@##/ /rgya gar skad du/ Ar+ya ma hA d+hA ra NI/ bod skad du/ 'phags pa gzungs chen po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te/ de'i tshe na tshe dang ldan pa kun dga' bo grong khyer gnas bcas su dbyar gnas dbyar zla ba gsum 'das pa dang chos gos byas te/ chos gos zin nas lhung bzed dang chas gos thogs te/ bcom ldan 'das ga la ba der song nas phyin pa dang / bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo khyod kyis sems can thams cad kyi don dang / phan pa dang / bde ba dang / stobs dang / gzi brjid kyi phyir gzungs chen po'i gsang sngags gzhi 'di dag zung shig /chongs shig /long shig /lhogs shig /kun chub par gyis shig /yid la zung shig /de ci'i phyir zhe na/ kun dga' bo gzungs chen po'i gsang sngags gzhi rnams ni rnyed par dka' zhing / de bzhin gshegs pa dgra bcom pa yang dag par rdzogs pa'i sangs rgyas rnams 'jig rten du 'byung ba yang rnyed par dka' ba'i phyir te/ dper na u dum bA ra'i me tog lta bu yin gyis/ zung shig /chongs shig /long shig / 101-1-163b lhogs shig /yid la zungs shig /kun chub par gyis shig /kun dga' bo dad pa'i rigs kyi bu'am/ rigs kyi bu mo gang la la gzungs chen po'i gsang sngags kyi gzhi 'di dag 'chang ngam/ 'dzin tam/ klog gam/ yid la 'dzin tam/ kun chub bar byed na de mtshon gyis 'chi ba'i dus byed par mi 'gyur/ dug gis ma yin/ mes ma yin/ chus ma yin/ rgyal pos chad pas ma yin te/ dus ma yin par 'chi ba'i dus byed par mi 'gyur ro/ /de lha dang / lha ma yin dang / klu dang / rlung lha dang/ nam mkha' lding dang / dri za dang / mi'am ci dang / lto 'phye chen po dang / gnod sbyin dang / srin po dang / yi dgas dang / sha za dang / grul bum dang / srul po dang / lus srul po dang / 'byung po dang / brjed byed dang / smyo byed dang / gnon po dang/ grib gnon dang / gshed byed dang / gnod byed dang / byad kyis mi tshugs/ de la mi dang / mi ma yin pa rnams kyis mi tshugs/ de la rig pa'i las dang / ngag gi las dang / yid kyi las kyis mi tshugs/ de la rims nyin gcig pa dang / nyin gnyis pa dang/ nyin gsum pa dang / nyin bzhi pa dang / rtag pa'i rims dang / 'byung po'i rims dang / yud tsam pa dang / rlung las gyur pa dang / mkhris pa las gyur pa dang / bad kan las gyur ba dang / 'dus pa las gyur pas mi tshugs par 'gyur ro/ /de la gzungs chen po'i gsang sngags gzhi ni 'di rnams yin no/ /tad+ya thA/ dz+wa le/ ma hA dz+wa le/ dz+wa la ne/ ma hA dz+wa la ne/ tA pa ne/ ma hA tA pa ne/ dz+wa li te/ u ka ke /bu ga ge /saM b+ha de/ ma hA saM b+ha de/ tsakre/ ma hA tsakre/ bdag dang sems can thams cad 'jigs pa thams cad dang / gnod pa dang / nad 'go ba thams cad las srungs shig srungs shig swA hA/ kun dga' bo gzungs chen po gsang sngags kyi gzhi 'di dag ni yang dag par rdzogs pa'i sangs rgyas bye ba phrag bdun cu rtsa bdun gyis gsungs te/ nga yang da ltar 101-1-164a 'chad cing rjes su yi rang ngo / /kun dga' bo dad pa'i rigs kyi bu'am/ rigs kyi bu mo gang la la gzungs chen po'i gsang sngags kyi gzhi 'di dag 'dzin tam/ 'chang ngam/ klog gam/ yid la byed dam/ kun chub par byed na/ de tshe rabs bdun gyi bar du tshe rabs dran par 'gyur ro/ /de byang chub kyi sems las mi ldog par 'gyur ro/ /de la gzungs chen po'i gsang sngags kyi gzhi ni 'di rnams yin no/ /tad+ya thA/ an+te/ ban+d+he/ k+Sha me/ k+Sha ma me/ d+hA na se/ ba da ne/ a da ne/ hu le/ ma hA hu le/ ta ka re gaM b+hI re/ duSh+pu ste/ bdag dang sems can thams cad 'jigs pa thams cad dang / gnod pa dang / nad 'go ba thams cad las srungs shig srungs shig swA hA/ kun dga' bo gzungs chen po'i gsang sngags kyi gzhi 'di dag ni yang dag par rdzogs pa'i sangs rgyas bye ba phrag brgyad cu rtsa brgyad kyis gsungs te/ nga yang da lta na 'chad cing rjes su yi rang ngo / /kun dga' bo dad pa'i rigs kyi bu'am/ rigs kyi bu mo gang la la gzungs chen po'i gsang sngags kyi gzhi 'di dag 'chang ngam/ 'dzin tam/ klog gam/ yid la byed dam/ kun chub par byed na/ de tshe rabs bcu bzhi'i bar du tshe rabs dran par 'gyur ro/ /de byang chub kyi sems las mi ldog par 'gyur ro/ /de la gzungs chen po'i gsang sngags kyi gzhi ni 'di rnams yin no/ /tad+ya thA/ aT+Te/ baT+Te/ ag+ge/ bag+ge/ Thag+ge/ Thag+ge/ d+hak+ke/ d+hA ra d+hak+ke/ Ta ke Ta ra ke/ a ka si/ sa ka si/ ma ka si/ i li mi li/ ti li mi li/ ro+o ra be/ ma hA ro+o ra be/ b+hU taM ga me b+hU ta pa rA ya Ne/ ti mi gi se/ ma hA ti mi ge se/ saM b+hA be/ ma hA saM b+hA be/ bdag dang sems can thams cad 'jigs pa thams cad dang / gnod pa thams cad dang / nad 'go ba thams cad las srungs shig srungs shig swA hA/ kun dga' bo gzungs chen po'i gsang sngags kyi gzhi 'di dag ni yang dag par rdzogs pa'i sangs rgyas bye ba phrag dgu bcu rtsa dgus gsungs te/ nga yang da lta na 'chad cing 101-1-164b rjes su yi rang ngo / /kun dga' bo dad pa'i rigs kyi bu'am/ rigs kyi bu mo gang la la gzungs chen po'i gsang sngags kyi gzhi 'di dag 'chad pa dang / 'dzin pa dang / klog pa dang / yid la byed pa dang / kun chub par byed pa de tshe rabs nyi shu rtsa gcig gi bar du tshe rabs dran par 'gyur ro/ /de byang chub kyi sems las phyir ldog par mi 'gyur ro/ /de la gzungs chen po'i gsang sngags kyi gzhi ni 'di rnams yin no/ /tad+ya thA/ ru le/ ma hA ru le/ he he ri/ mat+ta ri/ dzaM b+ha ni/ staM b+ha ni/ kun dga' bo dad pa'i rigs kyi bu'am/ rigs kyi bu mo gang la la gzungs chen po'i gsang sngags kyi gzhi 'di dag gis shing skam po la bsrung ba'am/ yongs su bskyab pa dang / yongs su gzung ba dang / yongs su bskyang ba dang / zhi ba dang / bde legs su 'gyur ba dang/ chad pa spang ba dang / mtshon cha spang ba dang / dug gzhil ba dang / dug gsad pa dang / mtshams gcad pa dang / nam mkha' bcing ba dang / sa bcing ba byas te/ de la srad bus bcings na de'i rtsa ba yang skye bar 'gyur/ yal ga dang / lo ma dang/ lcug ma dang / me tog dang / 'bras bu yang skye bar 'gyur na rnam par shes pa dang bcas pa'i lus la lta smos kyang ci dgos te/ kun dga' bo sngon gyi las kyi rnam par smin pa ni ma gtogs so/ /kun dga' bo nyi zla 'di ltar rdzu 'phrul che ba/ 'di ltar mthu che ba/ 'di ltar dbang che bar grags pa 'di gnyis ni sa la ltung yang srid do/ /kun dga' bo ri'i rgyal po ri rab gnas nas g.yo yang srid do/ /kun dga' bo rgya mtsho chen po 'di ltar zab pa/ 'di ltar rgya che la 'di ltar rdzu 'phrul che zhing mthu che ba bzhi po 'di dag ni skams shing yongs su zad de mthar thug par 'gyur yang srid do/ /kun dga' bo sa chen po 'di ni rnam pa stong du 'gyes kyang srid/ chu ni gsher ba nyid 'dor yang srid/ me ni tsha ba 'dor ba yang srid/ rlung ni grang ba 'dor yang srid kyi/ gzungs chen po'i gsang 101-1-165a sngags kyi gzhi 'di dag ni slu mi srid do/ /kun dga' bo lha'am/ klu'am/ lha ma yin nam/ nam mkha' lding ngam/ rlung lha'am/ dri za'am/ mi'am ci'am/ lto 'phye chen po'am/ gnod sbyin nam/ srin po'am/ yi dgas sam/ sha za'am/ grul bum mam/ srul po'am/ lus srul po'am/ 'byung po'am/ bram ze'am/ srin po'am/ grib gnon nam/ mi dang / mi ma yin pa gang la la zhig gam/ gzhan su yang rung ba zhig gis gzungs chen po'i gsang sngags kyi gzhi 'di dag las 'gal bar byed na/ tad+ya thA/ ag+gi le/ tsag+gi le/ bal+le/ mal+le/ o hA ni/ mo hA ni/ dzaM b+ha ni/ staM b+ha ni/ bdag dang sems can thams cad la srungs shig srungs shig swA hA/ rgyal po chen po yul 'khor srung yang lcags kyi 'khor lo 'bar ba/ rab tu 'bar ba/ kun du rab tu mched cing 'bar ba/ me lce gcig tu gyur pas de'i mgo tshal ba bdun du 'gems so/ /rgyal po chen po 'phags skyes po dang / mig mi bzang dang / rnam thos kyi bu yang lcags kyi 'khor lo 'bar ba/ rab tu 'bar ba kun du rab tu mched cing 'bar ba me lce gcig tu gyur pas de'i mgo tshal ba bdun du 'gems so/ /lha'i dbang po brgya byin yang rdo rje 'phen to/ /gsang ba pa'i bdag po lag na rdo rje yang rdo rje 'bar ba/ rab tu 'bar ba/ kun du rab tu mched cing 'bar ba/ me lce gcig tu gyur pas de'i mgo tshal pa bdun du 'gems so/ /de rgyal po'i pho brang lcang lo can du gnas su mi dbang ste/ de'i mgo ardza ka'i dog pa bzhin du tshal pa bdun du 'gas so/ /bcom ldan 'das kyis de skad ces bka' stsal nas/ tshe dang ldan pa kun dga' bo dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa gzungs chen po rdzogs so// //rgya gar gyi mkhan 101-1-165b po dzi ni mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te/ skad gsar chad kyis kyang bcos nas gtan la phab pa// |