@#/ /rgya gar skad du/ Ar+ya sa man+ta b+ha dra aSh+Tot+ta ra sha ta ka nA ma d+hA ra NI man+t+ra sa hi ta/ bod skad du/ 'phags pa kun tu bzang po'i mtshan brgya rtsa brgyad pa gzungs sngags dang bcas pa/ byang chub sems dpa' sems dpa' chen po snying rje chen po dang ldan pa kun tu bzang po nam mkha'i dkyil kun tu rab 'byam ma lus pa dang mnyam pa'i ngo bo nyid kyi chos kyi snang ba gsal ba brnyes pa/ sa'i dkyil 'khor kun tu 'phros pa'i sku tha dad pa med cing dus gsum gyi sku mnyam pa nyid brnyes pa/ gzugs sna tshogs can byang chub sems dpa' sems dpa' chen po'i mchog dang / rab mchog dam pa sbyin pa/ yon tan chen po'i sku sa kun tu mnga' mdzad pa la phyag 'tshal lo/ /de nas de'i tshe byang chub sems dpa' sems dpa' chen po'i mchog kun tu bzang po gzugs sna tshogs can / 91-1-112b byang chub sems dpa' rnams kyi ting nge 'dzin rab 'byam sa'i dbang phyug chen po zhes bya ba la snyoms par zhugs so/ /de nas byang chub sems dpa' sems dpa' chen po kun tu bzang po snyoms par zhugs ma thag pa de'i tshe stong chen po'i 'jig rten gyi khams kyi rdul phra rab kyi rdul snyed kyi sku rab 'byam kun tu yongs su rgyas par gyur te/ nam mkha'i khams kyi khongs su gtogs pa'i sku rnams sa'i dkyil 'khor du ma dag tu kun nas 'khod par gyur to/ /de nas sangs rgyas kyi zhing rab 'byam thams cad kyi khongs su gtogs pa'i de bzhin gshegs pa rnams kyis phyag g.yas pa brkyang ste/ byang chub sems dpa' chen po kun tu bzang po'i mgo bo la byugs nas bka' stsal pa/ rigs kyi bu legs so legs so/ /sangs rgyas 'byung ba thams cad kyi snying po gzungs chen mo shod cig / de nas byang chub sems dpa' chen po'i mchog lus 'od zer 'bum gyis snang bar byas pa de'i tshe/ sangs rgyas kyi zhing thams cad g.yo bar byas nas gzungs 'di bshad do/ /tad+ya thA/ oM na mo na ma s+t+ri b+hu ba ne shwa re/ ma hA b+ho gA ya/ a sa ma sa ma/ a mi ta sa ma/ a nan+ta sa ma/ ga ga na sa ma/ tri b+hu ba na sa ma/ a she Sha sa ma/ be Sha sa ma/ pa ra ma ar+tha sa ma/ swa b+hA ba sa ma/ ta thA tA sa ma/ a ra dzaHsa ma/ shud d+hi sa ma/ bud d+hi sa ma/ d+harma ta thA tA sa ma/ a b+hi Sha ma sa ma/ sa ma sa ma/ e kA nA ya/ sA ga ra/ bi shud+d+he/ A lo ka /hI hI/ lab+d+ha lab+d+ha/ bi dza ya bi dza ya/ oM pra sa ga ta/ na ya na ya/ hi ni ra a d+hiSh+ThA na/ saM b+ho ga /aM a na la ya la ya/ d+harma a gra/ d+ha ra d+ha ra/ dza ya dza ya/ hUM hUM/ d+ha ma d+ha ma swA hA/ de nas rgyal ba'i sras kyi thu bo 'jig rten thams cad kyi mgon po gcig pu sems can thams cad la phan par 'dod pa byang chub sems dpa' kun tu bzang pos bcom ldan 'das kyi zhal du bltas te/ sa'i dkyil 'khor g.yo bar byas nas de skad ces smras te/ 'jig 91-1-113a rten gsum po kun tu gang bar byas so/ /de nas lha dang lha ma yin du bcas pa'i byang chub sems dpa' chen po rnams kyis gang ba'i dkyil 'khor nas gser gyi 'od zer 'bar zhing snang la rab tu g.yo bas brgyan pa'i lus can sa steng kun gyi rdo rje me tog thod stan chen po las bskyod de/ dkyil 'khor nas langs nas ha ha zhes bya ba'i sgra phyung ste smras pa/ kye ma snying rje chen po dang yon tan grangs med pa'i rgya mtsho rab tu 'byam pa'i gzungs chen mo/ kye ma sangs rgyas 'byung ba chen mo/ mtha' dang dbus med pa'i sa gsum dang mnyam zhing sems can gyi khams grangs med pa yongs su smin par bya ba'i phyir gnas pa/ chos kyi dkyil 'khor gnas pa med pa'i gzungs chen mo/ /kye ma bskal pa mtha' yas pa nas 'phangs pa'i sdig pa'i bag chags sel cing nyon mongs pa'i rgya mtsho skems la lta ba'i ri bo 'thor bar byed pa'i gzungs chen mo bskal pa mtha' yas par dge ba'i rtsa ba'i tshogs 'byung ba yang dag par ma bsags shing bde bar gshegs pa 'bum phrag du ma mngon sum du mthong bas byang chub kyis bon ma bsgrubs la/ thams cad mkhyen pa'i sa'i khyad par gyi yon tan rgya mtsho yongs su rdzogs pa rjes su thob pa ma yin pa gzhan ni sus kyang de bzhin gshegs pa thams cad kyi snying po gzungs chen mo 'di mnyan par yang mi nus na/ gzung ba'am/ bklag pa'am/ kun chub par bya ba lta ci smos/ gzungs chen mo 'di'i ming tsam yang bskal pa bye ba phrag stong gi bar du thos par dka'o/ /kye ma gzungs chen mo 'di sems can gang dag gi lag na 'dug pa de dag ni rnyed pa legs par rnyed pa'o/ /'tsho ba bzang pos 'tsho ba'o/ / mngon par shes pa rnams kyi gzhi bzang po'o/ /dge ba'i rtsa ba yang dag par rdzogs pa'o/ /de bzhin gshegs pa'i spyod yul la gnas pa'o/ /yon tan thams cad yang dag par rdzogs pa'o/ /'di lan cig brjod pa tsam gyis ngan song gi sdug 91-1-113b bsngal thams cad las thar bar 'gyur ro/ /lan gnyis brjod pa tsam gyis sdig pa thams cad las grol bar 'gyur ro/ /lan gsum brjod pa tsam gyis nyon mongs pa thams cad las grol bar 'gyur ro/ /de ltar na brjod pa tsam gyis gong nas gong du yon tan rnams 'thob par 'gyur te/ de bzhin gshegs pa yang mthong bar 'gyur ro/ /'chag bzhin du bzlas brjod byas na sdug bsngal thams cad las thar bar 'gyur ro/ /shing gcig 'greng gi drung du bzlas brjod byas na grub pa thams cad 'thob par 'gyur ro/ / 'gro bzhin du bzlas brjod byas na sems can thams cad dbang du 'gyur ro/ /nags tshal chen po'i nang du skyil mo krung bcas te 'dug la lan bdun brjod na bsam gtan chen po 'thob par 'gyur la nyon mongs pa dang yang bral bar 'gyur ro/ /'phags pa kun tu bzang po'i sku gzugs kyi drung du skyil mo krung bcas te 'dug la me tog la sogs pa ji snyed pas mchod nas lus ngal bar gyur gyi bar du gzungs chen mo 'di brjod la/ ngal bar gyur nas de nyid du nyal na rmi lam du byang chub sems dpa' kun tu bzang po mthong bar 'gyur te/ phyag g.yas pas de la byugs nas yang dag par dbugs 'byin par mdzad de chos kyi snang ba chen po yang stsol bar mdzad do/ /'di skad du rgyal ba'i sras legs so legs so/ /khyod ni de bzhin gshegs pa'i dkyil 'khor chen por zhugs pa yin te/ khyod tshe brjes nas sa chen po thob par 'gyur ro zhes kyang gsung ngo / /de nas lus bde ba dang / sems bde ba dang / dga' ba chen po dang / dang ba dang / mchog tu dga' ba chen po dang ldan bzhin du sad par 'gyur ro/ /mthu che ba dang / dbang che bar grags par yang 'gyur ro/ /lha rnams kyang de la blta ba'i phyir 'ong ngo / /nang bar langs nas byang chub sems dpa' rnams kyis yang dag par bsdus pa'i mdo sde rnams bklag par bya'o/ /sems can thams cad la yang phan pa dang bde ba'i sems bskyed par 91-1-114a bya'o/ /de nas pha rol tu phyin pa thams cad yongs su rdzogs shing sdig pa thams cad dang bral te/ nyon mongs pa'i phyogs rnams bcom la/ de bzhin gshegs pa rnams kyis kyang bsngags par 'gyur ro/ /lha la sogs pa yang de la bsrung ba dang / bskyab pa dang / sba ba'i phyir brtson par 'gyur ro/ /de ltar ji skad bstan pa bzhin du byed pa'i rgyal ba'i sras de ni ring po mi thogs par kun tu bzang po'i sa chen po la 'jug par 'gyur ro/ /de nas rdo rje gtsug phud la sogs pa stong gsum gyi bdag po rig sngags 'chang chen po rnams dang / spyan chen mo la sogs pa rig sngags 'chang chen mo rnams dang / rdo rje snying po la sogs pa byang chub sems dpa' sems dpa' chen po rnams dang / rdo rje zhags pa la sogs pa rig sngags kyi lha chen po rnams dang / rin chen dra ba can la sogs pa rig sngags kyi lha mo chen mo rnams dang / lha mo sgrol ma la sogs pa byang chub sems dpa' chen po'i dkyil 'khor gyi lha rnams dang / dar chen dang / gzugs bzang dang / shin tu blta na sdug pa la sogs pa gzhon nu rnams dang / gzhon nu ma rnams dang / bran rnams dang / bran mo rnams dang / mi 'khrugs pa la sogs pa log 'dren chen po rnams dang / lus mchog la sogs pa srin po'i dbang po rnams dang / ma mo la sogs pa srin mo rnams dang / dbang phyug chen po la sogs pa lha'i dbang phyug rnams dang / rdo rje me tog thod la sogs pa dkyil 'khor chen por 'dus pa'i byang chub sems dpa' la sogs pa thams cad langs nas/ byang chub sems dpa' sems dpa' chen po'i mchog 'phags pa kun tu bzang po la mtshan brgya rtsa brgyad pa bla na med pa'i yon tan gyi snang ba zhes bya bas bstod pa/ kun tu bzang po kun gyi mchog /sna tshogs kun gyi 'byor pa che/ /dkyil 'khor chen po rdo rje mchog /sna tshogs gzugs can phyogs kyi 91-1-114b bdag /rdo rje chen po dgyes pa che/ /gzi brjid chen po stobs po che/ /gnon dang rab gnon dpal gyi rab/ /khyab bdag rgyal ba'i blo gros rgyal/ /rdo rje chen po rab tu bzhad/ /bsgrub dka' chen po sgrub mdzad pa/ /rol mo chen pos rnam par rol/ / rab dga' chen po 'dul ba po/ /lha chen dbang phyug chen po ste/ /btsan po khyab 'jug skye dgu'i bdag /sa steng sa 'og sa la dgyes/ /de bzhin sa 'dzin sa gsum pa/ /dul dang sbyin pa'i go rims thabs/ /rab mkhyen stong gi mnga' bdag lags/ / shes nyen can te bzod la dgyes/ /brtson 'grus 'byung ba 'byor pa che/ /brtson 'grus bcu dang thabs bcu pa/ /stobs bcu'i sras chen thu bo ste/ /mthu stobs stong gis spro ba dang / /yongs su ldan zhing bcu sel ba/ /rdul sel rgyal po chen po ste/ /rgyal po dkyil 'khor rgya mtsho pa/ /rdul rnams rab tu zhi ba'i thabs/ /cho ga mkhyen pa blo mnga' ba/ /mkhas pa mdzes pa skal ba bzang / /shin tu sdug pa dga' skyed pa/ /snying po chen po las byung ba/ /nyon mongs bral ba thub bar dka'/ / sa dang mnyam pa mkha' dang mnyam/ /rlung dang mtshungs pa'i spyod yul can/ /gzi brjid nyid de gzi brjid mtshungs/ /rgya mtsho bzhi yi chu dang 'dra/ /rmugs dang smyo ba zhi bar mdzad/ /thub par dka' ba'i nyon mongs 'jil/ /g.yul sel g.yul la dgyes pa ste/ /g.yul gyi nyes pa rab 'joms pa/ /gsung bzang ngang pa'i gdangs su bzhad/ /dbang po nye dbang dbang chen sras/ /dbang po las lhag thub dang mnyam/ /chos 'dzin 'byor dang ldan par bstan/ /rab dga' bun long zhi mdzad pa/ /nyon mongs 'dam rdzab skems par mdzad/ /dbang po rgyags pa'i rims nad sel/ /khro bo'i dregs pa rnam par 'joms/ /gsung snyan 'jam pa nyid dang ldan/ /mnyam pa mi mnyam mnyam pa dang / /mnyam med yul las rnam par 'das/ /sangs 91-1-115a rgyas kun dang spyod yul gcig /byang chub snying por rgya cher rol/ /rim pa rab ston dge ba ste/ /spyan bzang phun sum tshogs pa dge /gtsang ma lam bzang sbyin mdzad pa/ /dag mdzad bsreg sbyin mchog sbyin po/ /'joms byed bgegs rnams rnam par 'joms/ /'thob mdzad dpe med gsung ba po/ /rdo rje'i 'jig rten gcig snang ba/ /skyes pa bud med tshogs kyi bdag /nges par yon tan 'byor mdzad pa/ /sems can 'khor ba zhi mdzad pa/ /brtan po sdig pa rnams dang bral/ / kun tu rnam rgyal snang ba po/ /kun tu rgyal ba'i dkyil 'khor can/ /kun tu rgya mtsho'i snang ba mdzad/ /kun tu nyes pa sel ba lags/ /mi bzad sa 'og rnam par dkrugs/ /de bzhin zad mdzad thug par mdzad/ /nyon mongs rgya mtsho rnam par dkrugs/ /nyon mongs phyogs rnams zad par mdzad/ /'bar ba'i dka' ba 'phro mdzad pa/ /rgyags shing bdo ba zhi bar mdzad/ /rdo rje chen po stobs skyed pa/ /sdang ba thams cad nges par 'joms/ /pha rol zhugs pa sdig sel ba/ /dag pa nam mkha'i spyod yul can/ / dag pa sbyin zhing yon tan sbyin/ /'bras bu sbyin zhing kun sbyin pa/ /ye shes sbyin zhing bsod nams sbyin/ /longs spyod sbyin zhing rgyal sbyin pa/ /dbang phyug sbyin zhing tshig sbyin la/ /nor sbyin tshogs ldan rdo rje can/ /gzugs sbyin dpa' bo rnam par rgyal/ /dag cing dge ba'i tshul sbyin pa/ /bde 'byung gtsug na nor bu thogs/ /sa 'dzin gzung bar dka' ba po/ /dkyil 'khor mgu bar sgrub mdzad pa/ /'bab cing de bzhin 'bebs par mdzad/ /rin chen dra ba rin chen mnyam/ /sgron ma mun sel rgyal ba can/ /yon tan ye shes theg chen ldan/ /brtan mchog che ba'i chos nyid can/ /gsung ba chen po shes rab che/ /sangs rgyas tshul ni rab ston pa/ /mchod pa chen po theg chen gyi/ /theg pa bla na med par ldan/ /mchod pa chen po'i chos shes pa/ / 91-1-115b 'bras bu chen po'i chos kyi mchog /ston mdzad 'dul mdzad ston pa po/ /zhi ba de bzhin zhi mdzad pa/ /bzang po bzang dang mtshungs pa nyid/ /kun tu rab 'byam sel mdzad pa/ /snying rje ye shes snying po mkhyen/ /snying rje'i 'od kyi dkyil 'khor can/ /snying rje chen po yongs su rdzogs/ /dus chen rnam par dag par mdzad/ /mtshon mchog dang ba rab mtho ba/ /rtsod chen 'das pa'i spyod yul can/ /skye dgu srung zhing spyan yangs pa/ /rnyed par dka' ba'i dal 'byor can/ /kun tu spyod pa khong dge ba/ /dga' ba'i dam pa sbyin pa po/ /kun du yul kun mnga' ba ste/ /zhe sa bzang po rtag tu mnga'/ /dul ba sangs rgyas kun dang mnyam/ /dkyil 'khor chen po'i pad+ma lags/ /zla ba lta bur sim mdzad thabs/ /mkhas pa rgyags spangs cho ga mkhyen/ /spyod yul gcig la gnas pa ste/ /de bzhin gshegs pa'i ye shes mnga'/ /dam tshig chen po de nyid mkhyen/ /slob dpon chen po grags pa che/ /dam pa nyid de bla na med/ /gsang sngags rlabs ni rgyas par mdzad/ /de ltar khyab bdag chen po ni/ /yon tan brgya yi spos kyis rgyas/ /dag cing byang la mkhas la sogs/ /yon tan 'byung la rig sngags rgyal/ /gtsug na nor bu thogs la sogs/ /mchog rnams kyis ni bstod nas kyang / /sdug bsngal chu bo bcom pa yi/ /bcom ldan 'das kyis tshig 'di gsungs/ /kye ma bstod pa chen po brgya/ /ming brgya rtsa brgyad dam pa yin/ /mi rnams la la gang zhig gis/ /sdig bsal kun tu bzang po la/ /snying nas 'di yis bstod byas na/ /des ni sangs rgyas nyid kyang 'thob/ /gang zhig ming brgya rtsa brgyad 'don/ /mi de yon tan yongs rdzogs shing / /de bzhin gshegs tshul che ba yi/ /ye shes ma lus smra bar nus/ /de ltar thub mchog sras po yon tan brgya yi spobs las nges par byung gyur cing / /yon tan sna tshogs 'byung dang 'jig rten yan chad dag 91-1-116a gis yon tan rgyas rnams la/ /bstod pa chen po rnams byas rgyal ba'i sras la bstod pas nyin re bstod byas na/ /stobs bcu mnga' ba'i skur 'gyur snang ba thob cing rnam dag yon tan 'byung gnas 'gyur/ /'phags pa kun tu bzang po'i mtshan brgya rtsa brgyad pa gzungs sngags dang bcas pa rdzogs so// |