@##/ /rgya gar skad du/ AR+Ya many+dzu shrI pa ri pr-its+tshA nA na ma ma hA yA na sU tra/ bod skad du/ 'phags pa 'jam dpal gyis dris pa zhes bya ba theg pa chen po'i mdo/ bam po gcig go /sangs rgyas dang / byang chub sems dpa' thams cad la phyag 'tshal lo| |'di skad bdag gis thos pa dus gcig na/ bcom ldan 'das mnyan du yod 2a @##/ /pa'i kun nas mdzes pa'i khang pa na/ dge slong brgya phrag phyed dang bcu gsum gyi dge slong gi dge 'dun chen po dang / dpag tu med pa'i byang chub sems dpa' sems dpa' chen po dang / 'dul ba brgya stong mang po dang / spyan ras gzigs dbang po la sogs pa byang chub sems dpa' sems dpa' chen po rnams dang thabs gcig tu bzhugs te/ bcom ldan 'das rin po che'i seng ge'i khri la sku mi g.yo bar bzhugs pa dang / de nas byang chub sems dpa' sems dpa' chen po 'jam dpal sangs rgyas kyi 2b mthus stan las langs te/ bla gos phrag pa gcig tu byas nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar nas/ bcom ldan 'das la 'di skad ces gsol to/ /bcom ldan 'das/ bsod nams chen po gang gis 'dul ba bye ba khrag khrig brgya stong du ma'i bsam pa yongs su rdzogs par 'gyur ba de bzhin gshegs pa'i chos kyi drung du 'gyur ba'i bsod nams chen po de ji snyed tshad ji tsam lags/ de skad ces gsol pa dang / bcom ldan 'das kyis byang chub sems dpa' sems dpa' chen po 'jam dpal la 'di skad ces bka' stsal to/ /'jam dpal/ bsod nams chen po gang gis 'dul ba bye ba khrag khrig brgya stong gi bsam pa yongs su rdzogs par byed pa de bzhin gshegs pa'i chos kyi drung du 'gyur ba'i bsod 3a @##/ /nams chen po de ni/ shes rab las byung ba snying rje chen pos yongs su bsgos pa yin te/ bsam gyis mi khyab po| |'jam dpal/ dzam+bu'i gling gi sems can ji snyed pa de dag thams cad dge ba bcu'i las kyi lam dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de brgyar bsgyur bas gling bzhi la dbang ba rin po che bdun dang ldan pa'i 'khor los bsgyur ba'i rgyal por 'gyur te/ de'i rin po che bdun/ 'di lta ste/ 'khor lo rin po che dang| glang po rin po che dang / rta rin po che dang / nor bu rin po che dang / bud med rin po che dang / khyim bdag rin po che dang / blon po rin po che dang 'di bdun 'byung ngo / /de la bu stong dpa' ba/ rtul phod pa/ yan lag mchog gi gzugs dang ldan pa/ pha rol gyi sde 3b rab tu 'joms pa rnams yod de/ 'jam dpal/ de ltar 'khor los bsgyur ba'i rgyal po de rdzu 'phrul che zhing mthu che ba yin no/ /'jam dpal/ gling bzhi pa'i 'jig rten gyi khams kyi sems can ji snyed pa de dag thams cad 'khor los bsgyur ba'i bsod nams kyi phung po dang ldan par 'gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de brgyar bsgyur bas brgya byin lha'i dbang por 'gyur te/ de ltar lha'i dbang po ni rdzu 'phrul che zhing mthu che'o/ /'jam dpal/ gling bzhi pa'i 'jig rten gyi khams kyi sems can ji snyed pa de dag thams cad brgya byin gyi bsod nams kyi phung po dang ldan par 'gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de brgya stong du bsgyur bas gang 'dod pa'i khams su bstan pas go bar byed pa 'dod pa'i khams kyi dbang po bdud du 'gyur te/ de ltar 'dod pa'i khams kyi dbang po bdud ni rdzu 'phrul che zhing mthu che'o/ /'jam dpal/ gling bzhi pa'i 'jig rten gyi khams na sems can ji snyed pa de dag thams cad ba dud kyi bsod nams kyi phung po dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de brgya stong du bsgyur bas 4a @#/ /gang 'jig rten gyi khams stong byams pas khyab pa stong gi bdag po tshangs par 'gyur ro/ /'jam dpal/ stong gi 'jig rten gyi khams na sems can ji snyed pa de dag thams cad stong gi bdag po tshangs pa'i bsod nams dang ldan par gyur la/ gang sems can de dag thams cad kyi bsod nams su gyur pa'i bsod nams kyi phung po de brgya stong du bsgyur bas gang stong gnyis kyi 'jig rten gyi khams byams pas khyab pa stong gnyis kyi bdag po tshangs par 'gyur ro/ /'jam dpal/ stong gnyis kyi 'jig rten gyi khams na sems can ji snyed pa de dag thams cad stong gnyis kyi bdag po tshangs pa'i bsod nams kyi phung po dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de brgya stong du bsgyur bas/ gang stong gsum gyi stong chen po'i 'jig rten gyi khams byams pas khyab pa tshangs pa stong gsum gyi stong chen po'i 'jig rten gyi bdag po dbang phyug chen po'i mchog tu 'gyur ro/ /'jam dpal/ tshangs pa dbang phyug chen po mchog la ltos/ nam bskal pa 'jig pa na bskal pa'i chu 'byung ba de'i tshe/ phyis bar gyi bskal ba gcig tu char 'bab cing chu'i thigs pa 'byung ba des stong gsum gyi 4b stong chen po'i 'jig rten gyi khams chus gang bar byed de/ tshangs pa'i 'jig rten gyi bar du chus gang bar 'gyur ba'i chu'i thigs pa de dag thams cad kyang tshangs pa dbang phyug chen po'i mchog des shes so/ /de ltar ye shes chen po dang ldan zhing rdzu 'phrul che zhing mthu che ba yin te/ dge ba'i rtsa ba chung dus ni dbang phyug chen por mi 'gyur ro/ /'jam dpal/ stong gsum gyi stong chen po'i 'jig rten gyi khams na sems can ji snyed pa de dag thams cad stong gsum gyi stong chen po'i bdag po tshangs pa chen po'i bsod nams kyi phung po dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de bye ba khrag khrig brgya stong du mar bsgyur bas mthu chen po thob pa'i rang sangs rgyas su 'gyur ro/ /'jam dpal/ stong gsum gyi stong chen po'i 'jig rten gyi khams lta re zhig zhog ste/ 'jam dpal/ sangs rgyas kyi yul gyi mtha' phyogs bcu'i 'jig rten gyi khams na sems can ji snyed pa de dag thams cad rang sangs rgyas mthu chen po thob pa'i bsod nams dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de bye ba khrag khrig brgya stong du mar bsgyur bas byang chub sems dpa' srid pa'i tha mar gyur pa gcig tu 'gyur ro// 5a @#/ /'jam dpal/ nam mkha'i khams kyi mtha' phyogs bcu'i 'jig rten gyi khams na sems can sgo nga las skyes pa dang / mngal nas skyes pa dang / drod gsher las skyes pa dang / rdzus te skyes pa dang / gzugs yod pa dang / gzugs med pa dang / 'du shes yod pa dang| 'du shes med pa dang / 'du shes med 'du shes med min gyi sems can ji snyed pa de dag thams cad byang chub sems dpa' srid pa'i tha mar gyur pa'i bsod nams kyi phung po dang ldan par gyur la/ gang sems can de dag thams cad kyi bsod nams kyi phung por gyur pa'i bsod nams kyi phung po de bye ba khrag khrig brgya stong du mar bsgyur bas de bzhin gshegs pa'i sku la spu'i khung bu gcig tu 'gyur ro/ /de bzhin du de bzhin gshegs pa'i sku la spu'i khung bu brgya stong phrag dgu bcu rtsa dgu re re nas 'grub par 'gyur te/ 'jam dpal/ gang spu'i khung bu thams cad du gtogs pa'i bsod nams kyi phung por gyur pa'i bsod nams kyi phung po de bye ba khrag khrig brgya stong du mar bsgyur bas de bzhin gshegs pa'i sku la dpe byad bzang po gcig tu 'gyur ro/ /de bzhin du de bzhin gshegs pa'i sku la dpe byad bzang po brgyad cu re re nas 'grub par 'gyur te/ 'jam dpal/ dpe byad bzang po 5b po brgyad cur gtogs pa'i gang bsod nams kyi phung po ji snyed pa'i bsod nams kyi phung po de bye ba khrag khrig brgya stong du mar bsgyur bas de bzhin gshegs pa'i phyag gam zhabs gcig ri mo'i rjes kyi mtshan du 'gyur ro/ /de ltar ri mo'i rjes kyi mtshan brgyad cu la 'di lta ste/ gdugs dang / rgyal mtshan dang / dpal be'u dang / phreng ba dang / kyo ba thang dang / cod pan dang / dbyig to dang / bum pa dang / glang po dang / rta dang / stag dang / chu srin dang / nya dang / rus sbal dang / rma bya dang / ka la ping+ka dang / shang shang te'u dang / tsa sha dang / dur pa dang / ne tso dang / ngang pa dang / thi ba dang / nas dang / sman chen po dang / 'od ma dang / ba men dang / klu dang / ra dang / khyu mchog dang / ri dang / bil pa dang| shing dang / ri dwags nag po dang / nor bu rin po che dang / ral gri mchog dang / rdo rje dang / gzhu dang / mda' dang / shak+ti dang / mdung rtse gsum pa dang / gshol dang| gtun dang / sta re dang / zhags pa dang / gru dang / mu tig gi rgyan dang / sprin dang / tshangs pa dang / dbang po dang / 'khor srung po dang / chu'i lha dang / 'phags skyes po dang / mig mi bzang dang / nor sbyin dang / drang srong chen po dang / dpal dang / nyi ma dang / zla ba dang / me dang / rlung dang / pad+mo dang / g.yung drung dang / gru gsum dang / 6a @#/ /dge ba'i stan dang / me long dang / rnga yab dang / rtswa dur pa dang / pu ro da sha dang / khye'u dang / bu mo dang / rnga dang / dur dang / smri ga dang / gdu bu dang / dpung rgyan dang / rna cha dang / sor gdub dang / rna cha phyang phrul can dang / me tog bzang po dang / dpag bsam gyi shing dang / 'khor lo dang / dpung gi seng ge dang / 'di rnams ni ri mo'i rjes kyi mtshan brgyad cu yin te/ 'di dag ni de bzhin gshegs pa'i phyag dang / zhabs kyi mthil las byung ngo / /'jam dpal/ gang mtshan brgyad cu'i ri mor gtogs pa'i bsod nams kyi phung por gyur pa'i bsod nams kyi phung po de bye ba khrag khrig brgya stong du mar bsgyur bas de bzhin gshegs pa'i sku la skyes bu chen po'i mtshan gcig tu 'gyur te/ de bzhin du skyes bu chen po'i mtshan sum cu rtsa gnyis re rer 'gyur ro/ /'di lta ste/ dbu'i gtsug tor dang / dbu'i mthon mthing la g.yas phyogs su 'khyil ba dang / dpral ba mnyam pa dang / kha dog gis brgyan pa dang / smin mtshams kyi mdzod spu dang / spyan mthon mthing la ba'i rdzi ma 'dra ba dang / so bzhi bcu thags bzang ba dang / mche ba dkar ba dang / 'gram pa seng ge'i 'dra ba dang / lce che zhing srab pa dang / ro stod seng ge 'dra ba dang / shing n+ya gro d+ha 6b ltar chu zheng gab pa dang / spu khung re re nas skyes pa dang / pho mtshan mi snang bar nub pa dang / brla gang zhing zlum pa dang / byin pa ri dwags kyi rgyal po e na ya 'dra ba dang / zhabs kyi rting pa che ba dang / zhabs dang / phyag gi mthil 'jam zhing mnyen pa dang / zhabs dang / phyag gi sor mo'i bar dra bar 'brel ba dang / zhabs dang / phyag gi ser mo ring ba dang / zhabs kyi steng mtho ba dang / ro bro ba'i mchog dang / dpung mgo zlum pa dang / bdun mtho ba dang / pags pa srab la gser gyi mdog 'dra ba dang / ma btud pa phyag pus mo'i lha nga la reg pa dang / zhabs rab tu gnas pa dang / zhabs dang / phyag gi mthil na 'khor lo'i mtshan yod pa dang / tshangs pa'i dbyangs dang / 'di dag ni skyes bu chen po'i mtshan sum cu rtsa gnyis yin te/ de bzhin gshegs pa'i sku las 'byung ngo / /'jam dpal/ skyes bu chen po'i mtshan sum cu rtsa gnyis su gtogs pa'i bsod nams kyi phung por gang gyur pa'i bsod nams kyi phung po de grangs med par bsgyur ba dang / bsam gyis mi khyab par bsgyur ba dang / dpag tu med par bsgyur ba dang / brjod du med par bsgyur bas de bzhin gshegs pa'i chos kyi dung du 'gyur ro/ /chos kyi dung des 'dul ba'i dbang du de bzhin gshegs pas 'jig rten gyi khams tshad med grangs med par dbyangs kyis rig par byed do/ /dbyangs 7a @#/ /kyis ji lta ba de bzhin du 'od dang / skus kyang de bzhin no/ /'jam dpal/ de ltar shes rab chen po las byung ba/ snying rje chen pos yongs su bsgos pa/ thabs mkhas pa dang / smon lam gyis bskyed pa/ tshul khrims yongs su dag pa bsgoms pa'i khyad par las yang dag par skyes pa/ bsod nams chen po 'di dag ni nyan thos dang / rang sangs rgyas thams cad kyis bsam gyis mi khyab bo/ /'jam dpal/ rgyu gnyis kyis de bzhin gshegs pa'i gzugs kyi sku khyad par du 'phags pa yin no/ /rgyu gnyis gang zhe na/ smon lam gyi dbang dang / 'dul ba'i sems can rnams kyi dge ba yongs su smin pa'i dbang ste/ 'jam dpal/ rgyu de gnyis kyis na de bzhin gshegs pa'i gzugs kyi sku khyad par du 'phags pa yin no/ /'jam dpal/ de bzhin gshegs pa'i gzugs kyi sku khyad par du 'phags pa ji lta ba de bzhin du chos bstan pa'ang khyad par du 'phags pa yin no/ /'jam dpal/ de bzhin gshegs pa'i chos bstan pa ji lta ba de bzhin du 'od kyang khyad par du 'phags pa yin no/ /'jam dpal/ ji ltar de bzhin gshegs pa'i 'od khyad par du 'phags pa de bzhin du spyod pa'ang khyad par du 'phags pa yin no/ /'jam dpal/ de bzhin gshegs pa ni skus 'jig 7b rten thams cad du khyab pa yin te/ 'jam dpal/ kha dog dang / dbyibs dang / spyod pa'i bye brag gang dang / gang gis sems can rnams 'dul bar 'gyur ba'i kha dog dang / dbyibs dang / spyod pa'i bye brag de dang / de lta bur de bzhin gshegs pa sems can rnams kyis mthong ngo / /'jam dpal/ mtshan gyi bye brag gang dang / gang gis sems can rnams 'dul bar 'gyur ba'i mtshan gyi bye brag de dang / de lta bur de bzhin gshegs pa sems can rnams kyis mthong ngo / /'jam dpal/ chos bstan pa gang dang / gang gis sems can rnams yongs su smin par 'gyur ba'i chos bstan pa de dang / de lta bur de bzhin gshegs pa chos bstan par sems can rnams kyis shes so/ /'jam dpal/ spyod pa gang gis sems can rnams de bzhin gshegs pa'i bstan pa la 'jug pa dang / 'dul bar 'gyur ba'i spyod pa de dang /de la de bzhin gshegs pa gnas par sems can gyis mthong ngo / /'jam dpal/ de bzhin du de bzhin gshegs pa dgra bcom pa yang dag par rdzogs pa'i sangs rgyas 'jig rten du 'byung bar 'gyur ba'ang skye bo mang po la phan pa dang| skye bo mang po la bde ba dang / 'jig rten la snying brtse ba dang / lha dang / mi rnams dang / skye bo phal bo che'i don dang / phan pa dang / bde ba'i phyir skye'o/ /de nas byang chub sems dpa' 'jam 8a @#/ /dpal stan las langs te/ bcom ldan 'das ga la ba de logs su thal mo sbyar nas bcom ldan 'das la 'di skad ces gsol to/ /bcom ldan 'das/ bdag gi ston pa mi mnyam pa dang mnyam pa dang / gang zag zla med pa/ khams gsum na mgon po'i mchog /sems can thams cad la phan par mdzad pa/ 'jig rten gyi chos kyis mi bskyod pa/ nam mkha' ltar mi gos pa/ bsam gyis mi khyab pa/ bsam par 'os pa/ blta 'dod pa/ blta na sdug pa 'di 'dra ba ni bdag gis rnyed pa rab tu rnyed do/ /bde bar gshegs pa/ rnyed pa rab tu rnyed do/ /bcom ldan 'das kyis de skad ces bka' stsal nas 'jam dpal gzhon nur gyur pa dga'o/ /byang chub sems dpa' sems dpa' chen po de dag dang / dge slong de dag bcom ldan 'das kyis bshad pa la mngon par bstod do/ /'phags pa 'jam dpal gyis dris pa zhes bya ba theg pa chen po'i mdo rdzogs so// |