/rgya gar skad du/ AR+Ya maN+Dal aSh+Ta d+har+m+ma paR+Ya ya nA ma ma hA yA na sU tra/ bod skad du/ 'phags pa dkyil 'khor brgyad pa zhes bya ba'i chos kyi rnam grangs theg pa chen po'i mdo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong gi dge 'dun chen po dang / byang chub sems dpa'i dge 'dun chen po dang thabs cig tu bzhugs te/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa du mas yongs su bskor te/ mdun gyis bltas nas chos ston to/ /de'i tshe byang chub sems dpa' seng+ge'i rgyal po bkod pa zhes bya ba zhig 'khor der 'dus par gyur te 'dug pa des 'khor gyi dkyil 'khor chen po de mthong nas ltad mor gyur te/ de stan las langs nas bla gos phrag pa gcig tu gzar te/ pus mo g.yas pa'i lha nga sa la btsugs nas bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to/ /bcom ldan 'das/ bdag gis sangs rgyas 445a @#/ /'byung ba bye ba khrag khrig phrag du ma zhig 'das na/ gang gi 'khor gyi dkyil 'khor yang bcom ldan 'das kyi ci 'dra ba de 'dra bar ma gyur lags so/ /bcom ldan 'das| bdag gi zhu ba bstan pa 'di'i lan stsal du gsol/ byang chub sems dpa' gzhan dag gis thos na'ang dbugs phyin par 'gyur lags so/ /de nas bcom ldan 'das kyis thams cad dang ldan pa'i 'khor yang dag par gzengs bstod pa'i phyir byang chub sems dpa' seng+ge'i rgyal po bkod pa la 'di skad ces bka' stsal to/ /rigs kyi bu| nyon cig dang / dris pa lan gdab pa dkyil 'khor brgyad pa zhes bya ba'i chos kyi rnam grangs gang ngas sngon so so'i skye bo'i dus na kun tu bsten cing bsgoms te lan mang du byas pa de bstan par bya'o/ /rigs kyi bu/ 'das pa'i dus na sngon byung ba'i de bzhin gshegs pa dgra bcom pa yang dag par rdzogs pa'i sangs rgyas snang ba bsam gyis mi khyab pa zhes bya ba bzhugs te/ 'tsho zhing gzhes la chos kyang ston to/ /de'i dus na khyim bdag drag shul can gyis byin zhes bya ba zhig shin tu ma dad cing yid du mi 'ong ba'i chos lnga dang ldan zhing / chos 'dul ba la rgyab kyis phyogs so/ /dge slong rnam par rgyal ba 'byung ba zhes bya ba zhig khyim bdag de la snying brtse ba'i phyir yang dang yang du rgyun mi 445b 'chad par khyim bdag de'i khyim du 'gro'o/ /re zhig na dus kyi mthus khyim bdag de dge slong de la rjes su chags pa dang bcas pa'i sems su gyur nas/ re zhig na khyim bdag des legs par bya ba'i las kyi 'bras bu dris so/ /de nas dge slong des skye bo mang po la phan pa'i phyir dang / skye bo mang po la bde ba'i phyir dang / 'jig rten la snying brtse ba'i phyir dang / lha dang / mi rnams kyi skye bo phal po che'i don dang / phan pa dang bde ba'i phyir khyim bdag de la dkyil 'khor brgyad pa zhes bya ba'i chos kyi rnam grangs bstan te/ khyim bdag /dkyil 'khor brgyad pa zhes bya ba'i chos kyi rnam grangs gang zhe na/ bde ba thams cad sbyin par byed pa'o/ /des 'khor phun sum tshogs pa thob par 'gyur te/ gang dang gang du skyes par chos dang ldan pa'i sems can rnams dang mi 'bral bar 'gyur/ 'khor mang po dang lus phun sum tshogs nas gzugs bzang po nyid thob par 'gyur/ yo byad phun sum tshogs pa 'thob par 'gyur te/ btsal mi dgos par yo byad rnams 'byor bar 'gyur/ lus sra zhing brtan la lus phun sum tshogs pa 'thob par 'gyur zhing / de la ri dang rtsig pa rnams kyang sgrib par mi byed de/ phun sum tshogs pa bzhi po de dag 'thob par 'gyur ro/ /de nas khyim bdag de dga' zhing mgu la yi rang bar gyur nas/ dge slong de'i rkang pa 446a @#/ /la phyag byas te 'di skad ces smras so/ /'phags pa dkyil 'khor brgyad pa ston cig dang / des bdag la mngon sum du 'gyur ro/ /de nas dge slong rnam par rgyal ba 'byung bas khyim bdag de'i bsam pa shes nas yang dag par rab tu bstan te/ rigs kyi bu/ nyon cig dang bstan par bya'o/ /des na lci ba gsar bsres pa'i/ / dkyil 'khor gru bzhi lham par bya/ /sems can kun dang thun mong du/ /'das pa'i sangs rgyas gang yin dang / /gang dag ma 'ongs da ltar byung / /byang chub sems dpa' nyan thos dang / /rang sangs rgyas dag gang yod pa/ /de dag rnams la yongs su bsngo/ /de nas dkyil 'khor yug dgu /'khor gyi dkyil 'khor rnams bya ste| |'jig rten dbang dang byams pa dang / /thub pa skyes mchog nam mkha' dang / /kun tu bzang po blo ldan dang / /gsang ba pa yi bdag po dang / /'jam dpal gzhon nur gyur pa dang / /sgrib pa thams cad rnam sel dang / /de bzhin sa yi snying po ste \?\/ /de dag gi ched du dkyil 'khor brgyad bya'o/ /khyim bdag /'di ni/ dkyil 'khor brgyad pa zhes bya ba'i chos kyi rnam grangs yin te/ 'di ni/ bdag gis bcom ldan 'das de bzhin gshegs pa snang ba bsam gyis mi khyab pa de las mngon 446b sum du thos so/ /khyim bdag gzhan yang nyon cig /kun nas skal pa mthun pa yi/ /'khor rnams gang zhig 'dod pa des/ /dkyil 'khor brgyad ni 'dri bar bya/ /gang zhig brgya byin nyid dang ni/ /tshangs pa'i 'jig rten bdag po dang / /lha mi rgyal po'i rgyal srid dang / /blo ldan sna tshogs gzugs bzang 'dod/ /rtag tu dkyil 'khor mchog brgyad bya/ /seng+ge'i rgyal po bkod pa/ 'di ji snyam du sems/ de'i tshe dge slong rnam par rgyal ba 'byung ba zhes bya ba de gzhan zhig yin pa snyam du 'dzin na/ de ltar mi blta ste| 'jam dpal gzhon nur gyur pa 'di de'i tshe de'i dus na dge slong rnam par rgyal ba 'byung ba zhes bya bar gyur to/ /seng+ge'i rgyal po bkod pa/ de'i tshe de'i dus na khyim bdag drag shul can gyis byin pa zhes bya ba de gzhan zhig yin pa snyam du som nyi'am yid gnyis za na/ de ltar mi blta ste/ nga nyid de'i tshe de'i dus na drag shul can gyis byin pa zhes bya ba'i khyim bdag tu gyur to/ /ngas pha rol tu phyin pa drug yongs su rdzogs par byas pa'i bar dang / sangs rgyas nyid thob kyi bar du tshe rabs bye ba khrag khrig 'bum de dang de dag tu chos 'di kun tu bsten to/ /bsgoms so/ /mang du byas so/ /rigs kyi bu/ gang gis na/ nga'i 'khor gyi dkyil 'khor bkod pa 'di 'dra bar gyur ba'i rgyu ni/ de yin no/ /rkyen ni/ de yin no/ / 447a @#/ /bcom ldan 'das kyis de skad ces bka' stsal nas/ byang chub sems dpa' seng+ge'i rgyal po bkod pa dang / dge slong de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste/ bcom ldan 'das kyis gsungs pa la mngon par bstod do/ /'phags pa dkyil 'khor brgyad pa zhes bya ba'i chos kyi rnam grangs theg pa chen po'i mdo rdzogs so// //rgya gar gyi mkhan po dzi na mi tra dang / zhu chen gyi lots+tsha ba ban+d+he ye shes sde la sogs pas bsgyur cing zhus te gtan la phab pa// // |