rgya gar skad du/ AR+Ya su war+N+Na nA ma ma hA yA na sU tra/ bod skad du/ 'phags pa gser gyi mdo zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de'i tshe bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ byang chub kyi sems ji ltar blta bar bgyi/ /bcom ldan 'das kyis bka' stsal pa/ tshe dang ldan pa kun dga' bo/ byang chub kyi sems ni/ gser dang rang bzhin 'dra bar gnas par blta bar bgyi'o/ /gser rang bzhin gyis rnam par dag pa ltar byang chub kyi sems rang bzhin gyis rnam par dag par gnas so/ /mgar bas gser la bzo'i bye brag tha dad par byas kyang gser rang bzhin mi 'gyur pa ltar/ byang chub kyi sems la yon tan khyad par sna tshogs par snang yang don dam par byang chub kyi sems las ma g.yos pas rang bzhin mi 'gyur ba'i phyir ro/ /de nas bcom ldan 'das kyis tshigs su bcad de bka' stsal pa/ byang chub sems nyid rnam par dag /bdag dang 444a @#/ /gzhan gyi don la brtson/ /dngos med ngo bo nyid du sgom/ /shes rab skye ba'i rgyu la mos/ /bcom ldan 'das kyis de skad ces bka' stsal pa dang / tshe dang ldan pa kun dga' bo dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa gser gyi mdo zhes bya ba theg pa chen po'i mdo rdzogs so// |