//rgya gar skad du/ A R+Ya a mr-i ta byA ha ran nA ma ma hA yA na sU tra/ bod skad du/ 'phags pa bdud rtsi brjod pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na 'od ma'i tshal bya ka land ka gnas pa na dge slong lnga brgya tham pa'i dge 'dun chen po dang thabs gcig tu bzhugs te/ byang chub sems dpa' bdun khri nyis stong gi byang chub sems dpa'i dge 'dun chen po dang yang thabs gcig go /de'i tshe byang chub sems dpa' sems dpa' chen po byams pa zhes bya ba 'khor de nyid du 'dus par gyur te 'dug go /de nas byang chub sems dpa' sems dpa' chen po byams pa stan las langs te bla gos phrag pa gcig tu gzar nas pus mo g.yas pa'i lha ngas la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bdag la skabs dbye bar gnang na/ bcom ldan 'das de bzhin gshegs pa dgra bcom pa yang dag par rdzogs pa'i sangs 429a @#/ /rgyas la bdag phyogs 'ga' zhig zhu bar 'tshal lo/ /bcom ldan 'das kyis bka' stsal pa/ byams pa/ de bzhin gshegs pa khyod la rtag tu skabs phye yi/ byams pa/ khyod ci dang / ci 'dod pa de bzhin gshegs pa dgra bcom pa yang dag par rdzogs pa'i sangs rgyas la dris shig dang / dris pa de dang| de'i lung bstan pas ngas khyod kyi sems rangs par bya'o/ /de skad ces bka' stsal pa dang / bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das/ byang chub sems dpa' sems dpa' chen po rnams chos du dag dang ldan na bdud kyi ris thams cad kyi sa bgegs bgyid par mi 'gyur ba dang / bdud kyi 'khor thams cad kyis 'da' bar bgyi ba ma lags pa dang / sems can rnams la snying brtse ba'i slad du tshe ring du skyong bar bgyid pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur lags/ de nas bcom ldan 'das kyis byang chub sems dpa' sems dpa' chen po byams pa la legs so zhes bya ba byin te/ byams pa/ legs so/ /legs so/ /byams pa/ khyod skye bo mang po la phan pa'i phyir zhugs 429b te| skye bo mang po la bde ba dang / 'jig rten la snying brtse ba dang| lha dang / mi rnams kyi skye bo phal po che'i don dang / phan pa dang / bde ba'i phyir de bzhin gshegs pa dgra bcom pa yang dag par rdzogs pa'i sangs rgyas la don 'di 'dri bar sems pa khyod yang legs so/ /de'i phyir byams pa khyod legs par rab tu nyon la yid la zungs shig dang ngas bshad do/ /byang chub sems dpa' sems dpa' chen po byams pas de ltar 'tshal lo zhes gsol te/ bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /byams pa/ byang chub sems dpa' sems dpa' chen po rnams chos lnga dang ldan na bdud kyi ris thams cad kyi bgegs bya bar mi 'gyur ba dang / bdud kyi 'khor thams cad kyis 'da' bar bya ba ma yin pa dang / sems can la snying brtse ba'i phyir tshe ring du skyong bar byed pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /lnga po dag gang zhe na/ 'di lta ste/ rgyun mi 'chad par chos sbyin pa dang / rgyun mi 'chad par sems can thams cad la mi 'jigs pa sbyin pa dang / rgyun mi 'chad par byams pa chen po dang / snying rje chen po dang / dga' ba chen po dang / btang snyoms chen po bsgom pa 430a @#/ /dang| rgyun mi 'chad par mchod rten rnying pa bcos pa dang / rgyun mi 'chad par sems can thams cad byang chub kyi sems la mos par bya ba ste/ byams pa| byang chub sems dpa' sems dpa' chen po rnams chos lnga po de dag dang ldan na bdud kyi ris thams cad kyis bgegs bya bar mi 'gyur ba dang / bdud kyi 'khor thams cad kyis 'da' bar bya ba ma yin pa dang / sems can rnams la snying brtse ba'i phyir tshe ring du skyong bar byed pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /bcom ldan 'das kyis chos lnga bstan pa 'di bshad pa na dge slong lnga stong ni len pa med pa zag pa rnams las sems rnam par grol lo/ /byang chub sems dpa' bdun khri nyis stong ni mi skye ba'i chos la bzod pa thob par gyur to/ /lha'i bu brgyad khri bzhi stong ni chos rnams la chos kyi mig rdul med cing dri ma dang bral ba nyon mongs pa med pa rnam par dag go /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das/ bdag spobs lags so/ /bde bar gshegs pa/ bdag spobs lags so/ /bcom ldan 'das kyis bka' stsal pa/ rigs 430b kyi bu| da de'i dus la bab par shes na'o/ /de nas byang chub sems dpa' sems dpa' chen po byams pa/ bcom ldan 'das kyis gnang ba de'i tshe stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /sems can 'dod chags dang / zhe sdang dang / gti mug thams cad kyi bro nad can/ lta ba thams cad kyi rab rib dang / ling tog gi mun pas bsgribs pa thams cad kyis nyon mongs pa thams cad kyi bro nad gso ba dang / chos kyi mig bla na med pa yongs su sbyang ba'i slad du/ bcom ldan 'das/ chos kyi rnam grangs bstan pa 'di ni a la la rmad du byung ba chen po lags so/ /bcom ldan 'das/ chos kyi rnam grangs bstan pa 'di ni a la la bdud rtsi chen po lags so/ /bcom ldan 'das/ chos kyi rnam grangs bstan pa 'di ni a la la sman pa'i rgyal po chen po lta bu lags so/ /tha na dud 'gro'i skye gnas su skyes pa'ang rung ste/ gang dag gi rna lam du chos kyi rnam grangs 'di grag par gyur pa de dag ni dge ba'i rtsa ba chen po'i tshogs bsags pa dag ste/ sems can thams cad las khyad par du 'phags pa lags/ sangs rgyas thams cad la 431a @#/ /lta ba dang ldan pa lags/ skye bo mang po la lhag par bgyi ba bgyis pa lags/ dge ba'i rtsa ba bskrun pa lags so/ /de dag las kyi sgrib pa de yongs su dag nas dud 'gro'i yul de las yongs su thar te mi'i lus thob par 'gyur zhing / thob nas kyang tshe rabs snga ma dran te/ de bzhin gshegs pa'i bstan pa la dad pa rnyed nas sangs rgyas kyi zhing gang dang gang du skye bar 'tshal ba de dang / der skye bar 'gyur na/ mir gyur nas thos pa rnams lta smos kyang ci 'tshal/ bcom ldan 'das/ chos kyi rnam grangs 'di thos pa de ni 'di ltar sems can rnams kyi don chen po lags so/ /bcom ldan 'das/ gang dag chos kyi rnam grangs 'di thos pa'i sems can de dag ni bla na med pa yang dag par rdzogs pa'i byang chub la nges pa'i tshogs la gnas par 'gyur ba lags te/ btsun pa bcom ldan 'das / de dag ni de bzhin gshegs pa dgra bcom pa yang dag par rdzogs pa'i sangs rgyas rnams kyis yongs su bzung bas myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba lags so/ /bcom ldan 'das kyis bka' stsal pa/ byams pa/ legs so/ /legs so/ /byams pa/ khyod kyis ji skad 431b smras pa de ni de bzhin no/ /de ni bden no/ /de ni kho na'o/ /de ni ma nor ba'o/ /gang dag chos kyi rnam grangs 'di the tshom dang bcas pas thos pa'i sems can de dag kyang dge ba'i rtsa ba chung ngu dang ldan pa ma yin na/ gang dag the tshom med par nyan pa dang / 'dzin pa dang / 'chang ba dang / klog pa dang / kun chub par byed pa dang / rgya cher yang dag par ston pa lta smos kyang ci dgos/ mdo sde 'dzin pa de lta bu de dag la bdud kyi las 'byung bar mi 'gyur ro/ /de dag la 'dod chags dang / zhe sdang dang / gti mug dang / nga rgyal dang / ser sna dang / khro ba dang / gnod sems kyis gnod par mi 'gyur ro/ /de'i lus la rims nad dam/ nad 'byung bar mi 'gyur ro/ / yul gang na mdo sde 'di lta bu 'dzin pa dang / chos smra ba gnas pa'am/ chos kyi rnam grangs 'di glegs bam du bris te yod pa'i yul der nad dang / yams kyi nad dang / gnod pa dang / 'go ba'i nad dang / 'khrug pa thams cad rab tu zhi bar 'gyur ro/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das/ slad ma'i tshe slad ma'i dus lnga brgya pa tha ma la dam pa'i chos 'jig par 'gyur ba'i dus la bab cing 432a @#/ /sangs rgyas kyi byang chub 'jig par 'gyur ba 'jigs pa chen pos 'jig pa'i dus la bab pa na bdag gis chos kyi rnam grangs 'di skyes bu dam pa de dag la rab tu bstan par bgyi'o/ /de dag la gzi byin stsal bar bgyi'o/ /yul gang na mdo sde 'di 'dzin pa de lta bu dag gnas pa'i yul der bdag gis dus ma lags pa'i bser ma dang / dgung char dang / mu ge dang / bro nad yang ba dang / mi ngas dang / yams kyi nad dang / 'go ba'i nad dang / gnod pa dang / 'khrug pa thams cad rab tu zhi par bgyi'o/ /yul gang na chos kyi rnam grangs 'di 'chang ba dang / glegs bam du bgyis pa'am/ rgyal mtshan gyi rtse mor btags pa la mchod pa bgyid pa'i yul der bdag gis byin gyi rlabs kyis pha rol gyi dmag tshogs thams cad dang / chom rkun dang / srin po dang / mkha' 'gro ma'i ya nga ba thams cad rab tu zhi bar 'gyur ro/ /gang dag na chos smra ba 'di lta bu dang / mdo sde 'di 'chang ba'i yul der bdag gis lo tog dang / nor dang / 'bru dang / me tog dang / lo ma dang / 'bras bu thams cad phun sum tshogs pa dang / bde ba thams cad 'byung bar byin gyis brlab par bgyi'o/ /bcom ldan 432b 'das kyis bka' stsal pa/ byams pa/ khyod sems can thams cad kyi don gyi phyir dang / de bzhin gshegs pa'i dam pa'i chos yongs su gzung ba'i phyir dang / de bzhin gshegs pa'i chos kyi tshul yongs su bskyang ba'i phyir go cha chen po bgos te seng ge'i sgra bsgrags pa legs so/ /legs so/ /chos kyi rnam grangs 'di khyod la yongs su gtad kyi phyi ma'i tshe/ phyi ma'i dus lnga brgya tha ma la dam pa'i chos nub pa'i dus la bab cing sangs rgyas kyi byang chub 'jig par 'gyur la/ 'jigs pa chen pos 'jig pa'i dus la bab pa'i tshe khyod kyis chos kyi rnam grangs 'di sems can thams cad la bstan par bya'o/ /rab tu bsgrag par bya'o/ /skyes bu dam pa de dag gis mos pa bskyed par bya'o/ /don dam pa'i chos nyid tshad mar byas la mngon par brtson pas las gzhan mi bya bar rab tu bsgrag par bya'o/ /don dam pa'i chos nyid kho na las brtsams te dbang du byas la bstan par bya'o/ /ci nas kyang skyes bu dam pa de dag gis chos kyi rnam grangs 'di ji lta ba bzhin du phyin ci ma log par don rtogs par 'gyur ba de ltar bstan par bya'o/ /byang chub sems dpa' byams pas gsol pa/ bcom ldan 'das/ de ltar 'tshal lo/ /de nas dbang po dang bcas pa'i lha rnams dang / 433a @#/ /tshangs pa dang bcas pa'i lha rnams dang / skye dgu'i bdag po dang bcas pa rnams kyis chos kyi rnam grangs 'di mjug tu phyin pa'i dus la bab par shes nas/ bcom ldan 'das dang / byang chub sems dpa' sems dpa' chen po byams pa la lha'i me tog dang / bdug pa dang / spos dang / me tog phreng dang / byug pa dang / phye ma dang / gos dang / gdugs dang / rgyal mtshan dang / ba dan dag gis mchod nas/ 'di skad ces/ bcom ldan 'das/ gang gis sems can dpag tu ma mchis pa rnams kyi don bgyi ba chos kyi rnam grangs 'di ni a la la bdud rtsi brjod pa lags so zhes smras so/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo| chos kyi rnam grangs 'di lta bu thos par dka' yi/ /khyod kyis chos kyi rnam grangs 'di zungs shig / yi ger bris shig/ chongs shig / lhogs shig / kun chub par gyis shig / tshe dang ldan pa kun dga' bos gsol pa/ bcom ldan 'das/ bdag gis chos kyi rnam grangs 'di gzung lags na/ bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo/ de'i phyir khyod kyis chos kyi rnam grangs 433b 'di bdud rtsi brjod pa zhes bya bar zungs shig/ byams pas zhus pa zhes bya bar yang zungs shig/ bcom ldan 'das kyis de skad ces bka' stsal nas/ tshe dang ldan pa kun dga' bo dang / byang chub sems dpa' sems dpa' chen po byams pa dang / dge slong de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa bdud rtsi brjod pa zhes bya ba theg pa chen po'i mdo rdzogs so// //rgya gar gyi mkhan po pradz+nyA wa rma dang / zhus chen gyi lo tsA ba ban+de ye shes sdes bsgyur cing zhus te gtan la phab pa// |