+Shi tas zhus chen bgyis pa// // |