@##/ /rgya gar skad du/ Ar+yA ba lo ki te shwa ra nA ma d+hA ra NI/ bod skad du/ 'phags pa spyan ras gzigs dbang phyug gi gzungs zhes bya ba/ 'phags pa spyan ras gzigs thugs rje chen po dang ldan pa la phyag 'tshal lo/ /'phags pa spyan ras dbang phyug byams pa'i ngang las snying rje'i shugs kyis byang chub kyi sems rab tu bskyed nas/ pad+ma dang / nyi ma dang / zla ba'i gdan la hrIH'i 'phro 'du las zhal gcig pa la phyag bzhi pa/ dang po gnyis thal mo sbyar ba/ g.yas 'og ma na bgrang phreng mu tig dkar po/ g.yon 'og ma na pad+ma dkar po bsnams pa/ sku mdog dkar po zhabs rdzogs pa'i skyil krung bcas pa rin po che'i rgyan sna tshogs dang / rin po che'i dbu rgyan gyis mdzes pa/ ma lha mo drug ma dang / yab nor bu rin po ches brten pa/ byang chub sems dpa' dang / sems ma rab tu mang pos bskor te 'di skad ces gsungs so/ / 101-1-242a rigs kyi bu'am/ rigs kyi bu mos sngags 'di lan cig tsam brjod dam dran zhing yid la byas sam/ bris nas lus la bcangs sam/ mos shing gus par byas na mtshams med pa lnga dang / de dang nye ba'i sdig pa'i las thams cad 'byang zhing ngan song gsum dang / mi khom pa brgyad dang / sdug bsngal dang bcas par mi skye'o/ /mi dang mi ma yin pa dang / gcan gzan gyis 'jigs pa thams cad las grol bar 'gyur ro/ /nad dang gdon thams cad las thar par 'gyur ro/ /o~M ma Ni pad+me hU~M/ zhes brjod pas 'phags pa spyan ras gzigs kyi zhal mthong bar 'gyur zhing / tshe 'phos nas kyang bde ba can du skye ste/ 'di la the tshom mam/ som nyi'am/ yid gnyis ma za cig /'phags pa spyan ras gzigs dbang phyug gi gzungs rdzogs so// |