rKTs


H17

(e-text produced by ACIP)

see text in Tibetan script
189a
//rgya gar skad du/ AR+Ya pra dz+nyA pa ra mi ta sany+tsa ya ga thA/ bod skad du/ 'phags pa shes rab kyi pha rol tu phyin pa sdud pa tshigs su bcad pa/ sangs rgyas dang byang chub sems dpa' thams cad la phyag 'tshal lo/ /de nas yang bcom ldan 'das kyis 'khor bzhi po de dag yang dag par rab tu dga' bar mdzad pa'i phyir shes rab kyi pha rol tu phyin pa 'di ston cing / de'i tshe tshigs su bcad pa 'di bka' stsal to/ /dga' dang gus dang dad pa'i mchog ni nyer bzhag ste/ /sgrib pa nyon mongs bsal nas dri ma las 'das pa/ /'gro don mngon zhugs des pa'i shes rab pha rol phyin/ /gang la dpa' rnams spyod pa de ni mnyan par gyis/ /'dzam bu'i gling 'dir chu klung ji snyed cig 'bab cing / /me tog 'bras ldan sman dang nags tshal skyed byed pa/ /ma dros gnas pa'i klu dbang klu bdag brten gnas te/ /de ni klu yi bdag po de yi mthu dpal yin/ /rgyal ba'i nyan thos pa dag ji snyed chos ston dang / /'chad dang rigs pa dag dang ldan par brjod pa dang / /mchog 'phags
189b
bde ba byed dang de yi 'bras thob pa/ /de dag kun kyang de bzhin gshegs pa'i skyes bu'i mthu/ /ci phyir zhe na rgyal ba'i chos tshul gang bstan pa/ /de la mi mchog slob mar gyur pas mngon bslab cing / /mngon sum byas nas bslab pa ji bzhin ston byed de/ /sangs rgyas mthus byed rang gi stobs kyi mthus ma yin/ /gang la shes rab pha rol phyin mchog mi dmigs shing / /byang chub sems dpa' mi dmigs byang chub sems mi dmigs/ /de skad thos nas rmongs pa med cing skrag med pa/ /byang chub sems dpa' de ni bde gshegs shes rab spyod/ /gzugs med tshor ba med cing 'du shes sems pa med/ /de la rnam shes gnas ni rdul tsam yod ma yin/ /de chos kun la mi gnas gnas pa med par spyod/ /yongs su gzung med bde gshegs rnams kyi byang chub 'thob/ /ji ltar kun du rgyu ba bzo sbyangs shes pa yis/ /dmigs med phung po rnam par 'jig pa 'byung ba ltar/ /byang chub sems dpa' gang zhig de ltar chos shes pa/ /mya ngan 'das la mi reg de ni shes rab gnas/ /yang 'di shes rab 'di ni gang yin su yi yin/ /gang las yin zhes chos 'di thams cad stong par rtog/ nye bar brtags nas zhum pa med cing skrag med pa/ /byang chub sems dpa' de ni byang chub nye ba yin/ /gal te mi shes bzhin du gzugs su 'du shes shing / /tshor ba sems pa rnam shes phung por spyod byed cing / /phung
190a
@#/ /'di stong zhes rtog na'ang byang chub sems dpa' ni/ /mtshan ma la spyod skye med gnas la dad ma yin/ /gang zhig gzugs min tshor min 'du shes sems pa min/ /rnam par shes la mi spyod gnas pa med par spyod/ /de ni spyod ces bya bar mi dmigs shes rab bstan/ /skye med blo ldan ting 'dzin zhi ba mchog la reg /byang chub sems gang de ltar 'dir bdag zhir gnas pa/ /de ni sngon gyi de bzhin gshegs pas lung bstan yin/ /bdag ni mnyam par bzhag ce'am langs zhes rlom sems med/ /ci phyir zhe na chos kyi rang bzhin yongs shes phyir/ /de ltar spyod na bde gshegs rnams kyi shes rab spyod/ /des ni spyod med spyod pa yin par rab shes phyir/ /chos gang spyod pa de yang dmigs par mi 'gyur te/ /'di ni shes rab pha rol phyin mchog spyod pa yin/ /gang zhig yod pa ma yin de ni med ces bya/ /byis pa rnams kyis de brtags yod dang med par byed/ /yod dang med pa 'di gnyis med pa'i chos yin te/ /byang chub sems dpa' gang gis 'di shes nges par 'byung / /gang 'dir phung po lnga dag sgyu ma 'drar shes shing / /sgyu ma gzhan dang phung po gzhan du mi phyogs la/ /sna tshogs 'du shes bral zhing nye bar zhi spyod pa/ /'di ni shes rab pha rol phyin mchog spyod pa yin/ /dge ba'i bshes dang ldan zhing lhag mthong ldan gyur
190b
pa| |rgyal ba rnams kyi yum thos skrag par yong mi 'gyur/ /gang zhig sdig pa'i grogs ldan gzhan gyi dring mi 'jog /de ni snod so ma btang chus reg zhig pa bzhin/ /ci phyir 'di ni byang chub sems dpa' bya zhe na/ /chags pa spyod byed kun la chags pa zad par 'dod/ /rgyal ba rnams kyi byang chub chags med gyur la reg /des na 'di ni byang chub sems dpa'i ming 'thob bo| |ci phyir de ni sems dpa' che zhes bya zhe na/ /sems can tshogs rnams mang po'i mchog tu gyur pa dang / /sems can khams kyi lta rnams chen po gcod pa ste/ /de phyir sems dpa' chen po zhes ni rab brjod do/ /gtong ba che dang blo che ba dang mthu che dang / /rgyal ba rnams kyi theg chen mchog la zhugs pa dang / /go cha chen po bgos shing bdud kyi sgyu 'dul ba/ /de yi phyir na sems dpa' che zhes rab tu brjod/ /dper na sgyu ma mkhan gyis bzhi mdor sprul byas te/ /skye bo phal chen mgo mang bye ba gcod byed pa'i/ /gsad bya de dag ci 'dra de ltar byang chub sems/ /'gro kun sprul 'drar rab shes de la 'jigs pa med/ /gzugs dang 'du shes tshor ba dang ni sems pa dang / /rnam par shes pa ma bcings ma grol yod pa min// de ltar byang chub la 'jug zhum pa'i sems med pa/ /'di ni gang zag dam pa rnams kyi go cha mchog /ci phyir 'di ni byang chub theg chen bya zhe na/ /de gang zhon nas sems can thams
191a
@#/ /cad mya ngan zlo/ /theg pa 'di ni mkha' 'dra gzhal med khang chen te/ /dga' skyid bde ba mngon par thob byed theg pa'i mchog /gang zhig zhon nas phyogs su 'gro ba dmigs su med/ /mya ngan 'das par 'gro bar gsungs pa 'gro mi dmigs/ /dper na mi shi de yis 'gro rgyu med pa bzhin/ /rgyu des de ni mya ngan 'das zhes rab tu brjod/ /byang chub sems dpa' sngon gyi mtha' dang phyi mtha' dang / /da ltar byung bar mi dmigs dus gsum dag pa ste/ /gang dag de ni 'dus ma byas yin spros med de/ / 'di ni shes rab pha rol phyin mchog spyod pa yin/ /byang chub sems mkhas rig pa gang gi dus kyi tshe/ /skye med rnam par bsam ste 'di ltar spyod byed cing / /snying rje chen po bskyed kyang sems can 'du shes med/ /'di ni shes rab pha rol phyin mchog spyod pa yin/ /gal te sems can 'du shes sdug bsngal 'du shes bskyed/ /'gro ba rnams kyi don bya sdug bsngal spang snyam ste/ /bdag dang sems can yongs rtog byang chub sems dpa' ste/ /'di ni shes rab pha rol phyin mchog spyod pa yin/ /bdag ci 'dra ba de 'drar sems can thams cad shes/ /sems can thams cad ci 'dra de 'drar chos kun shes/ /skye ba med dang skye ba gnyi gar mi rtog pa/ /'di ni shes rab pha rol phyin mchog spyod pa yin/ /'jig rten dag na
191b
chos ming ji snyed yongs brjod pa/ /kun la skye ba dang ni yang dag 'das spangs na/ /ye shes 'chi med dam pa de las gzhan med thob/ /de phyir 'di ni shes rab pha rol phyin ces bya/ /byang chub sems dpa' gang zhig dogs med de ltar spyod/ /shes rab ldan te mnyam nyid gnas par shes par bya/ /chos rnams rang bzhin med par yongs su shes gyur pa/ /'di ni shes rab pha rol phyin mchog spyod pa yin/ /gang zhig gzugs la mi gnas tshor la mi gnas shing / /gang zhig 'du shes mi gnas sems dpar mi gnas la/ /rnam shes gang mi gnas pa chos nyid gnas pa ste/ /'di ni shes rab pha rol phyin mchog spyod pa yin/ /rtag dang mi rtag bde dang sdug bsngal sdug mi sdug/ bdag dang bdag med de bzhin nyid dang de bzhin stong / /'bras bu thob dang dgra bcom sa la mi gnas shing / /rang rgyal sa dang de bzhin sangs rgyas sar mi gnas/ /ji ltar 'dren pa 'dus ma byas khams mi gnas shing / /de bzhin 'dus byas la yang mi gnas gnas med spyod/ /de ltar byang chub sems dpa' gnas la gnas med gnas/ /gnas med gnas yin 'di ni rgyal bas gnas par gsungs/ /gang dag bde gshegs nyan thos 'gyur bar bya snyam dang / /rang sangs rgyas dang de bzhin chos rgyal 'gyur 'dod pa/ /bzod pa 'di la ma brten thob par mi nus te/ /dper na pha rol tshu rol 'gro ngogs mi mthong bzhin//
192a
@#/ /chos 'chad pa dang nyan dang bshad bya gang yin pa/ /'bras bu thob dang rkyen rgyal de bzhin 'jig rten mgon/ /mkhas pa gsal bas thob pa'i mya ngan 'das gang yin/ /de kun sgyu ma lta bur de bzhin gshegs pas bstan/ /gang zag bzhi po 'di dag de la mi skrag ste/ /rgyal sras bden la mkhas dang phyir mi ldog pa dang / /dgra bcom dri ma bsal cing som nyi spangs pa dang / /bzhi pa dge ba'i bshes kyis yongs su zin pa'o/ /byang chub sems dpa' mkhas rig de ltar spyod pa ni/ /dgra bcom sa la mi slob rkyen rtogs sa la min| |thams cad mkhyen nyid ched du sangs rgyas chos rjes slob/ /gang zhig slob mi slob la mi slob de slob yin/ /gzugs 'phel yongs su nyams dang yongs su gzung phyir min/ / chos rnams sna tshogs yongs su gzung phyir mi slob par/ /slob cing thams cad mkhyen pa nyid kyang yongs 'dzin la/ /nges 'byung gang yin 'di ni yon tan dga' ba'i slob/ /gzugs ni shes rab ma yin gzugs la shes rab med/ /rnam shes 'du shes tshor dang sems pa 'di dag ni/ /shes rab ma yin 'di dag la yang shes rab med/ /'di ni nam mkha'i khams dang mtshungs te tha dad med/ /dmigs pa rnams kyi rang bzhin de ni pha mtha' med/ /sems can rang bzhin gang yin de yang pha mtha' med/ /nam mkha'i khams kyi rang bzhin de yang
192b
pha mtha' med/ /'jig rten mkhyen pa'i shes rab de yang pha mtha' med/ /'du shes tshu rol yin zhes 'dren pas yongs su bsgrags/ /'du shes rnam par bshigs nas spong ba pha rol 'gro /gang dag 'du shes bral ba 'di ni rjes thob pa/ /de dag pha rol phyin nas ston pa'i bka' la gnas/ /gal te ston pas kyang ni gang+gA'i bye snyed kyi/ /bskal par bzhugs te sems can zhes sgra yongs bsgrags kyang / /gzod nas dag pas sems can skye bar ga la 'gyur/ /'di ni shes rab pha rol phyin mchog spyod pa yin/ /gang tshe nga ni pha rol phyin pa'i mchog 'di dang / /mthun par smra gyur de tshe sngon gyi skyes mchog gis/ /ma 'ongs pa yi dus na sangs rgyas 'gyur ro zhes/ /nga lung bstan par gyur ces rgyal ba de skad gsung / /shes rab pha rol phyin pa gang la mgon spyod pa/ /'di ni gang zhig gus byas 'dzin dang chub byed pa/ /de la dug dang mtshon dang me dang chus mi tshugs/ /bdud dang bdud kyi phyogs kyis glags kyang rnyed mi 'gyur/ /la las bde gshegs yongs su mya ngan 'das pa yis/ /mchod rten rin chen bdun las byas shing mchod byed la/ /bde bar gshegs pa'i mchod rten de dag gang+gA yi/ /bye ma snyed kyis bye ba phrag stong zhing bkang ste/ /yongs su brtag bzung zhing rnams bye ba mtha' yas na/ /sems can ji snyed 'khod pa de dag thams cad kyis/ /las gzhan mi byed lta yi me tog spos rab dang / /byug pas dus gsum bskal
193a
@#/ /pa'am de bas lhag mchod la/ /gang zhig gang las rnam 'dren stobs bcu 'byung 'gyur ba/ /bde bar gshegs pa'i yum 'di glegs bam la bris te| |'chang zhing me tog byug pas bsti stang byed gyur na/ /mchod rten byas mchod bsod nams des ni char mi phod/ /rgyal ba'i shes rab pha rol phyin 'di rig sngags che/ /sems can khams mang mya ngan sdug bsngal chos zhi byed/ /gang dag 'das dang gang dag phyogs bcu'i 'jig rten mgon/ /rig sngags 'di bslab sman pa'i rgyal po bla med 'gyur/ / gang dag phan dang snying rjer bcas pa'i spyad spyod pa/ /rig sngags 'di la bslab nas mkhas pa byang chub reg /'dus byas bde dang 'dus ma byas bde gang yin pa/ /bde ba de kun 'di las 'byung bar rig par bya/ /sa bon btab nas sa la gnas te 'byung 'gyur ba/ /tshogs pa rnyed nas rnam mang gzugs dag rnam par skye/ /pha rol phyin lnga byang chub yon tan ji snyed pa/ /de dag kun kyang shes rab pha rol phyin las skye/ /'khor los bsgyur rgyal lam gang nas ni rtag 'gro ba/ /lam de nyid nas rin chen bdun dang dpung tshogs kun/ /gang nas rgyal ba'i shes rab pha rol phyin 'di 'gro /de nyid nas ni yon tan chos kun 'gro bar 'gyur/ /rgyal bas brgya byin dri ba yongs dris lan gsol pa/ /gal te gang+gA'i bye snyed
193b
sangs rgyas zhing gyur la/ /de kun rgyal ba'i ring bsrel gyur bur gtams gyur kyang / /bdag ni shes rab pha rol phyin pa 'di nyid len/ /ci slad ce na sku gdung mi gus bdag ma lags// 'on kyang shes rab yongs su bsgoms pas mchod bgyid de/ /dper na rgyal po bsten mi rim gro 'thob pa ltar/ /sangs rgyas ring bsrel shes rab pha rol phyin la brten/ /nor bu rin chen yon tan kun ldan rin thang med/ /ga ba tshe gang du stsal ba de ni phyag bgyi 'os/ /de phyung gyur kyang gab tshe la ni dga' bgyid de/ /yon tan de dag nor bu rin chen de yi lags/ /de bzhin shes rab pha rol phyin mchog yon tan gyis/ /rgyal ba mya ngan 'das kyang ring bsrel mchod pa brnyes/ /de ltas gang zhig rgyal ba'i yon tan 'dzin 'tshal des/ /shes rab pha rol phyin blangs 'di ni thar pa lags/ /sbyin pa sbyin pa'i sngon du 'gro ba shes rab ste/ /tshul khrims bzod pa brtson 'grus bsam gtan de bzhin no/ /dge chos chud mi gzan phyir yongs su 'dzin pa yin/ /'di ni chos rnams thams cad tshul gcig ston par byed/ /dper na 'dzam bu gling na shing rnams bye ba stong / /rnam pa sna tshogs rnam pa du ma gzugs mang ba/ /grib mar gyur pa'i grangs su brjod pa ma gtogs par/ /grib ma sna tshogs med cing bye brag yod ma yin/ /de bzhin rgyal ba'i pha rol phyin lnga 'di dag kyang / /shes rab pha rol phyin pa'i ming
194a
@#/ /nyid thob par 'gyur/ /thams cad mkhyen pa nyid phyir yongs su bsngos byas na/ /byang chub ces byar drug po 'di kun ro gcig 'gyur/ /byang chub sems dpa' gal te rab tu mi shes bzhin/ /gzugs dang 'du shes tshor dang sems pa rnam par shes/ /mi rtag yongs su ston pa bcos la spyod pa ste/ /mkhas pa nam yang chos rnams 'jig par mi byed do/ /gang la gzugs min tshor min 'du shes mi dmigs shing / /rnam par shes pa ma yin sems pa mi dmigs la/ /chos kun skye med stong pa'i tshul du rab shes pa/ / 'di ni shes rab pha rol phyin mchog spyod pa yin/ /la las gang+gA'i klung gi bye snyed zhing rnams na/ /sems can ji snyed 'khod kun dgra bcom nyid btul bas/ /gang gis shes rab pa rol phyin 'di yig bris te/ /sems can mchog la glegs byin bsod nams khyad par 'phags/ /ci phyir zhe na smra mchog de dag 'dir bslab nas/ /chos rnams mtha' dag stong pa nyid du 'dir ston byed/ /de dag nyan thos myur du rnam par grol la reg /rang rgyal byang chub dang ni sangs rgyas byang chub reg /myu gu med par 'jig rten sdong byung yod med na/ /de la yal 'dab me tog 'bras bu ga la 'byung / /byang chub sems med rgyal 'byung 'jig rten yod med na/ /'bras bu brgya byin tshangs pa nyan thos ga la 'byung / /nyi ma'i dkyil 'khor
194b
gang tshe 'od kyi dra ba 'gyed/ /de tshe sems can las byed brtson pa de bzhin du/ /mkhas pa shes phyir 'jig rten byang chub sems byung na/ /ye shes kyis ni sems can yon tan chos dang ldan| |dper na ma dros pa yi klu bdag med gyur na/ /'dzam bu'i gling 'dir chu klung 'bab pa ga la 'gyur/ /chu klung med na me tog 'bras bu 'byung mi 'gyur/ /rgya mtsho la yang rin chen gzugs mang med par 'gyur/ /de bzhin 'dir yang byang chub sems med bder gshegs kyi/ /ye shes 'jig rten 'di dag kun kyang ga la 'byung / /ye shes med na yon tan 'phel med byang chub med/ /rgya mtsho 'dra ba'i sangs rgyas chos kyang med par 'gyur/ /'jig rten 'di na snang byed srog chags ji snyed pa/ /kun gyis snang bar bya phyir 'od rnams phyung ba bas/ /nyi ma'i dkyil 'khor 'od zer gcig phyung ches mchog ste/ /snang byed tshogs kyi 'od rnams kun gyis char mi phod/ /nyan thos tshogs rnams ji snyed sbyin dang tshul khrims dang / /bsgom dang rab tu ldan pa'i bsod nams tshogs bskyed pa'am/ /byang chub sems dpa'i rjes su yi rang sems gcig la/ /nyan thos tshogs rnams bsod nams phung pos char mi phod/ /'das dus sngon gyi sangs rgyas bye ba khrag khrig gang / /zhing mang mtha' yas bye stong dag na gang bzhugs dang / /gang yang mya ngan 'das pa'i 'jig rten mgon po rnams/ /sdug bsngal zad par
195a
@#/ /bya phyir rin chen chos ston pa/ /dang po byang chub mchog tu sems bskyed bskyed pa nas/ /rnam par 'dren pa rnams kyi dam chos zad kyi dus/ /de bar rgyal ba de dag bsod nams gang yin pa/ /pha rol phyin dang ldan dang sangs rgyas chos gang dang / /gang yang sangs rgyas sras rnams dang ni nyan thos dang / /slob dang mi slob dge ba zag bcas zag med pa/ /bsdus dang byang chub sems dpa' rjes su yi rang zhing / /'gro ba'i don rgyu byang chub phyir ni thams cad bsngo/ /yongs bsngo gal te sems su 'du shes 'byung 'gyur zhing / /byang chub 'du shes yongs bsngo sems can 'du shes na/ /'du shes phyir na lta gnas sems ni gsum la chags/ /dmigs pa yod pas yongs su bsngos par chud ma yin/ /gal te 'di ltar chos 'di 'gag cing zad pa dang / /gang du yongs su bsngo ba de yang zad pa dang / /chos kyis chos la nam yang mi bsngo shes gyur na/ /de ltar rab tu shes pas yongs su bsngos pa yin/ /gal te mtshan mar byed na de ni bsngo ma yin/ /ci ste mtshan ma med na byang chub bsngo ba yin/ /ji ltar dug dang 'dres pa'i kha zas bzang za ba/ / dkar po'i chos la dmigs pa 'ang de 'drar rgyal bas gsungs/ /de ltas 'di ltar yongs su bsngo ba bslab bya ste/ /ji ltar rgyal ba de dag dge ba de mkhyen pa'i/ /rnam pa gang yin
195b
'byung gang mtshan nyid gang yin la/ /rjes su yi rang de lta de ltar yongs su bsngo/ /de ltar bsod nams byang chub yongs su bsngo byed na/ /dug med sangs rgyas mi spong rgyal bas gsungs pa smra| |de ltar yongs bsngo dpa' bo 'jig rten dmigs can gyis/ /byang chub sems dpa' ji snyed thams cad zil gyis non/ /da mus long dmigs bu med pa bye ba khrag khrig rnams/ /lam yang mi shes grong khyer 'jug par ga la 'gyur/ /shes rab med na mig med pha rol phyin lnga ni/ /dmigs bu med pas byang chub reg par nus ma yin/ /gang tshe shes rab kyis ni rab tu zin gyur pa| |de tshe mig rnyed gyur cing 'di yi ming thob bo/ /dper na ri mo'i las ni yongs zin mig med pa/ /ji srid mig ma bris par rngan pa mi thob bzhin/ /gang tshe 'dus byas 'dus ma byas dang dkar nag chos/ /shes rab rnam par bshigs nas rdul tsam mi dmigs tshe/ /'jig rten dag na shes rab pha rol phyin grangs 'gro /nam mkha' gang la'ang cung zad mi gnas de dang 'dra/ / gal te bdag ni rgyal ba'i shes rab spyad bya zhing / /sems can sdug bsngal reg pa khrag khrig mang dgrol sems/ /sems can 'du shes yongs rtog byang chub sems dpa' ste/ /de ni shes rab pha rol phyin mchog spyod ma yin/ /byang chub sems dpa' gang zhig sngon chad spyod pa'i tshe/ /pha rol phyin 'dir spyod pa mkhas pa som nyi med/ /thos ma thag tu de ni ston pa'i 'du shes
196a
@#/ /skyes| des na byang chub zhi ba myur du rtogs par 'gyur/ /sngon chad tshe na sangs rgyas khrag khrig bkur byas kyang / /rgyal ba'i shes rab pha rol phyin la ma dad na/ /thos nas blo chung de yis 'di ni spong byed de/ /spangs nas skyabs med gyur pa de ni mnar med 'gro /de lta bas na gal te sangs rgyas ye shes mchog /reg par 'dod na rgyal ba'i yum 'dir dad par gyis/ /dper na tshong pa rin chen gling du song nas ni/ /zong zad slar log lta bur gyur na mi rung ngo / /gzugs kyi dag pa 'bras bu dag par rig par bya/ /'bras bu gzugs dag thams cad mkhyen nyid dag par gsungs/ /thams cad mkhyen nyid 'bras bu dag dang gzugs dag pa/ /nam mkha'i khams dang mtshungs te dbyer med gcad du med| |dpa' bo gar spyod shes rab pha rol phyin pa yis/ /khams gsum yang dag 'das la rnam par grol ba'ang min/ /nyon mongs bsal bar gyur kyang skye ba ston par byed/ / rga dang na dang 'chi ba med kyang 'chi 'pho ston/ /'gro ba 'di dag ming dang gzugs kyi 'dam la chags/ /rlung gi 'khor lo lta bu'i 'khor ba'i 'khor lor 'khyams/ /'gro ba 'khrul pa ri dwags rgyar tshud 'drar shes nas/ /shes rab ldan pa mkha' la bya bzhin rnam par rgyu/ /spyod pa yongs dag gang zhig gzugs la mi spyod cing / /rnam shes 'du shes tshor
196b
ba sems par mi spyod na/ /de ltar spyod pa chags pa thams cad yongs spong zhing / /chags las rnam grol bde gshegs rnams kyi shes rab spyod/ /de ltar spyod pa'i byang chub sems dpa' mkhas gsal ba/ /chags pa bcad nas 'gro la chags pa med par 'gro /nyi ma sgra gcan gza' bral lhang nger 'dug pa dang / /me btang rtswa dang shing dang nags tshal sreg pa bzhin/ /chos rnams thams cad rang bzhin dag cing yongs dag par/ /byang chub sems dpa' shes rab pha rol phyin lta na/ /byed pa po yang mi dmigs chos kun mi dmigs te/ /'di ni shes rab pha rol phyin mchog spyod pa yin/ /rgyal ba la ni lha rgyal brgya byin gyis zhus pa/ /byang chub sems dpa' shes rab spyod pa ji ltar brtson/ /phung po khams la rdul tsam brtson par mi byed cing / /phung por mi brtson de ni byang chub sems dpa'i brtson/ /gang zhig chos 'di sprul dang sgyu ma 'drar shes nas/ /som nyi med cing slob la phyir zhing sbyor byed pa/ /sems can de ni ring nas theg chen zhugs rig bya| |sangs rgyas bye ba khrag khrig mang la lhag byas yin/ /dgon pa'i lam ni dpag tshad mang por zhugs pa'i mis/ /gnag rdzi mtshams kyi nags tshal phun sum tshogs mthong na/ / de dag grong dang grong khyer nye ba'i rtags snyam ste/ /dbugs phyin rnyed par gyur cing chom rkun 'jigs pa med/ /de bzhin byang chub yongs su tshol tshe rgyal rnams kyi/ /shes rab pha rol
197a
@#/ /phyin 'di mnyan pa gang thob pa/ /de ni dbugs phyin thob par gyur cing 'jigs med de/ /dgra bcom sa la ma yin rkyen rtogs sa la min/ /mi zhig rgya mtsho'i chu ni blta phyir 'gro ba yis/ /gal te shing dang nags tshal ri mthong da rung ring / /ci ste rtags ma mthong na rgya mtsho chen po ni/ /nye bar gyur to snyam ste de la som nyi med/ /de ltar byang chub dam par rab zhugs rgyal ba yi/ /shes rab pha rol phyin pa 'di nyan rig par bya/ /rnam par 'dren pas mngon sum lung bstan ma gyur kyang / /sangs rgyas byang chub ring por mi thogs bdag reg 'gyur/ /dpyid dus bzang la sdong po lo ma lhags gyur na/ /yal gas ring por mi thogs lo 'bras me tog skrun/ /shes rab pha rol phyin 'di su yi lag thob pa/ /ring por mi thogs 'dren pa rnams kyi byang chub 'thob/ /dper na bud med sbrum gang sdug bsngal nyen gyur na/ /de ni de yi btsa' ba'i dus la bab ces bya/ /de bzhin byang chub sems dpa' rgyal ba'i shes rab nyan/ /dga' dang 'dun pa skyed pa myur du byang chub reg /shes rab pha rol phyin mchog spyod tshe rnal 'byor pa/ /gzugs kyi 'phel ba dang ni yongs su 'grib mi mthong // gang zhig chos dang chos min chos dbyings mi mthong zhing / /mya ngan 'das la mi reg de ni shes rab gnas/ /gang zhig 'dir spyod sangs rgyas chos rnams mi rtog ste/ /stobs dang
197b
rdzu 'phrul rkang pa byang chub zhi mi rtog /rnam par mi rtog rtog bral byin gyi rlabs kyis spyod/ /'di ni shes rab pha rol phyin mchog spyod pa yin/ /smra ba'i zla ba sangs rgyas la ni rab 'byor zhus| |yon tan dga' ba rnams kyi bar du gcod gang lags/ /ston pas bka' stsal bar du gcod par 'gyur mang ste/ /de las re zhig cung zad tsam zhig yongs su brjod/ /rgyal ba'i shes rab pha rol phyin 'di yig 'bri tshe/ /spobs pa tha dad rnam pa du ma 'byung 'gyur zhing / /'gro ba'i don ma byas par glog bzhin myur du yang / /yongs su nyams par 'gyur ba 'di ni bdud kyi las/ /'di bshad tshe na kha cig som nyi za 'gyur te/ /'dren pas 'dir ni bdag gi ming yang yongs ma brjod/ /rigs dang sa dang rus kyang yongs su ma brjod ces/ /de ni nyan par mi 'gyur spong 'gyur bdud kyi las/ /de ltar mi shes de dag rtsa ba bong nas ni/ /rmongs pas yal ga dag dang 'dab ma tshol bar 'gyur/ /glang po rnyed kyang glang po'i rjes ni tshol ba ltar// shes rab pha rol phyin thos mdo tshol de bzhin no/ /dper na la las ro brgya ldan pa'i zas rnyed la/ /zas mchog rnyed nas zas ngan tshol bar byed pa ltar/ /byang chub sems dpa' pha rol phyin pa 'di rnyed nas/ /dgra bcom sa yis byang chub tshol byed de bzhin no/ /bsti stang 'dod par 'gyur zhing rnyed pa 'dod 'gyur dang / /lta dang bcas pa'i sems kyis khyim 'dris byed ldan
198a
@#/ /zhing / /chos btang nas ni chos min bya ba spyod 'gyur ba/ /lam bor lam gol 'gro ba 'di ni bdud kyi las/ /gang dag de yi tshe na 'dun cing dad gyur nas/ / chos kyi dam pa 'di ni nyan du song ba las/ /de dag gis ni chos smra bya ba ldan rig nas/ /dga' ba med cing yid mi bde bar gyur nas 'gro/ /de yi tshe na bdud kyi las 'di 'byung bar 'gyur| |de tshe gang dag gis ni dge slong mang dkrugs nas/ /shes rab pha rol phyin 'di 'dzin par mi 'gyur ba'i/ /bar du gcod pa rnam mang gzhan yang 'byung bar 'gyur/ /rin chen rin thang med pa rnyed gyur gang dag yin/ /de dag dkon la dus rnams rtag tu 'tshe ba'ang mang / /de bzhin rgyal ba'i shes rab pha rol phyin pa mchog/ rin chen chos kyang dkon la rtag tu 'tshe ba'ang mang / /theg par gsar du zhugs pa'i sems can blo chung ba/ /gang zhig dkon pa'i rin chen 'di ni ma rnyed na/ /de la bar chad bya phyir bdud ni spro bar 'gyur/ /phyogs bcu'i sangs rgyas de dag yongs su 'dzin la sbyor/ /ma zhig na bar gyur la bu ni mang yod pa/ /de kun yid mi bde zhing de la rim gro byed/ /de bzhin phyogs bcu'i 'jig rten khams kyi sangs rgyas kyang / /yum gyur shes rab dam pa 'di la dgongs pa mdzad/ /gang dag 'das dang phyogs bcu'i 'jig rten mgon gang dang / /ma 'ongs dus na 'byung 'gyur de dag 'di
198b
las 'byung / /'jig rten ston pa rgyal ba rnams kyi skyed byed yum/ /sems can gzhan dang sems kyi spyod pa sten par byed/ /'jig rten de bzhin nyid dang dgra bcom de bzhin nyid// rang rgyal de bzhin nyid dang rgyal sras de bzhin nyid/ /gcig pa nyid de dngos bral gzhan min de bzhin nyid/ /shes rab pha rol phyin pa de bzhin gshegs pas mkhyen/ /mkhas pa 'jig rten gnas sam mya ngan 'das kyang rung / /chos nyid skyon med chos rnams stong pa 'di gnas te/ /byang chub sems dpas de bzhin nyid 'di rjes su rtogs/ /de phyir de bzhin gshegs zhes sangs rgyas mtshan gsol to/ /shes rab pha rol phyin pa'i dga' tshal la brten pa/ /stobs bcu rnam 'dren rnams kyi spyod yul 'di yin te/ /sems can sdug bsngal ngan song gsum las yongs 'don kyang / /de dag nam yang sems can 'du shes 'gyur ba med/ /dper na seng+ge ri su la brten nas 'jigs med par/ /ri dwags phra mo mang skrag byed cing sgra sgrog ltar/ /mi yi seng+ge shes rab pha rol phyin brten nas/ /mu stegs can mang skrag byed 'jig rten sgra yang sgrog/ dper na nam mkhar gnas pa'i nyi ma'i 'od zer ni/ /sa 'di skem par byed cing gzugs kyang rab tu ston/ /de bzhin chos rgyal shes rab pha rol phyin brten pa/ /sred pa'i chu klung skem zhing chos kyang rab tu ston/ /gzugs rnams mi mthong tshor ba dag kyang mi mthong zhing / /'du shes
199a
@#/ /mthong ba med la sems pa mi mthong zhing / /gang la rnam par shes dang sems yid mthong med pa/ /'di ni chos mthong yin zhes de bzhin gshegs pas bstan/ /nam mkha' mthong zhes sems can tshig tu rab brjod pa/ /nam mkha' ji ltar mthong zhes don 'di brtag par gyis/ /de ltar chos mthong ba yang de bzhin gshegs pas bstan/ /mthong ba dper gzhan gyis ni bsnyad par nus ma yin/ /gang gis de ltar mthong ba de yis chos kun mthong / /rgyal po btang snyoms 'dug cing blon po kun byed ltar/ /sangs rgyas mdzad dang nyan thos chos rnams ji snyed pa/ /de dag thams cad shes rab pha rol phyin pa byed/ /rgyal po grong du mi 'gro yul 'khor mi 'gro bar/ /rang gi yul na 'du ba thams cad sdud pa ltar/ /byang chub sems dpa'i chos nyid gang du'ang mi 'gro la/ /sangs rgyas sa yi yon tan gang yin thams cad sdud/ /gang la bde gshegs byang chub sems dpa' dad brtan yod/ /shes rab pha rol phyin pa mchog la bsam sbyor ba/ /nyan thos rang rgyal sa gnyis shin tu 'das byas nas/ /zil gyis mi non rgyal ba'i byang chub myur du 'thob/ /dper na rgya mtshor 'jug pa'i gru ni chag gyur la/ /mi gang ro 'am rtswa 'am shing ni mi 'dzin pa/ /chu dbus 'jigs par 'gyur te ngogs su phyin mi 'gyur/ /gang zhig 'dzin pa rgya mtsho'i pha rol phyin par 'gyur//
199b
de ltar dad ldan dang ba thob pa gang zhig ni/ /shes rab pha rol phyin yum rjes su mi 'jug min/ /de dag thabs kyi yon tan shes rab yongs zin na/ /mchog tu rmad byung bde gshegs byang chub myur du reg /dper na la las rdza so ma btang chu skyed na/ /nyam chung phyir ni myur du 'jig par rig par bya/ /so btang bum par chu skyed lam du 'jig pa yis/ /'jigs pa med cing bde bar khyim du phyin par 'gyur/ /de bzhin byang chub sems dpa' dad pa mang gyur kyang / /shes rab rnam par nyams shing myur du ma rungs 'gyur/ /de bas shes rab kyis ni yongs su zin gyur na/ /sa gnyis shin tu 'das te byang chub mchog thob 'gyur/ /dper na bcos legs ma byas gru ni rgya mtsho'i nang / /nor dang bcas shing stong par bcas te 'jig par 'gyur// gru de legs par bcos legs byas dang ldan gyur na/ /mi 'jig nor dang bcas par ngogs su phyin par 'gyur/ /de ltar byang chub sems dpa' dad pas yongs bsgos kyang / /shes rab med na byang chub las ni myur nyams 'gyur/ /de nyid shes rab pha rol phyin pa mchog ldan na/ /ma rmas ma nyams rgyal ba'i byang chub reg par 'gyur/ /lo brgya nyi shu lon te rgas shing sdug bsngal mi/ /langs kyang bdag nyid 'gro bar nus pa ma yin te/ /de ni g.yas g.yon gnyis nas mi yis bsten byas na/ /'gyel ba'i 'jigs pa med cing bde blag 'gro bar
200a
@#/ /'gyur| |de bzhin byang chub sems dpa' shes rab stobs chung ba/ /rab tu zhugs par gyur kyang rab tu nyams par 'gyur/ /de nyid thabs dang shes rab mchog gis yongs zin na/ /mi nyams de bzhin gshegs kyi byang chub reg par 'gyur/ /byang chub sems dpa' dang po'i las kyi sar gnas gang / /lhag pa'i bsam pas sangs rgyas byang chub mchog zhugs pa/ /slob ma bzang po bla mar gus ldan de dag gis/ /bla ma mkhas pa rnams la rtag tu bsten par bya/ /ci phyir zhe na mkhas pa'i yon tan de las 'byung / /de dag shes rab pha rol phyin pa rjes su ston/ /sangs rgyas chos rnams dge ba'i bshes la bsten to zhes/ /yon tan kun gyi mchog mnga' rgyal ba de skad gsungs/ /sbyin dang tshul khrims bzod cing de bzhin brtson 'grus dang / /bsam gtan shes rab byang chub yongs su bsngo bar gyis/ /byang chub phung por zhen nas mchog 'dzin ma byed ces/ /dang po'i las can de la de skad bstan par bya/ /de ltar spyod pa legs mtsho smra ba'i zla ba rnams/ /'gro ba'i skyabs dang dpung gnyen dang ni gnas yin te/ /rten dang blo dang gling dang yongs 'dren don 'dod pa/ / gsal byed sgron ma chos mchog smra ba mi 'khrugs yin/ /grags chen ldan rnams bya dka'i go cha gyon byed de/ /phung po khams dang skye mched rnams kyi go cha min/ /theg gsum
200b
'du shes bral zhing yongs su bzung ba ni/ /mi ldog g.yo ba med cing mi 'khrugs chos can yin/ /de dag de 'dra'i chos dang ldan zhing spros pa med/ /the tshom som nyi yid gnyis bral zhing don dang ldan/ /shes rab pha rol phyin pa thos nas mi nur ba/ /gzhan gyi dring mi 'jog cing mi ldog rig par bya/ /'dren pa rnams kyi chos 'di zab ste mthong bar dka'/ /sus kyang rtogs pa med cing thob par gyur med pa/ /de phyir phan mdzad brtser ldan byang chub brnyes nas 'di/ /sems can tshogs sus shes snyam thugs khral chung bar mdzad/ /sems can rnams ni gnas la dga' zhing yul rnams 'dong / /'dzin la gnas shing mi mkhas blun rmongs mun pa bzhin/ /thob par bya ba'i chos ni gnas med 'dzin med de/ /des na 'jig rten dag dang rtsod pa 'byung ba yin/ /nam mkha'i khams ni shar gyi phyogs dang lho phyogs dang / /de bzhin nub kyi phyogs dang byang phyogs pha mtha' yas/ /steng dang 'og dang phyogs bcu'i ji snyed rnams na'ang yod/ /tha dad gyur pa med cing bye brag gyur pa med/ /'das pa'i de bzhin nyid gang ma phyin de bzhin nyid/ /da ltar de bzhin nyid gang dgra bcom de bzhin nyid/ /chos kun de bzhin nyid gang dgra bcom de bzhin nyid/ /chos kyi de bzhin nyid 'di thams cad bye brag med/ /bde gshegs byang chub tha dad chos dang bral gyur pa/ /'di ni byang chub sems dpa' gang zhig tho ba
201a
@#/ /'dod pa/ /thabs dang ldan pas shes rab pha rol phyin la sbyor/ /'dren pa'i shes rab med na thob par 'gyur ma yin/ /bya zhig lus che dpag ched brgya rtsa lnga bcu par/ /gyur la 'dab gshog zad de nyams rtsal yod min na/ /de yis sum cu rtsa gsum gnas nas 'dzam gling 'dir/ /bdag nyid mchongs na der ni nyams nyes 'gyur ba yin// rgyal ba rnams kyi pha rol phyin pa lnga 'di yang / /bskal pa bye ba khrag khrig mang por bsgrubs byas shing / /smon lam mtha' yas rgya chen 'jig rten rtag brten kyang / /thabs med shes rab bral ba nyan thos nyid du byung / /sangs rgyas theg pa 'di la nges par 'byung 'dod gang / /'gro ba kun la'ang sems snyoms pha ma'i 'du shes dang / /phan pa'i sems dang byams pa'i yid kyis brtul bya zhing / /tha ba med cing drang la tshig 'jam smra bar bya/ /'jig rten mgon la gnas brtan rab 'byor yongs zhus pa/ /yon tan rgya mtsho nyon mongs ma mchis rtags bstan gsol/ /mthu che ba dag ji ltar slar ldog mi 'gyur ba/ /de ltar yon tan phyogs tsam rgyal bas lung bstan gsol/ /tha dad 'du shes bral zhing rigs pa ldan tshig smra/ /dge sbyong dag dang bram ze gzhan la rten mi byed/ /mkhas pa dus rnams rtag par ngan song gsum po spangs/ /de dag dge bcu'i las kyi lam la mngon par
201b
brtson| |zang zing med par 'gro la chos ni rjes su ston/ /chos la gcig tu dga' zhing rtag tu tshig 'jam ldan/ /'gro 'chag nyal dang 'dug par shes bzhin rab tu ldan/ /gnya' shing gang tsam lta zhing 'gro las sems 'khrul med/ /gtsang byas gtsang ma'i gos 'chang gsum po dben zhing dag/ rnyed 'dod ma yin khyu mchog rtag tu chos 'dod pa/ /bdud kyi yul las 'das shing gzhan gyi dring mi 'jog /bsam gtan bzhi la bsam gtan bsam gtan der mi gnas/ /grags pa 'dod pa ma yin khro bas sems dkris med/ /khyim par gyur kyang rtag tu dngos po kun ma chags/ /'tsho ba'i phyir ni yangs longs spyod tshol mi byed/ /drag shul spyod sngags mi byed bud med sbyor sngags min/ /'dod pa'i las can pho mor 'gyur zhes ston mi byed// rab tu dben pa'i shes rab pha rol phyin mchog brtson/ /'thab dang rtsod dang bral zhing byams pa'i sems kyang bsten/ /kun mkhyen 'dod cing bstan la rtag tu gzhol sems ldan/ / mtha' 'khob kla klo'i skye bo yul mtha' rnam par spangs/ /rang gi sa la dogs med rtag tu ri rab 'dra/ /chos phyir srog kyang 'dor zhing rnal 'byor rab tu brtson/ /mi ldog rtags ni 'di dag yin par shes par bya/ /gzugs dang tshor dang 'du shes sems pa rnam shes rnams/ /zab ste rang bzhin mtshan ma med cing rab zhi ba/ /dper na mda' yis rgya mtsho'i gting
202a
@#/ /thug tshol ba ltar/ /shes rab kyis ni brtags na phung po'i gting mi rnyed/ /byang chub sems dpa' gang zhig de ltar zab gyur cing / /theg pa don dam chags med gang la phung po dang / /khams dang skye mched yod min chos 'di rtogs pa de'i/ /bsod nams yang dag 'grub pa de las ci zhig yod/ /dper na 'dod chags chos la spyod pa'i skyes bu zhig /bud med dus btab de dang ma phrad de yi ni/ /nyin gcig sems kyi rnam rtog spyod pa ji snyed pa/ /de snyed bskal par byang chub sems dpas thob par 'gyur/ /byang chub sems dpa' gang zhig bskal mang bye stong du/ /dgra bcom rang rgyal sbyin byed tshul khrims srung byed kyang / /gang zhig shes rab pha rol phyin mchog ldan pa'i chos/ /brjod pa'i legs pa sbyin dang tshul khrims char mi phod/ /byang chub sems dpa' gang zhig shes rab mchog bsgoms te/ /de las langs nas gos pa med pa'i chos brjod cing / /de yang 'gro ba'i don du byang chub rgyur bsngo na| |dge ba de dang mnyam pa 'jig rten gsum na med/ /bsod nams de dang gsog dang de bzhin steng pa dang / /gsob dang ya ma brla dang snying po med shes pa/ /de ltar bde gshegs rnams kyi shes rab spyad spyod na/ /spyod tshe bsod nams dpag tu med pa yongs su 'dzin/ /sangs rgyas kyis bshad rab tu spyod cing rab bstan pa'i/ /chos 'di thams
202b
cad brjod pa tsam du zad shes na/ /bskal pa bye ba khrag khrig mang por brjod byas kyang / /chos kyi dbyings la zad pa med cing 'phel ba med/ /rgyal ba rnams kyi pha rol phyin ces bya ba gang / /chos de rnams kyang ming tsam du ni yongs su bsgrags/ /yongs bsngo rlom sems med pa'i byang chub sems dpa' ni/ /nyams pa med cing sangs rgyas byang chub mchog reg 'gyur| 'bru mar snying po 'bar ba 'phrad pa dang po yis/ /snying po tshig min de med par yang de mi tshig /me lce phrad pa thams snying po tshig min la/ /me lce tha ma med par snying po tshig min ltar/ / dang po'i sems kyis byang chub mchog reg ma yin la/ /de med par yang de la reg par nus ma yin/ /tha ma'i sems kyis byang chub zhi ba thob min la/ /de med par yang de 'thob nus pa ma yin no/ /sa bon las ni myu gu me tog 'bras bu 'byung| |de yang 'gag la shing yang med pa de min ltar/ /de bzhin dang po'i sems kyang byang chub rgyu yin te/ /de yang 'gag la byang chub med pa de ma yin/ /chu yi thigs pas bum pa dang po tha ma'i bar/ /rim gyis nyung du nyung dus de yongs 'gengs pa ltar/ /de bzhin dang po'i sems kyang byang chub mchog rgyu ste/ / rim gyis dkar po'i yon tan rdzogs pa'i sangs rgyas 'gyur/ /stong pa mtshan med smon pa med par chos spyod cing / /mya ngan 'das la mi reg mtshan mar mi spyod pa/ /dper na mnyan pa
203a
@#/ /mkhas pa phar 'gro tshur 'gro yang / /mtha' gnyis mi gnas rgya mtshor gnas pa med pa bzhin/ /de ltar spyod pa'i byang chub sems dpa' 'di snyam bdag /stobs bcus lung bstan byang chub reg 'gyur rlom sems med/ /'di la ci yang med ces byang chub skrag pa med/ /de ltar spyod pa bde gshegs shes rab spyod pa yin/ / 'jig rten dgon pa'i lam dang mu ge nad bcas par/ /mthong nas skrag pa med cing de nas go gyon te/ /phyi ma'i mu mthar rtag tu brtson zhing rab shes nas/ /yongs su skyo ba'i yid ni rdul tsam skyed mi byed/ /byang chub sems dpa' rgyal pa'i shes rab spyod byed cing / /phung po 'di dag gdod nas stong zhing skye med shes/ /mnyam par ma bzhag sems can khams la snying rje 'jug /bar skabs der yang sangs rgyas chos las yongs mi nyams/ /dper na skyes bu mkhas pa yon tan dang ldan zhing / /stobs ldan mi thub brtson byas sgyu rtsal chog shes/ / 'phong dang bzo gnas mang po'i pha rol phyin gyur cing / /sgyu ma sgrub shes 'gro don rab tu 'dod pa zhig/ pha dang ma dang chung mar bcas pa yongs bsdus nas/ /dag byed mang ba dgon pa'i lam du phyin pa dang / /de yis dpa' zhing rtul phod skyes bu mang \?\ sprul te/ /bde bar song zhing phyir yang khyim du 'ong ba ltar/ /de bzhin de tshe byang chub sems dpa' mkhas pa yang / /
203b
sems can khams rnams kun du snying rje che bskyed cing / /bdud bzhi dag dang sa gnyis las kyang rab 'das nas/ /ting 'dzin mchog la gnas shing byang chub reg mi byed/ /mkha' la rlung brten de la chu yi phung po brten/ /de la sa chen 'di brten de la 'gro ba brten/ /sems can las la spyod pa'i rgyu ni de 'dra ste/ /nam mkha' gang la gnas yin don 'di bsam par gyis/ /de bzhin byang chub sems dpa' stong pa nyid gnas pa/ /'gro la sems can shes pa'i smon lam brten can gyi/ /bya ba rnam pa sna tshogs du ma ston byed cing / /mya ngan 'das la mi reg stong par gnas pa med/ /gang gi tshe na byang chub sems dpa' mkhas gsal ba/ /stong pa zhi ba'i ting 'dzin dam pa 'di spyod pa/ /bar skabs der ni mtshan ma rab tu sgom mi byed/ /mtshan ma med par gnas shing zhi la rab zhi spyod/ /bar snang 'phur ba'i bya la gnas yod ma yin te/ /de na gnas pa ma yin sa la lhung mi 'gyur/ /de ltar byang chub sems dpa' rnam thar sgor spyod pa| |mya ngan 'das la mi reg mtshan mar spyod ma yin/ /dper na 'phong bslab skyes bus gnam du mda' 'phangs te/ /mda' gzhan dag ni phyi bzhin brgyud mar yong btags te/ / snga ma'i mda' de sa la ltung ba'i skabs mi 'byed/ /mi de 'dod na mda' de sa la ltung bar 'gyur/ /de ltar shes rab pha rol phyin pa mchog spyod pa/ /shes rab thabs stobs rdzu 'phrul gyis
204a
@#/ /ni rnam spyod pa/ /de dag dge ba'i rtsa ba ji srid ma rdzogs pa/ /de srid stong nyid dam pa de ni thob mi byed/ /dper na dge slong rdzu 'phrul stobs mchog ldan pa zhig /nam mkhar gnas te gcig car cho 'phrul rnam par 'phrul/ /'gro dang 'chag pa dang ni nyal dang 'dug pa ston/ /de ni skyo ba med cing de la dub pa med/ /de bzhin byang chub sems dpa' mkhas pa stong gnas shing / /ye shes rdzu 'phrul pha rol son la gnas pa med/ /'gro ba dag la bya ba rnam pa mtha' yas ston/ /bskal pa bye bar skyo ba med cing dub pa med| |dper na mi 'ga' g.yang sa chen por 'dug byed cing / /lag pa gnyi gas gdugs gnyis 'dzin cing nam mkha' la/ /mchong bar byed cing g.yang sa chen por lus bor na/ ltung bar mi 'gyur ji srid der ni 'gro bar 'gyur/ /de bzhin byang chub sems dpa' mkhas pa snying rjer gnas/ /thabs dang shes rab gnyis kyi gdugs ni yongs bzung ste/ /chos rnams stong pa mtshan med smon pa med rtog cing / /mya ngan 'das la reg pa med la chos kyang mthong / /dper na rin chen 'dod pa rin chen gling song ste/ /rin chen rnyed nas phyir yang khyim du 'ongs 'gyur ba/ /der ni ded dpon 'ba' zhig bde bar 'tsho byed cing / /gnyen bshes tshogs yid mi bder 'jog pa min pa ltar/ /de bzhin byang chub sems dpa' stong nyid rin
204b
gyi| |gling du song ste bsam gtan dbang po stobs thob pa/ /mya ngan 'das la reg pa 'ba' zhig mngon dga' zhing / /sems can sdug bsngal yid du 'jog par 'gyur ma yin| | dper na don gnyer tshong pa rgyus shes bya ba'i phyir/ /bar gyi grong khyer grong rdal gang yin bde bar 'gro/ der yang mi gnas rin chen gling du'ang mi gnas la/ /rig pa khyim du mi gnas ma la mkhas par 'gyur/ /de bzhin byang chub sems dpa' gsal de nyan thos dang / /rang rgyal rnams kyi shes pa rnam grol kun la mkhas/ /de la mi gnas sangs rgyas ye shes gnas ma yin/ /'dus ma byas la mi gnas lam gyi tshul shes yin/ /gang tshe 'gro la byams pas rjes su 'brel byas nas/ /ting 'dzin stong pa mtshan med smon pa med spyod pa/ /de ni mya ngan 'das pa thob par 'gyur zhe 'am/ /'dus byas yin par gdags nus de ni gnas med de/ /dper na sprul pa'i mi lus mi snang ma yin zhing / /de ni ming gis kyang ni gdags par nus pa ltar| |de bzhin byang chub sems dpa' rnam thar sgor spyod pa/ /de ni ming gis kyang ni gdags par nus pa yin/ /gal te spyod pa dang ni dbang po yongs dris la/ /byang chub sems dpa' stong pa mtshan ma med pa'i chos/ /yongs su mi ston phyir mi ldog pa'i sa yi chos/ /mi 'chad de ni lung ma bstan pa yin rig bya/ /dgra bcom sa dang rkyen gyi sangs rgyas ye shes dang / /khams
205a
@#/ /gsum dag na rmi lam na yang mi 'dod cing / /sangs rgyas rnams mthong 'gro la chos kyang ston byed pa/ /de ni mi ldog lung bstan yin par rig par bya/ / rmi lam na ni sems can ngan song gsum gnas mthong / /skad cig de la ngan song rgyun gcod smon lam 'debs/ /bden pa'i byin gyi rlabs kyis me yi phung po zhi/ /de ni mi ldog lung bstan yin par rig par bya/ /mi yi 'jig rten 'byung po'i gdon dang nad mang ba/ /phan dang snying brtser ldan pa'i bden pa'i byin gyis zhi/ /'on kyang slo ma sems med cing nga rgyal skye med pa/ /de ni mi ldog lung bstan yin par rig par bya/ /ci ste de ni bden pa'i byin brlabs sna tshogs dag /'byor pas bdag lung bstan snyam rlom sems 'byung ba 'am/ / gal te byang chub sems dpa' gzhan gyi lung bstan rlom/ /rlom sems gnas pa de ni blo chung shes par bya/ /ming gi gzhi las bdud ni nye bar 'ongs gyur nas/ /'di skad smra ste 'di ni khyod dang pha ma dang / /khyod kyi bdun mes brgyud kyi bar gyi ming yin zhing / /gang tshe khyod ni sangs rgyas 'gyur ba'i ming 'di yin/ /sbyangs sdom rnal 'byor ldan pa ci 'dra 'byung 'gyur la/ /khyod sngon yon tan tshul yang 'di 'dra zhes brjod de/ /de skad gang thos rlom sems byang chub sems dpa' ni/ /bdud kyis yongs su bslang zhing blo chung
205b
rig par bya/ /rab tu dben pa'i grong dang grong khyer ri sul dang / /dgon pa dben pa nags khrod rab tu sten byed cing / /bdag stod gzhan la smod pa'i byang chub sems dpa' ni/ /bdud kyis yongs su bslang zhing blo chung rig par bya/ /rtag tu grong dang yul 'khor grong rdal gnas byed cing / /sems can smin byed byang chub brtson pa ma gtogs par/ /de ni dgra bcom rang rgyal 'dod pa gzhan mi bskyed/ /'di ni bde bar gshegs pa'i sras kyi dben par gsungs/ /gang zhig dpag tshad lnga brgya yod pa'i ri yi sul/ /sbrul gyis gang bar lo mang bye bar gnas byed kyang / /dben pa 'di mi shes pa'i byang chub sems dpa' de/ /lhag pa'i nga rgyal rnyed nas 'dre par gnas pa yin/ /byang chub sems dpa' 'gro ba'i don brtson bsam gtan dang / /stobs dang dbang po rnam thar ting 'dzin thob de la/ /'di ni dgon dben spyod pa min snyam brnyas byed pa/ /de ni bdud kyi spyod yul gnas zhes rgyal bas gsungs/ /gang zhig grong ngam 'on te dgon par gnas kyang rung / /theg pa gnyis kyi sems bral byang chub mchog nges na/ /'di ni 'gro don zhugs pa rnams kyi dben pa ste/ /byang chub sems dpa' drod snyoms de ni bdag nyid nyams/ /de lta bas na byang chub dam pa tshol ba yi/ /bsam pa drag ldan mkhas pas nga rgyal nges bcom ste/ /nad pa'i tshogs kyis gos phyir sman pa bsten
206a
@#/ /pa ltar/ /g.yel ba med par dge ba'i bshes gnyen bsten par bya/ /sangs rgyas byang chub mchog zhugs byang chub sems dpa' dag /pha rol tu phyin dang bcas te dge ba'i bshes su bsten/ /de dag rjes su ston byed 'di ni sgrub pa yis/ /rgyu rnam gnyis kyis sangs rgyas byang chub myur du rtogs/ /rgyal ba 'das dang ma byon phyogs bcu gang bzhugs pa| |kun lam pha rol phyin pa 'di yin gzhan ma yin/ /pha rol phyin 'di byang chub mchog la zhugs rnams kyi/ /gsal dang sgron dang snang dang ston mchog yin zhes bshad/ /ji ltar shes rab pha rol phyin pa mtshan nyid stong / /chos 'di thams cad mtshan nyid de dang 'drar shes shing / /chos rnams stong zhing mtshan ma med par rab shes na/ /de ltar spyod pa bde gshegs shes rab spyod pa yin/ /sems can yongs su rtog pas zas la 'dod byed cing / /'khor bar chags pa'i yid dang ldan rnams rtag tu 'khor/ /bdag dang bdag gi chos gnyis yang dag min stong ste/ /byis pa bdag nyid kyis ni mkha' la mdud pa bor/ /dper na dogs pa'i 'du shes kyis ni dug bslangs pa/ /dug de khong du song ba med kyang brgyal bar 'gyur/ /de bzhin byis pa bdag dang bdag gir khas len pa/ /bdag der 'du shes yang dag min rtog skye zhing 'chi/ /ji ltar 'dzin pa de ltar kun nas nyon mongs
206b
bstan| |bdag dang bdag gir mi dmigs rnam par byang bar gsungs/ /'di la gang yang nyon mongs rnam dag 'gyur med par/ /byang chub sems dpas shes rab pha rol phyin pa rtogs/ /'dzam bu'i gling na sems can ji snyed ma lus pa/ /de dag thams cad byang chub mchog tu sems bskyed nas/ /lo stong bye ba mang por sbyin pa byin byas la/ /kun kyang 'gro ba'i don phyir byang chub rgyur bsngo yang / /gang zhig shes rab pha rol phyin la mngon brtson pa/ /tha na nyi ma gcig cig rjes su mthun byed na/ /de la sbyin pa'i phung pos bsod nams char mi phod/ /de phyir g.yel med rtag tu shes rab 'jug par bya/ /shes rab pha rol tu phyin mchog spyod pa'i rnal 'byor pa/ /snying rje chen po bskyed cing sems can 'du shes med/ /de tshe mkhas pa 'gro ba kun gyi sbyin gnas 'gyur// rtag tu yul 'khor bsod snyoms don yod yongs su spyod/ /byang chub sems dpa' gang 'dir yun ring 'brel pa yi/ /lha mi ngan song gsum gyi sems can dgrol ba'i phyir/ /lam yangs pha rol sems can khams la don 'dod pa/ /nyin mtshan shes rab pha rol tu phyin la brtson par bya/ /mi zhig sngon chad ma rnyed pa yi rin chen mchog /dus gzhan zhig na rnyed par gyur te dga' ba las| |rnyed ma thag tu bag med gyur te stor na ni/ /stor bas rin chen mngon 'dod rtag tu sdug bsngal lo/ /de ltar byang chub mchog zhugs rin chen lta bu yi/ /shes rab pha rol phyin
207a
@#/ /la rnal 'byor dor mi bya/ /rin chen rnyed nas blangs te rab tu brtson bkris nas/ /myur du 'gro bar byed pa zhi bar 'gyur ba bzhin/ /nyi ma sprin dang bral ba'i 'od zer dra ba can/ /mun nag thibs po'i mun pa thams cad 'joms 'char ba/ /srin bu me khyer srog chags 'byung po thams cad dang / /skar ma'i tshogs dang zla ba'i 'od kun zil gyis gnon/ /de bzhin byang chub sems dpa' shes rab pha rol phyin/ /mchog spyod stong ba dang ni mtshan ma med spyod pa/ /mkhas pas lta ba'i thibs po bcom nas 'gro kun dang // dgra bcom rang rgyal byang chub sems mang zil gyis gnon/ /dper na rgyal po'i bu zhig nor ster don 'dod pa/ /kun gyi gtso bor gyur te mngon par 'gro bya 'os/ /'di ni da ltar na yang sems can mang dga' byed/ /thabs thob gyur te rgyal srid gnas na smos ci dgos/ /de ltar shes rab spyod mkhas byang chub sems dpa' yang / /bdud rtsi sbyin par byed cing lha dang mi rnams dga'/ /'di ni da ltar na yang sems can mang phan brtson/ /chos kyi rgyal por gnas par gyur na smos ci dgos/ /de yi tshe na bdud ni zug rdu ldan par 'gyur/ /mya ngan nyam thag sdug bsngal yid bde nyam chung ba/ /ji ltar byang chub sems dpa' 'di yid nur 'gyur zhes/ /'jigs pa bstan phyir phyogs rnams sreg cing skar mda' gtong / /
207b
gang tshe mkhas pa de dag bsam pa rab ldan zhing / /nyin mtshan shes rab pha rol phyin pa mchog don lta| |de tshe lus sems dag ni mkha' 'gro bya ltar gyur/ /nag po'i rtsa lag rnams kyis glags rnyed ga la 'gyur/ /gang tshe byang chub sems dpa' 'thab dang rtsod gyur cing / /phan tshun mi mthun khros pa'i sems dang ldan gyur pa/ /de tshe bdud ni dga' zhing mchog tu nyams bder 'gyur/ /de gnyis rgyal ba'i ye shes las ni ring 'gyur snyam/ /de gnyis ring du 'gyur zhing sha za 'dra bar 'gyur/ /gnyi ga rang gi dam bcas nyams par byed par 'gyur/ /sdang zhing bzod dang bral la byang chub ga la yod/ /de tshe bdud rnams phyogs dang bcas te dga' bar 'gyur/ /lung bstan ma thob byang chub sems dpa' gang zhig gis/ /lung bstan thob la sems khros rtsod pa rtsom byed na/ /tha ba skyon ldan sems kyi skad cig ji snyed pa/ /de snyed bskal par gzhi nas go cha bgo dgos so/ /sangs rgyas bzod pa'i pha rol phyin pas byang chub reg /sems 'di bzang ba min snyam dran pa skyed byed cing / /so sor 'chags par byed cing phyis kyang sdom byed la/ /dga' bar mi byed 'di ni sangs rgyas chos 'dir slob/ /gang zhig slob tshe bslab pa gang yang khas mi len/ /slob pa po dang bslab pa'i chos rnams mi dmigs shing / /bslab dang bslab pa ma yin 'di gnyis mi rtog pa/ /de ltar gang slob de ni sangs rgyas chos 'dir
208a
@#/ /slob| |byang chub sems dpa' gang zhig de lta'i bslab 'di shes/ /de ni gzhan yang bslab nyams tshul khrims 'chal mi 'gyur/ /de ni sangs rgyas chos brnyes bya phyir 'di la slob/ /de ni bslab la mkhas te de ni dmigs pa med/ /mkhas pa 'od byed rnams kyis shes rab de ltar slob/ /dge ba ma yin sems gcig tsam yang skyed mi byed/ /nyi ma mkha' la 'gro ba'i zer gyis zil gnon pa'i/ /mdun gyi bar snang la ni mun pa mi gnas bzhin/ /shes rab pha rol phyin la bslab pa byas rnams kyi/ / pha rol phyin pa thams cad 'dir ni 'dus par 'gyur/ /'jig tshogs lta bar lta ba drug cu gnyis 'dus ltar/ /de bzhin pha rol phyin pa 'di dag 'dus par gsungs/ /dper na srog ge dbang po 'gag na dbang po gzhan/ /gang dag ji snyed yod pa thams cad 'gag par 'gyur/ /de ltar shes rab spyod pa mkhas pa mchog rnams kyi/ /pha rol phyin pa thams cad 'dir ni 'dus par gsungs/ /byang chub sems mkhas nyan thos yon tan gang dag dang / /de bzhin rang rgyal yon tan kun la slob byed cing / /de dag de la mi gnas 'dod pa mi bskyed de/ /'di ni bdag gis bslab bya yin snyam de phyir slob/ /mi ldog byang chub mchog la rab tu zhugs pa yi/ /sems bskyed pa la bsam pa thag pas yi
208b
rang ba| |stong gsum ri rab srang la gzhal bas tshad gzung rung / /rjes su yi rang dge ba de ni de lta min/ /dge ba don gnyer phan 'dod sems can ji snyed pa/ /kun gyi bsod nams phung po la yang yi rang 'gyur/ /de phyir de dag rgyal ba'i yon tan thob gyur nas/ /sdug bsngal zad par bya phyir 'jig rten chos sbyin byed/ /byang chub sems dpa' gang zhig mi rtog chos rnams kun/ /stong dang mtshan ma med dang spros med yongs shes pa/ /de ni shes rab gnyis kyis byang chub tshol mi byed/ /rnal 'byor pa de shes rab pha rol phyin mchog brtson/ / nam mkha'i khams de dang ni nam mkha' der 'gal ba/ /yod pa ma yin gang gis kyang ni de ma thob/ /de bzhin shes rab spyod mkhas byang chub sems dpa' yang / /nam mkha' lta bu yin te nye bar zhi bar spyod/ /skye bo'i dbus na sgyu ma'i skyes bu 'di snyam du/ /skye bo 'di mgu bya snyam mi sems de yang byed/ /rdzu 'phrul sna tshogs rab tu ston par byed mthong yang / /de la lus med sems med ming yang yod ma yin/ /de bzhin shes rab spyod pa nam yang 'di snyam du/ /byang chub rtogs nas 'gro ba yongs su dgrol mi sems/ /skye ba sna tshogs dang ni bya ba mang ldan pa/ /sgyu ma lta bur ston kyang rnam par mi rtog spyod/ /dper na sangs rgyas sprul pa sangs rgyas mdzad pa byed/ /byed pa de la dregs pa cung zad skyed mi 'gyur/ /de bzhin shes
209a
@#/ /rab spyod mkhas byang chub sems dpa' yang / /sprul pa sgyu ma bzhin du bya ba thams cad ston/ /shing mkhan bzo bo mkhas pas skyes pa bud med dang / /'dra ba'i bzo byas de yang bya ba thams cad byed/ /de bzhin shes rab spyod mkhas byang chub sems dpa' yang / /rnam par mi rtog ye shes bya ba thams cad byed/ /de ltar spyod mkhas rnams la lha tshogs mang po dag /thal mo sbyar ba btud nas phyag kyang 'tshal bar byed/ /phyogs bcu'i 'jig rten khams kyi sangs rgyas ji snyed pa'ang / /yon tan bsngags pa'i phreng ba yongs su rjod par mdzad/ /gang+gA'i klung mnyam zhing na sems can ji snyed pa/ /de kun yongs su brtag pa bzung ste bdud gyur la/ /ba spu nyag re las kyang de snyed sprul byas kyang / /de dag kun gyis mkhas la bar chad bya mi nus/ /rgyu rnam bzhi yis byang chub sems dpa' mkhas stobs ldan/ /bdud bzhis thub par dka' zhing bskyod par mi nus te/ /stong par gnas dang sems can yongs su mi gtong dang / /ji skad smras bzhin byed dang bde gshegs byin brlabs can/ /de bzhin gshegs yum shes pa pha rol phyin pa 'di/ /'chad tshe byang chub sems dpa' gang zhig mos byed cing / /bsam pa thag pas bsgrub par mngon par brtson byed na/ /des pa thams cad mkhyen pa nyid la zhugs rig bya/ /chos dbyings de bzhin nyid
209b
la gnas par mi 'gyur zhing / /dper na bar snang sprin bzhin gnas pa med par gnas/ /rig sngags 'chang ba gnas med mkha' rgyu gnas 'dod pa/ /sngags mthus dus min me tog ldan zhing byin gyis rlob/ /de ltar spyod pa'i byang chub sems dpa' mkhas gsal ba/ /rtogs par byed dang sangs rgyas chos rnams dmigs mi 'gyur/ /'chad par byed dang chos 'dod lta bar byed mi dmigs/ /'di ni zhi 'dod yon tan dga' ba'i gnas pa yin/ /dgra bcom rnam thar de bzhin gshegs kyi ma gtogs par/ /gnas pa 'di ni nyan thos rang rgyal bcas pa yi/ /gnas pa zhi ba'i ting 'dzin rab zhi bde ldan pa/ /ji snyed kun gyi mchog dang gong na med pa yin/ /'dab chags mkha' la gnas kyang ltung bar 'gyur ma yin/ /nya ni chu la gnas kyang 'tshubs te 'chi ba med/ /de ltar byang chub sems dpa' bsam gtan stobs dag gi /pha rol son pa stong gnas mya ngan 'da' mi 'gyur/ /sems can kun gyi yon tan mchog tu 'gro ba dang / /sangs rgyas ye shes mchog tu rmad byung mchog reg dang / /chos kyi sbyin pa rab mchog dam pa sbyin 'dod gang / /phan mdzad rnams kyi gnas mchog 'di la brten par gyis/ /bslab pa 'di ni 'dren pas bslab pa yongs brjod pa/ /bslab pa ji snyed kun gyi mchog dang gong na med/ /mkhas pa gang zhig bslab kun pha rol 'gro 'dod pas/
210a
@#/ /sangs rgyas bslab pa shes rab pha rol phyin 'dir slobs/ /'di ni chos gter mchog dang chos mdzod dam pa yin/ /sangs rgyas rigs yin 'gro ba'i bde dang skyid pa'i mdzod/ /'das dang ma byon phyogs bcu'i 'jig rten mgon po rnams/ /de dag 'di las 'khrungs kyang chos dbyings zad mi 'gyur/ /shing dang 'bras bu me tog nags tshal ji snyed pa/ /de dag thams cad sa las yang dag 'byung zhing 'thon/ /'on kyang sa la zad pa med cing 'phel ba med/ /yongs su mi nyams rnam par mi rtog skyo ba med/ /sangs rgyas sras dang nyan thos rang rgyal lha rnams dang / /'gro ba kun gyi bde skyid chos rnams ji snyed pa/ /de kun shes rab pha rol phyin pa mchog las byung / /shes rab rnams kyang zad pa med cing 'phel ba med/ /sems can tha ma 'bring dang mchog gyur ji snyed pa/ /de kun ma rig las byung bde bar gshegs pas gsungs/ /rkyen rnams tshogs nas sdug bsngal 'khrul 'khor rab tu 'byung / /ma rig 'khrul 'khor 'di ni zad med 'phel ba med/ /ye shes tshul sgo thabs dang rtsa ba ji snyed pa/ /de kun shes rab pha rol phyin pa mchog las byung / rkyen rnams tshogs nas las kyi 'khrul 'khor rab tu 'byung / /shes rab pha rol phyin la zad med 'phel ba med/ /byang chub sems dpa' gang zhig rten cing 'brel 'byung la/ /skye
210b
med zad pa med par shes rab 'di shes te/ /nyi ma sprin med 'od zer 'phro bas mun bsal ltar/ /ma rig thibs po bcom nas rang byung thob par 'gyur/ /mthu chen ldan pa bsam gtan bzhis kyang gnas byed la/ /rten par byed pa ma yin gnas par byed pa med/ /'on kyang bsam gtan yan lag bcas pa bzhi po 'di/ /byang chub dam pa mchog thob pa yi rten du 'gyur/ /shes rab mchog thob bsam gtan dag la gnas pa ni/ /gzugs med ting 'dzin dam pa bzhi yang nyams su myong / /bsam gtan 'di dag byang chub dam pa mchog la phan/ /byang chub sems dpa' zag pa zad phyir slob pa min/ /'di ni yon tan gsog pa'i ngo mtshar rmad byung ste/ /bsam gtan ting nge 'dzin la gnas nas mtshan ma med/ /de la gnas rnams gal te lus ni zhig gyur nas/ /bsam pa ji bzhin 'dod pa'i khams su yang skye'o/ /dper na 'dzam gling mi zhig sngon chad lha yul gyi/ /lha yi grong khyer mchog tu ma phyin phyis song ste/ /de ni yongs su bzung ba'i yul de rnams mthong nas/ /phyir 'dir 'ongs par gyur na chags par mi byed ltar/ /de bzhin byang chub sems dpa' yon tan mchog 'chang ba/ /rnal 'byor brtson te bsam gtan ting 'dzin la gnas nas/ /phyir yang 'dod pa'i khams su gnas te chags pa med/ /chu yi pad+ma bzhin du byis pa'i chos mi gnas/ /bdag nyid chen po sems can yongs
211a
@#/ /su smin bya dang / /zhing sbyang pha rol phyin rdzogs don byed kho nar zad/ /byang chub yon tan pha rol phyin nyams 'gyur 'ong zhes/ /gzugs med khams su skye ba don du gnyer mi byed/ /dper na mi zhig rin chen gter rnams rnyed gyur nas/ /de la 'dod pa'i blo ni bskyed par ma byas la/ /des kyang dus gzhan zhig na de dag yongs bslangs shing / /blangs nas khyim du song ste chags par mi byed ltar/ /de bzhin byang chub sems dpa' mkhas pa dga' ba dang / /bde sbyin bsam gtan ting 'dzin zhi ba bzhi thob nas/ / bsam gtan bde ldan bsam gtan ting 'dzin thob btang ste/ /'gro la snying brtser ldan pa phyir yang 'dod khams 'jug /gal te byang chub sems dpa' ting 'dzin bsam gtan gnas| |dgra bcom rang rgyal theg par 'dod pa'i blo bskyed na/ /mnyam par ma bzhag rgod cing sems g.yengs gyur pa ste/ /sangs rgyas yon tan yongs nyams mnyan pa gru zhig bzhin| |gzhan yang gzugs dang sgra dang de bzhin dri dang ro/ /reg dang 'dod pa'i yon tan lnga la brtson gyur kyang / /dgra bcom rang rgyal theg bral byang chub sems dga' na/ / dpa' bo rtag tu mnyam bzhag yin par shes par bya/ /sems can gang zag gzhan phyir sems pa rnam dag pa/ /brtson 'grus pha rol phyin la mngon brtson rnam par spyod/ /
211b
dper na bran mo chu chun dbang med rje bo'i dbang / /de bzhin dpa' rnams sems can kun gyi dbang gis 'gro /spyod ba byas sam 'on te rtag tu brdeg kyang rung / /bran mo rje bo la ni bzlog tshig mi smra yi/ /'di yis bdag ni bsad par 'gyur du 'ong snyam nas/ /shin tu skrag pa'i yid kyis 'jigs bcas zil gyis gnon/ /de bzhin byang chub ched du byang chub mchog zhugs pa/ /'gro ba kun la bran gyur bzhin du gnas par bya/ /'di las byang chub 'thob cing yon tan rdzogs par 'gyur/ /rtswa dang shing las me byung bas ni de nyid bsreg / bdag gi bde ba btang nas re ba med sems kyis/ /sems can gzhan gyi dgos la nyin mtshan mngon par brtson/ /bu gcig pa la ma ni rim gro byed pa ltar/ /bsam pa thag pas rnam par skyo med gnas par gyis/ /byang chub sems dpa' gang zhig yun ring 'khor 'dod cing / /sems can don dang zhing sbyong brtson pa'i rnal 'byor pa/ /skyo ba'i blo ni rdul tsam skye bar mi 'gyur na/ /de ni brtson 'grus pha rol phyin ldan g.yel ba med/ /byang chub sems dpa' mi mkhas bskal pa bye ba bgrang / /gal te ring bar 'du shes sdug bsngal byang chub sgrub/ /yang dag chos sgrub byed tshe yun ring sdug bsngal 'gyur/ /des na brtson 'grus pha rol phyin nyams le lo can/ /byang chub mchog tu sems bskyed dang po nas bzung ste/ /byang chub bla na med pa
212a
@#/ /thob par gyur gyi bar/ /nyin mtshan gcig tsam du ni yid la sems byed na/ /mkhas pa gsal bas brtson 'grus brtsams par rig par bya/ /gal te 'ga' zhig 'di skad ri rab ri bshig pa'i/ /rjes la byang chub mchog thob 'gyur zhes smra ba las/ /ci ste skyo ba'i blo skyed tshad kyang sems byed na/ /de tshe byang chub sems dpa' le lor gyur pa yin/ /ci ste de ni 'di tsam tshod lta ci dka' zhes/ /skad cig tsam la ri rab thal bar brlag sems bskyed/ /byang chub sems dpa' mkhas pa brtson 'grus brtsams pa ste| |ring por mi thogs 'dren pa'i byang chub mchog thob 'gyur/ /'gro ba yongs su smin par byas nas don bya zhes/ /gal te lus dang ngag dang yid kyis brtson byed na/ / bdag tu 'du shes gnas pas le lor gyur pa ste/ /thams cad mkhyen pa nyid las ring 'gyur gnam sa bzhin/ /gang tshe lus dang sems dang sems can 'du shes med/ /'du shes rnam par log nas gnyis su med chos spyod/ /'di ni byang chub zhi ba mi nyams mchog 'dod pa'i/ /brtson 'grus pha rol phyin ces phan pa mdzad pas gsungs/ /gal te gzhan las ngan brjod tshig rtsub thos gyur na/ /bdag bde yin zhes byang chub sems dpa' mkhas pa dga'/ /su smra sus thos gang gis gang zhig gang gi phyir/ /bzod pa'i pha rol phyin
212b
mchog ldan pa mdzangs pa yin/ /byang chub sems dpa' gang zhig bzod pa'i legs chos ldan/ /gang zhig stong gsum rin chan bkang ste 'jig rten mkhyen/ /sangs rgyas rnams dang dgra bcom rang rgyal phul byas pa/ /sbyin pa'i phung pos de la bsod nams char mi phod/ /bzod la gnas pa'i lus ni yongs su dag 'gyur te/ /sum cu rtsa gnyis mtshan dang mthu stobs pha mtha' yas/ /sems can rnams la chos rab stong pa sgrog par byed/ /'di ni bzod ldan de la 'gro ba dgar 'gyur mkhas/ /gal te sems can la las tsan+dan phur ma blangs/ /rab gus byang chub sems dpa' la ni nyug byed la/ /gzhan zhig me mdag mgo la 'thor byed gnyi ga la/ /de yis mnyam zhing snyoms pa'i yid ni bskyed par bya/ /byang chub sems dpa' mkhas pa de ltar bzod byas nas/ /sems bskyed de ni byang chub mchog tu yongs bsngos na/ /dpa' bo 'jig rten kun la bzod pas dgra bcom dang / /rang rgyal sems can khams mang ji snyed zil gyis gnon/ /bzod byed 'di snyam du yang sems ni bskyed bya ste/ /sems dmyal dud 'gro gshin rje'i 'jig rten sdug bsngal mang / /'dod pa'i yon tan rgyu yis dbang med gnod myong na/ /byang chub ched du ci phyir da gzod mi bya snyam/ /lcag dbyig mtshon dang bsad dang bcing dang brdeg pa dang / /mgo gcod pa dang rna ba rkang lag sna gcod dang / /'jig rten sdug
213a
@#/ /bsngal ji snyed bdag gis bzod snyam pa/ /byang chub sems dpa' bzod pa'i pha rol phyin la gnas/ /tshul khrims kyis ni zhi ba 'dod rnams 'phags par 'gyur/ stobs bcu'i spyod yul gnas shing tshul khrims nyams pa med/ /sdom pa'i bya ba ji snyed kun gyi rjes su 'jug /sems can kun la phan phyir de yang byang chub bsngo/ /gal te rang rgyal dgra bcom byang chub reg 'dod na/ /tshul khrims 'chal zhing mi mkhas de bzhin spyod pa nyams/ /ci ste byang chub zhi ba mchog tu yongs bsngo na/ /'dod yon brtson yang tshul khrims pha rol phyin la gnas/ /chos gang des pa'i byang chub yon tan 'byung 'gyur ba/ /de yi yon tan chos ldan rnams kyi tshul khrims don/ /chos gang phan byed rnams kyi byang chub yongs nyams pa/ /'di ni tshul khrims 'chal ces rnam par 'dren pas gsungs/ /gal te byang chub sems dpa' 'dod yon lnga spyod kyang / /sangs rgyas chos dang 'phags pa'i dge 'dun skyabs song ste/ /sangs rgyas 'grub bya snyam du kun mkhyen yid byed na/ /mkhas pa tshul khrims pha rol phyin gnas rig par bya/ /gal te bskal pa bye bar dge ba'i las lam bcu| |spyod kyang rang rgyal dgra bcom nyid la 'dod bskyed na/ /de tshe tshul khrims skyon byung tshul khrims nyams pa yin/ /sems bskyed de ni phas pham pas kyang shin tu lci/ /tshul
213b
khrims srung zhing byang chub mchog tu yongs bsngo la/ /de yis rlom sems med cing bdag bstod mi byed la/ /nga yi 'du shes sems can 'du shes yongs su spangs/ /byang chub sems dpa' tshul khrims pha rol phyin gnas brjod/ /gal te byang chub sems dpa' rgyal ba'i lam sbyod pa/ /sems can 'di dag khrims ldan 'di dag khrims 'chal zhes/ /sna tshogs 'du shes zhugs ba shin tu tshul khrims 'chal/ /tshul khrims nyams shing de la yongs dag tshul khrims med/ /gang la bdag gi 'du shes sems can 'du shes med/ /'du shes 'dod chags bral la sdom min ga la yod| |gang la sdom dang sdom pa ma yin rlom sems med/ /'di ni tshul khrims sdom par rnam par 'dren pas gsungs/ /sems can dag pa gang zhig de ltar khrims ldan pa/ /sdug dang mi sdug kun la lta ba med pa yin/ /mgo dang rkang lag gtong zhing zhum pa'i sems kyang med/ /bdog pa thams cad gtong zhing rtag tu zhen pa med/ /chos rnams rang bzhin bdag med ya ma brlar shes nas/ /bdag gi sha yang gtong la zhum pa'i sems med na/ /de tshe phyi rol dngos po gtong ba smos ci dgos/ /gal te ser sna byed pa de ni gnas med do/ /bdag tu 'du shes dngos la bdag gir 'dzin pas chags/ /blun po rnams la gtong ba'i blo lta ga la yod/ /ser sna can ni yi dwags gnas su skye bar 'gyur/ /ci ste mir skyes na yang de tshe dbul por 'gyur/ /de tshe
214a
@#/ /byang chub sems dpa' sems can dbul shes nas/ /gtong la mos par 'gyur zhing rtag tu lhug par gtong / /gling bzhi legs par brgyan pa mchil ma'i thal ba 'dra/ /byin nas dga' bar 'gyur gyi gling thob de lta min/ /byang chub sems dpa' mkhas pa gsal ba srid gsum gyi/ /sems can ji snyed de dag kun la sbyin pa 'di/ / byin par gyur cig snyam du sems nas sbyin gyur la/ /de yang 'gro ba'i don phyir byang chub mchog tu bsngo/ /sbyin pa byin nas dngos la gnas par byed pa med/ /de ni nam du'ang rnam par smin la re ba med/ /de ltar gtong ba mkhas pa thams cad gtong ba ste/ /chung ngu btang la mang po dpag tu med par 'gyur/ /srid pa gsum na sems can ma lus ji snyed pa/ / yongs su brtag pa bzung ste de dag thams cad kyis/ /'jig rten mkhyen pa sangs rgyas dgra bcom rang rgyal la/ /bskal pa mtha' yas sbyin byin nyan thos legs tshol na/ /byang chub sems dpa' mkhas pa thabs mkhas gang zhig gis/ /de dag bsod nams bya ba'i dngos la yi rang nas/ /sems can don du byang chub mchog rab yongs bsngo na/ /yongs su bsngo bas 'gro ba thams cad zil gyis gnon/ /nor bu 'ching bu'i phung po chen por gyur pa yang / /rin chen bai DUR+Ya gcig de kun zil gyis gnon/ /de bzhin 'gro kun sbyin pa'i
214b
phung po rgya chen kun/ /rjes su yi rang byang chub sems dpas zil gyis gnon/ /gal te byang chub sems dpas 'gro la sbyin byin nas/ /de la bdag gir mi byed dngos po phangs med na/ /de bas dge ba'i rtsa ba rgya chen 'phel 'gyur te/ /sprin med 'od ldan zla dkyil yar gyi ngo bzhin no/ /byang chub sems dpa'i sbyin pas yi dwags 'gro ba gcod/ /dbul ba dang ni de bzhin nyon mongs thams cad gcod/ /spyod tshe longs spyod mtha' yas rgyas pa thob par 'gyur/ /sbyin pas sdug bsngal gyur ba'i sems can yongs smin byed/ /khrims kyis dud 'gro'i 'gro ba du ma'i ngo bo dang / /mi kho ma brgyad spong de yis dal ba rtag tu rnyed/ /bzod pas gzugs bzang dam pa rgya chen thob 'gyur te/ /gser mdog sdug cing 'gro bas blta ba'i 'os su 'gyur/ /brtson 'grus kyis ni dkar po'i yon tan 'grib mi 'gyur/ /ye shes mtha' yas rgyal ba'i bang mdzod rnyed par 'gyur/ /bsam gtan gyis ni 'dod pa'i yon tan smad pa 'dor/ /rig dang mngon par shes dang ting 'dzin mngon par sgrub/ /shes rab kyis ni chos kyi rang bzhin yongs shes nas/ /khams gsum ma lus pa las yang dag 'da' bar 'gyur/ /mi yi khyu mchog 'khor lo rin chen bskor byas nas/ /sdug bsngal zad par bya phyir 'gro la chos kyang ston/ /chos 'di yongs rdzogs byas nas byang chub sems dpa' de/ /yongs dag zhing dang sems can dag pa yongs su
215a
@#/ /'dzin| |sangs rgyas rgyud dang chos kyi rgyud kyang yongs su 'dzin/ /de bzhin dge 'dun rgyud dang chos kun yongs su 'dzin/ /'gro ba'i nad gso mdzad pa sman ba'i mchog gyur pas/ /shes rab bstan pa byang chub lam ldan 'di gsungs te/ /ming ni yon tan rin chen sdud pa byang chub lam/ /lam 'di sems can kun gyis thob par bya phyir bshad/ /'phags pa shes rab kyi pha rol tu phyin pa sdud pa tshigs su bcad pa rdzogs so// //rgya gar gyi mkhan po bid+ya ka ra sid+ha dang / bod kyi lo tsA ba ban+d+he dpal brtsegs kyis bsgyur cing zhus te gtan la phab pa'o//