@##/ /rgya gar skad du/ tsan dra sU tra/ bod skad du/ zla ba'i mdo/'phags pa dkon mchog gsum la gus pas phyag 'tshal lo/ /'di skad bdag gis thos pa dus gcig na/ bcom ldan 'das mnyan yod rgyal byed tshal mgon med zas sbyin gyi kun dga' ra ba na bzhugs so/ /de nas de'i tshe lha'i bu zla ba/ lha ma yin gyi dbang po sgra gcan 'dzin gyis bzung nas/ de nas lha'i bu zla bas bcom 34-1-283a ldan 'das rjes su dran pa yid la byas te/ de'i dus su tshigs su bcad pa 'di gsol to/ /sangs rgyas dpa' bo de la 'dud/ /thams cad myur du grol bar gyis/ /bdag 'di'i kha ru bcug pas na/ /bdag ni khyed la skyabs su 'gro/ /de nas bcom ldan 'das kyis lha'i bu zla ba'i ched du lha ma yin gyi dbang po sgra gcan 'dzin la tshigs su bcad pa bka' stsal pa/ sangs rgyas 'jig rten la brtse bas/ /dgra bcom de bzhin gshegs pa la/ /zla ba skyabs su song bas na/ /sgra gcan 'dzin gyis zla ba thong/ /de nas lha ma yin gyi dbang po sgra gcan 'dzin gyis/ lha'i bu zla ba grol bar byas nas/ sngar gyi gzugs bzhin du gang su zhig gis lha ma yin gyi dbang po thags bzangs ris kyi drung du song zhing song nas/ sems mi dga' zhing yi mug pas ba spu langs par gyur pas phyogs gcig tu 'dug go/ / phyogs gcig tu 'dug nas yang lha ma yin gyi dbang po sgra gcan 'dzin la/ lha ma yin gyi dbang po thags bzangs ris kyis tshigs su bcad pa smras pa/ ci phyir yid ni skrag par gyur/ /sgra gcan 'dzin gyis zla ba thong/ /gzugs kyi rnam 'gyur kun tu ngan/ /ci phyir 'jigs pas 'di ru lhags/ /sgra gcan 'dzin gyis smras pa/ sangs rgyas tshigs bcad thos nas ni/ /zla ba bdag gis ma btang na/ /mgo bo tshal pa bdun 'gas shing/ /'tsho ba la ni bde ba med/ /zla ba'i mdo rdzogs s+ho/ / |