rKTs


H135

(e-text produced by ACIP)

see text in Tibetan script
1b
@##/ /rgya gar skad du/ AR+Ya pra t+yud pan ne bud+d+ha sam mu kha a ba s+thi ta sa mA d+hi nA ma mahA yA na sU tra/ bod skad du/ 'phags pa da ltar gyi sangs rgyas mngon sum du bzhugs pa'i ting nge 'dzin ces bya ba theg pa chen po'i mdo/ bam po dang po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig
2a
@#/ /na| bcom ldan 'das rgyal po'i khab na smyig ma'i tshal bya ka lan+ta ka gnas pa na dge slong lnga brgya tsam gyi dge slong gi dge 'dun chen po dang thabs cig tu bzhugs te/ thams cad kyang dgra bcom pa/ zag pa zad pa| nyon mongs pa med pa/ dbang dang ldan par gyur pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par kun tu sbyor ba yongs su zad pa/ yang dag pa'i shes pas sems shin tu rnam par grol ba| sems kyi dbang thams cad kyi dam pa'i pha rol tu son pa/ rnam par thar pa brgyad thob pa sha stag ste/ gang
2b
zag gcig ma gtogs pa ni/ 'di lta ste/ tshe dang ldan pa kun dga' bo'o/ /de'i tshe byang chub sems dpa' sems dpa' chen po bzang skyong zhes bya ba rgyal po'i khab kyi grong khyer chen po nas byung ste byang chub sems dpa' lnga brgya tsam thams cad kyang khyim par gyur cing bslab pa'i gzhi lnga yongs su bzung ba sha stag dang lhan cig tu chos nyan pa'i phyir bcom ldan 'das kyi zhabs 'bring byed par gyur to/ /de nas byang chub sems dpa' sems dpa' chen po bzang skyong phyem red kyi dus kyi tshe nang du yang dag 'jog las langs nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te lan bdun bskor ba byas nas bcom ldan 'das kyi spyan sngar phyogs gcig tu 'dug go /byang chub sems dpa' lnga brgya tsam po de dag kyang phyem red kyi dus kyi tshe nang du yang dag 'jog las
3a
@#/ /langs nas bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan bdun bskor ba byas nas bcom ldan 'das kyi spyan sngar phyogs gcig tu 'khod do/ /dge slong lnga brgya tsam po de dag kyang phyem red kyi dus kyi tshe nang du yang dag 'jog las langs nas bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan bdun bskor ba byas nas bcom ldan 'das kyi spyan sngar phyogs gcig tu 'khod do/ /yang de'i tshe tshe dang ldan pa shA ri'i bu dang / tshe dang ldan pa maung+gal gyi bu chen po mnyan yod kyi grong khyer chen por dbyar gnas nas dge slong lnga brgya tsam dang lhan cig tu rim gyis yul rgyu zhing rgyal po'i khab kyi grong khyer chen po ga la ba dang / smyig
3b
ma'i tshal bya ka lan+ta ka gnas pa gang na pa dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod do/ /de nas de'i tshe bcom ldan 'das kyis ji lta bu'i rdzu 'phrul mngon par 'du bya ba mngon par mdzad pas dge slong dag yul so so na rten cing gnas pa de dag thams cad rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa de lta bu'i rdzu 'phrul mngon par 'du bya ba mngon par mdzad do/ /yang de'i tshe smyig ma'i tshal bya ka lan+ta ka gnas par dge slong 'bum lhan cig tu 'dus te 'khod par gyur to/ /de nas de'i tshe bcom ldan 'das kyis ji lta bu'i rdzu 'phrul mngon par 'du bya ba mngon par mdzad pas skya rgu'i bdag mo chen mo gau ta ma la sogs pa dge slong ma sum khri rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der song ste lhags nas bcom ldan 'das kyi
4a
@#/ /zhabs la mgo bos phyag btsal te bcom ldan 'das la lan bdun bskor ba byas nas bcom ldan 'das kyi spyan sngar phyogs gcig tu 'khod pa de lta bu'i rdzu 'phrul mngon par 'du bya ba mngon par mdzad do/ /de nas de'i tshe bcom ldan 'das kyis ji lta bu'i rdzu 'phrul mngon par 'du bya ba mngon par mdzad pas byang chub sems dpa' sems dpa' chen po dkon mchog 'byung gnas zhes bya ba yangs pa'i grong khyer chen po nas byung ste li tsA bi gzhon nu nyi khri brgyad stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga lo ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag '+tsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po phug sbas kyang grong khyer chen po tsam pa ya nas byung ste srog chags nyi khri brgyad stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi
4b
zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po 'dam bus byin kyang grong khyer chen po wA ra NA si nas byung ste srog chags nyi khri lnga stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po mtshams bzang yang ser skya'i gnas kyi grong khyer chen po nas byung ste srog chags nyi khri brgyad stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po ded dpon chen po dang / khyim bdag mgon med zas sbyin
5a
@#/ /yang mnyan yod kyi grong khyer chen po nas byung ste srog chags nyi khri brgyad stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po dbang pos byin kyang ko'u sham+b+hi'i grong khyer chen po nas byung ste srog chags nyi khri brgyad stong gis yongs su bskor cing mdun du bdar nas rgyal po'i khab kyi grong khyer chen po ga la ba dang / smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / byang chub sems dpa' sems dpa' chen po chu lha'ang gnas bcas kyi grong khyer chen po nas byung ste srog chags nyi khri brgyad stong gis yongs su bskor cing mdun du bdar nas lhan cig tu rgyal po'i khab kyi grong khyer chen po ga la ba dang / smyig ma'i tshal
5b
bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal nas bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / rgyal po ma skyes dgra'ang rgyal po'i khab kyi grong khyer chen po nas byung ste srog chags sum khri tsam gyis yongs su bskor cing mdun du bdar nas lhan cig tu smyig ma'i tshal bya ka lan+ta ka gnas pa ga la ba dang / bcom ldan 'das ga la ba der dong ste lhags nas bcom ldan 'das kyi zhabs la mgo bo sa phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / rgyal po chen po bzhi dang / lha'i dbang po brgya byin dang / mi mjed kyi bdag po tshangs pa dang / lha'i bu dpal bzang yang lha bye ba khrag khrig brgya stong phrag du mas yongs su bskor cing mdun du bdar te lhan cig tu bcom ldan 'das ga la ba der dong nas lhags pa dang / bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / lha'i bu dbang phyug chen po'ang gnas gtsang ma'i ris kyi lha'i bu stong phrag du mas yongs su bskor cing mdun du bdar nas bcom ldan 'das ga
6a
@#/ /la ba der dong ste lhags pa dang / bcom ldan 'das kyi zhabs la mgo pos phyag btsal te bcom ldan 'das la lan gsum bskor ba byas nas bcom ldan 'das kyi spyan sngar phyogs gcig tu 'khod pa dang / lha ma yin gyi dbang po bzhi'ang lha ma yin bye ba khrag khri brgya stong phrag du ma dang lhan cig /klu'i rgyal po dga' bo dang / nye dga' yang klu bye ba khrag khrig brgya stong phrag du ma dang lhan cig /klu'i rgyal po ma dros kyang klu bye ba khrag khrig brgya stong phrag du ma dang lhan cig /klu'i rgyal po gzi can yang klu bye ba khrag khrig brgya stong phrag du ma dang lhan cig /klu'i rgyal po e la'i 'dab ma'ang klu bye ba khrag khrig brgya stong phrag du ma dang lhan cig tu bcom ldan 'das ga la ba der dong ste lhags nas bcom ldan 'das kyi zhabs la mgo bos phyag btsal te bcom ldan 'das la lan gsum bskor ba byas nas phyogs gcig tu 'khod pa de lta bu'i rdzu 'phrul mngon par 'du bya ba mngon par mdzad do/ /yang de'i tshe stong gsum gyi stong chen po'i 'jig rten gyi khams 'di/ 'di nas steng du tshangs pa'i 'jig rten man chad tha na 'khang ba'i rtse mo gzugs pa'i sa khyon tsam yang dbang che ba dbang tshe bar grags pa'i lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po rnams kyis ma gang
6b
ba gang yang med par gyur to/ /de nas byang chub sems dpa' sems dpa' chen po bzang skyong stan las langs nas bla gros phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa/ gal te zhus nas zhu ba lung bstan pa'i slad du bcom ldan 'das kyis bdag la skabs phye na/ bdag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la phyogs 'ga' zhig zhu'o/ /de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / de bzhin gshegs pa dgra bcom pa yang dag par rdzogs pa'i sangs rgyas la khyod ci dang ci 'dod pa dris shig dang / dris pa de dang de lung bstan pas ngas khyod kyi sems rangs par bya'o/ /de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /bcom ldan 'das/ byang chub sems dpa' sems dpa' chen pos ting nge 'dzin gang la gnas na/ thos pa rgya mtsho 'dra ba dang / thos pa bsags pa rnams su gyur pa dang / ne ma nur ma mchis pa dang / the tshom ma mchis pa dang / yid gnyis ma mchis pa rnams su
7a
@#/ /'gyur ba dang / bla na med pa yang dag par rdzogs pa'i byang chub las mi nyams shing yongs su mi nyams pa rnams su 'gyur pa dang / mi dal ba rnams su mi skye ba dang / skye ba dran pa rnams su 'gyur ba dang / tha na rmi lam du'ang de bzhin gshegs pa mthong ba dang mi 'bral ba rnams su 'gyur ba dang / gzugs bzang zhing mdzes la blta na sdug cing kha dog bzang po rgyas pa mchog dang ldan pa rnams su 'gyur ba dang / rigs mtho ba dang rigs che ba rnams su 'gyur ba dang / g.yog 'khor mang zhing g.yog 'khor mi phyed pa rnams su 'gyur ba dang / rtogs pa dang ldan pa rnams su 'gyur ba dang / dran pa dang ldan pa rnams su 'gyur ba dang / blo gros dang ldan pa rnams su 'gyur ba dang / dpal dang ldan pa rnams su 'gyur ba dang / brtan pa dang ldan pa rnams su 'gyur ba dang / rdzu 'phrul dang ldan pa rnams su 'gyur ba dang / shes rab dang ldan pa rnams su 'gyur ba dang / bsod nams dang ldan pa rnams su 'gyur ba dang / ngo tshar shes shing khrel yod pa dang ldan pa rnams su 'gyur ba dang / nga rgyal bcag pa rnams su 'gyur ba dang / byams pa la gnas pa rnams su 'gyur ba dang / ye shes dang ldan pa rnams su 'gyur ba dang / blo dang ldan pa rnams su 'gyur pa dang / brtson 'grus dang ldan pa rnams su 'gyur ba dang /
7b
ma zhum pa rnams su 'gyur ba dang / don gyi rjes su 'gro ba rnams su 'gyur ba dang / chos kyi rjes su 'gro ba rnams su 'gyur ba dang / zhi gnas kyi rjes su 'gro ba rnams su 'gyur ba dang / lhag mthong gi rjes su 'gro ba rnams su 'gyur ba dang / bsam gtan gyi rjes su 'gro ba rnams su 'gyur ba dang / ting nge 'dzin gyi rjes su 'gro ba rnams su 'gyur ba dang / shes rab kyi rjes su 'gro ba rnams su 'gyur ba dang / stong pa nyid dang / mtshan ma med pa dang / smon pa med pa'i chos rnams kyis mi skrag mi dngang dngang par mi 'gyur ba rnams su 'gyur ba dang / g.yang sa chen por mi ltung ba'i steng du chos rab tu 'dzin pa dang / chos smra ba chen po rnams su 'gyur ba dang / sangs rgyas kyi zhing gang dang gang du skye bar sems kyis smon pa de dang der skye ba dang / mu stegs can gyi gnas thams cad kyis yongs su mi zin pa rnams su 'gyur ba dang / rgyu'i stobs can rnams su 'gyur gyi rkyen gyi stobs can rnams su mi 'gyur ba dang / bsam pa'i stobs can rnams su 'gyur ba dang / sbyor ba'i stobs can rnams su 'gyur ba dang / dbang po'i stobs can rnams su 'gyur ba dang / dmigs pa'i stobs can rnams su 'gyur ba dang / nges par sems pa'i stobs can rnams su 'gyur ba dang / zhi gnas kyi stobs can rnams su 'gyur ba dang / rnam par lta ba'i stobs can rnams su 'gyur ba dang / mos pa'i stobs can rnams su
8a
@#/ /'gyur ba dang / smon lam gyi stobs can rnams su 'gyur ba dang / bsam pa yongs su mi zad pa rnams su 'gyur ba dang / thos pa rgya mtsho dang mtshungs pas rgya mtsho chu gter lta bu rnams su 'gyur ba dang / dkar po'i chos yongs su rdzogs pas zla ba lta bu rnams su 'gyur ba dang / mi shes pa'i mun pa bsal bas nyi ma lta ba rnams su 'gyur ba dang / snang bar byed pas mar me lta bu rnams su 'gyur ba dang / shin tu mi gos pas bar snang lta bu rnams su 'gyur ba dang / sems nam mkha' dang mtshungs pas mi gnas pa rnams su 'gyur ba dang / chos thams cad nges par rtogs pas rdo rje lta bu rnams su 'gyur ba dang / mthu brtan pas ri lta bu rnams su 'gyur ba dang / mi g.yo bas brtan pa'i chos can rnams su 'gyur ba dang / legs par gnas pas sgo'i them pa lta bu rnams su 'gyur ba dang / sems las su rung bas byi la'i pags pa lta bu rnams su 'gyur ba dang / bya ltar gang dang gang du 'dod par 'gro bas yongs su 'dzin pa ma mchis pa rnams su 'gyur ba dang / gdol bu lta bur nga rgyal bcag pa rnams su 'gyur ba dang / grong dang / grong khyer dang / grong rdal dang / yul 'khor dang / pho brang 'khor la mngon par dga' ba mi skyed pa dang / ri dwags dang / spre'u dang mtshungs pas dgon pa la mngon par dga' ba rnams su 'gyur ba dang /
8b
khyim pa dang / rab tu byung ba rnams dang lhan cig tu mi sten pas ma 'dres pa rnams su 'gyur ba dang / tshogs yongs su sdud pas tshogs kyi ston pa rnams su 'gyur ba dang / sems can thams cad kyis mi bskyod pa rnams su 'gyur ba dang / bdud thams cad kyis gdul dka' ba rnams su 'gyur ba dang / chos thams cad shin tu nges par shes pas so so yang dag par rig pa thob pa rnams su 'gyur ba dang / sangs rgyas kyi chos thams cad la gzhan gyi dring la mi 'jog pa rnams su 'gyur ba dang / byams pa chen po rab tu mi g.yo bas zil gyis gnon par dka' zhing bsam pa brtan pa rnams su 'gyur ba dang / dmigs su med pa la spyad cing brjod du med pa'i spyod yul dang ldan pas lhag pa'i bsam pa zab pa rnams su 'gyur ba dang / chos kyi shugs kyis dga' bas bag yod pa mang zhing bsam pa mnyen pa rnams su 'gyur ba dang / sangs rgyas thams cad la mchod pa dang rim gro'i las bgyid pas lhag pa'i bsam pa rgya che ba rnams su 'gyur ba dang / dge ba'i rtsa ba sna tshogs yang dag par sgrub pas lhag pa'i bas pa sna tshogs rnams su 'gyur ba dang / rgyan gyis brgyan pa rnams dag pas lhag pa'i bsam pa dge ba rnams su 'gyur ba dang / rdzun dang khod khro ba'i skyon spangs pas lhag pa'i bsam pa bzang po rnams su 'gyur ba dang / thams cad mkhyen pa'i ye shes kyi snang ba thob pas lhag pa'i bsam pa
9a
@#/ /yongs su dag pa rnams su 'gyur ba dang / sems dang zhing tha ba med la shes rab rgyas pa yongs su bzung bas yid bde ba'i lhag pa'i bsam pa rnams su 'gyur ba dang / 'jig rten gyi khams thams cad rgyan gyis brgyan pa rnam par dag pas bkod pa chen po la spyad pa'i lhag pa'i bsam pa rnams su 'gyur ba dang / nyan thos dang / rang sangs rgyas kyi sems yid la bgyi ba dang bral bas tshul khrims yongs su dag pa rnams su 'gyur ba dang / brtsams pa thams cad nyams su lon pas yi dam la brtan pa rnams su 'gyur ba dang / sems can thams cad dge ba'i chos rjes su spyod pa'i sngon du 'gro ba rnams su 'gyur ba dang / byang chub sems dpa' thams cad kyi bslab pa rnams dang / pha rol tu phyin pa rnams la yongs su mi 'jigs pa rnams su 'gyur ba dang / sangs rgyas kyi chos thams cad la phyir mi ldog pa rnams su 'gyur ba dang / bdud dang mu stegs can gzhan dang / phas kyi rgol ba thams cad kyis zil gyis mi non pa rnams su 'gyur ba dang / yid la byed pa rnams sangs rgyas kyi chos rnams la gzhog pas chos thams cad la mos pa rnams su 'gyur ba dang / sangs rgyas thams cad la phar 'du shes pa rnams su 'gyur ba dang / chos thams cad la snang ba skyes pas sangs rgyas thams cad kyis byin gyis brlabs pa rnams su 'gyur ba dang /
9b
sangs rgyas kyi chos thams cad mngon du gyur pas shes pa sgrib pa med pa rnams su 'gyur ba dang / chos thams cad la rlom sems med pas sgyu ma'i skyes bu rnams su 'gyur ba dang / ma skyes ma 'ongs shing 'gro ba med pa'i chos dang ldan pas sprul pa lta bu rnams su 'gyur ba dang / dus gsum la rtog pas rmi lam lta bu rnams su 'gyur ba dang / 'jig rten gyi khams thams cad du rang gi lus yang dag par ston pas gzugs brnyan lta bu rnams su 'gyur ba dang / 'pho ba med cing mi gnas la rten pa med pa'i chos can pas brag ca lta bu rnams su 'gyur ba dang / 'chi 'pho ba dang / skye ba thams cad la grib ma lta bu rnams su 'gyur ba dang / dngos po'i 'du shes spangs pas dngos po med par shes pa la gnas pa rnams su 'gyur ba dang / gnyis la kun tu spyod pa med pas mtshan nyid med pa'i chos la gzhol ba rnams su 'gyur ba dang / byang chub kyi sems tshad med pas chos kyi dbyings kyi mthas gtugs pa rnams su 'gyur ba dang / sems kyi rgyud mi g.yo bas 'jig rten gyi khams thams cad du mi g.yo ba rnams su 'gyur ba dang / sangs rgyas kyi zhing thams cad la mi chags pa'i spyod yul dang ldan pa rnams su 'gyur ba dang / chos thams cad kyi tshig rab tu dbye ba la mkhas pas gzungs kyi sgo rnams su zhugs pa rnams su 'gyur ba dang / sangs rgyas kyi chos thams cad kyi
10a
@#/ /snod du gyur bas chos kyi snod rnams su 'gyur ba dang / sangs rgyas kyi gzi brjid kyis brtan pas de bzhin gshegs pa thams cad kyis byin gyis brlabs pa rnams su 'gyur ba dang / khyu mchog dang seng+ge'i sgra sgrog pas bag tsha ba med pa rnams su 'gyur ba dang / 'jig rten thams cad la yang dag par dga' bar byed pas 'jigs pa med pa rnams su 'gyur ba dang / sangs rgyas thams cad dang mnyam pas rmongs pa med pa rnams su 'gyur ba dang / chos thams cad gzhan gyi dring mi 'jog cing the tshom dang bral bas de bzhin nyid rab tu rtogs pa rnams su 'gyur ba dang / dris pa thams cad lung bstan pa la srid pa dang dus gsum ston nus pa rnams su 'gyur ba dang / snying rje chen po thob pas phan pa 'dod pa rnams su 'gyur ba dang / chos ston pa la ngal ba med pa rnams su 'gyur ba dang / sems can thams cad yongs su mi gtong ba la gnas pa rnams su 'gyur ba dang / sgyu med pas g.yo med pa rnams su 'gyur ba dang / 'jig rten thams cad kyi sgron mar gyur pas drang po rnams su 'gyur ba dang / khams gsum thams cad na tshad med pa rnams su 'gyur ba dang / tha snyad tsam du rnam par dpyod pas nyon mongs pa med pa la gnas pa rnams su 'gyur ba dang / gzhi med pa la dga' bas ma 'dres par gnas pa
10b
rnams su 'gyur ba dang / rnam par mi rtog pa'i chos can pas yang dag pa'i mtha' la gnas pa rnams su 'gyur ba dang / theg pa chen po la sems can thams cad gzhog pas thams cad mkhyen pa'i gtam yang dag par ston pa rnams su 'gyur ba dang / 'jigs shing spu zing zhes byed pa thams cad dang bral bas mi 'jigs pa thob pa rnams su 'gyur ba dang / mdo sde'i chos kyi rnam grangs thams cad la de bzhin gshegs pa'i dgongs te gsungs pa la mkhas pa rnams su 'gyur ba dang / 'khor thams cad kyi nang du nye bar 'gro bas bzhin kun tu ston pa rnams su 'gyur ba dang / theg pa chen po la 'jig rten thams cad kyis mchod cing thams cad mkhyen pa ltar bsod nams kyi bdag po rnams su 'gyur ba dang / 'jig rten pa thams cad kyi sbyin gnas su gyur pas yon tan zad mi shes pa rnams su 'gyur ba dang / de bzhin gshegs pa'i zhabs kyi drung du dga' ba dang / dad pa chen po rab tu rnyed pa rnams su 'gyur ba dang / sangs rgyas kyi chos thams cad yongs su dri ba la dge ba'i spobs pa can rnams su 'gyur ba dang / 'khor gyi nang du 'jigs shing bag tsha ba spangs pas yid spa mi 'gong ba rnams su 'gyur ba dang / phas kyi rgol ba thams cad tshar gcod pas smra ba'i stag lta bu rnams su 'gyur ba dang / pha rol gyi phyogs thams cad 'joms pas dam bcas pa
11a
@#/ /ma nyams pa rnams su 'gyur ba dang / sangs rgyas thams cad kyis gnang bas chos kyi 'bel ba'i gtam gtan la 'bengs pa'i phyir seng+ge'i sgra sgrog cing seng+ge'i khri la 'dug pa mang ba rnams su 'gyur ba dang / yang dag par brjod pa la 'jug pa thams cad rab tu rtog pas 'jig rten rgyang pan pa thams cad ma bstan pa rnams su 'gyur ba dang / sangs rgyas su 'gyur ba'i rgyu la gnas pas dam pa'i chos smra ba rnams su 'gyur ba dang / de bzhin gshegs pa'i zhabs 'bring bgyid pas chos 'dod pa rnams su 'gyur ba dang / dge ba'i bshes gnyen la bsnyen bkur bgyid pa la mi skyo ba rnams su 'gyur ba dang / phyogs bcur rnam par rgyu bas gnas ma mchis pa rnams su 'gyur ba dang / sems can thams cad yongs su smin par bgyid pa'i smon lam 'debs pa rnams su 'gyur ba dang / rin po che'i mchog la ngal sos par bgyid pa la mkhas pas chos kyi rgya mtshor zhugs pa rnams su 'gyur ba dang / 'jig rten gyi khams thams cad rnam pa sna tshogs kyis brgyan pas 'jig rten gyi khams thams cad mi g.yo ba rnams su 'gyur ba dang / sangs rgyas kyi cho 'phrul gyis rnam par rol pa spyod pas cho 'phrul chen po myong ba rnams su 'gyur ba dang / sangs rgyas blta ba sems kyi skad cig gcig la rag las pa rnams su 'gyur
11b
ba dang / chos la gus pa rnyed pas ye shes kyis bskor ba rnams su 'gyur ba dang / chos kyi sku dang 'dra bar rtogs pas nam mkha' lta bu rnams su 'gyur ba dang / sangs rgyas kyi gdung mi chad par bgyid pas byang chub sems dpa' rnams la yang dag par 'dzin du 'jug pa rnams su 'gyur ba dang / byang chub sems dpa'i spyod pa thams cad rgyun mi gcod pa rnams su 'gyur ba dang / legs par gnas shing myur ba'i cad shes pas go cha chen po bgos pa rnams su 'gyur ba dang / de bzhin gshegs pa stobs bcu'i sa la thams cad mkhyen pa nyid du dbang bskur bas dbang bskur ba rnams su 'gyur ba dang / bgrang ba'i tshul gyis cho ga shes pas 'du shes kyi rnam pa thams cad rab tu rtogs pa rnams su 'gyur ba dang / grangs kyi rnam pa thams cad nye bar rtogs pas 'jig pa dang / 'chags pa thams cad la mkhas pa rnams su 'gyur ba dang / gtong ba thams cad la nan tan bgyid pas mi gnas shing len pa ma mchis pa rnams su 'gyur ba dang / 'gyong pa med pa'i sbyin bdag chen por gyur pas gtong ba la mkhas pa rnams su 'gyur ba dang / srid pa'i 'gro ba thams cad kyi skye ba'i gnas rnams don du mi gnyer ba rnams su 'gyur ba dang / 'jig rten gyi khams gzhan na bzhugs pa'i sangs rgyas bcom ldan 'das rnams kyi sangs rgyas kyi zhing dag mthong zhing chos kyang nyan la/ de'ang 'dzin cing mi bskyud
12a
@#/ /la lnga mngon par shes pa'ang ma lags/ drug mngon par shes pa'ang ma lags shing / byang chub sems dpa' de rnams 'jig rten gyi khams de nas shi 'phos te sangs rgyas kyi zhing de dag na gnas pa'ang ma lags la/ byang chub sems dpa' de rnams 'jig rten gyi khams 'di nyid na gnas bzhin du sangs rgyas rnams kyang mthong la chos kyang nyan cing / de thams cad kyang kun tu 'dzin te/ ji ltar bdag da ltar bcom ldan 'das kyi spyan snga na mchis pa bzhin du the tshom dang / nem nur ma mchis pa de bzhin du / byang chub sems dpa' de rnams kyang tha na rmi lam na'ang sangs rgyas mthong zhing / chos nyan pa dang mi 'bral ba rnams su 'gyur ba'i ting nge 'dzin gang lags/ bzang skyong gis zhus pa'i ting nge 'dzin gyi le'u ste dang po'o// //de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / legs so/ /legs so/ /yang bzang skyong / khyod skye bo mang po la phan pa dang / skye bo med po la bde ba dang / 'jig rten la snying brtse ba dang / skye bo phal po che dang / lha dang / mi rnams kyi don dang / phan pa dang bde pa'i phyir zhugs shing / bzang skyong / khyod de ltar de bzhin gshegs pa la don 'di 'dri bar sems pa legs so//
12b
bzang skyong / khyod ni/ sngon gyi rgyal ba la bya ba byas shing dge ba'i rtsa ba bskyed pa/ sangs rgyas bye ba khrag khrig brgya stong mang po la bsnyen bkur byas pa/ chos don du gnyer ba/ chos 'dod pa/ mi dmigs pa/ tshangs par spyod pa/ byang chub sems dpa' rnams la yang dag par slob par byed pa/ byang chub sems dpa' rnams yang dag par dga' bar byed pa/ byang chub sems dpa' rnams la ston pa/ byang chub sems dpa' rnams la yang dag par 'dzin du 'jug pa/ byang chub sems dpa' rnams la yang dag par gzengs bstod pa/ byang chub sems dpa' rnams la lung 'bogs pa/ byang chub sems dpa' rnams la sgrub par byed pa/ byang chub sems dpa' rnams la phan par 'dod pa/ snying rje che ba/ sems can thams cad la sems mnyam pa/ sems kyi dbang thams cad kyi dam pa'i pha rol tu son pa/ sangs rgyas mthong ba/ smon lam rgya che ba/ spyod yul zab pa/ thams cad mkhyen pa sems pa/ byang chub yang dag par 'dzin pa/ de bzhin gshegs pa'i gdung ston pa/ byang chub kyi sems rdo rje lta bu dang mnyam zhing mtshungs pa/ sems can thams cad kyi bsam pa kun tu spyod pa la mkhas pa/ sangs rgyas thams cad dang mngon sum du gnas pa ste/ bzang skyong / khyod kyi yon tan brjod na lta mthar ma phyin to/ /bzang skyong / da ltar gyi sangs rgyas mngon sum du bzhugs
13a
@#/ /pa zhes bya ba'i ting nge 'dzin yod de/ ting nge 'dzin de bzung zhing ma brjod la rna blags te nyan cing sems mi g.yeng ba rnyed na/ yon tan gyi khyad par de dag rnyed pa mi dka' bar 'gyur ro/ /de nas byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan 'das/ de bas na/ de bzhin gshegs pas ting nge 'dzin de bshad par gsol/ de ni/ skye bo mang po la sman pa dang / skye bo mang po la bde ba dang / 'jig rten la snying brtse ba dang / skye bo phal po che dang / lha dang mi'i don dang / sman pa dang bde bar 'gyur zhing / ma 'ongs pa'i byang chub sems dpa' sems dpa' chen po rnams la'ang snang ba chen po bgyis par 'gyur ro// de nas bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / de'i phyir legs par rab tu nyon la yid la zungs shig dang ngas khyod la bshad do/ /bcom ldan 'das/ de bzhin no/ /zhes gsol te byang chub sems dpa' sems dpa' chen po bzang skyong dang / lha dang / mi dang / lha ma yin dang / dri zar bcas pa'i 'jig rten bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /bzang skyong / chos gcig la kun tu bston/
13b
nges par bsten cing bsgoms la lan mang du byas/ lam du byas/ gzhir byas/ yang dag par bslangs/ legs par byang bar byas/ shin tu yongs su sbyangs/ shin tu mnyam par bzhag /shin tu yang dag par brtsams na/ yon tan thams cad khyad par du 'phags par 'gyur ro/ /chos gcig po gang zhe na/ 'di lta ste/ da ltar gyi sangs rgyas mngon sum du zhugs pa zhes bya ba'i ting nge 'dzin te/ mang du thos pa sngon du 'gro ba'i chos rnams yongs su rdzogs par 'gyur ro/ /bzang skyong / de la da ltar gyi sangs rgyas mngon sum du bzhugs pa zhes bya ba'i ting nge 'dzin de gang zhe na/ 'di lta ste/ sangs rgyas la dmigs pa'i sems yid la byed pa/ sems mi g.yeng ba/ dran pa nye bar gnas pa/ shes rab thob pa| brtson 'grus mi gtong ba/ dge ba'i bshes gnyen rnams la bsnyen bkur byed pa/ stong pa nyid kun tu sten pa/ sgom pa mang du byed pa/ sgrib pa rnams spong ba/ rmugs pa dang gnyid rnam par spong ba/ gtam yongs su spong ba/ sdig pa'i grogs po rnams rnam par spong ba/ dge ba'i bshes gnyen rnams la nges par sten pa/ dbang po rnams mi g.yeng ba/ zas kyi tshed shes pa/ nam gyi cha stod dang / cha smad la mi nyal ba'i brtson 'grus dang ldan pa/ gos dang / zas dang / mal stan dang / na ba'i gsos sman dang / yo byad rnams la mi
14a
@#/ /chags pa/ dgon pa la gnas pa mi gtong ba/ lus la ched che bar mi byed pa/ srog la mi lta ba/ lus gtong pa/ sems can la phan 'dogs pa/ gnyen rnams yongs su spong ba/ skyes pa'i sa ring du byed pa/ byams pa la kun tu brten pa/ snying rje thob pa/ dga' ba la gnas pa/ btang snyoms sgom pa/ nye ba'i nyon mongs pa rnams yongs su gtong pa/ bsam gtan rnams sgrub cing de dag gi ro myong bar mi byed pa/ gzugs kyi 'du shes rnam par 'jig pa/ mi sdug pa'i 'du shes rnyed pa/ dran pa mi g.yeng ba| phung po rnams yongs su mi 'dzin pa/ khams rnams la rlom sems med pa/ skye mched rnams la mngon par mi chags pa/ rigs smra bas snyems par mi byed pa/ nga rgyal tshar gcod pa/ gzhan gyis rnyed pa la phrag dog med pa/ sems can la phan pa'i gzhir gyur pa/ sems can thams cad la sems mnyam pa/ sems can thams cad mi gtong ba/ sems can thams cad yongs su grol bar byed pa/ sems can thams cad la bdag tu 'du shes pa/ sems can thams cad la mar 'du shes pa/ phar 'du shes pa| bur 'du shes pa/ gnyen du 'du shes pa/ sems can thams cad la nyon mongs pa med par 'du shes pa/ dngos po thams cad yongs su mi 'dzin pa/ tshul khrims
14b
mchog tu mi 'dzin pa/ ting nge 'dzin la nges par sten pa/ mang du thos pa 'dod cing des kyang rlom sems su mi byed pa/ tshul khrims kyi phung po la skyon med pa/ ting nge 'dzin gyi phung po la g.yo ba med pa/ chos rnams la the tshom med pa/ sangs rgyas dang mthun pa/ chos mi spong ba/ dge 'dun mi 'byed pa/ phra ma'i tshig spong ba/ 'phags pa rnams kyi drung du nye bar 'gro zhing de dag la bsnyen bkur byed pa/ byis pa rnams rnam par spong ba/ 'jig rten pa'i gtam la mngon par mi dga' zhing mi 'dod la ring du byed pa/ 'jig rten las 'das pa'i gtam la mngon par dga' zhing 'dod la 'dun cing sten pa/ gtam rgyud ma yin pa spong ba/ dga' bar byed pa'i chos drug la brten pa/ snyen pa rnams smra ba/ sgrib pa lnga spong ba/ rnam par grol ba'i skye mched lnga la brten pa/ phung po lnga yongs su shes pa/ mi dge ba bcu'i las kyi lam rnam par spong ba/ dge ba bcu'i las kyi lam sgom pa/ stobs bcu sgrub pa/ kun nas mnar sems kyi dngos po dgu rnam par sbyong ba/ 'du shes dgu rnam par 'jig pa/ le lo'i dngos po brgyad rnam par spong ba/ brtsam pa'i dngos po brgyad la nges par brten pa/ zil gyis gnon pa'i skye mched brgyad la kun tu brten pa/ rnam par grol ba brgyad sgom pa/ skyes bu chen po'i rnam par rtog pa brgyad thob pa/ 'phags pa'i lam yan lag brgyad pa dang
15a
@#/ /mthun pa/ bsam gtan la mi chags pa/ thos pas rlom sems mi byed pa/ nga rgyal bcom pa/ chos nyan par 'dod pa/ chos 'dod pa/ chos don du gnyer ba/ chos la 'dun pa/ chos la phyogs pa/ chos la 'bab pa/ chos la gzhol ba/ chos la brtson pa/ bdag tu 'du shes pas rlom sems su mi byed pa/ sems can du 'du shes pa spong ba/ srog tu 'du shes pa mi dmigs pa/ gang zag tu 'du shes pa yongs su spong ba/ phung por 'du shes pa rnam par sel ba/ dngos por 'du shes pa la mi gnas pa/ mya ngan las 'da' ba mi 'dod pa/ phung po rnams mi 'dod pa/ 'khor ba la mi zad pa'i 'jigs par 'du shes pa/ phung po rnams la gshed mar 'du shes pa/ khams rnams la sprul gdug par 'du shes pa/ skye mched rnams la grong stong bar 'du shes pa/ khams gsum la mi bde bar 'du shes pa/ mya ngan las 'das pa la phan yon du lta ba/ 'dod pa rnams la mchil ma'i thal ba ltar spong bar 'du shes pa/ zas la mi mthun par 'du shes pa/ mngon par 'byung ba la gzhol ba/ khyim na gnas pa la mngon par mi dga' ba/ bu dang bu mo rnams la dgrar 'du shes pa/ chung ma la srin mor 'du shes pa/ sangs rgyas kyi bstan pa la mi phyed par dad pa/ sems can thams
15b
cad dang mi mthun pa med pa/ 'jig rten gyi khams thams cad du gnas pa med pa/ sangs rgyas thams cad mngon sum du gyur pa/ legs par bsnyen par rdzogs shing tshangs pa legs par spyad pa/ lus thams cad rtogs pa/ mos pas yongs su dag pa/ lhag pa'i bsam pas dge ba/ sems las su rung ba/ mi rigs pa la brtson pa rnams rnam par spong ba| rigs par brtson pa rnams la brtson pa/ mtshan ma thams cad rnam par sel ba/ dus gsum mnyam pa/ sangs rgyas thams cad rjes su dran pa/ dge ba'i rtsa ba thams cad skyed pa| sangs rgyas thams cad kyis byin gyis brlabs pa/ ting nge 'dzin thams cad la dbang ba/ sangs rgyas kyi sku'i mtshan la mngon par mi chags pa/ chos thams cad la mnyam pa/ 'jig rten dang mi rtsod pa/ bya ba rnams la mi mthun pa med pa/ rten cing 'brel bar 'byung ba rtogs pa/ nges par 'byung ba'i lam de bzhin gshegs pa'i sa la bzod pa thob pa/ chos kyi dbyings la 'jug pa/ nam mkha'i khams yongs su shes pa/ sems can gyi khams la mngon par mi chags pa/ mi skye ba/ mi 'gag pa/ gnas pa med pa/ mya ngan las 'das pa'i dbyings mngon sum du gyur pa/ shes rab kyi mig rnam par sbyong ba/ chos thams cad la gnyis su med pa/ byang chub kyi sems la mtha' dang dbus med pa/ sems kyi rgyud gcig tu gyur pa/
16a
@#/ /sangs rgyas thams cad dang thogs pa med pa'i ye shes la 'jug pa/ ye shes la sgrib pa med pa/ byang chub kyi phyir sems yongs su smin pa/ sangs rgyas kyi ye shes gzhan la rag ma lus pa/ dge ba'i bshes gnyen rnams la ston par 'du shes pa/ byang chub sems dpa' rnams la mi 'byed pa/ bdud kyi las rnams rnam par spong ba/ 'gro ba thams cad sprul pa dang mtshungs pa/ de bzhin gshegs pa blta ba la mig yor dang mtshungs pa/ byang chub kyi sems yongs su tshol ba/ pha rol tu phyin pa rnams la sems mnyam pa/ de bzhin gshegs pa rnams blta ba la yang dag pa'i mtha' dang mnyam pa/ sangs rgyas thams cad la yon tan gyi chos thams cad mnyam pa 'di ni/ bzang skyong / da ltar gyi sangs rgyas mngon sum du bzhugs pa zhes bya ba'i ting nge 'dzin ces bya'o/ /bzang skyong gis zhus pa'i ting nge 'dzin gyi le'u ste gnyis pa'o// // bzang skyong / chos de rnams ni/ ting nge 'dzin de yongs su skyed par 'gyur te/ bzang skyong / de la ting nge 'dzin gang chos de rnams kyis yongs su skyed par 'gyur ba'i ting nge 'dzin de gang zhe na| 'di lta ste/ da ltar gyi sangs rgyas mngon sum du bzhugs pa zhes bya ba'i ting nge 'dzin to/ /bzang skyong / da ltar gyi sangs rgyas mngon sum du bzhugs pa zhes bya ba'i ting nge 'dzin
16b
de'ang gang zhe na/ bzang skyong / de la dge slong ngam/ dge slong ma'am/ dge bsnyen nam/ dge bsnyen ma tshul khrims yongs su rdzogs par spyod par 'gyur la/ des gcig pu dben par song ste 'dug nas 'di snyam du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag tu med de phyogs gang rol na gnas te 'tsho zhing gzhes la chos kyang ston cing bzhugs pa 'di snyam du sems bskyed par bya'o/ /des ji skad du thos pa'i rnam pas sangs rgyas kyi zhing 'di nas nub phyogs logs su sangs rgyas kyi zhing bye ba phrag 'bum 'das pa na 'jig rten gyi khams bde ba can na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag med de/ da ltar byang chub sems dpa'i tshogs kyis yongs su bskor cing mdun du bdar te bzhugs so/ /'tsho'o/ /gzhes so/ /chos kyang ston to snyam du yid la byed de/ des kyang sems ma g.yengs pas de bzhin gshegs pa yid la byed do/ /bzang skyong / 'di lta ste/ dper na/ skyes pa'am/ bud med gang la la zhig nyal ba'i rmi lam du gzugs kyi rnam pa mthong ste/ dngul lam/ gser ram/ mdza' bshes sam/ nye du'am/ snag gi gnyen mtshams sam/ mdza' bo dang / yid du 'ong ba dang / sdug pa dang / mi mthun pa med pa dag mthong la/ de rmi lam
17a
@#/ /na de dag dang lhan cig tu rtse zhing dga' la dga' mgur spyod cing smra ba kun tu smra bar rmis pa las de sad nas ji ltar mthong ba dang / thos pa dang / bye brag phyed pa dang / rnam par shes pa dang / smras pa dang / kun tu smras pa de thams cad gzhan la'ang brjod cing / de rmi lam gyi mtshan ma rjes su dran pas mchi ma klog par byed pa de bzhin du/ bzang skyong / byang chub sems dpa' ma/ khyim pa'am/ rab tu byung ba'ang rung gcig tu dben par song ste 'dug la/ de bzhin gshegs pa dgra bcom pa yang dag par rdzogs pa'i sangs rgyas tshe dpag med ji skad du thos pa'i rnam pas yid la byas te tshul khrims kyi phung po la skyon med cing / dran pa g.yeng ba med par nyin zhag gcig gam/ gnyis sam/ gsum mam/ bzhi'am/ lnga'am/ drug gam/ nyin zhag bdun du yid la bya'o/ /de gal te nyin zhag bdun du sems mi g.yeng bar de bzhin gshegs pa tshe dpag med yid la byed pa de nyin zhag bdun yongs su tshang ste 'das nas bcom ldan 'das de bzhin gshegs pa tshe dpag med mthong ngo / /de gal te nyin mo bcom ldan 'das de ma mthong na/ de nyal ba'i rmi lam du bcom ldan 'das de bzhin gshegs pa tshe dpag med de'i zhal ston to/ /bzang skyong / 'di lta ste/ dper na/ bud med dam skyes pa nyal ba'i rmi lam na bdag nyid khyim na
17b
'dug par yang mi shes/ phyogs na 'dug par yang mi shes shing / de'i mig gi dbang po la rtsig pas sgrib par yang mi byed/ mun pa dang / rab rib tu'ang mi byed pa de bzhin du/ bzang skyong / byang chub sems dpa' sems dpa' chen po de'ang ji ltar 'jig rten gyi bar dag gis sgrib par yang mi byed/ ri'i rgyal po ri rab dang / ri'i rgyal po khor yug dang / khor yug chen po dang / de bzhin du gzhan yang ri nag po rnams kyis mig gi dbang po la sgrib par mi byed pa de lta de ltar sems bskyed de/ byang chub sems dpa' de lha'i mig thob pas de bzhin gshegs pa mthong ba'ang ma yin/ lha'i rna ba'i khams thob pas/ dam pa'i chos nyan pa'ang ma yin/ rdzu 'phrul gyi stobs thob pas/ 'jig rten gyi khams der skad cig tu 'gro ba'ang ma yin gyi/ bzang skyong / byang chub sems dpa' de 'jig rten gyi khams 'di nyid na gnas bzhin du/ bcom ldan 'das de bzhin gshegs pa tshe dpag tu med de mthong zhing bdag nyid 'jig rten gyi khams de na 'dug pa snyam du shes la chos kyang nyan to/ /'chad pa thos nas kyang chos de dag kun 'dzin to/ /kun chub par byed do/ /'dzin par byed do/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag med la bkur stir byed do/ /bla mar byed do/ /ri mor byed do/ /mchod par byed do/ /byang chub sems dpa'
18a
@#/ /de'i ting nge 'dzin de las langs nas kyang ji skad du thos pa dang / ji ltar bzung ba dang / ji ltar kun chub par byed pa'i chos de dag gzhan la'ang rgya cher yang dag par 'chad do// //bam po gnyis pa/ bzang skyong / 'di lta ste/ dper na/ skyes bu zhig rgyal po'i khab kyi grong khyer chen po na 'dug pa las yangs pa can gyi grong khyer na smad tshong ma yid bzang zhes bya ba zhig yod par thos so/ /skyes bu gnyis pas ni/ smad tshong ma a mra skyong zhes bya ba zhig yod par thos so/ /skyes bu gsum pas ni/ sngon gyi smad tshong ma ut+pa la'i mdog ces bya ba yod par thos so/ /de rnams kyis de dag thos nas so sor so so la sems chags par gyur mod kyi/ skyes bu de rnams kyis smad tshong ma de rnams mthong ba ni/ ma yin te/ ming dang / gzugs dang / kha dog tsam zhig thos pas/ 'dod chags kyi sems bskyed par gyur to/ /de dag phyi phyir zhing de yid la byed bzhin du nyal ba dang / rmi lam du'ang smad tshong ma de dag gi drung du bdag cag dong ba snyam du shes te/ ji ltar skyes bu de dag rgyal po'i khab kyi grong khyer chen po na 'khod cing sngon ma nyal bar de lta da ltar 'dod chags dang ldan pa'i sems skyed pa de bzhin du/ skyes bu de dag nyal nas kyang rmi lam na smad tshong ma de dag mthong zhing phan tshun sprad de 'khrig pa'i chos la brten nas
18b
'khrig pa la dad pa de dang yang bral bar gyur par rmis so/ /de dag sad nas ji ltar mthong ba dang / thos pa dang / shes pa dang / rtogs pa'i rmi lam na myong ba rjes su dran nas bzang skyong / khyod gang na ba der dong ste phyin nas khyod la don de dag brjod do/ /khyod kyis don de dag thos nas lung 'di nyid kyis ci nas kyang de dag bla na med pa yang dag par rdzogs pa'i byang chub las phyir mi ldog par 'gyur ba de lta de ltar chos bstan to/ /ngas kyang skyes bu de dag ma 'ongs pa'i dus na de bzhin gshegs pa dgra bcom pa yang dag par rdzogs pa'i sangs rgyas legs par sad pa zhes bya ba rnams su 'gyur ro| /zhes lung ston to/ /skyes bu de dag bzod pa rnyed kyang nga dung mngon gyi mtshan ma de dag mthong zhing rjes su dran no/ /bzang skyong / de bzhin du byang chub sems dpa' da ltar gyi sangs rgyas mngon sum du bzhugs pa'i ting nge 'dzin 'di dang ldan pa de ni/ 'jig rten gyi khams 'di nyid na 'dug bzhin du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag med de thos so/ /des de bzhin gshegs pa de'i mtshan dang / gzugs dang / yon tan tsam zhig thos nas sems mi g.yeng bar bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag med de yang dag par rjes su dran par byed do/ /de'i
19a
@#/ /phyi phyir zhing yid la byed pas de bzhin gshegs pa de mthong ngo / /da ltar gyi sangs rgyas mngon sum du bzhugs pa'i byang chub sems dpa'i ting nge 'dzin de la gnas te/ des de bzhin gshegs pa de mthong nas bcom ldan 'das/ chos gang dang ldan na/ byang chub sems dpa' sems dpa' chen po 'jig rten gyi khams 'dir skye bar 'gyur zhes zhu ba zhu'o/ /de bzhin du sangs rgyas kyi zhing gang dang gang du skye bar 'dod pa de'i tshe de bzhin gshegs pa la zhu'o/ /de skad zhus nas bcom ldan 'das de bzhin gshegs pa tshe dpag med des byang chub sems dpa' de la 'di skad ces bka' stsal to/ /rigs kyi bu/ sangs rgyas rjes su dran pa kun tu bsten/ nges par bsten cing bsgoms la mang du byas na/ 'jig rten gyi khams 'dir skye bar byed do/ /sangs rgyas rjes su dran pa kun tu bsten/ nges par bsten cing bsgoms la mang du byas na/ sangs rgyas kyi zhing 'dir skye bar 'gyur ro/ /rigs kyi bu/ de la sangs rgyas rjes su dran pa de gang zhe na/ 'di lta ste/ gang de bzhin gshegs pa yid la byed pa ste/ 'di ltar de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/
19b
lha dang mi rnams kyi ston pa/ sangs rgyas bcom ldan 'das skyes bu chen po'i mtshan sum cu rtsa gnyis dang / gser gyi mdog lta bu'i sku dang ldan pa/ gser gyi gzugs 'tsher zhing gsal la legs par gnas pa dang 'dra ba/ rin po che'i mchod sdong ltar shin tu brgyan pa/ nyan thos kyi dge 'dun gyi nang na chos kyang ston te/ ci nas kyang chud mi za ba de ltar ston to/ /ci zhig chud mi za zhe na/ sa chud mi gzon to/ /chu dang / me dang / rlung dang / 'byung po dang / lha dang / bram ze dang / skye rgu'i bdag po chud mi gzon to/ /gzugs chud mi gzon to/ /tshor ba dang / 'du shes dang / 'du byed dang / rnam par shes pa chud mi gzon to/ /de bzhin gshegs pa rlom sems su mi byed/ mi dmigs/ mngon par mi chags/ yang dag par mi shes/ mi rtog/ rnam par mi rtog /yang dag par rjes su mi mthong ste/ gang de ltar de bzhin gshegs pa mi dmigs par yid la byed pas stong pa nyid kyi ting nge 'dzin thob pa de ni/ sangs rgyas rjes su dran pa zhes bya ste/ byang chub sems dpa' de ting nge 'dzin de bsgoms shing ting nge 'dzin de la mnyam par bzhag nas ting nge 'dzin de las langs te bzang skyong / khyod gang na ba der song nas phyin pa dang ting nge 'dzin de brjod do/ /bzang skyong / de la khyod kyis ci nas kyang byang chub sems dpa' de bla na med pa yang dag par rdzogs pa'i byang chub las phyir mi ldog par 'gyur ba de lta de
20a
@#/ /ltar chos ston to/ /de la ngas kyang skyes bu de ni/ ma 'ongs pa'i dus na de bzhin gshegs pa dgra bcom pa yang dag par rdzogs pa'i sangs rgyas spobs pa rnyed pa zhes bya bar 'gyur ro/ /zhes lung ston to/ /bzang skyong / khyod nyid dang / gnas brtan 'od srung chen po dang / byang chub sems dpa' dbang po byin dang / byang chub sems dpa' mtshams bzang dang / gzhan yang byang chub sems dpa' gang dag gis ting nge 'dzin 'di thob pa rnams ting nge 'dzin 'di la dbang du gyur pa yin te/ bzang skyong / sngon byung ba 'das pa'i dus na skyes bu gcig cig dgon pa'i mya ngam zhig tu song ba dang / de bkres shing skom nas rmugs pa dang / gnyid kyis non te nyal ba dang / rmi lam na bza' ba dang / btung ba mang po zhig rnyed do/ /rnyed nas kyang ji tsam chog par zos te bkres pa dang / skom pa de dag kyang med par gyur to/ /de sad pa dang / lus dang lto ma rgyas par gyur nas de 'di snyam du 'di lta ste/ rmi lam dang 'dra ba de lta bu'i chos shig yod do snyam ste/ de de ltar rtogs pas mi skye ba'i chos la bzod pa thob par gyur to/ /bla na med pa yang dag par rdzogs pa'i byang chub las phyir mi ldog par gyur to/ /bzang skyong / de bzhin du byang chub sems dpa' khyim pa'am/ rab tu byung ba'ang rung / phyogs gang dang gang na de bzhin gshegs pa bzhugs par thos pa'i phyogs de dang
20b
de logs su de bzhin gshegs pa de yid la byas na/ des sangs rgyas mthong ba thob bo/ /des dngos po'i 'du shes su mi bya'i/ nam mkha'i 'du shes su bya ste/ de nam mkha'i 'du shes la shin tu gnas shing sangs rgyas kyi 'du shes shin tu yid la byas pas/ de bzhin gshegs pa baiDUR+Ya'i sku gzugs lta bu bzang po byang chub sems dpa' des mngon sum du mthong bar 'gyur te/ byang chub sems dpa' des de bzhin gshegs pa dgra bcom pa yang dag par rdzogs pa'i sangs rgyas de lta bu de mthong bar 'gyur ro/ /bzang skyong / 'di lta ste/ dper na/ skyes bu la zhig rang skyes pa'i yul nas ljongs kyi phyogs gzhan zhig tu song ste phyin pa dang / rang skyes pa'i yul de rjes su dran nas ji ltar mthong ba dang / thos pa dang / shes pa dang / rtogs pa'i chos rnams yid la byed pa las rmugs pa dang / gnyid kyis non te/ de nyal ba dang / rmi lam na rang skyes pa'i yul du song nas de na bdag nyid 'dug pa snyam du shes shing / ji ltar sngon mthong ba dang / thos pa dang / bye brag phyed pa dang / rnam par shes pa de dag kyang mthong ngo / /de na 'gro zhing ldog pa dag kyang byed do/ /de sad pa dang gnyen 'dab dang / mdza' bshes dang / nye du dang / snag gi gnyen mtshams rnams kyi nang du nga ni/ 'di ltar song song ngo / /ngas ni/ 'di dag mthong ngo / /der ngas ni/ 'di dag myong ngo / /zhes don de dag kyang brjod do/ /bzang
21a
@#/ /skyong| de bzhin du byang chub sems dpa' sems dpa' chen po khyim pa'am/ rab tu byung ba'ang rung phyogs gang dang gang na de bzhin gshegs pa bzhugs pa thos pa'i phyogs dang de logs su dran pa dang ldan zhing / sems g.yeng ba med pas sangs rgyas mthong ba thob par bya ba'i phyir de bzhin gshegs pa de yid la bya'o/ / de ltar byang chub sems dpa' des de bzhin gshegs pa bai DUR+Ya'i sku gzugs bzang por gnas pa mthong par 'gyur ro/ /bzang skyong / 'di lta ste/ dper na/ dge slong mi sdug pa sgom pa zhig gis mdun na rnam par bam pa'i gzugs rnams mthong zhing rnam par sngos pa dang / rnam bar rnags pa dang / rnam par dmar ba dang / rnam par zos pa dang / sha rnams pags pa'am/ sha dang khrag med pa'am/ dkar po'am/ kha dog dung dang 'dra ba'am/ keng rus shig mdun du mthong na/ rnam par sngos pa nas keng rus kyi bar du de dag gang nas kyang ma 'ongs/ gang du'ang ma song ngo / /de dag sus kyang ma byas/ sus kyang ma bgags te/ bzang skyong / 'on kyang dge slong de'i sems rtse gcig pa'i dbang gis mdun na keng rus 'dug pa mthong ngo / /bzang skyong / de bzhin du sangs rgyas kyis yongs su bzung ba'i byang chub sems dpa' ting nge 'dzin 'di la gnas pa rnams phyogs gang dang gang na de
21b
bzhin gshegs pa dgra bcom pa yang dag par rdzogs pa'i sangs rgyas bzhugs pa'i phyogs de dang de logs su sangs rgyas mthong ba 'thob par bya ba'i phyir yid la byed do/ /phyogs de dang de logs su yid la byas pas des phyogs de dang de logs su de bzhin gshegs pa dgra bcom pa yang dag par rdzogs pa'i sangs rgyas de dag mthong ngo / /de ci'i phyir zhe na/ bzang skyong / 'di lta ste/ sangs rgyas mthong ba 'thob par 'gyur ba 'di ni/ ting nge 'dzin 'di'i rgyu mthun pa yin no/ /ting nge 'dzin 'di la gnas pa'i byang chub sems dpa' ni/ sangs rgyas kyi mthu dang / rang gis dge ba'i rtsa ba'i stobs bskyed pa dang / ting nge 'dzin thob pa'i phyir dang / 'di dag gsum tshogs shing 'dus pas de bzhin gshegs pa rnams mthong zhing snang bar 'gyur ro/ /bzang skyong / 'di lta ste/ dper na/ bud med dam/ skyes pa gang la la mgo 'khru zhing rgyan 'dogs pa'i rang bzhin can zhig yod la/ de 'bru mar dang ba'i snod dam| chu dang ba'i snod dam/ yongs su phyis pa'i me long gi dkyil 'khor ram/ mthing bus bskus pa'i sa phyogs la bdag nyid blta bar bsam nas des der bdag nyid kyi gzugs mthong na/ bzang skyong / de la ji snyam du sems/ 'bru mar dang pa'i snod dam/ chu dang ba'i snod dam/ yongs su phyis pa'i me long gi dkyil 'khor ram/ mthing bus
22a
@#/ /bskus pa'i sa phyogs de la gang skyes pa'am/ bud med kyi gzugs snang ba de skyes pa'am/ bud med gang yang de'i nang du song ba'am/ de'i nang du zhugs pa yod dam/ bzang skyong gis gsol pa/ btsun pa bcom ldan 'das/ de ni/ ma mchis mod kyi/ btsun pa bcom ldan 'das/ 'bru mar dang / chab de dang zhing rnyog pa ma mchis pa'am/ me long gi dkyil 'khor de legs par yongs su phyis pa'am/ mthing bus bskus pa'i sa chen po de dag pa'i slad du gzugs brnyan mdun na mchis te/ chab dang / 'bru mar dang / me long dang / sa chen po de las skyes pa'am/ bud med kyi lus 'byung ba'ang ma lags/ gang nas kyang ma mchis/ gang du'ang ma mchis/ gang nas kyang ma skyes| gang du'ang ma 'gags so/ /bcom ldan 'das kyis bka' stsal pa/ bzang skyong / legs so/ /legs so/ /bzang skyong / khyod yang legs so/ /bzang skyong / de de bzhin no| |ji skad smras pa bzhin te/ gzugs rnams shin tu yongs su dag pa las gzugs brnyan rnams snang bar 'gyur ro/ /de bzhin du byang chub sems dpa' de'ang ting nge 'dzin 'di shin tu bsgoms pas tshegs chung dus de bzhin gshegs pa de rnams byang chub sems dpa' des mthong ngo / /mthong nas kyang zhu ba zhu zhing zhus pa lung bstan
22b
bas yid rangs par 'gyur ro/ /de 'di snyam du de bzhin gshegs pa 'di ga zhig nas byon tam/ bdag ga zhig tu son tam snyam pa las/ des de bzhin gshegs pa de gang nas kyang ma byon par rab tu shes so/ /bdag gi lus kyang gang du'ang ma song bar rab tu 'du shes nas de 'di snyam du khams gsum po 'di dag ni/ sems tsam mo/ /de ci'i phyir zhe na/ 'di ltar bdag ji lta ji ltar rnam par rtog pa de lta de ltar snang ngo / /sems de'ang nang na'ang med/ phyi rol na'ang med/ gnyi ga med par yang mi dmigs te/ gzhan du na dmigs pa la brten nas skye'o// gang rten cing 'brel par 'byung ba de ni/ dngos po med pa'o/ /gang dngos po med pa de ni/ ma skyes pa'o/ /gang ma skyes pa de ni/ dmigs su med pa'o/ /gang dmigs su med pa de ni/ rang bzhin stong pa'o/ /gang rang bzhin stong pa de ni/ gdags su med pa'o/ /gang gdags su med pa de ni/ blta ba'am/ rnam par shes pa'am/ chags par bya ba'am/ bstan pa'am/ chud gzan par bya ba'am/ rab tu gzhag par bya mi nus so/ /de nas de'i tshe bcom ldan 'das kyis tshigs su bcad pa 'di dag gsungs so/ /sems kyis sangs rgyas byed pa ste/ /sems nyid kyis kyang mthong ba'o/ /sems nyid nga yi sangs rgyas te/ /sems nyid de bzhin gshegs pa'o/ /sems nyid nga yi lus yin te/ /sangs rgyas sems kyis mthong ba'o/ /sems
23a
@#/ /nyid nga yi byang chub ste/ /sems nyid rang bzhin med pa'o/ /sems kyis sems ni mi shes shing / /sems kyis sems ni mi mthong ngo / /sems su 'du shes mi shes yin/ /sems su mi shes mya ngan 'da'/ /chos 'di dag ni snying po med/ /rlom sems las ni kun byung ste/ /stong pa nyid las gang rlom pa'i/ /rlom sems de 'dir stong pa yin// bzang skyong gis zhus pa'i ting nge 'dzin gyi le'u ste gsum pa'o// //bzang skyong / ting nge 'dzin de la gnas pa'i byang chub sems dpa' de'i ye shes ni/ de lta bu yin no| |bzang skyong / chos bzhi dang ldan na/ byang chub sems dpa' sems dpa' chen po da ltar gyi sangs rgyas mngon sum du bzhugs pa'i ting nge 'dzin 'di 'thob bo/ /bzhi gang zhe na| 'di lta ste/ mi 'phrog pa'i dad pa dang / phyir mi ldog pa'i brtson 'grus dang / gzhan gyi dring la mi 'jog pa'i shes rab dang / dge ba'i bshes gnyen la bsnyen bkur byed pa ste| bzang skyong / chos bzhi po de dag dang ldan na/ byang chub sems dpa' sems dpa' chen po da ltar gyi sangs rgyas mngon sum du bzhugs pa'i ting nge 'dzin 'di 'thob bo/ / bzang skyong / gzhan yang chos bzhi dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzhi gang zhe na/ 'di lta ste/ zla ba gsum gyi bar du
23b
se gol brdabs pa tsam yang bdag gi 'du shes mi skyed pa dang / zla ba gsum gyi bar du se gol brdabs pa tsam yang rmugs pa dang gnyid kyis mi non pa dang / bshang ba dang / gci ba byed pa ma gtogs par zla ba gsum gyi bar du brtson 'grus brtsams te 'chag pa la zhugs nas sa la mi 'dug pa dang / gzhan dag la'ang chos kyi sbyin pa rgya cher gtong pa'i steng du rnyed pa dang / bkur sti dang / tshigs su bcad pa la mi re ba ste/ bzang skyong / chos bzhi po de dag dang ldan na/ byang chub sems dpa' sems dpa' chen po ting nge 'dzin 'di 'thob bo/ / bzang skyong / gzhan yang chos bzhi dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzhi gang zhe na/ 'di lta ste/ sangs rgyas blta bar sems can rnams la skul ba dang / chos mnyan par sems can rnams la skul ba dang / byang chub kyi sems skyed par sems can rnams la skul ba dang / phrag dog med pa ste/ bzang skyong / chos bzhi po de dag dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang chos bzhi dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzhi gang zhe na/ 'di lta ste/ ting nge 'dzin 'di 'dod pas/ de bzhin gshegs pa'i sku gzugs byed du bcug ste/ tha na ri mor yang 'brir 'jug
24a
@#/ /pa dang / ting nge 'dzin 'di 'dod pas/ ting nge 'dzin 'di yun ring du gnas par bya ba'i phyir ci nas kyang ting nge 'dzin 'di 'dzin par legs par bris shing / glegs bam sbyin pa dang / mngon ba'i nga rgyal can gyi gang zag rnams mngon pa'i nga rgya med pa'i chos 'di lta ste/ bla na med pa yang dag par rdzogs pa'i byang chub la 'jog pa dang / de bzhin gshegs pa'i bstan pa bsrung ba dang / sba ba dang / yang dag par gzung ba'i phyir gnas pa ste/ bzang skyong / chos bzhi po de dag dang ldan na/ byang chub sems dpa' sems dpa' chen po ting nge 'dzin 'di 'thob bo/ /de nas de'i tshe bcom ldan 'das gyis tshigs su bcad pa 'di dag gsungs so/ /bde gshegs bstan pa la ni dad pa skyed| |stong pa nyid kyi chos bshad ma smod cig /brtson 'grus brtsams shing gnyid ni spangs byas te/ /zla gsum tshad bar nam yang ma 'dug cig /rnyed dang bkur sti tshigs bcad mi rten par/ /bde gshegs gsungs pa'i chos ni bshad bya zhing / /mtshungs pa med pa'i bstan pa rgyas par bya/ /rten pa med na chos 'di thob par 'gyur/ /phrag dog med cing khro ba bskyed mi bya/ /'dod chags spangs shing sems ni rnam grol la/ /mnyam par bzhag cing bsam gtan dga' byas te/ /sbyor bar byed na chos 'di 'thob par 'gyur/
24b
gser mdog bsod nams brgya yi mtshan mnga' la/ /mdzes shing kun nas yongs su rgyas par gyur/ /gser gyi gzugs bzhin du ni blta sdug pa'i/ /bsod nams mchog mtshan sangs rgyas dran par byos/ /sangs rgyas 'das pa'am yang na ma byon pa/ /thal mo sbyar te rjes su dran par byos/ /mi mchog gang dag da ltar bzhugs pa yang / /de dag mchod phyir bde gshegs dran par byos/ /dang ba'i sems kyis me tog phreng ba dang / /byug pa dag dang bza' dang bca' ba yis/ /bde bar gshegs pa la ni mchod pa byos/ /ting 'dzin 'di ni rnyed par dka' mi 'gyur/ / ting nge 'dzin gyi mchog 'di 'dod pas na/ /sems ni rangs shing dga' ba 'dra med pas/ /rnga dung rdza rnga dag gi sil snyan dang / /dpe med ring bsrel la ni rol mo byed/ /ting nge 'dzin gyi mchog ni 'dod pas na/ /ri mo legs par bris shing mtshan rdzogs la/ /gser gyi mdog 'dra rgya che skyon med pa'i/ /mtshungs pa med pa'i sku gzugs byed pa dang / /dga' bar byed pa'i chos ni mdun bzhag nas/ /tshul khrims yongs dag thos pa tshol byed la/ /le lo'i dngos po yongs su spangs byas na/ /ting 'dzin 'di ni ring por mi thogs rnyed/ /kun nas mnar sems su la'ang ma byed cig /byams la gnas dang snying rjer gnas pa dang / /'dod pa'i yon tan btang snyoms byas nas ni/ /ting 'dzin 'di ni ring por mi thogs rnyed/ /chos smra ba la'ang de bzhin byams pa skyed/ /
25a
@#/ /ston par 'du shes rtag tu nye bar zhog /nga rgyal ma byed chags pa spang bar byos/ /chos sbyin pa la nam yang 'jungs ma gyur/ /phan yon bzang po 'di dag blang bar byos| |gdams ngag gnas ni bde bar gshegs pas bstan/ /'di ni sangs rgyas mang po'i bstan pa ste/ /ting 'dzin 'di ni rnyed par dka' mi 'gyur/ /bzang skyong gis zhus pa ting nge 'dzin gyi le'u ste bzhi pa'o// //bzang skyong / gzhan yang byang chub sems dpa' sems dpa' chen po ting nge 'dzin 'di 'dod pas chos smra ba'i dge slong la gus pa dang bcas shing zhe sa dang bcas par bya ste/ klan ka btsal ba med pa'i sems kyis ston par 'du shes bskyed la/ ting nge 'dzin 'di la sbyar bar bya'o/ /bzang skyong / gal te byang chub sems dpa' des chos smra ba'i dge slong de la kun nas mnar sems kyi sems kyis gnas sam/ tha ba'i sems kyis gnas sam/ sems ma dang bas gnas na/ bzang skyong / byang chub sems dpa' des ting nge 'dzin 'di thob pa ni/ gnas ma yin te/ skabs med do/ /gal te chos smra ba'i dge slong de la ston pa'i 'du shes mi skyed na'ang gnas de med do/ /bzang skyong / de ci'i phyir zhe na/ de ltar ma gus pas ni/ dam pa'i chos nub par 'gyur ro/ /bzang skyong / 'di lta ste/ dper na/ mig dang ldan pa'i skyes bu zhig gis nam thang zhing sprin med
25b
pa'i mtshan mo nam gyi gung thun la gdong gyen du bar snang la bltas na/ des der skar ma'i gzugs mang po rnams mthong ngo / /bzang skyong / de bzhin du sangs rgyas kyis yongs su bzung ba'i byang chub sems dpa' sems dpa' chen po ting nge 'dzin 'di la gnas pa ni/ nam mkha'i 'du shes shin tu nye bar gnas shing / sangs rgyas kyi 'du shes shin tu byin gyis brlabs pa'i phyir sangs rgyas kyi mthu dang / ting nge 'dzin 'di bsgoms pas/ 'jig rten gyi khams gzhan du shar phyogs su bltas na/ chegs chung dus sangs rgyas mang po rnams mig gi dbang po la snang bar 'gyur ro/ /chogs chung dus sangs rgyas brgya phrag mang po dang / sangs rgyas stong phrag mang po dang / sangs rgyas brgya stong phrag mang po dang / sangs rgyas bye ba phrag mang po dang / sangs rgyas bye ba brgya phrag mang po dang / sangs rgyas bye ba stong phrag mang po dang / sangs rgyas bye ba brgya stong phrag mang po dang / sangs rgyas bye ba khrag khrig brgya stong phrag mang po tshegs chung dus mig gi dbang po la snang bar 'gyur ro/ /de bzhin du lho phyogs dang / nub phyogs dang / byang phyogs dang / phyogs mtshams bzhi dang / 'og gi phyogs dang / steng gi phyogs rgyas par bya ste| de ltar phyogs bcur bltas na/ byang chub sems dpa' sems dpa' chen po des tshegs chung dus sangs rgyas mang po rnams mig gi dbang po la snang bar 'gyur ro/ /tshegs chung dus
26a
@#/ /sangs rgyas brgya phrag mang po dang / sangs rgyas stong phrag mang po dang / sangs rgyas brgya stong phrag mang po dang / sangs rgyas bye ba khrag mang po dang / sangs rgyas bye ba brgya phrag mang po dang / sangs rgyas bye ba stong phrag mang po dang / sangs rgyas bye ba brgya stong phrag mang po dang / sangs rgyas bye ba khrag khrig brgya stong phrag mang po tshegs chung dus mig gi dbang po la snang bar gyur to/ /bzang skyong / de ltar sangs rgyas kyis yongs su bzung ba'i byang chub sems dpa' sems dpa' chen po da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di la gnas pa rnams ni/ tshegs chung dus sangs rgyas mang po rnams mig gi dbang po la snang bar 'gyur ro/ / tshegs chung ngus sangs rgyas brgya phrag mang po dang / sangs rgyas stong phrag mang po dang / sangs rgyas brgya stong phrag mang po dang / sangs rgyas bye ba phrag mang po dang / sangs rgyas bye ba brgya phrag mang po dang / sangs rgyas bye ba stong phrag mang po dang / sangs rgyas bye ba brgya stong phrag mang po dang / sangs rgyas bye ba khrag khrig brgya stong phrag mang po rnams tshegs chung ngus mig gi dbang po la snang bar 'gyur ro/ /bzang skyong / 'di lta ste/ dper na/ sangs rgyas kyi spyan gang dang ldan pas de bzhin gshegs pa dgra bcom pa yang dag par
26b
rdzogs pa'i sangs rgyas kyis thams cad thugs su chud pa dang / thams cad gzigs par 'gyur ba'i de bzhin gshegs pa dgra bcom pa yang dag par rdzogs pa'i sangs rgyas kyi spyan yod do| |bzang skyong / de bzhin du sangs rgyas kyis yongs su bzung ba'i byang chub sems dpa' sems dpa' chen po de ltar gyi sangs rgyas mngon sum du bzhugs pa'i ting nge 'dzin 'di la gnas pa rnams ni/ tshegs chung dus mang du thos pa yongs su rdzogs par 'gyur ro/ /sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa yongs su rdzogs par 'gyur ro/ /tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba yongs su rdzogs par 'gyur ro/ /byang chub sems dpa'i yon tan thams cad yongs su rdzogs par 'gyur ro/ /bla na med pa'i shes rab kyi dbang po dang / bla na med pa yang dag par rdzogs pa'i byang chub yongs su rdzogs par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /dper na mig ldan mi zhig mtshan mo dben pa'i dus/ /nam gyi gung thun ldang byas nam mkha' rnam dag la/ /des ni skar ma mang po brgya stong
27a
@#/ /mthong gyur te/ /dran ldan bsam na nyin bar du yang dran par 'gyur/ /de ltar byang chub sems dpas ting 'dzin 'di thob nas/ /sangs rgyas dpa' bo mang po brgya stong mthong bar 'gyur/ /de las langs pa'i dus na'ang dran 'gyur zhing / /'khor la 'jig rten mgon po 'di 'dra'o zhes kyang smra/ /ji ltar nga'i mig sangs rgyas spyan de rnam dag la/ /rab rib med cing yongs dag des ni 'jig rten lta ba ltar/ /de ltar rgyal sras byang chub sems dpa' rnams kyi spyan/ /rdul med ting 'dzin 'di yin des ni ma gi dbang mthong / /stobs bcu rkang gnyis dbang po 'jig rten gtso lta'i tshe/ /thub rnams dngos po'i 'du shes nam yang mi skyed do/ /dug bcom yongs dag dngos po'i 'du shes med pa yi/ /byang chub sems dpa' gtso bo yon tan khyad par nyon/ /chos mchog bsil ba de dag kyang ni mnyan par byos/ /stong pa nyid chos bde ba myur du dran par byos/ /ngas kyang rgyal ba'i byang chub rnyed nas skye rgu la/ /skye bo mang po bde ba'i chos 'di bshad par bya/ /ji ltar byang chub sems dpa' tshe dpag med skyes nas/ /'jig rten mgon po brgya stong mang po mthong gyur pa| |de ltar byang chub sems dpa'i ting 'dzin 'di thob na/ /sangs rgyas dpa' bo mang po brgya stong mthong bar 'gyur/ /ji ltar dran ldan dge slong bzang po kun dga' bos/ /
27b
nga las thos pa rab bzung de yang kun 'dzin pa/ /de ltar byang chub sems dpas ting 'dzin 'di thob na/ /chos mang thos shing thams cad 'dzin par 'gyur/ /ting nge 'dzin 'di thos nas yang dag dga' skyed la/ /'jig rten gsang tshig sna tshogs thams cad spangs byas te/ /myur du dad par byos la chos kyi sbyin pa byin/ /de ltar yongs dag zhi ba'i sa 'di thob par 'gyur/ / bzang skyong gis zhus pa'i ting nge 'dzin gyi le'u ste lnga pa'o// //bzang skyong / de la byang chub sems dpa'i ting nge 'dzin 'di thob par bya ba dang / 'di lta ste/ yongs su bsgrub par bya ba'i phyir spro ba dang / brtson 'grus chen po bskyed par bya'o/ /bzang skyong / 'di lta ste/ dper na/ rgya tsho chen po'i gru rin po ches yongs su gang ba zhig rgya mtsho chen po rgal te 'jigs pa thams cad spangs pa las tshu rol gyi 'gram du chag na/ de la dzam+bu'i gling pa'i mi rnams kyis sgra chen po dang / skad chen po dang / 'o dod 'bod par byed do| |bdag cag ni| rin po che 'di dag las nyams so/ /zhes mya ngan chen pos smre sngags kyang gdon par byed do/ /bzang skyong / de bzhin du rigs kyi bu'am/ rigs kyi bu mo'am/ dge slong ngam/ dge slong ma'am/ dge bsnyen nam/ dge bsnyen ma gang la la ting nge 'dzin rin po che 'di lta bu 'di rna lam du grag par gyur la/ thos nas kyang glegs bam du 'dri bar mi byed/ ston
28a
@#/ /par mi byed/ 'don par mi byed/ 'dzin par mi byed/ klog par mi byed/ 'chad par mi byed/ sgom par mi byed/ nan tan gyis sgrub par mi byed na/ bzang skyong / de la lha dang bcas pa'i 'jig rten gyis sgra chen po dang / skad chen po dang / 'o dod 'bod par byed do/ /'di ltar ting nge 'dzin zab mo rin po che 'di lta bu sangs rgyas kyis bsngags pa| sangs rgyas kyis bstod pa/ sangs rgyas kyis bstong du bcug pa/ sangs rgyas kyi yon tan thams cad thob par 'gyur ba gang yin pa de thos nas yi ger 'bri bar mi byed/ ston par mi byed/ 'don par mi byed/ 'dzin par mi byed/ klog par mi byed/ 'chad par mi byed/ sgom par mi byed/ nan tan gyis sgrub par mi byed cing / nga rgyal gyis non la mi shes te/ mang du thos pa yongs su rdzogs pa mi 'dzin pa'i sems can de dag ni/ ting nge 'dzin rin po che 'di lta bu 'di las yongs su nyams so/ /zhes mya ngan chen pos smre sngags kyang gdon par bya'o/ /bzang skyong / ting nge 'dzin 'di nyan mi 'dod par 'gyur ba dang / ting nge 'dzin 'di 'dzin par mi 'gyur ba'i sems can de dag ni/ bzang skyong / yongs su nyams pa'i chos can yin par ngas bshad do/ /bzang skyong / gang ting nge 'dzin rin po che 'di lta bu 'di thos nas yi ge 'bri bar mi byed/ ston par mi byed/ 'don par mi byed/ 'dzin par mi byed/ klog
28b
par mi byed/ 'chad par mi byed/ sgom par mi byed/ nan tan gyis sgrub par mi byed pa'i sems can de dag gi yongs su nyams pa ji tsam du 'gyur ba ltas shig /bzang skyong / sems can de lta bu de rnams la ni/ chos de lta bu dag ched mi che bar ngas bshad do/ /bzang skyong / 'di lta ste/ dper na/ skyes bu gang la la zhig byis pa'i rang bzhin can/ shes rab 'chal pa'i rang bzhin can zhig la tsan+dan dmar po gsar pa zhig byin pa dang / de de la ci gtsang ba'i 'du shes skyed do/ /btsog pa'i 'du shes skyed do/ /de la skyes bu mkhas pa'i rang bzhin can tsan+dan gyi tshong pa zhig gis 'di skad du kye skyes bu/ khyod tsan+dan gsar pa 'di la mi gtsang ba'i 'du shes ma skyed cig /btsog pa'i 'du shes ma skyed cig /kye skyes bu/ 'di'i dri ji tsam du dga' bar byed pa re zhig snoms shig /kye skyes bu/ 'di'i kha dog ci tsam du blta na sdug pa'ang ltos shig ces smras pa dang / byis pa'i rang bzhin can/ shes rab 'chal pa'i rang bzhin can gyi skyes bu des tsan+dan dmar po de mthong nas snom mi 'dod pa'i phyir rang gis ma blangs/ blta mi 'dod pa'i phyir mig kyang 'dzum par byed pa de bzhin du/ bzang skyong / ma 'ongs pa'i dus nas dge slong byang chub sems dpa' rlom sems can lus ma bsgoms pa/ sems ma bsgoms pa/ tshul khrims ma bsgom pa/ shes rab ma bsgoms pa/ tshul khrims 'chal ba/ dam pa'i chos nges pa'i don
29a
@#/ /rin po che mi len pa/ dam pa'i chos des pa'i don rin po che yongs su spong bar byed pa/ shes rab 'chal ba/ shes rab las yongs su nyams pa/ bsam gtan rnyed pas lhag pa'i nga rgyal can/ /gang zag la rten pa/ gang zag tu lta ba/ gang zag tu gnas pa/ chos su dmigs pa la mngon par zhen pa/ stong pa nyid bshad pas skrag pa de dag da ltar gyi sangs rgyas mngon sum du bzhugs pa'i ting nge 'dzin 'di bshad pa thos na/ rna blags te nyan par mi byed/ mngon par dad par mi byed/ 'dzin par mi byed/ kun chub par mi byed/ 'chang bar mi byed/ klog par yang mi byed na/ gzhan dag la rgya cher 'chad pa lta ci smos/ de dag de'i phyir byams pa dang / dga' ba rgya chen po'ang mi 'thob na/ de bzhin nyid du sgrub pa lta ci smos pa'i steng du thos nas kyang spong bar byed do/ /mngon par mi dad do/ /mi len to/ /mos par mi byed do/ /dpya ba'i bsam pa dang / bsting ba'i bsam pa dang / smad pa'i bsam pas tshig kyang 'di skad du gsung rab 'di dag 'bar ba dang / 'di ltar dge slong kun dga' bo 'dra ba 'jig rten du byung ba dang / 'di lta bu'i mdo sde byung ba ni/ ngo mtshar to/ /zhes zer zhing / lkog tu dong nas kyang phan tshun du mdo 'di lta bu dag ni/ rang gis byas pa/ rang bzo byas pa ste/ 'di ni/ sangs rgyas kyis gsungs pa ma yin/ sangs rgyas kyis gnang ba ma yin
29b
no zhes de skad kyang brjod cing smod par byed de/ skyes bu blun po de lta bu dag ni/ dam pa'i chos rin po che las yongs su nyams pa dang / dam pa'i chos rin po che yongs su spangs par rig par bya'o| |bzang skyong / 'di lta ste/ dper na/ skyes bu byis pa'i rang bzhin can de tsan+dan dmar po de mthong nas mi bsnam pa'i phyir sna'ang 'gog pa dang / mi mthong bar bya ba'i phyir mig kyang 'dzum pa de bzhin du/ bzang skyong / skyes bu blun po de dag kyang ting nge 'dzin rin po che 'di lta bu thos nas phyi phyir zhing mnyan par mi sems/ gzung ba dang / kun chub par bya ba dang / bcang bar bya ba dang / bklag par bya bar mi sems dpa'i steng du thos nas kyang 'di lta ste/ nyan mi 'dod pa'i phyir gnas de nas 'gro bar 'gyur ro/ /bzang skyong / 'di lta ste/ dper na| skyes bu rin po che tshong pa la la zhig gis skyes bu blun po'i rang bzhin can de rnams la nor bu rin po che bai DUR+Ya rin thang med pa zhig bstan par bsam pa dang / de la skyes bu blun po'i rang bzhin can de dag gis nor bu rin po che de mthong nas de la 'di skad ces smras so/ /kye skyes bu/ nor bu rin po che 'di'i rin ji tsam/ rin po che tshong pa des de dag la 'di skad ces smras so/ / nor bu rin po che 'di'i 'od kyi phyogs ji tsam khyab pa de tsam gyi phyogs bzhir rin po che sna bdun gyis yongs su gang par byas pa de byin cig /de ci'i phyir zhe na/ nor bu rin po che 'di'i rin
30a
@#/ /thang tshang ba ni/ de yin no/ /sems can blun po'i rang bzhin can de dag gis de las nor bu rin po che de'i rin thang thos pa dang / gad mos 'debs shing 'phya bar byed/ sting bar bye la nor bu rin po che de'ang lag pa gnyis kyis dpog par byed do/ /bzang skyong / de bzhin du ma 'ongs pa'i dus na dge slong rtog pa mang ba/ bsod nams chung ba/ dge ba'i rtsa ba ma bskyed pa/ sngon gyi rgyal ba la bya ba ma byas pa/ nga rgyal gyis gzir ba/ phrag dog gis gzir ba/ rnyed pa dang / bkur sti dang / tshigs su bcad pas gzir ba| tshul khrims rnams yongs su ma dag pa/ ting nge 'dzin rnams ma thob pa/ shes rab rnams ma thob pa/ thos pa nyung ba/ slob dpon dang ma 'grogs pa/ gang zag tu lta ba dang / gang zag la rten pa/ gang zag la gnas pa/ chos su dmigs pa la mngon par zhen pa rnams ni/ stong pa nyid bshad pas skrag par 'gyur te/ de dag da ltar gyi sangs rgyas mngon sum du bzhugs pa'i ting nge 'dzin 'di thos nas rtog par mi 'gyur/ mngon par dad par mi 'gyur/ yid ches par mi 'gyur/ mos par mi 'gyur ba'i steng du thos kyang gad mos 'debs par 'gyur/ 'phya bar 'gyur/ sting bar 'gyur ro/ /lkog tu dong nas kyang phan tshun nas smod par byed/ spong bar byed cing / tshig kyang 'di skad du dge slong
30b
'di dag ni/ spyi rtol can no/ /dge slong 'di dag ni/ mu cor smra ba ste/ 'di ltar 'di dag ni/ sangs rgyas kyis ma gsungs pa/ rang gis byas shing rang bzo byas pa/ tshig dang yi ge sna tshogs pa/ gtam tsam du bshad pa la mdo sde'i ming gis 'chad pa ngo mtshar to/ /zhes zer zhing / mdo sde 'di dag ni/ sangs rgyas kyis gsungs pa ma yin no/ /zhes zer ba de dag skye bo rnams la'ang de ltar shes par byed do/ /de ltar skyes bu blun po bsod nams chung ba/ dge ba'i rtsa ba ma bskyed pa/ sngon gyi rgyal ba la bya ba ma byas pa/ bla na med pa'i chos rin po che yongs su spangs pas chos rin po che las phyi rol tu gyur pa de dag bsod nams chung ba nyid la bsten par 'gyur/ sgom par 'gyur/ mang du byed par 'gyur ro/ /bzang skyong / de na'ang sems can gzhan kha cig /sngon gyi rgyal ba la bya ba byas pa/ dge ba'i rtsa ba bskyed pa de dag da ltar gyi sangs rgyas mngon sum du bzhugs pa'i ting nge 'dzin 'di thos nas 'di lta ste/ rgyas par bya ba'i phyir 'dzin par 'gyur/ kun chub par byed par 'gyur/ yi ger 'bri bar 'gyur/ yi ger 'brir 'jug par 'gyur/ 'chad bar 'gyur/ klog par 'gyur/ gzhan la'ang rgya cher yang dag par 'chad par 'gyur/ lhag par dad par 'gyur/ rtog pa mang bar 'gyur/ mos pa mang bar 'gyur/ sbyod lam dang bar 'gyur/ ngo tsha shes pa dang / 'gyod pa
31a
@#/ /dang ldan par 'gyur/ bslab pa 'dod par 'gyur/ zab mo la mos par 'gyur/ shes rab dang ldan par 'gyur/ mang du thos par 'gyur/ byams pa la gnas pa dang snying rje thob par 'gyur/ de dag ting nge 'dzin 'di mnyan pa'i phyir gang la lar song ba der stong par 'gyur/ yang dag par ston par 'gyur ro/ /de 'di snyam du byang chub sems dpa'i ting nge 'dzin sangs rgyas kyis gsungs pa 'di 'dra ba 'di ci nas kyang yun ring du gnas par gyur cig /rgyas par gyur cig snyam du sems bskyed par 'gyur ro/ / bzang skyong / lha dang / mi dang / lha ma yin du bcas pa'i 'khor 'di rnams kyi mdun du khyod mos par bya'o/ /khyod kyis khong du chud par bya'o/ /rigs kyi bu'am rigs kyi bu mo gang gis stong gsum gyi stong chen po'i 'jig rten gyi khams 'di rin po che sna bdun gyis yongs su bkang ste/ de bzhin gshegs pa dgra bcom pa yang dag par rdzogs pa'i sangs rgyas la phul ba bas/ rigs kyi bu'am rigs kyi bu mo gang gis dag ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di nyan cing thos nas kyang rtog par byed/ mngon par dad par byed/ yid ches par byed la/ 'di ni/ bden pa nyid do/ /zhes mos par byed cing / sangs rgyas kyis gsungs pa yin no/ /zhes tshig tu 'ang
31b
brjod na/ rigs kyi bu 'am/ rigs kyi bu mo de'i bsod nams ches mang du 'phel bar 'gyur ro/ /de nas de'i tshe don de nyid bstan par bya ba'i phyir bcom ldan 'das kyis tshigs su bcad pa 'di dag gsungs so/ /gang gis stong gsum thams cad du/ /rin po ches ni bkang byas te/ /byang chub btsal bar bya ba'i phyir/ /'jig rten mgon la phul ba bas/ /gang gis sangs rgyas kyis bsngags pa'i/ /mdo sde ting 'dzin 'di lta bu/ thos nas mos par byed na ni/ /de yi bsod nams khyad par 'phags/ /sgyu dang gya gyu g.yo dang ldan/ /rgod cing dbang po ma bsdus la/ /sdig pa'i grogs pos zin gyur pa/ /blo ngan rnams ni dad mi 'gyur/ /tshul khrims 'chal cing sdig chos can/ /nga zhes nga rgyal dam du gnas/ /phan tshun dag nas 'dus nas kyang / /rgyal ba'i bstan la gang mos 'debs/ /mdo sde de dag chos kyi rgyal/ /sangs rgyas kyis ni ma gsungs zhes/ /ma bsngams de dag de 'dra ba'i/ /tshig dag kyang ni brjod par 'gyur/ /gang zhig ting nge 'dzin mdo 'di la/ thos nas rtogs par mi 'gyur ba/ /ma rungs chud zos mi shes shing / /lta ba ngan la dmigs can no/ /sangs rgyas kyis ni gsungs pa yi/ /mdo sde 'di 'dra 'di dag la/ /bsod nams chung zhing dmigs gnas pas/ /dad par bya ba mi nus so/ /gang zhig mdo sde 'di 'dra ba/ /thos nas dga' bar 'gyur
32a
@#/ /ba ni| |mi mchog tu ni mi 'gyur snyam/ /de la the tshom ma byed cig /gang zhig tshul khrims yongs dag cing / /lta ba'ang rtag tu drang ba dang / /chos 'di la ni gus bcas pa/ /ngas ni de la chos bshad do/ /gang gis dpa' chen 'jig rten mgon/ 'od byed pa ni mthong gyur ba/ /de dag don du bshad par byas/ /de dag kyang ni chos 'dzin shog /bzang skyong gis zhus pa'i ting nge 'dzin las lhag pa'i nga rgyal can gyi le'u ste drug pa'o// //bam po gsum pa/ bzang skyong / da ltar nga ting nge 'dzin 'di 'chad pa'i tshe gang gis nga la mnyes par byed pa de dag ni/ phyi ma'i tshe phyi ma'i dus lnga brgya pa tha ma la sdig pa'i grogs po'i lag tu song pa'am/ dge ba'i bshes dang bral ba ma gtogs par ting nge 'dzin 'di thos nas spong ba'am/ smod par 'gyur ba de ni/ gnas ma yin te/ skabs med do/ /bzang skyong / 'di na dge ba'i bshes gnyen gyi lag tu song ba las kyang skyes bu blun po kha cig ting nge 'dzin 'di thos nas mngon par dad par mi byed/ yid ches par mi byed/ mos par mi byed na/ gang dag sdig pa'i grogs po'i lag tu song ba rnams lta smos kyang ci dgos/ bzang skyong / de ci'i phyir zhe na/ mang du thos pa de ni/ de ltar sgrub par dka'o/ /sangs rgyas blta ba de ni/ de ltar rnyed par dka'o/ /bzang skyong / sangs
32b
rgyas kyis chos rnams la mos par bya ba ni/ de ltar dka'o/ bzang skyong / sangs rgyas kyi chos thams cad skyed par byed pa da ltar gyi sangs rgyas mngon su ma du bzhugs pa'i byang chub sems dpa'i ting nge 'dzin 'di'ang de ltar sgrub dka'o/ /bzang skyong / byang chub sems dpa' khyim pa'am/ rab tu byung ba gang la la zhig ting nge 'dzin 'di lta bu 'di thos nas mi skrag /mi dngang / dngang bar mi 'gyur/ gad mos mi 'debs/ 'phya bar mi byed/ sting bar mi byed/ spong bar mi byed pa'i steng du thos nas kyang rjes su yi rang bar byed/ mngon par dad par byed/ yid ches par byed/ 'dun par byed cing ting nge 'dzin 'di bstan pa dang / gzung ba dang / kun chub par bya ba dang / bcang ba dang / bklag pa dang / yi ger bri ba dang / bshad pa dang / bsgom pa'i phyir 'dod pa skyed pa ni| bzang skyong / rigs kyi bu'am/ rigs kyi bu mo de lta bu de dag thams cad de bzhin gshegs pas gzigs so/ /de dag ni/ de bzhin gshegs pas mkhyen to/ /bzang skyong / skyes bu dam pa de lta bu de dag ji ltar de bzhin gshegs pas gzigs shing ji ltar de bzhin gshegs bas mkhyen ce na/ gang dag ting nge 'dzin 'di 'dzin par 'gyur ba dang / kun chub par byed par 'gyur ba dang / 'chang bar 'gyur ba dang / klog par 'gyur ba dang / yi ger 'bri bar 'gyur ba dang / ston par 'gyur ba dang / sgom par 'gyur ba'i skyes bu dam pa de lta bu de dag ni/ bzang skyong /
33a
@#/ /tshul khrims 'chal bar mi 'gyur/ dad pa med par mi 'gyur/ chos mi 'dod par mi 'gyur/ log par lta bar mi 'gyur/ dmigs pa la mngon par zhen par mi 'gyur gyi/ bzang skyong / rigs kyi bu'am/ rigs kyi bu mo de lta bu de dag ni/ dad pa can du 'gyur ro/ /'di lta ste/ chos 'di lta bu 'di dag len par byed pa'i rigs kyi bu dang / rigs kyi bu mo de lta bu de dag ni/ rtog pa mang ba dang / mos pa mang ba dang / yid ches pa dang / chos 'dod pa dang / zab mo la mos pa rnams su 'gyur ro/ /bzang skyong / rigs kyi bu'am| rigs kyi bu mo de lta bu de dag ni/ bsod nams chung ba dang / dge ba'i rtsa ba chung bar mi 'gyur gyi/ bzang skyong / rigs kyi bu'am/ rigs kyi bu mo de lta bu de dag ni/ sngon gyi rgyal ba la bya ba byas shing / dge ba'i rtsa ba rnams 'bar ba yin no/ /bzang skyong / rigs kyi bu'am/ rigs kyi bu mo de lta bu de dag ni/ sangs rgyas gcig la bsnyen bkur byas pa ma yin| sangs rgyas gcig dang / gnyis dang / gsum la dge pa'i rtsa pa bskyed pa ma yin gyi/ bzang skyong / rigs kyi bu/ de lta bu de dag ni/ sangs rgyas brgya la bsnyen bkur byas par 'gyur ro/ /rigs kyi bu de lta bu de dag ni/ sangs rgyas brgya la dge ba'i rtsa ba bskyed par 'gyur ro/ /de bzhin gshegs pa de dag las rigs kyi bu'am rigs kyi bu mo de dag gis ting
33b
nge 'dzin 'di thos shing rjes su yi rang ba dang / mos par 'gyur ro/ /de dag phyi ma'i dus kyi tshe lnga brgya pa tha ma la'ang ting nge 'dzin 'di thos nas mi spong bar 'gyur ba'i steng du thos nas kyang rjes su yi rang bar 'gyur/ legs so/ /zhes bya ba 'bul bar 'gyur/ 'chang bar 'gyur/ klog par 'gyur/ lung nod par 'gyur/ 'chad par 'gyur/ sgom pa'i sbyor ba la brtson par 'gyur ro/ / bzang skyong / rigs kyi bu'am/ rigs kyi bu mo gang la la da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di thos nas mi skrag mi dngang dngang bar mi 'gyur zhing / mi spong ba'i steng du thos nas kyang rjes su yi rang bar byed/ mngon par dang bar byed/ mngon par yid ches par byed/ mos par byed/ legs so/ /zhes bya ba 'bul bar byed cing / thos nas kyang 'dzin par byed/ kun chub par byed/ 'chang bar byed/ klog par byed/ yi ger 'bri bar byed/ yi ger 'brir 'jug par byed/ ston par byed cing tha na nyin zhag 'ga' yang ting nge 'dzin 'di bsgom pa'i phyir sgom pa'i sbyor ba la rjes su brtson par byed na/ bzang skyong / rigs kyi bu'am rigs kyi bu mo de dag de'i gzhi las bsod nams mang po skyed par 'gyur ro/ / bsod nams kyi phung po tshad med pa dang / grangs med pa bskyed par 'gyur ro/ /rigs kyi bu dang / rigs kyi bu mo de dag ni/ bla na med pa yang dag par rdzogs pa'i byang chub las phyir mi ldog par
34a
@#/ /'gyur ro/ /bsam pa bzhin du yongs su rdzogs pa'ang 'thob par 'gyur ro/ /bzang skyong / 'on kyang yang don de nyid lhag par yongs su rdzogs par bya ba'i phyir khyod la dpe bstan to/ /bzang skyong / 'di lta ste/ dper na/ mi la la zhig byung bas stong gsum gyi stong chen po'i 'jig rten gyi khams 'di'ang rdul phra rab kyi rdul du blags/ gang stong gsum gyi stong chen po'i 'jig rten gyi khams 'di'i rtswa dang / yal ga dang / lo ma dang / 'dab ma tha na sor bzhi tsam pa de dag thams cad kyang rdul phra rab kyi rdul du blags la/ de nas mi des de las rdul phra rab kyi rdul gcig blangs te rdul phra rab kyi rdul de dag thams cad ji snyed yod pa de snyed kyi char bcad de/ tshul de lta bur rdul phra rab kyi rdul de dag thams cad cha de snyed du bcad na/ bzang skyong / khyod ji snyam du sems/ rdul phra rab kyi rdul mang ba yin nam/ byang chub sems dpa' bzang skyong gis gsol pa/ btsun pa bcom ldan 'das/ mang lags so/ /btsun pa bde bar gshegs pa/ mang lags so/ /bcom ldan 'das kyis bka' stsal pa/ bzang skyong / rigs kyi bu'am rigs kyi bu mo gang la la zhig gis rdul phra rab kyi rdul de dag gi cha ji snyed yod pa de snyed kyi sangs rgyas kyi zhing rnams rin po che sna bdun gyis yongs su bkang ste de bzhin gshegs pa dgra bcom pa yang
34b
dag par rdzogs pa'i sangs rgyas rnams la dbul bar phul na/ gzhi de las bsod nams mang du skyed dam/ gsol pa/ btsun pa bcom ldan 'das/ mang lags so/ /btsun pa bde bar gshegs pa/ mang lags so/ /bcom ldan 'das kyis bka' stsal pa/ bzang skyong / khyod mos par bya'o/ /khyod kyis khong du chud par bya'o/ /bzang skyong / yang rigs kyi bu'am/ rigs kyi bu mo gang gis de snyed kyi sangs rgyas kyi zhing rin po che sna bdun gyis yongs su bkang ste de bzhin gshegs pa la dbul bar phul ba bas/ bzang skyong / rigs kyi bu'am/ rigs kyi bu mo gang gis da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di thos nas rtog par byed/ mngon par dad par byed/ yid ches par byed/ mos par byed la brtags shing mngon par dad de yid ches shing mos par byas nas kyang 'dzin par byed/ kun chub par byed/ 'chang par byed/ klog par byed/ yi ge 'bri bar byed cing gzhan dag la'ang rgya cher 'chad par byed/ ston par byed/ yang dag par 'chad par byed na/ dge ba'i rtsa ba snga ma bas rigs kyi bu'am ma rigs kyi bu mo de'i bsod nams kyi phung po ches mang du skyed na/ gang zhig tha na ba 'jos tsam zhig sgom pa'i sbyor ba la brtson par gnas pa lta ci smos/ bzang skyong / gang zhig ting nge 'dzin 'di thos nas 'dzin par 'gyur/
35a
@#/ /kun chub par byed par 'gyur/ 'chang par 'gyur/ klog par '+r+g+yur/ yi ger 'bri bar 'gyur zhing / gzhan dag la'ang rga cher go bar byed/ ston par byed| yang dag par 'chad par byed pa'i rigs kyi bu'am/ rigs kyi bu mo de dag gi bsod nams kyi phung po de'i tshad kyang nga mi smra na/ bzang skyong / rigs kyi bu'am/ rigs kyi bu mo gang ting nge 'dzin 'di bsgrubs te de bzhin nyid du slob cing / de bzhin nyid du nan tan byed pa lta ci smos/ de nas de'i tshe bcom ldan 'das kyis tshigs su bcad pa 'di dag gsungs so/ / stong chen po yi 'jig rten khams 'di dag /rin chen bkang ste sbyin pa byin pa ni/ /de yi 'bras bu chung bar nga smra'o/ /gang gis chos 'di 'dra ba thos pa dang / /bsod nams mang 'dod byang chub sems dpa' gang / /ting 'dzin 'di ni 'chang zhing klog byed la/ /thos nas snyom pa med par ston pa ni/ /bsod nams phung po mtha' med ldan par 'gyur/ /gang gis 'jig rten khams 'di rdul phran ltar/ /bcad cing gshegs ste rdul du byas gyur pa/ /de snyed kyi ni 'jig rten khams kyi rnams/ /rin chen bkang ste sbyin pa byin pa bas/ / gang gis ting 'dzin sangs rgyas rnams kyis gnang / /bde gshegs bsngags pa 'di la tshig bzhi pa'i/ /tshigs bcad 'ga' zhig kun tu chub byed na/ /de yi bsod nams dpe
35b
yod mi 'gyur na/ /gang zhig skad cig tsam mam ba 'jos tsam/ kun chub byed dam 'dzin dang klog pa lta/ /smos kyang mi dgos de yi steng du yang / /de yi bsod nams la ni tshad mi rnyed/ / sems can thams cad bde bar gshegs gyur to/ /ye shes rnam dag don dam thugs su chud/ /de dag bskal pa bye bar mang ngam/ /de bas tshigs bcad gcig bshad bsod nams 'phags| /de srid bar du chos mang byed ba rnams/ /bstan nas de dag mya ngan 'das pa bas/ /ting 'dzin 'di las tshigs bcad gang 'dzin pa/ /de yi bsod nams tshad gzung sla ba min/ /ji tsam rgya che 'jig rten khams yod pa/ /phyogs bzhi dang ni 'og dang de bzhin steng / /rin chen bkang ste bsod nams 'dod pa'i phyir/ /'jig rten mkhyen la dbul bar phul bas ni/ /gang zhig ting 'dzin zhi ba rdul med 'di/ /rab tu bsgoms shing gzhan la ston byed ba'i/ /bsod nams de la 'jig rten khams yangs pas/ /de yi cha dang dper yang mi 'gyur ro/ /gang zhig ting 'dzin zhi ba 'di sgom pa/ /de ni nam yang yid gnyis the tshom med/ /de la nam yang log ltung 'jigs pa med/ /de ni chos la'ang nem nur mi 'byung ngo / /sangs rgyas bshad pa'i ting 'dzin 'di bsgoms pas/ /de ni nga la'ang bsnyen bkur byas par 'gyur/ /bsod nams rgya che bas ma mi khyab pa'ang gzung / byang chub sems dpa' thos pas 'phags par 'gyur/ /gang zhig phyi dus
36a
@#/ /'jigs byed chen po'i tshe/ /ting 'dzin 'di ni thos nas 'dzin byed pa/ /de ni nga dang 'das pa'i sangs rgyas sam/ /ma byon dag la'ang bsnyen bkur byas par 'gyur/ mos par bya zhing khong du chud par bya/ /bag yod pa las brtson 'grus brtsam par byos/ /dga' ba'i sems kyis brtan pa sbyor ba byos/ /ting 'dzin 'di ni rnyed par dka' mi 'gyur/ / ting 'dzin 'di ni yongs su 'dri byed na/ /des ni rgyal ba brgya yang mnyes par byas/ /gang zhig phyi dus 'jigs byed chen po'i tshe/ /ting 'dzin thos nas mngon par dang byed pa/ /des ni nga dang dge slong 'di dag dang / /khyim bdag bzang skyong khyod kyang mthong ba yin/ /gang zhig ting 'dzin zhi ba 'phags pa 'di/ /dang ba'i sems kyis gzhan la rjod byed cing / /ting 'dzin chen po 'di ni thob gyur na/ /byang chub sems dpa' mang du thos zhes bya/ /'di ni sangs rgyas kun gyis mthun par bsngags/ /thos kun sangs rgyas byang chub tu yang bskyed/ /sangs rgyas kyis gnang mkhas pas bsngags pa yi/ /ting 'dzin 'di ni shin tu goms byas na/ /ji ltar gnang zhing bde gshegs kyis bsngags pa'i/ /thos pa'i rigs ni rab tu thos par 'gyur/ /bzang skyong gis zhus pa'i ting nge 'dzin gyi le'u ste bdun pa'o// //bzang skyong / de la byang chub sems dpa' sems dpa' chen po'i ting nge 'dzin 'di ji ltar bsgom par bya zhe na
36b
bzang skyong / 'di lta ste/ dper na/ nga da ltar khyod kyi mdun na 'dug cing chos ston pa de bzhin du bzang skyong / byang chub sems dpas de bzhin gshegs pa dgra bcom pa yang dag par rdzogs pa'i sangs rgyas de dag sangs rgyas kyi gdan la bzhugs shing chos ston par yang yid la bya'o/ /des rnam pa thams cad kyi mchog dang ldan pa/ gzugs bzang ba/ mdzes pa/ blta na sdug pa/ sku yongs su grub pa dang ldan par de bzhin gshegs pa rnams yid la bya'o/ /de bzhin gshegs pa dgra bcom pa yang dag par rdzogs pa'i sangs rgyas kyi skyes bu chen po'i mtshan re re'ang bsod nams brgyas bskyed par blta'o/ /mtshan ma rnams kyang gzung bar bya'o/ /spyi gtsug bltar mi mthong ba'ang yongs su zhu bar bya'o/ /zhus nas kyang skyes bu chen po'i mtshan rnams kyi mtshan ma rnams kyang gzung bar bya'o/ /bzung nas kyang 'di ltar bslab par bya ste/ a la la de bzhin gshegs pa dgra bcom pa yang dag par rdzogs pa'i sangs rgyas de dag mdzes pa ni/ ngo mtshar te/ bdag kyang ma 'ongs pa'i dus na lus yongs su grub pa 'di lta bu dang ldan par 'gyur ro/ /mtshan 'di lta bu dag yongs su rdzogs par 'gyur ro/ /bdag kyang tshul khrims 'di lta bu dang ldan par 'gyur ro/ /de bzhin du ting nge 'dzin dang / de bzhin du shes rab dang / de bzhin du rnam par grol ba dang / de bzhin du rnam par grol ba'i ye shes mthong ba dang ldan par 'gyur ro/ /bdag kyang de bzhin du bla na med pa yang
37a
@#/ /dag par rdzogs pa'i byang chub tu mngon par rdzogs par 'tshang rgya bar 'gyur ro/ /mngon par rdzogs par sangs rgyas nas kyang 'khor bzhi dang / lha dang bcas pa'i 'jig rten la chos 'chad par 'gyur ro/ /snyam du bslab par bya'o/ /des de ltar rnam pa thams cad kyi mchog dang ldan par yid la byas nas yang 'di ltar bslab par bya ste/ nga zhes bya ba'i chos de ni| gang yin/ nga'i zhes bya ba'i chos de'ang gang yin/ byang chub de'ang gang yin/ byang chub mngon par rdzogs par 'tshang rgya ba de'ang su yin/ ci lus kyis byang chub mngon par rdzogs par 'tshang rgya'am/ 'on te sems kyis byang chub mngon par rdzogs par 'tshang rgya/ gal te lus kyis byang chub mngon par rdzogs par 'tshang rgya zhes byar ni/ lus ni/ bem po/ /g.yo ba med pa/ byed pa med pa| sems pa med pa/ rtswa dang / shing dang / rdo dang / rtsig pa dang / mig yor dang 'dra ba yin la/ byang chub ni/ gzugs med pa/ bstan du med pa/ mi snang ba/ rnam par rig par byed pa ma yin na| bem po/ /g.yo ba med pa/ byed pa med pa/ sems pa med pa'i lus kyis gzugs med pa/ bstan du med pa/ mi snang ba/ rnam par rig par mi byed pa'i byang chub mngon par rdzogs par 'tshang rgya bar ji ltar 'gyur/ ci ste sems kyis byang chub mngon par rdzogs par 'tshang rgya zhes byar ni/ sems ni/ gzugs med pa/ bstan du med pa/ mi snang ba/ rnam par rig par byed
37b
pa ma yin pa/ sgyu ma lta bu yin la /byang chub ni/ gzugs med pa/ bstan du med pa/ mi snang ba/ rnam par rig par byed pa ma yin na/ gzugs med pa/ bstan du med pa/ mi snang ba/ rnam par rig par byed pa ma yin pa/ sgyu ma lta bu'i sems kyis gzugs med pa/ bstan du med pa/ mi snang ba/ rnam par rig par byed pa ma yin pa'i byang chub mngon par rdzogs par 'tshang rgya bar ji ltar 'gyur snyam du bslab par bya'o/ /bzang skyong / de la byang chub sems dpas 'di ltar bslab par bya ste/ lus kyis byang chub mngon par rdzogs par 'tshang mi rgya'o/ /sems kyis byang chub mngon par rdzogs par 'tshang mi rgya'o/ /sems kyis sems med pa'ang byang chub mngon par rdzogs par 'tshang mi rgya'o/ /gzugs kyis gzugs med pa'ang byang chub mngon par rdzogs par 'tshang mi rgya'o/ /sems kyis sems kyang byang chub mngon par rdzogs par 'tshang mi rgya'o/ /gzugs kyis gzugs kyang byang chub mngon par rdzogs par 'tshang mi rgya'o/ /snyam du bslab par bya'o/ /bzang skyong / de ci'i phyir zhe na/ de bzhin gshegs pa'i sku ni/ mthar 'dzin pa thams cad rnam par spangs pa ste/ des na de bzhin gshegs pa lus la lus kyi rjes su gzigs shing spyod do/ /sems la sems kyi rjes su gzigs shing spyod do/ /bzang skyong / shes rab gang chos thams cad rab tu shes par byed pa'i shes rab gzugs med pa/ bstan du med pa/ mi snang ba/ rnam par rig par byed pa ma yin pa/ zag pa med
38a
@#/ /pa de'ang mngon par rdzogs par 'tshang rgya bar yang mi 'gyur ro/ /mngon par rdzogs par 'tshang mi rgya bar yang mi 'gyur ro/ /de ci'i phyir zhe na/ 'di ltar de bzhin gshegs pa rnams kyi sku zag pa med pa/ de bzhin gshegs pa rnams kyi thugs zag pa med pa/ de bzhin gshegs pa dgra bcom pa yang dag par rdzogs pa'i sangs rgyas rnams kyi gzugs kyang zag pa med pa/ de bzhin gshegs pa dgra bcom pa yang dag par rdzogs pa'i sangs rgyas rnams kyi tshor ba dang / 'du shes dang / 'du byed dang / rnam par shes pa rnams kyang zag pa med pa yin na/ de bzhin gshegs pa dgra bcom pa yang dag par rdzogs pa'i sangs rgyas rnams kyi tshul khrims sam/ ting nge 'dzin tam/ shes rab bam/ rnam par grol ba'am/ rnam par grol ba'i ye shes mthong ba zag pa med pa yin pa lta smos kyang ci dgos/ bzang skyong / de bzhin gshegs pa dgra bcom pa yang dag par rdzogs pa'i sangs rgyas rnams kyi chos thams cad kyang zag pa med pa'o/ /de bzhin gshegs pa dgra bcom pa yang dag par rdzogs pa'i sangs rgyas rnams kyis dam pa'i chos gang bshad pa'am/ 'chad pa'am/ 'chad par 'gyur ba'i chos de'ang zag pa med pa ste/ byis pa mi mkhas pa rnams kyis mi shes kyi/ mkhas pa rnams kyis yang dag par rtogs so/ /bzang skyong / de'i tshe na byang chub sems dpas 'di ltar bslab par bya
38b
ste| ci lus kyis byang chub mngon par 'tshang rgya'am/ 'on te shes rab kyis byang chub mngon par rdzogs par 'tshang rgya par 'gyur snyam du bslab par bya'o/ /bzang skyong / de la byang chub sems dpa' sems dpa' chen pos 'di ltar lus kyis kyang byang chub mngon par rdzogs par 'tshang mi rgya/ shes rab kyis kyang ma yin no/ /snyam du bslab par bya'o/ /de ci'i phyir zhe na/ shes rab de ni| zag pa med cing rnam pa thams cad du yongs su btsal kyang mi dmigs te/ de de'i rgyus byang chub btsal ba la btang snyoms su 'gyur ro/ /de ci'i phyir zhe na/ byang chub de 'ang zag pa med cing rnam pa thams cad du yongs su btsal kyang mi dmigs so/ /des rang gis lus dang / rang gis sems yongs su btsal kyang mi dmigs so/ /des de ltar chos thams cad yongs su btsal kyang mi dmigs so/ /su zhig byang chub mngon par rdzogs par 'tshang rgya zhes kyang mi dmigs so/ /gang gis byang chub mngon par 'tshang rgya zhes kyang mi dmigs so/ /ci zhig byang chub mngon par rdzogs par 'tshang rgya bar bya zhes kyang mi dmigs shing mi mthong ngo / /de chos thams cad la de ltar rnam par lta ba na yang dag par mi mthong ngo / /de chos thams cad rang bzhin gyis zhi bar yang dag par rjes su mi mthong yang de dag rang bzhin gyis zhi ba ni/ ma yin no/ /de ci'i phyir zhe na/ gang ma skyes pa de ni/ ma zhi ba'i phyir ro/ /de ma zhi ba'i chos thams cad la zhi ba'i chos rnams su rtog go /zhi ba'i
39a
@#/ /chos thams cad la zhi ba dang bral bar rtog go /des de ltar brtags nas chos rnams zhi ba zhes kyang brtag par mi bya'o/ /ma zhi bar yang brtag par mi bya'o/ / bzang skyong / de ci'i phyir zhe na/ chos thams cad ni/ ma skyes pa dang / yongs su ma grub pa'i phyir ro/ /bzang skyong / 'di lta ste/ dper na/ skyes bu la la zhig me ma bus ma 'bar bar 'di skad du bdag gis me 'di zhi bar bya'o/ /zhes zer na/ bzang skyong / de ji snyam du sems/ skyes bu de yang dag par smra bas smra ba yin nam/ bzang skyong gis gsol pa/ btsun pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ bzang skyong / de bzhin te/ chos thams cad mi dmigs pa'i phyir ro/ /gang zhig 'di skad du 'jig rten gyi kun rdzob ma gtogs par nga ni/ chos thams cad yongs su shes par 'gyur ro/ /nga ni/ chos thams cad spong bar 'gyur ro/ /nga ni/ chos thams cad mngon sum du byed par 'gyur ro/ /nga ni/ chos thams cad sgom par 'gyur ro/ /nga ni/ chos thams cad zhi bar byed par 'gyur ro/ /nga ni/ chos thams cad thob par 'gyur ro/ /nga ni/ rgyun du zhugs pa'i 'bras bu thob par 'gyur ro/ /nga ni/ lan gcig phyir 'ong ba'i 'bras bu thob par 'gyur ro/ /nga ni/ phyir mi 'ong ba'i 'bras bu thob par 'gyur ro/ /nga ni/ dgra bcom pa nyid thob par
39b
'gyur ro/ /nga ni/ rang byang chub thob par 'gyur ro/ /nga ni/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /nga ni/ bla na med pa yang dag par rdzogs pa'i byang chub mngon par rdzogs par sangs rgyas nas chos ston par 'gyur ro/ /nga ni/ sems can rnams 'khor pa las yongs su thar par byed par 'gyur ro/ /zhes zer na/ de yang dag pas smra bas smra ba yin nam/ bzang skyong gis gsol pa/ btsun pa bcom ldan 'das/ de ni/ ma lags so/ /bcom ldan 'das kyis bka' stsal pa/ bzang skyong / de lta bas na/ rigs kyi bu'am/ rigs kyi bu mo dag yang dag par rdzogs pa'i byang chub 'dod pa dang / rigs kyi bu'am/ rigs kyi bu mo rang byang chub 'dod pa dang / dgra bcom pa nyid 'dod pas chos de dag la de ltar brtag par bya'o/ /chos de dag la de ltar brtags nas chos rnams zhi ba zhes brtag par mi bya'o/ /chos rnams ma zhi ba zhes kyang brtag par mi bya'o/ /bzang skyong / de ci'i phyir zhe na/ 'di ltar gang la la zhig ci'ang med cing ma skyes te/ yongs su ma grub pa'i chos thams cad la chos thams cad zhi ba'o/ /zhes rtog na/ 'di ni/ mtha' gcig go /chos thams cad ma zhi ba'o/ /zhes rtog na/ 'di ni/ mtha' gnyis pa'o/ /bzang skyong / gang zhi ba dang / ma zhi ba'i mtha' 'di gnyis mi dmigs pa dang / mi rtog pa dang / rnam par mi sgrub pa dang / yid la mi byed pa dang / kun tu mi spyod pa 'di ni/ bgrang
40a
@#/ /ba'i tshul du 'jig rten gyi kun rdzob kyi bstan pas dbu ma'i lam zhes bya ste/ don dam par ni/ 'di la mtha' dang / dbus dmigs su med do/ /bzang skyong / de ci'i phyir na| 'di ltar chos de thams cad ni/ nam mkha' dang 'dra ba mya ngan las 'das pa dang mnyam pa ste/ de dag ni/ chad pa med pa/ ma zhig pa/ mi rtag pa/ ther zug tu gnas pa ma yin pa/ yul na mi gnas pa/ phyogs na mi gnas pa/ mtshan ma med pa/ grangs med pa ste/ mkhas pa rnams kyis kyang de la grangs kyis nye bar mi 'gro zhing mi dmigs pas na/ chos thams cad ni/ grangs med pa zhes bya'o/ /bzang skyong / de ltar byang chub sems dpas de bzhin gshegs pa dgra bcom pa yang dag par rdzogs pa'i sangs rgyas de dag mthong nas mngon par zhen par mi bya'o/ /de ci'i phyir zhe na/ bzang skyong / chos thams cad ni/ mngon par zhen par bya ba ma yin zhing / de dag la ni/ mngon par zhen pa med pa ste/ rtsa ba chad pa dang / rtsa ba dang bral ba/ rten pa med pa zhes bya'o| |bzang skyong / byang chub sems dpas da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di ci nas kyang sangs rgyas bcom ldan 'das de dag mthong na/ mchog tu 'dzin ba med cing mi dmigs pa dang / log par 'dzin pa med pa de ltar bsgom par bya'o/ /de ci'i phyir zhe na/ bzang skyong / chos thams cad ni/ gzung ba med pa ste/ shin
40b
tu zhi ba nam mkha' dang 'dra ba mya ngan las 'das pa dang mnyam pa'o/ /zhes de bzhin gshegs pas bka' stsal ba'i phyir ro/ /bzang skyong / 'di lta ste/ dper na/ gser gyi gar bu shin tu bsregs pa/ shin tu btsos pa/ lcags kyi thu lum dang 'dra ba ni/ mkhas pa rnams kyis 'dzin par mi byed do/ /bzang skyong / de ci'i phyir zhe na/ 'di ltar de ni/ tsha ba'i bdag nyid de/ bzang skyong / de ni/ rin po che'i mchog gser yin mod kyi/ 'on kyang bzang skyong / 'di lta ste/ shin tu tsha ba'i phyir 'dzin par mi byed do/ /bzang skyong / de bzhin du byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas de dag mthong na/ mngon par zhen par mi bya'o/ /gzugs dang / tshor ba dang / 'du shes dang / 'du byed dang / rnam par shes pa rnams su'ang mngon par zhen par mi bya'o/ /tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong bar yang mngon par zhen par mi bya'o/ /sangs rgyas kyi chos thams cad du'ang mngon par zhen par mi bya'o/ /rnam pa thams cad du'ang mngon par zhen par mi bya'o/ /bzang skyong / de ci'i phyir zhe na/ 'di ltar mngon par zhen pa ni/ 'khor ba'i bdag nyid can sdug bsngal gyi chos thams cad skyed pa'o/ /bzang skyong / 'on kyang byang chub sems dpa' sems dpa' chen pos de bzhin gshegs pa dgra bcom
41a
@#/ /pa yang dag par rdzogs pa'i sangs rgyas de dag mthong na/ 'di ltar yon tan gyi chos rmad du byung ba dang ldan pa'i de bzhin gshegs pa dgra bcom pa yang dag par rdzogs pa'i sangs rgyas rnams kyis 'di lta ste/ ye shes chen po dang / sangs rgyas kyi ye shes dang / de bzhin gshegs pa'i ye shes dang / rang byung gi ye shes dang / mi mnyam pa dang mnyam pa'i ye shes dang / 'jig rten gsum po thams cad las khyad par du 'phags pa'i ye shes ni/ ngo mtshar che'o/ /zhes de ltar yon tan gyi chos khyad par du 'phags pa la 'dod par bya'o/ /byang chub sems dpa' sems dpa' chen pos 'di la 'dod par bya'i ye shes de la mngon par zhen par mi bya'o/ /bzang skyong / byang chub sems dpa' sems dpa' chen pos ting nge 'dzin 'di la'ang mngon par zhen par mi bya'o/ /de ci'i phyir zhe na/ bzang skyong / chos 'di dag ni/ mngon par zhen pa med pa rnams kyi mngon sum du 'gyur ro/ /de nas bcom ldan 'das kyis de'i tshe tshigs su bcad pa 'di dag gsungs so/ /me long phyis pa'am 'bru mar snod dag la/ /bud med brgyan pas bzhin ni bltas byas te/ /de la de ni 'dod chags skyes gyur nas/ /'dod pa tshol zhing kun tu rgyug par byed/ /med pa'i chos la bud med phyin ci log /mi bzad gdungs shing 'dod pas gzir gyur pa/ /bud med rang gi lus las bslus gyur
41b
pa| |chos 'di rnams ni gsog tu mi shes ltar/ /byang chub 'tshang rgya bdud rtsi rig 'gyur zhing / /sdug bsngal gzir ba'i sems can dgro la 'gyur snyam/ /byang chub sems dpa' sems ni de bzhin te| |mi shes pas ni sems can zhes kyang bya/ /don dam la ni gang zhig skye 'chi dang / /mya ngan 'das pa'i sems can 'ga' mi dmigs/ /chos rnams gzung med nam mkha'i zla ba 'dra/ / byang chub btsal kyang rnyed par mi 'gyur te/ /gzugs brnyan lta bu nam mkha'i zla ba 'dra/ /sgyu ma lta bu stong pa smig rgyu 'dra/ /chos rnams dngos po med cing rang bzhin stong / /de la byis ba rtag tu yod 'du shes/ /'di la mi ni nyon mongs 'ga' med par/ /byang chub mkhas pa gang gis shes gyur cing / /'jig rten 'khrul par don dam shes gyur na/ /de ni 'jig rten gtso bo sangs rgyas 'gyur/ /sangs rgyas byang chub sems kyis brtags pa yin/ /sems kyang rnam dag rang bzhin 'od gsal zhing / /rnyog med 'gro ba kun dang ma 'dres par/ /gang gis shes pa byang chub mchog 'tshang rgya/ /chos kun zag pa med cing gzugs med la/ /dben zhing stong par rnam par mi rtog pa/ /'dod chags bral zhing sems ni rnam grol te/ /gang gis shes pas ting 'dzin 'di thob bo/ /rgyal ba'i sku la dmigs par byas nas su/ /rang bzhin rnam dag chos ni ma nyan par byos/ /sgom dang rnam sgom cung zad 'dir ma byed/ /ting 'dzin 'di ni rnyed par dka'
42a
@#/ /mi 'gyur/ /nam mkha'i 'du shes la ni gnas byas na/ /phra rab rdul gyi 'du shes 'gag par 'gyur/ /rtog pa med cing ma byas zhig med par| /gang gis shes pas ting 'dzin 'di thob bo/ /gzugs kun rtog pa med par shes byas nas/ /mig gis gang du bltas kyang mi chags shing / /'jig rten 'dir ni ji ltar nyi ma bdun shar pa/ /de ltar des ni sangs rgyas mthong bar 'gyur/ /mig kyang rnam dag rna ba'ang yongs dag cing / /brtson 'grus brtsams la dran ldan shes bzhin gyis/ /ting 'dzin 'di ni legs par bsgoms byas te| |mang du thos pa bsam gyis mi khyab 'dzin/ /mi mthong ting 'dzin de ni gang yin dang / /sems can kun gyi ting 'dzin gang yin de/ /gang gis mi mthong gang gis rnam mi mthong / / 'dir ni mu stegs mang po gzhan brlag 'gyur/ /mtshan ma'i 'du shes dag ni bsal byas na/ /de ni sems kyang rnam dag sangs rgyas mthong / /mthong bar gyur nas phyir yang mi mthong ba// de ni 'jig rten du'ang gtso bo sangs rgyas 'gyur/ /de yi mdun na sa med chu yang med/ /me yang med cing rlung med nam mkha'ang med/ /des kyang sangs rgyas rnams ni bzhugs gyur cing / / dam pa'i chos 'chad pa ni dmigs par 'gyur/ /ji ltar nga ni chos 'chad 'dug pa la/ /gang dag chos 'dod pa rnams lta ba bzhin/ /sangs rgyas de bzhin chos mchog ma gtogs par/ /de la
42b
dmigs pa gzhan ni mi 'byung ngo / /de lta bu dang ldan pa dag la ni/ /ting 'dzin rdul bral 'di ni legs bzung ba'i/ /sangs rgyas mang po 'chad pa ma gtogs par/ /nyan ston gzhan ni gang yang mi dmigs so/ /gang zhig ting 'dzin zhi ba 'phags pa 'di/ /ma bshad pa dang 'chad par mi 'gyur ba'i/ /sangs rgyas sngar 'das gang yang ma byung zhing / /ma byon pa yang gang yang mi bzhugs so| |srog chags dag la phan phyir 'jig rten du/ /da ltar mi yi mchog tu nga byung ba'ang / /sangs rgyas 'dren 'di rjes su dran gyur te/ /ting 'dzin zhi ba blta dka' 'di 'chad do/ /lus dang de bzhin srog la mi lta zhing / /sangs rgyas yon tan rnams ni tshol 'dod pas/ /ting 'dzin 'di la gnas par byas nas ni/ /sangs rgyas byang chub rnyed par mi dka' 'o/ /rang bzhin gcig pa'i mi mchog mang po dag /mkhas pa gang gis mthong na zhu 'dod pa/ /des ni rings shing rings par myur tshul du/ /rdul med dag pa'i ting 'dzin bsgom par bya/ /gang zhig sems can dag la phan phyir zhugs/ /thos mang rgya che bsam gyis mi khyab tshol/ /des ni rings shing rings par myur tshol du/ /rdul med dag pa'i 'jig rten bsgom par bya/ /'di la 'dod chags med cing zhe sdang med| |'di la gti mug med cing phrag dog med/ /'di la shes dang mi shes pa'ang med/ /de bas ting 'dzin zhi ba 'di shes byos/ /bzang skyong gis zhus pa'i ting nge 'dzin gyi le'u ste brgyad
43a
@#/ /pa'o|| ||de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to| |btsun pa bcom ldan 'das/ 'di ltar ting nge 'dzin zab mo 'di bcom ldan 'das kyis bshad pa ngo mtshar to/ /btsun pa bcom ldan 'das/ byang chub sems dpa' sems dpa' chen po khyim gyi gnas nas mngon par byung ba rnams ting nge 'dzin 'di thos nas lung nod pa'am/ sgom par 'tshal na/ bcom ldan 'das/ byang chub sems dpa' des chos gang dag la gnas te ting nge 'dzin 'di ngud mnod par bgyi/ bsgom par bgyi/ de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / byang chub sems dpa' khyim gyi gnas nas mngon par byung ba'i ting nge 'dzin 'di thos nas lung nod pa'am/ sgom par 'dod pa des tshul khrims yongs su dag par bya'o/ /tshul khrims la skyon med par bya'o/ /byang chub sems dpa' bzang skyong gis gsol pa/ btsun pa bcom ldan 'das/ ji ltar na/ byang chub sems dpa' khyim gyi gnas nas mngon par byung ba tshul khrims yongs su dag pa dang / tshul khrims la skyon ma mchis pa lags/ bcom ldan 'das kyis bka' stsal pa/
43b
bzang skyong / byang chub sems dpa' khyim gyi gnas nas mngon par byung ba gang ting nge 'dzin 'di thos nas lung nod pa'am/ sgom par 'dod pa'i byang chub sems dpa' des so sor thar pa'i sdom pas bsdam par bya'o/ /cho ga dang spyod yul phun sum tshogs pa dang / kha na ma tho ba chung rab la'ang 'jigs par lta ba dang / spyod lam yongs su dag par bya'o/ /yang dag par blangs te bslab pa'i gzhi rnams la bslab par bya'o/ /zab mo la mos pa dang / dmigs su med pa la bzod par bya'o/ /stong pa nyid dang / mtshan ma med pa dang / smon pa med pa'i chos thos nas mi skrag par bya'o/ /mi dngang bar bya'o/ /dngang bar mi 'gyur bar bya'o/ /bzang skyong / de ltar na/ byang chub sems dpa' khyim gyi gnas nas mngon par byung ba tshul khrims yongs su dag pa dang / tshul khrims la skyon med pa yin no/ /byang chub sems dpa' bzang skyong gis gsol pa/ btsun pa bcom ldan 'das/ ji ltar na/ byang chub sems dpa' khyim gyi gnas nas mngon par byung ba tshul khrims yongs su ma dag pa dang / tshul khrims la skyon ma mchis pa lags/ bcom ldan 'das kyis bka' stsal pa/ bzang skyong / byang chub sems dpa' khyim gyi gnas nas mngon par byung ba gang la la gzugs la gnas te tshangs bar spyad pa spyod pa dang / tshor ba dang / 'du shes dang / 'du byed dang / rnam par shes pa la gnas te
44a
@#/ /tshangs par spyad pa spyod cing / bdag gi tshul khrims dang / dka' thub dang tshangs par spyod pa 'dis lha'am lha la la zhig tu gyur cig/ ces zer ba 'di ni/ bzang skyong / byang chub sems dpa' khyim gyi gnas nas mngon par byung ba'i tshul khrims yongs su ma dag pa yin/ tshul khrims la skyon yod pa yin/ 'di lta ste/ srid pa'i 'du shes mchog tu bzung nas de 'dod pa la bsten par 'dod cing srid par skye ba'i gnas gzung bar 'dod pas tshul khrims yongs su ma dag pa yin no/ /bzang skyong / de bas na/ byang chub sems dpa' khyim gyi gnas nas mngon par byung ba gang ting nge 'dzin 'di thos nas 'chad pa'am/ sgom par 'dod pa des tshul khrims yongs su dag par bya'o/ /tshul khrims la skyon med par bya'o/ /tshul khrims 'dren ma ma yin par bya'o/ /tshul khrims ma nyams par bya'o/ /tshul khrims bsra bsrer ma gyur par bya'o/ /rten pa med pa'i tshul khrims dang / mchog tu 'dzin pa med pa'i tshul khrims dang / dmigs pa med pa'i tshul khrims dang / ma zhig pa'i tshul khrims dang / mkhas pas bsngags pa'i tshul khrims dang / 'phags pas bsngags pa'i tshul khrims rnams su bya'o/ /des sbyin pa 'gyed pa la dga' bar bya'o/ /'di lta ste/ sbyin pa'i mchog /sbyin pa bla na med pa/ chos kyi sbyin pa la brtson 'grus brtsam par bya'o/ /dran
44b
pa nye bar gnas par bya'o/ /dad pa dang ldan par bya'o/ /des pa dang ngo tsha shes pa dang ldan pa dang / khrel yod pa phun sum tshogs par bya'o/ /rnyed pa dang / bkur sti dang / tshigs su bcad pa la lhag par ma zhen par bya'o/ /ser sna med cing phrag dog med pa dang / sbyangs pa'i yon tan dang / yo byad bsnyungs par bya'o/ /'jig rten pa'i gtam don du mi gnyer gyi gtam yongs su spang zhing / 'jig rten las 'das pa'i gtam don du gnyer bar bya'o/ /byas pa shes pa dang / byas pa gzo bar bya'o/ /sgra chung ba dang / smra ba nyung bar bya'o/ /gus pa dang bcas pa dang / zhes dang bcas par bya'o/ /'di lta ste/ dge ba'i bshes gnyen ni/ rnyed par dka' bas slob dpon dang / mkhan po la bsnyen bkur bya bar spro bar bya'o/ /des su las chos 'di lta bu 'di rnam par thos par 'gyur ba dang / blangs pa dang / glegs bam du bris par 'gyur ba dang / tshig gis ston pa'i rag las par 'gyur ba de dang / gang las mdo sde 'di kun chub par byed pa'am/ kun chub par byed par 'gyur ba'am/ glegs bam du 'bri ba'am/ bris par 'gyur ba de la des par 'du shes bskyed par bya'o/ /dge ba'i bshes gnyen du 'du shes bskyed par bya'o/ / ston par 'du shes bskyed par bya'o/ /chos de lta bu 'di rnams kyi don dang / byang chub yongs su smin par bya ba'i phyir des de la lhag par yang dga' ba dang / dang ba dang / gus pa bskyed par
45a
@#/ /bya'o| |bzang skyong / gal te byang chub sems dpa'i theg pa pa'am/ nyan thos kyi theg pa pa'am/ rang sangs rgyas kyi theg pa pa'i rigs kyi bu'am rigs kyi bu mo dag chos 'di lta bu rnams kyi chos 'chad pa'i dge slong la dga' ba dang / dang ba dang / gus pa ma skyed cing dge ba'i bshes gnyen gyi 'du shes dang / ston pa'i 'du shes kyang mi skyed na/ bzang skyong / byang chub sems dpa'i theg pa pa'am/ nyan thos kyi theg pa pa'am/ rang sangs rgyas kyi theg pa pa'i rigs kyi bu'am rigs kyi bu mo de dag chos 'di lta bu kun chub par ma byas pa'i chos rnams kun chub par 'gyur ba dang / kun chub par byas pa'i chos rnams gnas pa dang / chud mi za ba dang / med par mi 'gyur ba ni/ gnas ma yin te/ skabs med do/ /byang chub sems dpa'i theg pa pa'i rigs kyi bu des ting nge 'dzin 'di 'thob pa de'ang gnas pa med do/ /bzang skyong / de ci'i phyir zhe na/ 'di ltar ma gus pas ni/ dam pa'i chos nub par 'gyur pa'i phyir ro/ /bzang skyong / gal te byang chub sems dpa'i theg pa pa'i rigs kyi bu'am/ rigs kyi bu mo'am/ nyan thos dang / rang sangs rgyas kyi theg pa pa'i rigs kyi bu dang / rigs kyi bu mo de dag chos 'di lta bu 'di dag ston par byed pa'i dge slong dang / gang la las chos kyi rnam grangs 'di lta bu 'di
45b
kun chub par byed par 'gyur ba dang / kun chub par byas pa dang / glegs bam du bris par gyur pa de dag la dga' ba dang / dang ba dang / gus pa'ang skyed cing / dge ba'i bshes gnyen gyi 'du shes dang / ston pa'i 'du shes kyang nye bar gzhog na/ bzang skyong / byang chub sems dpa'i theg pa pa'am/ nyan thos kyi theg pa pa'am/ rang sangs rgyas kyi theg pa pa'i rigs kyi bu'am rigs kyi bu mo de dag kun chub par ma byas pa'i chos rnams kun chub par 'gyur ba dang / kun chub par byas pa'i chos rnams gnas pa dang / chud mi za ba dang / med par mi 'gyur ba'i gnas yin te/ de ni/ gnas yod do/ bzang skyong / de bas na/ khyod mos par bya'o/ /khyod kyis khong du chud par bya'o/ /'di ltar chos 'di lta bu ston pa'i dge slong rnams la dga' ba dang / dang ba dang / gus pa bskyed par bya'o/ /dge ba'i bshes gnyen du 'du shes pa dang / ston par 'du shes bskyed par bya ste/ 'di ni/ nga'i rjes su bstan pa yin no| |bzang skyong / gzhan yang byang chub sems dpa' khyim gyi gnas nas mngon par byung ba'i ting nge 'dzin 'di lung nod par 'dod pa dang / sgom par 'dod pa des 'gyod pa dang bral bar bya'o/ /dgon pa la dga' ba dang / dgon pa la gzhal ba dang / dgon pa la 'bab pa dang / dgon pa la bab par bya'o/ /ljongs kyi phyogs la mngon par mi dga' bar bya'o//
46a
@#/ /mdza' bo'i khyim dang / zas sbyin pa'i khyim mi 'dod pas srog la mi blta bar bya'o/ /lus gtong bas lus la mi chags pa dang / dgon pa'i 'du shes thob par bya'o/ /rnyed pa dang / bkur sti dang / tshigs su bcad pa la mi brten pa dang / dam pa'i chos rab tu gzung bar bya'o/ /lhung bzed dang chos gos la mi chags pa dang / mi gsog par bya'o/ /mgron du gnyer mi dgos par bsod snyoms spyad par bya'o/ /'dzem zhing 'gyod pa dang ldan par bya'o/ /gser bdag gir mi byed par bya'o/ /kun nas ldang ba med pas 'gyod pa dang bral bar bya'o/ /khong khro ba spangs pas byams pa la gnas par bya'o/ /'tshe ba spangs pas snying rje la gnas par bya'o/ /mngon par mi dga' ba spangs pas dga' ba la gnas par bya'o/ /mtshan ma thams cad spangs pas btang snyoms la gnas par bya'o/ /brtson 'grus brtsams pas bslab pa 'dod par bya'o/ /rmugs pa dang gnyid kyis mi non par 'chag pa la zhugs par bya'o/ /bzang skyong / de pas na/ byang chub sems dpa' khyim gyi gnas nas byung ba ting nge 'dzin 'di thos nas lung nod pa dang / sgom par 'dod pa des chos de dag la gnas te ting nge 'dzin 'di lung mnod par bya'o/ /bsgom par bya'o/ /de skad ces bka' stsal pa dang / byang chub sems dpa' sems dpa' chen po bzang
46b
skyong gis bcom ldan 'das la 'di skad ces gsol to/ /btsun pa bcom ldan 'das/ 'di ltar rgya che zhing bzang ba'i chos 'di dag de bzhin gshegs pas bstan cing gsungs pa ni| ngo mtshar to/ /btsun pa bcom ldan 'das/ byang chub sems dpa' le lo can gang dag 'byung ba de dag ni/ ting nge 'dzin 'di thos nas skrag par 'gyur/ dngang bar 'gyur/ dngang bar bgyid par 'gyur ro/ /chos de lta bur bzang pa de dag 'chad pa la'ang dga' ba dang / mgu ba dang / dang ba rgya chen po mi 'thob cing de dag 'di snyam du bdag cag ni/ de bzhin gshegs pa dgra bcom pa yang dag par rdzogs pa'i sangs rgyas gzhan las ting nge 'dzin 'di bsgrub par bya'o/ /da ltar ni/ bdag cag lus skem zhing nad mang ngo snyam du sems par 'gyur te/ de dag da ltar gyi sangs rgyas mngon sum du bzhugs pa'i ting nge 'dzin 'di thos nas zhum par 'gyur/ kun tu zhum par 'gyur zhing / da ltar gyi sangs rgyas mngon sum du bzhugs pa'i ting nge 'dzin 'di sgrub par brtson 'grus kyang mi rtsom par 'gyur ro/ /btsun pa bcom ldan 'das/ yang byang chub sems dpa' sems dpa' chen po brtson 'grus brtsams pa dang / dran pa la gnas pa/ chos 'tshal ba/ chos la gus pa/ chos 'dzin pa/ chos ston pa/ chos smra ba/ chos la yongs su lan pa/ chos kyi rjes su mthun pa'i chos la spyod pa/ lus dang srog yongs
47a
@#/ /su gtong ba/ rnyed pa dang / bkur sti dang / tshigs su bcad pa la mi rten pa/ yon tan grags pa mi 'tshal ba/ lhung bzed dang / chos gos la ma chags pa/ grong dang / grong khyer dang / grong rdal dang / ljongs dang / rgyal srid dang / yul 'khor dang / pho brang 'khor la mngon par mi dga' ba/ dben pa la gzhol ba/ dben pa la 'bab pa/ dben pa la bab pa gang dag 'byung ba de dag ni/ da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di thos nas zhum par mi 'gyur/ kun tu zhum par mi 'gyur| skrag par mi 'gyur/ dngang bar mi 'gyur/ dngang bar bgyid par mi 'gyur ba'i steng du dga' ba dang / mgu ba dang / dang ba rgya chen po'ang 'thob bo/ /de dag ting nge 'dzin 'di gzung ba dang / kun chub par bya ba dang / bcang ba dang / bklag pa dang / yi ger bri ba dang / bstan pa dang / bsgom pa'i slad du brtson 'grus rgya chen po'ang rtsom mo/ /btsun pa bcom ldan 'das/ rigs kyi bu'am/ rigs kyi bu mo 'di dag ni/ ma byon pa'i sangs rgyas las mang du thos pa 'tshal bar mi 'gyur ro/ /sngags dang / yon tan dang / chos kyi khyad par bsgrub pa'i slad du sbyor bar yang mi 'gyur ro/ /de lta lags kyis kyang btsun pa bcom ldan 'das/ ma 'ongs pa'i dus na rigs kyi bu'am rigs kyi bu mo sngon gyi rgyal ba la bgyi ba bgyis pa/ brtson 'grus
47b
brtsams pa gang dag 'byung ba de dag ni/ de bzhin gshegs pas gsungs pa'i ting nge 'dzin 'di lta bu 'di thos nas 'di snyam du bdag cag ni/ 'di nyid du lus dang / pags pa dang / sha dang| khrag dang / rus pa dang / chu ba dang / rkang rnams bskams shing yongs su bskams kyang bla yi/ 'di ltar bdag cag le lo can du gyur te 'chi ba'i dus byed par mi bya'o/ /bdag cag gis chos rgya che zhing bzang pa 'di lta bu 'di dag kun chub pa dang / bshad pa dang / sgom pa ma byas par brtson 'grus gtang bar mi bya'o snyam ste/ de ltar brtson 'grus rtsom par 'gyur ro/ /skyes bu dam pa brtson 'grus rtag tu brtsams pa de lta bu de dag de bzhin gshegs pas gsungs pa'i mdo sde 'di lta bu 'di thos nas thos ma thag tu dga' ba dang / mgu ba dang / dang ba shin tu rgya che ba'ang 'thob bo/ /de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ / bzang skyong / legs so/ /legs so/ /yang bzang skyong / khyod kyis rjes su mthun pa'i chos bshad pa ni/ phyin ci ma log cing de ltar de bzhin yin te/ legs so/ /nga yang de la rjes su yi rang ste/ ngas gang la rjes su yi rang ba de la 'das pa dang / ma 'ongs pa dang / da ltar gyi sangs rgyas bcom ldan 'das rnams kyang rjes su yi rang bar mdzad do/ /de nas de'i tshe bcom
48a
@#/ /ldan 'das kyis tshigs su bcad pa 'di dag gsungs so/ /so sor thar par bslab pa ngas bshad gang / /de kun slob par byed cing dgon par sten/ /sbyangs pa'i yon tan dag la rtag spyod na/ /ting 'dzin 'di ni rnyed par dka' mi 'gyur/ /mgron du gnyer ba thams cad spangs byas shing / /ro la chags pa'ang yongs su spangs byas te/ /gang las mnyan la ston par 'du shes shing / /mnyam zhing mtshungs pa'i 'du shes nye bar gzhog /phrag dog 'dod pa nga rgyal spangs byas la/ /'dod chags zhe sdang gti mug spangs byas te/ / bsam gtan sbyor sems yang dag bskyed byas te/ ting nge 'dzin 'di la ni 'jug par bya/ /phrag dog med cing 'dod chags spangs byas la/ /rab tu bsdams shing khro ba spangs byas te| |rgyal ba'i sku la dmigs pa dag byas nas/ /ting nge 'dzin 'di la ni 'jug par bya'o/ /brtson 'grus mi gtong gnyid kyis mi non cing / /gnyen dang mdza' dang lhan cig mi 'grogs la| |'chag dang ldan zhing mang dang grogs spangs te/ /ting 'dzin rdul med de ni sgom par byos/ /bzang skyong gis zhus pa'i ting nge 'dzin gyi le'u ste dgu pa'o// // bam po bzhi pa/ de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan
48b
'das| theg pa chen po la yang dag par zhugs pa'i dge slong ma gang la la da ltar gyi sangs rgyas mngon sum du bzhugs pa'i ting nge 'dzin 'di thos nas lung nod pa'am/ sgom par 'tshal na| btsun pa bcom ldan 'das/ des chos gang la gnas te ting nge 'dzin 'di lung mnod par bgyi/ bsgom par bgyi/ de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / theg pa chen po la yang dag par zhugs pa'i dge slong ma gang la la ting nge 'dzin 'di thos nas lung nod pa'am/ sgom par 'dod pa des rtag tu gus pa dang bcas par bya'o/ /rtag tu phrag dog med pa dang / mi khro bar bya'o/ /nga rgyal bcom pa dang / khengs pa med pa dang / brtson 'grus brtsam par bya'o/ /le lo med pa dang / rmugs pa dang gnyid spang bar bya'o/ /mi nyal bar sbyor ba la brtson pa dang / rnyed pa dang / bkur sti dang / tshigs su bcad pa dang / chos gos dang / zas dang / mal stan dang / na ba'i gsos sman dang / yo byad btsal ba thams cad spang bar bya'o/ /'tsho ba yongs su dag pa dang / lus dang srog la'ang mi rten par bya'o/ /rtag tu chos 'dod pa dang / mang du thos pa tshol ba la brtson par bya'o/ /ma chags pa dang / zhe mi sdang ba dang / rmongs pa med pa'i sems su bya'o/ /bdud kyi phyogs spang bar bya'o/ /mnye ba dang / rgyan pa dang
49a
@#/ /lus la klubs pa rnams spang bar bya'o/ /lhung bzed dang chos gos la ma chags par bya'o/ /grags pa la mi chags pa dang / phra ma med pa dang / ngo mi rtag pa rnams spang par bya'o/ /bzang skyong / de bas na/ theg pa chen po la yang dag par zhugs pa'i dge slong ma gang ting nge 'dzin 'di thos nas lung nod pa'am/ sgom par 'dod pa des slob dpon la ston pa'i 'du shes bzhag ste ting nge 'dzin 'di lung mnod par bya'o/ /chos de dag la gnas te ting nge 'dzin 'di bsgom par bya'o/ /de nas de'i tshe bcom ldan 'das kyis tshigs su bcad pa 'di dag gsungs so/ /dge slong ma gang ting 'dzin 'di 'dod pas/ /rtag tu gus byas phrag dog khro ba dang / /nga rgyal de bzhin khengs pa spangs byas na/ /ting 'dzin 'di ni rnyed par dka' mi 'gyur/ /ting nge 'dzin 'di tshol bar gyur na ni/ /brtson 'grus brtsams shing gnyid ni spangs byas la/ /tshol ba thams cad rnam par spangs byas te/ / srog la 'ang mi rten par ni chos 'dod byos/ /gang zhig ting 'dzin 'di ni gzung 'dod pas/ /nyon mongs gzir bas 'dod chags zhe sdang dang / /ldan pa'i sems dang gnas par mi bya zhing / /nam yang bdud kyi zhags pas mi zin byos/ /gang zhig ting 'dzin 'di ni gzung 'dod pas/ /sgyu dang ldan par spyad par mi bya zhing / /mnye ba dang ni rgyan dang phra ma
49b
dang / /ngo mi rtag pa thams cad spang bar bya/ /lhung bzed phyir dang bsngags pa dag gi phyir/ /skad cig tsam yang rnam par mi rtog go /gang las nyan la ston par 'du shes shing / /mnyam zhing mtshungs pa'i 'du shes nye bar gzhog /bzang skyong gis zhus pa'i ting nge 'dzin gyi le'u ste bcu pa'o// //de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan 'das/ byang chub sems dpa' khyim par gyur pa gos dkar po 'tshal zhing khyim na gnas pa gang ting nge 'dzin 'di thos nas tha na zhag gcig gam/ zhag gnyis su lung nod pa'am/ sgom par 'tshal na/ btsun pa bcom ldan 'das/ des chos gang la gnas te ting nge 'dzin 'di lung mnod par bgyi/ bsgom par bgyi/ bcom ldan 'das kyis bka' stsal pa/ bzang skyong / de bas na/ byang chub sems dpa'i khyim par gyur pa gos dkar po gyo na zhing khyim na gnas pa ni/ gang ting nge 'dzin 'di thos nas tha na zhag gcig gam/ zhag gnyis sam/ tha na ba 'jos tsam yang lung nod pa'am/ sgom par 'dod na/ byang chub sems dpa' khyim par gyur pa gos dkar po gyon zhing khyim na gnas pa des dad pa dang ldan par bya'o/ /'jungs pa med pa dang / lhug par gtong bar bya'o/ /sbyin pa bged pa la dga' ba dang / rnam par smin
50a
@#/ /pa la re ba med par bdog pa thams cad yongs su gtang bar bya'o/ /des sangs rgyas la skyabs su 'gro bar bya'o/ /chos la skyabs su 'gro bar bya'o/ /dge 'dun la skyabs su 'gro bar bya'o/ /tshul khrims yongs su dag par bya'o/ /bslab pa'i gzhi lnga yongs su gzung bar bya'o/ /lha gzhan med par bya zhing bsam pa sangs rgyas kyi rjes su song bar bya'o/ / tshul khrims la skyon med pa dang / dge ba bcu'i las kyi lam yang dag par gzung zhing sgrub la gzhan la'ang de yang dag par 'dzin du 'jug pa dang / chang 'thung ba las phyir ldog par bya'o// ma 'phyar bar bya'o/ /gzhan dag la chang gi mi snyan pa brjod cing gzhan la'ang chang mi sbyin pa dang / gzhan dag la'ang 'dod pa smad cing tshangs par spyod par bya'o/ /phrag dog med par bya'o/ / 'tsho ba yongs su dag par bya'o/ /bu la sred par mi bya'o/ /bu mo la sred pa mi bskyed do/ /chung ma la sred pa ma skyed cig /nor la sred par mi bya'o/ /khyim la sred par mi bya'o/ /des rab tu byung ba la mngon par dga' ba dang / rab tu byung ba la sems gzhol bar bya'o/ /yan lag brgyad dang ldan pa'i nye bar gnas pa'i ting nge 'dzin la gzhol ba dang / gtsug lag khang la gnas par bya'o| |ngo tsha shes shing khrel yod pa dang ldan pa dang / sems byang chub la gzhol zhing theg pa gzhan mi 'dod par bya'o/ /tshul khrims dang ldan pa'i dge slong rnams la 'phya bar mi bya'o/ /
50b
tshangs par spyod pa rnams la gus pa dang bcas pa dang / zhes dang bcas par bya'o/ /slob dpon gang las ting nge 'dzin 'di lung mnos pa de la shin tu phangs par bsam pa dang / dang ba dang / gus par bya'o/ /dge ba'i bshes gnyen du'ang 'du shes nye bar gzhag par bya'o/ /ston par yang 'du shes nye bar gzhag par bya'o/ /de la bde ba'i yo byad thams cad dbul bar bya'o/ /byas pa shes pa dang / byas pa gzo ba dang / gus pa dang bcas pas gnas par bya ste/ bzang skyong / de ltar byang chub sems dpa' khyim par gyur pa khyim na gnas pas ting nge 'dzin 'di la sbyor bar bya'o/ /chos dag la'ang gnas te ting nge 'dzin 'di bsgom par bya'o/ /de nas de'i tsha bcom ldan 'das kyis tshigs su bcad pa 'di dag gsungs so/ /byang chub sems dpa' khyim na gnas pa gang / /ting 'dzin 'di ni gzung bar 'dod gyur pas/ /rtag tu tshul khrims yongs su dag gyur cing / /mngon byung sems brten yang dag bskyed byas te/ /bslab gzhi lnga ni yongs su bzung byas la/ /yan lag brgyad pa'i gso sbyong bsnyen byas shing / /khyim ma spangs par gtsug lag khang gnas te/ /ting nge 'dzin 'di la ni 'jug par bya/ /su la'ang chang ni blud par mi bya zhing / /sangs rgyas ma bsngags btung ba rnams spangs la/ /bslab pa 'di dag la ni gnas byas te/ /ting nge 'dzin 'di lung ni mnod par bya/ /bu la mi sred bu mor mi sred la/ /chung mar mi sred khyim la'ang mi sred cing / /dge bsnyen
51a
@#/ /ngo tsha shes dang ldan byas te/ /des ni ting 'dzin 'di la 'jug par bya/ /nad med bya zhing su dag la yang ni/ /mi bsnyen mi brjod mang po thams cad spang / /skyon med bzod pa dag la gnas nas su/ /ting nge 'dzin 'di la ni 'jug par bya/ /ting 'dzin 'phags pa 'di la 'jug pa na/ /sangs rgyas chos la rtag tu gus bcas shing / /sems ni dang la g.yo med phrag dog med/ /dge 'dun bsnyen bkur bya bar spro bar byos/ /bzang skyong gis zhus pa'i ting nge 'dzin gyi le'u ste bcu gcig pa'o// //de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan 'das/ theg pa chen po la yang dag par zhugs pa'i dge bsnyen ma gang ting nge 'dzin 'di thos nas lung nod pa'am/ sgom par 'tshal na/ btsun pa bcom ldan 'das/ des chos gang la gnas te ting nge 'dzin 'di lung mnod par bgyi/ bsgom par bgyi/ de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / de bas na/ theg pa chen po la yang dag par zhugs pa'i dge bsnyen ma gang ting nge 'dzin 'di thos nas lung nod pa'am/ sgom par 'dod pa des bslab pa'i gzhi lnga yongs su gzung bar bya'o/ /bzang skyong /
51b
dge bsnyen mas gsum la skyabs su song zhing lha gzhan med par bya'o/ /bzang skyong / dge bsnyen mas dge mtshan dang ltas yongs su spang ba dang sgyu med par bya'o/ /bzang skyong / dge bsnyen mas spyod lam mi bcos pa dang / 'jungs pa med par bya'o/ /bzang skyong / dge bsnyen mas sbyin pa bged pa la dga' ba dang / chos 'dod par bya'o/ /bzang skyong / dge bsnyen mas yongs su 'dri pa'i rang bzhin can dang / gus pa dang bcas pa dang / zhes dang bcas par bya'o/ /dge slong dang / dge slong ma dag mthong na stan la bdar bar bya'o/ /bzang skyong / de bas na/ theg pa chen po la yang dag par zhugs pa'i dge bsnyen ma gang ting nge 'dzin 'di thos nas lung nod pa'am/ sgom par 'dod na/ dge bsnyen ma des chos de lta bu dag la gnas te ting nge 'dzin 'di lung mnod par bya'o| |bsgom par bya'o/ /des nas de'i tshe bcom ldan 'das kyis tshigs su bcas pa 'di dag gsungs so/ /sangs rgyas gnang zhing bde gshegs bsngags pa yi/ /dge bsnyen ma gang ting 'dzin 'di tshol ba/ /bslab gzhi lnga po dag ni yongs bzung ste/ /ting nge 'dzin 'di la ni 'jug par bya/ /sangs rgyas chos dang de bzhin dge 'dun las/ /lha gzhan med cing gus dang bcas byas te/ /log pa'i lam ni thams cad spangs byas la/ /ting nge 'dzin 'di la ni 'jug par bya/ /srog chags mi gsod ma byin mi len cing / /brdzun du smra ba rnams kyang mi zer la/ /nam yang 'dod la log par
52a
@#/ /mi g.yem par/ /des ni ting nge 'dzin 'di lung mnod bya/ /'jungs pa med pa rnam smin mi re zhing / /spyod lam bcos ma dag kyang med byas la/ /phrag dog dang ni nga rgyal khro spangs te/ /des ni ting nge 'dzin 'di lung nod bya/ /dge slong de bzhin dge slong ma mthong na/ /gus dang bcas pas langs shing stan 'bul la/ /chos 'dod dge ba gang zhes tshol byed cing / /des ni ting nge 'dzin 'di lung mnod bya/ /bzang skyong gis zhus pa'i ting nge 'dzin las/ /dge bsnyen ma'i le'u ste bcu gnyis pa'o// //de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan 'das/ 'di ltar de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' khyim gyi gnas nas mngon par byung ba rnams kyi ched dang / byang chub sems dpa' 'dod chen pa rnams dang / lhag pa'i bsam pa phun sum tshogs pa rnams dang / brtson 'grus brtsams pa rnams dang / brtson pa mi 'dor ba rnams dang / bla na med pa yang dag par rdzogs pa'i byang chub tu yang dag par zhugs pa rnams kyi ched du chos gang la gnas na/ ting nge 'dzin 'di lung mnod par bgyi ba'am/ bsgom par bgyi ba'i chos rgya che zhing bzang ba gsungs pa ngo mtshar to/ /btsun pa bcom ldan
52b
'das| ma 'ongs pa'i dus na de bzhin gshegs pa mya ngan las 'das pa de'i tshe ci ting nge 'dzin 'di dzam+bu'i gling 'dir spyod par 'gyur ba lags sam/ rgyas par bgyid par 'gyur ba lags sam bcom ldan 'das kyis bka' stsal pa/ bzang skyong / nga yongs su mya ngan las 'das nas lo bzhi stong du ting nge 'dzin 'di dzam+bu'i gling na spyod par 'gyur ro/ /rgyas par byed par 'gyur ro/ /de'i 'og tu sa'i khung du song bar 'gyur ro/ /yang de lo lnga brgya ba tha ma phyi ma'i dus phyi ma'i tshe lnga brgya pa tha mar gyur pa/ dam pa'i chos 'jig par gyur pa/ dge sbyong 'jig par gyur pa/ dam pa'i chos spong bar gyur pa/ sems can 'jig par gyur pa/ rgyal srid 'khrugs par gyur pa/ tshul khrims dang ldan pa'i phyogs dmas pa'i dus la bab pa/ tshul khrims 'chal ba'i phyogs 'phel ba'i dus la bab pa/ dam pa'i chos kyi phyogs dmas pa'i dus la bab pa/ dam pa ma yin pa'i phyogs kyi chos 'phel ba'i dus la bab pa/ zad pa'i dus la bab pa na/ sems can gang mdo sde 'di lta bu thob par 'gyur ba'i phyir dge ba'i rtsa ba 'bar ba/ sngon gyi rgyal ba la bya ba byas pa/ dge ba'i rtsa ba bskyed pa/ dge ba'i rtsa ba smin pa/ sa bon btab pa'i sems can rnams ni nyung zad cig 'byung ste/ sems can de lta bu de dag gi don du 'di lta ste sangs rgyas kyi mthus ting nge 'dzin 'di dzam+bu'i gling du spyod par 'gyur ro/ /rgyas par byed par 'gyur ro/ /de dag gis kyang ting
53a
@#/ /nge 'dzin 'di thos nas dga' ba dang / mgu ba dang / dang pa rgya chen po 'thob bo/ /thob nas kyang 'dzin par 'gyur/ 'chang bar 'gyur/ klog par 'gyur/ kun chub par byed par 'gyur/ yi ger 'bri bar 'gyur/ 'chad par 'gyur/ rgyas par byed par 'gyur/ sgom pa'i sbyor ba la brtson par 'gyur/ tha na glegs bam du bris shing 'chang bar 'gyur ro/ /de nas byang chub sems dpa' sems dpa' chen po bzang skyong dang / byang chub sems dpa' sems dpa' chen po rin chen 'byung gnas dang / li tsa bI gzhon nus bcom ldan 'das la phyi ma'i dus na dam pa'i chos 'di 'gyur ba dang / rnam par 'jig pa thos nas chos kyi shugs kyis du zhing mchi ma klog par byed de/ de nas byang chub sems dpa' sems dpa' chen po bzang skyong dang / byang chub sems dpa' sems dpa' chen po rin chen 'byung gnas dang / li tsa bI gzhon nu mchi ma phyis te stan las langs nas bla gos phrag pa gcig tu gzar te pus mo g.yas pa'i lha nga sa la btsugs nas bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das/ bdag cag gis de bzhin gshegs pa mya ngan las 'das nas lo lnga brgya pa'i tha mar gyur pa/ phyi ma'i dus phyi ma'i tshe lnga brgya pa tha mar gyur pa/
53b
dam pa'i chos spong bar gyur pa na'ang mdo sde 'di lta bu dag gzung bar bgyi'o/ /kun chub par bgyi'o/ /yi ger bri bar bgyi'o/ /bcang bar bgyi'o/ /bklag par bgyi'o/ /rgyas par bgyi'o/ / sgom pa'i sbyor ba la brtson par bgyi'o/ /de ci'i slad du zhe na/ btsun pa bcom ldan 'das/ bdag cag ni/ de bzhin gshegs pas gsungs pa'i mdo sde zab mo 'di lta bu 'di nyan pa dang / 'bri ba dang / 'dzin pa dang / kun chub par bgyid pa dang / 'chang ba dang / klog pa dang / 'chad pa dang / rgyas par bgyid pa dang / sgom pas chog ma 'tshal to/ /de nas byang chub sems dpa' sems dpa' chen po khyim bdag ded dpon che bzang dang / byang chub sems dpa' sems dpa' chen po tshong dpon gyi bu phug sbas dang / byang chub sems dpa' sems dpa' chen po khye'u 'dam bus byin dang / byang chub sems dpa' sems dpa' chen po mtshams bzang dang / byang chub sems dpa' sems dpa' chen po dbang pos byin dang / byang chub sems dpa' sems dpa' chen po chu lha rnams bcom ldan 'das las lo lnga brgya pa tha mar gyur pa phyi ma'i dus phyi ma'i tshe lnga brgya pa tha ma la dam pa'i chos 'di 'gyur ba dang / rnam par 'jig pa thos nas chos kyi shugs kyis du zhing mchi ma klog par byed do/ /de nas byang chub sems dpa' sems dpa' chen po khyim bdag ded dpon che bzang dang / tshong dpon gyi bu phug spas dang / khye'u 'dam bus
54a
@#/ /byin dang / rigs kyi bu mtshams bzang dang / dbang pos byin dang / byang chub sems dpa' sems dpa' chen po chu lha rnams mchi ma phyis nas stan las langs te gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das/ bdag cag kyang ma 'ongs pa'i dus na de bzhin gshegs pa mya ngan las 'das nas lo lnga brgya pa tha mar gyur pa/ phyi ma'i dus phyi ma'i tshe lnga brgya pa tha mar gyur pa/ dam pa'i chos spong bar gyur pa na'ang mdo sde 'di lta bu dag gzung bar bgyi'o/ /kun chub par bgyi'o/ /yi ger bri bar bya'o/ /bcang bar bgyi'o/ / bklag par bgyi'o/ /gzhan dag la'ang rgya cher bshad par bgyi'o/ /bsgoms par bgyi'o/ /tsun pa bcom ldan 'das/ bdag cag gis de bzhin gshegs pa dgra bcom pa yang dag par rdzogs pa'i sangs rgyas rnams kyis bskal ba bye ba khrag khrig brgya stong du yang dag par bsgrubs pa'i bla na med pa yang dag par rdzogs pa'i byang chub 'di ring du gnas par bgyi'o/ / rgya che ba dang / rgyas par bgyi'o/ /de ci'i slad du zhe na/ btsun pa bcom ldan 'das/ bdag cag ni/ sngon ma thos pa'i chos rnams yang dag par len par bgyid pa dang / yang dag par
54b
sgrog par bgyid do/ /btsun pa bcom ldan 'das/ bdag cag ni/ chos zab mo 'jig rten pa thams cad yid ches par mi 'gyur ba bsgom par bgyi'o/ /bstan par bgyi'o/ /de nas 'khor de dag nas dge slong dang / dge slong ma dang / dge bsnyen dang / dge bsnyen ma srog chags lnga brgya tsam stan las langs te gus pa dang bcas/ zhes dang bcas pas bcom ldan 'das las lo lnga brgya pa tha mar gyur pa/ phyi ma'i dus phyi ma'i tshe lnga brgya pa tha mar gyur pa na dam pa'i chos rnams 'jig pa dang / dam pa'i chos mi len pa'i dus thos nas dam pa'i chos 'gyur ba'i shugs kyis du zhing mchi ma klog par gyur to/ /de nas srog chags lnga brgya tsam po de dag gis mchi ma phyis nas bla gos phrag pa gcig tu gzar te pus mo g.yas pa'i lha nga sa la btsugs nas bcom ldan 'das ga la ba de logs su thal mo sbyar ba btud de bcom ldan 'das la 'di skad ces gsol to/ /btsun pa bcom ldan 'das/ bdag cag kyang de bzhin gshegs pa yongs su mya ngan las 'das nas lo lnga brgya pa tha mar gyur pa/ phyi ma'i dus phyi ma'i tshe lnga brgya pa tha mar gyur pa na mdo sde 'di lta bu 'di dag gzung bar bgyi'o/ /bsgom par bgyi'o/ / gzhan dag la'ang rgya cher bsgrag par bgyi'o/ /skyes bu dam pa 'di dag la'ang lus kyi zhal ta bgyi ba bgyi'o/ /de bzhin gshegs pas gsungs pa'i mdo sde 'di lta bu 'di'ang de'i tshe
55a
@#/ /mnyan par bgyi'o/ /der yang dam pa'i chos yongs su gzung bar bgyi'o/ /dam pa'i chos kyi snod du gyur pa gzhan dag kyang dam pa'i chos dkon mchog 'dis phan gdags par bgyi'o/ /bcom ldan 'das/ ting nge 'dzin 'di skyes bu dam pa 'di dag la gtad par gsol/ bcom ldan 'das/ ting nge 'dzin 'di skyes bu dam pa 'di dag la gdams par gsol/ de nas de'i tshe bcom ldan 'das kyis gser gyi kha dog lta bu'i 'dzum pa mdzad de/ des 'jig rten gyi khams mtha' thug pa med pa rnams 'od kyis khyab par byas te tshangs pa'i 'jig rten gyi bar du mngon par byung nas nyi ma dang / zla ba'i 'od kyang zil gyis mnan te slar lhags nas bcom ldan 'das la g.yas phyogs nas lan gsum bskor ba byas te bcom ldan 'das kyi dbu'i gtsug gi mtshams su nub par gyur to/ /de nas tshe dang ldan pa kun dga' bo stan las langs te bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la mthun pa'i tshigs su bcad pa 'di lta bu dag gis mngon par bstod do/ /tshul khrims rnam dag spyod yul yongs su dag /mthu che ba yi nang na'ang rdzu 'phrul che/ /skye rgu kun las mchog tu 'phags gyur ba/ /
55b
dri ma bral ba'i nyi ma bzhin du mdzes/ /ma chags mkhyen ldan shin tu rnam grol thugs/ /ka la ping+ka'i gsung ldan lha yi lha/ /phas kyi rgol ba kun gyis mi bskyod pa/ /'dzum pa 'di mdzad rgyu rkyen ci zhig lags/ /phan phyir thugs brtse rkang gnyis nang na gtso/ /don dam gsal bas lung ni bstan par gsol/ /khyod kyi gsung sgra yid du 'ong thos na/ /'phags pa'i dga' ba zang zing med pa 'thob/ /rgyal mchog rnam par 'dren pa rgyu med par/ /gang zag mchog ni 'dzum pa mi mdzad na/ /'dzum pa 'di mdzad rgyu rkyen ci zhig lags/ /'jig rten phan phyir thugs brtse khyod la zhu'o/ /'jig rten mgon po 'dzum pa mdzad pa las/ /de ring su yi dgos pa rgya cher 'byung / /su zhig sangs rgyas ye shes brtan par gnas/ /su zhig de ring rgyal srid mchog thob 'gyur/ /su zhig de ring bsod nams brtan par gnas/ /su zhig chos mdzad 'di ni 'dzin par 'gyur/ /su zhig de ring cod pan che thogs te/ /rang gi lag gis rang gi mgo la 'dogs/ /de nas bcom ldan 'das kyis tshe dang ldan pa kun dga' bo la slar tshigs su bcad de gsungs pa/ kun dga' grogs po lnga brgya tshogs pa dag / dga' ba'i sems kyis mdun du 'khod gyur cing / /bdag cag chos 'di thob par shog cig ces/ /tshig tu rjod par byed pa 'di dag ltos/ /nam zhig bdag cag 'di 'drar 'gyur zhes
56a
@#/ /te| |de dag nga la yang ni lta bar byed/ /bdag cag byang chub mchog 'di 'dzin to zhes/ /nga yi mdun du 'dug nas tshig tu brjod/ /ma 'ongs phyi dus de 'drar gyur pa'i tshe/ /mdo sde 'di dag bsgrag par bya ba'i phyir/ /mkhas pa brgyad po 'di dag la sogs pa/ /lnga brgya 'di dag rnams kyang langs par gyur/ /mos par bya zhing khong du chung par bya| |'dir ni nga yi ye shes chags pa med/ /'di dag gis ni rgyal ba gcig pu la/ /thal mo sbyar ba byas nas langs pa min/ /sngon dag dran te skye ba snga ma la/ /sangs rgyas stong phrag brgyad cu tshang bar byung / /chos 'di dag ni bsgrag par bya ba'i phyir/ /de la'ang 'di dag brgyad la sogs pa'ang langs/ /de bas kyang ni shin tu snga ba na/ /tshul khrims rnam dag grags pa chen po pa/ /bye ba khrag khrig stong phrag brgyad cu byung / /de dag las kyang rgya che chos 'di blangs/ /nga yi gsung rab rgya che ba dag kyang / /don du gnyer cing yongs su 'dzin par byed/ /sems ni dga' zhing mgu ba dpe med pas/ /mang po byang chub sems la skul bar byed/ /de ni phyi dus mya ngan nga 'das tshe/ /sku gdun thams cad rgyas par byas gyur nas/ /sangs rgyas byang chub 'di dag legs bzung ste/ /yi ge bris nas sgrom du bcug nas kyang / /mchod rten sa dang brag dang ri dag dang / /lha dang de bzhin klu yi lag dag tu/ /mdo sde bzhag pa byas nas de dag
56b
rnams| |lha yi brtul zhugs 'dra bar bya phyir 'gro/ /de dag phyi ma'i dus tshe so so'i rigs/ /thams cad por te slad du babs gyur nas/ /sangs rgyas byang chub 'di dag legs bzung ste/ /bsam pa ji bzhin du ni byed par 'gyur/ /de dag chos 'di 'dod pas yul yul du/ /dong zhing mdo sde bzang po 'di rnyed 'gyur/ /rnyed nas yid ni mchog tu dga' gyur pas/ /rten pa med par skye bo mang la gtong / /lus dang de bzhin srog kyang spangs byas te/ /mkhas pa dag dang chos 'dod chog mi shes/ /phas kyi rgol ba kun dang mi zhing / /gya nom rgya che chos ni sbyin par byed/ /gang dag nga yi mdun na langs gyur pa/ /lnga brgya 'di dag thams cad ma gtogs par/ /mdo sde 'di la 'dzin par byed pa dang / /'chang dang klog par byed pa su yang med/ /dge slong brgyad dang de bzhin byang phyogs su/ /yongs su len cing chos 'dzin dga' ba dag /chos 'dod 'jig rten phan zhing brtses ba dag/ len pa'i phyir ni mang po 'byung bar 'gyur/ /gang dag der ni shin tu rgyas 'dzin cing / / snyan tshig rnyed la mi rten 'byung ba ni/ /brgyad la sogs pa dge slong lnga brgya bo/ /'di dag thams cad rnams ni tshang ba'o/ /dge slong dge slong ma dang dge bsnyen dang / /dge bsnyen ma ni mkhas shing 'jungs bral 'di/ /gang dag langs shing phyi dus ches 'dzin pa/ /de dag thams cad mi mchog rgyal bar 'gyur/ /yon tan bsam gyis mi khyab kun dang ldan/ /gser gyi kha dog bsod nams
57a
@#/ /brgya yi mtshan/ /phan phyir thugs brtse sems can mang po 'grol/ /bde ba sbyin zhing nyon mongs thams cad sel/ /de dag 'di nas 'chi 'phos phyi nas kyang / / log ltung sar ni nam yang 'gro mi 'gyur/ /skye ba thams cad du ni 'dus gyur cing / /mi mchog rnams ni mnyes par byed par 'gyur/ /de dag gis ni mi khom brgyad kyang spangs/ /des ni ngan song thams cad spangs pa'o/ /des ni bsod nams tshad med ji snyed bzung / /yon tan mtha' ni bshad par mi nus so/ /sangs rgyas zhing 'dir mnyes par byed par 'gyur/ /'dus par gyur nas sangs rgyas gang 'gyur ba/ /de dag phan pa'i phyir ni snying brtse la/ /bla med zhi lam tshol zhing gus par byed/ /de dag bskal pa gcig la 'dus gyur te/ /rkang gnyis gtso la mchod pa dag byas nas/ /bla na med pa'i rdul med byang chub phyir/ /'phags pa zang zing med pa'i bzod 'thob 'gyur/ /de dag na yang de bzhin chos 'dzin pa/ /phyi ma'i dus na'ang de bzhin bar ma'i dus/ /de na tshangs par spyod pa 'di spyad nas/ /tshe dpag med pa'i sangs rgyas mnyes par byed/ /bskal pa bzang po 'di la ji snyed kyi/ /'jig rten don mdzad 'od mdzad 'byung ba dag /de dag gi yang chos kyi tshul 'dzin pa/ /dus gsum la ni gnas pa'i dpa' bo'o/ /ma 'ongs sangs rgyas bye ba phrag mang po/ /bsam gyis mi khyab gang dag tshad
57b
med pa| |de la des ni rgya che mchod byas nas/ /sangs rgyas byang chub la ni mnyes byed 'gyur/ /byang chub zhi la de dag reg par 'gyur/ /de la 'dus nas gus par byed par 'gyur/ /bskal pa khrag khrig mang po 'das gyur pa/ /de srid na ni sa bon dngos por 'gyur/ /khyim gyi bdag po bzang skyong 'di dang ni/ /rin chen 'byung ba'i rin chen 'byung gnas dang / /ded dpon bzang dang phug sbas bram ze'i khye'u/ /sangs rgyas gang+gA'i bye snyed mthong bar 'gyur/ /de dag de rnams dang ni de bas kyang / /sangs rgyas bye ba mang po chos 'dzin pa/ /bskal pa bye ba mang po de yi tshad/ /brjod par bya zhing mtha' rtogs mi nus so/ /sems can chen po gang gis rmi lam na'ang / /dpa' bo 'di dag gi ni ming dang thabs/ /thos pa de dag rgyal ba chen por 'gyur/ /gang dag mthong ngam yang na thos nas kyang / /'dod par byed dam yang na dang byed na/ /thams cad byang chub 'gyur bar the tshom med/ /de la bsnyen bkur byed pa smos ci dgos/ /bsam gyis mi khyab chos 'di yongs su 'dzin/ /ming dang de bzhin tshe yang bsam mi khyab/ /snang ba bsam med yon tan bsam mi khyab/ /shes rab ye shes de bzhin bsam mi khyab/ /bla na med pa'i byang chub tshol byed cing / / sngon gyi sangs rgyas tshul khrims rnam dag pa/ /gang+gA'i bye snyed bsam mi khyab byung ba/ /de la'ang sbyin pa rgya chen dag ni phul/ /sangs rgyas bye ba mang pos bshad gyur kyang / /de yi bsod nams
58a
@#/ /tshad ni cung zad med/ /'dra ba'i sras dang grogs po de dag kyang / /byang chub 'gyur bar the tshom 'ga' yang med/ /kun dga' la la gang zhig mdo sde 'di/ /len tam 'dzin tam klog par byed pa dang / /lnga brgya tshang ba po ni de dag la/ /the tshom med par de la dga' ba skyed/ /kun dga' la la gang zhig mdo sde 'di/ /btsal ba'i phyir ni 'dun pa brtan byed cing / /gnyid ni spangs la brtson 'grus brtson byed na/ /de dag ting nge 'dzin 'di rnyed mi dka'/ /mdo sde 'di 'dra ba dag bzung byas nas/ /rnyed pa rab rnyed ngan 'gro dag kyang spangs/ /bde gshegs bstan pa la ni don yod dang / /mi khom thams cad rnam par spangs par 'gyur/ /bzang skyong gis zhus pa'i ting nge 'dzin las/ /spro ba skyed pa'i le'u ste bcu gsum pa'o// // de nas byang chub sems dpa' sems dpa' chen po bzang skyong dang / byang chub sems dpa' sems dpa' chen po li tsa bI gzhon nu rin chen 'byung gnas dang / byang chub sems dpa' sems dpa' chen po tshong dpon gyi bu phug sbas dang / byang chub sems dpa' sems dpa' chen po bram ze'i khye'u 'dam bus byin dang / byang chub sems dpa' sems dpa' chen po rigs kyi bu mtshams bzang dang / byang chub sems dpa' sems dpa' chen po khyim bdag ded dpon bzang po dang / byang chub sems dpa' sems dpa' chen po dbang pos byin dang /
58b
byang chub sems dpa' sems dpa' chen po chu lha rnams byang chub sems dpa' lnga brgya tsam po de dag dang lhan cig tu legs par gsungs pa'i phyir ras bcos bu zung lnga brgya bcom ldan 'das kyi sku la gsol to/ /bcom ldan 'das la rin po che 'grim par yang byed do/ /bcom ldan 'das la bsnyen bkur yongs su spyod par byed par gsol ba 'debs so/ /de nas bcom ldan 'das kyis bzang skyong la sogs pa byang chub sems dpa' sems dpa' chen po lnga brgya tsam po de dag la chos kyi gtam gyis yang dag par rab tu dga' bar mdzad/ yang dag par 'dzin du bcug /yang dag par gzengs bstod/ yang dag par mgu bar mdzad do/ /de dag dga' ba'i sems dang / skyon med pa'i sems dang / 'jam pa'i sems dang / 'dod par bya ba'i sems dang / dang ba'i sems dang / sgrib pa dang bral ba'i sems kyis bcom ldan 'das kyi spyan sngar thal mo sbyar te 'khod do/ /de nas byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /bcom ldan 'das/ chos du dang ldan na/ byang chub sems dpa' sems dpa' chen po ting nge 'dzin 'di 'thob par 'gyur/ de skad ces gsol ba dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / chos bzhi dang ldan na/ byang chub sems dpa'
59a
@#/ /sems dpa' chen po ting nge 'dzin 'di thob bo/ /bzhi gang zhe na/ 'di lta ste/ gzhan mu stegs can gyi gsang tshig la mi rten pa dang / 'dod pa'i yon tan la mi chags pa dang / sbyangs pa'i yon tan dang yo byad bsnyungs pa rnams kyis ma pham pa dang / srid pa'i 'gro ba'i skye ba'i gnas rnams la smod pa ste/ bzang skyong / chos bzhi po de dag dang ldan na| byang chub sems dpa' sems dpa' chen po ting nge 'dzin 'di 'thob bo/ /bzang skyong / byang chub sems dpa' gang la la zhig ting nge 'dzin 'di 'chang bar byed/ klog par byed/ yi ger 'bri bar byed/ 'dzin par byed/ kun chub par byed/ gzhan dag la'ang rgya cher yang dag par ston par byed na/ bzang skyong / byang chub sems dpa' de'i yon tan gang tshe 'di nyid la 'thob par 'gyur ba lnga brgya yod par rig par bya'o/ /lnga brgya gang zhe na/ bzang skyong / 'di lta ste/ dper na/ byams pa la gnas pa'i lus la dug gis mi tshugs/ mtshon gyis mi tshugs/ chur mi 'chi/ mes mi 'tshig /rgyal pos glags lta ba dag gis glags mi rnyed pa de bzhin du bzang skyong / ting nge 'dzin 'di 'dzin pa'i byang chub sems dpa' de'ang dug gis mi tshugs/ mtshon gyis mi tshugs/ chus 'chi bar mi byed/ mes mi 'tshig /rgyal pos glags lta ba dag gis glags mi rnyed do/ /bzang skyong / gzhan yang gal te bskal pas sreg pa byung bar gyur te/ ting
59b
nge 'dzin 'di 'dzin pa'i byang chub sems dpa' de'ang me'i phung po de'i nang du mchong na/ me'i phung po de zhi bar 'gyur ro/ /'di lta ste/ dper na/ chu'i bum pa chen pos ni/ me'i phung po zhi bar byed do/ / bzang skyong / ting nge 'dzin 'di 'dzin pa'i byang chub sems dpa' de ni/ sngon gyi las kyi rnam par smin pa ma gtogs par rgyal po'am/ chom rkun nam/ me'am/ chu'am/ skye bo'am/ klu'am/ ro langs sam/ gnod sbyin nam/ srin po'am/ seng+ge'am/ stag gam/ khyi'am/ wa'am/ spyang ki'am/ mi'am/ mi ma yin pa'am/ yi dwags sam/ grul bum gyis bar chad byed na/ lus sam/ srog gam/ lhung bzed dam/ gos sam/ tshangs par spyod pa'am/ 'chad pa'am/ kha ton byed pa'am/ bsam gtan nam/ tshul bzhin yid la byed pa'i bar chad byed pa 'di ni| gnas ma yin/ skabs ma yin te/ de ni/ gnas med do/ /bzang skyong / ting nge 'dzin 'di 'dzin pa'i dge slong de sngon gyi las kyi rnam par smin pa ma gtogs par mig nad kyis 'debs pa'am| rna nad kyis 'debs pa'am/ sna nad kyis 'debs pa'am/ lce nad kyis 'debs pa'am/ lus nad kyis 'debs pa'am/ sems nad kyis 'debs pa'am/ de dag las gzhan pa'i nad kyi rnam pas byang chub sems dpa' de'i 'tsho ba 'gog par byed pa ni/ gnas ma yin/ skabs ma yin te/ de ni/ gnas med do/ /bzang skyong / gzhan yang ting nge 'dzin 'di 'dzin pa'i
60a
@#/ /byang chub sems dpa' de la lha rnams kyang srung ngo / /klu rnams kyang srung ngo / /gnod sbyin rnams kyang srung ngo / /dri za rnams kyang srung ngo / /mi rnams kyang srung ngo / /mi ma yin pa rnams kyang srung ngo / /lha ma yin rnams kyang srung ngo / /nam mkha' lding rnams kyang srung ngo / /mi'am ci rnams kyang srung ngo / /lto 'phye chen po rnams kyang srung ngo / /rgyal po chen po bzhi dang / lha rnams kyi dbang po brgya byin dang / mi mjed kyi bdag po tshangs pa dang / lha'i bu mtshams bzang rnams kyang srung ngo / /de dag las gzhan pa lha'i bu gzi brjid che ba gzi brjid che ba dag kyang srung ngo / /byang chub sems dpa' sems dpa' chen po rnams kyang srung ngo / /sangs rgyas bcom ldan 'das rnams kyang ting nge 'dzin 'di 'dzin pa'i byang chub sems dpa' de la srung ngo / /bzang skyong / gzhan yang byang chub sems dpa' sems dpa' chen po de ni/ lha rnams dang / klu rnams dang / gnod sbyin rnams dang / lha ma yin rnams dang / nam mkha' lding rnams dang / mi'am ci rnams dang / lto 'phye chen po rnams dang / brgya byin dang / tshangs pa rnams dang / rgyal po chen po rnams dang / byang chub sems dpa' rnams dang / sangs rgyas bcom ldan 'das rnams la sdug par 'gyur ro/ /bzang skyong / gzhan yang byang chub sems dpa' sems dpa' chen po de la lha rnams kyang snyan par sgrog go /klu rnams kyang snyan par sgrog
60b
go /gnod sbyin rnams kyang snyan par sgrog go /mi rnams kyang snyan par sgrog go /mi ma yin pa rnams kyang snyan par sgrog go /lha ma yin dang / nam mkha' lding dang / mi'am ci dang / lto 'phye chen po rnams kyang snyan par sgrog go /brgya byin dang / tshangs pa dang / rgyal po chen po rnams kyang snyan par sgrog go /byang chub sems dpa' rnams dang / sangs rgyas bcom ldan 'das kyang byang chub sems dpa' sems dpa' chen po de la snyan par sgrog go /bzang skyong / gzhan yang ting nge 'dzin 'di 'dzin pa'i byang chub sems dpa' de la lha rnams kyang lta bar 'dod do/ /klu rnams kyang lta bar 'dod do| |gnod sbyin rnams kyang lta bar 'dod do/ /dri za rnams kyang lta bar 'dod do/ /mi'am ci rnams kyang lta bar 'dod do/ /mi rnams kyang lta bar 'dod do/ /mi ma yin pa rnams kyang lta bar 'dod do| |lha ma yin dang / nam mkha' lding dang / lto 'phye chen po rnams kyang lta bar 'dod do/ /byang chub sems dpa' rnams dang / sangs rgyas bcom ldan 'das dag kyang ting nge 'dzin 'di 'dzin pa'i byang chub sems dpa' de la tha na rmi lam du'ang zhal ston par mdzad do/ /ming nas rjod par yang mdzad do/ /bzang skyong / gzhan yang ting nge 'dzin 'di 'dzin pa'i byang chub sems dpa' de la byang chub sems dpa' rnams kyang lta bar 'dod do/ /sangs rgyas bcom ldan 'das rnams kyang gzigs par bzhed do/ /bzang skyong / gzhan yang ting nge 'dzin 'di 'dzin pa'i byang chub sems
61a
@#/ /dpa' de la lha rnams kyang bltar 'ong ngo / /klu rnams kyang bltar 'ong ngo / /gnod sbyin dang / lha ma yin dang / nam mkha' lding dang / mi'am ci dang / lto 'phye chen po dang mi rnams kyang bltar 'ong ngo / /lha'i dbang po brgya byin dang / mi mjed kyi bdag po tshangs pa dang / lha'i bu mtshams bzang yang bltar 'ong ngo / /bzang skyong / gzhan yang ting nge 'dzin 'di 'dzin pa'i byang chub sems dpa' de la ma bshad cing ma thos pa'i mdo sde dag kyang tha na rmi lam du'ang sgra grag cing dbyangs thos par 'gyur ro/ /bzang skyong / ting nge 'dzin 'di 'dzin pa'i byang chub sems dpa' gang ting nge 'dzin 'di 'dzin tam/ kun chub par byed dam/ 'chang ngam/ klog gam/ yi ger 'bri'am/ 'chad par byed pa de la bskal pa'am/ bskal pa las lhag par yang nga snyan pa rjod cing yon tan sgrog par byed na/ gang sgrub par byed pa lta la smos kyang ci dgos/ de nas de'i tshe bcom ldan 'das kyis tshigs su bcad pa 'di dag gsungs so/ /byang chub sems dpa' gang zhig ting nge 'dzin/ /bde bar gshegs pas gsungs pa 'di 'chad pa'i/ /yon tan yongs su bshad par bya ba ni/ /gang+gA'i bye ma snyed las gcig blangs bzhin/ /gang zhig ting nge 'dzin 'di 'chad byed pa/ /de la me dang mtshon gyis mi tshugs shing / /de la rkun pos gnod par byed mi 'gyur/ /de la rgyal po mi byams
61b
mi byed do/ /gdug pa'i sbrul dag 'khrugs shing 'jigs byed pas/ /gdug pa'i yid kyis mi la 'tshe byed na/ /gang zhig ting 'dzin 'di la 'jug byed pa/ /de yi byin gyis de dag dug med 'gyur/ mi dang klu dang gnod sbyin srin po dag /phas kyi rgol ba 'khrugs shing 'jigs byed pas/ /gang dag ting 'dzin 'di la 'jug byed pa/ /de yi byin la nam yang mi bzod do/ /dgon pa'i gcan gzan mi srun gang 'khod pa/ /spyang ki wa dang de bzhin seng+ge stag /de dag dgon pa'i gnas su gnas pa de'i/ /grogs byed pa dang g.yog byed par yang 'gyur/ /gnod sbyin sha za mdangs 'phrog 'jigs byed pa/ /gdug pa'i yid kyis mi la 'tshe byed na/ /gang zhig ting 'dzin 'di la 'jug byed pa/ /de yi byin gyis de dag spa yang 'god/ /gang zhig ting 'dzin 'di ni 'chad byed pa/ /de ni rna nad med cing lus nad med/ /mig gi dbang po rnams kyang nyams mi 'gyur/ /tshig kyang gsal zhing spobs pas smra bar 'gyur/ /gang zhig ting 'dzin 'di la 'jug pa de/ /de la nam yang sems dmyal ngan 'gro med/ /de yi lus la nad kyis mi 'debs shing / /de la nam yang log ltung 'jigs pa med/ /kha ton byas te gzhan la ston byed na| |de la lha dang klu dang grul bum dang / /lha ma yin dang lto 'phye che rnams srung / /de la gdug par sems pa'ang dang bar 'gyur/ /kha ton byas te gzhan la ston byed na/ /de la lha mi klu dang
62a
@#/ /lha ma yin/ /gnod sbyin mi'am ci dag cher snyan sgrog /sangs rgyas rnams kyang bu gcig bzhin du bstod/ /kha ton byas te gzhan la ston byed na/ /de ni chos la the tshom 'byung mi 'gyur/ /de ni byang chub the tshom yong mi 'byung / /de yi gzugs dang mnyam pa'ang mi 'byung ngo / /ting 'dzin de ni kha ton byed pa de/ /rgyal po 'khrugs dang de bzhin sems can 'khrugs/ /mu ge'i dgon pa byung bar gyur na yang / /de la gnod dang bkres par mi 'gyur ro/ /ting 'dzin 'di ni kha ton byed pa de/ /sems can dag la bdud ni nyer gnas kyang / /de ni mi skrag pa spu mi g.yo ste/ /de yi yon tan bsam gyis mi khyab 'gyur/ /'tshe ba dang ni nyes dang nyon mongs pa/ /ji snyed gang dag ngas ni bshad gyur pa/ /sngon gyi las kyi rnam smin ma gtogs par| |de dag de yi lus la mi tshugs so/ /zad pa phyi ma'i dus na gang lag tu/ /mdo sde rgya che 'di dag 'ongs pa ni/ /sras kyi thu bo bzhin du mdun bzhag ste/ /bstod cing bslang la snyan pa dag kyang gsung / /bag yod par yang brtson 'grus brtsams par byos/ /mthun par byas te chos kyang sbyad par byos/ /gang zhig 'dzin cing klog la ston byed pa/ /khyed kyi don du 'di dag 'chad par byed/ /bzang skyong gis zhus pa'i ting nge 'dzin las/ chos smra ba bsngags pa'i le'u ste bcu bzhi pa'o// //bam po lnga pa/ yang bcom ldan 'das kyis byang chub sems
62b
dpa' sems dpa' chen po bzang skyong la bka' stsal pa/ bzang skyong / ngas mngon par shes te/ 'das pa'i dus bskal pa grangs med pa/ rgyas pa/ tshad med pa/ bsam gyis mi khyab pa/ gzhal du med par gyur pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po zhes bya ba/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ngo / /bzang skyong / de'i tshe tshong dpon gyi bu bzang sbyin zhes bya ba zhig yod par gyur te/ de srog chags nyi khris yongs su bskor zhing mdun du bdar nas lhan cig tu de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po de ga la bar dong ste lhags nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po de'i zhabs la mgo bos phyag 'tshal nas lan gsum bskor ba byas te phyogs gcig tu 'khod do/ /phyogs gcig tu 'khod nas kyang tshong dpon gyi bu bzang sbyin gyis de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po de la ting nge 'dzin 'di yongs su zhus so/ /bzang skyong / de nas de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po des kyang tshong dpon gyi bu bzang sbyin de'i
63a
@#/ /lhag pa'i bsam pa mkhyen nas ting nge 'dzin 'di rgya cher bstan to/ /yang dag par bshad do/ /bzang skyong / de nas tshong dpon gyi bu bzang sbyin des ting nge 'dzin 'di thos nas 'dzin par byed do/ /bzung nas sgom par byed do/ /bsgoms nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po de las skra dang kha spu bregs te gos tshon can gyon nas khyim nas khyim med par rab tu byung ste tshangs par spyod do/ /lo brgyad khrir ting nge 'dzin 'di sgom zhing gnas par gyur to/ /des bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bde ba'i rgyal po de las thos pa thams cad bzung zhing / 'das pa'i de bzhin gshegs pa dgra bcom pa yang dag par rdzogs pa'i sangs rgyas rnams las kyang thos pa thams cad bzung ste/ de mang du thos pa bsam gyis mi khyab pa dang ldan par gyur to/ /de dus gzhan zhig na tshe brjes nas lus zhig ste shi ba dang / bde 'gro mtho ris kyi 'jig rten du sum cu rtsa gsum pa'i lha rnams dang skal pa mnyam par skyes so/ /skyes nas kyang des 'jig rten gyi khams de nyid du de bzhin gshegs pa gnyis pa glog gi lha zhes bya ba mnyes par byas so/ /bskal pa de nyid la rgyal rigs shing sA la chen po lta bur skyes te/ rgyal rigs shing sA la chen po lta bu de las mngon par byung nas de bzhin gshegs pa
63b
dgra bcom pa yang dag par rdzogs pa'i sangs rgyas glog gi lha de las rab tu byung ste lo brgyad khrir ting nge 'dzin 'di sgom zhing tshangs par spyad pa spyod do/ /des de bzhin gshegs pa dgra bcom pa yang dag par rdzogs pa'i sangs rgyas gsum pa 'od zer gyi rgyal po zhes bya ba mnyes par byas so/ /bskal pa de nyid la bram ze'i rigs shing sA la chen po lta bur skyes te/ bram ze'i rigs shing sA la chen po lta bu de las mngon par byung nas de bzhin gshegs pa dgra bcom pa yang dag par rdzogs pa'i sangs rgyas 'od zer gyi rgyal po de las rab tu byung ste lo brgyad khri bzhi stong du ting nge 'dzin 'di sgom zhing tshangs par spyad pa spyod do/ /tshong dpon gyi bu bzang sbyin de'ang de nas phyis bskal pa brgyad kyis bla na med pa yang dag par rdzogs pa'i byang chub mngon par rdzogs par sangs rgyas so/ /bzang skyong / de'i tshe de'i dus na tshong dpon gyi bu bzang sbyin zhes bya ba byung ba de gzhan zhig yin snyam du de ltar the tshom mam/ yid gnyis sam/ som nyi za bar gyur na| bzang skyong / khyod kyis de ltar mi blta'o/ /de ci'i phyir zhe na/ de bzhin gshegs pa dgra bcom pa yang dag par rdzogs pa'i sangs rgyas mar me mdzad de de'i tshe de'i dus na tshong dpon gyi bu bzang sbyin zhes bya bar gyur to/ /bzang skyong / tshong dpon gyi bu bzang sbyin de chos don du gnyer zhing chos 'dod la chos la 'dun pa dang ldan te/ de'i phyir myur du bla na med pa yang dag par rdzogs
64a
@#/ /pa'i byang chub mngon par rdzogs par sangs rgyas pa la ltos/ bzang skyong / da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di byang chub sems dpa' sems dpa' chen po rnams sangs rgyas kyi ye shes skyed pa dang / thos pa rgya mtsho lta bur 'gyur ba la ji tsam du phan pa mang por gyur pa la ltos/ bzang skyong / de bas na/ khyod kyis ting nge 'dzin 'di gzung bar bya'o/ /kun chub par bya'o/ /yi ger bri bar bya'o/ /bcang bar bya'o/ /bklag par bya'o/ /bzung zhing kun chub par byas nas gzhan dag la'ang rgya cher yang dag par bshad par bya'o/ /bstan par bya'o/ /brjod par bya'o/ /sgom pa'i sbyor ba la'ang brtson par bya'o/ /de ci'i phyir zhe na/ bzang skyong / de ni/ 'di ltar ting nge 'dzin 'di phyi phyir bsten cing bsgoms la mang du byas na/ sangs rgyas kyi ye shes 'thob par 'gyur ba dang / de bzhin gshegs pa'i ye shes dang / rang byung gi ye shes dang / thams cad mkhyen pa'i ye shes dang / bsam gyis mi khyab pa'i ye shes dang / mi mnyam pa dang mnyam pa'i ye shes dang / bla na med pa'i ye shes dang / ltag na med pa'i ye shes 'thob par 'gyur ba ma gtogs par chos gzhan 'thob par mi 'gyur ro/ /yang bzang skyong / yang dag par smra bas gang la mig tu gyur pa byang chub sems dpa' rnams skyed pa/ sangs rgyas kyi chos
64b
rnams skyed par byed pa zhes smra ba de dag ni/ bzang skyong / ting nge 'dzin 'di la yang dag par smra bas smra ba yin no/ /yang bzang skyong / yang dag par smra bas gang la sangs rgyas kyi rigs so/ /chos kyi rigs so/ /dge 'dun gyi rigs so/ /sangs rgyas kyi sa'o/ /thos pa'i rigs so/ /thos pa rgya mtsho lta bu'o/ /thos pa bsags pa'o/ /thos pa'i gzhi'o/ /yon tan bsags pa'o/ /bzod pa skyed pa'o| |byams pa skyed pa'o/ /snying rje thob pa'o/ /byang chub skyed pa'i chos so/ /zhes smra ba de dag ni/ bzang skyong / ting nge 'dzin 'di la yang dag par smra bas smra ba yin no/ /yang bzang skyong / yang dag par smra bas gang la lha dang / mi dang / lha ma yin du bcas pa'i 'jig rten gyi mun pa sel bar byed pa'i chos so/ /snang ba chen po byed pa'i chos so/ /zhes smra ba de dag ni/ bzang skyong / ting nge 'dzin 'di la yang dag par smra bas smra ba yin no/ /yang bzang skyong / yang dag par smra bas gang la de bzhin gshegs pa'i stobs bcu dang / de bzhin gshegs pa'i mi 'jigs pa bzhi dang / so so yang dag par rig pa bzhi dang / sangs rgyas kyi chos ma 'dres pa bco brgyad skyed par byed pa'i chos so/ /zhes smra ba de dag ni/ bzang skyong / ting nge 'dzin 'di la yang dag par smra bas smra ba yin no/ /bzang skyong / 'di ltar byang chub sems dpa' sems dpa' chen po dag 'di nyid na 'dug bzhin du 'jig rten gyi khams gzhan dag gi sangs rgyas kyang lta/ chos kyang nyan/
65a
@#/ /dge 'dun yang lta bar byed pa'i da ltar kyi sangs rgyas mngon sum du bzhugs pa'i byang chub sems dpa'i ting nge 'dzin 'di ji tsam du rgya che ba la ltos/ bzang skyong / de bas na/ byang chub sems dpa' sems dpa' chen po ting nge 'dzin rin po che 'di sgrub par 'dod pas dran pa nye bar gzhag pa bzhi la brtul ba brtan par bya'o/ /bzang skyong / byang chub sems dpa' sems dpa' chen po ji ltar dran pa nye bar gzhag pa bzhi la brtul ba brtan par bya zhe na/ bzang skyong / 'di la byang chub sems dpa' sems dpa' chen pos lus la lus kyi rjes su blta bar bya ste/ lus dang ldan pa'i rnam par rtog pa rnam par brtag par ni/ mi bya'o/ /tshor ba la tshor ba rjes su blta bar bya ste/ tshor ba dang ldan pa'i rnam par rtog pa rnam par brtag par mi bya'o/ /sems la sems kyis rjes su blta bar bya ste/ sems dang ldan pa'i rnam par rtog pa rnam par brtag par mi bya'o/ /chos la chos kyi rjes su blta bar bya ste| chos dang ldan pa'i rnam par rtog pa rnam par brtag par mi bya'o/ /bzang skyong / de bzhin gshegs pa dgra bcom pa yang dag par rdzogs pa'i sangs rgyas rnams dang / byang chub sems dpa' sems dpa' chen po phyir mi ldog pa rnams dang / nyan thos lus mngon sum du byed pa rnams ma gtogs par ting nge 'dzin 'di la su zhig mngon par dang bar 'gyur/ bzang
65b
skyong / de ci'i phyir zhe na/ da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di la byis pa so so'i skye bo thams cad kyis ni/ 'khrul to/ /bzang skyong / de ci'i phyir zhe na/ chos de dag nyid yid la bya/ chos de dag nyid blta bar bya/ sangs rgyas bcom ldan 'das dag kyang nyid la bya/ de bzhin gshegs pa rnams kyang blta bar bya/ chos kyang mnyan par bya ste/ mngon par zhen par ni/ mi bya'o/ /bzang skyong / de ci'i phyir zhe na/ chos 'di dag thams cad ni/ rang bzhin gyis stong pa/ rang bzhin gyis yongs su dag pa ste/ thog ma nyid nas nye bar zhi ba'o/ /bzang skyong / chos 'di dag thams cad ni/ dmigs pa'i dbang du gyur pas dmigs su med pa'o/ /chos 'di dag thams cad ni/ yid la bya ba de nyid kyis dben pa'o// chos 'di dag thams cad ni/ rang bzhin gyis dmigs su med pas gzung du med pa'o/ /chos 'di dag thams cad ni/ nam mkha' dang 'dra bas mi chags pa'o/ /chos 'di dag thams cad ni/ bdag dang sems can gyi 'du shes dang bral ba'i phyir shin tu rnam par dag pa'o/ /chos 'di dag thams cad ni/ rgyu'i dbang las gyur pas nyon mongs pa med pa'o/ /chos 'di dag thams cad ni/ srog dang gang zag mi dmigs pa'i phyir bgrang du med pa'o/ /chos 'di dag thams cad ni/ rang bzhin gyis 'od gsal bas mya ngan las 'das pa dang mnyam pa'o/ /chos 'di dag thams cad ni/
66a
@#/ /dngos po mi dmigs pa'i phyir nye bar gyur pa'o/ /bzang skyong / rigs kyi bu'am/ rigs kyi bu mo gang la la ting nge 'dzin 'di sgom par 'dod par gyur na/ des ci nas kyang sangs rgyas bcom ldan 'das rnams kyang mthong zhing sangs rgyas rjes su dran pa dang ldan pa'i dran pa yang dag pa byang chub kyi yan lag kyang sgom par byed/ chos kyang nyan cing chos la chos 'byed pa yang dag byang chub kyi yan lag kyang sgom par byed la/ bdag kyang mi dmigs shing chos kyang mi snyems pa de ltar mtshan ma'i rnam pas 'jug pas mtshan ma med pa'i 'jug pa la 'jug par bya'o/ /bzang skyong / de ci'i phyir zhe na/ 'di ltar dngos po'i 'du shes can gyis sangs rgyas mthong bar mi 'gyur ro/ /chos kyi 'du shes can gyis chos mthong bar mi 'gyur ro/ / rnam par smin pa la re bas ni/ gtong ba phun sum tshogs par mi 'gyur ro/ /sgom pa la mngon par dga' bas ni/ tshul khrims rnam par dag par mi 'gyur ro/ /chos la ser sna byed pas ni/ mang du thos par mi 'gyur ro/ /gang zag la rten pas ni/ yongs su mya ngan las 'da' bar mi 'gyur ro/ /bre mo gtam la mngon par dga' bas ni/ dben pa mthong bar mi 'gyur ro/ /gnas la dga' bas ni/ 'bras bu thob par mi 'gyur ro/ /rjes su chags pas ni/ skyon mthong bar mi 'gyur ro/ /gnod sems la mngon par dga' bas ni/ /bzod pa dang des par mi 'gyur ro/ /zhe
66b
sdang zhing zhe 'gras pas ni/ phan yon mthong bar mi 'gyur ro/ /nyan thos kyi theg pa pa'i rigs kyi bu'am /rigs kyi bu mos gang gi phyir bzod pa thob par 'gyur ba'i da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di mngon sum du mi 'gyur ro/ /byang chub sems dpa' la ni/ ser sna mi 'byung ngo / /dmigs pa can ni/ stong pa nyid sgom par mi 'gyur ro/ /le lo can ni/ mngon par rtogs pa thob par mi 'gyur ro/ /'dod pa la sten pa ni/ zhi gnas su mi 'gyur ro/ /rten pa ni/ sgom pa 'grub par mi 'gyur ro/ /bzang skyong / de bas na| ting nge 'dzin 'di ci nas kyang nub par mi 'gyur bar lha dang bcas pa'i 'jig rten la gtad do/ /bcom ldan 'das kyis chos kyi rnam grangs 'di bshad pa'i tshe 'dod pa na spyod pa dang / gzugs na spyod pa'i lha'i bu khrag khrig phrag bco brgyad bla na med pa yang dag par rdzogs pa'i byang chub tu sems skyes so/ /srog chags lha dang / mi dang / lha ma yin du bcas pa'i skye rgu brgyad stong yang bla na med pa yang dag par rdzogs pa'i byang chub tu sems skyes so/ /de dag thams cad kyang de bzhin gshegs pa gang+gA'i klung gi bye ma snyed la sems rnam par grol bar gyur nas gang bla na med pa'i byang chub tu sems dang po bskyed pa de dag ming tha dad kyis kyang tshe'i tshad gcig par bla na med pa yang dag par rdzogs pa'i byang chub mngon par rdzogs par 'tshang rgya bar 'gyur na/
67a
@#/ /bzang skyong / yang gang gis nga sngon byang chub sems dpa'i spyad pa spyod pa na nga la mnyes par byas pa lta ci smos/ gang gis nga sngon byang chub sems dpa'i spyad pa spyod pa na grogs por gyur pa lta smos kyang ci dgos te/ de dag ni/ myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /bzang skyong / chos 'di bshad pa'i tshe sems can tshad med pa rnams kyang ye shes mthong ba skyes so/ /dge slong brgyad brgya'ang len pa med par zag pa las sems rnam par grol lo/ /de nas de'i tshe bcom ldan 'das kyis tshigs su bcad pa 'di dag gsungs so/ /gang dag ting 'dzin 'di ni 'dzin gyur pa/ /de dag shes rab tshad ni cung zad med/ /tshul khrims tshad dang rdul dang dri ma med/ /tshul khrims rnam dag sems kyang yongs su dag /gang dag ting 'dzin 'di ni 'dzin gyur pa/ /de dag shes rab nam yang nyams pa med/ /ting 'dzin thos nas nam yang nyams pa med| |zla ba bzhin du yon tan thams cad ston/ /gang dag ting 'dzin 'di ni 'dzin gyur pa/ /des ni sangs rgyas bsam mi khyab pa bstod/ /des ni chos kyang bsam mi khyab pa mthong / / de la bsam mi khyab pa'i lha rnams srung / /sngon gyi sangs rgyas bsam gyis mi khyab byung / /des ni bsam gyis mi khyab chos bshad pa/ /gang zhig ting 'dzin 'di ni 'dzin gyur pa/ /des ni
67b
thams cad mthong zhing bsnyen bkur byas/ /gang zhag ting 'dzin 'di ni 'dzin gyur pa/ /rgyal ba gang dag sdug bsngal kun sgrol ba/ /'jig rten don du byung ste bzhugs pa yi/ /rgyal ba de dag de yis gus byas 'gyur/ /ma byon sangs rgyas mang po bsam mi khyab/ /dang ba'i sems kyis bsnyen bkur bya ba'i phyir/ /byang chub sems dpa' gang zhig lta 'dod pas/ /ting nge 'dzin mchog 'di ni gzung bar byos/ /gang zhig ting 'dzin 'di ni 'dzin gyur pa/ /mi de dag ni rnyed pa bsam mi khyab/ /de dag mi yi 'jig rten legs par 'ongs/ /rang byung legs spyad bsod snyoms legs par zos/ /phyi ma'i dus na ting 'dzin mchog 'di ni/ /gang gi lag tu gnas par gyur pa de/ /rnyed pa dam pa shin tu legs par rnyed/ /des ni bsam gyis mi khyab chos kyang bzung / / bzang skyong gis zhus pa'i ting nge 'dzin gyi le'u ste bco lnga pa'o// //de nas byang chub sems dpa' sems dpa' chen po bzang skyong stan las langs te bla gos phrag pa gcig tu bgos nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das thugs brtse ba'i slad du sang dge slong gi dge 'dun dang thabs cig tu bdag gi bshos gsol bar ci gnang / bcom ldan 'das kyis thugs brtse ba'i phyir byang chub sems dpa' sems
68a
@#/ /dpa' chen po bzang skyong la cang mi gsung bas gnang ngo / /de nas byang chub sems dpa' sems dpa' chen po bzang skyong gis bcom ldan 'das kyis cang mi gsung bas gnang bar shes nas bcom ldan 'das kyi zhabs la mgo bos phyag 'tshal te lan gsum bskor ba byas nas bcom ldan 'das kyi drung nas song ste/ dge slong ma skye rgu'i bdag mo chen mo ga la ba der song nas phyin pa dang / dge slong ma skye rgu'i bdag mo chen mo gau ta ma'i rkang pa la mgo bos phyag btsal nas phyogs gcig tu 'dug go/ phyogs gcig tu 'dug nas kyang byang chub sems dpa' sems dpa' chen po bzang skyong gis dge slong ma skye rgu'i bdag mo chen mo gau ta ma la 'di skad ces smras so/ /'phags ma thugs brtse ba'i slad du sang dge slong ma'i dge 'dun dang thabs cig bdag gi bshos gsol bar ci gnang / dge slong ma skye rgu'i bdag mo chen mo gau ta mas snying brtse ba'i phyir byang chub sems dpa' sems dpa' chen po bzang skyong la cang mi smra bas gnang ngo / /de nas byang chub sems dpa' sems dpa' chen po bzang skyong gis dge slong ma skye rgu'i bdag mo chen mo gau ta mas cang mi smra bas gnang bar rig nas dge slong ma skye rgu'i bdag mo chen mo gau ta ma'i rkang pa la mgo bos phyag 'tshal te lan gsum bskor ba byas nas song ngo / /song nas kyang li tsa byi gzhon nu rin chen 'byung gnas ga la ba
68b
der song ste phyin pa dang / li ca byi gzhon nu rin chen 'byung gnas la 'di skad ces smras sa/ /nye du bo rgyal po'i khab 'od ma'i tshal bya ka lan+ta ka gnas pa 'dir rgyal po'i khab 'di'am/ ljongs kyi phyogs gzhan dag nas dge bsnyen ji snyed cig 'dus pa thams cad 'khor dang bcas te kho bo'i tshig gis sang gi gdugs tshod la mgron du bos shig /de nas li tsa byi gzhon nu rin chen 'byung gnas kyis 'khor der dge bsnyen ji snyed cig 'dus pa de dag thams cad la byang chub sems dpa' sems dpa' chen po bzang skyong gis khyed cag 'khor dang bcas par sang mgron du bos ste// zhes bsgo'o/ /de nas byang chub sems dpa' sems dpa' chen po bzang skyong dang / li tsa byi gzhon nu rin chen 'byung gnas dang / khyim bdag ded dpon che bzang dang / tshong dpon gyi bu phug sbas dang / bram ze 'dam bus byin dang / khyim bdag chu lha dang / khyim bdag dbang pos byin dang / khyim bdag gzhan dag kyang rang rang gi stan las langs te bcom ldan 'das kyi zhabs la mgo bos phyag 'tshal nas bcom ldan 'das la lan gsum bskor ba byas nas dge slong gi dge 'dun gyi zhabs la'ang mgo bos phyag bcal te 'od ma'i tshal nas byung nas rgyal po'i khab kyi grong khyer chen po ga la ba dang / bzang skyong gi khyim ga la ba der dong ste lhags pa dang / de nyid kyi nub mo de dag thams cad dang / tha na slong ba rnams kyi phyir yang bca' bar bya ba dang / bza' bar bya ba dang / myang bar
69a
@#/ /bya ba dang / bdag par bya ba bsod pa mang du sbyar ro/ /zas ro brgya pa'ang bshams shing g.yos so/ /de ci'i phyir zhe na/ byang chub sems dpa' sems dpa' chen po rnams bsam pa rlabs po che dang / brnyas pa med pa la gnas shing / sems can thams cad la sems mnyam par zhugs pa yin no/ /de nas lha rnams kyi dbang po brgya byin dang / mi mjed kyi bdag po tshangs pa dang / lha'i bu mtshams bzang dang / rgyal po chen po bzhi rnams kyis mi mang po'ang sprul te skyo ba skye ba'i tshul du khyim bdag de rnams la byang chub kyi phan gdags pa dang / yongs su smin par bya ba'i phyir brtson par byed par gyur to/ /de nas byang chub sems dpa' bzang skyong dang / li tsa byi gzhon nu rin chen 'byung gnas de dag dang / khyim bdag gzhan dag kyang rang rang gi gnyen rnams dang lhan cig tu rgyal po'i khab kyi grong khyer chen po thams cad dang ldan par phyag dar bya ba rnams kyang phyag dar legs par byas/ dar gyi lda ldi ni/ bres/ spos kyi snod kyis ni/ bdugs/ me tog gi sil mas ni/ 'thor du bcud do/ /de nas byang chub sems dpa' sems dpa' chen po bzang skyong rang gi gnyen dang bcas pas rgyal po'i khab kyi grong khyer chen po'ang brgyan/ ro brgya dang ldan pa'i bshos kyang sbyar te/ de'i mtshan mo 'das nas gnyen gyis bskor cing mdun du
69b
bdar te lhan cig tu bcom ldan 'das ga la ba der dong ste lhags pa dang / bcom ldan 'das kyi zhabs la mgo bos phyag btsal nas bcom ldan 'das la lan gsum bskor ba byas te/ btsun pa bcom ldan 'das/ bshos kyi dus la bab po/ /btsun pa bcom ldan 'das/ bshos kyi tshod la bab bo/ /bshos ni/ sbyar lags te/ da de'i dus la bab par mkhyen par mdzad du gsol zhes gdugs tshod la bab par gsol lo/ /de nas bcom ldan 'das snga dro'i dus kyi tshe chos gos dang sham thabs mnabs/ lhung bzed bsnams nas dge slong gi dge 'dun dang thabs cig /dge slong ma'i dge 'dun dang thabs cig /dge bsnyen dang / dge bsnyen ma'i 'khor rnams dang yang thabs cig bskor cing mdun du bdar te byang chub sems dpa' sems dpa' chen po bzang skyong gi khyim ga la ba der gshegs so/ /de nas byang chub sems dpa' sems dpa' chen po bzang skyong 'di snyam du sems te/ bcom ldan 'das kyis ji lta bu'i rdzu 'phrul mngon par mdzad pas bdag gi khyim 'di yangs shing rgya che la bai DUR+Ya sngon po lta bur gyur te/ grong khyer gyi skye bo thams cad kyis kyang mthong zhing 'khor mang po 'di dag kyang bag yongs su 'khod pa de lta bu'i rdzu 'phrul mngon par mdzad pa mngon par mdzad na legs so/ /snyam du bsam mo/ /de nas bcom ldan 'das kyi thugs kyis byang chub sems dpa' sems dpa'
70a
@#/ /chen po de'i sems kyi rtog pa mkhyen nas ji lta bu'i rdzu 'phrul mngon par mdzad pa mngon par mdzad pas byang chub sems dpa' sems dpa' chen po bzang skyong gi khyim de yangs shing rgya che la baiDUR+Ya sngon po lta bur gyur te/ grong khyer gyi skye bo thams cad kyis kyang ci nas kyang mthong zhing 'khod de/ de dag thams cad kyang bag yangs su 'khod pa de lta bu'i rdzu 'phrul mngon par mdzad pa mngon par mdzad do/ /de nas bcom ldan 'das byang chub sems dpa' sems dpa' chen po bzang skyong gi khyim du gshegs so/ / gshegs nas kyang dge slong dang / dge slong ma'i dge 'dun dang / dge bsnyen dang / dge bsnyen ma'i 'khor rnams dang thabs cig tu gdan bshams pa la bzhugs so/ /de nas byang chub sems dpa' sems dpa' chen po bzang skyong dang / li tsa byi gzhon nu rin chen 'byung gnas dang / khyim bdag ded dpon che bzang dang / tshong dpon gyi bu phug sbas dang / bram ze 'dam bus byin dang / khyim bdag dbang pos byin dang / khyim bdag chu lha rnams kyis bcom ldan 'das bzhugs par rig /dge slong gi dge 'dun dang / dge slong ma'i dge 'dun dang / dge bsnyen dang / dge bsnyen ma'i 'khor rnams kyang 'khod par rig nas sangs rgyas la sogs pa dge slong gi dge 'dun dang / dge slong ma'i dge 'dun dang / dge bsnyen dang /
70b
dge bsnyen ma'i 'khor rnams la rang gi lag gis bca' bar bya ba dang / bza' bar bya ba dang / myang bar bya ba dang / ro rnam pa brgya dang ldan pa'i thas bsod pa mang pos tshim par byas so/ / bstabs so/ /rang gi lag gis bza' bar bya ba dang / bca' bar bya ba dang / myang bar bya ba dang / ro sna brgya dang ldan pa'i zas bsod pa mang pos tshim par byas shing bstabs nas bcom ldan 'das bshos gsol/ phyag bcabs/ lhung bzed gyu bar rig pa dang / ci rigs pa'i stan zhig blangs nas bcom ldan 'das la mdun gyis bltas te bcom ldan 'das kyi spyan sngar 'dug go /de nas bcom ldan 'das kyis byang chub sems dpa' sems dpa' chen po bzang skyong dang / li tsa byi gzhon nu rin chen 'byung gnas dang / khyim bdag ded dpon che bzang dang / tshong dpon gyi bu phug sbas dang / bram ze 'dam bus byin dang / khyim bdag dbang pos byin dang / khyim bdag chu lha rnams dang / 'khor bzhi po de dag la chos kyi gtam gyis yang dag par dga' bar mdzad do/ /yang dag par 'dzin du bcug go /yang dag par gzengs bstod do/ /yang dag par mgu bar mdzad do/ /chos kyi gtam gyis yang dag par dga' bar mdzad/ yang dag par 'dzin du bcug /yang dag par gzengs bstod/ yang dag par mgu bar mdzad nas bzhengs te/ dge slong gi dge 'dun dang thabs cig tu slar gshegs so/ /de nas byang chub
71a
@#/ /sems dpa' sems dpa' chen po bzang skyong zas kyi bya ba byas nas rang gi mdza' bo dang / gnyen dang / snag gi gnyen mtshams rnams dang lhan cig tu srog chags 'bum du tshang bas bskor cing mdun du bdar te lhan cig tu bcom ldan 'das ga la ba de logs su dong ste lhags pa dang / bcom ldan 'das kyi zhabs la mgo bos phyag btsal nas lan gsum bskor ba byas te phyogs gcig tu 'khod do/ /byang chub sems dpa' sems dpa' chen po rin chen 'byung gnas dang / ded dpon che bzang dang / phug sbas dang / 'dam bus byin dang / mtshams bzang dang / dbang pos byin dang / byang chub sems dpa' sems dpa' chen po chu lha rnams lhan cig tu bcom ldan 'das kyi zhabs la mgo bos phyag 'tshal nas lan gsum bskor ba byas te phyogs gcig tu 'khod do/ /de nas byang chub sems dpa' sems dpa' chen po bzang skyong gis 'khor thams cad 'khod par rig nas bcom ldan 'das la 'di skad ces gsol to/ /btsun pa bcom ldan 'das/ chos du dang ldan na/ byang chub sems dpa' sems dpa' chen po da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di 'thob par 'gyur/ rna blags te nyan pa dang / sems mi g.yeng ba'i slad du kun tu 'dzin pa dang / mi bskyud par 'gyur/ kun tu bzung nas
71b
kyang 'thob par 'gyur/ de skad ces gsol pa dang / bcom ldan 'das kyis byang chub sems dpa' sems dpa' chen po bzang skyong la 'di skad ces bka' stsal to/ /bzang skyong / chos lnga dang ldan na| byang chub sems dpa' sems dpa' chen po da ltar gyi sangs rgyas mngon sum du zhugs pa'i byang chub sems dpa'i ting nge 'dzin 'di 'thob par 'gyur ro/ /rna blags te nyan pa dang / sems mi g.yeng ba'i phyir kun tu 'dzin pa dang / mi brjed par 'gyur/ kun tu bzung nas kyang 'thob par 'gyur ro/ /bzang skyong / lnga gang zhe na/ 'di la byang chub sems dpa' sems dpa' chen po chos zab mo la bzod pa dang ldan pa yin te/ zad mi shes pa/ zad pa dang bral ba/ mi zad pa/ rnam par mi zad pa/ rnyog pa med pa/ rnyog pa las yang dag par 'das pa/ dri ma med pa| dri ma dang bral ba/ rdul med pa/ rdul dang bral ba/ rdul las 'das pa/ rdul thams cad dang bral ba'i mi skye ba'i chos la bzod pa dang ldan pa ste/ bzang skyong / chos dang po 'di dang ldan na/ byang chub sems dpa' sems dpa' chen po da ltar gyi sangs rgyas mngon sum du bzhugs pa'i ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po 'du byed thams cad la spyod cing / byang chub la rten pa ma gtogs par skye ba'i gnas thams cad mi 'dod pa dang / sangs rgyas bcom ldan 'das la lta bar 'dod cing / mu stegs can gyi skye
72a
@#/ /mched thams cad dang / mu stegs can gyi sngags thams cad la mi rten pa dang / 'dod pa'i longs spyod mi 'dod pa dang / tshangs par spyod pa la mngon par dga' ste 'khrig pa'i chos spangs nas de rtog pa tsam gyis kyang 'dod pa la mi rten na/ dbang po gnyis sprod pa lta ci smos te/ bzang skyong / chos gnyis pa 'di dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po sems tshad med pa rnams bsgoms shing / sems shin tu legs par bsdus la gnod pa med pa'i sems su gyur pa dang / sems can thams cad la sems mnyam par gyur cing sems can thams cad la bsdu ba'i dngos po bzhis sdud pa ste/ bzhi gang zhe na/ sbyin pa dang / snyan par smra ba dang / don spyod pa dang / don mthun pa ste/ bzhi'o/ /bzang skyong / chos gsum pa 'di dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po byams pa chen po dang ldan par gyur pa dang / snying rje chen po dang / dga' ba chen po dang / btang snyoms chen po la spyod pa yin te/ de dge slong ngam/ dge slong \?\ na ltung ba byung ba mi gleng zhing dang du len pa'i rang bzhin can yin pas bzod pa yin/ de mkhan po dang slob dpon la gus
72b
pa dang bcas/ zhes dang bcas shing ston par 'du shes pa yin/ bdag kyang bdag tu smra ba ma yin/ sems can du smra ba ma yin/ srog tu smra ba ma yin/ gang zag tu smra ba ma yin/ gso bar smra ba ma yin/ skyes bur smra ba ma yin/ shed las skyes su smra ba ma yin/ shed bur smra ba ma yin zhing gzhan dag kyang chos 'di la skul ba ste/ bzang skyong / chos bzhi po 'di dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po chos kyi rjes su mthun pa'i chos la nan tan byed pa yin/ lus kyi spyod pa yongs su dag pa dang / ngag gi spyod pa yongs su dag pa dang / yid kyi spyod pa yongs su dag pa dang / lta ba yongs su dag pa dang / 'tsho ba yongs su dag cing mang du thos pa yin/ sangs rgyas bcom ldan 'das rnams dang thabs cig tu dgongs pa'i tshig la mkhas pa yin te/ bzang skyong / chos lnga po 'di \?\ dang ldan na/ byang chub sems dpa' sems dpa' chen po de ni/ ting nge 'dzin 'di 'thob bo/ /bzang skyong / chos lnga po de dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po chos gzhan lnga dang ldan na/ ting nge 'dzin 'di 'thob ste/ lnga gang zhe na/ bzang skyong / 'di la byang chub sems dpa' sems dpa' chen po sbyin
73a
@#/ /pa'i bdag po sbyin pa byed pa yin te/ sems la bsri ba med pa/ 'jungs pa med pa/ lhug par gtong ba/ lag pa brkyang pa/ sbyin pa 'ged par dga' ba/ rnam par smin pa la re ba med par bdog pa thams cad yongs su gtong ba/ sems can rnams la snying brtse ba/ 'gyod pa dang bral ba/ sbyin pa byin nas 'gyod par mi byed pa yin te/ bzang skyong / chos dang po 'di dang ldan na/ byang chub sems dpa' sems dpa' chen po da ltar gyi sangs rgyas mngon sum du bzhugs pa'i ting nge 'dzin 'di tha na thos pa tsam yang 'thob bo| |bzang skyong / gzhan yang byang chub sems dpa' sems dpa' chen po sbyin pa'i bdag po sbyin pa byed pa yin te/ 'di ltar bla na med pa'i chos sbyin par byed pa/ shin tu nges par gsungs pa'i tshig dang / yi ge dang / thogs pa med pa'i tshig dang / yi ge dang / 'chab pa med pa'i nges pa'i tshig dang / zab mo don dam pa'i tshul bstan pa de bzhin gshegs pas gsungs pa'i bla na med pa'i chos kyi sbyin pa gtong zhing de la gnas par gyur pa/ bzod pa phun sum tshogs pa dang / des pa phun sum tshogs par gyur pa dang / de gzhan gyis kha byas shing spyos kyang mi khro/ mi gshe/ gnod par mi byed/ rmongs par mi byed/ yi chad par mi 'gyur zhing / khro ba mang bar mi 'gyur zhing / 'jigs pa med pa yin te/ bzang
73b
skyong / chos gnyis pa 'di dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po ting nge 'dzin 'di thos nas dam pa'i chos yun ring du gnas par bya ba dang / rgyas par byed par bya ba'i phyir gzung bar bya/ kun chub par bya/ bcang bar bya/ bklag par bya/ gzhan dag la'ang rgya cher yang dag par bshad par bya/ glegs bam du'ang bris te bcang bar bya zhing chos la 'jungs pa med par bya ste/ bzang skyong / chos gsum pa de dang ldan na/ byang chub sems dpa' sems dpa' chen po ting nge 'dzin 'di 'thob bo/ /bzang skyong / gzhan yang byang chub sems dpa' sems dpa' chen po phrag dog med pa/ gdung ba med pa/ rmugs pa dang gnyid dang bral ba/ sgrib pa rnams dang bral ba/ bdag la mi bstod pa gzhan la mi smod pa yin te/ bzang skyong / chos bzhi pa de dang ldan na/ byang chub sems dpa' sems dpa' chen po ting nge 'dzin 'di 'thob bo// bzang skyong / gzhan yang byang chub sems dpa' sems dpa' chen po dad pa dang ldan pa dang / dang ba mang ba yin/ rkan pa dang / bar ma dang / gzhon pa rnams la gus pa dang bcas/ rjes dang bcas pa yin/ byas pa shes pa dang byas pa gzo ba yin/ de byas pa cung zad la'ang drin du gzon/ mang po lta ci smos/ bden pa'i tshig la gnas shing gzhan du mi smra ba yin te/
74a
@#/ /bzang skyong / chos de lnga dang ldan na/ byang chub sems dpa' sems dpa' chen po ting nge 'dzin 'di 'thob bo/ /de nas de'i tshe bcom ldan 'das kyis tshigs su bcad pa 'di dag gsungs so/ /zab mo'i chos la bzod pa skyed byed cing / /'gro ba thams cad la ni smod byed pa/ /'gro ba drug po kun kyang mi 'dod pa/ /de 'dra nges ni ting 'dzin myur du 'thob// phas kyi rgol ba kun la mi rten cing / /gsang tshig nyan par mi byed ga la 'dzin/ /'dod pa'i yon tan lngas ni skyo bar gyur/ /de 'dra des ni ting 'dzin myur du thob/ /tshul khrims rnam dag tshangs par spyod gnas te/ /bud med la ni nam yang rtog mi skyed/ /'dod chags spangs shing bde gshegs sras gyur ba/ /de 'dra des ni ting 'dzin myur du thob/ /rnam smin mi re bar ni sbyin pa byin/ /rten pa med par byin nas mi gdung zhing / /sangs rgyas ye shes reg bya ma gtogs par/ /sbyin pa byin nas smon pa cung zad med/ /sems can snying brtse phyir ni sbyin byin nas/ /mya ngan byed pa med cing 'gyod pa med/ /sbyin dang dul dang bsdams la rtag tu gnas/ /de 'dra des ni ting 'dzin 'di rnyed 'gyur/ /gang zhig 'jungs med sbyin bdag sbyin byed pa/ / gya nom pa dang yid 'ong sbyin pa byin/ /byin nas de ni yid kyang dga' bar 'gyur/ /de 'dra des ni ting 'dzin 'di rnyed 'gyur/ /bde gshegs gsungs pa zab cing zhi ba yi/ /gya nom
74b
mdo sde dag ni 'chang byed cing / /gang dag chos kyi sbyin bdag gyur pa ni/ /de 'dra des ni ting 'dzin 'di rnyed 'gyur/ /chos la rtag tu gnas par gyur byas nas/ /bzod dang des la gnas shing phrag dog med/ /gzhan dag khros na khro bar mi byed pa/ /de 'dra des ni ting 'dzin 'di rnyed 'gyur/ /gang dag la la ting 'dzin 'di 'don cing / /chos 'di ring du gnas par bya ba'i phyir/ /gzhan la'ang ston cing bris nas 'jog byed pa/ /de 'dra des ni ting 'dzin 'di rnyed 'gyur/ /nam yang chos la 'jungs par mi 'gyur zhing / /bde gshegs sras 'gyur phyir ni ma gtogs par/ /rnyed dang bkur sti'i phyir ni mi 'chad pa/ /de 'dra des ni chos 'di rnyed par 'gyur/ /phrag dog med cing sgrib pa rnam par spangs/ /gnyid dang bral la kun tu gdung ba med/ /bdag la mi bstod gzhan la mi smod pa/ /des ni bdag med 'du shes rnyed mi dka'/ /dad dang ldan la sgyu med g.yo med cing / /sangs rgyas chos dang dge 'dun rnams la dad/ /des ni byas pa shes shing byas pa srung / /des ni cung zad tsam yang rnyed mi dka'/ /rtag tu bden pa'i tshig ni smra byed cing / /chung ngam nyung ngam mang ngam bzang yang rung / /nam yang legs spyad chud mi gson pa yi/ /chos 'dod de ni rnyed par dka' mi 'gyur/ /tshul khrims rnam dag byas pa srung ba yi/ /mi gang la la chos 'di 'chang byed pa/ /des ni byang chub rnyed par mi dka' na/ /ting 'dzin zhi ba 'di lta smos ci dgos/ /
75a
@#/ /bzang skyong gis zhus pa'i ting nge 'dzin gyi le'u ste bcu drug pa'o// //bzang skyong / ngas mngon par shes te/ 'das pa'i dus na de bzhin gshegs pa mar me mdzad mthong ma thag tu de las ngas ting nge 'dzin 'di thob bo/ /ngas ting nge 'dzin 'di thob ma thag tu de'i mod la tshad med grangs med pa'i sangs rgyas bcom ldan 'das nga'i mig lam du snang bar gyur/ dam pa'i chos 'chad pa'ang thos shing de thams cad kyang ji skad du thos pa bzhin du 'dzin par gyur to/ /sangs rgyas bcom ldan 'das de dag kyang nga la bram ze'i khye'u khyod ma 'ongs pa'i dus na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya ba rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das su 'gyur ro/ /zhes lung bstan to/ / bzang skyong / de bas na/ khyed kyis 'phags pa byis pa rnams spangs pa mtshan ma thams cad dang bral ba'i chos 'di la bslab par bya'o/ /de nas khyed ting nge 'dzin 'di la gnas pa rnams bla na med pa yang dag par rdzogs pa'i byang chub mi dka' bar rnyed par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /sangs rgyas mar me mdzad
75b
mthong nas/ /ngas ni ting nge 'dzin kyang bsgoms/ /sangs rgyas mang po mthong nas kyang / /mchog gi chos kyang thob par gyur/ /ji ltar bsod nams byas pa dag /bsam pa bzang po 'grub pa bzhin| |khyed kyang chos la spyod cig dang / /byang chub mchog ni thob par 'gyur/ /sangs rgyas bye ba bsam mi khyab/ /mtha' med cing ni mu med pa/ /byang chub zhi ba tshol byed cing / /gang dag ngas ni sngon bkur ba/ /byang chub de ni ngas rnyed de/ /chos kyi 'khor lo rab tu bskor/ /gang dag byang chub bzhag pa ni/ /sems can bye ba du ma'o/ /lha dang klu dang gnod sbyin dang / /dri za mi 'am ci yi rnams/ /e ma'o sangs rgyas bsam yas shes/ /mchod pas nga la mchod pa byed/ /mkhas pas mi ni gang dag kyang / /sangs rgyas chos la ston 'dod pas/ /mang du thos par bya ba'i phyir| |'dun pa nyid ni bstan par bya/ /sangs rgyas bye ba phrag gsum cu/ shAkya seng+ge mi yi mchog /byang chub zhi ba tshol byed cing / /gang dag ngas ni sngon bkur ba/ /sangs rgyas bsam yas de dag gis/ /der ni nga la lung ma bstan/ /dmigs su med pa'i ye shes la/ /nga ni gnas par ma gyur to/ /sangs rgyas gtso bo skyob pa'i rnams/ /de bzhin bsdus par shes par byed/ / bye ba khrag khrig du ma'i rnams/ /gang dag ngas ni sngon bkur ba/ /des ni nga yi bsam mkhyen nas/ /de bzhin gshegs pas lung bstan kyang / /sangs rgyas ye shes bsam yas la//
76a
@#/ /nga ni gnas par ma gyur to/ /de yi phyir ni don dam la/ /brtson pa bzang po dag kyang byos/ /sangs rgyas bsam gyis mi khyab pa'i/ /ye shes mchog la'ang bslab par byos/ /mdo sde 'di la bslab byas nas/ /'jig rten mgon po'i spyod yul la/ /bla na med pa'i ye shes mchog /bsam gyis mi khyab rtogs par 'gyur/ /e ma'o/ bla med ye shes dang / /sangs rgyas ye shes bsam yas shes/ /bzang skyong sems ni dga' mgu zhing / /gus pa dang yang bcas par gyur/ /ma 'ongs dus na bdag cag kyang / / chos 'dzin phyi mar 'gyur zhes te/ /lnga brgya tshang ba de dag kyang / /sems dga' gus dang bcas par gyur/ /bzang skyong gis zhus pa'i ting nge 'dzin gyi le'u ste bcu bdun pa'o|| ||bam po drug pa/ de skad ces bka' stsal pa dang / byang chub sems dpa' sems dpa' chen po bzang skyong gis bcom ldan 'das la 'di skad ces gsol to/ /btsun pa bcom ldan 'das/ byang chub sems dpas ting nge 'dzin 'di ji ltar bsgom par bgyi/ bcom ldan 'das kyis bka' stsal pa/ bzang skyong / rigs kyi bu'am/ rigs kyi bu mo gang la la ting nge 'dzin 'di sgom 'dod par gyur na/ des gzugs la gnas par mi bya'o/ /tshor ba dang / sems dang / chos la gnas par mi bya'o/ /skye ba la gnas par mi
76b
bya'o| |chos thams cad la gnas par mi bya'o/ /stong pa nyid dang / mtshan ma med pa dang / smon pa med pa la gnas par mi bya'o/ /byams pa la gnas par mi bya'o/ /bzang skyong / de la ting nge 'dzin gang zhe na/ gang chos de dag la nan tan du byed kyi/ log pa'i nan tan du byed pa ma yin pa'o/ /bzang skyong / gzhan yang byang chub sems dpa' gang lus la lus kyi rjes su lta zhing gnas kyi| lus dang ldan pa'i rnam par rtog pa ni/ rnam par mi rtog pa dang / tshor ba dang / sems dang / chos la chos kyi rjes su lta zhing gnas kyi/ chos dang ldan pa'i rnam par rtog pa ni/ rnam par mi rtog pa'o/ /byang chub sems dpa' de ni/ ting nge 'dzin 'di 'thob bo/ /de ci'i phyir zhe na/ bzang skyong / de ni/ 'di ltar byang chub sems dpa' sems dpa' chen po lus la lus kyi rjes su lta zhing gnas te/ lus dang ldan pa'i rnam par rtog pa ni/ rnam par mi rtog /tshor ba dang / sems dang / chos la chos kyi rjes su lta zhing gnas te/ chos dang ldan pa'i rnam par rtog pa ni| rnam par mi rtog na/ chos thams cad mi dmigs par 'gyur ro/ /chos thams cad mi dmigs pa de mi rtog /rnam par mi rtog go /bzang skyong / gang mi rtog /rnam par mi rtog pa de ni/ chos gang yang mi mthong ngo / /bzang skyong / gang la chos gang yang mi mthong bde ni/ sgrib pa med pa'i ye shes zhes bya'o/ /bzang skyong / gang sgrib pa med pa'i ye shes de ni/ bzang skyong / ting
77a
@#/ /nge 'dzin ces bya'o/ /bzang skyong / byang chub sems dpa' gang ting nge 'dzin 'di dang ldan pa de ni/ sangs rgyas tshad med grangs med pa rnams mthong ngo / /dam pa'i chos kyang thos so/ /thos nas kyang kun chub par byed do/ /de bzhin gshegs pa dgra bcom pa yang dag par rdzogs pa'i sangs rgyas de dag gi gang sgrib pa med pa'i rnam par grol ba'i ye shes mthong ba dang / thogs pa med pa'i ye shes kyang 'thob bo/ /bzang skyong / gzhan yang byang chub sems dpa' lus la lus kyi rjes su lta zhing gnas te/ gnas nas kyang chos gang yang mi mthong ngo / /ma mthong nas kyang mi rtog /rnam par mi rtog cing / dmus long yang ma yin/ 'on pa'ang ma yin no/ /de bzhin du tshor ba dang / sems dang / chos la chos kyi rjes su lta zhing gnas te/ gnas nas kyang chos gang yang mi mthong ngo / /ma mthong nas kyang mi rten par 'gyur/ mi rten nas kyang lam sgom par byed/ lam rnam par bsgoms pa'i phyir de chos rnams la the tshom du mi 'gyur/ the tshom med bas sangs rgyas mthong bar 'gyur ro/ /sangs rgyas mthong nas kyang chos thams cad 'byung ba med pa'i phyir rnam par grol ba 'byung ngo / /de ci'i phyir zhe na/ bzang skyong / gal te byang chub sems dpa' chos kyi 'du shes 'jug na/ de nyid de'i dmigs par lta bar 'gyur ro/ /de nyid yod par lta ba dang /
77b
bdag tu lta ba dang / sems can du lta ba dang / srog tu lta ba dang / gang zag tu lta bar 'gyur ro/ /de nyid phung por lta ba dang / khams su lta ba dang / skye mched du lta ba dang / mtshan mar lta ba dang / dngos por lta ba dang / rgyur lta ba dang / rkyen du lta ba dang / dmigs pa 'dzin par 'gyur ro/ /de ci'i phyir zhe na/ bzang skyong / chos thams cad ni/ rang bzhin gyis stong pa dang / chos thams cad ni/ mtshan ma med pa/ mi gzung ba/ gzung ba med par byang chub sems dpas mthong ste/ de dag chos thams cad mi dmigs so/ /rlom sems su mi byed do/ / mi mthong ngo / /ji ltar mi dmigs shing rlom sems su mi byed la mi mthong zhe na/ bzang skyong / 'di lta ste/ dper na/ gzhan mu stegs can nam/ gzhan mu stegs can gyi nyan thos bdag tu 'du shes pa la gnas pa/ sems can dang / srog dang / gang zag tu 'du shes pa la gnas pa/ chos thams cad du 'du shes pa la gnas pa/ chos rnams la dmigs shing /rlom sems su byed pa/ mthong bar byed pa de ltar bzang skyong / byang chub sems dpas mi mthong ngo / /bzang skyong / yang byang chub sems dpas ji ltar mthong zhe na/ bzang skyong / 'di lta ste/ dper na/ de bzhin gshegs pa dang / phyir mi ldog pa'i byang chub sems dpa' rnams dang / rang sangs rgyas rnams dang / nyan thos dgra bcom pa rnams
78a
@#/ /kyis chos thams cad mthong ba de bzhin du bzang skyong / byang chub sems dpa' sems dpa' chen pos chos thams cad blta bar bya'o/ /de mthong nas mngon par dga' bar mi bya'o/ /mngon par dga' ba med pas dga' ba can du mi 'gyur zhing dga' ba dang bral te dga' ba yang dag par bcom pa'i byang chub sems dpa' ni/ ting nge 'dzin 'di sgom mo| |bzang skyong / 'di lta ste/ dper na/ nam mkha' gzugs med pa/ bstan du med pa/ gnas pa med pa/ shin tu rnam par dag pa/ nyon mongs pa med pa de bzhin du byang chub sems dpas chos thams cad la blta ste/ 'dus byas dang / 'dus ma byas kyi chos rnams la de'i mig thogs pa med par 'gyur ro/ /byang chub sems dpa' mig thogs pa med pa de la chos rnams mngon sum du 'gyur te/ de yid la byas na/ de bzhin gshegs pa dgra bcom pa yang dag par rdzogs pa'i sangs rgyas gser gyi ka ba brgyan pa lta bu/ 'od zer gyi rgyal po mngon par 'phags pa lta bu/ zla ba nya ba skar mas bskor ba lta bu/ 'khor los bsgyur ba'i rgyal po stobs kyi tshogs kyis bskor ba lta bu/ tshangs pa tshangs pa'i 'jig rten na tshangs pa'i stan la 'dug pa lta bu/ lha'i rgyal po brgya byin sum cu rtsa gsum pa'i lhas bskor ba lta bu/ ri'i rtse mo la me 'bar ba lta bu/ sman pa'i rgyal po sman gtong ba
78b
lta bu| ri dwags kyi rgyal po seng+ge ral pa can 'jigs pa med par wa thams cad skrag par byed pa lta bu/ ngang pa'i mchog bar snang la 'phur ba lta bu/ ri'i rgyal po ri rab rgya mtsho'i nang nas mngon par 'phags pa lta bu/ ri'i rgyal po gangs ri me tog dang sman thams cad yongs su rgyas pa lta bu/ ri khor yug rlung gi bu las skyes pas 'dzin cing 'greng ba lta bu/ rlung gi phung pos chu'i phung po 'dzin pa lta bu/ chu'i phung pos sa'i phung po 'dzin pa lta bu mthong ngo / /de nas de'i tshe bcom ldan 'das kyis tshigs su bcad pa 'di dag gsungs so/ /ri rab kyi ni rtse mdzes pa/ / dri med dri ma bral zhing dag /nam mkha' dang ni mnyam zhing 'dra/ /lha rnams kyis ni rab tu brgyan/ /bzang skyong / de bzhin du byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas de dag gzi brjid dang / dpal gyis stong gsum gyi stong chen po'i 'jig rten gyi khams thams cad du lham me/ lhan ne/ lhang nger dmigs par byas te mthong zhing chos 'chad pa'ang thos par 'gyur ro/ /thos nas kyang 'dzin par byed/ kun chub par byed/ 'chang bar byed de/ byang chub sems dpa' de'i ting nge 'dzin 'di las langs nas kyang chos ji skad du thos pa dang / ji ltar bzung ba dang / ji ltar kun chub par byas pa bzhin du gzhan dag la'ang rgya cher ston par 'gyur/ 'chad par 'gyur ro/ /bzang
79a
@#/ /skyong / de ltar ting nge 'dzin 'di ni/ byang chub sems dpa' rnams la phan 'dogs pa mang du byed pa'o/ /'di lta ste/ 'jig rten dang / 'jig rten las 'das pa'i chos rnams kyi yon tan mang po skyed par byed pa'o/ /bzang skyong / de bas na/ byang chub 'dod pa'i rigs kyi bu'am rigs kyi bu mos ting nge 'dzin 'di gzung bar bya'o/ / kun chub par bya'o/ /bcang bar bya'o/ /bklag par bya'o/ /bri par bya'o/ /gzhan dag la'ang rgya cher bshad par bya'o/ /bstan par bya'o/ /bsgrag par bya'o/ /sgom pa'i sbyor ba la'ang brtson par bya'o/ /de nas de'i tshe bcom ldan 'das kyis tshigs su bcad pa 'di dag gsungs so/ /dri bral rdul bral dri med sangs rgyas te/ /chags pa med cing skye bo mang pos mchod| |rnga rdung 'khar rnga lha yi rol mo'i sgra/ /rol mo phrag brgyas phan mdzad phyag bya ba/ /me tog sil ma dag gis gtor byas shing / /skye bo mang pos ring bsrel mchod rten mchod| |lha yi phreng ba dri dang gdugs sna tshogs/ /ting 'dzin 'di ni tshol zhing 'dogs par byed/ /gang zhig kun rdzob la ni gnas byas nas/ /shin tu rgyas chos blta dka' gya nom byed| |ma chags ye shes rgyal ba dran byed cing / /stong pa nyid las nam yang nyams mi 'gyur/ /zla ba dri med nyi ma shar ba'am/ /tshangs pa'i 'jig rten tshangs pa 'dug pa bzhin/ /
79b
rnam dag sems kyis rgyal ba dran byed cing / /stong pa nyid ni nam yang mi 'dor ro/ /ji ltar sum cu rtsa gsum lha yi rgyal/ /sum cu rtsa gsum lta bas zil gyis gnon/ /de ltar rgyal bas 'jig rten zil mnan te/ /dpal gyis lham me lhan ne lhang nge'o/ /tshal gyi mchog la me dag mched gyur te/ /mar gyi me bsregs me lce rab 'bar ba/ /'od zer brgya stong dag ni 'byung ba ltar/ / de bzhin rgyal ba mtshan gyis rgyas pa ltos/ /ji ltar sman pa zug rngu 'byin byed pa/ /nad pa rnams la nad dpyad byed pa ltar/ /rgyal ba mi yi seng+ge sman pa mchog /ji ltar mthun par bde gshegs gtam yang gsung / /'khor la seng+ge'i sgra ni sgrog mdzad cing / /khyu mchog sangs rgyas 'jig rten kun mi bsnyengs/ /nags gnas seng+ge wa la ji bzhin du/ /phas kyi rgol ba thams cad zil gyis gnon/ /ji ltar ngang pa'i rgyal po mchog dag ni/ /mkha' la 'phur na dkar zhing rnam dag mdzes/ /de ltar bde bar gshegs pa gser gyi mdog /bde gshegs sras kyi thu bo rnams kyang dran/ /ji ltar ri rgyal gangs can lham me zhing / /lhag ge ba dang rgyal rigs rgyal po'am/ /ji ltar ka ba rin chen sna tshogs brgyan/ /de ltar rgyal ba mtshan gyis brgyan par blta/ / mi g.yo ma ral ji ltar rdo rje 'dra/ /khor yug ri ni rlung gi bu skyes 'dzin/ /de ltar bde gshegs bskal pa phyogs 'dzin cing / /phan dang ldan zhing byams ldan chos kyang che/ /ji
80a
@#/ /ltar chu la sa dag brten pa dang / /ji ltar rlung la chu yang brten pa dang / /ji ltar nam mkha' la ni rlung brten pa/ /de ltar rgyal ba yon tan kun la bzhugs/ /ji ltar sum cu rtsa gsum ri rab rgyal/ /lhan ne lhag ge thams cad yongs su rgyal/ /de ltar bde gshegs ri rab lta bu yang / /rin chen tshogs kyi nang na bzhugs pa mdzes/ /ma chags sems ldan rgyal ba dran byed na/ /mun dang bral zhing mi snang med pa yi/ /ting 'dzin rdul bral rnam dag de mig 'gyur/ /de ni dngos po'i 'du shes kun dang bral/ /rgyal ba rnam dag sems ni dran byed na/ /rdul dang dri ma bral zhing khro ba spangs/ /ma rig bral zhing de yi ye shes dag /de yi ye shes rdul bral 'byung bar 'gyur/ /rgyal ba tshul khrims rnam dag dran byed na/ /de yi ye shes rab rib bral zhing dag/ nga dang bdag lta de la phyis kyang med/ /dngos po'i 'du shes nam yang 'byung mi 'gyur/ /de ni srid pa'i rgyud la lta dang bral/ /the tshom lam bral ye shes rnam par dag /nam yang gzugs kyi 'du shes mi 'gyur zhing / /zhi lam bsil ba'i dngos po'i chos kyang nyan/ /sa dang chu dang me dang rlung dag ni/ /rang gi dngos po med cing thams cad stong / /rgyal ba mchog rab bstan pa thos nas kyang / /de ni dngos po'i 'du shes mi 'byung ngo / /dngos su shes pa thams cad tshar bcad cing / /'gro ba
80b
thams cad stong par rig nas kyang / /ji ltar 'dab chags nam mkhar mi chags bzhin/ /nam yang yid ni chags par mi 'gyur ro/ /mchog rab rgyal la ri mo byas pas ni/ /rdzu 'phrul stobs la gnas shing yid rno bas/ /'jig rten kun nas phyogs bcur rnam par snang / /yon tan tshad med pa ni kun dang ldan/ /lag pa rkang pa de bzhin mgo bo mig /rgyal srid rta dang ba lang thams cad dang / /'jig rten pa yi rin chen kun kyang gtong / /tshul khrims phung po yongs su gtong mi byed/ /snying rje bskyed nas 'jig rten kun phan phyir/ /chos kyi gtso bo rin chen ston par byed/ /'dus byas ma lus thams cad spong byed kyang / /byang chub sems ni yongs su gtong mi byed/ /dge slong dang ni rgyal sras legs zhugs dang / /de bzhin dge slong ma dang dge bsnyen dang // dad ldan chags dang bral ba'i dge bsnyen mas/ /rjes su dran par byas na gnas 'di 'thob/ /ting 'dzin zhi ba 'di ni su 'chang pa'i/ /bde gshegs sras po ting nge 'dzin mkhas pa/ /de la yon tan mang po de dag 'byung / /bla med rnam pa mang po gnas 'byung ngo / /bzang skyong gis zhus pa'i ting nge 'dzin gyi le'u ste bco brgyad pa'o// //bzang skyong / de lta bas na| byang chub sems dpa' gang ting nge 'dzin 'di 'chad pa'am 'thob par 'dod pa des dang po nyid nas mtshan ma'i 'du shes rnams bsal bar bya'o/ /mtshan ma'i 'du shes rnams bsal
81a
@#/ /nas lhag pa'i nga rgyal du mi bya ste/ byang chub sems dpa' lhag pa'i nga rgyal spangs shing / yid la mtshan ma dang bral bas ting nge 'dzin 'di lung mnod par bya ste/ rtsod par mi bya'o/ /de la ji ltar na rtsod pa med par 'gyur zhe na/ gang stong pa nyid mi spong ba ste/ 'di ni/ rtsod pa med pa'o/ /bzang skyong / rtsod pa med pa gtso bor byed pa'i byang chub sems dpas ting nge 'dzin 'di lung mnod par bya'o/ /bzang skyong / rigs kyi bu'am rigs kyi bu mo gang la la zhig ting nge 'dzin 'di lung nod par 'dod par gyur na/ des chos bcu dang ldan par bya ste/ ting nge 'dzin 'di lung mnod par bya'o/ /bcu gang zhe na/ 'di lta ste/ bzang skyong / nga rgyal bcom pa'i rigs kyi bu dang / gzhan gyi rnyed pa dang / bkur sti dang / tshigs su bcad pa la phrag dog med pa dang / gus pa dang bcas shing rjes dang bcas pa dang / byas pa shes shing byas pa gzo ba dang / 'jungs pa med cing 'gyod pa dang bral ba dang / dad pa dang ldan zhing brtags pa mang ba dang / brtson 'grus brtsams shing 'chag pa la zhugs pa dang / mgron du gnyer ba la mi ltos par bsod snyoms byed pa dang / zab mo la mos pas ting nge 'dzin 'di lung mnod par bya'o/ /rigs kyi bu'am rigs kyi bu mo gang la las ting nge 'dzin 'di lung nod par 'dod pa de la ston pa'i 'du shes nye bar bzhag ste ting
81b
nge 'dzin 'di lung mnod par bya/ gdon par bya/ bcang bar bya ste/ bzang skyong / chos bcu po de dag dang ldan na/ rigs kyi bu'am rigs kyi bu mo des ting nge 'dzin 'di mnod par bya'o/ / de ltar zhugs pa de ni/ chos brgyad 'dzin to/ /brgyad gang zhe na/ 'di lta ste/ shin tu byang ba'i phyir tshul khrims rnam par dag pa dang / shes rab dang ldan pas lta ba rnam par dag pa dang / yang 'byung ba med pas shes rab rnam par dag pa dang / 'khor thams cad don du mi gnyer bas gtong pa yongs su dag pa dang / shin tu brjod pa med pas thos pa rnam par dag pa dang / byang chub 'thob pas brtson 'grus rnam par dag pa dang / rten pa med pas bkur sti thob pa dang / bla na med pa yang dag par rdzogs pa'i byang chub las sems can thams cad kyis mi bskyod pa ste/ bzang skyong / byang chub sems dpa' ni/ chos brgyad po 'di dag rab tu 'dzin to/ /de nas de'i tshe bcom ldan 'das kyis tshigs su bcad pa 'di dag gsungs so/ /mkhas pas mtshan ma'i 'du shes mi bskyed cing / /nga rgyal nga'o snyam pa'i nga rgyal spang / /bzod pa rdul bral 'dus ma byas bskyed nas/ /des ni ting 'dzin 'di la'ang lung mnod bya/ /mkhas pas stong pa nyid dang mtshan med dang / /zhi ba mya ngan 'das la rtsod mi bya/ /mi bskyod chos can ston pa dang yang mthun/ /de 'dra des ni ting 'dzin 'di lung nos/ /mkhas pa nga rgyal phrag dog mi byed
82a
@#/ /cing / /byas gzo sangs rgyas chos dang dge 'dun la/ /dang ba skyes par gyur cing mi bskyod pa/ /des ni ting 'dzin 'di yang myur lung nos/ /'jungs pa med cing mun bral mi rtsub la/ /brtag dang ldan la shin tu dad pa can/ /'chag sar zhugs shing brtson 'grus rtsom byed pas/ /ting 'dzin 'di ni rab tu 'dod par bya/ /dge slong rtag tu bsod snyoms spyad bya ste/ /mgron du bos pa'ang spang na gsog ci smos/ /don dam dmigs su med la rab tu mkhas/ /de 'dra des ni ting 'dzin 'di zungs shig /gang las ting 'dzin 'phags pa 'di bris sam/ /bcangs sam gzhan dag la yang bstan byas na/ /de las des ni dang por 'di thob nas/ /mkhas pas de la ston par 'du shes bskyed/ /yon tan phun sum tshogs pa 'dir gnas te/ /gang zhig ting 'dzin 'di lung nod byed pa/ /de ni rgyal bas gnang zhing rdul bral la/ /rnam par dag pa'i chos brgyad myur du 'dzin/ /mkhas pa gang la yon tan 'di snang ba| |tshul khrims kyang ni rnam par dag par 'gyur/ /ting 'dzin dag cing de bzhin lta ba dag /des ni srid par srid pa dag kyang sbyangs/ /mkhas pa gang la yon tan 'di snang ba/ /yang srid med pas shes rab rnam par dag /rten pa dag kyang med cing gtong ba dag /mang du thos shing nyams par mi 'gyur ro/ /mkhas pa gang la yon tan 'di snang ba/ /brtson 'grus
82b
brtsams shing byang chub las mi nyams/ /rnyed dang bkur sti cung zad mi rten te/ /de ni bla na med pa'i byang chub 'gyur/ /bzang skyong gis zhus pa'i ting nge 'dzin gyi le'u ste bcu dgu ba'o// // bzang skyong / chos brgyad po 'di dag dang ldan na/ byang chub sems dpa' de bzhin gshegs pa'i stobs bcu 'thob bo/ /bcu gang zhe na/ bzang skyong / 'di la de bzhin gshegs pa gnas la gnas su yang dag pa ji lta ba bzhin du rab tu mkhyen/ gnas ma yin pa la gnas ma yin par yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas gnas la gnas dang / gnas ma yin pa la yang gnas ma yin par yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs dang po ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing 'jig rten 'di na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas 'das pa dang / ma 'ongs pa dang / da ltar byung ba'i las rnams dang / las yang dag par 'dzin pa rnams kyi gnas dang / rgyu dang / rnam par smin pa mkhyen pa yang
83a
@#/ /dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs gnyis pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing / 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas thams cad du 'gro ba'i lam mkhyen pa yang dag pa ji lta ba bzhin du rab tu mkhyen te/ bzang skyong / gang de bzhin gshegs pas thams cad du 'gro ba'i lam mkhyen pa yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs gsum pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas khams du ma dang / khams sna tshogs pa'i 'jig rten
83b
mkhyen pa yang dag pa ji lta ba bzhin du rab tu mkhyen te/ bzang skyong / gang de bzhin gshegs pas khams du ma dang / khams sna tshogs pa'i 'jig rten mkhyen pa yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs bzhi pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing / 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas sems can gzhan dag dang / gang zag gzhan rnams kyi mos pa du ma mkhyen pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas sems can gzhan dang / gang zag gzhan mos pa du ma dang / mos pa sna tshogs pa rnams kyi mos pa mkhyen pa yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs lnga pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing / 'jig rten na dge sbyong ngam/ bram ze'am/ lha'am/ bdud dam
84a
@#/ /tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas sems can gzhan dag dang / gang zag gzhan rnams kyi dbang po mchog dang / mchog ma yin pa mkhyen pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas sems can gzhan dag dang / gang zag gzhan rnams kyi dbang po mchog dang / mchog ma yin pa mkhyen pa yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs drug pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas bsam gtan dang / rnam par thar pa dang / ting nge 'dzin dang / snyoms par 'jug pa'i kun nas nyon mongs pa dang / rnam par byang ba dang / rnam par gzhag pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas bsam
84b
gtan dang / rnam par thar pa dang / ting nge 'dzin dang / snyoms par 'jug pa'i kun nas nyon mongs pa dang / rnam par byang ba dang / rnam par gzhag pa yang dag pa ji lta ba bzhin du rab tu mkhyen pa 'di ni/ bzang skyong / de bzhin gshegs pa rnams kyi de bzhin gshegs pa'i stobs bdun pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing / 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas sngon gyi gnas rjes su dran pa mkhyen pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas sngon gyi gnas rjes su dran pa mkhyen pa yang dag pa ji lta ba bzhin du rab tu mkhyen pa 'di ni/ bzang skyong / de bzhin rnams kyi de bzhin gshegs pa'i stobs brgyad pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /
85a
@#/ /bzang skyong / gzhan yang de bzhin gshegs pas lha'i mig mkhyen pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas lha'i mig mkhyen pa yang dag pa ji lta ba bzhin du rab tu mkhyen pa 'di ni/ de bzhin gshegs pa rnams kyi de bzhin gshegs pa'i stobs dgu pa ste/ stobs de la brten nas de bzhin gshegs pas khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing 'jig rten na dag sbyong ngam| bram ze'am/ lha'am/ bdud dam/ tshangs pa'am/ sus kyang chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / gzhan yang de bzhin gshegs pas zag pa zad pa mkhyen pa yang dag pa ji lta ba bzhin du rab tu mkhyen te/ bzang skyong / gang yang de bzhin gshegs pas zag pa zad pa mkhyen pa yang dag pa ji lta ba bzhin du rab tu mkhyen pa 'di ni/ de bzhin gshegs pa rnams kyi de bzhin gshegs pa'i stobs bcu pa ste/ stobs de la brten nas de bzhin gshegs pa'i khyu mchog gi gnas rab tu mkhyen la 'khor gyi nang du gshegs te seng+ge'i sgra yang dag par sgrog cing / 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang
85b
chos dang mthun par bskor bar mi nus pa'i tshangs pa'i 'khor lo bskor ro/ /bzang skyong / de bzhin gshegs pa'i stobs bcu po 'di dag byang chub sems dpas yongs su 'dzin par 'gyur ro| |de nas de'i tshe bcom ldan 'das kyis tshigs su bcad pa 'di skad gsungs so/ /'jig rten mgon po skyob pa yis/ /stobs rnams kyi ni sa bshad pa/ /ting 'dzin 'di la gnas na ni| |byang chub sems dpas thob par 'gyur/ /gnas dang de bzhin gnas ma yin/ /yang dag ji bzhin mkhyen pa ni/ /'jig rten mgon po skyob mdzad pa/ /sangs rgyas rnams kyi stobs dang po/ /'jig rten mgon po skyob mdzad pa/ /rang byung rnams kyi stobs dang po/ /de la gnas nas rdzogs sangs rgyas/ /srog chags rnams la chos ston to/ /'das dang ma 'ongs da ltar gyi/ /las rnams rab tu mkhyen pa ni/ /'jig rten mgon po skyob mdzad pa/ /sangs rgyas rnams kyi stobs gnyis pa'o/ /mos pa chung dang mchog rnams dang / /'bring dag rab tu mkhyen pa ni/ /dpal ldan rdzogs par sangs rgyas pa'i/ /stobs gsum pa ni de yin no/ /dbang po rno dang bar ma dang / /tha ma'i khyad par mkhas pa ni/ /drang srong chen po rdzogs sangs rgyas/ / sangs rgyas rnams kyi stobs bzhi pa'o/ /khams rnams sna tshogs rab mkhyen cing / /khams rnams kyi ni pha rol phyin/ /gnas 'di dag ni rang byung gi /stobs ni lnga pa nyid yin no/ /thams
86a
@#/ /cad du ni 'gro ba'i lam/ /de dang der ni 'grod pa ste/ /de dag thams cad rab mkhyen pa/ /bsam gyis mi khyab stobs drug pa'o/ /bsam gtan rnam thar snyoms par 'jug /kun nas nyon mongs rab mkhyen cing / /gnas dang gnas min mkhyen pa ni/ /stobs bdun pa zhes bya ba'o/ /sngon gyi bye ba tshun chad kyi/ /bdag ni sngon na gar gnas pa'i/ /sngon gyi gnas rnams rab mkhyen pa/ /de yi stobs kyang brgyad pa'o/ /'chi 'pho dang ni skye ba mkhyen/ /mtho ris dang ni ngan song gzigs/ /mig gi pha rol phyin thob pa// 'di ni stobs kyang dgu pa'o/ /gang dag lha 'am gang dag mi/ /zag pa thams cad nga la zad/ /nga la yang srid zad pa ni/ /bsam gyis mi khyab stobs bcu pa'o/ /'jig rten mgon po skyob mdzad pa/ /rang byung rnams kyi stobs 'di dag /ting 'dzin 'di la gnas na ni/ /de dag thams cad rnyed mi dka'/ /bzang skyong gis zhus pa'i ting nge 'dzin gyi le'u ste nyi shu pa'o// //bzang skyong / byang chub sems dpas ting 'dzin 'di la zhugs na/ de bzhin gshegs pa'i mi 'jigs pa gang dag thob par 'gyur ba de gang zhe na/ bzang skyong / byang chub sems dpas ting nge 'dzin 'di la zhugs na thob par 'gyur ba'i de bzhin gshegs pa'i mi 'jigs pa ni/ 'di bzhi'o/ /bzhi gang zhe na/ 'di
86b
lta ste| nga yang dag par rdzogs par sangs rgyas pa la 'di la chos 'di mngon par sangs ma rgyas so/ /zhes nga la 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par tshig tu brjod cing rgol bar 'gyur ba'i rgyu yang dag par rjes su mi mthong ste/ rgyu yang dag par rjes su ma mthong bas dbugs 'byin pa thob par gnas so/ /bag tsha ba med pa thob par gnas so/ /bde ba thob par gnas so/ /mi 'jigs pa thob par gnas so/ /'khor gyi nang du gshegs te seng+ge'i sgra yang dag par bsgrag par bya'o/ /'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par ma bskor ba'i tshangs pa'i 'khor lo bskor bar bya'o/ /zhes bya ba 'di ni/ bzang skyong / gang byang chub sems dpas ting nge 'dzin 'di la zhugs na 'thob par 'gyur ba'i de bzhin gshegs pa rnams kyi de bzhin gshegs pa'i mi 'jigs pa dang po'o/ /bzang skyong / gzhan yang nga zag pa zad pa la de la zag pa 'di rnams yongs su zad par ma gyur to/ /zhes 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par tshig tu brjod cing rgol bar 'gyur ba'i rgyu yang dag par rjes su mi mthong ste/ rgyu yang dag par rjes su ma mthong bas dbugs 'byin pa thob par gnas so/ /bag tsha ba med pa thob par gnas so/ /bde
87a
@#/ /ba thob par gnas so/ /mi 'jigs pa thob par gnas so/ /'khor gyi nang du gshegs te seng+ge'i sgra yang dag par bsgrag par bya'o/ /'jig rten na dge sbyong ngam| bram ze'am/ lha'am/ bdud dam/ tshangs pa'am/ sus kyang chos dang mthun par ma bskor ba'i tshangs pa'i 'khor lo bskor bar bya'o/ /zhes bya ba 'di ni/ bzang skyong / gang byang chub sems dpas ting nge 'dzin 'di la zhugs na 'thob par 'gyur ba'i de bzhin gshegs pa rnams kyi de bzhin gshegs pa'i mi 'jigs pa gnyis pa'o/ /bzang skyong / gzhan yang gang ngas par du gcod pa'i chos su bstan pa de dag la brten na bar du gcod pa'i chos su mi 'gyur ro/ /zhes nga la 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par tshig tu brjod cing rgol bar 'gyur ba'i rgyu yang dag par rjes su mi mthong ste/ rgyu yang dag par rjes su ma mthong bas dbugs 'byin pa thob par gnas so/ /bag tsha ba med pa thob par gnas so/ /bde ba thob par gnas so/ /mi 'jigs pa thob par gnas so/ /'khor gyi nang du gshegs te seng+ge'i sgra yang dag par bsgrag par bya'o/ /'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par ma bskor ba'i tshangs pa'i
87b
'khor lo bskor bar bya'o/ /zhes bya ba 'di ni/ bzang skyong / gang byang chub sems dpas ting nge 'dzin 'di la zhugs na 'thob par 'gyur ba'i de bzhin gshegs pa rnams kyi de bzhin gshegs pa'i mi 'jigs pa gsum pa'o/ /bzang skyong / gzhan yang gang ngas 'phags pa'i nges par 'byung bar 'gyur ba de byed pa'i sdug bsngal yang dag par zad par 'gyur ba'i chos bshad pa de la 'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par tshig tu brjod cing rgol bar 'gyur ba'i rgyu yang dag par rjes su mi mthob ste/ rgyu yang dag par rjes su ma mthong bas dbugs 'byin pa thob par gnas so/ /bag tsha ba med pa thob par gnas so/ /bde ba thob par gnas so/ /mi 'jigs pa thob par gnas so/ /'khor gyi nang du gshegs te seng+ge'i sgra yang dag par bsgrag par bya'o/ /'jig rten na dge sbyong ngam/ bram ze'am/ lha'am/ bdud dam/ tshangs pa'am/ sus kyang chos dang mthun par ma bskor ba'i tshangs pa'i 'khor lo bskor bar bya'o/ /zhes bya ba 'di ni/ bzang skyong / byang chub sems dpas ting nge 'dzin 'di la zhugs na 'thob par 'gyur ba'i de bzhin gshegs pa rnams kyi de bzhin gshegs pa'i mi 'jigs pa bzhi pa'o/ /de nas de'i tshe bcom ldan 'das kyis tshigs su bcad pa 'di dag gsungs so/ /sangs rgyas mi 'jigs gang yin pa/ /mi 'jigs rnams ni bshad
88a
@#/ /par bya| |seng+ge'i sgra ni bsgrags byas te/ /'khor rnams la ni chos kyang ston/ /yang dag rdzogs sangs rgyas smra la/ /chos 'di sangs rgyas ma gyur ces/ /rgol ba de ni ma mthong ste/ /de phyir sangs rgyas mi 'jigs pa'o/ /zag pa zad par smras pa la/ /zag pa 'di dag ma zad ces/ /lha dang bcas pa'i 'jig rten na/ /rgol ba de ni ma mthong ngo / /gang dag par du gcod pa'i chos/ /de dag gang gis bsten byas kyang / /bar du gcod par mi 'gyur zhes/ /nga la rgol ba de ma mthong / /mya ngan 'das pa thob pa'i phyir/ /ngas ni chos mchog gang bshad pa/ /mya ngan 'da' ba'i tshig gi mchog /des ni nga la rgol ba med/ /'jig rten mgon po skyob mdzad pas/ /mi 'jigs gsungs pa 'di dag ni/ /ting 'dzin 'di la gnas pa yi/ /byang chub sems dpas 'thob par 'gyur/ /bzang skyong gis zhus pa'i ting nge 'dzin gyi le'u ste nyi shu rtsa gcig pa'o// //bzang skyong / gang byang chub sems dpas ting nge 'dzin 'di la zhugs na 'thob par 'gyur ba'i de bzhin gshegs pa rnams kyi sangs rgyas kyi chos ma 'dres pa bco brgyad po de dag gang zhe na/ bzang skyong 'di lta ste/ nam gyi nub mo de bzhin gshegs pas bla na med pa yang dag par rdzogs pa'i byang chub mngon par rdzogs par sangs rgyas pa nas nam gyi nub mo phung po lhag ma ma lus
88b
pa'i mya ngan las 'das pa'i dbyings su yongs su mya ngan las 'das pa de'i bar du de bzhin gshegs pa la 'khrul ba mi mnga'o/ /ca co mi mnga'o/ /bsnyel ba mi mnga'o/ /sems mnyam par ma bzhag pa mi mnga'o/ /tha dad pa'i 'du shes mi mnga'o/ /so sor ma brtags pa'i btang snyoms mi mnga'o/ /'dun pa nyams pa mi mnga'o/ /brtson 'grus nyams pa mi mnga'o/ /dran pa nyams pa mi mnga'o/ /ting nge 'dzin nyams pa mi mnga'o/ /shes rab nyams pa mi mnga'o/ /rnam par grol ba nyams pa mi mnga'o/ /rnam par grol ba'i ye shes gzigs pa nyams pa mi mnga'o/ / 'das pa'i dus la ma chags ma thogs pa'i ye shes mthong ba 'jug go /ma 'ongs pa'i dus la ma chags ma thogs pa'i ye shes mthong ba 'jug go /da ltar gyi dus la ma chags ma thogs pa'i ye shes mthong ba 'jug go /de bzhin gshegs pa'i sku'i 'phrin las thams cad ye shes sngon du 'gro zhing ye shes kyi rjes su 'brang ngo / /de bzhin gshegs pa'i gsung gi 'phrin las thams cad ye shes sngon du 'gro zhing ye shes kyi rjes su 'brang ngo / /de bzhin gshegs pa'i thugs kyi 'phrin las thams cad ye shes sngon du 'gro zhing ye shes kyi rjes su 'brang ngo / / bzang skyong / 'di dag ni/ gang byang chub sems dpas ting nge 'dzin 'di la gnas na 'thob par 'gyur ba'i de bzhin gshegs pa rnams kyi sangs rgyas kyi chos ma 'dres pa bco brgyad yin no/ /
89a
@#/ /de nas de'i tshe bcom ldan 'das kyis tshigs su bcad pa 'di dag gsungs so/ /gang la gnas nas de bzhin gshegs/ /chos kyi 'khor lo bskor mdzad pa'i| |sangs rgyas kyi ni ma 'dres chos/ /bshad kyi nga la mnyan par byos/ /nam gyi nub mo rdzogs sangs rgyas/ /de bzhin gshegs pas byang chub brnyes/ /nam gyi nub mo len med par/ /mya ngan las ni 'das par 'gyur/ /de yi bar du gang gsungs dang / /gsung dang gsung bar 'gyur ba'i rnams/ /de kun yang dag ji bzhin te/ /de ni ma 'dres dang po'o/ / nga la 'khrul pa cung zad med/ /ca co nga la mi mnga' 'o/ /gsung la nyams pa mi mnga' ste/ /nga la zhum pa mi mnga' 'o/ /nga la bsnyel ba yod ma yin/ /nga la ma brtags btang snyoms med| |chos la sna tshogs byed pa med/ /rtag tu mnyam par bzhag pa nyid/ /nga yi 'dun pa ma nyams shing / /brtson 'grus kyang ni ma nyams so/ /ting 'dzin las ni mi g.yeng zhing / / nga la nyams pa mi mnga' 'o/ /nga yi shes rab nyams pa med/ /rnam par grol ba 'ang nyams pa med/ /nga yi rnam grol ye shes mthong / /nga la'ang nyams pa mi mnga' 'o/ /nga ni 'das pa'i dus la yang / /ye shes thogs pa mi mnga' 'o/ /ma 'ongs pa yi dus la yang / /nga la sgrib pa mi mnga' 'o/ /da ltar byung ba'i dus la yang / /nga la chags pa mi mnga' 'o/ /skyob pa nga ni
89b
chos kun la/ /ye shes bsgribs pa med pa'o/ /nga yi sku yi 'phrin las kun/ /ye shes kyi ni rjes su 'brang / /nga yi gsung thugs 'phrin las kun/ /ye shes sngon du 'gro ba yin/ /gang la gnas nas de bzhin gshegs/ /chos kyi 'khor lo bskor mdzad pa'i/ /rdzogs sangs rgyas kyi ma 'dres chos/ /bco brgyad po ni de dag go /ting 'dzin 'di la bsgoms byas na/ /sangs rgyas chos ni bco brgyad dang / /ston pa yi ni stobs bcu dang / /mi 'jigs rnams ni rnyed mi dka'/ /bzang skyong gis zhus pa'i ting nge 'dzin gyi le'u ste nyi shu rtsa gnyis pa'o// // bzang skyong / gzhan yang byang chub sems dpas ting nge 'dzin 'di la rjes su yi rang ba bzhin rjes su yi rang bar bya'o/ /bzhi gang zhe na/ 'di lta ste/ ji ltar sngon gyi de bzhin gshegs pa dgra bcom pa yang dag par rdzogs pa'i sangs rgyas de dag sngon byang chub sems dpa'i spyad pa spyod pa na ting nge 'dzin 'di gsan nas lung nos te bla na med pa yang dag par rdzogs pa'i byang chub kyi ched du mang du thos pa yongs su rdzogs par bya ba'i phyir rjes su yi rang ba de bzhin du bdag kyang ting nge 'dzin 'di thos nas bla na med pa yang dag par rdzogs pa'i byang chub kyi ched du mang du thos pa yongs su rdzogs par bya ba'i phyir rjes su yi rang ngo / /bzang skyong / 'di ni/ byang chub sems dpa'i rjes su yi rang ba dang po'o/ /bzang skyong / gzhan yang ji ltar ma byon pa'i de bzhin
90a
@#/ /gshegs pa dgra bcom pa yang dag par rdzogs pa'i sangs rgyas de dag byang chub sems dpa'i spyad pa spyod par 'gyur ba na ting nge 'dzin 'di gsan nas lung nos te bla na med pa yang dag par rdzogs pa'i byang chub kyi ched du mang du thos pa thob par bya ba dang / mang du thos pa yongs su rdzogs par bya ba'i phyir rjes su yi rang bar 'gyur ba de bzhin du bdag kyang rjes su yi rang ngo / /bzang skyong / 'di ni/ byang chub sems dpa'i rjes su yi rang ba gnyis pa'o/ /bzang skyong / gzhan yang byang chub sems dpas 'di skad du ji ltar da ltar byung ba'i dus na da ltar gyi de bzhin gshegs pa dgra bcom pa yang dag par rdzogs pa'i sangs rgyas de dag sngon byang chub sems dpa'i spyad pa spyod pa na ting nge 'dzin 'di gsan nas lung nos te rjes su yi rang nas mang du thos pa yongs su rdzogs par mdzad de bla na med pa yang dag par rdzogs pa'i byang chub mngon par rdzogs par sangs rgyas pa dang / da ltar byang chub sems dpa' rnams ting nge 'dzin 'di la ji ltar rjes su yi rang ba de bzhin du bdag kyang da ltar gyi ting nge 'dzin 'di thos nas bla na med pa yang dag par rdzogs pa'i byang chub kyi ched du mang du thos pa yongs su rdzogs par bya ba'i phyir rjes su yi rang ngo / /zhes brjod par bya ste/ bzang skyong / 'di ni/ byang chub sems dpa'i rjes su yi rang ba gsum pa'o/ /bzang skyong / gzhan
90b
yang byang chub sems dpas 'di skad du bdag gis rjes su yi rang ba dang ldan pa'i bsod nams 'di thams cad sems can thams cad dang lhan cig tu thun mong du byas te bla na med pa yang dag par rdzogs pa'i byang chub tu gyur cig /ting nge 'dzin 'di'ang thob par gyur cig /mang du thos pa yongs su rdzogs par gyur cig /ces brjod par bya ste/ bzang skyong / 'di ni/ byang chub sems dpa'i rjes su yi rang ba dang ldan pa'i bsod nams bzhi pa'o/ /bzang skyong / rjes su yi rang ba dang ldan pa'i bsod nams dang / ting nge 'dzin 'di thob pa'i byang chub sems dpa' dag ni/ byang chub kyi phyogs kyi chos rnams yongs su rdzogs nas myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /bzang skyong / byang chub sems dpas ting nge 'dzin 'di la rjes su yi rang ba de dag gis rjes su yi rang zhing bsngos nas bsod nams kyi phung po ji snyed cig 'dzin par 'gyur ba'i dpe tsam zhig bstan to/ /bzang skyong / 'di lta ste/ dper na/ skyes bu la la zhig tshe lo brgya phrag du ma thub pa/ lo brgya phrag du mar 'tsho ba/ mgyogs pa'i mthu rlung dang 'dra ba zhig yod la de mi 'dug par lo brgya tshang bar shar phyogs su'ang song / de bzhin du lho dang / nub dang / byang dang / 'og dang / steng gi phyogs su'ang song na/ bzang skyong / de ji snyam du sems/ tshe lo brgya thub cing lo brgyar 'tsho ba/ mgyogs pa'i mthu rlung dang 'dra ba'i
91a
@#/ /skyes bu des mi 'dug par phyogs drug tu phyogs gcig cing yang lo brgya brgya song ba'i skyes bu des dpag tshad du zhig tu song bar gyur ba bgrang ba'am/ gzhal ba'am| bsam pa'am/ dpag par skyes bu la la spro'am/ byang chub sems dpa' bzang skyong gis gsol pa/ btsun pa bcom ldan 'das/ de bzhin gshegs pa dgra bcom pa yang dag par rdzogs pa'i sangs rgyas dang / gnas brtan shA radwa ti'i bu dang / phyir mi ldog pa'i byang chub sems dpa' rnams ma gtogs par de ni/ mi nus so/ /bcom ldan 'das kyis bka' stsal pa/ bzang skyong / bud med dam/ skyes pa gang la la zhig gis skyes bu lo brgyar gnas pa rlung gi mgyogs pa bzhin du mgyogs par 'gro ba de'i spyod yul rnams gser dang / dngul gyis gang bar byas te de bzhin gshegs pa dgra bcom pa yang dag par rdzogs pa'i sangs rgyas rnams la phul la ting nge 'dzin 'di ni/ nyan pa dang / byang chub sems dpa' gang yang ting nge 'dzin 'di thos nas rjes su yi rang ba bzhi po de dag gis rjes su yi rang zhing rjes su yi rang nas kyang bla na med pa yang dag par rdzogs pa'i byang chub kyi ched du mang du thos pa 'dod pas bsngo bar yang byed na/ bzang skyong / bsod nams kyi phung po 'di la bsod nams kyi phung po snga ma des brgya'i char yang nye bar mi 'gro'o/ /stong dang /
91b
stong phrag brgya dang / bye ba phrag brgya dang / bye ba khrag khrig phrag brgya stong dang / grangs dang / cha dang / bgrang ba dang / dpe dang / rgyur yang nye bar mi 'gro'o// //bam po bdun pa ste tha ma bzang skyong / ting nge 'dzin 'di la rjes su yi rang ba dang ldan pa'i bsod nams kyi phung po byang chub sems dpa' rnams la ji tsam du don che ba la ltos/ bzang skyong / de bas na/ rnam grangs 'dis kyang ting nge 'dzin 'di la rjes su yi rang ba dang ldan pa'i bsod nams kyi phung po byang chub sems dpa' rnams kyi don chen po yin par rig par bya'o/ /bzang skyong / sngon byung ba 'das pa'i dus na bskal ba grangs med pa bas kyang ches grangs med pa/ shin tu rgyas pa/ tshad med pa/ bsam gyis mi khyab par byung ba de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas seng+ge'i blo gros zhes bya ba rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ngo / /bzang skyong / de'i tshe dzam+bu'i gling 'di'ang 'byor ba dang / rgyas pa dang / bde ba dang / lo legs pa dang / nyams dga' ba dang / skye bo mang po dang / mis gang bar gyur to/ /bzang skyong / de'i tshe dzam+bu'i gling 'di na grong khyer chen po thams cad kyang rin po che sna bdun las grub pa/ khyim bye ba phrag dgu yod pa/
92a
@#/ /dpag tshad bcu gnyis pa stong phrag drug cu rtsa brgyad yod par gyur to/ /bzang skyong / de'i tshe dzam+bu'i gling 'di'ang 'di lta ste/ dpag tshad stong phrag drug cu rtsa brgyad yod de/ yangs shing rgya che bar gyur to/ /bzang skyong / de'i tshe dzam+bu'i gling 'di na gang du de bzhin gshegs pa de skye ba'i sar gyur pa 'di lta ste/ bzang po byung ba zhes bya ba'i grong khyer chen po gcig cig yod de/ grong khyer chen po de na srog chags bye ba phrag drug cu gnas so/ /bzang skyong / yang de'i tshe de bzhin gshegs pa dgra bcom pa yang dag par rdzogs pa'i sangs rgyas seng+ge'i blo gros de'i nyan thos 'dus pa dang po ni/ dgra bcom pa bye ba phrag dgu bcu 'dus par gyur to/ /zhag bdun 'das nas nyan thos 'dus pa gnyis pa ni/ nyan thos bye ba phrag dgu bcu 'dus par gyur to/ /zhag bdun pa gnyis 'das nas nyan thos 'dus pa gsum pa ni/ bye ba phrag dgu bcu 'dus par gyur to/ /dag pa'i byang chub sems dpa' bye ba phrag dgu bcu'ang 'dus par gyur to/ /de nas phyis ni/ bcom ldan 'das de'i nyan thos grangs kyis mi chod pa zhig byung ngo / /bzang skyong / de'i tshe de'i dus na mi de dag dge ba bcu'i las kyi lam yang dag par len par gyur te/ 'di lta ste/ dper na/ de bzhin gshegs pa dgra bcom pa yang dag par rdzogs pa'i sangs rgyas byams pa'i gsung rab la
92b
sems can rnams dge ba bcu'i las kyi lam dang ldan par 'gyur ba bzhin no/ /bzang skyong / de'i tshe sems can rnams kyi tshe'i tshad ni/ lo brgyad khri bzhi stong thub par gyur to/ /bzang skyong / de'i tshe grong khyer chen po de na 'khor los bsgyur ba'i rgyal po khyad par du 'gro ba zhes bya ba rin po che sna bdun dang ldan pa bu stong du tshang ba zhig yod de/ de bcom ldan 'das de bzhin gshegs pa seng+ge'i blo gros de'i drung du song zhing bsnyen bkur byed do/ /bzang skyong / de nas de bzhin gshegs pa dgra bcom pa yang dag par rdzogs pa'i sangs rgyas seng+ge'i blo gros des rgyal po khyad par du 'gro ba de'i bsam pa thugs su chud nas ting nge 'dzin 'di bstan to/ /yang dag par bshad do/ /bzang skyong / de nas rgyal po khyad par du 'gro ba des ting nge 'dzin 'di thos nas rjes su yi rang ngo / /rjes su yi rang nas kyang bcom ldan 'das de la rin po che spar gang gis gtor to/ /de de nas shi 'phos pa dang / dge ba'i rtsa ba des de bzhin gshegs pa de mya ngan las 'das pa'i 'og tu'ang dzam+bu'i gling 'dir rgyal po'i khyim de nyid du skyes so/ /bzang skyong / de'i tshe de bzhin gshegs pa de'i gsung rab la dge slong chos smra ba rin chen mchog ces bya ba zhig byung ste/ des 'khor bzhi la ting nge 'dzin 'di rgya cher ston to/ /yang dag par sgrog go /bzang skyong / de'i tshe rgyal po khyad par du 'gro ba zhes bya ba de rgyal po'i bu tshangs pas
93a
@#/ /byin zhes bya bar gyur to/ /des dge slong de ting nge 'dzin 'di 'chad pa thos so/ /thos nas kyang thos ma thag tu dang brnyed par gyur te/ dang ba'i sems kyis gser stong phrag brgya dang / ras bcos bu zung gcig gis dge slong de la g.yogs so/ /bzang skyong / de nas rgyal po'i bu tshangs pas byin des dge slong de las ting nge 'dzin 'di thos nas dge slong des legs par bshad pa'i phyir dgab pa byas nas bla na med pa yang dag par rdzogs pa'i byang chub tu sems bskyed do/ /des bla na med pa yang dag par rdzogs pa'i byang chub tu sems bskyed nas ting nge 'dzin 'dod pa'i phyir chos smra ba'i dge slong de las srog chags stong du tshang ba dang lhan cig chos 'dod pas skra dang kha spu bregs te gos dur smrig bgos nas dad pas khyim nas khyim med par rab tu byung ngo / /de rab tu byung nas lo brgyad stong du rang gi 'khor srog chags stong po de dag dang lhan cig tu dge slong de la bsnyen bkur byed cing rjes su 'brangs kyang nyan pa tsam zhig thob pa ma gtogs par dge slong de las ting nge 'dzin 'di ma thob bo/ /de 'ang lan gnyis ma yin gyi/ lan gcig kho na zhig thos nas rjes su yi rang ba bzhi po 'di dag gis rjes su yi rang ngo / /des srog chags stong du tshang ba de dag dang lhan cig tu dge ba'i rtsa ba des sangs rgyas stong phrag drug cu rtsa
93b
brgyad mnyes par byas so/ /skye ba thams cad du'ang ting nge 'dzin 'di bshad cing gzhan dag la'ang rgya cher yang dag par bsgrags te/ des rim gyis sangs rgyas gzhan stong phrag drug cu rtsa brgyad kyang mnyes par byas so/ /de rjes su yi rang ba dang ldan pa'i dge ba'i rtsa ba de nyid dang / ting nge 'dzin 'di thos pas byang chub kyi phyogs kyi chos rnams yongs su rdzogs te bla na med pa yang dag par rdzogs pa'i byang chub mngon par rdzogs par sangs rgyas nas de bzhin gshegs pa dgra bcom pa yang dag par rdzogs pa'i sangs rgyas brtson 'grus brtan pa zhes bya bar gyur te/ srog chags bye ba khrag khrig brgya stong dpag tu med pa bla na med pa yang dag par rdzogs pa'i byang chub la bzhag go /srog chags stong po de dag kyang ting nge 'dzin gyis yongs su smin par byas pa'i dge ba'i rtsa ba 'di nyid kyis byang chub kyi phyogs kyi chos rnams yongs su rdzogs te bla na med pa yang dag par rdzogs pa'i byang chub mngon par rdzogs par sangs rgyas nas thams cad kyang de bzhin gshegs pa dgra bcom pa yang dag rdzogs pa'i sangs rgyas dpa' brtan pa zhes bya bar gyur te/ srog chags bye ba khrag khrig brgya stong tshad med pa bla na med pa yang dag par rdzogs pa'i byang chub la bzhag go / bzang skyong / ting nge 'dzin 'di la rjes su yi rang ba dang ldan pa'i bsod nams kyi phung po ji tsam du don che ba la ltos/ 'di ltar rjes su yi rang ba dang ldan pa'i tshig tu brjod pas kyang bla na med pa yang dag
94a
@#/ /par rdzogs pa'i byang chub sgrub par byed na/ bzang skyong / byang chub sems dpa' gang ting nge 'dzin 'di thos nas 'dzin pa dang / kun chub par byed pa dang / 'chang ba dang / klog pa dang / gzhan dag la'ang rgya cher yang dag par sgrog pa dang / sgom pa'i sbyor ba la brtson par gnas pa lta ci smos te/ bzang skyong / ting nge 'dzin 'di thos nas rjes su yi rang bar mi byed/ lung nod par mi byed/ kun chub par mi byed/ 'chang bar mi byed/ gzhan dag la'ang rgya cher yang dag par sgrog par mi byed/ sgom pa'i sbyor ba la brtson par mi gnas pa lta su zhig yod/ de ci'i phyir zhe na/ bzang skyong / 'di ltar ting nge 'dzin 'di thos pas byang chub sems dpa' rnams kyi byang chub kyi phyogs kyi chos thams cad yongs su rdzogs par 'gyur ba'i phyir ro/ /bzang skyong / de bas na/ khyod mos par bya'o/ /khyod kyis khong du chud par bya'o/ /byang chub sems dpa' lhag pa'i bsam pa phun sum tshogs pa byang chub don du gnyer ba rnams kyis gal te ting nge 'dzin 'di dpag tshad tsam na yod par thos na/ bzang skyong / byang chub sems dpa' lhag pa'i bsam pa phun sum tshogs pa byang chub don du gnyer ba des ting nge 'dzin 'di mnyan pa'i phyir dpag tshad tsam gyi bar der 'gro bar bya'o/ /thos nas kyang gzung bar bya/ kun chub par bya/ bcang bar bya/ bklag par bya/ gzhan dag la'ang
94b
rgya cher bstan par bya/ bshad par bya/ bsgrag par bya'o/ /sgom pa la'ang mngon par dga' bar bya'o/ /bzang skyong / dpag tshad tsam lta zhog gi /dpag tshad gnyis tsam mam/ dpag tshad gsum tsam mam/ dpag tshad bzhi tsam mam/ dpag tshad lda tsam nas dpag tshad bcu'i bar tsam mam/ bzang skyong / dpag tshad bcu tsam lta'ang zhog gi /gal te byang chub sems dpas dpag tshad brgya na da ltar gyi sangs rgyas mngon sum du bzhugs pa'i byang chub sems dpa'i ting nge 'dzin 'di ljongs kyi phyogs che ge mo zhig na spyod do/ /zhes ting nge 'dzin 'di dpag tshad brgya'i bar tsam na yod par thos na'ang bzang skyong / byang chub sems dpa' lhag pa'i bsam pa phun sum tshogs pa byang chub don du gnyer ba des zhum pa med pa dang / snyom las med pa dang / 'jigs pa med pa dang / sgyid lug pa med pa dang / gdung ba med pa'i sems dang / brtson 'grus brtsams pa mi lhod pas ting nge 'dzin 'di tha na mnyan pa nyi tshe tsam gyi phyir yang dpag tshad brgya bo der 'gro bar bya na/ lung mnod pa dang / kun chub par bya ba dang / bsgrag par bya ba dang / bsgom par bya ba'i phyir lta smos kyang ci dgos te/ de ci'i phyir zhe na/ bzang skyong / 'di ltar byang chub sems dpa' rnams kyi byang chub kyi phyogs kyi chos rnams ni/ ting nge 'dzin 'di la rag las pa'i phyir ro/ /bzang skyong / de la byang chub sems dpa'
95a
@#/ /lhag pa'i bsam pa phun sum tshogs pa byang chub don du gnyer ba de dag gis dpag tshad brgya po der song nas gang las ting nge 'dzin 'di thos par gyur pa'i slob dpon de la des ston pa'i 'du shes bskyed par bya'o/ /chos smra ba'i rigs kyi bu de la bsnyen bkur thams cad kyis bsnyen bkur byed cing phyi bzhin 'brang bar bya'o/ /tha na ting nge 'dzin 'di mnyan pa tsam gyi phyir yang lo gcig gam/ gnyis sam/ gsum mam/ bzhi'am/ lnga'am/ lo bcu'am/ brgya'am/ ji srid 'chi'o bar du phyi bzhin 'brang bar bya na/ lung mnod pa'am/ kun chub par bya ba'am/ bri ba'am/ bcang ba'am/ bsgrag pa'am/ bsgom pa'i phyir lta smos kyang ci dgos/ bzang skyong / rigs kyi bu'am/ rigs kyi bu mo des rang nyams gtang bar bya ste/ btang nas kyang slob dpon de'i blo bzhin du 'jug par bya'o/ /gus pa dang bcas pa dang / zhe sa dang bcas pas slob dpon gyi phyir 'brang bar bya'o/ /bka' bzhin du byed pas phyi bzhin 'brang bar bya'o/ /bka' mi gcog pa dang / mdza' ba rtag pa dang / ngo mi rtag pa spangs pa dang / nyes par lta ba med pas phyi bzhin 'brang bar bya'o/ /dge ba'i bshes gnyen gyi 'du shes kyang bskyed par bya'o/ /de la ston pa'i 'du shes kyang nye bar gzhag par bya'o/ /bzang skyong / byang chub
95b
sems dpa'ang slob dpon de la de ltar na na tan byed na/ sngon chos kyis phongs par 'gyur ba'i las byas shing bsags pa ma gtogs par tha na ting nge 'dzin 'di nyan pa tsam yang mi thob pa ni/ gnas ma yin skabs ma yin te/ de ni/ gnas med do/ /byang chub sems dpa' des slob dpon de la khrel yod pa dang / byas ba gzo ba dang / byas pa shes par bya'o/ / de ltar na/ de'i ting nge 'dzin de'i tshig dang yi ge de yun ring du gnas pa dang / rmongs pa med par 'gyur na/ bzang skyong / byang chub sems dpa' gang ting 'dzin 'di grong gzhan na yod par thos sam/ grong gi zhing gzhan na yod par thos la/ thos nas kyang tha na mnyan pa tsam gyi phyir yang 'gro bar bya ba lta ci smos/ lung mnod par bya ba dang / kun chub par bya ba dang / bcang bar bya ba dang / bklag par bya ba dang / bri bar bya ba dang / bsgom par bya ba dang / gzhan dag la'ang yang dag par bsgrag par bya ba'i phyir lta'ang smos kyang ci dgos/ bzang skyong / byang chub sems dpa' gang ting nge 'dzin 'di tshol bas tha na ting nge 'dzin 'di thos pa tsam yang thob pa ni/ bzang skyong / khyod mos par bya/ khyod kyis khong du chud par bya ste/ byang chub sems dpa' de ni/ ting nge 'dzin 'di nyid tshol ba'i dge ba'i rtsa ba dang / chos don du gnyer ba'i dge ba'i rtsa ba dang / chos 'dod pa'i dge ba'i rtsa ba dang / brtson 'grus brtsams pa'i dge
96a
@#/ /ba'i rtsa bas bla na med pa yang dag par rdzogs pa'i byang chub las phyir mi ldog pa yin par rig par bya na/ bzang skyong / byang chub sems dpa' gang ting nge 'dzin 'di lung nod par byed/ kun chub par byed/ 'chang bar byed/ klog par byed la/ lung mnod pa dang / kun chub par bya ba dang / bcang bar bya ba dang / bklags par byas nas kyang gzhan dag la ston par byed/ sgrog par byed/ yang dag par sgrog par byed cing sgom pa'i sbyor ba la brtson par gnas pa lta smos kyang ci dgos/ de nas de'i tshe bcom ldan 'das kyis tshigs su bcad pa 'di dag gsungs so/ /sngon gyi de bzhin gshegs pa mi yi mchog /seng+ge'i blo gros zhes bya rjes dran te/ /der ni mi yi dbang po rgyal po des/ /ting 'dzin 'di ni de tshe thos par gyur/ /rgyal pos ting 'dzin 'di ni thos nas kyang / /sems mgu dga' ba dpe med pas bzung ste/ /mi mchog sangs rgyas seng+ge'i blo gros la/ /sngar gang gi ni rin po ches kyang gtor/ /bcom ldan 'das kyis legs gsungs ting 'dzin 'di/ /sems can thams cad la ni phan par shog /khyod la skyabs su de ring mchi'o zhes/ /de snyam bsam nas tshig tu'ang brjod par gyur/ /rgyal po de ni de yi las kyis ni/ /shi nas de nyid du ni yang skyes te/ /des ni dge slong rin chen zhes bya bar/ /phyogs su grags pa mthu chen
96b
mthong bar gyur/ /de las de nyid kyang ni thos gyur te/ /thos nas dga' ba shin tu rgyas pa skyed/ /bskyed nas byang chub zhugs pa dga' gyur te/ /gser dang gos kyis dge slong dgab byas nas| |de ni ting 'dzin 'di yang 'dod pa'i phyir/ /srog chags stong dang lhan cig rab tu byung / /lo ni stong phrag brgya snyed tshang bar yang / /de dag kun gyi dge slong de phyir 'brangs/ /thos pa rgya mtsho lta bu'i ting 'dzin 'di/ /lan gnyis ma yin lan gcig kho na thos/ /de yi dran pa skyo ba ma skyes shing / /ting 'dzin zhi ba 'di ni yongs su tshol/ /de dag kun gyis las 'di byas pa'i phyir/ /stong phrag drug cu rtsa brgyad tshang ba yi/ /sangs rgyas mthu chen rnams ni mnyes par byas/ /de las ting 'dzin 'di ni thos par gyur/ /de nas bde par gshegs pa gzhan dag kyang / /stong phrag drug cu rtsa brgyad tshang bar brjod/ /bde bar gshegs pa seng+ge'i blo gros la/ /bdag ni rjes su yi rang bgyid ces brjod/ /bsod nams byas pa de yis rgyal po de/ / brtson 'grus brtan pa zhes bya'i sangs rgyas gyur/ /srog chags bye ba khrag khrig bsam mi khyab/ /thams cad de yis skye zhing 'chi las bkrol/ /stong du tshang ba'ang rjes su slob slob nas/ / sangs rgyas gyur te dpa' brtan zhes bya bar/ /lhar bcas 'jig rten la ni grags par gyur/ /ting 'dzin sgras kyang byang chub reg gyur na/ /srid pa thams cad la ni mi brten par/ /gang zhig
97a
@#/ /ting 'dzin 'di ni rgya che bar/ /ston pa de dag byang chub 'gyur bar ni/ /smos ci dgos te nam yang the tshom med/ /sangs rgyas kyis gsungs ting 'dzin zhi ba 'di/ / dpag tshad brgya na gal te yod gyur kyang / /byang chub don du gnyer ba nyin mtshan du/ /nam yang mi 'dug song ste mnyan par bya/ /gal te song nas 'di ni ma rnyed na/ /'on kyang de yi bsod nams tshad med de/ /de ni de yi byang chub bskyed yin na/ /gang gis song ste 'di thos smos mi dgos/ /de phyir gang zhig ting 'dzin 'di 'dod pas/ /dang por tshangs pas byin de dran par byos| |dge slong gang la ting 'dzin 'di yod la/ /skyo ba'i sems ni med par bsten par bya/ /rjes su dran te skye ba snga ma la/ /stong phrag sum cu rtsa drug lo tshang bar/ /ngas ni chos smra ba la rtag bsten kyang / /ting 'dzin 'di ni nam yang thos ma gyur/ /sngon gyi sangs rgyas bden zhes bya ba byung / /de na dge slong gzhon nu thos mang zhing / /bde bar gshegs pa'i bstan pa nub 'og tu| |de tshe des ni ting 'dzin 'di nyid bzung / /nga ni de na rgyal rigs rgyal po ste/ /dge slong che ge mo zhig ting 'dzin 'di/ /'dzin gyi drung du legs par nyon cig ces/ /rmi lam du ni ting 'dzin 'di thos nas/ /myur du langs te rings ba'i tshul gyis ni/ /'di 'dzin pa yi dge slong de btsal te/ /mthong nas rab tu byung ba de las ni/ /'di nyid lan 'ga' thos lta srid dam zhes/ /
97b
stong phrag drug cu rtsa drug lo tshang bar/ /ngas ni dge slong de la dga' bas bkur/ /bdud kyis byin gyis brlags par gyur pa'i phyir/ /lan 'ga' tsam yang thos par ma gyur te/ /de phyir dge slong rnams dang dge slong ma/ /dge bsnyen dag dang dge bsnyen ma rnams la/ /ting 'dzin thos nas myur du zungs shig ces/ /mos par byed cing khong du chud par byed/ /der ni bskal pa tshang bar 'dug nas kyang // ting 'dzin 'dzin pa de ni bsnyen cing bsten/ /bskal pa stong du legs par bsnyen bkur byas/ /des ni ting 'dzin 'di'ang bshad par gyur/ /ting 'dzin rdul med 'di la rab spyod pa'i/ /dge slong grong du slong ba de nyid la/ /bza' ba dang ni bca' dang mal cha dang / /de bzhin gos dang bye ba byin par gyur/ /bca' dang bza' dang mal stan de bzhin gos/ /mang po bye ba thams cad lta 'ang zhog /gal te rang gi sha sbyin thob na ni/ /legs spyad yin na zas skom smos ci dgos/ /rtag tu bran gyur bsnyen bkur byed cing ni/ /ting 'dzin zhi ba 'di'ang tshol byed la/ /mkhas pas rnyed nas de'ang myur byed kyang / /de la byas pa gzo ba ma yin no/ /bskal pa mang po byed par btsal kyang ni/ /ting 'dzin 'di ni shin tu rnyed par dka'/ /'di yi skra yang brgya lam thos gyur na/ /kha ton byas nas ston pa smos ci dgos/ /gang gis gang+gA'i bye snyed 'jig rten khams/ /rin po ches ni bkang ste byin pa bas/ /gang zhig 'di las tshigs bcad 'ga' lung nos/ /de yi bsod nams tshad gzung mi sla'o//
98a
@#/ /bskal pa bye ba gang+g+na'i bye snyed du/ /gang rtag brtson 'grus brtsams te gnas pa bas/ /gang zhig 'di las tshigs bcad 'ga' lung mos/ /de yi bsod nams tshad gzung mi sla'o/ /bskal pa bye ba gang+ga'i bye snyed du/ /gang dag mi rten bsam gtan sgom pa bas/ /gang zhig 'di las tshigs bcad 'ga' lung nos/ /de yi bsod nams tshad gzung mi sla'o/ /bskal pa bye ba gang+gA'i bye snyed du/ /gang rtag shes rab gnas par gyur pa bas/ /gang zhig 'di las tshigs bcad 'ga' lung mnos/ /de yi bsod nams tshad gzung mi sla'o/ /bzang skyong gis zhus pa'i ting nge 'dzin gyi le'u ste nyi shu rtsa gsum pa'o// //bzang skyong / de bas na/ dad pa'i rigs kyi bu'am/ rigs kyi bu mos ting nge 'dzin 'di gus par byas te mnyan par bya'o/ /thos nas kyang gzung bar bya/ kun chub bar bya/ yi ger bri bar bya/ bcang bar bya/ bklag par bya'o/ /bzung zhing kun chub par byas nas kyang gzhan dag la rgya cher yang dag par bsgrag par bya'o/ /legs par bris te gzhag par bya'o/ /de ci'i phyir zhe na/ bzang skyong / nga 'das pa'i 'og tu ma 'ongs pa'i dus na byang chub sems dpa' dad pa can/ dang ba/ brtag pa mang po mang po 'byung bar 'gyur te/ de dag sems can rnams la phan pa dang bde ba'i phyir mang du thos pa tshol par 'gyur ro//
98b
de dag mang du thos pa tshol bas dam pa'i phyir phyogs dang / phyogs mtshams dag tu rgyu bar 'gyur te/ bzang skyong / sems can de lta bu chos don du gnyer ba/ chos la mos pa/ chos 'dod pa| chos yongs su 'dzin pa/ shin tu rgyas pa 'dzin pa'i sems can rnams kyi don dang ched du ting nge 'dzin 'di lung nos shing bstan la/ de bzhin gshegs pa rnams kyi byin gyi rlabs kyis byin gyis brlabs te glegs pa ba chen por legs par bris nas de bzhin gshegs pa rnams kyi phyag rgyas btab la gzhag par bya'o/ /bzang skyong / de la de bzhin gshegs pa rnams kyi phyag rgya gang zhe na/ 'di lta ste/ chos thams cad byed pa med pa/ bya ba med pa/ mngon par 'dus ma byas pa/ chags pa med pa/ dmigs su med pa/ stong pa nyid/ mtshan ma med pa/ smon pa med pa/ mtshan nyid med pa/ gnyis su med pa/ 'jug pa med pa/ brten pa med pa/ bgrang du med pa/ rnam par gzhag tu med pa/ gzung ba med pa/ dor ba med pa| gnas pa med pa/ chos thams cad rtag pa med pa/ chad pa med pa/ rgyu zad pa/ sdug bsngal zad pa/ dngos po zad pa/ mi skye ba/ mi 'gag pa/ mi gnas pa/ mi 'jig pa/ lam med pa| lam gyi 'bras bu med pa/ 'phags pa thams cad kyis ma dkrugs pa/ byis pa thams cad kyis spangs pa/ mi shes pa rnams kyis bor ba/ mkhas pa rnams kyis yongs su bzung
99a
@#/ /pa ste| bzang skyong / 'di ni/ de bzhin gshegs pa rnams kyis phyag rgya gang gis de bzhin gshegs pas gsungs pa rnams la btab pa'i de bzhin gshegs pa thams cad kyi phyag rgya'o/ /bzang skyong / de bas na/ byang chub don du gnyer ba'i rigs kyi bu'am/ rigs kyi bu mos phyi ma'i tshe phyi ma'i dus der ting nge 'dzin 'di lung mnod par 'dod pas lung mnos shing kha ton du byas nas gzhan dag la'ang rgya cher yang dag par bsgrag par bya'o/ /bzang skyong / de la chos bzhi dang ldan na/ byang chub sems dpa' tha na ting nge 'dzin 'di nyan pa'i phyir yang brtson par 'gyur na/ lung mnod pa dang / kha ton bya ba'i phyir lta smos kyang ci dgos/ bzhi gang zhe na/ sngon lhag pa'i bsam pa yongs su sbyangs pa dang / sngon smon lam btab pa dang / thams cad mkhyen pa'i ye shes la mos pa dang / ji ltar na de bzhin gshegs pa dgra bcom pa yang dag par rdzogs pa'i sangs rgyas rnams kyis bskal pa bye ba khrag khrig brgya stong phrag du mar yang dag par bsgrubs pa'i chos dkon mchog gi mdzod 'di 'chang bar 'gyur/ ston par 'gyur snyam nas chos kyi tshul thams cad len pa ste/ bzang skyong / chos bzhi po 'di dag dang ldan na/ byang chub sems dpa'i ting nge 'dzin 'di mnyan pa dang / gzung ba dang / bcang pa'i phyir brtson par 'gyur ro/ /bzang skyong /
99b
gzhan yang chos bzhi dang ldan na/ byang chub sems dpa' ting nge 'dzin 'di btsal ba la tha na yi ger bri ba tsam gyi phyir yang brtson par 'gyur ro/ /bzhi gang zhe na/ 'di lta ste/ sangs rgyas yid la byed pa dang / phyi phyir zhing chos rjes su dran pa la mkhas pa dang / chos thams cad dmigs pa yongs su gcod pa yid la byed pa dang / mtshan ma thams cad rnam par 'jig pa la mkhas pa ste/ bzang skyong / chos de bzhi dang ldan na/ byang chub sems dpa' ting nge 'dzin 'di btsal pa la tha na bri ba tsam gyi phyir yang brtson par 'gyur ro/ /bzang skyong / de la chos bzhi dang ldan na/ byang chub sems dpa' ting nge 'dzin 'di btsal ba la brtson par rig par bya'o/ /bzhi gang zhe na/ 'di lta ste/ chos thams cad gzung du med pa'i dngos po yongs su gcod pa'i shes pas byang chub sems dpa' ting nge 'dzin 'di la brtson par rig par bya'o/ /sangs rgyas kyi sku dmigs pa rnam par sgom pa la mkhas pas byang chub sems dpa' ting nge 'dzin 'di la brtson par rig par bya'o/ /dmigs pa thams cad du sangs rgyas dmigs pa yid la byed pas byang chub sems dpa' ting nge 'dzin 'di la brtson par rig par bya'o/ /chos thams cad dngos po dang bral bar mos pa la mkhas pas byang chub sems dpa' ting nge 'dzin 'di la brtson par rig par bya ste/ bzang skyong / chos de bzhi dang ldan na/ byang chub sems dpa' ting nge 'dzin 'di btsal
100a
@#/ /pa la mngon par brtson par rig par bya'o/ /bzang skyong / phyi ma'i tshe phyi ma'i dus lnga brgya pa tha ma la dam pa'i chos kun tu 'khrug pa'i tshe sems can thams cad la phan gdags pa dang / sems can thams cad la snying brtse ba'i phyir gang la la zhig ting nge 'dzin 'di btsal ba la brtson par gyur cing / de 'di snyam du ting nge 'dzin 'di ji ltar na shin tu rgyas pa dang / rgya che ba dang / yun ring du gnas par 'gyur snyam du sems bskyed par gyur na/ rigs kyi bu/ de'i bsod nams mang du bskyed de/ bsod nams kyi phung po de thams cad mkhyen pa nyid du gzhol bar rig par bya ba ma gtogs par bsod nams kyi phung po de'i mtha' rtogs par ma nus so/ /de dag gi bsod nams kyi phung po de smon lam gyi dbang gis myur du thams cad mkhyen pa nyid du gzhol bar 'gyur te/ dge ba'i rtsa ba'i tshogs chen po dang ldan pa/ bdag med par gnas pa las nges par byung ba/ gang dag gis bskal pa tshad med/ grangs med/ gzhal du med| bsam gyis mi khyab pa'am/ de bas kyang lhag par go cha chen po bgos pa rnams ni/ ma gtogs te/ de dag thams cad ni/ bsam pa ji lta ba bzhin du thams cad yongs su rdzogs par 'gyur/ de dag thams cad ni/ spyod pa'i khyad par ji lta ba dang / tshogs ji lta ba bzhin du nges par 'byung ngo / /bzang skyong / byang chub sems dpa'i theg pa la zhugs pa'i
100b
rigs kyi bu'am/ rigs kyi bu mo chos thams cad kyi pha rol tu phyin pa dang / thams cad mkhyen pa'i ye shes kyi pha rol tu phyin pa thob par 'dod pa dang / dge ba'i rtsa ba rnam par dag pa thob par 'dod pas phyi ma'i dus phyi ma'i tshe 'jigs pa chen po 'byung ba/ dam pa'i chos rnam par 'jig pa'i dus der ting nge 'dzin 'di yi ger bri ba dang / lung mnod pa dang / kha ton bya ba dang / gzhan dag la'ang rgya cher yang dag par bsgrag par bya ba'i phyir sbyor bar bya'o/ /de ci'i phyir zhe na/ chos thams cad kyi rnam pa thams cad mkhyen pa nyid kyi ye shes ni/ bzang skyong / ting nge 'dzin 'di'i nang du 'dus so/ /sangs rgyas rjes su dran pa la mkhas pa bsgrubs pas chos thams cad dngos po med pa'i rang bzhin du rtogs pa 'di ni/ sangs rgyas rjes su dran pa ste/ de la gnas pa'i byang chub sems dpa' rnams dmigs pa thams cad sangs rgyas la dmigs par mos so/ /dmigs pa thams cad de bzhin gshegs pa'i mthar 'jug par byed do/ /dmigs pa'i dngos po thams cad rang bzhin gyis ya ma bslar shes so/ /de dag ji lta ji ltar de bzhin gshegs pa rnams dmigs par byed pa dang / yid la byed pa de lta de ltar de bzhin gshegs pa mthong ba rnam par dag ste/ de lta bu la gnas pa de dag ni/ phyogs gang du'ang de bzhin gshegs pa mngon sum du mi 'gyur ba med de/ de dag ni/ phyogs thams cad du de bzhin gshegs pa mthong ba rnam
101a
@#/ /par sbyong ngo / /de bzhin gshegs pa mthong ba rnam par dag nas tshegs chung ngus 'jig rten gyi khams 'di nyid du dmigs pa byas na/ 'di nyid du de bzhin gshegs pa de dag mngon sum du mthong bar 'gyur ro/ /tshad med pas de dag gi de bzhin gshegs pa mngon sum du mthong ba yongs su dag par 'gyur te/ de bzhin gshegs pa tshad med pa rnams de'i mig lam du snang bar 'gyur ro/ /dmigs pa thams cad kyi rang bzhin ni/ gzung ba med pa'i phyir dmigs pa gcig gis dmigs pa thams cad 'dzin pa'ang ma yin/ dmigs pa thams cad kyis dmigs pa gcig 'dzin pa'ang ma yin no/ /chos thams cad kyi rang bzhin nye bar brtags na/ shin tu nye bar zhi ba'i phyir dngos po med pa nyid du grub pa'o/ /bzang skyong / de lta bu la gnas pa de dag ni/ de bzhin gshegs pa thams cad mthong ba rnam par dag par 'gyur la/ rnam par dag nas kyang rlom sems su mi byed/ spros par mi byed de/ de dag ni/ de ltar gyi sangs rgyas mngon sum du bzhugs pa'i ting nge 'dzin 'di sgom pa yongs su rdzogs par 'gyur ro/ /byang chub kyi phyogs kyi chos thams cad kyang yongs su rdzogs pa la gnas par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /de bzhin gshegs pas gang dag gsungs pa ni/ /ji lta bzhin du ye shes 'jug pa yin/ /de ni
101b
'jig rten gtso bo ston pa'i sras/ /ting nge 'dzin 'di la ni yid kyang brtson/ /gang gis sangs rgyas dmigs brjes dran pa/ /dmigs pa'i don ni du ma mthong bar 'gyur/ /de la ting 'dzin zhi ba blta dka' 'di| |phyi ma'i dus na mngon sum du'ang 'gyur/ /mkhas pa gang zhig chos kun mi rten cing / /sems can dag la phan phyir yid brtson pa/ /de dag phyi dus 'jigs pa chen po'i tshe/ /ting nge 'dzin 'di la ni sbyor bar 'gyur/ /sems can rnams la phan zhing gzung ba'i phyir/ /gang zhig rtag tu blta dka' chos 'di la/ /dran pa brtan par 'jog cing brtson byed pa/ /de yi lag tu ting 'dzin 'di 'gro 'gyur/ /gang zhig dran dang blo gros rtogs pa dag /sangs rgyas dmigs par rtag tu 'jog byed cing / /gzhan dring mi 'jog rnal 'byor brtson pa de/ /ting 'dzin chen po 'di la gnas par 'gyur/ /rjes su gzung phyir blta dka' tshig la gnas/ /'jig rten thams cad la ni yid skyo zhing / /mkhas pa srid pa thams cad mi 'dod pa/ /de dag ting 'dzin chen po 'di la brtson/ /byang chub 'dod cing phan phyir snying brtse gang / /de bzhin gshegs pa rnams kyi sku la rtog /zhi ba'i chos la smon lam 'debs byed pa/ /de dag ting 'dzin 'di la brten par brtson/ /'thab pa med cing rtsod pa med la zhi/ /bde bar gshegs pas bstod pa'i chos tshol zhing / /sangs rgyas dmigs pa la ni rtag gnas pa/ /de dag ting 'dzin 'di la brtag brtson yin//
102a
@#/ /gang dag phyi ma'i sdig pa'i dus de na/ /ting nge 'dzin 'di la ni brtson byed pa/ /spyod pa'i yon tan mtha' yas la gnas pa/ /de yi yon tan 'jig rten mgon pos mkhyen| |gang dag zag pa med pa'i chos shes shing / /shin tu tshul bzhin zag pa rnams kyang shes/ /rtog pa med spyod mnyam pa nyid gnas pa/ /de dag ting 'dzin 'di la brtag brtson yin/ /gang dag bde gshegs chos ni tshad med la/ /shes bzhin du yang kun smon lam 'debs shing / /kun mkhyen ye shes la ni brtan gnas pa/ /de la ting 'dzin zhi ba 'di ston to/ /mtshan nyid med cing mtshan nyid las kyang 'das/ /nyon mongs pa dang rnam dag gang yang med/ /rang bzhin stong pa'i chos rnams gang shes pa/ /de dag bde bar gshegs pa tshad med mthong / /gang zhig dmigs pa mtha' med brtson byed kyang / /dmigs pa thams cad stong pa nyid du shes/ /blta bar dka' dag mthong nas rlom sems med/ / des ni bde bar gshegs pa tshad med mthong / /gang zhig don mthong yid kyang rnam par dag /nyon mongs med cing zhi ba'i go 'phang gnas/ /rdul dang bral zhing mnyan don chos ston pa| |de la ting 'dzin zhi ba 'di bshad do/ /bde gshegs sras po zug rdu phyung ba gang / /bden pa ma nyams the tshom rnams dang bral/ /srog chags phan phyir byams pa sgom byed pa/ /de
102b
dag la ni don mchog 'di bshad do/ /gang zhig rang bzhin gyis ni ma rig bral/ /rig pas ma rig gnas ni sel byed cing / /don mchog 'di la brtson par sbyor byed pa/ /de la ting 'dzin zhi ba 'di bshad do/ /rnam dag gnas shing kun nas nyon mongs med/ /ye shes mtha' yas mngon par 'dod byed cing / /nges don 'di la mchog tu dga' thob pa/ /de la rnam thar zhi ba 'di bshad do| |gang zhig kun tu sbyor ba kun las grol/ /brtan zhing srog chags kun la snying brtse zhing / /gnod sems med cing zhi lam dga' brten pa/ /de la ting 'dzin 'di ni yang dag bsgrags/ / bzang skyong gis zhus pa'i ting nge 'dzin gyi le'u ste nyi shu rtsa bzhi pa'o// //bzang skyong / chos 'di bzhi ni/ byang chub sems dpa' rnams ting nge 'dzin 'di thob par 'gyur pa'o| |bzhi gang zhe na/ 'di lta ste/ sangs rgyas la gus pa dang / mi phyed pa'i dang ba yid la byed pa dang / chos la gus shing nyan 'dod pa dang / chos kyi rjes su mthun pa'i tshig sgrub pa ste| bzang skyong / chos bzhi po de dag ni/ byang chub sems dpa' rnams ting nge 'dzin 'di thob par 'gyur ba'o/ /bzang skyong / gzhan yang byang chub sems dpa' rnams ting nge 'dzin 'di thob par 'gyur ba'i chos bzhi'o/ /bzhi gang zhe na/ 'di lta ste/ yid la phyin ci log med pas sangs rgyas la dmigs pa'i sems pa dang / chos la the tshom med pas dmigs pa'i
103a
@#/ /ngo bo nyid rang bzhin gyis dge ba la rtog pa dang / dngos po la mkhas pa la rtog pas ngo bo nyid kyis stong pa/ rang bzhin gyis stong pa/ shin tu stong pa'i chos thams cad la yang dag par gzhol ba dang / 'du shes rnam par 'jig pa la mkhas pa/ yongs su gcod pa shes pa la rtog pas dngos po ya ma brla rnam par 'jig pa ste/ bzang skyong / chos de bzhi ni/ byang chub sems dpa' rnams ting nge 'dzin 'di 'thob par 'gyur ba'o/ /bzang skyong / gzhan yang byang chub sems dpa' rnams ting nge 'dzin 'di 'thob par 'gyur ba'i chos bzhi'o/ /bzhi gang zhe na/ 'di lta ste/ sangs rgyas thams cad kyis rjes su bzung ba dang / dam pa'i chos 'dzin pa la mkhas la dam pa'i chos srung zhing sbed pa dang / sems can thams cad la bde bar sbyor zhing sems can thams cad la snying brtse ba'i sems dang / sems can gyi 'du shes rnam par 'jig pa la mkhas pa ste/ bzang skyong / chos de bzhi ni/ byang chub sems dpa' rnams ting nge 'dzin 'di thob par 'gyur ba'o/ /bzang skyong / de bas na/ phyi ma'i dus phyi ma'i tshe lnga brgya pa tha ma la dam pa'i chos cher 'khrug pa'i tshe der byang chub sems dpa' lus dang srog kyang yongs su btang ba la gnas te/ ting nge 'dzin 'di gzung bar bya'o/ /kun chub par bya'o/ /bcang bar bya'o//
103b
bzang skyong / ches thams cad gzung ba la mkhas pa la brtson pa'i byang chub sems dpa' rnams ni/ de bzhin gshegs pa rnams kyis bskal pa bye ba mtha' yas par yang dag par bsgrubs pa'i chos rin po che'i mdzod 'di yun ring du gnas par bya ba'i phyir 'jog par 'gyur/ chos 'di lta bu 'di yang dag par bstan pa dang / rnam par dbye ba dang / yang dag par bsgrag par bya ba'ang nus par 'gyur ro/ /bzang skyong / byang chub sems dpa' rnams la brtson 'grus kyi gnas 'di dag ni/ yod de/ byang chub sems dpa' rnams brtson 'grus kyi byin gyi rlabs kyis sems can rnams kyi dge ba'i rtsa ba yongs su smin par bya ba'i phyir smon lam la 'jug par 'gyur ro/ /bzang skyong / gang zhig phyi ma'i tshe phyi ma'i dus der chos 'di dag 'jog par byed/ yang dag par 'dzin par 'gyur ba'i rigs kyi bu'am rigs kyi bu mo de dag ni/ sems can thams cad la phan pa dang / sems can thams cad yongs su gzung ba dang / sems can thams cad yang dag par gzung ba'i phyir zhugs pa yin te/ de dag ni/ de bzhin gshegs pa dgra bcom pa yang dag par rdzogs pa'i sangs rgyas rnams kyis yongs su bzung bar 'gyur ro/ /byang chub sems dpa' de 'jig rten gyi khams gzhan na 'dug kyang 'jig rten gyi khams gzhan na bzhugs pa'i sangs rgyas bcom ldan 'das rnams kyis
104a
@#/ /dgongs par 'gyur ro/ /de ni/ chos 'dod pa dang / chos don du gnyer ba dang / chos bsgrub pa'i phyir phyi ma'i tshe phyi ma'i dus na ting nge 'dzin 'di'i phyir brtson par 'gyur ro/ /gang dag phyi ma'i tshe phyi ma'i dus na chos kyi rnam grangs 'di lta bu 'di 'dzin par 'gyur ba de dag ni/ byang chub sems dpa'i chos rnams dang / byang chub sems dpa'i nor rnams kyis yang dag par bzung bar 'gyur ro/ /gang dag phyi ma'i tshe phyi ma'i dus na chos 'di lta bu 'di dag yongs su gzung ba'i phyir gnas par 'gyur ba de dag ni/ de bzhin gshegs pa'i stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad dang / sangs rgyas kyi chos thams cad kyang myur du 'dzin par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /gang zhig brtan pa chos sems pa/ /phyi ma'i dus su gyur pa na/ /dam chos gzung phyir gnas gyur pa/ /de dag la ni gzungs 'di bshad/ /gang dag dam chos rin chen phyir/ /'jigs pa med par brtson byed cing / /snying yang brtse la snying rje can/ /de dag chos kyang 'dzin par gnas/ /brtan cing bag yod dga' ba dang / /thub pa'i chos kyi mdzod 'dzin pa/ /de dag don du ting nge 'dzin/ /sangs rgyas bsngags pa bstan pa yin/ /gang zhig chos rgyal skyob pa yis/ /gang dag byin gyis
104b
brlabs gyur pa/ /de dag phyi dus 'jigs bcas tshe/ /chos nyid 'di ni 'dzin par 'gyur/ /shin tu ngo bo nyid kyis ni/ /chos rnams stong zhing spros med par/ /dran dang ldan pa gang gis shes/ / de dag chos kyang 'dzin par 'gyur/ /thams cad chos kyi ngo bo nyid/ /de la bsam yas tshigs su bcad/ /nges pa nyid du shes gyur pa/ /de dag chos kyang 'dzin par 'gyur/ /zad pa shes la gnas gyur cing / /mi skye ba la'ang rab gnas la/ /sems ni dul zhing ngo tsha ldan/ /de dag chos kyang 'dzin par 'gyur/ /bde ba'i lam ni bla na med/ /cang shes lam la zhugs gyur pa/ / brtson 'grus byin gyis brlabs dang ldan/ /de dag chos 'dzin gnas pa yin/ /de bzhin nyid dang mi rtog don/ /gang gis chos nyid rab tu shes/ /de la spros pa ci yang med/ /de dag chos kyang 'dzin par 'gyur/ /thams cad chos ni byed med par/ /des pa gang gis shes pa de/ /ci yang med cing len med pa'i/ /chos nyid de ni sgrog par 'gyur/ /'dzin pa med cing 'dzin dang bral/ / chos kun sngon nas yongs dag par/ /gang gis shes pa de dag ni/ /chos kyi spyod yul gnas pa yin/ /chos kun ngo bo med par ni/ /de ltar chos la gang gis shes/ /de dag chos nyid 'di ston 'gyur/ /de ni 'jug pa yin par bshad/ /ming med ming dang bral gyur cing / /spros pa med cing mi skye bar/ /gang gis chos nyid rab shes pa/ /de dag stong pa nyid kyang sgrog /
105a
@#/ /gnas pa med cing 'gro ba med/ /nam mkha'i gnas bzhin dag par ni/ /gang gis chos 'di shes gyur pa/ /de la ting 'dzin skye bar 'gyur/ /gang dag 'du shes don rtog bral/ /ngo bo nyid du ma skyes shing / /dngos po'i 'du shes bral gyur pa/ /de dag chos nyid ston par 'gyur/ /rgyas gang ba de ni rgya med de/ /dgongs pa'i tshig tu gsungs pa yin| |gang gis de ltar shes gyur pa/ /de dag chos nyid 'di 'dzin 'gyur/ /bzang skyong gis zhus pa'i ting nge 'dzin gyi le'u ste nyi shu rtsa lnga pa'o// //bzang skyong / de lta bas na/ rigs kyi bu'am/ rigs kyi bu mo de dag gis bag yod pa lhur blangs te chos 'di dag yang dag par bsdu bar bya'o/ /'di'i phan yon du yang sbyar bar bya'o/ / tshul bzhin dang yang ldan par bya'o/ /tshul bzhin ma yin pa'ang yongs su spang bar bya ste/ de ltar na chos zab mo blta bar dka' ba/ rtogs par dka' ba gang sangs rgyas kyi chos thams cad skyed par byed pa/ rang byung rnams kyi ye shes dang / thogs pa med pa'i ye shes thob par byed pa 'di rnyed mi dka' bar 'gyur ro/ /de nas de'i tshe bcom ldan 'das kyis tshe dang ldan pa kun dga' bo dang / tshe dang ldan pa 'od srung chen po dang / byang chub sems dpa' sems dpa' chen po bzang skyong dang / li tsa byi gzhon nu rin chen 'byung gnas dang /
105b
khyim bdag ded dpon che bzang dang / tshong dpon gyi bu phug spas dang / bram ze 'dam bus byin dang / byang chub sems dpa' dbang pos byin dang / khyim bdag chu lha dang / byang chub sems dpa' lnga brgya tsam po de dag dang / 'khor bzhi po las ji snyed cig 'dus pa de dag thams cad dang / lha dang / mi dang / lha ma yin du bcas pa'i 'jig rten rnams la bka' stsal pa| rigs kyi bu rnams/ ngas bskal pa bye ba khrag khrig phrag brgya stong du yang dag par bsgrubs pa bla na med pa'i chos rin po che 'di'i mdzod dang / 'jig rten thams cad yid ches par mi 'gyur ba zab mo/ /don zab pa/ rnam par thar pa sgo gsum gyi tshul bshad pa zab mo/ /byang ba/ mthong bar dka' ba/ rtogs par dka' ba/ mkhas shing shes pas rig pa/ rgya che ba| gya nom pa/ don phun sum tshogs pa'i mdo sde 'di lta bu 'di'ang khyed la gtad do/ /rjes su gtad do/ /gang dag bla na med pa yang dag par rdzogs pa'i byang chub kyi rten du gyur pa de dag kyang khyed la nyis 'gyur du rjes su gtad gyi/ khyed kyis kyang ci nas kyang bri bar bya'o/ /mnyan par bya'o/ /gzung bar bya'o/ /kun chub par bya'o/ /bcad par bya'o/ /bklag par bya'o/ /shin tu rgyas pa dang / rgya cher bya ba'i phyir gzhan dag la'ang rgya cher bshad par bya'o/ /bstan par bya'o/ /yang dag par bsgrag par bya'o/ /sems can thams cad rjes su
106a
@#/ /gzung ba'i phyir sgom pa'i sbyor ba la brtson par bya'o/ /'di skad \?\ bstan pa bzhin du chos kyi rjes su mthun pa'i chos bsgrub par bya ste/ de ci nas kyang skyes bu tha ma par ma gyur par bya'o/ /bzang skyong / rigs kyi bu'am/ rigs kyi bu mo gang \?\ la la zhig ting nge 'dzin 'di thos la thos nas kyang lung nod par byed/ kha ton du byed/ kun chub par byed na/ des lhag pa'i bsam pas gus par bya ste/ mnyan par bya'o/ /lung mnod par bya'o/ /bshad par bya'o/ /gang dag gzhan dag la ston tam/ klog tu 'jug na/ des kyang lhag pa'i bsam pas rgya cher bya ba'i phyir ci nas kyang ting nge 'dzin 'di yun ring du gnas pa dang / shin tu rgyas pa dang / shin tu rgya che bar gzhan dag la bstan par bya/ klog tu gzhug par bya ste/ 'di ni/ khyed la rjes su bstan pa yin no/ /chos kyi rnam grangs 'di bshad pa'i tshe sems can grangs med tshad med pa dag ni/ bla na med pa yang dag par rdzogs pa'i byang chub tu dge ba'i rtsa ba bskyed do/ /byang chub sems dpa' gang sangs rgyas kyi zhing dpag tu med pa nas 'dus pa gang+gA'i klung gi bye ma snyed kyis ting nge 'dzin 'di nyid thob ste/ bla na med pa yang dag par rdzogs pa'i byang chub las phyir mi ldog par gyur to/ /stong gsum gyi stong chen po'i 'jig rten gyi khams 'di'ang rnam pa drug tu
106b
g.yos so/ /lha rnams kyis kyang bar snang las me tog gi char phab bo/ /rnga bo che dag kyang ma brdungs par sgra byung ngo / /bcom ldan 'das kyis de skad ces bka' stsal nas byang chub sems dpa' sems dpa' chen po bzang skyong dang / dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yi rang ste| bcom ldan 'das kyis gsungs pa la mngon par bstod do/ /'phags pa da ltar gyi sangs rgyas mngon sum du bzhugs pa'i ting nge 'dzin ces bya ba theg pa chen po'i mdo rdzogs so// //rgya gar gyi mkhan po shAkya pra b+ha dang / zhu chen gyi lo tsA ba ban+d+he rat+na rak+Shi tas zhus te gtan la phab pa/ skad gsar bcad kyis kyang bcos lags /