//rgya gar skad du/ AR+Ya rASh+Ta pA la pa ri pr-its+tshA na ma ma hA yA na sU tra/ bod skad du/ 'phags pa yul 'khor skyong gis zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di 271b skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la dge slong stong nyis brgya lnga bcu'i dge slong gi dge 'dun chen po dang / thabs gcig tu bzhugs te/ de nas tshe dang ldan pa yul 'khor skyong stan las langs te bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das kyi zhabs la mgo bos phyag btsal nas/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ / bcom ldan 'das/ de bzhin gshegs pa'i bstan pa 'di nub par bgyid pa'i sems can gang lags pa de dag ji lta bu dag gcig lags/ de skad ces gsol pa dang / bcom ldan 'das kyis tshe dang ldan pa yul 'khor skyong la 'di skad ces bka' stsal to/ /yul 'khor skyong / gnas 'di gnyis ni bcom ldan 'das kyis gsungs pa ste/ gnyis gang zhe na/ dge slong gi gnas dang / lhod pa'i gnas so/ /de la dge slong gi gnas ni tshul khrims dang ldan pa'i phyogs gang yin pa'o/ /lhod pa'i gnas ni tshul khrims 'chal ba'i phyogs gang yin pa'o/ /yul 'khor skyong / de la yongs su mya ngan las 'da' bar 'dod pa'i dge slong gis ni gnas 'di gnyis pa bslab par 272a @#/ /bya'o/ /gnyis gang zhe na/ tshul khrims kyi phung pos kyang shin tu bsrung bar bya ba dang / bdag nyid la nges par bsam par bya yi/ pha rol la nges par bsam par mi bya'o/ /de la ji ltar bdag nyid la nges par bsam par bya yi/ pha rol la nges par bsam par mi bya zhe na/ des 'di ltar brtag par bya ste/ ci bdag rang gi sdug bsngal gyi phung po zad par byed 'dod pa yin nam/ 'o na te bla na med pa yang dag par rdzogs pa'i byang chub mngon par rdzogs par 'tshang rgya bar 'dod pa yin snyam du brtag par bya'o/ /gal te nyan thos kyi theg pas yongs su mya ngan las 'da' bar 'dod pa zhig yin na ni des nyan thos kyi bslab pa kho na la bslab par bya ste| so so thar pa'i sdom pas bsdam par bya'o/ /cho ga dang / spyod yul phun sum tshogs par bya'o/ /kha na mtho ba phra rab tsam dag la'ang 'jig par lta bas yang dag par blangs te bslab par bya'o/ /bslab pa'i gzhi rnams la'ang lus kyi las dang / ngag gi las dang / yid kyi las yongs su dag par bya'o/ /'tsho ba yongs su dag pa dang / smad du med par yang bya'o/ /brkam pa med cing ro rnams la 'tshums pa med pa dang / chos gos la tshod zin par yang bya'o/ /lhung bzed la tshod zin par 272b yang bya'o/ /des kha zas yog drod kyis bza' bar yang mi bya ste/ lto ma bkres tsam du kha zas bsnyungs pa des bslab par bya'o/ /des kha zas la rtag tu rgyun mi chad par mi gtsang ba'i 'du shes bskyed par bya'o/ /'di lta ste/ phyi sa dang / gcin gyi 'du shes dang / rnag gi 'du shes dang / skyugs pa'i 'du shes dang / mi gtsang ba'i 'du shes dang / rma bsku ba lta bu'i 'du shes dang / dman pa'i 'du shes dang / mi mthun pa'i 'du shes dang / bu'i sha lta bu'i 'du shes dang / dor ba'i 'du shes dang / spang ba'i 'du shes dang / dri mi zhim pa'i 'du shes bskyed par bya ste/ des de lta bu'i tshul du bza' zhing tshod rig par bya'o/ /des chags pa med pa dang / sdang ba med pa dang / rmongs pa med pa dang / rtag tu dben pa la mngon par dga' bar bya ste/ blo mo'i gtam la mngon par dga' bar mi bya'o/ /ri dwags 'chi ba lta bu dang du blang bar bya'o/ /dben par bya'o| |dben pa la mngon par dga' bar bya'o/ /dben pa la mngon par dga' zhing mos pa dang / bzod pa dang ldan par bya'o/ /des pa dang / 'grogs na bde bar bya'o/ / 'jig rten gyi gtam la mi rten par bya'o/ /nyo tshong spyod pa spang bar bya'o/ /sman pa byad la dga' ba dang / phrin pa la dga' ba dang / khyim gyi bya ba dang 'brel bar mi bya'o/ / 273a @#/ /'dug pa dang / 'greng ba dang / 'chag pa dang / nyal ba la mkhas par bya'o/ /rab tu dben pa dang / dgon par dga' ba dang / zhi ba'i gnas mal sgra chung ba/ skad chung ba dang / 'jigs pa'i yid la byed pa med pa/ sdig sbrul med pa/ mi mang po med pa/ mis dben pa/ nang du yang dag par 'jog dang 'tsham pa bsten par bya'o/ /bdag bstod par yang mi bya/ gzhan smod par yang mi bya'o/ /tshul 'chos pa dang / kha gsag mi bya'o/ /rtag tu rgyun mi chad par skyo ba'i sems bskyed par bya'o/ /des khyim pa dang / rab tu byung ba rnams dang 'du zhing 'dris par mi bya'o/ /stong pa'i chos rnams kun tu bsten par bya/ bsgom par bya/ mang du bya'o/ / des rig pa dang mi ldan pa'i dge slong dang lhan cig phrad pa spang par bya'o/ /dge slong ma dang 'dris par mi bya'o/ /'dod pa chung bar yang bya'o/ /rtag tu bdag nyid kyi 'khrul pa rnams la so sor brtag par bya'o/ /gzhan gyi 'khrul pa rnams la brtag par mi bya'o/ /pha ma la'ang yid brtan par mi bya na rigs gzhan lta la ci smos \?\| shin tu yang dag par bsdam pa can du bya'o/ /nye bar zhi ba'i chos kyi sbyin bdag bya'o/ /dmigs pa la mkhas par bya'o/ /dben pa'i gnas mal du gnas 273b par bya'o/ /mthun pa'ang gzhan dag la smra bar mi bya na mi mthun pa lta ci smos/ nges chos de dag la sems nye bar gnas par byas nas/ chos zab mo rnams la so sor brtag par bya'o/ /chos zab mo rnams la brtag par bya ba de dag kyang gang zhe na/ mig mi rtag go snyam du so sor brtag par bya'o/ /de'i skye ba dang / 'jig pa la'ang so sor brtag par bya'o/ /de la skye ba dang / 'jig pa la so sor rtog pa gang yin pa de ni med pa la so sor rtog pa'o/ /de ci'i phyir zhe na/ mig ces bya ba ni dmigs pa med pa'i phyir ro// mig dang / gzugs dang / mig gi rnam par shes pa ni dmigs pa ma yin gyi med par dmigs pa yin no/ /de ci'i phyir zhe na/ chos thams cad dmigs pa med pa'i phyir ro/ /des rna ba'i rten bsam par mi bya'o/ /sna dang / lce dang / lus dang / yid kyi rten bsam par mi bya'o/ /ci'ang rung ba'i rten bsam par mi bya'o/ /de ltar byas na ci zhig bsam pa yin/ de bzhin du chos rnams stong par yang brtson par bya'o/ /de ltar brtson pa de ni tshul khrims kyi phung po yongs su dag par byed do/ /ting nge 'dzin gyi phung po dang / shes rab kyi phung po yongs su dag par byed do/ /rgyun du zhugs pa'i 'bras bu 'thob par 'gyur ro/ /lan gcig phyir 'ong ba'i 'bras bu dang / phyir mi 'ong ba'i 274a @#/ /'bras bu dang / dgra bcom pa nyid thob par 'gyur te/ de lta bu'i 'du 'dzi med pa ni dang po'i nyan thos kyis yin te/ de dag gis zag pa zad pa thob par 'gyur ro/ /de la dge slong ltar bcos pa gang zhe na/ yul 'khor skyong / 'di na dge slong bdag nyid la nga'o snyam du 'dzin te/ de ni tshul khrims kyi phung po yongs su ma rdzogs pa dang ldan pa yin/ chos gos gces par 'dzin pa dang / lhung bzed gces par 'dzin pa yin/ zang zing gces par 'dzin pa yin te/ de ni mi smra ba spangs nas ngan song du 'gyur ba'i mal cha dang / stan dang / mgron du gnyer ba chen po rnams bdag gir byed/ bud med dang 'dris par byed/ dge slong ma dang 'dris par byed/ rgyal pos bkrabs pa dang 'dris par byed de/ de 'dris par gyur nas rgyun mi 'chad par mig gis gzugs rnams la nges par sems so/ /des de ltar sems bskyed nas kun nas nyon mongs par 'gyur ro/ /kun nas nyon mongs pa'i sems dang ldan na gnas 'di lta bu yod do/ /nyes pa lci ba de byed pa'am/ yang na chung du byed cing 'dug par 'gyur te/ yul 'khor skyong / 'di ni dge slong ltar bcos pa yin no/ /yul 'khor skyong / ci'i phyir dge slong ltar bcos pa yin zhe na/ dge slong 274b ltar bcos pa de de bzhin gshegs pas mal cha dang / stan gnang ba tha mal pa gang la dge sbyong gnas pa'i mal cha dang / stan gang yin pa mi blun po des spangs na chos gos la zhen cing zang zing la zhen nas bud med dang 'dris par byed cing / khyim pa dang 'dris par byed na 'dris par 'gyur ba'i mi blun po de la dge sbyong gi tshul lta ga la yod de/ de'i steng du chos zab mo rnams la'ang sun 'byin cing gshe bar byed la des thos su zin kyang bsngags pa ma yin pa rjod par byed do/ /dgon pa'i bsngags pa ma yin brjod par byed do/ /gang la de'i sems mngon par dga' ba'i 'dod pa rnams 'ba' zhig gis bsngags brjod par byed cing gang la de'i sems mngon par dga' ba'i bre mo'i gtam 'ba' zhig gi bsngags pa rjod par byed la/ dge slong gi gnas gang yang rung ba de dag gi bsngags pa ma yin pa rjod par byed do/ /gang la las de bzhin gshegs pas mdo'i tshig khyim na gnas pa dang / rab tu byung ba rnams dang / 'du 'dzir mi 'byung bar bya'o zhes gsungs pa'i mdo'i tshig de bor nas dge sbyong gi tshul mi 'dod cing dge slong gi dngos po mi 'dod de/ gcig pur 'dug cing bud med la chos 'chad par byed pa gzhan dag la'ang de lta bu'i gzhi rnams su lung 'bog par byed pa'o/ /de 275a @#/ /ci'i phyir zhe na/ de dag ni de bzhin gshegs pas chos kyi chom rkun par gsungs te/ so sor thar pa spangs nas gcig pur 'dug cing bud med chos 'chad pa'i phyir ro/ /mi blun po de dag ni bcos ma ste/ mgo bregs pas bcos pa dang / gos ngur smig gyon pas bcos pa'o/ /rgyu gang gis bcos ma yin par shes par bya zhe na/ sangs rgyas bcom ldan 'das rnams kyis sman pa gang yin pa mi blun po de dag gis gnang bar byed de/ lo nyi shu ma lon par rdzogs par bsnyen par byed/ rang gi lag gis len par byed/ ma brtags pa la longs spyod par byed/ rang nyid g.yos dang 'tshed pa'i las byed/ gser dang / dngul bdag gir byed / khre rgod dang / 'bru la sogs pa gsog par byed/ khyim gyi gzhi dang / zhing gi gzhi dang / kun dga' ra ba'i gzhi nyo tshong byed cing / tshal za'i 'tsho ba sbyor bar byed/ khyim gyi gzhi dang / zhing gi gzhi dang / kun dga' ra ba'i gzhi len par byed/ las kyi rnam par smin pa la'ang yid mi ches shing so sor thar pa la'ang ma dad nas de la gzhol/ de la 'bab/ de la bab/ de la bden par 'dzin/ de'i spyod lam byed/ dge sbyong du 'dra bar 'dzin cing gang na skye bo mang po yod par der gcer bu pa dang 275b mtshungs par ston par byed/ gang zag tu lta ba bsngags par byed/ gang zag tu lta ba dang / gcer bu pa dang mtshungs par ston pas/ skye bo mang po 'dzud par byed cing 'god par byed/ sangs rgyas kyi spyod yul de bzhin gshegs pa'i gnas pa stong pa nyid la dmigs nas sun 'byin par byed/ gshe bar byed par shes par bya'o/ /yul 'khor skyong de lta bu'i sems can dag 'byung bar 'gyur te/ de dag ni khyim pa'ang ma yin/ dge sbyong yang ma yin te/ de dag gis ni de bzhin gshegs pa'i bstan pa 'di nub par byed do| |de nas bcom ldan 'das kyis de'i tshe tshigs su bcad pa 'di dag bka' stsal to/ /dge slong tshul khrims rnams la bsdam/ /zhi zhing zhi ba'i gnas la dga'/ / so sor thar pa slob byed pa/ /de dag dge slong bram ze yin/ /chos rnams gtso bo blangs nas ni/ /ci yang med pa'i dge slong ba/ /bas mtha' dgon pa rnams su dga'/ /de dag dge slong bram ze yin/ /de dag bre mo gtam mi dga'/ /so sor thar rnams legs par bslabs/ /gang zag mchog la nyin mtshan du/ /bkur sti chen po byed pa yin| |zhing yang mi rmed tshong mi byed/ /lhung bzed chos gos rnyed mi tshol/ /len pa med par brtson pa dang / /de dag sangs rgyas nyan thos yin/ /de dag bud med sten mi 276a @#/ /byed/ /bud med rnams dang 'du ba med/ /shing drung rnams ni bsngags par byed/ /de dag sangs rgyas nyan thos yin/ /zas dang skom gyi don gyi phyir/ / gcam gsag dag kyang yongs mi byed/ /de 'drar gyur pa de dag ni/ /dge slong mal sten mi byed/ /mtshon rno ji ltar brdar ba bzhin/ /bud med rnams ni de 'drar shes/ /so sor thar las byung ba bzhin/ /bud med 'du shes spong bar byed/ /des pa de dag zas phyir dang / /skom gyi phyir dang gos kyi phyir/ /khyim khyim dag tu 'gro byed cing / /chos rnams ston par mi byed do/ /dge slong rnams kyis bud med rnams/ /blta bar li bya rdzogs sangs rgyas/ /de la shes ldan su zhig ston/ /de ni bdud kyi spyod yul yin// de dag gis ni med par smras/ /ro dang nyal ba bzhin du nyal/ /de phyir sangs rgyas thams cad mkhyen/ /'du 'dzi bsngags par mi mdzad do/ /chos rnams srog med gso ba med/ /gso ba dang gsog dang snying po med/ /stong pa nyid la mos byed pa/ /de ni dge slong chos nyid do/ /rtag tu brtson 'grus phun sum tshogs/ /gcig pu dgon par gnas byed dang / /'jig rten na ni rten med sems/ /de ni dge slong chos nyid do/ /seng ge bzhin du 'jigs pa med/ /tshangs par spyod la gzhol bar byed// 276b sdug bsngal kun las thar bya'i phyir/ /shes rab ldan pas lam la bsgom/ /mig dang gzugs ni tshol ba na/ /de dag gis ni rnam shes rnyed/ /dngos po de yang tshol ba na// btsal ba gang yin mi rnyed do/ /sngon yang ma byung phyis mi 'byung / /dbus na'ang yod pa ma yin te/ /de lta bu yi don gyis na/ /chos kun mnyam pa nyid gyi phyir/ /des pa de dag zas phyir dang / /skom gyi phyir dang gos kyi phyir/ /khyim khyim dag tu 'gro byed cing / /chos rnams ston par mi byed do/ /rgyu med des pa bzang po yin/ /de dag sangs rgyas bslab pa rnams/ /'da' zhing 'jig par mi byed de/ /brtul bzang stong nyid skrag pa med/ /'jig pa med par 'jug par byed/ /lta pa mi bzad 'jig mi byed/ /sems can gang zag dngos mi 'jig /dkar po'i chos rnams thams cad la/ /shin tu brtan par gnas pa yin/ /brtan po de dag 'jig rten na/ /mya ngan 'das pa'ang reg gyur nas| |mchod pa'i gnas su 'os par 'gyur/ /gang dag shes rab 'chal ba dang / /le lo can dang dman la brtson/ /thos pa nyung dang sdig pa 'dod/ /nga rgyal tha ba khro 'byung gnas/ /mgo la spu gri sten byed cing / /shing gis kha bsgyur chos gos gyon/ /stong pa nyid ni don med pa/ /de ni mkhas pa sgom mi byed/ /chos la sun 'byin theg 277a @#/ /chen gyi/ /bsngags pa ma yin rjod par byed/ /gang zhig chos 'di bstan pa rnams/ /ji ltar bstan pa de bzhin du/ /nag po'i phyogs la kun tu chags/ /des ni ngan 'gror 'gro bar 'gyur/ /bcom ldan 'das kyis de skad ces bka' stsal nas/ tshe dang ldan pa yul 'khor skyong dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa yul 'khor skyong gis zhus pa zhes bya ba theg pa chen po'i mdo rdzogs so// //rgya gar gyi mkhan po dzi na mi tra la sogs pa dang / zhus chen gyi lo tsA ba ban+de ye shes sdes bsgyur cing zhus te gtan la phab pa// |