@#/ /rgya gar skad du/ Ar+ya tsak+Shur pi sho d+ha ni nA ma bi d+yA man+t+ra/ bod skad du/ 'phags pa mig rnam par sbyong ba zhes bya ba'i rig sngags/ sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das shAkya'i grong rdal bzang po zhig na shAkya rnams kyi nang na bzhugs te/ de'i tshe sta du sa zhes bya ba na shAkya bde ba zhes bya ba sangs rgyas la mngon par dad pa/ chos dang dge 'dun la mngon par dad pa/ sangs rgyas la skyabs 91-1-59b su song / chos la skyabs su song / dge 'dun la skyabs su song / sangs rgyas la gcig tu phyogs/ chos la gcig tu phyogs/ dge 'dun la gcig tu phyogs/ sangs rgyas la nem nur med cing the tshom med/ chos dang / dge 'dun dang / sdug bsngal ba dang / kun 'byung ba dang / 'gog pa dang / lam la nem nur med cing the tshom med la bden pa mthong ba/ 'bras bu thob pa/ mngon par rtogs par gyur pa/ mtshon cha dang / dbyig pa bor ba zhig gnas pa de'i mig la snang ba dang / mi snang ba'i gzugs rnams snang bar ma gyur nas/ de sangs rgyas bcom ldan 'das la dad pa skyes te yid la byed cing / sangs rgyas bcom ldan 'das la phyag 'tshal lo/ /sangs rgyas bcom ldan 'das snang ba mdzad pa/ sgron ma 'dzin pa/ gsal ba 'dzin pa la phyag 'tshal lo/ /bde bar gshegs pa thugs rje chen po dang ldan pa gsal bar mdzad du gsol/ bcom ldan 'das bdag gi mig rnam par sbyong du gsol zhes byas pa dang / bcom ldan 'das lha'i gnas pa la bzhugs pa/ lha'i snyan rnam par dag pa mi las 'das pas shAkya bde bas tshig de skad brjod pa gsan to/ /gsan nas kyang ting nge 'dzin de las bzhengs te/ tshe dang ldan pa kun dga' bo la bka' stsal pa/ kun dga' bo khyod song la mig rnam par sbyong ba'i rig sngags 'dis shAkya bde ba la bsrung ba gyis shig /yongs su bzung ba dang / yongs su bskyab pa dang / yongs su bskyang ba dang / zhi ba dang / bde legs su 'gyur ba dang / chad pa spang ba dang / mtshon cha spang ba dang / dug gzhil ba dang / dug bsad pa dang / mtshams bcad pa dang / sa bcing ba gyis shig /de dang de bzhin du 'khor bzhi po dge slong rnams dang / dge slong ma rnams dang / dge bsnyen rnams dang / dge bsnyen ma rnams dang / sems can gzhan gyi mig kyang rnam par sbyongs shig /mig gi sbubs rnam par sbyongs shig /mig gi skyon med par gyis shig /tad+ya thA/ hi li mi li/ ki li mi li/ hi li te mi li/ hu yA hu yA hu yA ma ni/ hu lu hu lu hu lu/ 91-1-60a hu du hu du hu du/ tsak+Shur me bi sho d+ha ya swA hA/ kun dga' bo rig sngags kyi rgyal mo mig rnam par sbyong ba 'di ni mig gi skyon dang / rlung gi skyon dang / mkhris pa'i skyon dang / bad kan gyi skyon dang / 'dus pa las gyur pa'i skyon sel te/ tshul khrims kyi bden pa dang / brtul zhugs kyi bden pa dang / drang srong rnams kyi bden pa dang / rten cing 'brel par 'byung ba'i bden pa dang / sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa dang / dgra bcom pa rnams kyi bden pa dang / rang sangs rgyas rnams kyi bden pa dang / sangs rgyas bcom ldan 'das rnams kyi bden pas shAkya bde ba'i mig na bar ma gyur cig /mchi ma 'dzag par ma gyur cig /kun tu mchi ma 'dzag par ma gyur cig /bdag dang sems can thams cad kyi mig rnam par dag par gyur cig swA hA/ kun dga' bo rig sngags kyi rgyal mo mig rnam par sbyong ba 'di ni yang dag par rdzogs pa'i sangs rgyas drug gis gsungs pa'o/ /nga yang da ltar 'chad de/ rgyal po chen po bzhi dang / lha rnams kyi bdag po brgya byin dang / mi mjed kyi bdag po tshangs pa yang rjes su yi rang ngo / /kun dga' bo gang gis rig sngags 'di dus gsum du brjod na de la thibs por 'gyur ba'am/ rab rib bam/ ling tog gam/ mig nad sngon por mthong ba'am/ mig gi yul gyi skyon lha las gyur ba rnams sam/ klu las gyur pa rnams sam/ dri za las gyur pa rnams sam/ gnod sbyin las gyur pa rnams sam/ srin po las gyur pa rnams sam/ sha za las gyur pa rnams sam/ byad las gyur pa rnams sam/ ro langs las gyur pa rnams sam/ ro langs dang byad las gyur pa rnams sam/ kun tu rgyu las gyur ba rnams sam/ kun tu rgyu dang ro langs las gyur pa rnams kyis tshugs par 'gyur ba ni lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa dang / lha dang / mi dang / lha ma yin du bcas pa'i skye dgu'i 'jig rten na ngas ma 91-1-60b mthong ste de ni gnas med do/ /tshe dang ldan pa kun dga' bos bcom ldan 'das kyi ltar mnyan te/ bcom ldan 'das de bzhin no zhes gsol nas/ gsang sngags kyi gzhi rnams bzung ste/ kun chub par byas nas shAkya bde ba ga la ba der song ste/ bde ba mig rnam par sbyong ba'i gsang sngags kyi gzhi 'di dag de bzhin gshegs pas khyod la bskur gyis nyin re zhing dus gsum du dran par gyis shig ces de la rgyas par smras so/ /shAkya bde bas thos ma thag kho nar mig rnam par dag ste/ mig rnam par dag pas dri ma med pa'i mig gis thams cad mthong ngo / /bcom ldan 'das kyis de skad ces bka' stsal nas/ tshe dang ldan pa kun dga' bo dang / shAkya bde ba dang / lha dang bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa mig rnam par sbyong ba zhes bya ba'i rig sngags rdzogs so// |