@##/ /rgya gar skad du/ Ar+ya a b+hiShiny+tsa ni nA ma d+hA ra NI/ bod skad du/ 'phags pa dbang bskur ba zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong brgyad stong gi dge 'dun chen po dang / byang chub sems dpa' grangs med pa bye ba sngon gyi rgyal ba la lhag par bya ba byas pa rnams dang thabs cig tu bzhugs te/ de nas bcom ldan 'das 90-1-194b kyis tshe dang ldan pa shA ri'i bu la bka' stsal pa/ shA ri'i bu khyod kyis 'di lta ste/ byang chub sems dpa'i ma dang / byang chub sems dpa'i sngon gyi spyod pa dang / bden pa'i smon lam dang / byang chub sems dpa' sa yongs su bzung ba/ byang chub sems dpa'i chos 'di dag sgoms shing / /ston cig /'di lta ste/ gzungs kyi chos kyi rnam grangs so/ /de nas tshe dang ldan pa shA ri'i bus bcom ldan 'das la 'di skad ces gsol to/ /bcom ldan 'das gzungs ni/ yul na mi gnas/ phyogs na mi gnas na bcom ldan 'das gzungs gzungs zhes bgyi ba la/ bcom ldan 'das gzungs zhes bgyi ba 'di'i tshig gi don gang lags/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu legs so legs so/ /shA ri'i bu khyod 'di ltar theg pa chen po la yang yang dag par zhugs pa dang / theg pa chen po la mngon par brtson pa dang / theg pa chen po la lhag par bya ba byed pa dang / khyod gzungs yul na mi gnas/ phyogs na mi gnas par ston pa yang legs so/ /de ci'i phyir zhe na/ shA ri'i bu gzungs ni chos nyid kyis 'das pa dang / ma 'ongs pa dang / da ltar byung ba ma yin te/ shA ri'i bu gzungs ni 'das pa zhes mi 'chad/ ma 'ongs pa zhes mi 'chad/ da ltar byung ba zhes mi 'chad/ dngos por mi 'chad/ dngos po med par mi 'chad/ mtshan ma dang / mtshan ma med par mi 'chad/ chos gang skye ba'i phyir ram/ 'gag pa'i phyir mi 'chad mod kyi/ shA ri'i bu 'on kyang byang chub sems dpa' la phan par bzhed pa'i phyir chos ston te/ gang 'di gzungs kyi chos kyi rnam grangs kyi gzungs ni gzugs med pa bya ba'i lam du gyur pa/ /rigs pa'i stobs kyis gnas ba/ sangs rgyas kyi yon tan/ sangs rgyas kyi lhag par bya ba sgrub pa/ sangs rgyas kyi tshul khrims/ sangs rgyas kyi bsdus pa/ sangs rgyas kyi mtshams sbyor ba/ sangs rgyas 'byung ba'o/ /de nas tshe dang ldan pa shA ri'i bus bcom ldan 'das la 'di skad ces gsol to/ / 90-1-195a bcom ldan 'das gzungs gang la gnas shing gzungs de thob na byang chub sems dpa' bla na med pa yang dag par rdzogs pa'i byang chub las phyir mi ldog par 'gyur ba dang / dam bca' ba bzang ba dang / chos la mi gnas pa dang / bdag the tshom ma mchis pa dang / slob dpon ma mchis pa dang / rang gi lam la gnas pa bcom ldan 'das kyis bshad du gsol/ bde bar gshegs pas bshad du gsol/ bcom ldan 'das kyis bka' stsal pa/ shA ri'i bu legs so legs so/ /shA ri'i bu gzungs thob pa'i byang chub sems dpa' ni sangs rgyas nyid du brjod do/ /shA ri'i bu gang la la zhig byang chub sems dpa'i gzungs thob pa la bsti stang du byed dam/ bla mar byed dam/ rim gror byed dam/ mchod na des sangs rgyas thams cad la bsti stang byas par 'gyur ro/ /gang dag gis gzungs 'di thos pa dang / gang dag mos pa de dag kyang sangs rgyas rnams ji lta ba de bzhin du mchod pa'i 'os su 'gyur zhing byang chub kyi sems dang mi 'bral bar 'gyur ro/ /shA ri'i bu gzungs ni 'di yin te/ san+d+hA ra NI/ ud+d+hA ra NI/ saM pra tiSh+Thi ta/ ut+ta ma/ su pra tiSh+Thi tA/ bi dza ya ba lA/ sarba pri ta dz+nyA A ro hA dz+nyA na ba ti/ uta pA da ni/ bi ni ma NI/ a b+hi Shany+tsa ni/ a b+hi bya hA rA/ shu b+ha ba ti/ a ni shri ta/ ba hu kum+b+ha/ a b+hi ba tsa/ shA ri'i bu 'di dag ni dbang bskur ba zhes bya ba'i gzungs kyi chos kyi ming rnams te/ 'das pa rnams dang / ma 'ongs pa rnams dang / da ltar byung ba rnams dang / legs par gnas pa rnams byang chub sems dpa' gang gis legs par bzung ste 'chang ba de myur du mngon par rdzogs par 'tshang rgya bar bya ba'i phyir bskal pa brgya dang / bskal pa stong dag smon lam gyis zad par byed par 'gyur/ de la mtshon gyis mi tshugs par 'gyur/ me dang srog chags mi srun pa rnams kyis mi tshugs par 'gyur ro/ /de ci'i phyir zhe na/ 'di ltar shA ri'i bu gzungs 'di ni 'das pa'i sangs rgyas rnams kyi yum mo/ /shA ri'i bu rigs kyi bu 'am/ rigs kyi bu mo gang la las stong gsum 90-1-195b gyi stong chen po grangs med pa bcu mthar chags su gang ba'i sangs rgyas rnams la na bza' dang / zhal zas bzang pos bskal pa grangs med par gzung ba byas pa bas/ rigs kyi bu'am/ rigs kyi bu mo gzhan gang gis gzungs 'di las tha na tshig gcig tsam bzung ba de bas ches bsod nams mang du skyed do/ / de ci'i phyir zhe na/ shA ri'i bu dbang bskur ba'i gzungs 'di ni sangs rgyas kyi yum yin pa'i phyir ro/ /bcom ldan 'das kyis de skad ces bka' stsal nas/ dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dbang bskur ba zhes bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te skad gsar chad kyis kyang bcos nas gtan la phab pa// |