@##/ /rgya gar skad du/ shrI kA ya bAk+tsit+ta tan+t+ra rA dza/ bod skad du/ dpal sku gsung thugs kyi rgyud kyi rgyal po/dpal rdo rje sems dpa' la phyag 'tshal lo/ /'di skad bdag gis 'dod chags che/ /mchog gyur 'di la yang dag gnas/ /mgon po thugs rje che ldan pa/ /khyod kyis bdag la bshad du gsol/ /rdo rje 'dzin pas bka' stsal pa/ /sku ni bum pa'i ngo bo ste/ /gsung ni gsang ba'i ngo bo 'dod/ /thugs kyang shes rab ye shes te/ /sangs rgyas spyan dang mA ma kI/ /dam tshig sgrol ma gos dkar mo/ /rdo rje 'dzin la 'di skad gsol/ /rgyud kyi don la rab goms shing / /smra ba'i tshig gis ma rmongs la/ /gzhan gyi rtsod pas mi rdzi yang / /dbang dang man ngag ma thob par/ /dbang bskur rab gnas sbyin sreg sogs/ /sngags spyod ngal ba don med yin/ /shi nas sems can dmyal bar skye/ /de phyir gtso bos dbang bskur gyi/ /man ngag yang dag bshad du gsol/ / rdo rje 'dzin pas bka' stsal pa/ /dang por bum dbang rim pa yang / /gnas ni shin tu bsngags pa btsal/ /bkra shis yid dga' shin tu snum/ /bkra shis bya rnams snyan par sgrogs/ /dpag bsam shing rgyas yod par 'dod/ /gzhan yang dur khrod shing gcig gam/ / chu ngogs dag la sogs pa ru/ /sa bdag sa yi lha mo la/ /gtor ma sbyin sreg mchod yon gyis/ /sa bslang phyir ni mtho rnams gzugs/ /de nas dang po bsnyen pa dbul/ /bsnyen pa gsum ni rab 'bring tha/ /mtshan ma grangs dang dus su gsungs/ /re re la yang gsum gsum ste/ /mtshan ma gzugs dang 'od dang sgra/ /grangs ni stong dang khri dang 'bum/ /dus ni bcwa lnga bcu gsum dang / /bdun du bsnyen pa rdzogs pa dang / /lha rnams bsnyen pas mnyes byas nas/ /lha dang slob ma rdzas rnams kun/ /lhag par gnas pa tshul bzhin bya/ / 79-1-204a bkra shis lo grangs ldan pa yi/ /bu mos sa yi phyogs mthun pa'i/ /ku sha btsal la mtshan ma brtag /so shing rtse mor me tog dri/ /bsrung skud la sogs mtshan ma brtag /dbang gi dkyil 'khor bskyed par bya/ /dkyil 'khor slob ma rab 'bring tha/ / ting 'dzin me tog rdul tshon rim/ /gang dang ldan pa de nyid do/ /de nas mchod rdzas rim pa dgram/ /khaM bIr yi sngags kyis kyang / /de la rdo rje bya ba par bya/ /de nas ku sha la sogs pa/ /spogs pa'i cho ga dang bcas bya/ /gzhan yang sngon du 'gro ba'i rdzas/ /bla ma mnyes par bya ba dang / /dkyil 'khor lha rnams mchod pa'i phyir/ /rta dang glang po ma he dang / /rin chen la sogs gter rnams dang / /spos dang mar me la sogs pa/ /brgya'am stong ngam khri'am 'bum/ /bla re rgyan dang ba dan sogs/ /byin brlabs tshogs bsag phyi ru dgod/ / de nas slob ma gzhug par bya/ /khrus dang yan lag dri yis byug /kye ho khyod ni ji lta bu/ /'jig rten 'phrul pa las sad na/ /he ru kar grags chen po yi/ /dkyil 'khor chen por khyod rol lam/ /dad pa dang bcas spro bar gyis/ /rnam rtog dang bral rdo rje sems/ /dga' chen khyod bdag ston pa po/ /rdo rje 'dzin pa dgongs su gsol/ /byang chub chen por lung bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems ni bdag la stsol/ /pad+ma las byung bdag la stsol/ /gsang ba dgyes pa bdag la stsol/ /thar pa chen po'i grong mchog tu/ /mgon po bdag ni 'jug par 'tshal/ /legs so legs so rigs kyi bu/ /rgyal sras kun gyi nang na mchog /rnam rtog thams cad 'jig byed pas/ /gnyis med khyod kyis blang bar bya/ /mi bskyod bcom ldan dang mtshungs pa'i/ /zil gyis mi non khyod kyis blangs/ /dam tshig spyod pa spyad pa yi/ /mchog gi de nyid blang bar bya/ /thabs dang shes rab zung du sbrel/ /nam yang khyod kyis spang mi bya/ /tshangs spyod de bzhin bsam gtan la/ /'bad pas sems ni brtan par bya/ / 79-1-204b chang ni rtag btung khro mi bya/ /de bzhin sha yang shes par bya/ /gzhan gyi phyag rgya bsten par bya/ /'di ni dam tshig brgyad yin no/ /dkon mchog gsum la skyabs su 'gro/ /thun mong sdom dang sems skyed sbyin/ /bskor ba lan gsum phyag gsum bya/ /yol bas bar du bcad nas ni/ /mig la sogs pa lnga bkab la/ /lha grangs du yod me tog sbyin/ /kun byed chu yis bsal dag bya/ /me tog dang bcas rdo rje yang / /de yi snying la gzhag la bsgom/ /slob dpon la ni brnyas byed sogs/ /ltung ba'i nyes pa brjod par bya/ /phyi yi rdo rje 'dzin pa dbab/ /sngon du sdig pa lan gsum dral/ /mig gis gzugs rnams mthong ba dang / /rna bas sgra dang sna yis dri/ /lce yis ro dang lus kyis reg /dngos grub phrin las so so ru/ /mkhas pas brtag par shes par bya/ /me tog dor te lha yang sbyin/ / 'khor rnams gtso bo'i yan lag yin/ /gtso bo'i mtshan nyid shes par bya/ /ji ltar gso ba'i sman pa yis/ /dbang po lnga yi zug rngu 'byin/ /de bzhin sems dpa' chen po yis/ /mi shes pa yi rab rib kun/ /rgyal ba rnams kyis yang dag bsal/ /de la gzugs brnyan dkyil 'khor bstan/ /dbang gi dkyil 'khor byang shar du/ /pad+ma 'dab ma brgyad pa ru/ /gzhag la rig pa'i dbang lnga bskur/ /chu khams mi bskyod me long gis/ /rdo rje rigs kyi phrin las 'grub/ /dbu rgyan rin chen 'byung ldan te/ /mnyam nyid ye shes rang bzhin gyis/ /rin chen rigs kyi phrin las 'grub/ /'od dpag med pa'i rdo rje'i dbang / /so sor rtog pa'i rang bzhin gyis/ /pad+ma rigs kyis phrin las byed/ /dril bu don yod grub pa ste/ /bya ba nan tan ye shes kyis/ /phrin las sna tshogs byed par 'gyur/ / rigs las dras nas ming gi dbang / /rdo rje dang sbyar rdo rje sems/ /rnam snang chen po'i ngo bo ste/ /chos dbyings ye shes rang bzhin las/ /de bzhin nyid kyi mtshan nyid 'dzin/ /mi 'jigs seng ge'i khri stengs su/ /rigs byed slob dpon dbang sbyin bya/ /bdud bzhi 79-1-205a 'joms pas rgyal chen bzhi/ /chos rnams mi nub rgyal mtshan gzugs/ /chos kyi sku yis kun la khyab/ /gdugs kyis steng nas dgab par bya/ /rdo rje dril bu brtul zhugs gnyis/ /phyag rgya dam tshig gsum po yin/ /dbugs dbyung ba dang lung bstan dang / /rjes su gnang dang phyir mi ldog /brtan par byed dang rnam pa lnga/ /gzhan yang rdzas kyi bye brag rnams/ /rin chen bdun la sogs pa kun/ /thun mong yin par nga yis gsungs/ /bum pa'i dbang la rnam gsum ste/ /dkyil 'khor du 'jug dang po yin/ / gnyis pa rig pa'i dbang yin te/ /brtan par byed pa gsum pa'o/ /de nas gsang ba bshad bya ba/ /lus ni ri rab lhun po la/ /byang chub sems kyi gnas bcas nas/ /bde ba'i stan la gnas nas su/ /gsang ba'i dbang gi rten gyur pa/ /rig ma dang po btsal bar bya/ / dang po shes pas brtag pa dang / /bdag dbang yod par blang ba dang / /nyes pa dag par sbyang ba dang / /dkyil 'khor bskyed par bya ba dang / /bar chod bgegs rnams zhi ba dang / /bsrung dang de la tshogs kyis mchod/ /dri yi thig le du ma bya/ /g.yon na gnas pa de nyid dang / / bsrub dang bsrub bcas sbyor byas dang / /bsrubs las bde ba'i chu rgyun gyis/ /lus kun khyab nas gsang ba ru/ /dkar la rtsa dmar lta bur 'jag /dkyil 'khor du 'jug gong dang 'dra/ /ro ma'i 'khor lor byA bsams la/ /lce de pad+mar byin brlabs te/ /lce yi rtse mor b+h+ya:bsams la/ /sih+la ga pur 'dres pa yis/ /b+h+yaHla bzhag ste de la bstim/ /so gnyis longs spyod mnyam sbyar la/ /dbus su mi dmigs bsgom par bya/ /gsang ba'i dbang la rnam gsum ste/ /rdo rje gtso mor sbyin pa dang / /sbom po khro mos sbyin pa dang / /rdo rje gre tshangs sbyin pa'o/ /shes rab ye shes dbang la yang / /dang por shes rab brtag pa ni/ /lus dang ngag dang yid dang gsum/ /mkhas pas brtag cing shes par bya/ /de nas khyad par lnga brtags te/ /rigs dang lang tsho longs spyod dang / /rgyan dang gzugs kyi khyad 79-1-205b bar lnga/ /phyi yi brtag pa yin par gsungs/ /sems brtan rdo rje yi ni rigs/ /khyad par yin par nga yis gsungs/ /rnam rtog chung ba rdo rje yi/ /lang tsho'i khyad par yin par gsungs/ /mi rtog pas brgyan shes pa ste/ /rdo rje'i rgyan gyi khyad par yin/ /de nyid gsum du mi 'gyur ba/ /mi nub chos kyi rgyal mtshan te/ /rdo rje gzugs kyi khyad par yin/ /chos rnams thams cad stong pa nyid/ /de yi ro la longs spyod pas/ /rdo rje'i longs spyod khyad par ro/ /kun 'dar ma ste thugs kyi rigs/ /rigs kyi khyad par yin pa'o/ / de nyid mda' ltar mkhrang ba ni/ /thugs kyi lang tsho'i khyad par ro/ /rtsa de dmar la dngas pa dang / /byang chub sems ni dkar la dngas/ /gnyis su med par gsal ba'i tshul/ /dper na nor bu ke ke ru/ /dar la brgyus pa ji bzhin du/ /thugs kyi gzugs kyi khyad par ro/ /la la nA dang ra sa nA/ /a ba d+hU tIr gnyis med la/ /thugs kyi longs spyod khyad par ro/ /dang por phyi la gnyis pa nang / /gsum pa gsang ba'i brtag pa'o/ /lus brtag pa ni sku yin te/ /ngag brtag pa ni gsung du 'gyur/ /yid brtag thugs su 'gyur ba'o/ /sgyu ma tsam gyis dgongs pa'i don/ /kun la khyab par shes par bya/ /lus kyi drug la ngag gi bdun/ /sems kyi bdun po sgyu ma'i tshul/ /dang por smig rgyu chur 'khrul dang / /gnyis pa smig rgyu nyid yin te/ /gsum pa smig rgyu mi snang bzhin/ /de bzhin zhal nas shes par bya/ /chu la bdun no mar la gcig /dri ni bdun te sha la gnyis/ /sgo nga bzhi ste 'o ma gsum/ /'di rnams btsal ba'i rten gyur pa/ /lo ni gsum bzhi yin par gsungs/ /ka ra gnyis te bu ram gcig /chang ni gnyis su shes par bya/ /rgyan ni bye brag sna tshogs so/ /dgun dang de bzhin ston gyi sha/ /zhag gcig na ni bcud dang ldan/ /dbyar dang dpyid kyi sha rnams kyang / /drod dang ldan na bcud dang ldan/ /rang bzhin shi ba'i sha yin te/ /'dun pa byas na dam tshig nyams/ /rtsa ba lnga dang yan 79-1-206a lag bcas/ /gzhan yang 'bras bu la sogs sman/ /mar dang bcas pas sbyar bar bya/ /sha yang mar gyi de bzhin no/ /kha bas kun gyi bcud skyed de/ /mngar ba kun gyis ro tsa byed/ /bcud bskyed sha ni gzhon nu zhes/ /ro tsa sha ni bcwa lnga yin/ / bcud bskyed sha dang mar gnyis kyang / /lnga dang lnga yi cha yis bsres/ /chang ni mnyam por gsungs pa'o/ /ro tsa ba yi sha la yang / /'o ma sgo nga cha mnyam par/ /lnga gsum lnga gnyis gtso bor bya/ /kha ra'i chang ngam 'o ma 'am/ /sha dang mnyam por sbyin par bya/ /'di ni yan lag spros bcas so/ /de nas mtshams bcad bsnyen pa dang / /dam tshig sna tshogs bya ba yang / /spros pa med pa'i yan lag yin/ /dbang bskur sngon du bsgom pa'i don/ /dbang thob phyir ni nga yis gsungs/ /rig ma gtad dang man ngag sbyin/ /brda rnams bya zhing 'dod pa'i rtags/ /brtag pa shin tu spros pa med/ /phyag dang zhabs la sogs pas 'khyud/ /dang po'i sbyor thabs zhes gsungs so/ /dbu rgyan mgul rgyan la sogs pa/ /sbyor thabs chen po zhes bya ste/ /langs pa tsog pu gan rkyal dang / /kha sbub 'phred dang lnga yin te/ /'di rnams kun gyi dgongs pa zab/ /dgongs med spyad pa spyod byed pa/ /'di ni mnar med skye ba'i rgyu/ /tha mal pa las brgya 'gyur gyis/ /bum pa'i dbang dang 'brel pa'o/ /bum pa dang ni gsang ba ste/ /gsang ba las gzhan gsum pa ste/ /de yi rnam smin brjod mi lang / /dkyil 'khor du 'jug rim pa ni/ /bla ma'i zhal nas shes par bya/ /yan lag bdun bsgoms sbyor ba dngos/ /khyad par rnam pa gsum las byung / /sngags dang sman ni dang po ste/ /gnyis pa sbyor thabs yin par gsungs/ /gsum pa ting nge 'dzin yin te/ /sngags dang sman gyis kun+da drang / /rked bcing tshad dang gnas pa'i tshad/ /drang ba'i tshad rnams shes par bya/ /'byung ba bzhi dang rigs mthun pa'i/ /rked bcing rked pa'i tshad dang mnyam/ /sor gsum sor bzhi dar ram men/ /gnas pa'i tshad ni rnam pa 79-1-206b drug /rnam thar gsang ba'i pho brang gnas/ /skye mched rig par gnas pa'o/ /stong pa rta mgrin 'khor lor gnas/ /khams rnams gsang ba bde skyong gnas/ /'dab la sprul pa'i 'khor lor gnas/ /yang dag spong ba snying gar gnas/ /he ru kar ni ma gshigs shing / / rdo rje mnga' yis ma brgyab pa'o/ /drang ba'i tshad ni sor bzhi 'byung / /dang por khrus byas gnyis pa la/ /sman dang snum dang dri dang gsum/ /sum cha sum gnyis stod smad du/ /lus la bsku zhing me la bdug /rtse gsum rtsa ni shin tu zab/ /ba spru ba dang lca ba dang / /ra mnye ba dang nye'u shing dang / /ra mo shags dang yan lag bcas/ /rdo la sogs pa lnga sbyar dang / /gzhan yang sman dang snum dang dri/ /dar la sogs pa'i nang du blugs/ /sgo gnyis nas ni tho ldos bdug /zab pa'i sngags btab bsgoms byas na/ /dang por mtshan ma shes par bya/ / chags pa'i gzi ldan sna tshogs 'byung / /tha ma'ang gsum mam bdun na 'byung / /dgongs pa'i bye brag shes gyur nas/ /sngags dang sman gyi khyad par ro/ /dgongs pa mi shes 'dod chags phyir/ /sman la sogs pa btsal mi bya/ /'di yi sdig pa bsam mi khyab/ / bdug pa'i sbyor thabs shes gyur na/ /dbus kyi rtsa yi kha 'byed pa/ /sbyor thabs khyad par yin par gsungs/ /bde chen go bzlog sbyor ba dang / /'khor lo'i go bzlog sbyor ba dang / /sku yi go bzlog sbyor ba dang / /ye shes go bzlog sbyor ba dang / /'byung ba go bzlog sbyor ba dang / /yum gyi go bzlog sbyor ba dang / /thig le go bzlog sbyor ba dang / /bsam gtan go bzlog sbyor ba dang / /yi ge go bzlog sbyor ba dang / /stong pa'i go bzlog sbyor ba dang / /dbugs kyi go bzlog sbyor ba dang / /dga' ba'i go bzlog sbyor ba dang / /gtum mo'i go bzlog sbyor ba dang / /rtsa yi go bzlog sbyor ba dang / /byang sems go bzlog sbyor ba dang / /g.yas g.yon go bzlog sbyor ba dang / /brda yi go bzlog sbyor ba dang / /rten gyi go bzlog sbyor ba rnams/ /kun mkhyen gyis kyang ma gzigs pa/ /sangs rgyas rnams kyi thugs kyi gsang / / 79-1-207a byang chub sems dpa' kun gyi yum/ /sras rnams thun mong ma yin bskyed/ /ting nge 'dzin gyi khyad par ro/ /'di yi khyad par ma dpags par/ /zab pa'i don ni yod ma yin/ /dbang bskur ba yi sngon du yang / /gdams ngag sbyin par gsungs pa yin/ / gdams ngag de yis dbang thob 'gyur/ /shes rab ma la brten nas su/ /bde ba'i ye shes bskyed pas na/ /shes rab ye shes dbang du gsungs/ /sih+la ga pur shes rab ste/ /de yi bde ba ye shes yin/ /sih+la shes rab ces bya ste/ /ga pur ye shes su ni bshad/ /rtsa gsum 'dus pa shes rab ste/ /de yi thig le ye shes yin/ /la la nA ni ye shes so/ /ra sa nA ni shes rab ste/ /rtsa ni shes rab zhes bya ste/ /byang chub sems ni ye shes so/ /mkha' 'gro ma ni shes rab ste/ /dpa' bo ye shes su ni bshad/ /dga' ba gsum ni ye shes te/ /rang bzhin dga' ba shes rab yin/ /'og ni shes rab ces bya ste/ /steng la ye shes su yang bshang / /g.yon pa shes rab ces bya ste/ /g.yas pa ye shes su yang bshad/ /chos dbyings shes rab ces bya ste/ /ye shes bzhi ni ye shes yin/ /phyag mtshan ming dang yi ge rnams/ / gzhan yang bye brag shes par bya/ /shes rab ye shes la yang gsum/ /tshig la bslab pa'ang gnang ba yin/ /gzugs brnyan la ni bshad pa ste/ /mngon par rtogs pas bsgom pa gsungs/ /e wa~M ma yA'i rnam pa bzhi/ /e ni sa ste wa~M ni chu/ /ma ni me ste yA ni rlung / / e ni snying rje wa~M ni byams/ /ma ni dga' ba yA btang snyoms/ /e ni spyan wa~M mAm kI/ /ma ni gos dkar yA sgrol ma/ /e ni sbyin pa wa~M tshul khrims/ /ma ni bzod pa yA bsam gtan/ /e ni phyag rgya chen po ste/ /wa~M ni dam tshig phyag rgya yin/ /ma ni chos kyi phyag rgya ste/ /yA ni shes rab phyag rgya'o/ /e ni shar te wa~M lho phyogs/ /ma ni nub phyogs yA byang phyogs/ /e ni sku yi thig le ste/ /wa~M ni gsung la ma ni thugs/ /yA ni ye shes thig le'o/ /e ni sngon po wa~M ljang ku/ /ma ni dmar po yA ser po/ /e ni mkha' 'gro wa~M lA ma/ /ma ni dum skyes yA 79-1-207b gzugs can/ /e ni ye shes mkha' 'gro yin/ /wa~M ni rdo rje'i mkha' 'gro yin/ /ma ni sha za'i mkha' 'gro ste/ /yA ni las kyi mkha' 'gro'o/ /e ni 'gog pa wa~M ni lam/ /ma ni sdug bsngal yA kun 'byung / /e ni bde chen wa~M longs spyod/ /ma ni chos la yA sprul pa/ / e ni mtshan la wa~M stong pa/ /ma ni rnam thar yA dpe byad/ /e ni rnam pa sna tshogs te/ /wa~M ni rnam par smin pa'o/ /ma ni rnam par nyed pa ste/ /yA ni rnam pa mtshan nyid bral/ /e ni chung ba wa~M 'bring po/ /ma ni lhag pa yA cher lhag /e ni g.yas nas me rgyu ste/ wa~M ni g.yon nas rlung rgyu'o/ /ma ni 'og nas sa rlung rgyu/ /yA ni steng nas chu rlung rgyu/ /e ni gnas brtan wa~M phal chen/ /ma ni bkur ba yA thams cad/ /e ni bsnyen pa wa~M nye bsten/ /ma ni sgrub pa yA bsgrub che/ /e ni shar lho wa~M lho nub/ /ma ni nub byang yA byang shar/ /e ni rgyud la wa~M ni sngags/ /ma ni ye shes yA gsang ba/ /e ni snang ba wa~M snang mched/ /ma ni snang thob yA 'od gsal/ /e ni bdag gi bzang po yin/ /wa~M ni dus kyi bzang po'o/ /ma ni ye shes bzang por gsungs/ /yA ni rlung gi bzang po yin/ /e ni bdag gi gnas yin te/ /wa~M ni rnal 'byor gnas su bstan/ /ma ni gzhan gyi gnas yin te/ /yA ni rgyud kyi gnas yin no/ /e ni dga' ba wa~M mchog dga'/ /ma ni lhan cig yA dga' bral/ /e ni me long wa~M mnyam nyid/ /ma ni kun rtog yA nan tan/ /e ni chos sku wa~M longs spyod/ /ma ni sprul sku yA bde chen/ /e ni zhi ba wa~M ni dbang / /ma ni rgyas pa yA gsod pa/ /yi ge btus pa'i sngags chen gsum/ /oM ni sku yi 'khor lo ste/ /A:ni gsung gi 'khor lo'o/ /hU~M ni thugs kyi 'khor lo yin/ /oM ni rnam snang AH'od dpag /hU~M ni mi bskyod rang bzhin no/ /oM ni phyag g.yon hU~M ni g.yas/ /A:ni dbus kyi snying ga yin/ /oM ni g.yon gyi spyan yin te/ /hU~M ni g.yas pa A:dbu ma/ /oM ni srog yin hU~M rtsom pa/ /A:ni gnas par shes par bya/ /oM ni sku la hU~M ni thugs/ AHni gsung du shes par bya/ /oM ni lus la A:ni ngag / 79-1-208a hU~M ni yid du shes par bya/ /oM ni thabs la hU~M shes rab/ /AHni gnyis su med pa'o/ /oM ni g.yon gyi la la nA/ /hU~M ni g.yas kyir sa nA/ /A:ni a ba d+hU tI yin/ /o~M ni g.yas kyi ra sa nA/ /hU~M ni g.yon gyi la la nA/ /AHni de bzhin dbus na gnas/ /o~M ni ga pur hU~M sih+la/ /A:ni dkar dmar rtsa dag yin/ /o~M ni mchog dga' hU~M khyad dga'/ /AHni rang bzhin dga' ba'i don/ /dga' ba lhan cig skyes dgar 'gyur/ /lhan cig skyes pa dga' bar 'gyur/ /rgyu la 'bras bu sbyor ba dang / /'bras bu la yang rgyu sbyor dang / /rgyu la rgyu yi sbyor ba dang / /'bras bu la yang 'bras bur sbyor/ /rgyu 'bras gnyis su med par sbyor/ /thabs la shes rab sbyor ba dang / /shes rab la yang thabs kyis sbyor/ /thabs la thabs kyis sbyor ba dang / /shes rab shes rab sbyor ba dag /thabs dang shes rab gnyis med sbyor/ /sbyor ba 'di yi dgongs pa yang / /kun mkhyen gyis kyang rtogs par dka'/ /a ni rnam snang mi bskyod pa/ /na ro rin chen 'byung ldan te/ /zla tshes 'od dpag med pa yin/ /thig le don yod grub pa'o/ /o~M ni bde gshegs lnga rang bzhin/ /zhabs skyed don yod grub pa ste/ /'a ni de bzhin 'od dpag med/ /ha ni rnam par snang mdzad de/ /zla tshes rin chen 'byung ldan yin/ /thig le mi bskyod rang bzhin no/ /zhabs skyed sgrol ma'i rang bzhin te/ /'a ni gos dkar ngo bo yin/ /ha ni rdo rje dbyings phyug ma/ / zla tshes mA ma kI rang bzhin/ /thig le spyan du shes par bya/ /'byung ba lnga dang sku lnga dang / /'khor lo lnga dang dga' ba lnga/ /go rims bzhin du shes par bya/ /zhabs skyed bya ba nan tan yin/ /'a ni mnyam nyid ye shes so/ /ha ni chos kyi dbyings yin te/ /zla tshes so sor rtog pa'o/ /thig le me long ye shes so/ /'di dag kun gyi dgongs pa'i don/ /sangs rgyas kun gyi thugs kyi gsang / /kun tu gsang zhing dpyad par dka'/ /yi ge tshul gyis rgyas btab pa'o/ /de nas byang chub sems dpa' rdo rje snying po dang / mkha' 'gro ma'i tshogs kyis mchod pas mchod nas 79-1-208b mi snang bar gyur to/ /mkha' 'gro ma dra ba'i sdom pa sku gsung thugs kyi rgyud kyi rgyal po rdzogs so// //paN+Di ta ga ya d+ha ra dang / lots+tsha ba dge slong shAkya ye shes kyis bsgyur ba'o// // |