//rgya gar skad du/ AR+Ya rat+na tsan+d+ra pa ri pr-i ts+tshA nA ma ma hA yA na sU tra/ bod skad du/ 'phags pa rin chen zla bas zhus pa zhes bya ba theg pa chen po'i mdo/ thams cad mkhyen pa la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la shA ri'i bu dang / maung+gal gyi bu chen po la sogs pa dge slong 'bum phrag bdun cu rtsa gnyis kyi dge slong gi dge 'dun chen po rnams dang thabs gcig tu bzhugs te/ byang chub sems dpa' dgu khri la/ 'di lta ste/ byang chub sems dpa' sems dpa' chen po byams pa dang / byang chub sems dpa' sems dpa' chen po 'jam dpal dang / byang chub sems dpa' sems dpa' chen po blo gros mi zad pa dang / byang chub sems dpa' sems dpa' chen po blo gros rgya mtsho dang / byang chub sems dpa' sems dpa' chen po blo gros mtha' yas dang / byang chub sems dpa' sems dpa' chen po blo gros brtan pa dang / byang chub sems dpa' sems dpa' chen po khams gsum rnam par gnon pa dang / byang chub sems dpa' sems dpa' chen po lag na rin po che dang / byang chub sems 253a @#/ /dpa' sems dpa' chen po sman gyi rgyal po dang / byang chub sems dpa' sems dpa' chen po rin chen 'byung gnas dang / byang chub sems dpa' sems dpa' chen po dga' sdug dang / de dag la sogs pa byang chub sems dpa' dgu khri dang / lha'i bu bye ba khrag khrig 'bum phrag du ma dag dang / rgyal po chen po bzhi dang / lha rnams kyi dbang po brgya byin g.yog 'khor lha'i bu 'bum phrag du ma dang bcas pa dang / mi mjed kyi bdag po tshangs pa g.yog 'khor tshangs ris kyi lha'i bu 'bum phrag du ma dang bcas pa dang / klu'i rgyal po rgya mtsho dang / klu'i rgyal po ma dros pa dang / klu'i rgyal po e la'i 'dab dang / klu'i rgyal po kun tu grags dang / de dag la sogs pa klu 'bum phrag du ma dang / gnod sbyin gyi sde dpon chen po 'brog gnas dang / kha spu can dang / rtsi sman dang / bong bu dang / de dag la sogs pa gnod sbyin gyi sde dpon 'bum phrag du ma dang thabs gcig tu bzhugs so/ /de nas bcom ldan 'das snga dro'i dus kyi tshe/ sham thabs dang / chos gos gsol te/ lhung bzed bsnams nas rgyal po'i khab kyi grong khyer chen por bsod snyoms la gshegs so/ /de'i tshe rgyal po gzugs can snying po'i sras khye'u rin chen zla ba zhes bya ba glang po che lag brgyad 253b pa zhes bya ba rin po che sna bdun gyis brgyan cing gser gyis dra bas g.yogs pa/ dril bu g.yer kha dpyangs pa/ gser gyis spras pa'i dar gyi lda ldi mang pos mdzes par byas pa| bdug pas gdugs pa/ me tog sil mas gtor ba/ rgyal mtshan dang ba dan sgreng ba/ gdugs dang ra bas brgyan pa/ rin po che'i shing ljon pas mdzes par byas pa/ stegs bu bdun gyis khor ra khor yug dag bskor ba la zhon nas rgyal po'i 'byor pa chen po dang / rgyal po'i mthu chen po dang ldan pas rgyal po'i khab kyi grong khyer chen po nas byung ste/ sems can thams cad la sbyin pa dag sbyin zhing song ba las gzhon nu rin chen zla bas thag ring po zhig nas bcom ldan 'das mdzes pa/ dang bar bya ba/ dbang po dul ba/ thugs dul ba/ kha dog bzang po rgyas pa mchog dang ldan pa/ dul ba dang / zhi ba'i mchog /dul ba dang / zhi ba dam pa'i pha rol tu phyin pa/ gtso bo chen po/ dbang po bsrung ba/ dbang po thul ba/ mtsho ltar dang zhing gsal la rnyog pa med pa/ skyes bu chen po'i mtshan sum cu rtsa gnyis mnga' ba/ dpe byad bzang po brgyad cus brgyan pa'i sku gser gyi mchod sdong ltar 'phags la dpal gyi mchog gis lham me/ lhan ne/ lhang nge ste gshegs pa mthong ngo / /mthong nas kyang / sems dad par gyur to/ /sems 254a @#/ /dad par gyur nas glang po che'i steng nas skyen par babs te/ bcom ldan 'das ga la ba der song ste phyin nas bcom ldan 'das kyi zhabs la phyag btsal te/ bcom ldan 'das la lan gsum bskor ba byas nas phyogs gcig tu 'dug go /bcom ldan 'das la zhes dang bcas/ gus pa dang bcas pas phyogs gcig tu 'dug nas rgyal po gzugs can snying po'i sras khye'u rin chen zla bas bcom ldan 'das ga la ba der logs su thal mo sbyar ba btud de bcom ldan 'das la 'di skad ces gsol to/ /bcom ldan 'das/ rigs kyi bu'am/ rigs kyi bu mo dad pa can gang dag gis phyogs bcu'i de bzhin gshegs pa dgra bcom pa yang dag par rdzogs pa'i sangs rgyas bcu po dag gi mtshan thos na bla na med pa yang dag par rdzogs pa'i byang chub las phyir mi ldog par 'gyur ba de lta bu bcom ldan 'das kyis bshad du gsol/ bde bar gshegs pas bshad du gsol/ de skad ces gsol ba dang / bcom ldan 'das kyis rgyal po gzugs can snying po'i sras khye'u rin chen zla ba la 'di skad ces bka' stsal to/ /gzhon nu/ legs so/ /legs so/ /gzhon nu/ khyod 'di ltar skye bo mang po la phan pa dang / skye bo mang po la bde ba'i phyir dang / 254b 'jig rten la snying brtse ba dang / skye bo'i tshogs phal po che'i don dang / lha dang / mi rnams la phan pa dang / bde ba'i phyir zhugs pa dang / da ltar dang / ma 'ongs pa'i byang chub sems dpa' sems dpa' chen po rnams yongs su gzung ba'i phyir zhugs te/ gzhon nu/ khyod de bzhin gshegs pa dgra bcom pa yang dag par rdzogs pa'i sangs rgyas la don 'di zhu bar sems pa legs so/ /gzhon nu/ khyod kyi zhu ba bzang ste spobs pa dge'o/ /de'i phyir/ gzhon nu khyod legs par rab tu nyon la yid la zungs shig dang bshad do| |sems rtse gcig tu rna ba blags te sems sdus la soms shig dang / don de ngas khyod la bshad do/ /de nas rgyal po gzugs can snying po'i sras khye'u rin chen zla bas bcom ldan 'das la legs so zhes gsol nas bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /gzhon nu/ sangs rgyas kyi zhing 'di nas shar phyogs su sangs rgyas kyi zhing bye ba khrag khrig 'bum phrag dpag tu med grangs med bsam gyis mi khyab gzhal du med pa snyed 'das pa na 'jig rten gyi khams mya ngan med pa zhes bya ba zhig yod do/ /'jig rten gyi khams mya ngan med pa zhes bya ba de sangs rgyas kyi zhing dpag tu med pa ji snyed cig 'das pa na yod 255a @#/ /ce na/ gzhon nu/ dper na/ stong gsum gyi stong chen po'i 'jig rten gyi khams 'di srid pa'i rtse mo'i bar du phye mas yongs su gang bar gyur la/ de nas mi la la zhig gis bye ma de'i sa 'bru re re nas blangs shing shar phyogs kyi sangs rgyas kyi zhing re rer bye ma 'bru re 'jog par byed pa de lta bu'i tshul gyis bye ma de thams cad shar phyogs su yongs su zad cing yongs su gtugs par gyur kyang / sangs rgyas kyi zhing de dag gi tshad dam/ mtha' rtogs par mi nus pa'i sangs rgyas kyi zhing bye ba khrag khrig 'bum phrag dpag tu med grangs med pa de snyed 'das pa na 'jig rten gyi khams mya ngan med pa zhes bya ba de yod de/ 'jig rten gyi khams de'ang lag mthil ltar mnyam par gyur pa/ rin po che sna bdun gyis legs par brgyan pa/ gser gyis gzhir 'dug cing / mig mang ris su bris pa/ rin po che'i shing ljon pas brgyan pa/ sems can dmyal ba dang / dud 'gro'i skye gnas dang / yi dwags dang / lha ma yin gyi tshogs rnams med pa/ rtswa dang / shing skam dang / tsher ma dang / rdo dang / gseg ma dang / gyo mo dag med pa/ ngam grog dang / g.yang sa med pa/ me tog/ sil ma dag bkram pa yin te/ de na de bzhin gshegs pa dgra bcom pa yang dag par rdzogs 255b pa'i sangs rgyas dpal bzang po zhes bya ba da ltar bzhugs zhing 'tsho la gzhes te/ /byang chub sems dpa'i tshogs kyis bskor cing / byang chub sems dpas mdun gyis ltas pa| rig pa dang / zhabs su ldan pa/ bde bar gshegs pa/ 'jig rten mkhyen pa/ skyes bu gdul bya'i kha lo sgyur ba/ bla na med pa/ lha dang / mi rnams kyis ston pa/ sangs rgyas bcom ldan 'das skyes bu chen po'i mtshan sum cu rtsa gnyis kyis brgyan pa'i sku/ gser legs par btsos shing legs par dul ba lta bu rin po che'i rgyan legs par bkod pa bzhin du 'khor gyi nang na mdzes par bzhugs shing / thog mar dge ba/ bar du dge ba/ tha mar dge ba'i chos ston to/ /'di skad ces kyang ston te/ 'di ltar sa'i khams ni med par mi 'gyur ro/ /de bzhin du chu'i khams dang / me'i khams dang / rlung gi khams dang / skye dgu'i bdag po tshangs pa dang / gzugs dang / tshor ba dang / 'du shes dang| 'du byed dang / rnam par shes pa med par mi 'gyur ro zhes ston to/ /gzhon nu/ gzhan yang / de bzhin gshegs pa dgra bcom pa yang dag par rdzogs pa'i sangs rgyas dpal bzang po bla na med pa yang dag par rdzogs pa'i byang chub mngon par rdzogs par sangs rgyas nas ni bskal pa bye ba phrag drug cu lon no/ /gzhon nu/ gzhan yang / 256a @#/ /sangs rgyas kyi zhing de na nyin mo dang / mtshan mo'i ming yang med de/ dzam+bu gling gi rtsi ba'i thabs 'dis dper bya ba ni ma gtogs so/ /sangs rgyas kyi zhing de thams cad kyang rtag tu de bzhin gshegs pa de'i 'od kyis snang bar 'dug go /gzhon nu/ gzhan yang / de bzhin gshegs pa des chos bstan pa re res kyang sems can bye ba khrag khrig phrag 'bum dpag tu med pa dag mi skye ba'i chos la 'god par mdzad do/ /bzod pa dang po dang / bzod pa gnyis pa dang / bzod pa gsum pa la ni de'i nyis gyur 'god par mdzad do/ /gzhon nu/ gzhan yang / de bzhin gshegs pa dgra bcom pa yang dag par rdzogs sangs rgyas de'i sngon gyi smon lam gyi stobs bskyed pas sangs rgyas kyi zhing gzhan dag na gang dag sngon gyi rgyal ba rnams la lhag par bya ba byas shing dge ba'i rtsa ba bskyed pa'i sems can dag gi lus la 'od kyis reg pa de dag kyang mi skye ba'i chos la bzod pa thob bo/ /gzhon nu/ gzhan yang / rigs kyi bu'am/ rigs kyi bu mo 'ang rung / de bzhin gshegs pa dgra bcom pa yang dag par rdzogs pa'i sangs rgyas dpal bzang po de'i mtshan thos na bla na med pa yang dag par rdzogs pa'i byang chub las phyir mi ldog par 'gyur ro/ /gzhon nu/ 'di nas lho 256b phyogs su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na 'jig rten gyi khams dga' ba zhes bya ba zhig yod de/ lag mthil ltar mnyam pa zhes bya ba nas snga ma bzhin du sbyar ro/ /de nas de bzhin gshegs pa dgra bcom pa yang dag par rdzogs pa'i sangs rgyas tsan+dan dpal zhes bya ba da ltar bzhugs shing 'tsho la gzhes te/ byang chub sems dpas bskor cing byang chub sems dpas mdun gyis bltas pa la thog mar dge ba/ bar du dge ba/ tha mar dge ba'i chos ston to zhes bya ba nas rnam par shes par med par mi 'gyur ro/ /zhes bya ba'i bar du snga ma bzhin du sbyar ro/ /gzhon nu/ de la ji snyam du sems/ ci'i phyir de bzhin gshegs pa de tsan+dan dpal zhes bya zhe na/ gzhon nu/ de bzhin gshegs pa de'i sangs rgyas kyis zhing de thams cad tsan+dan gyi khang pa brtsegs pas yongs su khyab pas na de'i phyir de bzhin gshegs pa de'i mtshan tsan+dan dpal zhes bya'o/ /gzhan yang rigs kyi bu'am/ rigs kyi bu mo 'ang rung / de bzhin gshegs pa dgra bcom pa yang dag par rdzogs pa'i sangs rgyas de'i mtshan thos nas bla na med pa yang dag par rdzogs pa'i byang chub las phyir mi ldog par 'gyur ro/ /gzhon nu/ 'di nas nub phyogs 257a @#/ /su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na 'jig rten gyi khams bzang po zhes bya ba zhig yod de/ lag mthil ltar mnyam par gyur pa zhes bya ba nas snga ma bzhin du sbyar te/ ji ltar gong du bstan pa bzhin no/ /de nas de bzhin gshegs pa dgra bcom pa yang dag par rdzogs pa'i sangs rgyas snang ba mtha' yas zhes bya ba da ltar bzhugs shing 'tshol gzhes te/ byang chub sems dpas yongs su bskor cing / byang chub sems dpas mdun gyis bltas pa la thog mar dge ba/ bar du dge ba/ tha mar dge ba'i chos ston to/ /'di skad ces kyang chos ston to zhes bya ba nas rnam par shes pa med par mi 'gyur ro zhes bya ba'i bar du snga ma bzhin du sbyar ro/ /gzhon nu/ gzhan yang / rigs kyi bu'am/ rigs kyi bu mo 'ang rung / de bzhin gshegs pa dgra bcom pa yang dag par rdzogs pa'i sangs rgyas de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing 'od de'ang nyams su myong ngo / /gzhon nu| 'di nas byang phyogs su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na 'jig rten gyi khams 'khrug med ces bya ba 257b zhig yod de/ lag mthil ltar mnyam par gyur pa zhes bya ba nas thams cad snga ma bzhin du sbyar ro/ /de na de bzhin gshegs pa dgra bcom pa yang dag par rdzogs pa'i sangs rgyas me tog gi dpal zhes bya ba da ltar bzhugs shing 'tshol gzhes te/ byang chub sems dpas yongs su bskor cing byang chub sems dpas mdun gyis bltas pa la chos ston to zhes bya ba nas rnam par shes pa med par mi 'gyur ro/ /zhes bya ba'i bar du snga ma bzhin du sbyar ro/ /gzhon nu/ gzhan yang rigs kyi bu'am/ rigs kyi bu mo'ang rung de bzhin gshegs pa dgra bcom pa yang dag par rdzogs pa'i sangs rgyas de'i mtshan thos nas bla na med pa yang dag par rdzogs pa'i byang chub las phyir mi ldog par 'gyur zhing lha dang bcas pa'i 'jig rten gyi rgyal mtshan lta bur 'gyur ro/ /gzhon nu/ 'di nas shar lho'i phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na 'jig rten gyi khams zla ba snang ba zhes bya ba zhig yod de/ lag mthil ltar mnyam pa zhes bya ba nas snga ma bzhin du sbyar ro/ /gzhon nu/ de la ji snyam du sems/ ci'i phyir 'jig rten gyi khams zla ba snang ba zhes bya zhe na/ 'jig rten gyi khams de thams cad de bzhin gshegs pa de'i 'od kyis snang bar byas pa na / 258a @#/ /de'i phyir 'jig rten gyi khams de zla ba snang ba zhes bya'o/ /de na de bzhin gshegs pa dgra bcom pa yang dag par rdzogs pa'i sangs rgyas mya ngan med pa'i dpal zhes bya ba da ltar bzhugs shing 'tsho la gzhes te/ byang chub sems dpas yongs su bskor cing byang chub sems dpas mdun gyis bltas pa la chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro/ /rigs kyi bu 'am/ rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur ro/ /gzhon nu/ 'di nas lho nub kyi phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na 'jig rten gyi khams rtog dang ldan pa zhes bya ba zhig yod de/ lag mthil ltar mnyam par gyur pa zhes bya ba nas snga ma bzhin du sbyar ro/ /de na de bzhin gshegs pa dgra bcom pa yang dag par rdzogs pa'i sangs rgyas rin po che'i mchod sdong zhes bya ba da ltar bzhugs shing 'tshol bzhes te/ byang chub sems dpas yongs su bskor cing byang chub sems dpas mdun gyis bltas pa la chos ston to zhes bya ba nas rnam par shes pa med par mi 'gyur 258b ro zhes bya ba'i bar du snga ma bzhin du sbyar ro/ /rigs kyi bu'am/ rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing 'jig rten na rin po che ltar mngon par 'phag par 'gyur ro/ /gzhon nu/ 'di nas nub byang gi phyogs mtshams su sangs rgyas kyi bye ba khrag khrig 'bum phrag grangs med pa de snyed 'das pa na 'jig rten gyi khams sgra ldan zhes bya ba zhig yod de/ lag mthil ltar mnyam par gyur pa zhes bya ba nas snga ma bzhin du sbyar ro/ /gzhon nu/ de la ji snyam du sems/ ci'i phyir 'jig rten gyi khams de sgra dang ldan zhes bya zhe na/ 'jig rten gyi khams de sgra 'di lta bu dang ldan te/ 'di lta ste/ sangs rgyas kyi sgra dang / chos kyi sgra dang / dge 'dun gyi sgra dang / stong pa nyid kyi sgra dang / mtshan ma med pa'i sgra dang / smon pa med pa'i sgra dang / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab kyi sgra dang / rnam par grol ba'i sgra dang / rnam par grol ba'i ye shes gzigs pa'i sgra rnams dang ldan no/ /gzhon nu/ 'jig rten gyi khams de sgra de lta bu dag dang ldan pas na de'i phyir 'jig rten gyi khams de sgra dang ldan zhes bya'o/ /de na de bzhin gshegs pa dgra bcom pa yang dag par rdzogs 259a @#/ /pa'i sangs rgyas me tog dpal zhes bya ba da ltar bzhugs shing 'tsho la gzhes te/ byang chub sems dpas bskor cing byang chub sems dpas mdun gyis bltas pa la chos ston to/ /zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro/ /rigs kyi bu'am rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing me tog ltar mi dge ba'i chos rnams kyis kyang gos bar mi 'gyur ro/ /gzhon nu/ 'di nas byang shar gyi phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na 'jig rten gyi khams bde ldan zhes bya ba zhig yod de/ 'byor pa dang / rgyas pa dang / bde ba dang / lo legs pa dang / skye bo dang / mi mang pos gang zhing lag mthil ltar mnyam par gyur pa zhes bya ba nas snga ma bzhin du sbyar ro/ /de na de bzhin gshegs pa dgra bcom pa yang dag par rdzogs pa'i sangs rgyas mngon par shes pa chung du dang / 'bring dang / chen pos rnam par rol pa zhes bya ba da ltar bzhugs shing 'tshol gzhes te/ byang chub sems dpas bskor cing byang chub sems dpas mdun gyis bltas pa la chos ston to 259b zhes bya ba nas rnam par shes pa med par mi 'gyur ro zhes bya ba'i bar snga ma bzhin du sbyar ro/ /rigs kyi bu'am/ rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing byang chub sems dpa'i spyod pa dang tshul thams cad la mkhas shing pha rol tu phyin pa'i shes pa'ang yongs su 'dzin par 'gyur ro/ /gzhon nu/ 'di nas 'og gi phyogs su sangs rgyas kyi zhing bye ba khrag khrig 'bum phrag grangs med pa de snyed 'das pa na 'jig rten gyi khams yangs pa dang ldan pa zhes bya ba zhig yod do/ /gzhon nu/ de la ji snyam du sems/ ci'i phyir 'jig rten gyi khams de yangs pa dang ldan pa zhes bya zhe na/ 'jig rten gyi khams de lag mthil ltar mnyam par gyur pa/ ri med cing khor yug dang / khor yug chen po med de/ sangs rgyas kyi zhing de na ri zhes bya ba'i ming yang ye med pas na de'i phyir 'jig rten gyi khams de yangs pa dang ldan pa zhes bya'o/ /de na de bzhin gshegs pa dgra bcom pa yang dag par rdzogs pa'i sangs rgyas snang ba'i dpal zhes bya ba da ltar bzhugs shing 'tsho la gzhes te/ byang chub sems dpas bskor cing byang chub sems dpas mdun gyis bltas pa la chos ston to zhes bya ba nas rnam par shes 260a @#/ /pa med par mi 'gyur ro zhes bya ba'i bar du snga ma bzhin du sbyar ro/ /rigs kyi bu'am/ rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing nye bar len pa'i nyon mongs pa thams cad zad par yang rjes su 'dzin par 'gyur ro/ /gzhon nu| sangs rgyas kyi zhing 'di nas steng gi phyogs su sangs rgyas kyi zhing bye ba khrag khrig 'bum phrag grangs med pa/ dpag tu med pa/ bsam gyis mi khyab/ gzhal du med pa de snyed 'das pa na 'jig rten gyi khams zla ba can zhes bya ba zhig yod do/ /'jig rten gyi khams zla ba can zhes bya ba de sangs rgyas kyi zhing dpag tu med pa ji snyad cig 'das pa na yod ce na/ gzhon nu/ 'di lta ste/ stong gsum gyi stong chen po'i 'jig rten gyi khams 'di srid pa'i rtse mo'i bar du bye mas yongs su gang bar gyur la/ de nas mi la la zhig gis bye ma de las 'bru re re nas blangs shing steng gi phyogs kyi sangs rgyas kyi zhing re rer bye ma 'bru re 'jog par byed pa de lta bu'i tshul gyis bye ma de thams cad steng gi phyogs su yongs su zad cing yongs su gtugs par gyur kyang sangs rgyas kyi zhing de dag gi tshad dam/ mtha' rtogs par mi nus 260b pa'i sangs rgyas kyi zhing bye ba khrag khrig 'bum phrag dpag tu med grangs med pa de snyed 'das pa na 'jig rten gyi khams zla ba can zhes bya ba de yod de/ 'jig rten gyi khams de'ang lag mthil ltar mnyam par gyur pa/ rin po che sna bdun gyis legs par brgyan pa/ gser gyis gzhir 'dug cing mig mang ris su bris pa/ rin po che'i shing ljon pas legs par brgyan pa/ sems can dmyal ba dang / dud 'gro'i skye gnas dang / yi dwags dang / lha ma yin gyi tshogs rnams med pa/ rtswa dang / shing skam dang / tsher ma dang / rdo dang / gseg ma dang / gyo mo dag med pa/ ngam grog dang / g.yang sa med pa/ me tog gi sil ma dag bkram pa yin te/ de na de bzhin gshegs pa dgra bcom pa yang dag par rdzogs pa'i sangs rgyas nor dpal zhes bya ba da ltar bzhugs shing 'tsho la gzhes te/ byang chub sems dpas bskor cing byang chub sems dpas mdun gyis bltas pa/ rig pa dang / zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang / mi rnams kyi ston pa| sangs rgyas bcom ldan 'das skyes bu chen mo'i mtshan sum cu rtsa gnyis kyis brgyan pa'i sku gser legs par btsos shing legs par dul ba lta bu/ rin po che'i rgyan 261a @#/ /legs par bkod pa bzhin du 'khor gyi nang na mdzes par bzhugs shing / thog mar dge ba/ bar du dge ba/ tha mar dge ba'i chos ston to| |'di skad ces kyang ston te/ 'di ltar sa'i khams med par mi 'gyur ro/ /de bzhin du chu'i khams dang / me'i khams dang / rlung gi khams dang / skye dgu'i bdag po tshangs pa dang / gzugs dang / tshor ba dang / 'du shes dang / 'du byed dang / rnam par shes pa med par mi 'gyur ro zhes ston to/ /rigs kyi bu'am/ rigs kyi bu mo'ang rung / de'i mtshan thos na bla na med pa yang dag par rdzogs pa'i byang chub las phyir mi ldog par 'gyur zhing chos rin po che bla na med pa'ang thob par 'gyur ro/ / gzhon nu/ de ltar na rigs kyi bu'am/ rigs kyi bu mo'ang rung / de bzhin gshegs pa dgra bcom pa yang dag par rdzogs pa'i sangs rgyas spyod pa dang / yon tan phun sum tshogs pa dang / ye shes phun sum tshogs pa dang / tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes gzigs pa phun sum tshogs pa dang ldan pa de dag gi mtshan thos na bla na med pa yang dag par rdzogs pa'i byang chub las phyir mi ldog par 'gyur ro/ /gzhon 261b nu| sngon byung ba 'das pa'i dus bskal pa grangs med pa bas kyang ches grangs med pa yun ring po tshad med pa 'das pa de'i tshe rin chen 'byung gnas zhes bya ba'i bskal pa zhig byung ste/ der de bzhin gshegs pa dgra bcom pa yang dag par rdzogs pa'i sangs rgyas rig pa dang / zhabs su ldan pa/ bde bar gshegs pa 'jig rten mkhyen pa/ skyes bu 'dul ba kha lo sgyur ba/ bla na med pa/ lha dang / mi rnams kyi ston pa/ sangs rgyas bcom ldan 'das rgya mtsho'i dpal zhes bya ba zhig 'jig rten du byung ste/ der de bzhin gshegs pa dgra bcom pa yang dag par rdzogs pa'i sangs rgyas bcu po 'di dag thams cad lhan cig tu mthun par dge ba'i rtsa ba bskyed de/ zas dang / skom dang| bza' ba dang / bca' ba rnam pa sna tshogs dang / me tog dang / spos dang / me tog phreng ba dang / byug pa dang / gdugs dang / rgyal mtshan dang / ba dan gyi rnam pa dpag tu med grangs med pas bcom ldan 'das de la mchod pa rgya chen po byas nas thams cad kyis lhan cig tu mthun par bla na med pa yang dag par rdzogs pa'i byang chub tu sems bskyed de/ thams cad kyis nyi ma gcig tu skad cig thang cig yud tsam gcig la mi skye ba'i chos la bzod pa thob par gyur to/ /de nas de dag gis rim gyis byang 262a @#/ /chub sems dpa'i spyod pa spyad nas/ byang chub kyi phyogs dang mthun pa'i chos rnams yongs su rdzogs par byas te/ skad cig yud tsam gcig la rang rang gi sangs rgyas kyi zhing rnams su bla na med pa yang dag par rdzogs pa'i byang chub mngon par rdzogs par sangs rgyas so/ /skad cig thang cig yud tsam gcig la de dag gis chos kyi 'khor lo bskor to/ /thams cad kyi tshe'i tshad kyang mnyam mo/ /gzhon nu/ de bzhin gshegs pa dgra bcom pa yang dag par rdzogs pa'i sangs rgyas de dag thams cad kyang nyi ma gcig tu skad cig thang cig yud tsam gcig la yongs su mya ngan las 'da' bar 'gyur ro/ /de skad ces bka' stsal pa dang / bcom ldan 'das la rgyal po gzugs can snying po'i sras khye'u rin chen zla bas 'di skad gsol to/ /bcom ldan 'das/ de bzhin gshegs pa dgra bcom pa yang dag par rdzogs pa'i sangs rgyas de dag gi sku tshe'i tshad ni ngo mtshar lags te/ bcom ldan 'das/ de bzhin gshegs pa de dag gis ni sems can rnams la thugs brtse ba'i slad du sku tshe'i tshad de tsam du ring ba gzhes lags so/ /bcom ldan 'das/ gzhan yang / rigs kyi bu'am/ rigs kyi bu mo gang de bzhin gshegs pa de rnams kyi sku tshe'i tshad 'di la de 262b bzhin du 'dzin cing yid ches la spong bar mi bgyid/ 'dor bar mi bgyid pa de la bsod nams ji tsam skye bar 'gyur lags/ bcom ldan 'das kyis bka' stsal pa/ gzhon nu| stong gsum gyi stong chen po'i 'jig rten gyi khams 'di dang / de bzhin gshegs pa bcu po de dag gi sangs rgyas kyi zhing de dag dang / sangs rgyas kyi zhing bcu po rnams lha'i rin po che sna bdun gyis yongs su bkang nas de bzhin gshegs pa dgra bcom pa yang dag par rdzogs pa'i sangs rgyas rnams la nyin gcig bzhin du sbyin pa byin te/ de lta bur bskal pa grangs med par sbyin pa sbyin par byed la/ rigs kyi bu'am/ rigs kyi bu mo gang gis mtshan 'di rnams dang / sku tshe'i tshad 'di rnams thos nas de bzhin du 'dzin cing yid ches la spong bar mi byed/ smod par mi byed de/ mos par byed cing mthun par byed na bsod nams kyi phung po snga ma des bsod nams kyi phung po de'i brgya'i char yang mi phod/ stong gi cha dang / dpe'i bar du'ang mi bzod do/ /de nas lha rnams kyi dbang po brgya byin dang / mi mjed kyi bdag po tshangs pa dang / rgyal po chen po bzhi dang / lha'i bu dbang phyug dang / dbang phyug chen po dang / dpal ldan legs dang / dga' ldan dang / lha'i bu yongs su dga' ldan gyis 'di ltar chos kyi rnam grangs 'di dang / de bzhin 263a @#/ /gshegs pa bcu po de rnams la mchod pa bya ba'i phyir de bzhin gshegs pa la lha'i me tog dang / tsan+dan gyi phye mas gtor/ mngon par gtor/ mngon par rab tu gtor to/ /tshig 'di skad ces kyang smras te/ bcom ldan 'das/ rigs kyi bu'am/ rigs bu mo gang dag chos kyi rnam grangs 'di 'dzin pa dang / 'chang ba dang / klog pa dang / brjod par bgyid pa de dag ni phyag bgyi ba'i 'os lags so/ /bcom ldan 'das/ tha na chos kyi rnam grangs 'di gang dag gis sug na mchis pa de dag ni bla na med pa yang dag par rdzogs pa'i byang chub las phyir mi ldog par 'gyur ba lags so/ /bcom ldan 'das/ chos kyi rnam grangs 'di rigs kyi bu'am/ rigs kyi bu mo gang dag gi rna lam du grags par 'gyur pa de dag ni bdud sdig can gyi dbang du mchi bar mi 'gyur lags so/ /de nas bcom ldan 'das la rgyal po gzugs can snying po'i sras khye'u rin chen zla bas tshigs su bcad pas gsol pa/ phung po med pa bcom ldan 'das/ /khyod kyis legs gsung dpag tu med/ / bdag dang lhar bcas 'jig rten rnams/ /khyod kyis 'di la yi rang ngo / /'jig rten mgon po 'das pa na/ /gang dag da dung ma byon dang / /phyogs rnams ma lus gang 263b bzhugs pa'i/ /sangs rgyas rnams la skyabs su mchi/ /sangs rgyas rnams kyi yul gcig pa/ /chos dang dge 'dun zhi ba'i mchog /yon tan legs par bsam mi khyab/ /dge 'dun la yang skyabs su mchi/ /byang chub sems dpa' 'jigs pa med/ /gang dag bzod la rab gnas shing / /gang dag gzungs la gnas pa dang / /gang dag mtshungs med stong nyid tshul/ /mtshan nyid kyi ni mdo sde dang / /byang chub rgyur 'gyur sde snod dang / /mthun par 'jug pa'i mdo sde la/ /legs bslabs byang chub sems rnams ltar/ /thub pa bdag ni byang chub kyi/ /spyad pa spyod cing slob par 'tshal/ /rang byung de dag ji bzhin du/ /zhing gi bkod pa rnams dag dang / /spyod dang spyod yul ting 'dzin dang / /de dag gi ni yon tan dang / /drang srong mchog rnams sku tshe'i tshad/ /gsungs pa gang lags rdzogs par bgyi/ /de nas bcom ldan 'das kyis lha'i bu de dag dang / rin chen zla ba gzhon nur gyur pa la legs so zhes bya ba byin nas tshigs su bcad pa 'di dag bka' stsal to/ /'jig rten mgon po de rnams kyi/ /mtshan ni gang zhig 'dzin byed pa/ /ma 'ongs dus na de dag kun/ /rkang gnyis rnams kyi mchog tu 'gyur/ /nga yis ji skad gsungs pa bzhin/ /drang srong mchog bzhugs de dag ltar/ /de dag tshe yang bskal pa ni// 264a @#/ /bye ba bsam yas snyed du 'gyur/ /gang zhig skyobs pa de dag gi /mtshan 'di dag ni 'dzin 'di la/ /me dang chom rkun dug rnams dang / /mtshon gyis tshugs par mi 'gyur ro/ /mtshan 'di dag ni 'dzin byed na/ /chu chen dag gis de mi 'chi/ /rgyal po'i gnod pa ma yin te/ /de ni nam yang chos mi spong / /mtshan mo thun tshod dang po dang / /gung dang tha ma'ang de bzhin te/ /dus gsum dag tu mtshan sgrogs dang / /drang srong mchog ni de dag gi /mtshan rnams snga dro sgrogs byed cing| |nyi ma'i gung la sgrogs byed dang / /mkhas pa nub kar sgrogs byed pa/ /rmi lam bzang po mthong bar 'gyur/ /mtshan rnams bzung nas de 'og tu/ /bskal pa bye ba stong rnams su/ /sngon chad sdig pa ci bsags pa/ /mi dge thams cad bshags par bya/ /de yis lus ngag yid kyi las/ /mi dge gang dag byas gyur na| |mtshan rnams bzung nas de 'og tu/ /nyes byas de yang bshags par bya/ /yan lag lnga yis gtugs nas ni/ /rgyal rnams byang chub sngon rol tu/ /dus gsum dge ba ci bsags pa/ /de kun rjes su yi rang bya/ /'jig rten rtsa lag rnams kyis ni/ /byang chub brnyes nas chos gsungs dang / /lus can gang dag 'jig 264b rten gyi/ |mgon po rnams la mchod byed pa/ /de la rgyal ba'i sras rnams kyis/ /nyin mtshan dus gsum yi rang bya/ /de na bdag gzhan don byed pa'i/ /pha rol phyin pa rdzogs par 'gyur/ /bcom ldan 'das kyis de skad ces bka' stsal nas/ rgyal po gzugs can snying po'i sras khye'u rin chen zla ba dang / /byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten bcom ldan 'das kyis gsungs pa la yi rangs te mngon par bstod do/ /'phags pa rin chen zla bas zhus pa zhes bya ba theg pa chen po'i mdo rdzogs so// //rgya gar gyi mkhan po bi shud+d+ha sing ha dang / lo tsA ba ban+de dge ba dpal gyis bsgyur/ rgya gar gyi mkhan po bid+yA ka ra sid+ha dang / zhus chen gyi lo tsA ba ban+de de pa tsan+d+ra sa zhus te gtan la phab pa// |