//rgya gar skad du/ 249a @#/ /AR+YA b+ha ga ba ti pra dz+nyA pA ra mi ta pany+tsa sha ti ka/ bod skad du/ 'phags pa bcom ldan 'das ma shes rab kyi pha rol tu phyin pa lnga bcu pa/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal bo'i khab na bya rgod phung po'i ri la dge slong gi dge 'dun chen po dang byang chub sems dpa'i dge 'dun chen po dang thabs cig tu bzhugs te/ brgya byin dang / tshangs pa dang / 'jig rten skyong ba dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / dge slong dang / dge slong ma dang / dge bsnyen dang / dge bsnyen ma du ma dag dang yang thabs cig go /de nas bcom ldan 'das kyis tshe dang ldan pa rab 'byor la bka' stsal pa/ rab 'byor/ gang la la zhig nyan thos kyis la slob par 'dod pa dang / rang sangs rgyas kyi sa la slob par 'dod pas/ shes rab kyi pha rol tu phyin pa 'di nyid mnyan par bya/ gzung bar bya/ bcang bar bya/ bklag par bya/ kun chub par bya'o/ /byang chub sems dpa' thabs la mkhas pa dang ldan pas/ sangs rgyas dang / byang chub sems dpa'i chos thams cad yang dag par bsgrub pa'i phyir shes rab kyi pha rol tu phyin pa 'di nyid la mngon par brtson par bya'o/ /de ci'i phyir zhe na/ rab 'byor/ 'di ltar/ 249b byang chub sems dpa' sems dpa' chen pos gang la bslab par bya ba dang / rnal 'byor du bya ba sangs rgyas dang / byang chub sems dpa'i chos thams cad shes rab kyi pha rol tu phyin pa 'di nyid du rgya cher bstan pa'i phyir ro/ /bla na med pa yang dag par rdzogs pa'i byang chub la slob par 'dod pas kyang / shes rab kyi pha rol tu phyin pa 'di nyid mnyan par bya/ gzung bar bya/ bcang bar bya/ bklag par bya/ kun chub par bya'o/ /byang chub sems dpa' thabs mkhas pa dang ldan pas/ sangs rgyas dang / byang chub sems dpa'i chos thams cad yang dag par bsgrub pa'i phyir shes rab kyi pha rol tu phyin pa 'di nyid la mngon par brtson par bya'o/ /de ci'i phyir zhe na/ rab 'byor/ 'di ltar/ byang chub sems dpa' sems dpa' chen pos gang la bslab par bya ba dang / rnal 'byor du bya ba sangs rgyas dang / byang chub sems dpa'i chos thams cad shes rab kyi pha rol tu phyin pa 'di nyid du rgya cher bstan pa'i phyir ro/ /rab 'byor/ dge ba'i chos byang chub kyi phyogs kyi chos rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag yin pa de dag thams cad ni shes rab kyi pha rol tu phyin pa'i nang du chud cing / 'dus te 'ubs la yang dag par gzhol ba yin no/ /rab 'byor 250a @#/ /gyis gsol pa/ bcom ldan 'das/ shes rab kyi pha rol tu phyin pa la bslab par bya/ rnal 'byor du bya ste/ nyan thos kyi sa la bslab par 'dod/ rang sangs rgyas kyi sa la slob par 'dod pas/ shes rab kyi pha rol tu phyin pa 'di nyid dang / sangs rgyas kyi chos rnams dang / byang chub sems dpa'i chos rnams kyang mnyan par bya/ gzung bar bya/ bcang bar bya/ bklag par bya/ kun chub par bya'o/ /dge ba'i chos byang chub kyi phyogs kyi chos rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag yin pa rnams shes rab kyi pha rol tu phyin pa'i nang du chud cing / 'dus te 'ubs la yang dag par gzhol ba yin no/ /zhes bgyi ba de dag gang lags/ bcom ldan 'das kyis bka' stsal pa/ rab 'byor/ 'di lta ste/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin ba dang / nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa 250b nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa stong pa nyid dang / ngo bo nyid stong pa nyid dang / dngos po med pa'i ngo bo nyid stong pa nyid dang / dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo stong pa nyid dang / mtshan ma med pa dang / smon pa med pa dang / mngon par shes pa rnams dang / ting nge 'dzin rnams dang / gzungs kyi sgo thams cad dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad dang / rgyun du zhugs pa'i 'bras bu dang / lan gcig phyir 251a @#/ /'ong ba'i 'bras bu dang / phyir mi 'ong ba'i 'bras bu dang / dgra bcom pa nyid dang / rang byang chub nyid dang / thams cad shes pa nyid dang / lam gyi rnam pa shes pa nyid dang / rnam pa thams cad mkhyen pa nyid do/ /rab 'byor/ de dag ni/ dge ba'i chos byang chub kyi phyogs kyi chos rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag lags pa de dag shes rab kyi pha rol tu phyin pa'i nang du chud cing / 'dus te 'ubs la yang dag par gzhol ba rnams yin no/ /rab 'byor gyis gsol pa/ bcom ldan 'das/ 'di ltar/ dge ba'i chos byang chub kyi phyogs kyi chos rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag lags pa de dag shes rab kyi pha rol tu phyin pa'i nang du chud cing / 'dus te 'ubs la yang dag par gzhol ba ni/ bcom ldan 'das/ kye ma a la la shes rab kyi pha rol tu phyin pa 'di ni/ zab pa lags so/ /bcom ldan 'das kyis bka' stsal pa/ rab 'byor/ shes rab kyi pha rol tu phyin pa shin tu dben pa'i phyir ro/ /rab 'byor gyis gsol ba/ bcom ldan 'das/ kye ma a la la shes 251b rab kyi pha rol tu phyin pa 'di ni/ gting dpag dka' ba lags so/ /bcom ldan 'das kyis bka' stsal pa/ rab 'byor/ shes rab kyi pha rol tu phyin pa rnam par dag pa'i phyir ro/ /rab 'byor gyis gsol pa| bcom ldan 'das/ kye ma a la la a la la shes rab kyi pha rol tu phyin pa 'di ni/ nam mkha' dang mtshungs pa lags so/ /bcom ldan 'das kyis bka' stsal pa| rab 'byor/ shes rab kyi pha rol tu phyin pa shin tu rnam par dag pa'i phyir te/ rab 'byor/ de bas na/ shes rab kyi pha rol tu phyin pa ni/ nam mkha' lta bu yin no/ /rab 'byor gyis gsol pa/ bcom ldan 'das/ kye ma a la la a la la shes rab kyi pha rol tu phyin pa 'di ni/ mi brtson pas rtogs par dka' ba lags so/ /bcom ldan 'das kyis bka' stsal pa/ rab 'byor/ de de bzhin te/ de de bzhin no/ /ji skad smras pa de bzhin te/ shes rab kyi pha rol tu phyin pa 'di ni/ mngon par mi brtson pa dang / dge ba'i rtsa ba chung ba dang / yid mi gzhungs pa dang / don du mi gnyer ba dang / thos pa dang mi ldan pa dang / shes rab chung ba dang / sdig pa'i grogs pos zin pa dang / sdig pa'i grogs po dang 'dres pa mang ba dang / sdig pa'i grogs pos 'dzin du bcug pa dang / dad pa tsam dang ldan pa dang / las dang po pa dang / skal pa med pa'i tshul can dang / yongs su mi 'dri ba'i tshul can dang / shes rab 'chal bar gyur pa byas 252a @#/ /pa dang / le lo can dang / brtson 'grus chung ba dang / snying stobs chung ba dang / mos pa chung ba dang / dge ba'i chos de dag la mngon par mi brtson pas mos par dka' ba ste/ rab 'byor/ de lta bas na/ shes rab kyi pha rol tu phyin pa ni/ mos par dka' ba zhes bya'o/ /rab 'byor/ gzhan yang rigs kyi bu'am rigs kyi bu mo gang la la zhig shes rab kyi pha rol tu phyin pa zab mo 'di nyan ram/ 'dzin tam/ 'chang ngam/ klog gam/ kun chub par byed dam/ gzhan dag la yang rgya cher yang dag par rab tu ston na/ des 'das pa dang / ma byon pa dang / da ltar byung ba'i sangs rgyas bcom ldan 'das rnams kyi byang chub bzung ba yin no/ /rab 'byor/ de lta bas na/ rigs kyi bu'am/ rigs kyi bu mo gang lhag pa'i bsam pa phun sum tshogs pa myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas rgyun mi 'chad par shes rab kyi pha rol tu phyin pa mnyan par bya/ gzung bar bya/ bcang bar bya/ bklag par bya/ kun chub par bya ste/ des na/ myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /bcom ldan 'das kyis de skad ces bka' stsal nas tshe dang ldan pa rab 'byor dang| dge slong de dag dang / byang chub sems dpa' de dag dang 252b lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa shes rab kyi pha rol tu phyin pa lnga bcu pa rdzogs so|| |