@##/ /rgya gar skad du/ ku la lo ka nA tha pany+tsa da sha ka nA ma/ bod skad du/ rigs kyi 'jig rten mgon po lnga bcu pa zhes bya ba/ dpal ldan rigs kyi 'jig rten mgon po la phyag 'tshal lo/ /de nas 'di ni mchog tu gsang/ /'jig rten yang dag rmongs pa'i mchog /rigs dang rigs byung mngon brjod pas/ /gnyis med sngags ni rab bshad bya/ /dam tshig spyod pa nges par grol/ /bya ba dus tshod 81-1-27b rnam par spangs/ /de nyid gsum ldan yang dag lha/ /'jig rten mgon po 'gro ba'i bdag /'dod pa'i dbang phyug 'dod pa'i lha/ /mthong dang ma mthong 'bras rab ster/ /de 'dir sngags ni mtshungs med pa/ /bla ma'i zhal la rnam par gnas/ /drag chen 'jigs byed lus la ni/ /lnga pa'i thig le dang bcas shing / /rnam gcod dang po yang dag ldan/ /chen po lnga pa'i lnga pas brgyan/ /lce gnyis yan lag med gnyis gnas/ /lus gsum gyis ni sngags mchog la/ /yi ge rnams kyi bsdu ba las/ /mtshan nyid cho ga bzhin du bzlas/ /'di yi rjes dran sngags pa yis/ /gtsang ngam yang na mi gtsang rung / /lha bzhin mthong ba lha rnams kyis/ /de yi lha mo 'dod lha bzhin/ /'di bzhin sngags kyi 'dod lha yi/ /bya ba med cing sgrub pa'ang med/ /mchod med me la sbyin sreg med/ /rnal 'byor ldan dang yang dag ldan/ /dus tshod rnams las rnam nges grol/ /rtse gcig sems ni g.yo mi byed/ /sgrib pa dang bral mtshungs pa yi/ /mchog gi bsam gtan yang dag sbyar/ /rigs kyi 'jig rten dbang phyug gi rtog pa lnga bcu pa las sngags kyi de kho na nyid kyi le'u ste dang po'o// // snying ga'i 'khor lo'i nang song ba'i/ /de nyid gzhan dang gzhan du 'gro/ /dbye ba nyis 'gyur de las ni/ /ye shes nyid ni kun 'gro bya/ /mi 'gyur dga' ba'i yul rig pa/ /sems kyi rjes su rtogs pa can/ /bya ba de yi bde 'dod phyir/ /rtogs pa kun nas 'jug par 'gyur/ /de yi ngo bo rtogs nyid 'jug /de sems dga' ba'i spyod yul la/ /bya ba dang ni las rnams kun/ /tshig dang bcas pas the tshom med/ /bsam gtan rnal 'byor yang dag ldan/ /brtan par dgod bya blo ldan gyis/ /'gro kun dgra yi rang bzhin gyi/ /sa steng sa 'og mtho ris sgrub/ /lte ba'i pad+mar pad+ma che/ /rnam gsum nam mkha'i nang song ba/ /pad+ma'i phyag rgya yang dag ldan/ /nam mkha' phyag rgya'i bdag nyid bzhin/ /srog 'bab pa yi tshad kyis ni/ /gnas gnyis po yis goms par bya/ /de bzhin rab tu dgod byas nas/ / 81-1-28a 'jig rten mgon po'i sku ru 'gyur/ /gang gis gzhan du bzlas byas dang / /las rnams kyang ni bsgrub byas na/ /de ni mkha' la khu tshur bsnun/ /rmongs pas spun stong 'joms par byed/ /bsam gtan sbyor bas cho ga bzhin/ /las gang rtag tu bya ba ste/ / de las myur du sgrub byed do/ /de yi las ni yid kyir 'dod/ /rigs kyi 'jig rten dbang phyug gi rtog pa lnga bcu pa las bdag gi de kho na nyid kyi le'u ste gnyis pa'o// // rang bzhin bsam gtan dang bcas shing / /dzA ti mtshal gyi 'od zer bzhin/ /se 'bru le brgan me tog bzhin/ / li khri dmar po dang mtshungs gtso/ /sngags kyi sku yi lha yi lha/ /zhal gcig phyag ni bzhi pa ste/ /mkha' pad zla ba'i gdan la bzhugs/ /khyab bdag zhags pa lcags kyu bsnams/ /mchog sbyin phyag gis yang dag rol/ /mu tig nor bus rnam par brgyan/ /pad+ma'i phyag dang spyan gsum po/ /gzi brjid chen po sna tshogs sku/ /dpa' bo dbang phyug 'gro ba'i mgon/ /rnal 'byor ma yi thugs dgyes pa/ /dngos grub thams cad rab ster ba'i/ /sngags rnams kun la bsam gtan bya/ /gang dang gang gis bsgom pa yis/ /rnal 'byor goms par gyur pa'i phyir/ /de ni de yi rang bzhin 'gyur/ /yid bzhin nor mchog ji bzhin no/ /lha ni dkar pos zhi rab ster/ /de bzhin ngag ni rab sad byed/ /dbang dang dgug pa'i de nyid la/ /sku mdog dmar po rnam par bsam/ /du ba dmar po'i 'od mdog can/ /rlung gi dkyil 'khor gyis dkris pas/ /dgra bo rnams ni nyer skrod pa/ /'dir ni the tshom med par byed/ /du ba skya bo dmar ba yis/ /rnam par zhe sdang nges sbyor ba/ /gsad pa la ni kha dog gnag /rengs pa la ni ser por shis/ /lug gi steng du gnas pa la/ /rkan gyi bar du rnam phug na/ /srid pa gsum du gang gang gnas/ /thams cad rab tu rmongs par byed/ /gzhan dag rmongs pas ci zhig bya/ /don mang tshig ni rab 'dus pa/ /'jig rten gsum gyi las rnams ni/ /yon tan brgyad dang ldan pa yi/ /rgyud gzhan rnams la nyer gyur pa/ /gsungs dang ma gsungs 81-1-28b gyur pa ni/ /rang bzhin bsam gtan sbyor ba yis/ /bya ba 'di la the tshom med/ /gang zhig lha ni nam mkha' mtshungs/ /kha dog dbye bas so so ste/ /'jig rten gsum na gang spyod pa'i/ /las rnams thams cad bya ba'o/ /skal bzang byed pa'i sngags rnams ni/ /snying ga'i chu skyes dbus song ba/ /snying ga'i chu skyes sbyor ba yis/ /dbang la sogs pa yang dag bsgrub/ /yi ge gsum dang bcas pa'i lha/ /steng du 'gro ba gsum ldan pas/ /mi rnams las ni rtag bsgrubs pa/ /rnal 'byor ma rnams zhal la gnas/ / rnam pa gsum ni 'gugs par byed/ /pad+ma gzugs ldan gyur pas mdzes/ /rtag sbyor rgyun du rnal 'byor pas/ /mar me g.yo med gnas pa bzhin/ /sngon gsungs lha yi lha dbang phyug /skya rengs dmar po dang mtshungs 'od/ /mtshan mo phyed kyi dus gnas la/ /rnal 'byor nyid ni yang dag spyod/ / de yi gzugs 'dzin lus la ni/ /yang dag sngon du bkod pa yis/ /zhags pa lcags kyu 'dzin pa'i lha/ /bsgrub bya'i lus la yang dag blang / /thams cad bla ma'i zhal la gnas/ /zhags pa lcags kyu'i 'od zer gyis/ /de las lcags kyu bsnun nas ni/ /zhags pa yis ni 'gugs par byed/ /rnam par myos shing lus ni dmar/ /yang dang yang du brgyal gyur te/ /bu ga sgo dgu nas bsnun nas/ /khrag ni rab tu 'bab par byed/ /sgrib pa med par dang mtshungs par/ /rang lus rnam par blta bar bya/ /de yi dbugs las bzhengs pa'i sngags/ / yi ge'i dbang po dang por bsam/ /'bar zhing 'bar ba lta bu yis/ /kha yi sgo ru sngon 'dod rol/ /pad+ma'i gzugs 'dzin de yang ni/ /kha yi nang nas nges par 'byung / /bsgrub bya'i kha ru thim gyur te/ /ji srid de snying chu skyes la/ /gang zhig de yi snying gnas pa/ /'dir ni de'i snying kun nas phrogs/ /mer mer por ni blangs pa yis/ /sgrol ma'i gzugs bzhin yid 'phrog pa/ /de ni gsum pas cho ga bzhin/ /rlung gis lo ma g.yo ba ltar/ /rang gi khyim du rim par bsgom/ /gcig gi ngo bor gyur pa mchog /lha dang lha yi sgrub pa'i thabs/ /mtshan mo 81-1-29a mdun du bsgrub par bya/ /bran gyi ngo bos 'jug 'gyur zhing / /'tsho ba dang ni nor gyis kyang / /sa stengs 'jig rten slar ci smos/ /'grub 'gyur 'di la the tshom med/ /sngags kyi dbang po sgrub pa pos/ /rang dbang med rnams sbyar mi bya/ /sngags kyi rgyal dbang bzlas byas pas/ /rgyal srid sgrub pa de mchog go/ /gzhan du gang gis rab bsgrubs na/ /bud med 'dod pas long bzhin myos/ /gal te lha yi bu mo yang / /de yi skad cig nyid la mchi/ /rigs kyi 'jig rten mgon po'i lnga bcu pa las lha'i de kho na nyid kyi le'u ste gsum pa'o// //'jig rten dbang phyug snying po mchog /sba zhing srog bzhin yang dag bsrung / /dam tshig spyod pa dman pas kyang / /'dren pa'i bdag nyid sngags bzlas bya/ /gcig pu grogs dang bral byas te/ /blo dang ldan pas 'bum du bzlas/ /de yi mngon sum 'ong 'gyur te/ /'khor lo gsum du legs 'gro mchog /'jig rten thams cad 'byin pa dang / /sdud pa dang ni yang dang yang / /nam mkha'i go 'phang bder 'gro ste/ /dran pas 'di la the tshom med/ /sems dang sems med sbyor ba ni/ /sems ni sems med la des mthong / /sems ni sems ma la thim nas/ /rab 'jug lus skyes ma rnams la/ /nad bcas nad med pa dang ni/ /nad med de bzhin nad bcas byed/ /zhags pa lcags kyu 'dzin pa'i mchog /sngags kyi rgyal po'i dbang pos so/ /gzhan du byis pa rmongs pa yis/ /zla ba 'dzin par 'dod pa bzhin/ /gang zhig rang bzhin sbyor bral bas/ /las rnams bsgrub pa de mchog min/ /gang gis gsum gsum gnas skabs gsum/ /'jig rten mgon po nyid rig nas/ /chu 'dzin bral ba'i nam mkha' bzhin/ /'jig rten mgon po'i go 'phang 'gro/ / zhes pa ni dpal pad+ma 'bar ba'i rgyud chen po las phyung ba rigs kyi 'jig rten mgon po lnga bcu pa rdzogs so// //paN+Di ta chen po bi ma la shrI b+ha dra'i zhal snga nas/ byang chub rin chen gyis bskul nas/ shud ke grags pa rgyal mtshan gyis dpal sa skya'i gtsug lag khang 81-1-29b chen por bsgyur ba'o// |