@#/ /rgya gar skad du/ sU ka ri ka a ba dA na nA ma sU tra/ bod skad du/ phag mo'i rtogs pa brjod pa zhes bya ba'i mdo/dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ /de nas bcom ldan 'das kyis dge slong rnams la bka' stsal pa/ dge slong dag lha'i bu'i 'chi 'pho'i chos kyi snga ltas rnam pa lnga 'byung bar 'gyur te/ lnga gang zhe na/ gos rnams sngon dri ma mi chags pa las dri ma chags pa dang / me tog phreng rnams sngon mi rnyings pa las rnyings pa dang / mchan khung gnyis nas rngul 'byung ba dang / lus las dri mi zhim pa 'byung ba dang / lha'i bu'i 'chi 'pho'i chos ni rang gi stan la dga' ba mi 'thob pa'o/ /dge slong dag de nas lha'i bu zhig 'chi 'pho'i chos kyis sa la 'gre ldog ste brang rdung zhing ngu la/ snying rje rje skad du smre sngags 'don te/ kyi hud dal gyis 'bab pa/ kyi hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs 'du/ kyi hud sdug pa/ kyi hud ar mo nig lta bu'i rdo leb/ kyi hud lha'i 'dun sa/ kyi hud blta na sdug pa zhes snying rje rje skad du smre sngags 'don to/ /lha'i dbang po brgya byin gyis lha'i bu de shin tu sa la 'gre ldog cing snying rje rje skad du smre sngags 'don pa mthong ste/ mthong nas kyang lha'i bu ga la ba der song ste phyin nas lha'i bu de la 'di skad ces smras so/ /grogs po khyod ci'i phyir shin tu sa la 'gre ldog cing snying rje rje skad du smre sngags 'don te/ kyi hud 75-1-290a dal gyis 'bab pa/ kyi hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs 'du/ kyi hud sdug pa/ kyi hud ar mo nig lta bu'i rdo leb/ kyi hud lha'i 'dun sa/ kyi hud blta na sdug pa zhes snying rje rje skad du smre sngags 'don par byed/ de skad ces smras pa dang / lha'i dbang po brgya byin la lha'i bu des 'di skad ces smras so/ /kau shi ka bdag ni 'dir lha'i bde ba dang bral te zhag bdun na 'di nas rgyal po'i khab kyi grong khyer chen por phag mo'i mngal du skye bar 'gyur te/ bdag ni der lo mang po zhig tu phyi sa dang gcin 'tshal bar 'gyur bas de'i slad du bdag de skad mchi'o/ /grogs po tshur shog /khyod rkang gnyis rnams kyi mchog sangs rgyas la skyabs su song shig /'dod chags dang bral ba rnams kyi mchog chos la skyabs su song shig /tshogs rnams kyi mchog dge 'dun la skyabs su song shig /des 'di skad ces smras so/ /grogs po bdag ni rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ / tshogs rnams kyi mchog dge 'dun la skyabs su mchi'o/ /de nas lha'i bu des skyabs gsum bzung ste 'chi 'pho'i dus byas nas/ dga' ldan gyi lha'i ris su skyes so/ /de nas lha'i dbang po brgya byin gyis lha'i bu de bltas pa ci lha'i bu de phag mo'i mngal du skyes sam ma skyes zhes bltas na yang ma skyes/ sems can dmyal ba dang / dud 'gro'i skye gnas su skyes sam ma skyes zhes bltas na yang ma skyes te/ lha rnams ni chos nyid kyis 'og ma la shes pa dang mthong ba 'jug gi gong ma la ni ma yin no/ /de nas lha'i dbang po brgya byin the tsom skyes nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas kyang lha'i dbang po brgya byin gyis bcom ldan 'das la 'di skad ces gsol to/ /bcom ldan 'das bdag gis 'di na lha'i bu zhig 'chi 'pho'i chos 75-1-290b byung nas dogs la 'gre ldog cing snying rje rje skad du smre sngags 'don te/ kyi hud dal gyis 'bab pa/ kyi hud rdzing / kyi hud rdzing bu/ kyi hud shing rta sna tshogs can gyi tshal/ kyi hud rtsub 'gyur gyi tshal/ kyi hud dga' ba'i tshal/ kyi hud 'dres pa'i tshal/ kyi hud yongs 'du/ kyi hud sdug pa/ kyi hud ar mo nig lta bu'i rdo leb/ kyi hud lha'i 'dunas/ kyi hud blta na sdug pa zhes snying rje rje skad du smre sngags 'don pa mthong ste/ bdag der mchis nas 'di skad ces bgyis so/ /grogs po khyod ci'i phyir brang rdung zhing ngu la mya ngan byed de/ ngu zhing smre sngags 'don/ des smras pa/ bdag ni 'dir lha'i bde ba dang bral te zhag bdun na 'di nas rgyal po'i khab kyi grong khyer chen por phag mo'i mngal du skye bar 'gyur te/ bdag ni der lo mang po zhig tu phyi sa dang gcin 'tshal bar 'gyur bas de'i slad du bdag de skad mchi'o/ /grogs po tshur shog /khyod rkang gnyis rnams kyi mchog sangs rgyas la skyabs su song shig /'dod chags dang bral ba rnams kyi mchog chos la skyabs su song shig /tshogs rnams kyi mchog dge 'dun la skyabs su song shig /de nas lha'i bu de dud 'gro'i skye gnas kyis 'jigs shing skrag /'chi bas 'jigs shing skrag ste/ de 'di skad ces mchi'o/ /grogs po bdag ni 'di ltar rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la skyabs su mchi'o/ /de nas lha'i bu des skyabs gsum bzung nas 'chi 'pho'i dus bgyis pa de/ bcom ldan 'das gang du skyes lags/ bcom ldan 'das kyis bka' stsal pa/ kau shi ka lha'i bu de ni dga' ldan lha'i ris der skyes te/ lha'i 'dod pa thams cad kyang phun sum tshogs so/ /de nas lha'i dbang po brgya byin tshim zhing mgu ste/ rab tu dga' nas dga' ba dang yid bde ba skyes te/ dbang po tshim nas de'i tshe tshigs su bcad de gsol pa/ gang dag sangs rgyas skyabs mchi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ / 75-1-291a gang dag chos la skyabs mchi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ /gang dag dge 'dun skyabs mchi ba/ /de dag ngan 'gror mi mchi ste/ /mi yi lus rnams spangs nas su/ /de dag lha lus thob par 'gyur/ /gang dag nyin mtshan rtag par yang / /sangs rgyas rjes su dran pa dang / /gang dag sangs rgyas skyabs mchis pa/ /mi de dag gi rnyed pa che/ /gang dag nyin mtshan rtag par yang / /chos ni rjes su dran pa dang / /gang dag chos la skyabs mchis pa/ /mi de dag gi rnyed pa che/ / gang dag nyin mtshan rtag par yang / /dge 'dun rjes su dran pa dang / /gang dag dge 'dun skyabs mchis pa/ /mi de dag gi rnyed pa che/ /de nas bcom ldan 'das kyis lha'i dbang po brgya byin gyi rjes su 'thun par brjod pa'i tshigs su bcad pa bka' stsal pa/ kau shi ka de de bzhin te/ de de bzhin no/ /gang dag sangs rgyas skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur/ /gang dag chos la skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur/ /gang dag dge 'dun skyabs dong ba/ /de dag ngan 'gror mi 'gro ste/ /mi yi lus rnams spangs nas su/ /de dag lha lus thob par 'gyur/ /de nas lha'i dbang po brgya byin bcom ldan 'das kyis gsungs pa la mngon par dga' nas bcom ldan 'das kyi zhabs la mgo bos phyag 'tshal te/ bcom ldan 'das la lag pa thal mo sbyar nas lan gsum bskor ba byas te/ de nyid du mi snang bar gyur to/ /bcom ldan 'das kyis de skad ces bka' stsal nas dge slong de dag yi rangs te/ bcom ldan 'das kyis gsungs pa la mngon par bstod do/ /phag mo'i rtogs pa brjod pa'i mdo rdzogs so// //rgya gar gyi mkhan po dzi na mi tra dang / zhu chen gyi lots+tsha ba ban de ye shes sdes bsgyur cing zhus te gtan la phab pa// //sarba shu b+haM b+ha ban+tu// // |