@#/ /rgya gar skad du/ shrI ma hA mA yA tan+t+ra rA dza nA ma/ bod skad du/ dpal sgyu 'phrul chen po zhes bya ba'i rgyud kyi rgyal po/ dpal rdo rje mkha' 'gro la phyag 'tshal lo/ dpal ldan rdo rje mkha' 'gro ma/ /mkha' 'gro ma yi 'khor lo bsgyur/ /ye shes lnga dang sku gsum nyid/ /'gro ba skyob la phyag 'tshal lo/ /ji skad rdo rje mkha' 'gro ma/ /kun tu rtog pa'i 'ching gcod cing / /'jig rten bya bar rab 'jug pa/ /de snyed rnams la phyag 'tshal lo/ /de nas de las rdo rje mkha' 'gro ma gsang ba'i dbang phyug 80-1-167b ma rnams kyi mchog tu gsang ba zhes bya ba'i rgyud bshad par bya ste/ gang zhig gis ni kun khyab pa/ /rgyu dang mi rgyu tshangs sgo nga / /lha mo thams cad skyed byed cing / /tshangs la sogs pa'i bdag nyid che/ /de rnams kyi ni gsang chen 'di/ /sgyu 'phrul chen mo dbang phyug che/ /sgyu 'phrul chen mo drag chen mo/ /'byung ba yang dag sdud mdzad ma/ /gang gis 'di kun la khyab pa/ /rgyu dang mi rgyu'i 'jig rten gsum/ /des ni de nas 'di bsdus nas/ /'jig rten gsum po yang spro'o/ /gsang ba pa rnams 'di yi ni/ /sgyu ma'i bdag nyid ces rnam grags/ /'jig rten gsum sgrub rig ma ste/ /'dod pa thams cad rab ster ba/ /gang zhig rnam par shes tsam gyis/ /sgrub pa'i dbang phyug rig pa nyid/ /lha dang nor bdag dri za dang / /gnod sbyin lha min mi dang bcas/ /rig pa 'dzin dang gang yang rung / /mi'am ci dang lto 'phye che/ /srin po dang ni sha za rnams/ /sgrub po rnams la 'grub par 'gyur/ /dbang du 'du 'gyur 'byung po rnams/ /chu las skyes dang thang las skyes/ /chos rnams rang bzhin 'od gsal ba/ /gdod nas dag cing rnyog pa med/ / thabs brjod pa yis de las ni/ /rang byung ye shes lnga ldan 'gyur/ /rnal 'byor ma rnams sbyor ba'i ma/ /khams gsum po ni ma lus kun/ /ma lus lus pa med grub cing / /sgyu ma kun gyis rnam rol pa'o/ /sangs rgyas kun las phrogs nas su/ /lha mchog lha skyes bu mo skyod/ /rnal 'byor dbang phyug byed rig pa/ /de bzhin du ni mig 'phrul byed/ /rmongs pa dang ni rengs pa dang / /bskrad dang gsad pa la sogs pa/ /dbang dang dgug pa la sogs dang / /nam mkhar 'gro ba nyid kyang ngo / /gzhan gyi grong sogs bya ba dang / /mi snang ba dang gang yang rung / /zhe 'gras pa dang rmugs pa dang / /de bzhin sa 'og 'gro ba'o/ /rig 'dzin 'khor los sgyur nyid 'gyur/ /'chi ba med cing rgas pa med/ /rnal 'byor sgyu ma'i rig pa 'di/ /'di yis na ba med par 'gyur/ /sngags 80-1-168a kyi yi ge'i gzugs kyis su/ /rnal 'byor bas ni rnam rol byed/ /bklags pa dang ni bsams pa yis/ /bsgom pa dang ni ting 'dzin rnams/ /bklags pas byed pa'i rig pa ste/ /rig pa'i dngos grub byed par 'gyur/ /brtul zhugs med cing dka' thub med/ /dka' spyod smyung ba sdom med par/ /rtag tu shes rab thabs sogs kyis/ /rtag tu dga' dang bde bas 'grub/ /lte ba'i dbus nas dpa' bo ste/ /ge sar gsang ba'i spyod yul la/ /sems dang sems med sems kyi gzugs/ / ye shes shes bya'i rang bzhin bdag /de ni bdag gis bshad bya ste/ /zab mo sangs rgyas bstan pa'o/ /A li kA li mnyam byas te/ /ri mo de la sbyar bar bya/ /ri mo steng du 'bar ba mthar/ /'og tu 'bab par byed pa'o/ /khu ba'i tshul gyis 'bab pa ste/ / bdud rtsi'i thigs pa'i gzugs las so/ /gang gang dbang po'i lam nas ni/ /de de'i rang bzhin skye bar 'gyur/ /mchog tu phan pa'i rnal 'byor gyis/ /sangs rgyas kun gyi rang bzhin 'bab/ /dam tshig chen po'i dngos grub dang / /ril bu chen po'i bsgrub pa yang / / sgyu 'phrul chen po'i rab sbyor ba'i/ /sdom pa'i sbyor ba byed par 'gyur/ /mchod pa lnga dang yang dag ldan/ /'dod pa'i yon tan lnga dang bcas/ /sgrub pa'i dbang po shes bya ba/ /dngos grub shin tu rtag pa'o/ /gang zhig shes pa'i dngos grub kyis/ /lha yi gnas su myur bar 'gyur/ /de ni bdag gis bshad bya ste/ /lha mo bden par nga smra'o/ /sgyu 'phrul chen mo khyod la ngas/ /'jig rten gsum 'grub de bshad bya/ /rnal 'byor chen mo rnams kyi ni/ /bzang po'i yi ge'i phrang ba rnams/ /gang zhig bsams pa tsam gyis ni/ /rgyu dang ni rgyu 'grub 'gyur ba'o/ /'dod pas kun la nyer spyod pa/ /ji ltar 'dod bzhin bsten byas na/ /rnal 'byor pa chen rtag rol te/ /rdo rje rnal 'byor rnams 'grub/ /rnam pa sna tshogs gzugs su ni/ /rnal 'byor bdag nyid ston par byed/ /de 80-1-168b bzhin gshegs pa kun gyi dpal/ /dngos grub chen po ster bar 'gyur/ /bcud len rnam pa sna tshogs kyis/ /rtag tu sems can don byed pa'o/ /khu ba dgug dang chang dang ni/ /gong bu chen po dgug pa nyid/ /sha chen po ni bkug nas su/ /rnal 'byor ma dang lhan cig spyod/ /tshe ring brtson 'grus chen po dang / /gzi brjid che zhing stobs chen 'gyur/ /lha yi mig dang rdzu 'phrul ldan/ /nyin re zla ba 'thung ba'o/ /de yi tshe ni 'phel 'gyur te/ /bskal pa chen po'i bar du gnas/ /blta bas mi ngoms lus dang ni/ /cho 'phrul dag ni ston par byed/ /yid la bsams ma thag tu ni/ /rang gi gzugs ni yongs brjes shing / /bklags pas 'grub pa'i don yod pa/ /rig ma'i dbang phyug rdzu 'phrul che/ /rig pa 'jig rten gsum po na/ /nga yi rig dang mnyam pa med/ /rgyud rnams kun gyi lung 'di ni/ /mdzes ma khyod la bshad pa yin/ /rnal 'byor ma'i dbang phyug ma'i rig ma chen mo las dngos grub kyi mtshan ma bstan pa ste le'u dang po'o// //de nas de las rnal 'byor ma'i dbang phyug chen mo rnams kyi sbyor ba'i dngos grub kyi 'bras bu rab tu ster ba'i gsang ba'i yi ge bzang po bshad par bya ste/ gang zhig bsams pa tsam gyis ni/ /rnal 'byor ma mchog ster 'gyur ba/ /dang po'i yi ge'i sbyor ba yis/ /rtag tu dgugs ni gtang bar bya/ /brgyad pa'i mtha' dang yang dag ldan/ /u dang thig ler bcas pa yis/ / rnal 'byor pa yi dbugs rngub byed/ /dngos dang dngos med rnam spangs pa'o/ /de la brtul zhugs ma bshad de/ /phreng ba sngags dang gzung ba dang / /sbyin sreg gi ni las rnams kyang / /gcig nas gcig tu ldog par 'gyur/ /sngags dang dbyibs dang chos bdag nyid/ /sbyor ba rnam gsum zhes bya ste/ /ye shes rnam pa gsum gyis ni/ /srid pa'i nyes pas gos mi 'gyur/ /de ltar rgyun du rnal 'byor pa/ /rtag tu goms pa nyid kyis ni/ /rdo rje sems dpa' dang mnyam pa'ang / /zla ba gcig gis de 'grub 80-1-169a 'gyur/ /dbang po'i mdog dang yang dag ldan/ /dang po'i yi ge bsgom bya ste/ /rang gi rig pa rab sbyar na/ /des 'di mod la 'gugs par 'gyur/ /yi ge gnyis pa dang ldan pa/ /bsam zhing rnam par bsgom byas na/ /sa gsum po ni ma lus pa/ /de dag thams cad dbang du 'gyur/ /tshangs dang khyab 'jug dbang po dang / /de bzhin dbang po 'dod dbang phyug /ye shes yi ges bskul byas na/ /de dag chung mar bcas te 'gugs/ /yi ge a dang yang dag ldan/ /sku gsung thugs la legs gnas pa/ /sbyor ba rnam gsum bsgom byas na/ /gong bu 'gugs pa'i mchog yin no/ /yi ge khe dang yang dag ldan/ /sku mdog dmar po zhal bzhi pa/ /lag na thod pa chags pa'i bdag /khu ba 'gugs pa'i mchog yin no/ /yi ge rtsi dang ldan pa yis/ / kha dog ser po kun tu 'od/ /rta yi zhal gyi tshul byas na/ /chang 'gugs pa yi dam pa yin/ /yi ger dang yang dag ldan/ /kha dog dmar po 'od chen po/ /phyag bzhi pa dang zhal bzhi pa/ /ce spyang tshul du legs gnas pa/ /khro ba'i sems kyis bsgom byas na/ / khrag 'gugs pa yi dam pa'o/ /yi ge drug dang yang dag ldan/ /gnas drug tu ni nges sbyar bya/ /rnal 'byor mkha' 'gro ma yi tshogs/ /rdo rje rnal 'byor ma rnams 'grub/ /mig gnyis dang ni rna ba dang / /de bzhin sna dang yid nyid dag /seng ge rnal 'byor phyag rgya yi/ /rnal 'byor pa yis bcing bar bya/ /srog dang rtsol ba bsdams nas su/ /bsgoms na skad cig de la 'bar/ /'og min srid pa'i mthar thug par/ /rgyu dang mi rgyu'i 'jig rten bdun/ /thams cad kyis ni de bsgoms kyang / /de ni rtog pa ma yin no/ /gal te thams cad rab rtogs na/ /'gro ba'i rol pa rnam par 'jig /de phyir ye shes 'di gsang zhing / /mi gsal yi ge med pa'o/ /gang phyir sangs rgyas rnams kyis mkhyen/ /rnal 'byor gnyid dang yang dag ldan/ /gong bur song ba'i yid de yis/ /gzugs 80-1-169b gcig tu ni sgom par byed/ /sgo dgu las ni gang byung ba/ /rdzas kyi bdag nyid rnam bsgoms la/ /rang bzhin med pa'i blo ldan pa'i/ /rnam par mi rtog pa yis bza'/ /mthe bong dang ni srin lag gis/ /kha ru yid bzhin nor bu ni/ /bdud rtsi'i rang bzhin las byung ba'i/ / rtag pa'i dngos grub thob par 'gyur/ /rnal 'byor ma'i dbang phyug ma'i rig pa chen mo las sbyor ba gtan la dbab pa'i le'u ste gnyis pa'o// //de nas yang dag bshad bya ba/ /dam tshig sgrub pa'i dam pa ste/ /rdzas gzhan tshogs ni bza' bya ba/ /thams cad mkhyen pa'i 'bras ster ba'o/ /gang zhig zos pa tsam gyis ni/ /'byung po'i mi rnams 'grub 'gyur ba/ /brtan pa dang ni myur 'gro nyid/ /de bzhin du ni ba lang khyi/ /chen por yang dag ldan pa ni/ /de bzhin ye shes bdud rtsi lnga/ /tshes grangs bcu bzhi brgyad la ni/ /lhan cig bsgos te sbyar byas nas/ /nyi ma bdun du ce spyang gi/ /dbus su gzhag la de nas bton/ /lnga po dag las yungs kar gyi/ /'bras bu'i tshad tsam ril bu bya/ /de ni rgyud 'dir gsungs mod kyi/ /tshes brgyad dang ni bcu bzhi'i bar dag tu/ / nyi ma bdun du lhan cig min bsgom ste/ /sbyar nas ce spyang dbus su lags bzhag la/ /de las bton te lnga po dag las ni/ /dngos grub 'bras bu'i tshad tsam ril bu bya/ /'bras bu chen po rab tu rtogs pas na/ /de ni rgyud 'dir gsungs kyi kun tu sbas/ / 'bras bu chen po sangs rgyas kyis/ /thams cad du ni sbas pa'o/ /de nas sgrub thabs 'byung ba'o/ /yid kyi pad+ma bsam bya ba/ /kha dog dmar po kun 'od la/ /lha mo bzhi dang yang dag ldan/ /sangs rgyas gzugs kyis nyer brgyan pa'o/ /shar du ut+pal sngo 'od mdog /lho ru ser po lta bu'o/ /nub tu dkar dang dmar ba'i 'od/ /byang du ma rgad 'od yin no/ /'bar ba'i phreng bas 'khrigs pa dang / /zhal bzhi phyag bzhi spyan gsum ma mdzes/ /shar phyogs kyi lha mo ni spyan gsum pa phyag g.yon na kha T+wA~M ga dang 80-1-170a dril bu/ g.yas na rdo rje dang / thod pa bsnams pa bsam mo/ /lho phyogs kyi lha mo'i phyag na mdung rtse gsum pa dang / rin po che dang / ba dan dang / ce spyang bsnams pa'o/ /nub phyogs kyi lha mo'i phyag na gzhu dang / mda' dang / sna tshogs pad+ma dang / thod pa bsnams pa'o/ /byang phyogs kyi lha mo'i phyag na ral gri dang / zhags pa dang / rnge'u chung dang / thod pa bsnams pa'o/ /sku gsung thugs kyi rdo rje ni/ /de yi dbus su bsam par bya/ /thod pa nyid dang kha T+wA~M ga/ /de bzhin gzhu dang mda' nyid do/ /dang po'i sngags dang yang dag ldan/ /bsgoms na skad cig de la 'bar/ /de ltar rnal 'byor pas bsgrubs na/ /rdzas kyi dngos grub rab tu ster/ /rnal 'byor ma yi grub sbyor bas/ /'phral du yid ches yang dag 'jug /thams cad kyis ni mi mthong zhing / / stong phrag gcig tu snang bar 'gyur/ /sangs rgyas kun las phrogs pa dang / /lha yi bu mo mchog la spyod/ /gang gA'i bye snyed sangs rgyas rnams/ /nyid kyi rdo rje'i gnas bzhugs pa/ /lag tu skyu ru ra bzhag bzhin/ /rdo rje'i mig gis mthong bar 'gyur/ /gang gA'i bye snyed zhing dag kyang / /sku gsung thugs kyi mtshan nyid dang / /dngos po kun gyi bdag nyid gnas/ /sems kyi gar las byung ba mkhyen/ /yi ge go bzlog sbyor ba yis/ /sngags ni de ru rnam bsgom bya/ /rdo rje chu dang yang dag ldan/ /ril bu re re bza' bar bya/ / yi ge brgyad kyi mtha' ldan pa/ /U dang thig ler bcas pa ni/ /mtha' ru yang dag sbyar byas la/ /sngags ni kun du brjod bya ste/ /gu h+ya bak+Sha a b+ha k+She hU~M zhes bya'o/ /rnal 'byor ma kun sbyor ba yis/ /dang po'i yi ge yang dag ldan/ /gal te rdo rje can gyis grub 'dod na/ /lan bdun mngon sngags rnal 'byor pa yis bza'/ /yi ge gsum mtha' zhes bya ste/ /brgyad kyi mtha' mar legs gnas pa/ /A dang thig ler yang dag ldan/ /yi ge mchog tu gyur pa'i gnas/ /yi ge dang po sbyor ba yis/ /hrI zhes bya ba yang dag sbyar/ / 80-1-170b yi ge rnams kyi mthar sbyor la/ /sa bon lngas ni rab dgang bya/ /yi ge yis ni rnam bsgoms te/ /pad+ma rab tu rgyas par bya/ /ci ste rdo rje can 'grub 'dod/ /de lta'i sbyor ba kun shes bya/ /de nas 'dir rdo rje rnal 'byor ma rnams kyis dgongs pa dpal rdo rje'i gras srid pa shin tu sgrub pa blangs pa/ kye grogs po rdo rjes pad+ma kha 'byed sad mdzad ma/ /a la la ho/ bde ba chen po gar gyis rab tu mnyes mdzod cig /nyi ma'i dkyil 'khor pad+ma'i kha ni rab phye ba/ /bde ba chen po gar gyis rab tu mnyes par mdzod/ / rdo rje 'dzin pa chen po la/ /de nas 'dir glu blangs tsam gyis/ /rdo rje mkha' 'gro ma rnams gar/ /rdo rje sems dpa' yang dag bskul/ /de ltar rtag tu gus ldan pas/ /sbyor ba'i dngos grub 'gyur ba yin/ /dus bzhir rab tu sbyor ba yis/ /'grub par 'gyur ba bsgom pa'i mchog /rgyan rnams thams cad yongs rdzogs shing / /spos dang me tog rnams kyis brgyan/ /ji ltar sku gsum mchog ster ba'i/ /dngos grub nges par thob par 'gyur/ /dpag tshad brgya yi khyon tsam du/ /'di ni rab tu snang bar byed/ / dbang po gnyis ni rab sbyor bas/ /sgo dgu las ni byung ba'i rdzas/ /sangs rgyas byang chub gnas zhi ba'i/ /de nyid bla na med pa 'grub/ /'dir tshigs bcad du 'gyur ba ni/ /gzugs rnams de bzhin phyag rgya mtshan ma dang / /rdzas rnams dang ni bsam gtan rnam sgom pa'i/ /cho ga'i thabs ni sna tshogs bstan pa dang / /lha mo yid 'dod rnams ni gsungs pa'o/ /gang gi khyim du rgyud 'di gnas pa dang / rgyun du 'chang ba dang / klog pa dang / rnam par bsgom pa de la nad rnams 'byung bar mi 'gyur zhing / rgas pa dang / bgegs mi 'byung la/ 'chi bar mi 'gyur te/ rgyun du thams cad du rnal 'byor ma'i dbang phyug ma rnams kyis bgags bsrung bar 'gyur ro/ /rdo rje rnal 'byor ma chen mo rnams kyi dgongs pa mchog tu gsang ba gsang ba chen po nye bar spyod pa dang bcas 80-1-171a pa'i sgrub thabs te le'u gsum pa'o/ /sgyu 'phrul chen mo'i rgyud ces bya ba rdzogs so// //rgya gar gyi mkhan po dzi na bar dang / bod kyi lo ts+tsha ba chen po 'gos lhas btsas kyis bsgyur cing zhus te gtan la phab pa// // |