@#/ /rgya gar skad du/ badzra hri da ya badzra dzi hwA na la nA ma d+hA ra NI/ bod skad du/ rdo rje snying po rdo rje lce dbab pa zhes bya ba'i gzungs/ /sangs rgyas dang byang chub sems dpa' thams cad la phyag 'tshal lo/ /'di skad 83-1-66a bdag gis thos pa dus gcig na/ /bcom ldan 'das dur khrod chen po bsil ba'i tshal na bzhugs te/ de na 'khor nye ba'i sras byang chub sems dpa' dang / nyan thos dang / rang sangs rgyas dang / lha dang / mi dang / lha ma yin dang / klu rnams dang thabs cig tu bzhugs so/ /de nas bcom ldan 'das kyis rdo rje snying po zhes bya ba'i ting nge 'dzin la snyoms par zhugs te/ thugs ka nas 'od zer rab tu bkye bar gyur te/ 'od zer des stong gsum gyi stong chen po'i 'jig rten gyi khams thams cad khyab par byas nas sems can thams cad kyi nad dang mi bde ba dang sdug bsngal thams cad dang bral bar byas nas slar bcom ldan 'das kyi thugs su zhugs so/ /de nas drang srong chen po nyes 'dor langs te phyag 'tshal nas bcom ldan 'das la 'di skad ces gsol to/ /bcom ldan 'das 'jig rten gyi khams 'di na sems can thams cad la nad dang / dug dang / rims dang / dgra dang / gdon dang / byad stems dang / sbod gtong dang / char ches pa dang / char mi 'bab pa dang / lo tog ma rungs par byed pa rnams kyis sems can thams cad sdug bsngal zhing nyam thag par gyur na de la ji ltar bsrung ba dang / bskyab pa dang sba bar bgyi/ bcom ldan 'das kyis bka' stsal pa/ drang srong chen po nyes 'dor ba la rdo rje snying po rdo rje lce dbab pa zhes bya ba'i gzungs yod de/ des sems can thams cad la bsrung ba dang / bskyab pa dang / sba bar byed do/ /de ngas bshad kyis legs par rab tu nyon la yid la zung shig /de nas bcom ldan 'das kyis badzra badzra hU~M zhes gsungs pas rdo rje snying po khro zhing gtum pa gdug pa'i cha lugs can 'thon nas bcom ldan 'das kyi snam logs na 'khod par gyur to/ / de nas bcom ldan 'das kyis mgrin gcig tu gzungs 'di bka' stsal to/ /nyi ma nAn zla nAn/ klad pa nAn/ ku na zhi tsi ta ku li nA na/ yag sha bzlog byer/ de nas gzungs 'di gsungs ma thag tu bgegs dang log 'dren thams cad 'jigs shing skrag nas kha sbub tu 83-1-66b 'gyel te lbu bar skyug cing brgyal bar gyur to/ /de nas klu'i rgyal po mtha' yas kyang 'jigs skrag nas lus 'dar zhing bcom ldan 'das la phyag 'tshal nas 'di skad ces gsol to/ /bcom ldan 'das bdag gis dgra dang gdon thams cad brlag par byed pa'i gzungs 'di brjod par bgyis bcom ldan 'das kyis byin gyis brlab tu gsol/ na mo bud+d+ha ya/ tsi tra mu drA yak+Sha bzlog byer/ de nas gzungs 'di smras ma thag tu sa chen po g.yos par gyur te/ 'jig rten gyi khams thams cad kha sbub tu 'gyel te/ gdon dang log 'dren thams cad kha sbub tu 'gyel te/ khrag tu skyug cing dbugs dang bral bar gyur to/ /de nas yang klu mtha' yas kyis 'di skad ces brjod do/ /bcom ldan 'das bdag gis sems can thams cad la bsrung ba dang / bskyab pa dang / sba bar bgyi'o/ / bcom ldan 'das kyi bstan pa bsrung bar bgyi'o/ /sangs rgyas kyi bstan pa yun ring du gnas par bgyi'o/ /char dus su dbab cing lo tog thams cad bsrung bar bgyi'o/ /nad dang dgra dang gdon thams cad gzhom par bgyi'o/ /bcom ldan 'das kyis ji ltar bka' stsal pa ltar bgyid pa las bzlog par mi bgyid do/ /bcom ldan 'das kyis bka' stsal pa/ legs so legs so/ /klu'i rgyal po mtha' yas khyod kyis ji ltar dam bcas pa ltar gyis shig /dam tshig rjes su srungs shig /ji ltar nga'i bka' bcag na ngan song du lhung bar gyur ta re/ nga'i ji ltar bsgo ba thams cad gyis shig /de nas gsang ba'i bdag pos rdo rje lce dbab pa zhes bya ba'i gzungs bklags pas 'grub pa drag po rab tu mi bzad pa 'di smras so/ /nA ga shig /nA ga byer/ nA ga nAn/nA ga go la nAn/ /nA ga ha na ha na/ /mA ra ya rbad nAn/ sa gdon nag po sod/ sa gdon nag po sod/ sa gdon nag po nAn/ phyu ga tsi phaT/ tsi ga phyu phaT/ lce ba ti phaT/ e ga ra ba/ tse di nA ga ba ra ma/ ma hA pa la sa ta/ ye 83-1-67a go de/ sad te nAn/ thum ril rbad/ che ge mo mA ra ya dzaHrbad nAn/ nA ga hril hril/ nA ga phrauM phroM/ nA ga phob/ badzra pra be sha ya/ sa 'di srungs shig byer ya/ b+h+yor ma ma hA a hU~M hU~M phaT swA hA/ de nas gzungs 'di gsungs ma thag tu nam mkha' la gnam lcags drag po'i rdo rje'i thog phab nas/ dgra dang / gdon dang / lo tog ma rungs par byed pa thams cad kyi lus dum bu dum bur gtubs nas rdul phra rab bzhin du brlag par byas so/ /de nas bcom ldan 'das kyis cho ga bka' stsal pa/ drang srong chen po sa'i dkyil 'khor gru bzhi pa byi dor byas nas ba'i rnam lngas byug par bya'o/ /tsan dan dang rgya spos dri zhim pos byug par bya'o/ /me tog sil ma dgram mo/ /bum pa gang ba gzhag go/ /mar me bud do/ /gtor ma bzang po gzhag go/ /lcags sam seng ldeng gi phur pa gzugs so/ /dbus su rdo rje snying po gzhag par bya'o/ /de'i mdun du klu mtha' yas gzhag go/ /de nas mchod par 'dod na me tog la sogs pa mchod pa lnga bya'o/ /klu mchod par 'dod na 'khar ba'i snod du 'o ma dang / klu sman sna tshogs dang / rtsi sman sna tshogs kyis bya'o/ /nad dang dug bsrung bar 'dod na tshil chen dang / gla rtsi dang / skud pa sngon po dang / rma bya'i sgros bya'o/ /klu nag po chen po la ni tshil chen dang / gla rtsi dang / tshon skud sna lnga dang / seng ldeng gi phur pas bya'o/ /'byung po thams cad la ni phur pa dang / yungs kar gyis bya'o/ /skya rengs 'char ka'i gdon la ni phur pa dang / yungs kar dang / yungs nag dang / ske tshe dang / thal chen gyis bya'o/ /'byung po kun du rgyu ba la ni phur bu lnga dang / thod pas bya'o/ /gzhan dag gsad par 'dod na phur pa dang / gzugs dang / thod bas bya'o/ /gnon par 'dod na thod pa dang / dug dang / yungs kar gyis bya'o/ /lo tog gzhom par 'dod na thod pa dang / dug dang / yungs kar dang /tshil chen dang / khrag sna tshogs la bya'o/ /lo thog bsrung bar 'dod na thal chen 83-1-67b dang / ske tshe dang / phur bus bya'o/ /kun tu bsrung ba zhes bya ba gzhan gyi sbod gtong bzlog par 'dod na mchod rten dang gzugs dang / thod pa dang / yungs kar dang / phur pas bya'o/ /thams cad zhi bar 'dod na thab khung rnying par tsan dan nam rgya shug la me btang la/ dkar gsum dang / mngar gsum dang / 'bras dang / til dang / mar dkar la sbyin sreg bya zhing / che ge mo mA ra ya shA ting ku ru swA hA zhes bzlas na thams cad bsrung bar 'gyur ro/ /gang dag gsad par 'dod na sla nga'i nang du seng ldeng ngam gdug pa'i shing la me btang la/ gdug pa'i rdzas sna tshogs dang / ske tshe dang / til dang / mar nag dang / tshil chen dang / ming byang spel te/ sbyin sreg bya zhing / che ge mo ra sha mA ra ya rbad ces bzlas na dgra dang / gdon thams cad brlag par 'gyur ro/ /bdag dang gzhan bsrung bar 'dod na rma bya'i mkhris pa dang ka ra dang / sa'i bdud rtsi lo lnga brgya lon pas bya'o/ /klu sa bdag bsrung bar 'dod na spos dang / gu gul nag po dang / gla rtsi dang / mu zi dang / ldong ros dang / dri chen dang / sbrang rtsis bya'o/ /mchog tu bsrung bar 'dod na 'bras bu gsum dang / bu chung gi rang byung dang / dri chus bya'o/ /khyad par dam pa bsrung ba chen po ni a ru ra rnam par rgyal ba bcang zhing gzungs 'di brjod par bya'o/ /shig byer nAn/ 'go nAn ha na ha na mA ra ya rbad nA na/ drang srong chen po nyes 'dor gzungs 'di yid la rab tu zung shig /sems can thams cad la bsrung ba dang / bskyab pa dang / sba bar gyis shig /nga'i bstan pa rjes su srungs shig /bcom ldan 'das kyis de skad ces bka' stsal nas/ drang srong chen po nyes 'dor dang / thams cad dang ldan pa'i 'khor de dag dang / lha dang/ mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //rdo rje snying po rdo rje lce dbab pa zhes bya ba'i gzungs rdzogs so// //'di dang po ska cog gis bsgyur zhing / phyis gnyan lots+tsha ba dar 83-1-68a ma grags kyis kyang bsgyur ro// // |