@##/ /rgya gar skad du/ Ar+ya kAny+tsa ba ti nA ma d+hA ra NI/ bod skad du/ 'phags pa gser can zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das lhas ma lta bu na gnod sbyin gyi sde dpon chen po lag na rdo rje dang thabs cig tu bzhugs te/ de nas lha'i dbang po brgya byin bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ phyogs gcig tu 'dug go/ /phyogs gcig tu 'dug nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das bdag g.yul ngor mchis te g.yul 'gyed pa na lha ma yin gyi sgyu dang rig sngags rnams dang / gsang sngags dang / sman dag gis pham par gyur pa mkhyen lags sam/ bcom ldan 'das bdag cag rjes su gzung ba dang / bdag cag la thugs brtse ba dang / lha ma yin rnams kyi sgyu dang / rig sngags dang / gsang sngags dang / sman rab tu gzhom pa dang / rab tu gzhig pa'i smad du rnam par rgyal ba chen po'i gsang sngags chen po legs par bstan du gsol/ de nas bcom ldan 'das kyis lha'i dbang po brgya byin la 'di skad ces bka' stsal to/ /kau shi ka de de bzhin no/ /lha ma yin dang g.yul sprad pa na rig sngags rnams dang / gsang sngags rnams dang sman rnams kyis pham pa de de bzhin te/ /kau shi ka snying brtse ba'i phyir da 'dir rig sngags brjod par bya ste/ sgyu thams cad rengs par byed pa/ rig sngags thams cad zlog pa/ gsang sngags thams cad rengs par byed pa/ 'thab pa dang / rtsod pa dang / mtshang 'dru ba dang / 'thab mo dang / 'gyed pa thams cad rab tu zhi bar byed pa/ gsang sngags dang / sman thams cad gcod pa'i rig sngags bshad par bya'o/ /de nas bcom ldan 'das kyis de'i tshe rig sngags chen po gser can bka' stsal pa/ gang bskal 91-1-103b pa grangs med pa gsum du gzhan mu stegs can spyod pa pa dang / kun tu rgyu ba dang gcer bu pa rnams kyis ngan du bsams shing bar chad du byas pa las/ ngas de tshun chad sgyu dang ldan pa rnams kyis rig sngags thams cad bzlog nas pha rol tu phyin pa drug yongs su rdzogs par byas te gzhan mu stegs can spyod pa pa dang / kun du rgyu dang / gcer bu pa dang / 'tshe ba rnams kyi sgyu dang / rig sngags dang / gsang sngags dang / sman dang / bdud kyi sde thams cad rab tu 'joms pa'i rig pa chen mo de ngas bshad par byas/ kau shi ka khyod kyis sems can thams cad rjes su gzung ba'i phyir gsang sngags chen po rnam par rgyal ba chen po zung shig /bcom ldan 'das de bzhin no zhes gsol te lha'i dbang po brgya byin bcom ldan 'das kyi ltar nyan pa dang / de nas bcom ldan 'das kyis de'i tshe rig sngags chen po gser can 'di dag bka' stsal to/ /tad+ya thA/ oM hi ni hi ni/ hi li hi li/ mi li mi li/ hi li mi li/ ni hi ni hi/ ni hi ra pi ni/ kAny+tsa nA pa ti/ lo kA mA te/ b+hu te/ b+hu ku ta man+t+ra/ a d+hi kr-i te/ be de be de be ta man+t+ra/ a d+hi kr-i te/ ha na ha na/ ha sa ha sa/ tshin+d+ha tshin+d+ha/ b+hin+d+ha b+hin+d+ha/ b+ha ga ba ti/ dza ye bi dza ye/ dzam+b+ha ni/ stam+b+ha ni/ ban+d+ha ni/ mo ha ni/ a mo g+ha shag+ti d+hA ra Ni/ gr-ih+Na gr-ih+Na/ kA Da ma mA na si/ dzam+b+ha ya dzam+b+ha ya/ b+hany+dza ya b+hany+dza ya/ stam+b+ha ya stam+b+ha ya/ ban+d+ha ya ban+d+ha ya/ mo ha ya mo ha ya/ lha'i sgyu dang / klu'i sgyu dang / gnod sbyin gyi sgyu dang / srin po'i sgyu dang / nam mkha' lding gi sgyu dang / dri za'i sgyu dang / lha ma yin gyi sgyu dang /mi'am ci'i sgyu dang / lto 'phye chen po'i sgyu dang / rig sngags 'chang gi sgyu dang / rig sngags 'chang grub pa'i rgyal po'i sgyu dang / drang srong gi sgyu dang / sems can rig sngags 'chang thams cad kyi sgyu dang / 'byung po'i sgyu dang / sgyu thams cad ra la ra la/ radz+dza radz+dza/ d+hu ma d+hu ma/ d+hu d+hu ma/ rA ba rA ba/ rA ba na/ tsakrAn tan/ grAn tha ni/ ha na ha na/ 91-1-104a sarba bid+yA/ sha trU nAM/ stam+b+ha ya/ ba yuM stam+b+ha ya/ sUr+yAM stam+b+ha ya/ so maM stam+b+ha ya/ ba ru NAM stam+b+ha ya/ ag+Nin stam+b+ha ya/ ud da kaM d+hi ti d+hi ti/ d+hA ra NI pA sha ha ste/ beSh+Ta ya pA sha ne/ gang dag bdag la phyir rgol ba rnams dang / dgra rnams dang / sdang ba dang / rab tu sdang ba'i sems dang ldan pa rnams dang / 'thab pa dang / rab tu 'thab pa dang / mi phan par 'dod pa thams cad/ ha na ha na/ da ha da ha/ pa tsa pa tsa/ p+hany+dza ya p+hany+dza ya/ dzam+b+ha ya dzam+b+ha ya/ stam+b+ha ya stam+b+ha ya/ b+han+d+ha ya b+han+d+ha ya/ mo ha ya mo ha ya/ ma hA mo ha ni/ b+ha ga ba ti swA hA/ bdag 'jigs pa dang gnod pa dang / nad 'go ba thams cad las srungs shig srungs shig phaT swA hA/ kau shi ka rigs kyi bu'am/ rigs kyi bu mo'am/ rgyal po'am/ rgyal po'i blon po chen po gang la la zhig /gser can gyi rig sngags 'di rjes su dran par byed na de la pha rol gyi 'jigs pa mi 'byung ngo / /de'i sde la pha rol gyi dmag tshogs kyis mi tshugs so/ /lhas ma yin/ klus ma yin/ gnod sbyin gyis ma yin/ srin pos ma yin/ dri zas ma yin/ lha ma yin gyis ma yin/ nam mkha' lding gis ma yin/ mi'am cis ma yin/ rig sngags 'chang gis ma yin/ mkha' 'gro mas ma yin/ dus ma yin par 'chi ba'i dus byed par mi 'gyur/ rig sngags dang / gsang sngags dang / sman rnams kyis mi tshugs/ pha rol gyi dmag tshogs kyis mi tshugs/ pha rol gyi dmag tshogs kyis 'chi ba'i dus byed par mi 'gyur/ lus la mtshon gyis mi tshugs/ lus la me dang / chu dang / dug dang / rig sngags dang / gsang sngags dang / sman rnams kyis mi tshugs so/ /gang gis sdig pa byas pa dang / byed du bcug pa dang / rjes su yi rang ba de nyid slar 'bab par 'gyur/ de nyid du slar 'gro bar 'gyur/ kau shi ka de lta bas na dad pa'i dge slong ngam/ dge slong ma'am/ dge bsnyen nam/ dge bsnyen ma'am/ rigs kyi bu'am/ rigs kyi bu mos rig sngags 'di chu la 91-1-104b lan bdun bzlas te bdag gi lus la byugs na bdag gi lus srung bar 'gyur ro/ /'jigs pa thams cad dang / gnod pa thams cad dang / yams kyi nad dang / nad 'go ba thams cad dang / rig sngags thams cad dang / gsang sngags dang / sman thams cad dang / byad thams cad las shin tu 'da' bar 'dod pas gser can gyi rig sngags 'di dran par bya'o/ /rgyal po'am/ rgyal po'i blon po pha rol gyi dmag tshogs gzhom pa dang / pha rol gyi dmag tshogs gdul bar 'dod pas gser can gyi rig sngags 'di dran par bya'o/ /lan bdun bzlas te mdud pa bdun bor ba'i srad bu gdags par bya ba'am/ chu la lan bdun bzlas pas bdag bsrung bar bya'o/ /'jigs pa thams cad la thogs pa med pa'i gzungs yi ger bris te bcang bar bya/ mgul du gdags par bya'o/ /yi ger bris nas rgyal mtshan gyi rtse mo la btags te g.yul du zhugs na dge ba dang bde bar thar bar 'gyur ro/ /rig sngags 'di'i stobs kyis nang mi dang / g.yog 'khor dang / sde dang bcas te dge ba dang bde bar rgal bar 'gyur ro/ /ma grub pa rnams kyang grub par 'gyur ro/ /rig sngags rengs par byed par 'dod pas srad bu dkar po la lan bdun bzlas te/ mdud pa bdun bor na bcings pa dang rengs par byas par 'gyur ro/ /sgyu rengs par byed par 'dod pas dur khrod kyi sa la lan bdun bzlas te gtor na rgyu rengs par byas par 'gyur ro/ /'gyed pa'i tshe kha lkugs par byed par 'dod pa'i zin thig le la lan bdun bzlas te 'chos na smra ba thams cad kyi lan thebs par 'gyur ro/ /bklag par bya/ kha ton du bya/ brjod par bya ste/ brjod pa tsam gyis sdig pa thams cad rab tu zhi bar 'gyur ro/ /gang gis byas par gyur pa dang / gang gis bsams par gyur pa de nyid la slar 'gro'o/ /srad bu btags sam/ chus bdag bsrung ba byas na de'i lus la rig sngags dang / gsang sngags dang / sman 91-1-105a thams cad kyis mi tshugs so/ /ma grub pa rnams grub par 'gyur ro/ /de'i don thams cad kyang mthun par 'gyur ro/ /bcom ldan 'das kyis de skad ces bka' stsal nas/ lha'i dbang po brgya byin yi rangs te/ /bcom ldan 'das kyis gsungs pa la mngon par bstod do/ /'phags pa gser can zhes bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban+de ye shes sdes bsgyur cing zhus te skad gsar chad kyis kyang bcos nas gtan la phab pa// // |