@##/ /rgya gar skad du/ shrI kha sa ma tan+t+ra rA dza nA ma/ bod skad du/ dpal nam mkha' dang mnyam pa'i rgyud kyi rgyal po zhes bya ba/dpal bde ba chen po la phyag 'tshal lo/ /'di 79-1-199b skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'i b+ha ga la snyoms par bzhugs so/ /de'i tshe 'khor 'dus pa de dag gi nang nas mkha' spyod ma/ sa spyod ma dang / sa 'og na spyod pa ma gsum la bcom ldan 'das kyis zhal 'dzum pa mdzad de/ gsang ba'i don 'di gsungs pa/ /dad ldan snying rjer ldan dang rtse gcig sems/ /lus ngag gus bcas gzhan la phan sems ldan/ /'jigs med brtul zhugs ldan zhing zab mo yi/ /lam la spro bar gyis la legs par nyon/ /mkha' 'gro khyod kyi mtshan nyid ni/ /nga yis khyod la bshad par bya/ /mkha' spyod steng sgo'i rlung yin te/ /sa spyod bar du thig le'i sgo/ /sa 'og spyod pa shu kra'i sgo/ /sgo gsum sku gsung thugs yin te/ /dang po mkha' spyod mtshan nyid kyang / /rnam pa gsum du shes bya ste/ /bems po'i rlung dang rnam rtog rlung / /kun gyi mtshan nyid ye shes rlung / /mdor bstan de nyid rim pas dbye/ /gnyis med rlung ni ma ning ste/ /zung 'jug thabs dang shes rab rlung / /ldang 'jug sku gsung thugs kyi rlung / /snying dang gzhang kha mgrin pa dang / / lte ba lus kyis khyab pa ru/ /rigs lnga'i rlung ni khyab par gnas/ /rgyu ba bzhi ni 'byung ba'i rlung / /dngas snyigs 'byed pa brgyad du 'gyur/ /'di nyid rlung ni thun brgyad de/ /thun re la ni 'pho ba gnyis/ /rlung gi 'pho ba bcu drug yin/ /'pho ba gcig la chu tshod gnyis/ / chu tshod re la dbyug gu gnyis/ /rlung gi dbyug gu drug cu bzhi/ /de bzhin chu tshod sum cu gnyis/ /nyi khri chig stong drug brgya sogs/ /sems dang sems min 'dres pa'i rlung / /rags pa dang ni phra ba la/ /mkhas pas sems kyi bzhon par gzung / /rnam rtog gzung 'dzin sems kyi rta/ /gzung 'dzin gnyis 'gags dbu mar gnas/ /de nyid ye shes rdo rje'i rlung / /dbye ba thabs dang shes rab gnyis/ /'di rnams mkha' spyod rang bzhin te/ /de dag man ngag mkhas pas brtag /yon tan skyon dang rtags rnams kyis/ /rlung gi 79-1-200a mtshan nyid shes par bya/ /de dag kun gyi rten nyid kyang / /gzhol ma dang ni g.yon ma dang / /'di ni gzhu yi rnam par gnas/ /bems po rlung gi lam yin te/ /dbang po mngon sum lam yin pas/ /sna yi ri rab gling bzhi la/ /nyi zla byang nub lhor rgyug gis/ /thabs dang shes rab skor sogs la/ /'bad pas sems ni gzung bar bya/ /'di dag bems pos yang dag gnas/ /mi shes pa yi rab rib kyis/ /rin chen sems ni dri can byas/ /'di ni rnam rtog rlung yin te/ /'di nyid kyis ni lam gyur ba/ /ro ma dang ni rkyang ma'o/ /sbrul 'khyil lta bu'i rnam pa ste/ /rnal 'byor gyi ni dmigs pa'i yul/ /gnas der rnam rtog rlung 'gag go/ /rang rig gdod nas ma skyes pa/ /'di nyid ye shes rdo rje'i rlung / /kun 'dar ma yi rtsa la brten/ /tsaN+DA lI ni shing lta bu/ /rang rig ye shes spyod yul te/ /gnas der 'bad de rang rig gzung / /mkha' spyod rlung gi rang bzhin phyir/ /'di dag rdo rje'i lam yin no/ /de nas sa spyod bshad bya ste/ /rang rig ye shes gang 'dod pas/ /tsaN+DA lI yi bye brag brtag /dang por rang bzhin tsaN+DA lI/ /gnyis pa gtum mo tsaN+DA lI/ /gsum pa kha sbyar tsaN+DA lI/ /de bzhin gcer bu'i tsaN+DA lI/ /de nyid la yang dbye ba ste/ /gcer bu gtum mo shin tu gtum/ /yang dag gtum mo gzhan sbyar dang / /bye brag kun la sbyar bar bya/ /gcer bu shin tu gcer bu dang / /shin tu gcer bu gcer bu sogs/ /'di dag kun la sbyar bar bya/ /dbye na rnam pa bcu gnyis te/ /yan lag bcu tshan bzhi dang brgyad/ /sa spyod ma yi rang bzhin te/ /stong phrag bdun cu rtsa gnyis sogs/ /gzhan skyes kyi ni khro mo tsam/ /phra ba de las bzlog pa'o/ /brgya dang nyi shu skra yi rtse/ / sum cu rtsa gnyis skra yi rtse/ /lnga yi cha ste gtso bo gsum/ /gsum 'dus yungs kar gyi ni tshad/ /dbus dang g.yas g.yon phra sbom dang / /gnyis 'gyur bye brag shes par bya/ /dngas ma dang ni snyigs ma'i rtsar/ /rang bzhin du ni gnas pa la/ /yi ge lta bu'i rtsa mdud 79-1-200b kyang / /dang po'i sgra ru gang shes pa/ /sa spyod ma yi rang bzhin no/ /gnas la sogs pa gzhan nas shes/ /'di nyid nor bu rin po che/ /'di la brten nas thams cad 'byung / /rig 'chol gnas 'chol tshad 'chol dang / /dbyibs dang kha dog grangs la sogs/ / 'chol pa las ni dngos grub min/ /de nyid bral ba'i rang bzhin ni/ /sa spyod ma yi dngos grub ste/ /thams cad kun gyi rten yin no/ /sa 'og spyod ma'i rang bzhin te/ /de nas yang dag rab bshad pa/ /byang chub sems ni rnam pa gsum/ /dang po chos nyid sems yin te/ /'di ni shes brjod yul las 'das/ /gnyis pa rang rig byang chub sems/ /dper na rkyen gyis shel sgong bzhin/ /gsum pa bems po'i byang chub sems/ /sih+la dang ni ga pur te/ /don dam kun rdzob gnyis su gsungs/ /las kyi rlung dang las kyi mes/ / g.yo ba kun rdzob byang chub sems/ /ye shes rlung dang ye shes mes/ /g.yo ba don dam sems yin te/ /dngas snyigs las ni rim pa yin/ /dbyibs dang kha dog las kyis ni/ /sems kyi khyad par shes par bya/ /las kyi rlung gis mi g.yo zhing / /las kyi me yis mi 'dzag par/ /kha ba lta bu'i mtshan nyid las/ /mi shigs ha~M gi dbyibs 'dra ste/ /nor ba kun+da'i mdog lta bu/ /dkar la 'tsher dang gzi mdangs snum/ /bde ba chen po'i skur 'byung ba/ /'di ni don dam byang chub sems/ /dmar la dngas pa'i rang bzhin la/ / khyad par bzhi ni thun mong ste/ /'di ni shes rab byang chub sems/ /de las bzlog pa'i dman pa gnyis/ /'og sgor gnas shing srid pa skye/ /dman pa'i rkyen gyis g.yo bar byed/ /de phyir don dam kun rdzob kyis/ /sems kyi mtshan nyid shes par bya/ /rgyu 'chol ba las dngos grub med/ /rkyen 'chol ba las de bzhin te/ /bla ma'i zhal nas shes par bya/ /don dam sems kyi spyod yul min/ /kun rdzob tshor ba bde ba'i yul/ /sa 'og spyod pa'i rang bzhin te/ /rdo rje gsum bsgom mi phyed pa/ /de nyid rdo rje sems dpa' ste/ /yi ge 79-1-201a dang ni yan lag dang / /bsdus pa'i don dang spyi yi don/ /sbas pa'i don dang mthar thug don/ /sna tshogs sems las 'byung bar 'gyur/ /nor bu dang ni sil snyan bzhin/ /rtog med rten las sna tshogs 'byung / /A li kA li ma ning dang / /drug tu sbyor ba brtag par bya/ /sgra mtha'i yi ge bsam mi khyab/ /yan lag rnam pa gsum yin te/ /rgyu 'bras brda dang brda can dang / /brjod bya dang ni rjod byed do/ /de las bzlog pa bsdus par bshad/ /theg pa gsum dang de las gzhan/ /thun mong spyi ru nges pa ste/ /bye brag rang las shes par bya/ /sbas pa dbang dang sngags su dbye/ /sngags la bzhi ste dbang la gnyis/ /chos ni spyi dang bye brag go/ /de dag kun gyi mtshan nyid kyang / /bla ma'i zhal nas shes par bya/ /snod dang snod min bye brag kyang / /bla mas legs par brtag bya ste/ /de nyid yang dag rtogs gyur na/ /ston pa med cing bstan pa med/ /bsam gtan la sogs 'jig pa med/ /sangs rgyas gzugs ni sna tshogs 'byung / /bya ba bcu gnyis la sogs pa/ /chos kyi 'khor lo sna tshogs bskor/ /dman pa rnams la bya ba'i rgyud/ /bya med rnal 'byor de ltag la/ /de rjes rnal 'byor nyid gsungs te/ /rnal 'byor nang pa de ltag la/ /phyi nas rnal 'byor ma rgyud ni/ /shes rab snying po brtser gyur pa'i/ /thabs dang shes rab bsrub shing la/ /gnyis med thugs kyis bsrubs pa las/ /bdud rtsi'i ro ni nyi shu bzhi/ /nor bu rin chen rgyud ces brjod/ /'jig rten 'jig rten 'das pa yi/ /dngos grub thams cad 'di las 'byung / /ji ltar ma dkrogs 'o ma las/ /'dod pa gang yang 'byung ba min/ /de bzhin lo grangs mang po las/ /dngos grub myur du 'byung ba min/ /de phyir rin chen nyi shu bzhi/ / bdud rtsi ro 'dra seng ge'i gzugs/ /gnas ni nyi shu bzhi nyid kyang / /sku gsung thugs kyis byin brlabs te/ /mkha' 'gro nyi shu bzhi la gtad/ /phyag rgya bzhi yis rgyas btab bo/ /dam du sba zhing dam du spel/ /rgya las 'das na dam tshig nyams/ /sngags dang dbyibs dang chos 79-1-201b bdag ni/ /sku gsung thugs kyi rang bzhin te/ /de yi ngo bor rgyud kun brtag /sngags la gnyis te chos la gnyis/ /dbyibs kyang de bzhin shes par bya/ /re re'i bye brag dbye ba yang / /bla ma'i zhal nas shes par bya/ /phyi nang sbas pa mthar thug bzhi/ /rgyud kun phyag rgya bzhi yin te/ /de nyid dbye ba mkhas pas brtag /de nyid rtogs na rgyud dang ldan/ /de las bzlog pa 'das pa'o/ /rang bzhin gyis ni tsaN+DA lI/ /gnas ni nyi shu rtsa bzhi ste/ /rtsa gsum gyis ni byin gyis brlabs/ /gnas ni nyi shu rtsa bzhi ru/ /mkha' 'gro nyi shu rtsa bzhi la/ /rgyud ni nyi shu rtsa bzhi gtad/ /pu ru rab gtum gsang rdo rje/ /dza ru gtum mig gsang ba gcod/ /o ru 'od ldan bsam mi khyab/ /A ru sna rtse nam mkha' mnyam/ /go ru bstan blo nam mkha' che/ /ra ru mi'u thung sku gsung thugs/ /de ru lang ka rin chen phreng / /ma ru shing grib dam tshig che/ /ka ru e rU stobs po che/ /o ru 'jigs byed ye shes gsang / /tri ru rlung shugs ye shes phreng / /ko ru chang 'thung ye shes 'bar/ /ku ru sh+yA ma zla ba'i phreng / /la ru shin bzang rin chen 'bar/ /ka ru rta rna nyi ma'i 'khor/ /he ru kha kha ye shes rgyal/ /bre ru 'khor shugs mkha' 'gro gsang / / gr-i ru khaN+Da gsang me 'bar/ /sau ru shoN+Di gsang bdud rtsi/ /su ru 'khor lo dur khrod rgyan/ /na ru shin dpa' rdo rje rgyal/ /si ru stobs chen ye shes rgyal/ /ma ru 'khor sgyur chags pa'i rgyal/ /ku ru brtson 'grus mkha' 'gro sdom/ /de dag gtad do legs par sbos/ /nang du tsaN+TA lI dag ni/ /nyi shu bzhi ni gtad pa ste/ /dang po gsang ba gnyis pa yang / /rang bzhin yin te de nas dbang / /rkyen ni tha mas gsungs pa ste/ /mkha' 'gro khyed kyi rang bzhin te/ /de nas dngos grub gang 'dod sbyin/ /dngos grub dam pa gang 'dod pas/ /dbang dang dam tshig ldan byas te/ / rta dang glang po la sogs dang / /bu dang chung ma nor gyi dbyig /bsnyen bkur dag gis bsnyen byas te/ /bdud rtsi ro yi ra li las/ /bla ma'i zhal nas dngos grub blang / /yid la zung la dran par gyis/ /de nas 'khor 'dus pa de dag thams cad rjes su yi rang bar gyur to/ /sku 79-1-202a gsung thugs kyi rang bzhin dpal nam mkha' dang mnyam pa'i rgyud kyi rgyal po zhes bya ba rdzogs so// //paN+Di ta ga ya d+ha ra dang / dge slong shAkya ye shes kyis zhus shing bsgyur ba'o// // |