@#/ /dkon mchog gsum la phyag 'tshal lo/ /sems can khams ni mtha' yas pa'i/ /sdug bsngal nye bar zhi ba dang / /ngan 'gro rnams las bsgral ba dang / /nyon mongs rnams las sgrol ba'i phyir/ /srid pa mi bde dogs pa na/ /sdug bsngal sna tshogs ci mchis pa/ /de ltas yongs su bskyab pa'i phyir/ /bdag gis byang chub sems bskyed do/ /sems can phongs pa thams cad kyi/ /skyabs su bdag nyid rtag tu shog /bdag ni mgon med rnams kyi mgon/ /rten med rnams kyi rten du bdag / skyabs med rnams kyi skyabs 'gyur zhing / /sdug bsngal bde bar byed pa dang / /bdag ni sems can thams cad kyi/ /nyon mongs zhi bar byed par shog /dge ba'i las rnams gang dang gang / /'di dang gzhan du bsags pa rnams/ /bsod nams ye shes zhes bya ba'i/ /tshogs ni rnam pa gnyis su shog /pha rol phyin pa drug sgo nas/ /bdag gis brtson 'grus gang brtsams pa/ /de yang sems can ma lus pa/ /thams cad la ni phan par shog /tshe yi mtha' klas byed pa dang / /gang yang 96-1-251a cung zad byed 'gyur ba/ mdor na sems can thams cad kyi/ /nyon mongs thams cad zhi ba dang / /grol bar bya ba'i phyir 'bad cing / /byang chub rab tu dga' brtson no/ /de nas rdzogs pa'i byang chub sems/ /cho ga bzhin du kun du bskyed/ / sems can kun la snying rje dang / /byams pa nye bar gnas par bya/ /sems ni legs par sbyang ba'i phyir/ /sna tshogs thabs kyis rjes dran drug /nang gi bdag nyid zhi ba yis/ /bsam pa gcig tu bsgom par bya/ /sngon gyi rgyal ba'i sras rnams kyis/ / smon lam ji ltar mdzad pa bzhin/ /bdag kyang dge ba'i sems kyis su/ /de bzhin du ni smon lam 'debs/ /chos kyi longs spyod sna tshogs la/ /mnyam par bzhag nas yi rang ngo / /sems can thams cad bde ba dang / /zhi zhing nad kyang med par shog / bdag ni bya ba kun nus shing / /yon tan dang yang ldan par shog /nor ldan gtong phod shes rab can/ /bzod ldan dge la dang po dang / /sems can tshe rabs thams cad du/ /skye ba dran zhing brtser ldan shog /dpal legs par grub par byed pa'i rgyud chen po las byung ba'i smon lam rdzogs s+ho// |