@##/ /rgya gar skad du/ shrI rat+na dz+wa la tan+t+ra rA dza nA ma/ bod skad du/ dpal rin chen 'bar ba'i rgyud kyi rgyal po zhes bya ba/ dpal kun tu bzang po la phyag 'tshal lo/ /he he rdo rje snying po dang / /mkha' spyod ma la sogs pa dag /sgo gsum legs par bsdus nas ni/ /ra li chen po'i dbye ba nyon/ /la las byung ba thabs kyi rgyud/ / ra las byung ba shes rab rgyud/ /i phyis a las gnyis med rgyud/ /thabs ni sku ste shes rab gsung / /gnyis med thugs su shes par bya/ /sku gsung thugs kyi rang bzhin las/ /nyi shu rtsa bzhi byung ba'o/ /a la la ho e ma'o/ /thabs ni la las ji ltar byung / /ra las shes rab ji ltar byung / /a las gnyis med ji ltar byung / /sku gsung thugs su ji ltar 'gyur/ /nyi shu rtsa bzhir ji ltar dbye/ /e ma'o mgon pos bshad du gsol/ /'jigs byed chen pos bka' stsal pa/ /a las a ba d+hU tI ste/ /'di nyid las ni gnyis med rgyud/ / 79-1-225a 'byung ba'i gnas dang rgyu ru brtags/ /la las la la nA yi rtsa/ /de las thabs kyi rgyud byung ba'i/ /rgyu dang gnas dang ngo bo brtag /ra las ra sa nA yi rtsa/ /'di nyid las ni shes rab kyi/ /ra li 'byung ba'i rgyu dang gnas/ /ra ni chags phyir shes rab ste/ /shes rab yi ge bcu drug brda/ /la ni nub phyir thabs yin te/ /thabs kyi yi ge bcu bzhi'i brda/ /thog ma nyid nas ma skyes pa/ /a ni gnyis med rang bzhin te/ /gnyis med blo yi spyod yul min/ /blo dang sgra ni kun rdzob phyir/ /g.yas ni thabs yin la la nA/ / g.yon pa shes rab ra sa nA/ /a ba d+hU tI gnyis su med/ /thabs dang shes rab gnyis med kyi/ /ra li'i ngo bo shes par bya/ /'dod chags rdul la lus ni thabs/ /la la nA ni sku yin te/ /gti mug mun pa ngag dang yang / /shes rab ra sa nA ni gsung / /zhe sdang snying stobs yid yin te/ /sku gsung thugs kyi 'gyur ba'o/ /sku la brgyad de gsung la brgyad/ /thugs la brgyad de nyi shu bzhi/ /ra li nyi shu bzhi ru nges/ /gnas ni nyi shu rtsa bzhi dang / /tsaN+DA lI dang phyag dag dang / /mkha' 'gro 'byung po nyi shu bzhi/ /de nyid brda ru nges pa ste/ / sku gsung thugs kyi dbye bas so/ /gnas dang mkha' 'gro ra li dbye/ /sku gsum du ni de nyid bsdu/ /dang por rgyud kyi nges pa dang / /rgyu yi gnas dang gnas nges pa/ /gtad sa nges dang go rims nges/ /grangs nges rigs nges bcwa lngar nges/ /mdo sde 'dul ba mngon pa yi/ /dman pa'i rim pa dang por gsung / /dman pa rnams la bya ba'i rgyud/ /de rjes rnal 'byor nyid yin te/ /skyes pa 'dul phyir rnal 'byor rgyud/ /phyi nas rnal 'byor ma rgyud ni/ /bud med yongs su gzung phyir ro/ /dang po rtsa ba'i rgyud gsungs te/ /de nas bshad pa'i rgyud nyid do/ /de nas rgyud ni phyi ma'o/ /de rjes phyi ma'i phyi ma ste/ /rim pa bcu ni bskor ba ste/ /snod ngan dman pa'i rim pas gsungs/ /me tog snying po'i bcud bzhin du/ /phyi yi phyi nas bdud rtsi yi/ /ra li'i snying po snying po rgyud/ /dang por la las sku yi rgyud/ / 79-1-225b dpa' bo mkha' 'gro mas zhus nas/ /sku yi mkha' 'gro brgyad la gtad/ /de rjes ra las gsung gi rgyud/ /gsung gi mkha' 'gro brgyad la gtad/ /phyi nas a las thugs kyi rgyud/ /thugs kyi mkha' 'gro brgyad la gtad/ /gnyis med ye shes bdud rtsi'i ro/ /lus las lus gsal mig gi lus/ /gsal ba'i phyir na sgron ma ste/ /seng ge'i gzugs 'dra bdud rtsi'i ro/ /nyi ma'i 'od 'dra zla ba'i zer/ /'brug gi sgra 'dra rgya mtsho'i gting / /chu bo'i rgyun 'dra ri rab lhun/ /u dum bAr 'dra'i zhing gi rdul/ /'di la 'dod 'dod tshol ba dang / /rtog ge ba yis dpyad du med/ /gal te rang 'dod dpyad gyur na/ /dpa' bo mkha' 'gro khros gyur te/ /mgo lus tshal pa brgya ru 'gas/ /de bas rang gi chung ma dang / /bu dang yul 'khor lus ngag gis/ /bla ma dam pa mnyes bya ste/ /chu bo'i rgyun 'dra'i man ngag blang / /kye ma'o mgon po snying rje can/ /ra li'i dbye ba de ltar na/ /de yi chen po ji ltar lags/ /nang du nyi shu rtsa bzhi yi/ /nges pa slar yang bdag la gsungs/ /rdo rje can gyis bka' stsal pa/ /ma spangs nyi shu rtsa brgyad kyis/ /ra li 'di ni chen por nges/ /re re la yang chen po bdun/ /gang zhig 'bras bu 'dod pa la/ /rgyu nyid gtso bor gyur pa ste/ /sA lu las ni myu gu bzhin/ /de phyir dang po rgyu mi spang / /lhan cig skyes gnyis rgyu yin te/ /rang bzhin lhan cig skyes pa dang / /lhan cig lhan cig skyes pa'o/ /thun mong dang ni thun mong min/ /bla ma'i zhal nas shes bya'i phyir/ /dpa' bo mkha' 'gro'i zhal yin te/ /de nyid ston pa'i bka' las 'das/ /de las 'khrul pa snying re rje/ /phung songs rtsa dang shu kra ni/ /lhan cig skyes pa'i rgyu yin te/ /log rtog 'khrul pa rgyur 'dod dang / /ngo bo ma grub rgyur 'dod dang / /kun rdzob byang sems rgyur 'dod pa/ /'di ni rmongs pa ma rungs pa/ /phung po 'byung ba dbang po dang / /phyi yi skye mched dman po'i rgyu/ /brtags pa rgyur 'dod snying re rje/ /nam mkha'i me tog gi dri gang / /rang bzhin gnas pa'i rtsa rlung sogs/ /khyad par lam gyi rgyu yin te/ /rang bzhin gnas pa ma shes 79-1-226a par/ /log par rtogs pa snying rje nyams/ /don dam byang chub sems kyis ni/ /lhan cig skyes pa'i ye shes rgyu/ /bla ma ma bsten de las 'khrul/ /kun rdzob shu kra rgyur 'dod pa/ /rgyu dang 'bras bu 'khrul pa'o/ /rkyen med rgyu yis 'bras mi 'byin/ /de phyir rkyen ni spang mi bya/ /ye shes rlung dang ye shes me/ /lhan skyes gnyis med rkyen yin te/ /de nyid spang bar mi bya zhing / /las kyi rlung dang me nyid dang / /gzhan du 'ang de nyid sbyar bar bya/ /srid pa len dang bde ba len/ /las mi spang zhing bde ba yang / /mi spang pa ni bzhi pa'o/ /lus dang lus kyi snying po'i rtsa/ /gnas dang gnas chen mi spang ba/ /lnga pa drug pa yin par 'dod/ /de nyid phyi dang nang du shes/ /phyi ni dbye ba ma spangs pa'o/ /snang ba dang ni mun pa'i cha/ /gang ba dang ni stong pa'i cha/ /'pho ba ma spangs brgyad pa'o/ /rgyu yi gnas dang 'bras bu'i gnas/ / de nyid mi spang shes par bya/ /rin po che yi pho brang du/ /rten ni mi spang shu kra gzung / /gal te de ru ma zin na/ /shor ba mi spang ro mar bstim/ /gnyen po mi spang gzugs sku gnyis/ /ma spangs pa ni bcu gnyis pa'o/ /nor bu'i rten las skyes pa yi/ /bde ba la rten dbang po yi/ /sgo bsdu ngo bo ma spangs pa'o/ /gong 'og khyad par shes byas nas/ /sgyu mas gnyen po ma spangs pa'o/ /dga' ba mchog dga' shes byas te/ /sngon du 'gro ba ma spangs pa'o/ /'khor ba lugs las bzlog bya ste/ /gnas nas gnas su zlog byed pa/ /gnas kyi khyad par ma spangs pa'o/ /de nyid rim par 'pho byed pa/ /bla ma'i bla ma las brgyud shes/ /'khor ba 'jug ldog bye brag ni/ /'pho ba ma spangs rnam pa gnyis/ /ye shes me ni cher 'bar bas/ /phung po 'byung ba dbang po sogs/ /thams cad bdud rtsir gyur pa ni/ /rkyen gyi khyad par ma spangs pa'o/ /lus kyi ba spu'i bu ga dang / /brtan dang g.yo ba'i dngos po kun/ /bde ba'i ngo bor gang snang ba/ /ngo bo'i khyad par ma spangs pa'o/ /de nyid sgyu ma'i rang bzhin med/ /gnyen po'i khyad par ma spangs pa'o/ /bzhin mdzes mig yangs phyag rgya ni/ /ldan pa phyag 79-1-226b rgya ma spangs pa'o/ /dam tshig chos kyi phyag rgya dang / de nas ye shes phyag rgya che/ /phyag rgya'i khyad par ma spangs pa'o/ /chags pa'i phyag rgya las yin te/ /dam tshig chos ni ma ning gi/ /phyag rgya gnyis su shes par bya/ /ye shes phyag rgya chen po gnyis/ /grol ba'i phyag rgya yin par 'dod/ /phyag rgya'i dbye ba ma spangs pa'o/ /dang por gsang ba'i 'khor lor te/ /phyi nas rang bzhin 'khor lor yin/ /'khor lo'i dbye ba ma spangs pa'o/ /dang por gsang ba'i gtum mo ste/ /gnyis par rang bzhin gtum mo ni/ /gtum mo'i dbye ba ma spangs pa'o/ / las kyi rlung dang me gnyis ni/ /kun rdzob 'khor ba'i rkyen yin te/ /ye shes rlung dang me gnyis ni/ /don dam gnyis med rkyen yin te/ /rkyen gyi dbye ba ma spangs pa'o/ /srid pa bskyed cing 'dzag pa bde/ /kun rdzob shu kra'i las yin no/ /srid pa mi len rang rig skyes/ /don dam byang sems las yin no/ /las kyi dbye ba ma spangs pa'o/ /sbyor thabs rtsa ni rgyas pa dang / /kha 'byed pa yi las yin te/ /sbyor thabs bzhi la ma rmongs pa/ /'di ni ma spangs nyi shu brgyad/ /spyi mthun las las grub pa yi/ /mi drug la sogs grangs kyis bstan/ /rang rig ye shes gang 'dod pas/ /bla ma'i dus thabs legs bsten te/ /mi spang nges pa'i gdams ngag blang / /'di nyid rdo rje 'chang gi rgyu/ /de las byung ba khyad par 'bras/ /dang por cha ste thig le dang / /tshul dang tshul can mchog gzhan mchog /'di nyid de nyid drug yin te/ /de nyid drug ni tsaN+DA lI/ /re re la yang bzhi bzhi ste/ /tsaN+DA lI ni nyi shu bzhi/ /ra li nyi shu rtsa bzhir nges/ /phyi ru gnas ni nyi shu bzhi/ /spyan dang phyag rgya nyi shu bzhi/ /tsaN+DA lI dang ra li yi/ /phyi dang nang du grangs su nges/ /he he dpa' bo rdo rje 'chang / /ra li'i 'byung ba'i rgyu gang lags/ /ra li'i ngo bo gang gang lags/ /bcom ldan 'das kyis bka' stsal pa/ /sku dang phyag mtshan rags pa kun/ /ra li'i ngo bo dman pa'i lam/ /mkha' spyod sa spyod sa 'og spyod/ /sgo gsum la gnas khyad par gyi/ /ra li'i ngo bor gsungs pa yin/ /dga' ba bcu drug rten dang 79-1-227a bcas/ /zab pa'i ra li'i ngo bor brtags/ /rang rig stong pa thabs dang bcas/ /mthar thug ra lir shes par bya/ /a ni thog mar ma skyes pa/ /la ni nub dang skyong ba ste/ /ra ni chags dang rin po che/ /Ra las 'dod chags khrag yin te/ /la las zhe sdang khu ba'o/ /a las gti mug khu ba ste/ /sems can ra li'i rang bzhin te/ /ye shes lnga dang sa bcu sogs/ /kun la ldan pas ra lir gnas/ /sku yi ra li spyi bo yi/ /gtsug tor dag las byung ba'o/ /gsung ni ljags kyi dbang po las/ /thugs kyi ra li thugs ka nas/ /byung ba rnam par nges pa'o/ /sku gsung thugs kyi rdo rje yi/ /spyan rnams la ni rim bzhin byung / /sku gsung thugs kyi gnas la ste/ /spyi bo la sogs dag las byung / /phyag gi mthil nas rim pas byung / /bla ma'i zhal nas blang bar bya/ /bye brag 'byung ba'i sgo yin te/ /he he sems can sangs rgyas kyi/ /rang bzhin sa dang lam ldan te/ /zla ba bcu sogs sa sogs ni/ /brdzus skyes la sogs ji ltar lags/ /'on te sangs rgyas min nam ci/ /sems can thams cad gdod ma nas/ /sangs rgyas yin par gsungs pa ste/ /brdzus skyes sgong skyes drod gsher sogs/ / sems kyi gnas bcu sa bcu ste/ /rnam shes brgyad ni byang chub lnga/ /mkhan po sems kyi rgyal po ste/ /rang bzhin dag pa chos gos yin/ /rang bzhin gnas pa kha spu bregs/ /a dang ha~M gnyis sngags kyi don/ /thams cad sems la gnas pa ste/ /sems med sangs rgyas ma yin te/ /ngam grog la sogs bems po yi/ /sems nyid sangs rgyas yin pa'i phyir/ /sems can sangs rgyas rang bzhin no/ /rgyu dang 'bras bu'i tshul dang yang / /bag la nyal dang kun tu rgyu/ /nus pa'i tshul dang mngon sum tshul/ /gzugs can gzugs med mkhas pas brtags/ / sangs rgyas sems can de bzhin no/ /de ltar sems can sangs rgyas pas/ /ra li sems can rang bzhin phyir/ /lus la sku yi phyag rgyas gdab/ /ngag la gsung gi phyag rgyas gdab/ /sems la thugs kyi phyag rgyas gdab/ /sku gsung thugs kyi rang bzhin du/ /dngos po ro mnyam gyur 79-1-227b pa las/ /sangs rgyas sems can ga la yod/ /dman dang gya nom ga la yod/ /'khor ba yongs su shes pa la/ /mya ngan 'das zhes de la brjod/ /thams cad 'jigs dang rnam rtog spongs/ /'di la thams cad ngo mtshar gyi/ /legs par gtad kyis dam du sbos/ /de'i tshe 'khor 'dus pa thams cad ngo mtshar du gyur te mi snang bar gyur to/ /dpal rin chen 'bar ba'i rgyud kyi rgyal po rdzogs so// //rnal 'byor ma zla ba'i phreng ba dang lo ts+tsha ba dge slong shAkya ye shes kyis bsgyur cing zhus te gtan la phab pa// // |