@#/ /rgya gar skad du/ Ar+g+ma tA rA b+han+nA ri kA nA mA Sh+Ta sha ta kaM/ bod skad du/ rje btsun ma 'phags ma sgrol ma'i mtshan brgya rtsa brgyad pa zhes bya ba/ rje btsun 'phags ma sgrol ma la phyag 'tshal lo/ /dpal ldan yid 'ong po Ta la/ /sna tshogs khams kyis rnam par spras/ / sna tshogs ljon pa 'khri shing bkram/ /'dab chags du ma sgra 'byin pa/ /'bab chu sna tshogs lhung lhung sgrogs/ /ri dwags mang pos kun tu dkrig /me tog sna tshogs rigs rnams kyis/ /kun tu dri yis bkang ba ste/ /sna tshogs yid 'ong 'bras bur ldan/ /rkang drug pa rnams glu sgra 'byin/ /mi'am ci rnams dbyangs snyan len/ /glang po myos pas rab tu gtams/ /grub pa rig 'dzin tshogs dang ni/ /dri za rnams kyis glu blangs pa/ /thub pa 'dod chags bral rnams kyis/ /rtag tu legs par bsten pa na/ /byang chub sems dpa'i tshogs gzhan dang / /sa bcu'i dbang phyug rnams kyang ste/ / 'phags ma sgrol sogs lha mo rnams/ /rig pa'i rgyal mo stong rnams dang / /khro bo'i rgyal po'i tshogs gzhan dang / /rta mgrin la sogs kyis bskor ba'i/ /sems can kun la phan brtson pa/ /bcom ldan 'das ni spyan ras gzigs/ /bzhugs te de nas dpal dang ldan/ /pad+ma'i snying po'i gdan bzhugs pa'i/ /dka' thub chen po dang ldan pa/ /byams dang snying rje ldan pa yis/ /lha yi 'khor ni chen po la/ /de yi chos ni ston par bzhed/ /lag na rdo rje stobs chen po/ /der ni nye bar 'ong nas su/ /mchog tu snying rje dang ldan pa/ /des ni spyan ras gzigs la zhus/ /glang po sbrul dang seng ge me/ /glang po stag dang chus dkrigs par/ /'phyan pa'i sems can 'di dag rnams/ /'khor ba'i rgya mtshor bying ba rnams/ /'khor ba'i zhags pas bcings pa rnams/ /chags sdang gti mug rang bzhin las/ /gang gis sems can grol byed pa/ /thub chen bdag la de gsungs shig /dpal ldan de ni spyan ras gzigs/ / 'jig rten mgon pos 'di skad gsungs/ /phyag na rdo rjes rtogs byed pa/ /snyan pa'i tshig ni gsungs pa'o/ /nyon cig gsang ba'i rgyal dbang po/ /skyob pa 'od dpag med pa yi/ /smon lam dbang gis byung ba ste/ /bdag gi bka' yis 'jig rten ma/ /snying rje che dang ldan pa yis/ /'gro ba 'don par brtson pa mo/ /nyi ma shar ba 94-1-267a dang 'dra ba/ /zla ba nya 'dra byad kyi 'od/ /lha dang lha min mir bcas pa/ /'di rnams sgrol zhing snang bar byed/ /'jig rten gsum po g.yo bar byed/ /gnod sbyin srin po 'jigs par byed/ /lha mo ut+pal sngon po'i phyag /ma 'jigs ma 'jigs zhes brjod ma/ /'gro ba yang dag bsrung don du/ /rgyal po rnams kyis bdag bskyed pas/ /'brog dgon mtshon cha ltung ta ba dang / /sna tshogs 'jigs pa 'khrugs pa'i tshe/ /ming rnams dran pa nyid kyis ni/ /bdag gis rtag tu sems can bsrung / /sna tshogs 'jigs pa'i rgya mtsho las/ /sems can thams cad bdag gis bsgral/ /des na bdag la 'jig rten du/ /thub pa'i tshogs kyis sgrol mar sgrogs/ /de nas gus bcas legs gnas shing / /thal mo sbyar bar byas nas ni/ /'bar bzhin bar snang la gnas te/ /'di skad tshig ni gsol bar gyur/ /gang zhig rgyal dang sa bcu yi/ /dbang phyug mgon po byang chub sems/ /rdzu 'phrul che rnams sngon bsgrags pa'i/ /sdig kun 'phrog cing bsod nams dang / /bkra shis grags pa 'phel byed pa/ /nor dang 'bru dang dang dpya nyid dang / /nad med 'byor pa 'phel bar byed/ /tshe dang nad med bde skyed pa/ /sems can thams cad bde 'thob cing /sems can kun gyi dpal dang ni/ /shis pa 'jog cing rnams spel ba/ /mtshan brgya rtsa brgyad pa gsungs shig /sems can rnams la byams mdzad nas/ /thub pa chen po de sgrogs shig / 'di skad zhus la bcom ldan 'das/ /spyan ras gzigs ni rab tu bzhad/ /byams pa 'phro ba'i spyan ras kyis/ /phyogs rnams kun tu rnam gzigs nas/ /bsod nams mtshan gyis brgyan pa yi/ /g.yas pa'i byag gi bskyod mdzad nas/ /de gsungs shes rab shin tu che/ /legs so legs so dka' thub che/ /sems can kun la gcig tu brtse/ /skal ba chen po'i ming rnams nyon/ /mi rnams gang zhig 'di sgrogs pa/ /nor gyi dbang phyug yang dag 'gyur/ /nad rnams kun las rnam par grol/ /dbang phyug yon tan thams cad ldan/ /dus min 'chi ba nges par bsregs/ /shi ba bde ba can 'gro ba/ /de rnams bdag gis bshad par bya/ /lha yi dge 'dun bdag la nyon/ / 'dir khyod rjes su yi rang byos/ /legs par bsdams pa mchis par mdzod/ /oM lo tsa ni su lo tsa ni/ ta re/ tA rod+b+ha be/ sar+b+ba satwA nu kam+pe ni/ sar+b+ba sa twot+ta ri Ni/ sa ha sra b+hu dze/ sa ha sra ne tre/ oM na mo b+ha ga tI a ba lo ka ya/ a ba lo ka ya/ mAM sar+b+ba sa twA~M sh+tsa hU~M phaT swA hA/ oM sid+d+he su sid+d+he/ su ga tAt+na dze maM trAM kr-i bA ni r+m+ma le/ sh+yA me d+yA ma rU be ma hA 94-1-267b pra dz+nyA+e pra ba re ba ra be b+hA Shi te/ oM a pa rA dzi tA ma hA rau drI bi shwa rU bI ma hA ba lA/ oM saHshrI tad+ya thA/ oM dge ba ma ni gzi brjid che/ /'jig rten gso byed snyan pa che/ /mtsho ldan ma dang spyan yang sam/ /shes rab dpal dang blo 'phel ma/ /brtan sbyin gso sbyin ma swA hA/ /oM yig 'dod pa'i gzugs can ma/ /sems can kun la phan brtson ma/ / g.yul las sgrol byed rgyal ba mo/ /lha mo shes rab phar phyin ma/ /'phags ma sgrol ma yid 'ong ma/ /gang ma rnga chen dung can ma/ /rig pa'i rgyal mo tshig snyan ma/ /zla ba'i gdong can dkar mo che/ /mi pham ma dang gos ser ma/ /sgyu ma chen mo dkar chen mo/ /stobs chen pha rol gnon pa mo/ /drag mo chen mo gtum chen mo/ /sdang ba'i sems can rlag byed ma/ /rab tu zhi ma zhi gzugs ma/ /rnam par rgyal ma 'bar 'od ma/ /glog gi phreng ma rgyal mtshan ma/ /ral gri 'khor lo gzhu thogs mtshon/ /rmug byed rengs byed nag mo dang / /dus mtshan ma dang mtshan spyod ma/ /srung byed rmongs byed zhi ba mo/ /zhu ma dge ma su sgrol ma/ /tshangs rig ma dang rig byed yum/ /gsang len ma dang phug gnas ma/ / bkra shis bde byed zhi byed ma/ /skyes pa rig byed yid mgyogs ma/ /thod pa can ma shugs chen ma/ /mtshams ma bden ma gzhan las rgyal/ /ded dpon chen mo snying rjes 'jug /nyams la lam ni rab ston ma/ /mchog ster 'chos byed ston pa mo/ /bud med gzugs la dpag med gnon/ /grub ma ri khrod rnal 'byor ma/ /gdol ma nges ma bdud rtsi ma/ /nor can bsod nams skal chen ma/ /skal bzang ma dang grogs ston ma/ /gshin rje skrag byed 'jigs byed ma/ /drag shul drag shul dka' thub che/ /'gro la gcig tu phan brtson ma/ /skyob ma gus la mnyen gshin ma/ /zhi ma phra mo ngag dbang phyug /rtag ma kun gyi mar gyur ma/ /don kun sgrub byed bzang po ma/ /sbas ma ma ma nor sbyin ma/ /'jigs med gau ta mA rab bshad/ /dpal ldan 'jig rten dbang sras mo/ /yon tan mtha' yas sgrol ma'i mtshan/ /bsam pa thams cad rdzogs byed pa'o/ /oM tA re kr-i pA ba laM ba ni/ mai t+yAt+ma ke shri ba NI ye swA hA/ mtshan brgya rtsa brgyad 'di dag ni/ /phan par 'dod pas bsgrags pa ste/ /gsang ba las ni mchog tu gsang/ /lhas kyang rnyed par shin tu dka'/ /skal bzang skal ba can du byed/ /sems can thams cad bde bar 'jug /sdig pa kun 'phrog bsod nams te/ /nyes pa thams cad 'joms byed pa'o/ /blo ldan gang zhig gtsang byas nas/ /mnyam bzhag dus gsum klog byed pa/ /de ni mi ring dus nyid du/ /rgyal srid dpal ni thob par 'gyur/ /sdug 94-1-268a can rtag tu bde bar 'gyur/ /dbul po rnams ni nor ldan 'gyur/ /'dir ni blun po shes rab che/ /yid gzhungs can 'gyur the tshom med/ /bcings pa 'ching las grol bar 'gyur/ /tha snyad las ni rgyal bar 'gyur/ /dgra bo rnams ni bshes su 'gyur/ /rwa can dang ni mche ba can/ /bgrod dka' dog dang 'thab mo yang / /sna tshogs 'jigs pa 'khrugs pa'i tshe/ /mtshan ni 'di rnams dran pa yis/ /'jigs pa thams cad sel bar 'gyur/ /dus min 'chi las sgrol bar byed/ /snyan grags rol mo 'thob par 'gyur/ /de gcig pus ni bdag nyid che/ /mi rnams skye ba 'bras bur bcas/ /gang zhig mi ni sngar langs nas/ /'di nyid sgrogs par byed pa de/ /dus ring por yang tshe dang ldan/ /mi yi dpal yang rnyed par 'gyur/ /lha dang klu dang gnod sbyin dang / /de bzhin dri za lus srul po/ /sha za srin po 'jigs rung dang / /ma mo drag po'i sems ldan pa/ /gnon po mkha' 'gro ma yi dwa gas/ /skem byed smyo byed gza' de bzhin/ /ro langs sems sgyur sbod gtong gang / /gdug pa'i sems ldan gzhan gyis kyang / / grib ma yang ni 'gong mi nus/ /slar yang de yi smos ci dgos/ /sems can gdug pas gsod mi 'gyur/ /grib gnon dang ni brjed byed nyid/ /gshed byed byad ltem la sogs dang / /nad rnams kyis kyang theb mi 'gyur/ /lha dang lha min 'thab pa yang / /rdzu 'phrul chen pos nyams su myong / /longs spyod dbang phyug yon tan ldan/ / bu dang tsha bo rnam par 'phel/ /blo ldan skye ba dran par 'gyur/ /rigs dang ldan zhing mthong na dga'/ /gnyen dang ldan zhing smra mkhas che/ /bstan bcos kun la 'jigs pa med/ /dge ba'i bshes la yang dag bsten/ /byang chub sems kyi rgyan dang ldan/ /rtag tu skye ba gang gang du/ /sangs rgyas rnams dang mi 'bral lo/ /rje btsun ma 'phags ma sgrol ma'i mtshan brgya rtsa brgyad pa sangs rgyas kyis gsungs pa rdzogs so// //zhes pa 'di ni rje btsun bla ma rig pa 'dzin pa chen pos ne pA la'i yul nas byung ba'i rgya dpe stsal nas gser gyi kAR+ShA pa Na'i gnang skyes dang bcas te sgyur cig ces mnga' ris stod nas bya ma rta'i lam brgyud de bka' pheb pa bzhin si tu pa bstan pa'i nyin byed kyis dpal gdong gi lo tha skar can gyi yar tshes brgyad kyi nyin mdo smad sde dge'i mnga' ris thub bstan chos 'khor gling gi gtsug lag khang du bsgyur ba ste/ sngar bsgyur ba rnams dang mi mtshungs pa dang lhag pa 'ga' zhig 'dug kyang tshig don gyi char 'di nyid legs tshang phul du byung bar rtogs so// // |