@##/ /rgya gar skad du/ Ar+ya Sha Da k+Sha ra bid+yA/ bod skad du/ 'phags pa yi ge drug pa'i rig sngags/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das mnyan yod na bzhugs te/ de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo yi ge drug pa'i rig sngags gang yang dag par rdzogs pa'i sangs rgyas drug dang / 'jig rten skyong ba bzhi dang / gnod sbyin gyi sde dpon chen po nyi shu rtsa brgyad kyis bshad pa/ yi ge drug pa'i rig sngags kyi rgyal mo 'di kun dga' bo khyod kyis zung shig /chongs shig /lhogs shig /kun chub par gyis shig /tad+ya thA/ dan+ti le/ kan+ti le/ da N+Di ma ti/ ma d+hu ma ti/ ma raN+Di/ ko ra N+De/ drA bi ti/ ko shA ri/ tsha Ta dze/ du du ma ni/ ke tu ma ti/ tsu dun+d+he/ kau Ta da na te/ ta hu ra re/ e na ni ge/ hu ta ba hu ni/ kun dga' bo 'di ni yi ge drug pa'i rig sngags te/ klad pa na ba dang / mig na ba dang / rna ba na ba dang / so na ba dang / sna na ba dang / lce na ba dang / snying na ba dang / lto na ba dang / rgyab na ba dang / rtsib logs na ba dang / chu so na ba dang / byin pa na ba dang / rkang pa na ba dang / yan lag na ba dang / nying lag na ba dang / zas ma zhu ba dang / sbos pa dang / mngal du thogs pa dang / rlung las gyur pa dang / mkhris pa las gyur pa dang / bad kan las gyur pa dang / 'dus pa las gyur 90-1-201b pa dang / rims drag po dang / nyin gcig pa dang / nyin gnyis pa dang / nyin gsum pa dang / nyin bzhi pa dang / rims yud tsam pa dang / nyin mo'i rims dang / mtshan mo'i rims kyis btab pa las yi ge drug pa'i rig sngags 'dis bsrung ba dang / yongs su bskyab pa dang / yongs su gzung ba dang / yongs su bskyang ba dang / zhi ba dang / bde legs su 'gyur ba dang / chad pa spang ba dang / mtshon cha spang ba dang / dug gzhil ba dang / chus gtor ba dang / srad bus bcing ba byas pa las gang zhig 'gal bar byed na/ de'i mgo ardza ka'i dog pa bzhin du tshal ba bdun du mi 'gas pa ni kun dga' bo ngas lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa'i skye dgu dang / lha dang / mi dang / lha ma yin du bcas pa'i 'jig rten na ma mthong ngo / /tad+ya thA/ aN+Da re/ paN+Da re/ ka re te/ ke yU re/ b+hU taM ga me/ b+hu ta gra he/ b+hu ta pra k+Shi te/ b+hu ta ya sma ra ya ni/ pri yA ba ni te/ dza ba ti/ ya sho ba ti/ gi ri Ni ni/ sha rI Ni ni/ bdag 'jigs pa thams cad dang / gnod pa thams cad las bde legs su gyur cig swA hA/ bcom ldan 'das kyis de skad ces bka' stsal nas/ tshe dang ldan pa kun dga' bo dang / lha dang / mi dang / lha ma yin dang / dri zar bcas pa'i 'jig rten yi rangs te/bcom ldan 'das kyis gsungs pa la mngon par bstod do// //'phags pa yi ge drug pa zhes bya ba'i rig sngags rdzogs so// |