@#/ /rgya gar skad du/ Ar+yA pa ri mi tA yur+dz+nyA na hr-i da ya nA ma d+hA ra NI/ bod skad du/ 'phags pa tshe dang ye shes dpag tu med pa'i snying po zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das gang gA tas bskor ba'i rdzing bu'i 'gram na/ dge slong lnga brgya'i dge slong 101-1-62b gi dge 'dun chen po dang / byang chub sems dpa'i dge 'dun chen po dang thabs cig tu bzhugs te/ de nas bcom ldan 'das kyis dge slong rnams la bka' stsal nas/ dge slong de dag bcom ldan 'das kyi ltar nyan pa dang / bcom ldan 'das kyis de dag la 'di skad ces bka' stsal to/ / 'di nas nub kyi phyogs rol na/ /bde ba can gyi 'jig rten khams/ /de na rdzogs pa'i sangs rgyas bzhugs/ /de bzhin gshegs pa tshe dpag med/ /su zhig de yi mtshan brjod na/ /de ni de ru skye bar 'gyur/ /'chi ba'i dus su ston pa ni/ /dge slong dge 'dun bcas te mthong / /de na bud med yod ma yin/ /mngal na gnas pa yod ma yin/ /rin chen rnams kyi pad+mo las/ /rdzu 'phrul chen po 'byung bar 'gyur/ /zas dang gos dang sman rnams dang / /chos gos mal cha lhung bzed rnams/ /sems kyis bsam ma thag tu ni/ /de dag mod la 'byung bar 'gyur/ / phyogs bcur bzhugs pa'i sangs rgyas rnams/ /bde ba can gyi bsngags pa brjod/ /de ltar sangs rgyas bsam mi khyab/ /sangs rgyas chos kyang bsam mi khyab/ /'phags pa'i dge 'dun bsam mi khyab/ /bsam mi khyab la dad byas na/ /rnam par smin pa bsam mi khyab/ / rnam dag zhing du skye bar 'gyur/ /dge slong dag de bzhin gshegs pa dgra bcom pa yang dag par rdzogs pa'i sangs rgyas tshe dpag med kyi pho brang 'khor dang bcas pa zhes bya brgyar dpag tshad khri yod pa zhig yod de/rgyal rigs su skyes so/ /dge slong dag de bzhin gshegs pa dgra bcom pa yang dag par rdzogs pa'i sangs rgyas tshe dpag med kyi yab ni 'khor los sgyur ba'i rgyal po bzang po'i mchog ces bya bar gyur to/ /de'i yum ni gzi brjid can zhes bya bar gyur to/ /de'i btsun mo ni rgyal rigs bzang skyong ma zhes bya bar gyur to/ /dge slong dag de bzhin gshegs pa tshe dpag med kyi sras ni zla ba'i 'od ces bya bar gyur to/ /rim gro pa ni snyan pa dri ma med ces bya bar gyur to/ /dge slong dag de bzhin gshegs pa tshe dpag med kyi shes rab can gyi mchog tu gyur pa ni bzang po'i tog ces bya bar gyur to/ /rdzu 'phrul dang 101-1-63a ldan pa'i mchog dang brtson 'grus chen po dang ldan pa'i mchog ni bkod pa chen po zhes bya'o/ /dge slong dag de bzhin gshegs pa tshe dpag med kyi bdud ni mchod pa'i rgyal po zhes bya bar gyur to/ /lhas byin gyi ming ni dang ba zhes bya bar gyur to/ /dge slong dag de bzhin gshegs pa tshe dpag med kyi nyan thos 'dus pa chen po ni nyan thos chen po drug khri yod do/ /dge slong dag sems can thams cad kyis legs par bsams te/ de bzhin gshegs pa tshe dpag med kyi mtshan legs par bzung la/ zhag bcur sangs rgyas rjes su dran pa yid la ma yengs par sgom zhing 'jig rten gyi khams bde ba can na bzhugs pa'i de bzhin gshegs pa tshe dpag med rgyun du yid la bya'o/ /dpal 'chi med rnga sgra'i rgyal po zhes bya ba'i gzungs 'di yang rtag tu bzlas brjod bya'o/ /nyin lan gsum mtshan lan gsum yan lag lngas phyag byas la/ sems can thams cad kyis de bzhin gshegs pa tshe dpag med bsams na zhag bcu 'das pa'i dus su de bzhin gshegs pa tshe dpag med mthong bar 'gyur ro/ /phyogs bcu na bzhugs pa'i sangs rgyas bcom ldan 'das thams cad kyang mthong bar 'gyur ro/ /dge ba'i rtsa ba thams cad kyang 'jig rten gyi khams bde ba can du yongs su bsngos na/ de 'chi ba'i dus kyi tshe de bzhin gshegs pa tshe dpag med mdun na bzhugs par 'gyur ro/ /de bzhin gshegs pa tshe dpag med de'i sangs rgyas kyi zhing du skye par 'gyur ro/ /dge slong dag 'chi med rnga sgra'i rgyal po zhes bya ba'i gzungs de gang zhe na/ tad+ya thA/ sha ba le/ a ba le/ sa ma dza le/ nirde she/ nirdzA te/ ni ruk+te/ nirmu khe/ dz+wa la pa ri ts+tshe da ni/ su kha ba ti nirde she/ a mr-i te/ A yurgarba nir+hA Ti/ a mr-i te A yuHpra sA d+ha ne/ nir bud+d+hi A kA ka nirde she/ A kA sha nirdzA te/ A kA sha ni ra ku sha le/ A kA sha nirdar+sha ne/ A kA sha a d+hiSh+thA ne/ su kha ba ti a d+hiSh+thA ne/ rU pa nirde she/ tsa twA ri d+harma pra sA d+ha ne/ tsa twA ri Ar+ya sat+ya pra sA d+ha ne/ tsa twA ri mArga b+ha ba na pra sA d+ha ni/ ba la bIr+ya pra sA d+ha ne/ d+harmA ts+tshe da ne/ ku sha le/ ku sha la ni rde she/ ku sha la pra tiSh+thA ne/ bud d+hA ku sha le/ bi shud+d+ha pra b+ha sa d+harma ka ra Ne/ nirdza 101-1-63b ti/ nirbu d+d+he/ bi ma le/ bi ra dze/ rA dza se/ ra sA gre/ ra sA gra ba le/ ra sA gra/ a d+hiSh+thi te/ ku le pra ti ku le/ bi ku le/ dAn+te su dAn+ta tsit+te/ su pra shAn+ta tsit+te/ su pra tiSh+thi te/ su le su mu khI/ d+harme tsa d+harme ba le tsa ba le/ a nu sha a ba le/ bud+d+ha A kA sha gu Ne/ bud+d+ha/ A kA sha ni ra gu Ne/ a mr-i ta dun+du b+hiHswa re swA hA/ dge slong dag dad pa'i rigs kyi bu'am rigs kyi bu mo gang la la 'chi med rnga sgra'i rgyal po zhes bya ba'i gzungs 'di ji skad bstan pa de bzhin du kha ton byed pa des/ gos gtsang ma bgos te sa phyogs gtsang zhing dri ma med par de bzhin gshegs pa tshe dpag med la me tog dang spos kyis mchod pa bya'o/ /byang chub kyi snying po'i pad+ma'i gnas dang / byang chub kyi shing phun sum tshogs pa yang yid la bya'o/ /de la yang 'dod pa bskyed par bya ste/ 'dod pa dang dad pa byas na de bzhin gshegs pa tshe dpag med de'i sangs rgyas kyi zhing du skye bar 'gyur ro/ /dge slong dag de bzhin gshegs pa tshe dpag med kyi shing gi rgyal po ni rin po che'i pad+ma rnam par snang ba zhes bya ba shing de me tog dang / 'bras bu phun sum tshogs pa'o/ /pad+ma'i gdan ni dag cing gsal la bzang zhing bkra ba'i 'od zer can zhes bya ba ste/ rin po che du mas bskor ba la de bzhin gshegs pa tshe dpag med bzhugs so/ /g.yas na ni byang chub sems dpa' spyan ras gzigs dbang phyug go/ /g.yon na ni byang chub sems dpa' mthu chen thob pa ste/ byang chub sems dpa'i tshogs grangs med pas bskor to/ /dad pa'i rigs kyi bu'am rigs kyi bu mo gang la la mos pa dang dad pa dang gus pa mang ba de der skye bar 'gyur te/ gser gyi sa gzhi chen po la rin po che sna bdun gyi pad+ma chen po dag la rdzus te skye bar 'gyur ro/ /dge slong dag dge slong pha'am/ dge slong ma'am dge bsnyen pha'am dge bsnyen ma gang la la bcom ldan 'das de bzhin gshegs pa tshe dpag med de'i mtshan yang dag par 'dzin pa de la me'i 'jigs pa mi 'byung / chu'i 'jigs pa mi 'byung / dug gi 'jigs pa mi 'byung / mtshon cha'i 'jigs pa mi 'byung / gnod sbyin gyi 'jigs pa mi 'byung / srin po'i 'jigs pa mi 'byung / sngon gyi las kyi 101-1-64a rnam par smin pa ni gang la yang ma gtogs so/ /bcom ldan 'das kyis de skad ces bka' stsal nas/ dge slong de dag dang thams cad dang ldan pa'i 'khor de dag dang lha dang mi dang lha ma yin dang dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa tshe dang ye shes dpag tu med pa'i snying po zhes bya ba'i gzungs rdzogs so// //rgya gar gyi mkhan po pu N+ya sam+b+ha wa dang / lo ts+tsha ba pa tsha ba nyi ma grags kyis bsgyur ba'o// // |