@##/ /rgya gar skad du/ ya thA la b+d+ha kha sa ma tan+t+ra nA ma/ bod skad du/ ji bzhin brnyes pa nam mkha' dang mnyam pa zhes bya ba'i rgyud/ bcom ldan 'das rdo rje sems dpa' la phyag 'tshal lo/ /gang zhig sangs rgyas lnga yi cod pan can/ / sa gsum kun gyi snying po dang ldan pa/ /dpal ldan dang po'i sangs rgyas ngo bo mdzad/ /de ni mkha' dang mnyam par spyod pa'o/ /gal te de 'dra'i ngo bor sems dag pa/ /byis pa 'di ni don dam sgom pa yin/ /sangs rgyas rnams kyi rang bzhin mthong min te/ /sangs rgyas dang ni rdo rje 'dzin pa dang / /rin chen tog dang pad ldan 'jug pa ste/ /lha de rnams kyi rang bzhin yod ma yin/ /dang po'i sangs rgyas nam mkha'i rang bzhin no/ /dang po'i chos las de rnams 'byung ba ste/ /mkha' dang lhan cig sems can khams rnams kyang / /gzhug rnams su ni bstan bcos tshad mar byas/ /gdod nas dag pa'i go 'phang mkha' mnyam mtshungs/ /sangs rgyas lnga yi cod pan dang yang ldan/ /gang zhig chos de nyid kyi rang bzhin can/ /sa gsum po yi chos ni 'byung 'gyur ba/ /rdo rje sems dpa' de la phyag 'tshal lo/ /rdo rje sems dpa' la ni phyag 'tshal ba'i/ /bsod nams kyang ni mtha' yas 'byung 'gyur zhing / /rdo rje sems dpa' de la phyag 'tshal bas/ /chos kyi bdag nyid chen po 'thob par 'gyur/ /sems can thams cad yongs su bsgom par yang / /bya ba 'di ni thar pa'i rang bzhin no/ /dngos kun rdo rje sems dpar dag byas pa'i/ /thar pa chos kyi rang bzhin bya ba ste/ /chos 'di 'jig pa med pa'i rang bzhin can/ /'jig rten pas ni rang bzhin gzhan du byas/ /'di ni sku dang gsung dang thugs dag ni/ /chos 'di yi ni dang po 'byung ba ste/ /rnal 'byor gnas ni lha mo skul byed ma/ /der ni dang por chos rnams 'byung 'gyur ba'o/ /der ni sngags rnams rdo rje gcig dngos bsgom/ /chos kyi rang bzhin rdo rje dngos dmigs sam/ / 81-1-87a ral pa'i thor tshugs kyis kyang rab brgyan cing / /sku mdog kyang ni sngon po'i rang bzhin can/ /rdo rje sems dpa'i ting 'dzin dge ba ste/ /gcig pa'i rang bzhin nyid ni bsgom par bya/ /nyi ma'i dkyil 'khor gyi ni dbus gnas par/ / yi ge bskyed pa nyid du bsam par bya/ /yi ge'i gzugs ni yongs su gyur pa las/ /rdo rje rang bzhin nyid du bsam par bya/ /mchu yi mtha' ni sngags pas bsgom bya ba/ /rang gi ngo bo nyid kyis rang bzhin te/ /gnyis su med pa'i sku yi rang bzhin can/ / rdo rje sems dpa' dmigs par bya ba'o/ /'di ni sems nyid yongs su grub pa ste/ /rdo rje 'dzin pa yis ni gsungs pa yin/ /gang zhig bsgom pa 'di yis sgom byed pa/ /sems kyi rang bzhin nyid ni 'grub par 'gyur/ /'di ni lha mo bzhi rnams ro gcig pa'o/ /ngo bo blos ni mkha' dang mnyam las bsgom/ /de lta'i chos byas sems kyi rang bzhin te/ /lha mo thar pa'i rang bzhin nyid du bsgom/ /rdo rje sems dpa' des mthong ba/ /chos rnams kun gyi rang bzhin can/ /rnal 'byor gnas dang rol pa ste/ /thams cad mnyam pa'i btsun mor bcas/ /bkod pa dag dang ldan par gnas/ /mkhas bcas dngos las byung de la/ /rdo rje sems dpa' gang mthong bar/ /gzung ba sangs rgyas spro bsdu'o/ /bzhi yi ngo bo lha mo bzhi/ /dbus su nges par gnas pa ste/ /sgyu ma lta bu'i rang bzhin gyis/ /sa gsum la ni khyab pa'o/ /lha yi der ni kha bzhi pa'i/ /lha tshogs rdo rje nyid yin no/ /de la sangs rgyas rnams kyi ni/ /rnam 'phrul thams cad 'di yi'o/ /ci lta ci ltar sems can rnams/ /skye bar 'gyur ba lan nyid de/ /sangs rgyas rnams kyi rnam 'phrul ni/ /sna tshogs rdo rje yin par 'gyur/ /de las gang byung lha kun kyang / /rdo rje sems dpa'i rnam 'phrul yin/ /sems can rnams ni chos kyi ngo bor blta/ /sa gsum thams cad gcig pa'i ngo bo nyid/ / 81-1-87b rol pa mdzad pa sangs rgyas kyis gzigs shing / /de yis rnal 'byor dbang phyug ma kun mthong / /lha yi dam tshig gi le'u ste dang po'o// // rtag tu mchog ldan khyod kyi ni/ /dam tshig lha mo thams cad kyi/mchog tu gyur pa'i lha mo ni/ /du mchis bdag cag zhu bar 'tshal/ /de la glu bzhi gsungs pa ste/ /steng dang dbyer med byas pa'i chos mnyam rang snang ma/ /zhi la thar pa ma dang mchog tu mnyam byed ma/ /gang phyir sgyu ma'i mdzad pas sangs rgyas rnams dang mnyam/ /mkha' mnyam thams cad rol pa zhi ba med pa'o/ / ru lu ru lu b+h+yo ru d+ha/ mkha' dang mnyam pa'i chos rnams kun du rol pa ste/ /sgyu ma'i rang bzhin dang ni sgra brnyan chos mnyam snang / /lhan cig gnas min cha ste rang nyid pi wang mtshungs/ /byas pa'i snang ba dang ni mnyam par gyur pa'o/ /gang zhig chos rnams snang ba nam mkha' dang mnyam pa/ /der ni rdo rje mdzad pa gzugs can lta bu ste/ /rdo rje'i theg pa der ni gzugs sogs 'dod yon gyi/ /bde ba mi zad sna tshogs dang mnyam stsol mdzad pa'o/ /rnal 'byor gnas ni du ma'i rdo rje'i tshul 'di ni/ /du ma'i gzugs 'dzin der ni rdo rje dang mnyam zhing / /nyid dang 'dra ba'i sems dpa' rnams ni spro mdzad pa'i/ /rdo rje dbyings dang lhan cig mchog stsol mdzad/ /rang bdag mkha' mnyam bzhugs la bskul ba ni/ /gang zhig rtse gcig sems kyis 'di nyan cing / /brjod bcas sems kyi glu 'di 'dzin pa'o/ /glu 'di nam mkha' dang ni mnyam pa ste/ /der ni gzugs bcas rdo rje len pa'i phyir/ /rdo rje'i bdag nyid thugs ni sad byed cing / /rang bzhin gcig pa'i phyir ni rgyud kyang len par 'gyur/ /'di ni rdo rje'i tshig ste rdo rje gzhan rang bzhin/ /sngags pas thugs chud dkyil 'khor kun bsgoms shing / /chos kyi dkyil 'khor dbus gnas pad mchog der bsgom pa/ /dkyil 'khor dbus gnas chos ni hU~M gi dbye ba can/ /gzugs rnams thams cad sgyu ma'i ngo bor nges par brtag / 81-1-88a thugs kyi ngo bo ra gcig bsam rdo rje theg pa'o/ /sems ni mkha' mnyam sems kyi theg pa rang bzhin med/ /gnyis ka'i rang bzhin yang ni lus can ma yin te/ /der ni rdo rje la ni med pa yis/ /rdo rje sems dpa' khyod ni gcig pa'i rang bzhin te/ /'jig rten pa la sgyu ma'i rang bzhin nyid du mdzad/ /sems can 'dul ba'i rang bzhin du ni sad mdzad pa/ /kye lags rdo rje sems dpa' khyod ni gcig pa'i dngos/ /lha mo bzhis smras rdo rje kun tu spangs pa ste/ /nang du gnas pa rdo rje rol par ldan pa dang / / thugs kyi ngo bo nyid kyis der ni rab tu gnas/ /thugs kyi gsang ba'i chos ni rnam par 'byung ba'o/ /nam mkha'i rang bzhin can gyi rdo rje spro bya zhing / /spros pa'i rdo rje slar yang bsdu byas te/ /sems kyi rang bzhin du ni gcig phyir ro/ /sems ni 'gog par gyur pa na/ / kun kyang mnyam zhing mtshungs par mthong / /yang dang yang du sngags bsdus pas/ /gcig pa'i rnam par bya ba'o/ /thugs kyi dkyil 'khor gyi le'u ste gnyis pa'o// // bram ze dang ni gdol pa gcig pa'i rang bzhin du/ /chos rnams kyi ni rang bzhin sangs rgyas kyis gsungs pa'o/ /gcig gi rang bzhin la gnas pa yi dngos po ste/ /de la rdo rje can gyis mnyam pa'i ngo bor gsungs/ /bram ze dang ni khyi dag gcig pa'i dngos yin zhing / /rus pa'i rgyan rnams kyang ni sgyu ma'i rang bzhin te/ /rdo rje'i go 'phang de la len pa'i rang bzhin no/ /rnal 'byor de la mnyam pa'i ngo bor des mthong ste/ /de dang mnyam pa'i rang bzhin sems can rnams la sbas/ /de yi rnal 'byor rang bzhin lha mos gsungs pa ni/ /lha mo thams cad der ni gcig pa'i rang bzhin te/ /gtso bo dang bcas mdzes pa gcig pu 'byung gyur khyod/ /mnyam pa rang bzhin de ni sngags pa gcig pu ste/ /rdo rje rnam par sad par byed pa gcig pu nyid/ /der ni zhe sdang rang bzhin dag ni zhig pa ste/ /yan lag phyed pa'i chos ni 'byung bar 'gyur ba yin/ /der ni 81-1-88b rdo rje'i btsun mo gcig rang bzhin/ /gang tshe rdo rje la ni dbyangs kyis bstod pa'i tshe/ /lha yi g.yon gyi phyed dang gcig tu gyur par blta/ /lung nyid tshad mar byas nas rdo rje sems dpa' de bsgom bya/ /gsung gi dkyil 'khor gyi le'u ste gsum pa'o// // glang po dang ni rta dang mi dang khyi dang ni/ /ba lang sha ste thams cad ma lus gyur pa rnams/ /dam tshig de nyid gcig pa'i rang bzhin nyid yin te/ /mkha' mnyam rang bzhin can gyis rnal 'byor pas bza' ba'i/ /dam tshig 'di ni lha mo bzhi pos gsungs pa'o/ /rnal 'byor pa la bsgom pa'i sems dang ldan gyur cing / /sems gcig pa ni rdo rje 'chang nyid 'grub 'gyur te/ /dngos po nyid dang bcas pa'i thugs ni skye bar 'gyur/ /rdo rje'i dngos mdzad zhi ba ma gsungs snying po ste/ /'di ltar chos rnams mnyam pa nyid du rtogs bya zhing / /de ltar mkha' dang mnyam par rnam par dpyad par bya/ /lha 'di rnam snang lha mo lnga rnams de'i bdag nyid/ /rdo rje theg pa la ni mnyam pa'i rang bzhin te/ /skul byed mas ni srid pa'i rang bzhin yin phyir ro/ /gcig pa'i dang po rdo rje sems te skur mthong ba/ / rdo rje'i theg par 'dod rnams lha mos 'di skad gsungs/ /bden pa bskyed pa 'di ni rnam snang lha mos gsungs/ /'di ni zla ba'i dbus gnas bsgom pa rdo rje'i gsang sngags te/ /de ni sems gcig pa yis rdo rje rnam bsgom pa/ /rab tu 'bar ba'i rdo rje rtse gsum pa nyid do/ /rnal 'byor gnas kyi dbus gnas rdo rje'i rang bzhin bsgom/ /ngas ni rdo rje'i theg par 'di skad du/ /chos rnams gcig pa'i rang bzhin nyid du bstan/ /sku'i dkyil 'khor gyi le'u ste bzhi pa'o// // dngos med mi rtag pa las dngos bcas lus bsgom min/ /lha mos skul ba byed pa'i dngos po ste/ /de ltar chos las nges par brtag bya bas/ /sems ni nam mkha' lta bu'i mtshan nyid dang / /dngos po theg pa med pa'i dngos por bya/ /dngos po'i rang bzhin la ni theg pa med pa ste/ /sems 81-1-89a ni nam mkha' nyid dang mnyam pa'i rang bzhin can/ /snga ma ci bzhin sems ni rnam par sbyar bar bya/ /ci ltar de ni dngos por bya ba ste/ /dngos po 'di ni theg par 'grub par mi 'gyur te/ /sems can nam mkha' lta bu'i mtshan nyid dang / /dbus su tshig ni chos la nges rtog par/ /sems las dngos po nyid du bya ba ste/ /rnam pa du ma'i tshul gyi rang bzhin gyis/ /rdo rje sems dpa' bskyed par bya ba'o/ /ci ltar dang zhing rnyog pa med pa'i chu/ /'di 'dra'i sems ni myur ba'i ngo bor bsgrub/ /de ltar bstan du med pa 'di ni nga yis bstan/ /rdo rje sems dpa'i sku yi rang bzhin gyis/ /bzhi pa'i rnam pa'i ngo bor bya ba ste/ /de la rdo rje'i chu ni yi dam lha yi rang bzhin can/ /thugs kyi ngo bo'i rnal 'byor pas bza' bya/ /chos dang dge 'dun dang ni rdo rje'i chu ste de rnams mnyam pa'i rang bzhin te/ /zhag dang khrag sogs mchog tu mdzes par rab bzhugs dngos po'i lus ni bsgyur bar bya/ /bza' dang bca' dang mal stan la sogs de rnams thams cad 'di'i rang bzhin/ /gang zhig ting nge 'dzin du nges par bstan pa'ang de dang gcig pa'i rang bzhin no/ /sangs rgyas kyis ni gsum char ra rdo rje'i ngo bor mdzad/ /chos rnams thams cad dngos po med pa'i rang bzhin te/ /rdo rje can gyis sgyu ma'i rang bzhin nyid du gsungs/ /de yi rang bzhin mkha' mnyam so sor snang bar 'gyur/ /sgyu ma'i ngo bor nges par bstan pa yis/ /rdo rje yi ni nges par 'jug par bya ba ste/ /sems can rang bzhin la ni theg par med/ /sems ni de la gnas pa'i snying po'o/ /de lta'i ngo bos thugs kyi bdag nyid kyi/ /sngags pa khyod ni 'grub par 'gyur ba ste/ /thugs dang spro dang slar yang bsdus bya ba/ /gsum car yang ni gcig pa'i rang bzhin no/ /sems ni ri rab hU~M dang mnyam byas te/ /dag pa'i sangs rgyas su ni sems slar bskyed/ /sems dub gyur na slar yang bsdu ba dag /der ni sngags pas des brtag bsgom par bya/ /bsdus pa'i ngo bos 81-1-89b slar yang sbyar bar bya/ /rdo rje sems dpa' der ni sku g.yos mdzad/ /slar yang nam mkha'i ngo bos khro bas te/ /de ltar spros dang bsdus pa'i rang bzhin no/ /de la rdo rje sems dpa' gcig dngos grub pa'i phyir/ /de'i phyir spro ba'ang rdo rje 'chang du rigs/ /sngags pas brtan par gyur na spro/ /brtan par ma gyur 'dir spros pa/ /lus nyon mongs kyi 'bras mi 'byin/ /nges par 'grub 'gyur theg pa'i dngos/ /thams cad bden pa 'di rnams bstan/ /de lta'i chos ni bsgom pa yi/ /dngos po rdo rje'i rang bzhin no/ /mkha' dang mnyam pa'i sems ni smad mi bya/ /gang yang dri ma cis kyang gos pa min/ /kye rnal 'byor pa/ bcom ldan 'das yum skul byed ma ni dang po'i rang bzhin te/ /rdo rje bskyed par bsgoms pas sangs rgyas bskyed mdzad pa'o/ /lha mo rnams ni lha dang gcig pa'i rang bzhin te/ /rdo rje sems dpa' sangs rgyas 'byor pa bskyed mdzad pa'o/ /rjes su 'dzin pas bsgom pa'i sems dang ni/ /yi ge hU~M gis kyang ni de 'grub 'gyur/ /brla dang rkang pa dag tu rnam rtog pa'i/ /rmongs pa yid la bya ba ma yin no/ /'jig rten gsum gyi 'khor lo 'di nyid ni/ /rdo rje'i 'od zer gyis ni yang dag bcings/ /sngags pas nam mkha'i khams su khro bo'i lha/ /bye ba stong phrag dag ni spro bya ste/ /gcig pa'i ngo bor gyur pa'i rdo rjer ni/ /slar yang nges par bsdu bar bya ba yin/ /byang chub theg pa sems kyi rang bzhin te/ /byang chub kyang ni sems kyi rang bzhin no/ /gnyis ka rang bzhin sems kyi theg pa ste/ /sems kyang mkha' dang mnyam pa'i rang bzhin no/ /rgyud gzhan dang thun mong ba'i le'u ste lnga pa'o// //ji bzhin brnyes pa nam mkha' dang mnyam pa'i rgyud rdzogs s+ho// //rgya gar gyi mkhan po chen po tAk+Sha ka ga Na dang / lo tsA ba mang 'or dge slong byang chub shes rab kyis bsgyur cing zhus te gtan la phab pa// |