//rgya gar skad du/ AR+Ya k+She ma ba tI byA ka ra Na nA ma ma hA yA na sU tra/ bod skad du/ 'phags pa bde ldan ma lung bstan pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong nyi khri'i dge slong gi dge 'dun chen po dang / byams pa dang / 'jam dpal 386b la sogs pa byang chub sems dpa' sems dpa' chen po rab tu mang po dang thabs gcig tu bzhugs so/ /de nas bcom ldan 'das snga dro'i dus kyi tshe chos gos dang / sham thabs gsol te/ lhung bzed bsnams nas byang chub sems dpa' sems dpa' chen po byams pa dang thabs gcig tu rgyal po'i khab kyi grong khyer chen por bsod snyoms la gshegs so/ /de nas bcom ldan 'das rgyal po'i khab kyi grong khyer du mthar chags kyis bsod snyoms rgyu zhing rgyal po gzugs can snying po'i pho brang ga la ba der gshegs so/ /de nas rgyal po gzugs can snying po'i btsun mo bde ldan ma zhes bya ba khang bzang mchog gi steng na 'dug pas bcom ldan 'das thag ring po nas gshegs pa mthong ngo / /mthong nas kyang sems dga' bar gyur te/ khang bzang gi steng nas babs nas/ bcom ldan 'das dang / byang chub sems dpa' sems dpa' chen po byams pa'i gdan dar dkar rin che ba bting ngo / /de nas bcom ldan 'das dang / byang chub sems dpa' sems dpa' chen po byams pa gdan bshams pa la bzhugs so/ /de nas rgyal po'i btsun mo bde ldan ma lus rgyan thams cad kyis brgyan pas bcom ldan 'das dang / byang chub sems dpa' sems dpa' chen po byams pa'i zhabs la 387a @#/ /mgo bos phyag btsal nas chos mnyan pa'i phyir zhes dang bcas/ gus pa dang bcas pas bcom ldan 'das kyi spyan sngar 'dug go /de nas bcom ldan 'das kyis rgyal po'i btsun mo bde ldan ma lus rgyan thams cad kyis brgyan pa la gzigs nas sems can thams cad la phan pa'i phyir mkhyen bzhin du rgyal po'i btsun mo bde ldan ma la bka' stsal pa/ bde ldan ma/ gang lus la thogs pa'i 'bras bu 'di lta bu shin tu lham me/ lhan ne/ lha nger 'dug pa'i shing de'i ming ci zhes bya/ de skad ces bka' stsal pa dang / bcom ldan 'das la rgyal po'i btsun mo bde ldan mas tshigs su bcad de gsol pa/ gang gi 'bras bu khyod thogs pa// shing de'i ming ni ci yin zhes/ /dpa' bo chen po mkhyen bzhin du/ /gang zag mchog gis smras pa ni/ /bdag gis sngon ni gang bskyed pa/ /bsod nams las byung shing zhes bgyi/ /'dren pa bdag gis myong ba yi/ /'bras bu de dag de yi lags/ /ljon shing bshad pa de nyid kyang / /sangs rgyas nyan thos rnams la yod/ /sangs rgyas ye shes 'thob 'dod rnams/ /byang chub phyir ni de la gnas/ /sbyin dang tshul khrims chab stsal bas/ /ljon shing de ni rnam par bsrung / /de ni rnam par 'khrungs 387b pa na/ /'bras bu bzang po rnams kyang 'byung / /bzod pa dang ni brtson 'grus mthus/ /ljon shing bdag gis legs par bsrungs/ /de ni rnam par 'khrungs pa na/ / 'bras bu dri med 'byung bar 'gyur/ /shing 'di blta na mdzes pa ste/ /bsam gtan shes rab me tog rgyas/ /'dren pa bdag gis de dag gi /'bras bu rnams ni myong ba lags/ /ji ltar ri la brten pa yi/ /shing rnams yal ga lo ma dag /chu zheng gab par rgya che ba/ /'phel bar gyur te bskyod mi nus/ /de bzhin ljon shing che bzang 'di/ /sangs rgyas chos nyid 'tshal bas na/ /sems can kun la phan pa'i phyir/ /sngon ni legs par bsrungs pa lags/ /'dren pa bsod nams ljon shing 'di'i/ /'bras bu gzhan yang mchis lags te/ /bdag gis nyams su myong ba 'di/ /de yi me tog tsam du bas/ /de yi 'bras bu byang chub mchog /sangs rgyas byang chub bla med lags/ /de ni bdag gis thob par 'gyur/ /smad pa bud med nyid spangs nas/ /skyes par bdag nyid 'gyur ba lags/ /sems can kun gyi dam pa mchog /chos rnams kun gyi pha rol phyin// thams cad mkhyen pa thams cad gzigs/ /sdug bsngal kun gyi nyen pa yi/ /sems can rnams ni bdag gis dgrol/ /'jig rten kun la snying brtse ba'i/ /skyabs su 388a @#/ /bdag ni 'gyur ba lags/ /de skad ces gsol ba dang / bcom ldan 'das kyis rgyal po'i btsun mo bde ldan ma la bka' stsal pa/ bde ldan ma| gang khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo phal po che'i tshogs kyi don dang / lha rnams dang / mi rnams la phan pa dang / bde ba'i phyir zhugs pa legs so/ /legs so/ /de skad ces bka' stsal pa dang / bcom ldan 'das la rgyal po'i btsun mo bde ldan mas 'di skad ces gsol to/ /bcom ldan 'das/ bcom ldan 'das kyi sku la skyes bu chen po'i mtshan sum cu rtsa gnyis dang / dpe byad bzang po brgyad cu dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / sangs rgyas kyi chos ma 'dres pa bco brgyad dang / byams pa chen po dang / snying rje chen po dang / dga' ba chen po dang / btang snyoms chen po 'di rnams ci las grub lags/ de bzhin du gzhan yang sangs rgyas kyi chos dpag tu ma mchis pa dang / bsam gyis mi khyab pa dang / gzhal du ma mchis pa dang / brjod du ma mchis pa dang / bgrang ba las 'das pa rnams ci las grub lags/ de skad ces 388b gsol pa dang / bcom ldan 'das kyis rgyal po'i btsun mo bde ldan ma la tshigs su bcad de bka' stsal pa/ sangs rgyas ye shes 'dod pas na/ /sems can kun la phan pa'i phyir/ /ngas kyang 'di ltar ljon pa'i shing / /sngon ni legs pa kho nar bskyed/ /sbyin dang tshul khrims bzod pa dang / /de bzhin brtson 'grus bsam gtan bsags/ /yun ring dus nas ting 'dzin dang / /shes rab nges par bsten pa yin/ /sems can rnams la mi mnyam sems/ /ngas ni bsgoms par mi dran te/ /rtag tu sems ni mnyam gyur pas/ /sangs rgyas nyid ni ngas brnyes so/ /nga yi sems ni mnyam pa yi/ /rtag tu sdug dang mi sdug dang / /mdza' dang mi mdza' snyoms pas na| |bsod nams shing ni rnam par bskyed/ /des na ljon shing chen po 'di/ /yon tan mang por gyur pa yin/ /'khor los bsgyur nyid ngas thob ste/ /brgya byin nyid kyang byas pa yin/ /rnam mang dbang phyug chen po dang / /tshangs pa nyid kyang de las thob/ /bsam gyis mi khyab sangs rgyas chos/ /chos nyid dag kyang ngas rtogs so/ /de nas rgyal po'i btsun mo bde ldan mas bcom ldan 'das kyi yon tan rnams thos nas/ bcom ldan 'das kyis legs par rab tu gsungs pa la mngon par bstod de rjes 389a @#/ /su yi rangs nas bcom ldan 'das la tshigs su bcad de gsol pa/ /ji ltar mi mchog dam pa po/ /yon tan rgya mtsho mtha' yas pas/ / sngon ni spyod pa shin tu bslabs/ /de ltar bdag kyang rjes su slob/ /yon tan mthar phyin khyod kyi ni/ /yon tan rnams ltar bdag slob ste/ /srid par sdug bsngal spangs nas ni/ /bdag kyang 'di 'drar 'gyur bar bgyi/ /tshe rabs gzhan ni ma lus par/ /bdag gis sbyin pa gang stsal pa/ /mnyam med ye shes mthong slad du/ /de dag thams cad yongs su bsngo/ /srid pa 'di'am gzhan dag tu/ /bdag gis tshul khrims gang bsrungs pa/ /sangs rgyas ye shes 'thob slad du/ /de dag thams cad yongs su bsngo// bzod dang brtson 'grus ting 'dzin dang / /shes rab dge ba gang bsten pa/ /sangs rgyas chos kyi don gyi phyir/ /de dag thams cad bdag gis bsngo/ /lus dang ngag dang yid rnams kyis/ /las dge ba gang bdag gis bsags/ /sangs rgyas ye shes yon tan phyir/ /byang chub tu ni bdag gis bsngo/ /bud med lus 'di spangs nas ni/ /skyes pa mchog tu bdag gyur cig /de ltar skyes pa'i lus thob nas/ /dam pa'i mchog tu bdag gyur cig /de ltar gyur nas bde gshegs kyi/ /'khor lo bla med bskor bar bgyi// 389b 'khor ba'i btson rar bcings pa yi/ /sems can bye ba dgrol bar bgyi/ /de nas bcom ldan 'das kyis rgyal po'i btsun mo bde ldan ma la tshigs su bcad pa dag gis legs so zhes bya ba byin te/ tshig 'di smras pa legs pa yin/ /sems ni rab tu sdom pa legs/ /khyod kyis bdud ni legs par mnan/ /rdzogs sangs rgyas su khyod 'gyur ro/ /de nas rgyal po'i btsun mo bde ldan ma dga' zhing mgu la rab tu dga' ba dang / dga' zhing yid bde ba skyes nas bcom ldan 'das dang / byang chub sems dpa' byams pa bza' ba dang / bca' ba mang pos tshim par byas so/ /de nas bcom ldan 'das bstsang sder ni gyu/ phyag ni bcabs nas rgyal po'i btsun mo bde ldan ma la chos kyi gtam rgyas par yang dag par bstan/ yang dag par 'dzin du bcug /yang dag par gzengs bstod/ /yang dag par rab tu dga' bar mdzad nas lung bstan te/ bde ldan ma/ khyod ma 'ongs pa'i dus bskal pa du ma zhig na de bzhin gshegs pa dgra bcom pa yang dag par rdzogs pa'i sangs rgyas lha dang / mi rnams kyi ston pa/ sangs rgyas bcom ldan 'das yon tan rin chen dpal zhes bya bar 'gyur ro/ /khyod kyi sangs rgyas kyi zhing yang mchog tu yongs su dag par 'gyur te/ ngan song ngan 'gro log par 390a @#/ /ltung ba'i sdug bsngal med pa/ yid du 'ong ba/ yid dang 'thad pa/ mchog tu rnam par dag pa'i byang chub sems dpa' rnams kyi gnas yin te/ khyod kyi sangs rgyas kyi zhing de ni de lta bur 'gyur ro/ /chos kyi rnam grangs 'di bshad pa na dge bsnyen ma stong phrag mang po zhig gis ni bla na med pa yang dag par rdzogs pa'i byang chub tu sems bskyed do/ /srog chags stong phrag mang po dang / lha dang / mi'i skye dgu rnams kyis ni chos kyi snang ba thob par gyur to/ /bcom ldan 'das kyis de skad ces bka' stsal nas/ rgyal po'i btsun mo bde ldan ma dang / 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa bde ldan ma lung bstan pa zhes bya ba theg pa chen po'i mdo rdzogs so// // |