@#/ /rgya gar skad du/ Ar+ya b+ha dra rA trI nA ma sU tra/ bod skad du/ 'phags pa mtshan mo bzang po zhes bya ba'i mdo/ sangs rgyas dang byang chub 91-1-56b sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na 'od ma'i tshal bya ka lan da ka gnas pa na bzhugs te/ de'i tshe dge slong zhig rgyal po'i khab kyi chu ta la po ta'i 'gram na 'dug go/ /de nas lha kha dog mchog dang ldan pa zhig nam sros nas dge slong de ga la ba der song ste phyin nas chu ta la po ta'i 'gram thams cad snang bar byas te dge slong de la 'di skad ces smras so/ /dge slong khyod kyis mtshan mo bzang po'i mdo sde shes sam/ des 'di skad ces smras so/ /lha bdag gis ni mtshan mo bzang po'i mdo sde ma 'tshal na/ lha khyod kyis mtshan mo bzang po'i mdo sde mkhyen tam mi mkhyen/ des 'di skad ces smras so/ /dge slong bdag gis kyang mtshan mo bzang po'i mdo sde mi shes so/ /lha 'o na mtshan mo bzang po'i mdo sde 'tshal ba de lta bu su mchis/ des 'di skad ces smras so/ /rgyal po'i khab kyi 'od ma'i tshal bya ka lan da ka gnas pa 'di na bcom ldan 'das bzhugs kyis/ khyod bcom ldan 'das kyi thad du song la zhus te/ bcom ldan 'das kyis de khyod la ji ltar lung bstan pa de bzhin du zung la brtson par gyis shig ces smras nas lha de de nyid du mi snang bar gyur to/ /de nas dge slong de nang par langs nas bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas dge slong des bcom ldan 'das la 'di skad ces gsol to/ /btsun pa mdang dgung rmongs nas bdag gi der lha kha dog mchog dang ldan pa zhig bdag ga la ba der mchis te/ chab ta la po ta'i 'gram thams cad snang ba rgya chen pos khyab pas snang bar bgyis nas bdag la 'di skad ces mchi'o/ /dge slong khyod kyis mtshan mo bzang po'i mdo sde shes sam/ bdag gis de la 'di skad ces bgyis so/ /lha bdag gis ni mtshan mo bzang po'i mdo sde ma 'tshal na/ lha khyod kyis mtshan mo bzang po'i 91-1-57a mdo sde mkhyen tam mi mkhyen/ de bdag la 'di skad ces mchi'o/ /dge slong bdag gis kyang mtshan mo bzang po'i mdo sde mi shes so/ /lha 'o na mtshan mo bzang po'i mdo sde 'tshal ba de lta bu su mchis/ des 'di skad ces mchi'o/ /rgyal po'i khab kyi 'od ma'i tshal bya ka lan da ka gnas pa 'di na bcom ldan 'das kyi thad du song la zhus te bcom ldan 'das kyis de khyed la ji ltar lung bstan pa de bzhin du 'di zung la brtson par gyis shig ces smras nas lha de de nyid du mi gda' bar gyur to/ /btsun pa bcom ldan 'das de'i slad du bdag 'di yongs su zhu'o/ /bcom ldan 'das kyis bka' stsal pa/ dge slong khyod kyis lha de shes sam/ dge slong des gsol pa/ btsun pa bdag gis lha de ma 'tshal to/ /bcom ldan 'das kyis bka' stsal pa/ lha'i bu de ni sum cu rtsa gsum gyi lha rnams kyi ded dpon te tsan+dan zhes bya'o/ /dge slong des gsol pa/ btsun pa bdag kyang mtshan mo bzang po'i mdo sde thos par 'tshal lo/ /bcom ldan 'das kyis bka' stsal pa/ dge slong khyod de'i phyir legs par rab tu nyon la yid la zung shig dang / ngas khyod la bshad par bya'o/ /dge slong chos gsum dang ldan na dge slong mtshan mo bzang po'i mdo sde la gnas pa zhes bya'o/ /gsum gang zhe na/ 'di lta ste/ 'das pa la rjes su phrad par mi byed pa dang / ma 'ongs pa la re ba med pa dang / da ltar byung ba'i chos rnams kyis mi phrogs par gnas pa'i chos can te/ chos gsum po de dag dang ldan na dge slong mtshan mo bzang po'i mdo sde la gnas pa zhes bya'o/ /bcom ldan 'das kyis de skad ces bka' stsal nas/ bde bar gshegs pas de skad ces gsungs nas/ ston pas gzhan yang 'di skad du gsung ngo / /'das pa rjes su phrad mi byed/ /ma 'ongs pa la re ba med/ /'das pa gang yin de 'gags te/ /ma 'ongs de ni ma phyin pa'o/ /gang dag da ltar byung ba'i chos/ /de dang de la rab bltas nas/ /rnam par rtog pas mi phrogs par/ /de dag mkhas pas khong du chud/ /sang tsam 'chi 'am su shes kyis/ /de ring nyid du rtun de bya/ /'chi bdag sde chen de dang ni/ /bdag tu shes pa ma yin no/ /sems can kun dang srog chags kun/ /'byung 91-1-57b po kun dang thams cad kyang / /bde ba 'ba' zhig 'grub 'gyur te/ /thams cad nyon mongs med par shog /thams cad bzang por mthong gyur te/ /gang dag sdig par ma gyur cig /de ltar gnas shing rab brtson la/ /nyin mtshan snyom las med pas na/ /de phyir mtshan mo bzang po yi/ / mdo sde thub pas rtag tu gsungs/ /de nas bcom ldan 'das kyis sems can thams cad rjes su bsrung ba'i phyir mtshan mo bzang po'i mdo sde 'di bshad nas/ 'gro lding ba'i gsang sngags kyi gzhi 'di dag gsungs so/ /tad+ya thA/ bi ni bi ra Ni/ pa ni pU ra ni/ bud+d+ha marte/ ma ni ni/ Ni Ni Ni Ni/ Ti Ti Ti Ti/ pa ra Ti/ gau ri/ gan+d+ha ri/ tsaN+Da li/ ma ta~M gi/ puk+ka si/ b+ha ma ni/ dra mi dri/ dra mi dri/ sha ba ri/ sa ra lam b+he/ hI na ma d+ha ma d+ha tra ra ni/ ma ho la na/ da la ba ni/ da la ba ni/ da la bad te/ ma hA da li ni/ tsa li ni/ muSh+Te tsakra pA ti/ ma hA tsakra pA ti/ sha ba ri sha ba ri/ ma hA sha ba ri/ b+hu tsid gi ni/ b+hU tsi rang gi ni/ ni mi/ ni mong gi ri/ ni min d+hi ni/ b+hU b+ha ni swA hA/ tad+ya thA/ e Tu Tu Tu Tu/ na Tu mir+Ni/ kir+Ni/ eng ku/ sid da ta ri/ tsa la lu/ naM tu/ nar lam lu/ gal lu/ A ba tra no ne/ she ku ni ra ba rad sa le/ tar ke/ ta re/ ta rod tu/ nor tu/ ti la la lu/ b+hU ta ba ti ya/ ba ta yi ye swA hA/ tad+ya thA/ a ra gar+De/ na ra gar+De/ pa~M su ka/ pA yi ye/ ka po ta ka pa yi ye ye ta bo d+ha ne swA hA/ dge slong rigs kyi bu'am/ rigs kyi bu mo gang la la zhig gis sems can thams cad rjes su bsrung ba'i phyir mtshan mo bzang po'i mdo dang / tshig dang / tshigs su bcad pa dang / 'gro lding ba'i gsang sngags gzhi 'chang ngam/ 'dzin tam/ klog gam/ yid la byed dam/ kun chub par byed dam/ gzhan dag la yang rgya cher yang dag par ston na/ de'i lus la mes mi tshugs par 'gyur/ dug gis ma yin/ mtshon gyis ma yin/ chus ma yin/ rgyal po'i chad pas ma yin/ rkun po'i chad pas ma yin te/ dus ma yin par 'chi ba'i dus byed par yang mi 'gyur zhing / nges par mya ngan las 'das par nye bar 'gro bar 'gyur ro/ /gang dang gang du skyes par yang / /mtshan mo bzang po'i mdo bklags na/ /skye ba dran dang dgra bcom dang / / 91-1-58a dbang phyug tu yang nges par 'gyur/ /lan cig gis ni gnas kun du/ /dus min 'chi dang bar ma dor/ /bdag gis bdag la mi sbyor bar/ /dus min 'chi dang chos ma yin/ /sems can thams cad srung zhing sel/ /nad dang mya ngan 'jigs skye dang / / rmi lam mi shes mya ngan du/ /brjod na dpal du byed par 'gyur/ /gang gis bris te skyes pa dang / /bud med lus la btags na ni/ /skal ba bzang dang gzi brjid dang / /de yi dpal yang skye bar 'gyur/ /lus dang ngag dang yid kyis su/ /mi dge cung zad gang byas pa/ / de dag thams cad bzang po'i mdos/ /dus ma yin par 'chi las skyob/ /rgyal po chu dang me dang glog /chom po nad dang dgra dag dang / /g.yul sprod pa dang 'thab par yang / /bzang po dran na skyob par byed/ /rig pa bzang po 'di dang ni/ /gsang sngags 'di dag rtag brjod na/ / mi dag mi zhum gnas kun du/ /de bas 'di ni yid kyis brjod/ /'das pa dang / ma byon pa dang / da ltar byung ba'i de bzhin gshegs pa dgra bcom pa yang dag par rdzogs pa'i sangs rgyas rnams la phyag 'tshal lo/ /phyag 'tshal nas rig sngags 'di dag brjod par bya ste/ rig sngags 'dis bdag 'byor par gyur cig /tad+ya thA/ ni mi ni min d+hi re/ ti mi ti ming gi li/ trai lo ki ni/ a lo ki ni/ tri shU la d+ha ra Ni/ a ku pi Ni kri mi kri ti/ ko li ko li/ kud to kud to/ ku to ki si/ ku ti/ ku pi ti/ bdag dang sems can thams cad lag na rdo rje dang lhan cig tu 'jigs pa thams cad dang / nad thams cad dang / dug thams cad dang / rims thams cad dang / gdon thams cad dang / gdug pas zin pa thams cad dang / chom rkun thams cad dang / mi dang mi ma yin pa thams cad dang / 'jigs pa dang / gnod pa dang / nad 'go ba thams cad dang / 'thab pa dang / rnyog pa dang / sdig pa dang / rtsod pa dang / 'gyed pa dang / mtshang 'dru ba thams cad dang / lus dang / ngag dang / yid kyis ngan par spyad pa thams cad dang / thams cad du 'jigs pa thams cad las srungs shig srungs shig /tad+ya thA/ hi li mi li/ tsi li/ i li mi li/ bi shI tsa na/ par+Na 91-1-58b sha ba ri/ tsi li tsi li swA hA/ bcom ldan 'das kyis de skad ces bka' stsal nas/ dge slong de dag dang thams cad dang ldan pa'i 'khor de dang lha dang mi dang lha ma yin dang / nam mkha' lding dang / dri za dang / mi'am ci dang / lto 'phye chen po dang / gnod sbyin dang / srin po dang / yi dwags dang / sha zar bcas pa'i 'jig rten yi rangs te bcom ldan 'das kyis gsungs pa la mngon par bstod do/ /'phags pa mtshan mo bzang po zhes bya ba'i mdo rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te/ skad gsar chad kyis kyang bcos nas gtan la phab pa// |