@#/ /'phags pa gnas 'jog gi mdo zhes bya ba/sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ser skya'i gnas na shing n+ya gro d+ha'i kun dga' ra ba na bzhugs so/ /de nas drang srong chen po ser skya nyin re zhing rkang pas 'gro la 'chag cing rjes su 'chag pa bcom ldan 'das ga la ba der ched du song ste/ bcom ldan 'das dang / yang dag par dga' ba dang / yang dag par bsnyen pa'i gtam rnam pa sna tshogs dag byas nas phyogs gcig tu 'dug 72-1-264a go/ /bram ze gnas 'jog phyogs gcig tu 'dug par bcom ldan 'das kyis mkhyen nas de la 'di skad ces bka' stsal to/ /gnas 'jog khyod ci'i phyir 'di ltar skem zhing mdog mi sdug /ag tsom dang / skra dang / sen mo dang / spu ring zhing lus rtsub la gcom chung ngur smra/ gnas 'jog gis gsol pa/ gau ta ma bdag ni dgung zlar smyung ba bgyid pas 'di ltar skem zhing mdog ngan/ ag tsom dang / skra dang / sen mo dang / spu ring zhing lus rtsub la gcom chung ngur smra ba lags so/ /de nas bcom ldan 'das kyis mkhyen bzhin du drang srong gnas 'jog la smras pa/ gnas 'jog khyod 'phags pa'i yan lag brgyad dang ldan pa'i bsnyen gnas la gnas shing cho 'phrul gyi phyogs la yang nan tan gyis sgrub bam/ gnas 'jog gis gsol pa/ kye gau ta ma gang 'phags pa'i yan lag brgyad dang ldan pa'i bsnyen gnas la gnas pa dang / cho 'phrul gyi phyogs la nan tan gyis sgrub pa de cir 'gyur/ bcom ldan 'das kyis bka' stsal pa/ bram ze de ni lha dang mi rnams kyi 'dod pa la spyod par 'gyur ro/ /gnas 'jog gis gsol pa/ gau ta ma 'phags pa'i yan lag brgyad dang ldan pa'i bsnyen gnas zhes bgyi ba de gang lags/ gau ta ma ji ltar na 'phags pa'i yan lag brgyad dang ldan pa la bsnyen pas lha dang mi rnams kyi 'dod pa la nye bar spyod par 'gyur/ gnas 'jog rigs kyi bu'am/ rigs kyi bu mo dad pa dang ldan pa 'phags pa'i yan lag brgyad dang ldan pa'i bsnyen gnas la gnas par 'dod pas nang par langs nas dge slong ngam/ bram ze'am/ gzhan gang yang rung ba shes pa zhig gi drung du song ste/ bla gos phrag pa gcig tu byas la pus mo g.yas pa'i lha nga sa la btsugs te/ thal mo sbyar nas tshig 'di skad ces brjod par bya ste/ bdag ming che ge mo zhes bgyi ba 'di dus 'di nas bzung ste/ gang do nub kyi mtshan mo 'di dang / sang nyi ma shar gyi bar du srog gcod pa spang zhing srog gcod pa las slar log 72-1-264b ste/ dbyug pa spangs shing mtshon cha spangs te ngo tsha dang ldan zhing snying rje dang ldan par bgyis la/ sems can dang / srog chags 'byung po thams cad las chung ngu na srog chags phra mo grog sbur yan chad kyi srog gcod pa spangs te/ srog gcod pa las slar ldog par bgyi'o/ / ji ltar 'phags pa dgra bcom pa de dag ji srid 'tsho'i bar du srog gcod pa spangs te/ srog gcod pa las slar log nas dbyug pa spangs shing mtshon cha spangs te/ sems can dang / srog chags 'byung po thams cad las chung ngu na srog chags phra mo grog sbur yan chad kyi srog gcod pa yang spangs te/ srog gcod pa las slar log pa de bzhin du bdag che ge mo yang dus 'di nas bzung ste/ do nub kyi mtshan mo 'di dang / sang nyi ma shar gyi bar du srog gcod pa spang zhing srog gcod pa las slar ldog ste/ dbyug pa spangs shing mtshon cha spangs te/ ngo tsha dang ldan zhing snying rje dang ldan par bgyis la sems can dang / srog chags 'byung po thams cad las chung ngu na srog chags phra mo grog sbur yan chad kyi srog gcod pa yang spangs te/ srog gcod pa las slar ldog par bgyi'o/ /yan lag dang po 'dis bdag 'phags pa dgra bcom pa de dag gi bslab pa la rjes su slob bo/ /rjes su sgrub bo/ /rjes su bgyid do/ /ji ltar srog gcod pa las slar log pa de bzhin du ma byin par len pa dang / mi tshangs par spyod pa dang / brdzun du smra ba dang / 'bru'i chang dang / bcos pa'i chang myos par 'gyur ba bag med pa'i gnas dang / glu gar dang / rol mo'i sgra dang / phreng ba dang / spos nyug pa dang / rgyan dang / kha dog 'chang ba dang / khri stan mthon po dang / khri stan chen po dang / dus ma yin pa'i kha zas spangs te/ dus ma yin pa'i kha zas las slar ldog par bgyi'o/ /ji ltar 'phags pa dgra bcom pa de dag ji srid 'tsho'i bar du dus ma yin pa'i kha zas spangs te/ dus ma yin pa'i kha zas las slar log pa de bzhin du bdag che ge mo yang dus 'di nas bzung ste/ gang do nub kyi mtshan mo 'di dang / 72-1-265a sang nyi ma shar gyi bar du dus ma yin pa'i kha zas spangs te/ dus ma yin pa'i kha zas las slar ldog par bgyi'o/ /yan lag brgyad pa 'dis bdag 'phags pa dgra bcom pa de dag gi bslab pa la rjes su slob bo/ /rjes su sgrub bo/ /rjes su bgyid do/ /de ltar lan gnyis/ de ltar lan gsum du'o/ /gnas 'jog 'di ni 'phags pa'i yan lag brgyad dang ldan pa'i bsnyen gnas yin te/ de ltar 'phags pa'i yan lag brgyad dang ldan pa'i bsnyen gnas la gnas pa ni lha dang mi'i 'dod pa la nye bar spyod par 'gyur te/ gnas 'jog khyod 'phags pa'i yan lag brgyad dang ldan pa'i bsnyen gnas la gnas par gyis shig /cho 'phrul gyi phyogs la yang nan tan gyis sgrubs shig /lha dang mi rnams kyi 'dod pa yang spyad par gyis shig /gnas 'jog ji ltar 'phags pa'i yan lag brgyad dang ldan pa la gnas pa'i rigs kyi bu'am/ rigs kyi bu mo dad pa dang ldan pa de'i bsod nams 'di tsam mo zhes bsod nams sam/ bsod nams kyi 'bras bu'am/ bsod nams kyi 'bras bu rnam par smin pa'i tshad gzung bar mi nus te/ 'on kyang bsod nams kyi phung po mang ngo zhes bya ba'i grangs su 'gro'o/ /gnas 'jog dper na chu bo chen po lnga po gcig tu gzhol bar 'bab pa ni 'di lta ste/ gang ga dang / ya mu na dang / mtsho ldan dang / khyim ldan dang / sa ste chu de dag la 'di tsam mo zhes chu'am/ chu bum pa brgya'am/ chu bum pa stong ngam/ chu bum pa brgya stong zhes tshad gzung bar mi nus te 'on kyang chu mang zhing chu klung che'o zhes bya ba'i grangs su 'gro'o/ /gnas 'jog de bzhin du 'phags pa'i yan lag brgyad dang ldan pa'i bsnyen gnas la gnas pa'i rigs kyi bu'am/ rigs kyi bu mo de'i bsod nams 'di tsam mo zhes bsod nams sam/ bsod nams kyi 'bras bu'am/ bsod nams kyi 'bras bu rnam par smin pa'i tshad gzung bar mi nus te/ 'on kyang bsod nams mang ngo zhes bya ba'i grangs su 72-1-265b 'gro'o/ /gnas 'jog de ji snyam du sems/ gang zhig rgya mtsho chen po'i chu ni 'di tsam ste/ chu'am/ chu bum pa brgya'am/ chu bum pa stong ngam/ chu bum pa brgya stong yod ces tshad gzung bar nus pa yod dam/ gnas 'jog gis gsol pa/ gau ta ma gang la la rgya mtsho chen po'i chu ni 'di tsam ste/ chu'am/ chu bum pa brgya'am/ chu bum pa stong ngam/ chu bum pa brgya stong zhes tshad gzung ba de ni gnas ma mchis te skabs ma lags so/ /gau ta ma de ci'i slad du zhe na/ chu klung de ni tshad gzung du ma mchis pa'i slad du'o/ /bcom ldan 'das kyis bka' stsal pa/ gnas 'jog de bstan pas go bar bya ste/ gang zhig gang gi tshe thabs la mkhas pa gang gis rgya mtsho chen po'i chu 'di tsam ste/ chu'am/ chu bum pa brgya'am/ chu bum pa stong ngam/ chu bum pa brgya stong zhes tshad gzung bar nus pa yod srid kyi/ gang 'phags pa'i yan lag brgyad dang ldan pa'i bsnyen gnas la lan cig gnas pa'i bsod nams 'di tsam zhes bsod nams sam/ bsod nams kyi 'bras bu'am/ bsod nams kyi 'bras bu'i rnam par smin pa'i tshad gzung bar mi nus te/ 'on kyang bsod nams mang zhing bsod nams kyi phung po che'o zhes bya ba'i grangs su 'gro'o/ /gnas 'jog 'phags pa'i yan lag brgyad dang ldan pa la gnas pa ni de ltar 'bras bu che ba yin/ de ltar phan yon che ba yin/ de ltar mthu che ba yin/ de ltar rgya che ba yin no/ /gnas 'jog 'phags pa'i yan lag brgyad dang ldan pa'i bsnyen gnas la nye bar gnas par gyis shig /cho 'phrul gyi phyogs la yang nan tan gyis sgrubs shig /lha dang mi rnams kyi 'dod pa la yang spyad par gyis shig /de nas bcom ldan 'das la bram ze gnas 'jog gis 'di skad ces gsol to/ /kye gau ta ma 'di la skyes bu gnyis shig las de gcig gis ji srid 'tsho'i bar du sbyin pa stsal ba dang / gnyis pas kyang ji srid 'tsho'i bar du 'phags pa'i yan 72-1-266a lag brgyad dang ldan pa'i bsnyen gnas la gnas pa de gnyis las bcom ldan 'das khyad par gang che lags/ bcom ldan 'das kyis bka' stsal pa/ gnas 'jog 'di la 'phags pa'i yan lag brgyad la gnas pa dang sbyin pa gnyis mnyam pa ma yin te/ gnas 'jog dper na gang 'dzam bu'i gling 'dir dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par sbyor ba yongs su zad pa/ yang dag pa'i shes pas sems shin tu rnam par grol ba rnams kyis gang bar gyur pa de dag la gang rigs kyi bu'am/ rigs kyi bu mo gcig gis ji srid 'tsho'i bar du 'di lta ste/ yul chen po bcu drug la ang ga dang / ma ga d+hA dang / ko sa la dang / kA shi dang / br-i dzi dang / mal+la dang / pun dra dang / sreg pa dang / kA mA dang / a ban ti dang / ku ru dang / lnga len dang / bad sa dang / dpal sde dang / ya ba na dang / kam po rnams su 'di lta ste/ rin po che rdo rje dang / mar gad dang / pad ma rA ga dang / an da rnyil dang / mthon ka chen po dang / nor bu dang / mu tig dang / bai dU r+ya dang / shang ka shi la dang / byi ru dang / dngul dang / sa le sbram dang / rdo'i snying po dang / spug dang / mu tig dmar po dang / dung g.yas su 'khyil pa rnams brtson 'grus kyi stobs kyis bskyed rdul cing dri ma chags chags su lag mthus bsgrubs/ chos dang ldan zhing chos kyis thob pa de dag dang / yo byad dang / chos gos dang / zas dang / mal cha dang / nad kyi rkyen gyi gsos sman rnams kyis bsnyen bkur byas pa bas gang zag gnyis pas 'phags pa'i yan lag brgyad dang ldan pa'i bsnyen gnas la lan cig gnas pa la snga ma sbyin pa las byung ba'i bsod nams kyi phung po des ni 'phags pa'i yan lag brgyad dang ldan pa la gnas pa las byung ba'i bsod nams kyi phung po'i brgya'i char yang nye bar mi 'gro/ /stong gi cha dang / 72-1-266b brgya stong gi cha dang / grangs dang / cha dang / bgrang ba dang / dpe dang / rgyur yang nye bar mi 'gro ste/ gnas 'jog 'phags pa'i yan lag brgyad dang ldan pa la gnas pa ni de ltar 'bras bu che ba yin/ de ltar phan yon che ba yin/ de ltar mthu che ba yin/ de ltar rgya che ba yin no/ /gnas 'jog khyod 'phags pa'i yan lag brgyad dang ldan pa'i bsnyen gnas la nye bar gnas par gyis shig /cho 'phrul gyi phyogs la yang nan tan gyis sgrubs shig /lha dang mi rnams kyi 'dod pa la yang spyad par gyis shig /gnas 'jog 'on kyang lha'i bde ba la brten na mi'i rgyal srid dman te/ gang mi rnams kyi lo lnga bcu la rgyal chen bzhi'i ris kyi lha rnams kyi nyin zhag gcig ste/ nyin zhag gi tshad de'i zhag bcwa lnga la zla ba phyed/ zhag sum cu la zla ba gcig /zla ba bcu gnyis la lo gcig ste/ tshul des rtsis pa'i lha'i lo lnga brgya gang yin pa de ni rgyal chen bzhi'i ris kyi lha rnams kyi tshe'i tshad yin no/ /mi'i tshul gyis rtsis na lo brgya phrag dgu stong yod de/ gnas 'jog rigs kyi bu 'am/ rigs kyi bu mo gang dad pa dang ldan pa/ 'phags pa'i yan lag brgyad dang ldan pa'i bsnyen gnas la lan cig gnas pa ni lus dang bral na rgyal chen bzhi'i ris kyi lha rnams dang skal ba mnyam par skye ba de ni gnas yin te/ gnas 'jog ngas 'di las dgongs nas lha'i bde ba la brten na mi'i rgyal srid dman no zhes bka' stsal to/ /mi rnams kyi lo brgya la sum cu rtsa gsum pa rnams kyi nyin zhag gcig ste/ nyin zhag gi tshad de'i zhag bco lnga la zla ba phyed/ zhag sum cu la zla ba gcig /zla ba bcu gnyis la lo gcig ste/ tshul des rtsis pa'i lha'i lo stong gang yin pa de ni sum cu rtsa gsum pa'i lha rnams kyi tshe'i tshad yin no/ /mi'i tshul gyis rtsis na lo bye ba phrag gsum dang / lo brgya phrag stong drug cu yod de/ /rigs kyi bu'am/ rigs kyi bu mo dad pa dang ldan pa 'phags pa'i yan lag brgyad dang ldan pa'i bsnyen gnas la lan 72-1-267a cig gnas pa ni lus dang bral na sum cu rtsa gsum gyi lha rnams dang skal ba mnyam par skye ba de ni gnas yin te/ gnas 'jog ngas 'di la dgongs nas/ lha'i bde ba la brten na mi'i rgyal srid dman no zhes bka' stsal to/ /gnas 'jog gang mi rnams kyi lo nyis brgya la 'thab bral gyi lha rnams kyi nyin zhag gcig ste/ nyin zhag gi tshad de'i zhag bco lnga la zla ba phyed/ zhag sum cu la zla ba gcig /zla ba bcu gnyis la lo gcig ste/ tshul des rtsis pa'i lo nyis stong gang yin pa de ni 'thab bral gyi lha rnams kyi tshe'i tshad yin no/ /mi'i tshul gyis rtsis na lo bye ba phrag bcu bzhi dang / lo stong phrag bcu bzhi yod de/ rigs kyi bu'am/ rigs kyi bu mo gang dad pa dang ldan pa 'phags pa'i yan lag brgyad dang ldan pa'i bsnyen gnas la lan cig gnas pa ni lus dang bral na 'thab bral gyi lha rnams dang skal ba mnyam par skye ba de ni gnas yin te/ gnas 'jog ngas 'di las dgongs nas lha'i bde ba la brten na mi'i rgyal srid dman no zhes bka' stsal to/ /gnas 'jog gang mi rnams kyi lo bzhi brgya la dga' ldan gyi lha rnams kyi nyin zhag gcig ste/ nyin zhag gcig gi tshad de'i zhag bco lnga la zla ba phyed/ zhag sum cu la zla ba gcig /zla ba bcu gnyis la lo gcig ste/ ji ltar lor rtsis pa'i tshul gyis lha'i lo bzhi stong gang yin pa de ni dga' ldan gyi lha rnams kyi tshe'i tshad yin no/ /mi'i tshul gyis rtsis na lo bye ba phrag lnga bcu rtsa bdun dang / lo brgya phrag stong drug cu yod de/ gnas 'jog rigs kyi bu'am/ rigs kyi bu mo gang dad pa dang ldan pa 'phags pa'i yan lag brgyad dang ldan pa'i bsnyen gnas la lan cig gnas pa ni lus dang bral na dga' ldan gyi lha rnams dang skal ba mnyam du skye ba de ni gnas yin te/ gnas 'jog ngas 'di las dgongs nas lha'i bde ba la brten na mi'i rgyal srid dman no zhes bka' stsal to/ /gnas 'jog gang mi rnams kyi lo brgyad brgya la 'phrul dga'i 72-1-267b lha rnams kyi nyin zhag gcig ste/ nyin zhag gi tshad de'i zhag bco lnga la zla ba phyed/ zhag sum cu la zla ba gcig /zla ba bcu gnyis la lo gcig ste/ lor rtsis pa'i tshul des lha'i lo brgyad stong gang yin pa de ni 'phrul dga'i lha rnams kyi tshe'i tshad yin no/ /mi'i tshul gyis rtsis na lo bye ba phrag nyis stong sum brgya dang / lo brgya phrag stong bzhi bcu yod de/ /rigs kyi bu'am/ rigs kyi bu mo gang dad pa dang ldan pa 'phags pa'i yan lag brgyad dang ldan pa'i bsnyen gnas la lan cig gnas pa ni lus dang bral na 'phrul dga'i lha rnams dang skal ba mnyam par skye ba de ni gnas yin te/ gnas 'jog ngas 'di las dgongs nas lha'i bde ba la brten na mi'i rgyal srid dman no zhes bka' stsal to/ /gnas 'jog gang mi rnams kyi lo stong phrag drug cu la gzhan 'phrul dbang byed kyi lha rnams kyi nyin zhag gcig ste/ nyin zhag gi tshad ni de'i zhag bco lnga la zla ba phyed/zhag sum cu la zla ba gcig /zla ba bcu gnyis la lo gcig ste/ lor rtsis pa'i tshul des lo khri drug stong yod pa gang yin pa de ni gzhan 'phrul dbang byed kyi lha rnams kyi tshe'i tshad yin no/ /mi'i tshul gyis rtsis na lo bye ba phrag dgu brgya nyi shu rtsa gcig dang / lo brgya phrag stong drug cu yod de/ rigs kyi bu'am/ rigs kyi bu mo gang dad pa dang ldan pa 'phags pa'i yan lag brgyad dang ldan pa'i bsnyen gnas la lan cig gnas pa ni lus dang bral na gzhan 'phrul dbang byed kyi lha rnams dang skal ba mnyam par skye ba de ni gnas yin te/ gnas 'jog ngas 'di las dgongs nas lha'i bde ba la brten na mi'i rgyal srid dman no zhes bka' stsal to/ /gnas 'jog khyod 'phags pa'i yan lag brgyad dang ldan pa'i bsnyen gnas la nye bar gnas par gyis shig /cho 'phrul gyi phyogs la yang nan tan gyis sgrubs shig /lha dang mi rnams kyi 'dod pa la yang spyad par gyis shig /de nas bcom ldan 'das la bram ze gnas 'jog gis 'di skad ces gsol to/ /kye 72-1-268a gau ta ma bdag gis ni yun ring po zhig nas dgung zla re rer dka' thub drag po skyo skyor bgyis pa ni bdag gis ci yang ma rnyed de/ bdag ni deng slan chad sangs rgyas la skyabs su mchi'o/ /chos dang / dge 'dun la skyabs su mchi'o/ /mthu ji lta ba dang stobs ci mchis pas 'phags pa'i yan lag brgyad dang ldan pa'i bsnyen gnas la gnas par bgyi zhing sbyin pa yang stsal bar bgyi'o/ /bcom ldan 'das kyis bka' stsal pa/ gnas 'jog 'di ni legs pa yin te/ khyod kyi bya ba ni de yin no/ /bcom ldan 'das kyis de skad ces bka' stsal nas/ bram ze gnas 'jog dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa gnas 'jog ces bya ba'i mdo rdzogs so// //rgya gar gyi mkhan po sarba dz+nya de ba dang / zhu chen gyi lo ts+tsha ba ban de dpal brtsegs la sogs pas bsgyur cing zhus te gtan la phab pa// // |