@#/ /rgya gar skad du/ Ar+ya pradz+nyA pA ra mi tA nA mASh+Ta sha ta kaM /bod skad du/ 'phags pa shes rab kyi pha rol tu phyin pa'i mtshan brgya rtsa brgyad pa zhes bya ba/ bcom ldan 'das ma shes rab kyi pha rol tu phyin ma la phyag 'tshal lo/ /'das dang ma byon da ltar gyi/ /rgyal ba gang lags de kun gyi/ /yum ni dge ma khyod lags te/ /khyod ni lha mo rgyal ba'i sras/ /rang bzhin med pa'i rang bzhin can/ /sangs rgyas yum gyur de yi mtshan/ /dge ma bdag gis brjod par bgyi/ /'byor par 'dod pas mnyan par gyis/ shes rab kyi pha rol tu phyin pa dang / thams cad mkhyen pa nyid dang / lam gyi rnam pa mkhyen pa nyid dang / rnam pa thams cad mkhyen pa nyid dang / yang dag pa'i mtha' dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / bden pa dang / de kho na dang / yang dag pa dang / phyin ci ma log pa nyid dang / stong pa nyid dang / mtshan ma med pa nyid dang / smon pa med pa nyid dang / dngos po med pa nyid dang / ngo bo nyid dang / dngos po med pa'i ngo bo nyid dang / chos nyid dang / chos kyi dbyings dang / chos gnas pa nyid dang / chos mi 'gyur ba nyid dang / chos skyon med 89-1-16b pa nyid dang / chos kyi mtshan nyid dang / chos bdag med pa nyid dang / ngo bo nyid med pa nyid dang / sems can med pa nyid dang / srog med pa nyid dang / gso ba med pa nyid dang / skyes bu med pa nyid dang / gang zag med pa nyid dang / brjod par bya ba dang / brjod par bya ba ma yin pa dang / sems dang yid dang rnam par shes pa dang bral ba dang / mnyam pa med pa dang / mi mnyam pa dang / mnyam pa dang bdag gi ba med pa dang / rgyags pa med pa dang / spros pa med pa dang / spros pa dang bral ba dang / spros pa thams cad dang bral ba dang / spros pa thams cad las shin tu 'das pa dang / sangs rgyas thams cad kyi yum dang / byang chub sems dpa' thams cad skyed pa dang / nyan thos thams cad 'dzin pa dang / rang sangs rgyas thams cad skrun pa dang / 'jig rten thams cad 'dzin pa dang / bsod nams kyi tshogs zad mi shes pa bsags pa dang / ye shes 'bab pa dang / rdzu 'phrul mdzad pa dang / lha'i mig rnam par sbyong bar mdzad pa dang / lha'i rna ba rab tu dang bar mdzad pa dang / pha rol gyi sems shes par mdzad pa dang / sngon gyi gnas rjes su dran par mdzad pa dang / 'chi 'pho ba dang / skye ba shes par mdzad pa dang / nyon mongs pa thams cad zad par mdzad pa dang / 'phags pa dang / gtsang ba dang / bsangs pa dang / dran pa nye bar gzhag pa la gnas pa dang / yang dag par spong ba'i shugs dang ldan pa dang / rdzu 'phrul gyi rkang pa bzhi'i zhabs dang ldan pa dang / dbang po sbyong bar mdzad pa dang / stobs mdzad pa dang / kha na ma tho ba med pa dang / byang chub kyi yan lag bdun gyi rin po ches mdzes par byas pa dang / nor bdun sbyin par mdzad pa dang / 'phags pa'i lam yan lag brgyad pa ston pa dang / mthar gyis gnas pa'i snyoms par 'jug pa dgu ston par mdzad pa dang / dbang bcu sgrub pa dang / sa bcu la gnas par mdzad pa dang / stobs bcu yongs su rdzogs par mdzad pa dang / zad par gyi skye mched bcus mdzes par byas pa dang / shes pa bcu sgrub pa dang / bag la nyal bcu'i dgra 'jig par mdzad pa dang / bsam gtan rnams sgrub par mdzad pa dang / gzugs med pa'i khams las yang dag par 'da' bar mdzad pa dang / yang dag par rdzogs pa'i 89-1-17a sangs rgyas thams cad kyis bstod pa dang / shes pa thams cad mdzad pa dang / pha rol tu phyin pa thams cad rdzogs par mdzad pa dang / nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa stong pa nyid dang / ngo bo nyid stong pa nyid dang / dngos po med pa'i ngo bo nyid stong pa nyid dang / ma byung ba dang / ma skyes pa dang / ma 'gags pa dang / chad pa med pa dang / rtag pa med pa dang / don gcig pa ma yin pa dang / don tha dad pa ma yin pa dang / 'ong ba med pa dang / 'gro ba med pa dang / rten cing 'brel par 'byung ba rnam par bsgom pa dang / rab tu brtag par bya ba ma yin pa dang / rnam par shes par bya ba ma yin pa dang / gzhi med pa dang / mtshan nyid med pa dang / brtag par bya ba ma yin pa dang / rig par bya ba ma yin pa dang / thog ma dang tha ma 'jig pa med par mdzad pa dang / g.yo ba med par mdzad pa dang / gnyis su med pa dang / gnyis su med pa ma yin pa dang / zhi ba dang / blo 'jug pa rnam par spangs pa dang / gnyen po med pa dang / ma gos pa dang / nam mkha'i lam dang 'dra ba dang / yod pa dang med par brjod pa ma yin pa dang / rmi lam gyi ngo bo nyid dang / sgyu ma lta bu'i chos nyid dang / mgal me bskor ba dang 'dra bar chos thams cad ro gcig pa nyid do/ /su zhig shes rab kyi pha rol tu phyin pa'i mtshan brgya rtsa brgyad pa 'di 'don pa de ngan song thams cad las rab tu thar bar 'gyur ro/ /sangs rgyas thams cad kyis kyang dgongs par 'gyur ro/ /byang chub sems dpa' thams cad kyis kyang rtag par rgyun du srung ba dang / skyob pa dang / sbed pa byed par 'gyur ro/ /de'i gsang sngags kyi tshig 'di dag kyang rtag tu rgyun mi 'chad par dran par bya'o/ /bcom ldan 'das ma 'phags ma shes rab kyi pha rol tu phyin ma/ mos pa la byams ma/ yon tan dpag tu med pa dang ldan ma/ de bzhin gshegs pa thams cad kyi ye shes kyis rnam par mkhyen pa nyid/ sangs rgyas dang / byang chub sems dpa' thams cad kyi phyag bzhes pa la 89-1-17b phyag 'tshal lo/ /'di lta ste/[ \u0f00] pradz+nye pradz+nye ma hA pradz+nye/ pradz+nyA a ba b+hA se/ pradz+nyA A lo ka ka re/ a dz+nyA na bi d+ya ma ne/ sid d+hi/ su sid d+hi/ sid d+h+ya ma ne/ b+ha ga ba ti sar+b+bAM ga sun dA ri/ b+ha ga ba ti/ brta sa li/ pra sA ri ta haste/ sa mA shwA sa ka ri/ tiSh+Tha tiSh+Tha/ kam pa kam pa/ tsa la tsa la/ rA ba rA ba/ gardza gardza/ A gats+tsha/ A gats+tsha/ b+ha ga ba ti mA bi lam+ba swA hA/ shes rab kyi pha rol tu phyin pa 'di 'dzin na shes rab kyi pha rol tu phyin pa 'bum bzung bar 'gyur ro/ /rtag tu bzlas brjod byas na de'i las kyi sgrib pa thams cad byang bar 'gyur ro/ /'di nas shi 'phos nas kyang skye ba dran pa dang / yid gzhungs shing shes rab mtshungs pa med par 'gyur ro/ /dus gsum gyi de bzhin gshegs pa thams cad kyi chos ma lus par bzung bar 'gyur ro/ /gsang sngags dang / rig sngags thams cad kyang yongs su bzung bar 'gyur ro/ /'di nas shi 'phos nas kyang skye ba dran pa dang / yid gzhungs shing shes rab chen por 'gyur ro/ /'phags pa shes rab kyi pha rol tu phyin pa mtshan brgya rtsa brgyad pa rdzogs so// |