@#/ /rgya gar skad du/ Ar+yA ba lo ki te shwa ra s+ya nA mASh+Ta sha ta kaM /bod skad du/ 'phags pa spyan ras gzigs dbang phyug gi mtshan brgya rtsa brgyad pa/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das 'phags pa spyan ras gzigs dbang phyug gi gnas pho brang ri po Ta la'i rtse mo na me tog dri zhim po sna tshogs kyis brgyan pa/ 'dzam bun da'i gser gyi kha dog dang 'dra ba/ rin po che sna tshogs kun du 'bar ba'i sa phyogs na bzhugs te/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang mi ma yin pa bye ba khrag khrig brgya stong du mas bcom ldan 'das la bsti stang du byas/ bla mar byas/ rim gror byas/ mchod cing bkur stir byas te/ yongs su bskor nas mdun du byas pa la chos ston te/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su byang ba/ yongs su dag pa/ yongs su rdzogs pa/ yongs su gsal ba/ tshangs par spyod pa 'ba' zhig yang dag par rab tu ston to/ /de nas tshangs pa la sogs pas byang chub sems dpa' sems dpa' chen po 'phags pa spyan ras gzigs dbang phyug la bstod pa/ kye kye sangs rgyas bcom ldan 'das/ / bya ba byas shing byed la mkhas/ /khur bor bdag don rjes su brnyes/ /srid par sbyor ba yongs su zad/ /yang dag bka' la rnam grol sems/ /shes rab shin tu rnam par grol/ /klu chen po ni cang shes po/ /sems la dbang 101-1-216a sgyur thams cad kyi/ /mchog tu pha rol phyin pa thob/ /ye shes tshogs ni yongs su rdzogs/ /srid pa'i dgon pa rab tu rgal/ /gzhan la phan pa mdzad le brtson/ /thugs rje dang ni 'brel pa'i thugs/ /skye dgu kun la mchog tu byams/ /bde bar brtson pa byams las byung / /mtha' yas sems can grol la mkhas/ /bde bar gshegs pa nyid las skyes/ /bde bar gshegs pa nyid kyi bka'/ /khams gsum kun gyi gnyen gcig po/ / 'dod chags zhe sdang gti mug med/ /dri ma gsum ni rab tu spangs/ /rig pa gsum gyi pha rol phyin/ /mngon par shes pa drug kyang brnyes/ /n+ya gro d+ha ni lta bur zlum/ /skyes bu chen po'i mtshan rnams ni/ /sum cu rtsa gnyis dag dang ldan/ / dpe byad bzang po brgyad cus kyang / /sku ni rnam pa kun du brgyan/ /sku mdog gser gyi kha dog 'dra/ /sku tshad che la dkar sham po/ /nA ga ge sar gzhon nu ltar/ /cung zad dmar pa 'dra ba'i mdog /dbu yi thor tshugs dag dang ldan/ /thor tshugs mang pos nye bar g.yogs/ /dbu la 'od dpag med pa bzhugs/ /'od zer dag ni rnam par 'phro/ /'od 'phro 'dom gang rab tu 'bar/ /gser gyi ri 'dra grags pas khyab/ /gzi brjid dag kyang rab tu che/ /shar gyi ri la 'char ba yi/ / nyi ma'i gtsug tor dag dang ldan/ /nor bu rin chen 'bar ba yi/ /se ral khar ni sku phyed brgyan/ /sa dag la ni rab tu mkhas/ /pha rol phyin pa bcu rnams spyod/ /tshul khrims mnyams ral ba med/ /mthon ka seng ge'i ral pa 'dra/ /sku ni 'jam zhing ldem bag can/ /gzigs shing gshegs pa khyu mchog 'dra/ /g.yas su 'khyil pa'i dung yang 'dra/ /dpral ba zla ba kham pa 'dra/ /dpral ba'i dbyibs kyi rgya yang che/ /smin mtshams bar yang yong ma chad/ /spyan ni nor bu rin 101-1-216b chen 'bar/ /shangs kyi dbyibs kyang cung zad mtho/ /tshems kyi sgros kyis rnam par gnon/ /ljags kyis stong gsum khebs mdzad cing / /snyan gyi khung yang rab tu zab/ /mgur kyang bum pa'i mgrin pa 'dra/ /dpung pa dag kyang rab tu zlum/ /phyag sor rnams kyi tshigs kyang ring / /sor mo 'jam zhing cung zad dmar/ /phyag sor rnams kyi bar yang 'brel/ /phyag dang zhabs kyi mthil rnams la/ /'khor lo dag gis rab tu brgyan/ /ston ka'i pad+ma 'dra bar mdzes/ / sku mdangs 'jam zhing shangs kyang rgyas/ /gsung ni tshangs pa'i dbyangs ltar snyan/ /yid du 'ong zhing dga' bar 'gyur/ /blta na sdug cing mdangs dga' ba/ /pad+ma las 'khrungs pad+ma 'dra/ /pad+ma dag las kun du skyes/ /pad+ma dag gi gdan la bzhugs/ /phyag na pad+ma bzang po bsnams/ /ril ba spyi blugs phyag na bsnams/ /kriSh+Nas ra'i pags pa man bas/ /dbyug pa dang ni bgrang phreng 'dzin/ /bkra shis dag gis gtsang mar gyur/ /snga nas gsung zhing gsong por gsung / /bdud rtsi'i char ni rab tu 'bebs/ /yid bzhin nor bu rin chen 'dra/ /sems can thams cad dga' bar mdzad/ /bzang por snang ba'i ljon shing ltar/ /sems can kun gyi gsos su 'gyur/ /sangs rgyas kyi ni sprul pa lags/ / bde bar gshegs pa'i cha lugs mnga'/ /bde bar gshegs pa'i ring bsrel 'dzin/ /ba spu nyag ma re re yang / /sems can rnams kyi gtso bor gyur/ /bsod nams mdzad cing dge ba mdzad/ /bshol ba med cing nges par mdzad/ /rab tu drag pa'i brtson 'grus can/ /'khor ba dag las rab tu rgal/ /dam chos rgyal tshab mnga' gsol ba/ /yid bzhin 'khor lo dge ba sbyor/ /don yod zhags pas sdug bsngal 'dren/ /ha ya gr-i ba bdud bzhi 'joms/ /kro d+ha mgrin sngon 101-1-217a gdug pa sel/ /chu srin 'dzin khri'i 'jigs las sgrol/ /lha mo sgrol ma rjes su 'brang / /khro gnyer can ni bka' bzhin byed/ /rgyal ba can ni tshul dang ldan/ /mthu chen ldan zhing dran dang ldan/ /yon tan ldan zhing byams dang ldan/ /shes rab ldan zhing dpal dang ldan/ /tshul khrims ldan zhing don dang ldan/ /don rnams kun ni rig pa po/ /the tshom thams cad gcod pa po/ /chos rnams thams cad smra ba po/ /'jig rten rnams kyi ston pa po/ / zhal bzang zla ba nya ba 'dra/ /sku smad rin chen kun gyis brgyan/ /gser gyi mchod sdong 'dra bar gnas/ /'od zer nyi ma stong bas lhag /tshangs pa la sogs phyag bgyis pa'o/ /'phags pa spyan ras gzigs dbang phyug la mtshan brgya rtsa brgyad kyis gang zhig stod pa byed pa de mtshams med pa lnga byas pa'i las kyi sgrib pa yongs su byang bar 'gyur ro/ /dkyil 'khor thams cad du zhugs par 'gyur ro/ /gsang sngags thams cad kyang 'grub par 'gyur ro/ /bskal pa stong gi bar du yang ngan 'gror mi skye'o/ /mnar med par mi 'gro'o/ /su zhig nang par langs nas klog gam/ klog tu 'jug gam/ kha ton du 'don na mi de'i lus la mdze dang / shu ba dang glo na ba dang dbugs mi bde ba la sogs pa'i nad thams cad las thar bar 'gyur ro/ /skyes so cog tu skye ba dran par 'gyur ro/ /lha'i bu dang 'dra bar 'gyur ro/ /'chi ba'i dus kyi tshe na yang 'jig rten gyi khams bde ba can du skye bar 'gyur ro/ /gar skyes gar gnas kyang 'phags pa spyan ras gzigs kyi dbang phyug dang mi 'bral bar 'gyur ro/ /rtag tu bzlas brjod byas na yid gzhungs par 'gyur ro/ /sems dpa' bar 'gyur ro/ /dbyangs snyan par 'gyur ro/ /skal ba bzang por 'gyur ro/ /gtsug lag thams cad la mkhas par 'gyur ro/ / 101-1-217b tshig btsun par 'gyur ro/ /bstod pa 'dis bstod na sangs rgyas bcom ldan 'das gang gA'i klung gi bye ma drug cu rtsa gnyis snyed la mchod pa byas par 'gyur ro/ /rnam par smin pa yang de dang 'dra bas na bye brag med do/ /rgyal ba thams cad kyi ring bsrel rin po che za ma tog ces bya ba 'phags pa spyan ras gzigs dbang phyug gi mtshan brgya rtsa brgyad pa rdzogs so// |