H225

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>H225</h1><td>(<a href="https://asianclassics.org/tibetan/" target="new2">e-text produced by ACIP</a>)<br><br><a href="verif2.php?id=H225&coll=lhasa">see text in Tibetan script</a></table>267a<br><font size=+1>


rgya gar skad du/ AR+Ya s+thi ra a d+h+ya sha yi ba ri brta nA ma ma hA yA na sU tra/ bod skad du/ 'phags pa lhag pa'i bsam pa brtan pa'i le'u zhes bya ba theg pa chen po'i mdo/ /sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa </font><hr>267b<br><font size=+1>


dus gcig na/ bcom ldan 'das rgyal po'i khab na bya rgod kyi phung po'i ri la dge slong stong nyis brgya lnga bcu'i dge slong gi dge 'dun chen po dang / byang chub sems dpa' lnga brgya tsam dang thabs cig tu bzhugs so/ /de'i tshe byang chub sems dpa' lhag pa'i bsam pa brtan pa nang par sngar sham thabs dang / chos gos bgos/ lhung bzed thogs te rgyal po'i khab tu bsod snyoms la song ngo / /de nas byang chub sems dpa' lhag pa'i bsam pa brtan pa bsod snyoms kyi phyir rgyal po'i khab kyi grong khyer chen por mthar chags su rgyu ba na tshong dpon zhig gi khyim na bu mo gzugs bzang ba/ mdzes pa/ blta na sdug pa/ kha dog bzang po rgyas pa mchog dang ldan pa zhig yod pa mthong ngo / /des bu mo de mthong nas 'dod chags kyi yongs su gdung ba skyes te/ des mi sdug pa yid la bya'o snyam du bsams kyang de'i sems sdug pa'i mtshan ma 'ba' zhig gis yongs su zin te 'dug par 'gyur to/ /de nas byang chub sems dpa' lhag pa'i bsam pa brtan pa dga' bar 'dzin pa'i sems kyis khyim de nas bsod snyoms ma blangs par rgyal po'i khab kyi grong khyer nas lhung bzed stong bzhin du phyir song ste/ 'dod pa'i rtog pa de yid la mi bya bar bya ba'i phyir 'bad na/ so sor rtog pa'i stobs kyis kyang 'dod pa'i rtog pa bsal ma nus nas bcom </font><hr>268a<br><font size=+1>


@#/ /ldan 'das kyis lha'i spyan rnam par dag pa mi'i las 'das pas byang chub sems dpa' lhag pa'i bsam pa brtan pa'i 'dod pa'i rtog pa dang ldan pa so sor rtog pa'i stobs kyis kyang 'dod pa'i rtog pa bsal ma nus pa gzigs so/ /de nas bcom ldan 'das kyis byang chub sems dpa' lhag pa'i bsam pa brtan pa gdul bar bya ba'i dbang gi phyir byang chub sems dpa' lhag pa'i bsam pa brtan pa lam gang nas 'gro ba'i lam der tshong dpon gyi bu mo de ci 'dra ba de 'dra ba'i bu mo zhig sprul nas byang chub sems dpa' lhag pa'i bsam pa brtan pas sprul pa'i bu mo de mthong ngo / /mthong nas kyang 'di skad ces smras so/ /rigs kyi bu mo/ khyod gar 'gro /sprul pa'i bu mos smras pa/ khyod gar bzhud pa der bdag mchi'o/ /de nas byang chub sems dpa' lhag pa'i bsam pa brtan pa 'jigs shing skrag nas bros so/ /bros nas ri bgrod dka' ba zhig tu song ngo / /sprul pa'i bu mo de yang ri bgrod dka' ba de nyid du song ngo / /de nas byang chub sems dpa' lhag pa'i bsam pa brtan pa lus ngal chad de 'dug go /sprul pa'i bu mo de yang byang chub sems dpa' lhag pa'i bsam pa brtan pa'i mdun du 'dug go /'dug nas kyang tshigs su bcad pa 'di skad ces smras so/ /bdag ni sems kyis spang bar bgyi/ /lus ni bros pas ci </font><hr>268b<br><font size=+1>


zhig bya| |brtan po lus ni bros pa yis/ /'dod chags spong bar mi 'gyur ro/ /de nas sprul pa'i bu mo des tshigs su bcad pa de skad ces smras nas ri bgrod dka' ba de las lhung ngo / / lhung nas de'i mgo yang logs shig tu song ngo / /lag pa yang logs shig /rkang pa yang logs shig /yan lag dang / nyid lag rnams kyang logs shig tu song ste/ 'di lta ste / dper na/ khab bcangs pa las rab tu dros shing rab tu zhu nas sa la thim pa de bzhin du sprul pa'i bu mo de de nyid du mi snang bar gyur to/ /de nas byang chub sems dpa' lhag pa'i bsam pa brtan pas sprul pa'i bu mo de mthong nas 'dod chags kyi sems de nyid zhi bar gyur te/ de skyo ba chen po skyes so/ /des skyo ba chen po thob ste sprul pas tshigs su bcad pa smras pa de mngon sum du gyur nas de 'di snyam du sems te/ rang bzhin 'di dag thams cad bcom ldan 'das la bdag gis gsol to/ /de ltar byas na/ bcom ldan 'das kyi thugs kyis sems mkhyen nas ci nas bdag gis chos mngon par rtogs par 'gyur ba'i chos ston par 'gyur snyam mo/ /de nas byang chub sems dpa' lhag pa'i bsam pa brtan pa ri bgrod dka' ba de nas byung nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go /de'i tshe bcom ldan 'das 'khor </font><hr>269a<br><font size=+1>


@#/ /'bum phrag du mas yongs su bskor cing mdun gyis bltas nas chos ston to/ /byang chub sems dpa' lhag pa'i bsam pa brtan pas bcom ldan 'das kyi bka' rdzogs par rig nas bla gos phrag pa gcig tu gzar te pus mo'i lha nga sa la btsugs nas bcom ldan 'das ga la ba de logs su thal mo sbyar ba btud de bcom ldan 'das la rang bzhin thams cad gsol to/ /bcom ldan 'das kyis bka' stsal pa/ rigs kyi bu/ gang lam gyis 'byung ba yongs su tshol ba de ni/ de bzhin te/ rigs kyi bu/ de bzhin gshegs pas ni/ chags par 'gyur ba'i chos rnams spangs pas 'dod chags spong bar ma gsungs so/ /de bzhin du zhe sdang bar 'gyur ba dang / gti mug par 'gyur ba'i chos rnams spangs pas de bzhin gshegs pas gti mug spong bar ma gsungs so/ /de ci'i phyir zhe na/ rigs kyi bu/ de bzhin gshegs pa ni/ chos gang yang dor bar bya ba'am/ thob par bya ba'i phyir chos mi ston to/ /yongs su shes par bya ba dang / yongs su spang bar bya ba dang / bsgom par bya ba dang / mngon sum du bya ba dang / mngon par rtogs par bya ba dang / 'khor ba las bskyod par bya ba dang / mya ngan las 'das par 'gro bar bya ba dang / bsal bar bya ba dang / gzhag par bya ba dang / dbye </font><hr>269b<br><font size=+1>


bar bya ba'i phyir chos mi ston to/ /rigs kyi bu/ gnyis su dbye ba ni/ de bzhin gshegs pa rnams kyi chos nyid ma yin no/ /gnyis su spyod pa gang yin pa de dag ni/ yang dag pa la zhugs pa ma yin no/ /rigs kyi bu/ gnyis gang zhe na/ bdag gis 'dod chags spang bar bya'o snyam pa 'di ni/ gnyis so/ /bdag gis zhe sdang spang bar bya'o/ /bdag gis gti mug spang pa bya'o snyam pa 'di ni/ gnyis so/ /de ltar sbyor ba gang yin pa de dag ni/ yang dag pa la zhugs pa ma yin te/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mi la la zhig gis sgyu ma mkhan gyi rol mo byung ba'i tshe sgyu ma mkhan gyis sprul pa'i bung med mthong na 'dod chags kyi sems bskyed de/ de 'dod chags kyis sems dkris nas 'khor gyis 'jigs shing bag tsha ste stan las langs nas song ste/ de song nas bud med de nyid la mi sdug pa yid la byed cing / mi rtag pa dang / sdug bsngal ba dang / stong pa dang / bdag med par yid la byed na/ rigs kyi bu/ 'di ji snyam du sems/ ci mi de yang dag par zhugs pa yin nam/ 'on te log par zhugs pa yin/ gsol pa/ bcom ldan 'das/ gang bud med ma mchis pa la mi sdug par yid la bgyid cid mi rtag pa dang / sdug bsngal ba dang / stong pa dang / bdag med par yid la bgyid pa'i mi de'i mngon par brtson pa de ni/ </font><hr>270a<br><font size=+1>


@#/ /log pa lags so/ /bcom ldan 'das kyis bka' stsal pa/ rigs kyi bu/ 'di na dge slong dang / dge slong ma dang / dge bsnyen dang / dge bsnyen ma kha cig ma skyes ma byung ba'i chos rnams la mi sdug par yid la byed cing mi rtag pa dang / sdug bsngal ba dang / stong pa dang / bdag med par yid la byed pa gang yin pa rnams kyang de dang 'dra bar blta bar bya'o/ /nga ni/ mi blun po de dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mi la la gnyid log pa'i rmi lam du bdag gi khyim du rgyal po'i btsun mo mthong nas de dang lhan cig nyal bar byed de/ dran pa nyams pa'i phyir bdag ni/ gsad do snyam du de ltar sems nas rgyal pos mtshor grang / des bdag gsad du 'ong ngo snyam nas de 'jigs shing skrag ste bros na/ 'di ji snyam du sems/ ci mi de 'jigs shing skrag ste bros pas rgyal po'i btsun mo'i phyir 'jigs pa de las thar par 'gyur ram/ gsol pa/ bcom ldan 'das/ de ni/ ma lags so/ /de ci'i slad du zhe na/ bcom ldan 'das/ 'di ltar mi des bud med ma mchis par bud med kyi 'du shes bskyed de yang dag pa ma lags pa kun brtags pa'i slad du'o/ /bcom ldan 'das kyis bka' stsal pa/ rigs kyi bu/ 'di na dge slong dang / dge slong </font><hr>270b<br><font size=+1>


ma dang / dge bsnyen dang / dge bsnyen ma kha cig 'dod chags med pa la 'dod chags kyi 'du shes bskyed nas 'dod chags kyi 'jigs pas skrag ste/ 'dod chags las nges par 'byung ba yongs su tshol ba dang / de bzhin du zhe sdang med par zhe sdang gi 'du shes bskyed/ gti mug med par gti mug gi 'du shes bskyed nas gti mug gis 'jigs pas skrag ste/ gti mug las nges par 'byung ba yongs su tshol ba gang yin pa rnams kyang de dang 'dra bar blta bar bya'o/ /nga ni/ mi blun po de dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mi des med bzhin du sgro btags pas 'jigs pa med pa la 'jigs pa'i 'du shes bskyed pa de bzhin du rigs kyi bu| byis pa so so'i skye bo'i rnams ni/ 'dod chags kyi mtha' ma shes nas 'dod chags kyi mtha'i 'jigs pas skrag ste/ 'dod chags kyi mtha' las nges par 'byung ba yongs su tshol lo| |zhe sdang gi mtha' ci'ang med pa'i mthar ma shes nas zhe sdang gi mtha'i 'jigs pas skrag cing ci yang med pa'i mtha' las nges par 'byung ba yongs su tshol lo/ /gti mug gi mtha' stong pa nyid kyi mthar ma shes nas gti mug gi mtha'i 'jigs pas skrag ste/ stong pa nyid kyi mtha' las nges par 'byung ba yongs su tshol bar byed do/ /nga ni/ mi blun po de </font><hr>271a<br><font size=+1>


@#/ /dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mi la la zhig sos ka'i zla ba tha ma'i nyi ma gung la lam du zhugs nas tsha bas nyen te ngal chad nas skom zhing gdungs te shin tu so sor rtog pa'i stobs dang ldan par gyur nas des 'brog dgon par smig rgyu'i chu 'dal ba chen po'i rgyun 'bab pa mthong la/ de der 'di ltar so sor rtog par byed de/ bdag khyim du ma phyin gyi bar du re zhig chu 'di btung bar mi bya'o/ /snyam nas des smig rgyu de por te rang gi khyim du song ngo / /rang gi khyim du song nas bdag skom la chu mthong bzhin du ma 'thungs par bor ba ni/ bdag gis ngo mtshar ba zhig byas so/ /bdag gis mchog tu ngo mtshar ba zhig byas so/ /zhes ched du brjod pa ched du brjod na/ rigs kyi bu/ 'di ji snyam du sems/ mi des chu med cing yod pa ma yin pa ma 'thungs te bor ba la ngo mtshar zhig byas pa yod dam/ gsol pa/ bcom ldan 'das/ de ni/ ma lags so/ /de ci'i slad du zhe na/ bcom ldan 'das/ de na chab kyang ma mchis/ chab tu gdags pa yang ma mchis te/ bcom ldan 'das/ mi de chab ma mchis par 'du shes 'khrul te/ de chab dor bar so sor rtog par bgyid cing mi bden pa'i dga' ba dang / mchog tu </font><hr>271b<br><font size=+1>


dga' ba bskyed nas dga' ba des mgu bar 'dzin par byas so/ /bcom ldan 'das kyis bka' stsal pa/ rigs kyi bu/ 'di na dge slong dang / dge slong ma dang / dge bsnyen dang / dge bsnyen ma kha cig de bzhin gshegs pa'i dgongs pa'i tshig ma shes nas ser sna'i sems yongs su spang ba'i phyir sbyin pa med par sbyin pa'i 'du shes bskyed de med bzhin du so sor rtog par byed la/ mi bden pa'i dga' ba dang / mchog tu dga' ba skyed cing bdag cag gis ni/ ser sna'i sems bsal to snyam ste/ dga' ba des mgu par 'dzin pa dang / 'chal pa'i tshul khrims kyi sems yongs su spang pa'i phyir tshul khrims med par tshul khrims kyi 'du shes skyed de med bzhin du so sor rtog par byed la/ mi bden pa'i dga' ba dang / mchog tu dga' ba skyed cing bdag cag gis ni/ 'chal pa'i tshul khrims kyi sems bsal to snyam ste/ dga' ba des mgu bar 'dzin pa dang / gnod sems kyi sems yongs su spang ba'i phyir bzod pa med par bzod pa'i 'du shes skyed de med bzhin du so sor rtog par byed la/ mi bden pa dang / mchog tu dga' ba skyed cing bdag cag gis ni / gnod pa'i sems kyis sems bsal to snyam ste/ dga' ba des mgu bar 'dzin pa dang / le lo'i sems yongs su spang ba'i phyir brtson 'grus med par brtson 'grus kyi 'du shes </font><hr>272a<br><font size=+1>


@#/ /bskyed de/ med bzhin du so sor rtog par byed la/ mi bden pa'i dga' ba dang / mchog tu dga' ba skyed cing bdag cag gis ni/ le lo'i sems bsal to snyam ste/ dga' ba des mgu bar 'dzin pa dang / rnam par g.yeng pa'i sems yongs su spang ba'i phyir bsam gtan med par bsam gtan gyi 'du shes skyed de med bzhin du so sor rtog par byed la/ mi bden pa'i dga' ba dang / mchog tu dga' ba skyed cing bdag cag gis ni/ rnam par g.yeng ba'i sems bsal to snyam ste/ dga' ba des mgu bar 'dzin pa dang / mi shes pa'i sems yongs su spang ba'i phyir shes rab med par shes rab kyi 'du shes skyed de med bzhin du so sor rtog par byed la/ mi bden pa'i dga' ba dang / mchog tu dga' ba skyed cing bdag cag gis ni/ mi shes pa'i sems bsal to snyam ste/ dga' ba des mgu bar 'dzin pa gang yin pa rnams kyang de dang 'dra bar blta bar bya'o/ /nga ni/ mi blun po de dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mi zhig chu med par 'du shes 'khrul te/ de chu dor bar so sor rtog par byed la/ mi bden pa'i dga' ba dang / mchog tu dga' ba skyed cing dga' ba des mgu bar </font><hr>272b<br><font size=+1>


'dzin pa de bzhin du rigs kyi bu/ 'di na dge slong dang / dge slong ma dang / dge bsnyen dang / dge bsnyen ma kha cig de bzhin gshegs pa'i chos kyi dbyings ma shes nas rgyun du zhugs pa'i 'bras bu med par rgyun du zhugs pa'i 'bras bur 'du shes 'khrul/ lan cig phyir 'ong ba'i 'bras bu med par lan gcig phyir 'ong ba'i 'bras bur 'du shes 'khrul| phyir mi 'ong ba'i 'bras bu med par phyir mi 'ong ba'i 'bras bur 'du shes 'khrul/ dgra bcom pa nyid kyi 'bras bu med par dgra bcom pa nyid kyi 'bras bur 'du shes 'khrul/ rang sangs rgyas nyid kyi 'bras bu med par rang sangs rgyas nyid kyi 'bras bur 'du shes 'khrul/ sangs rgyas nyid kyi 'bras bu med par sangs rgyas nyid kyi 'bras bur 'du shes 'khrul/ mya ngan las 'das pa'i 'bras bu med par mya ngan las 'das pa'i 'bras bur 'du shes 'khrul te/ med bzhin du so sor rtog par byed la/ mi bden pa'i dga' ba dang / mchog tu dga' ba skyed cing dga' ba des mgu bar 'dzin pa gang yin pa rnams kyang de dang 'dra bar blta bar bya'o/ /nga ni/ mi blun po de dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ de lta bas na/ rigs kyi bu'am/ rigs kyi bu mo dad pa can rnams kyis </font><hr>273a<br><font size=+1>


@#/ /ji ltar smig rgyu la chu'i 'du shes skyed pa de lta bur chos rnams rab tu shes par bya'o/ /de ltar chos rnams rab tu shes pa de dag ni/ yang dag par zhugs pa yin nam/ gzhan du shes pa gang dag yin pa de dag ni/ yang dag par zhugs pa ma yin no/ /da ni/ mi blun po de dag la lam sgom pa yin no/ /zhes mi smra ste/ de dag ni| log par zhugs pa zhes bya'o/ /rigs kyi bu/ 'di lta ste/ dper na/ bud med gcig gis me long blangs te bzhin gyis mtshan ma brtags na/ des me long shin tu phyis pa de la gzugs brnyan mdzes shing blta na sdug pa mthong nas des de la bdag gis ni/ gzugs brnyan 'di la 'dod chags kyi sems bskyed par mi bya'o/ /de ci'i phyir zhe na/ 'di ni/ bdag gi ma yin la/ bdag kyang 'di'i ma yin pa'i phyir ri snyam du so sor rtog par byed na/ rigs kyi bu/ 'di ji snyam du sems/ de ltar gzugs brnyan de bud med 'di la 'dod chags kyi sems mi skyed pa ngo mtshar to snyam du 'dzin tam/ gsol pa/ bcom ldan 'das/ de ni/ ma lags so/ /de ci'i slad du zhe na/ bcom ldan 'das| gzugs brnyan ni/ rnam par rtog pa ma mchis pa dang / yongs su ma grub pa lags te/ de la rtog pa ci yang ma mchis pa'i slad du'o/ /bcom ldan 'das kyis bka' stsal </font><hr>273b<br><font size=+1>


pa| rogs kyi bu/ de de bzhin te/ byis pa so so'i skye bo rnams ni/ gzugs rnams la rtog par byed de/ gzugs 'di dag ni/ dan no/ /'di dag ni/ 'bring ngo / /'di dag ni/ rab bo snyam du sems mod kyi/ 'on kyang gzugs rnams ni/ gzugs kyi ngo bo nyid la rnam par rtog pa mi skyed de/ rtog par mi byed/ rnam par rtog par mi byed do/ /sgra dang / dri dang / ro dang / reg bya rnams kyang de dang 'dra'o/ /'di ltar yang byis pa so so'i skye bo rnams ni/ chos rnam par rtog par byed do/ chos 'di dag ni/ dan ni/ /'di dag ni/ 'bring ngo / /'di dag ni/ rab bo snyam du sems mod kyi/ 'on kyang chos rnams ni/ chos kyi ngo bo nyid la rnam par rtog pa mi skyed de/ rtog par mi byed/ rnam par rtog par mi byed do/ /rigs kyi bu/ 'di lta ste/ dper na/ bud med des med pa de yod pa'i 'du shes bskyed nas de'ang so sor rtog par byed cing de la mngon par zhen pa de bzhin du rigs kyi bu/ 'di na dge slong dang / dge slong ma dang / dge bsnyen dang / dge bsnyen ma kha cig chos thams cad gzugs brnyan lta bur ma shes nas 'di skad du bdag cag gzugs rnams la chags par mi bya'o/ /de bzhin du bdag cag sgra rnams dang / dri rnams dang / ro rnams dang / reg bya rnams dang / chos rnams la chags par mi bya'o/ /bdag cag gis sngom pa bsgrub par bya'o/ /zhes zer te/ de dag med pa de la yod par 'du shes bskyed </font><hr>274a<br><font size=+1>


@#/ /nas med bzhin du so sor rtog par byed de/ de la mngon par zhen la/ des kyang dga' bar 'dzin cing bdag cag la ni/ bstod par byed/ gzhan la ni/ brnyas par byed pa gang dag yin pa rnams kyang de dang 'dra bar blta bar bya'o/ /nga ni/ mi blun po de dag la lam sgom pa yin no/ /zhes mi smra ste/ de dag ni/ log par zhugs pa zhes bya'o/ /rigs kyi bu/ 'di lta ste/ dper na/ mo gsham zhig yod la de dran pa nyams pas 'di ltar bdag ni/ bu mi 'dod par bya'o/ /zhes dam 'cha' bar byed pa de la/ bud med la la zhig gis yid bsrung ba'i phyir shes shing dogs bzhin du 'di skad ces/ khyod kyi bu gzugs bzang zhing mdzes la blta na sdug pa zhig yod par 'gyur gyi/ 'di ltar dam mi bca' bar gsol zhes zer la/ de nas mo gsham des bud med de'i tshig mnyan nas dran pa nyams pas bdag gi bu gzugs bzang zhing mdzes la blta na sdug pa zhig yod par 'gyur ro snyam du re ba'i sems skyed par byed de/ sems 'khrul pa des 'du shes kyi rnam pa des sems yongs su mgu bar byed la/ bu ni/ skyes kyang ma skyes/ skye bar yang mi 'gyur ba de bzhin du rigs kyi bu/ de bzhin gshegs pa ni| chos thams cad mo gsham gyi bu dang 'dra bar mkhyen cing gzigs bzhin du 'jig rten gyi rjes mthun par bya ba'i phyir gnyis su ston te/ 'das pa'i dus na khyed ming 'di zhes bya bar </font><hr>274b<br><font size=+1>


gyur| rigs ni/ 'di zhes bya/ rus ni/ 'di zhes bya/ kha dog ni/ 'di 'dra bar 'gyur/ zas ni/ 'di lta bu zhig za za/ yun ni/ 'di srid cig tu gnas gnas/ bde ba dang sdug bsngal ni/ 'di lta bu zhig nyams su myong / tshe'i mtha' ni/ 'di srid cig tu gyur to/ /ma 'ongs pa'i dus na ni/ 'di lta bu zhig tu 'gyur te/ ming ni/ 'di skad ces bya bar 'gyur/ rigs ni/ 'di zhes bya| rus ni/ 'di zhes bya/ kha dog ni/ 'di 'dra bar 'gyur/ zas ni/ 'di lta bu zhig za bar 'gyur/ yun ni/ 'di srid cig tu gnas par 'gyur/ bde ba dang sdug bsngal ni/ 'di lta bu zhig nyams su myong bar 'gyur/ tshe'i mtha' ni/ 'di srid cig tu 'gyur ro/ /de bzhin du da ltar byung ba'i dus na ming ni/ 'di zhes bya/ rigs ni/ 'di zhes bya/ rus ni/ 'di zhes bya/ kha dog ni/ 'di 'dra ba zhig /zas ni/ 'di lta bu zhig za/ yun ni/ 'di srid gnas/ bde ba dang / sdug bsngal ba ni/ 'di lta bu zhig nyams su myong / /tshe'i mtha' ni/ 'di srid cig thub bo zhes ston par mdzad do/ /rigs kyi bu/ dper na/ mo gsham de rang gi brtags pas bu'i 'du shes des re bar byed la bu de ni/ mi skye ba'i chos can no/ /mi skye ba'i chos can yin pas na/ mi 'gag pa'i chos can no/ /mi 'gag pa'i chos can yin pas na/ rnam par rig byed ma yin pa'i chos can no/ /rigs kyi bu/ de bzhin du gzugs thams cad </font><hr>275a<br><font size=+1>


@#/ /ni| gzugs kyi ngo bo nyid kyis ma skye ba'i chos can no/ /mi skye ba'i chos can yin pas na/ mi 'gag pa'i chos can no/ /mi 'gag pa'i chos can yin pas na/ rnam par rig byed ma yin pa'i chos can no/ /tshor ba thams cad dang / 'du shes thams cad dang / 'du byed thams cad dang / rnam par shes pa thams cad kyang de dang 'dra ste/ rnam par shes pa'i ngo bo nyid kyis mi skye ba'i chos can no/ /mi skye ba'i chos can yin pas na/ mi 'gag pa'i chos can no/ /mi 'gag pa'i chos can yin pas na/ rnam par rig byed ma yin pa'i chos can te/ chos kyi ngo bo nyid de ltar mi shes pa gang dag yin pa de dag ni/ yang dag par zhugs pa ma yin no/ /nga ni/ mi blun po de dag la lam sgom pa yin no/ / zhes mi smra ste/ de dag ni/ log par zhugs pa zhes bya'o/ /chos rnams de ltar shes pa gang dag yin pa de dag ni/ yang dag par zhugs pa yin te/ de dag ni/ lam la gnas pa yin no| |de dag ni/ lam las mi g.yo ba yin no/ /de ci'i phyir zhe na/ de bzhin gshegs pa rnams kyi chos gnas pa ni/ chos kyi dbyings mi g.yo ba'i tshul gyis mi g.yo ba yin pa'i phyir ro/ /rigs kyi bu/ de lta bas na/ rigs kyi bu'am/ rigs kyi bu mo de bzhin gshegs pa rnams kyi chos kyi tshul la 'jug par 'dod pas 'dod chags la g.yo bar </font><hr>275b<br><font size=+1>


mi bya'o| |zhe sdang las g.yo bar mi bya'o/ /gti mug las g.yo bar mi bya'o/ /nyon mongs pa thams cad las g.yo bar mi bya'o/ /mig dang / gzugs dang / mig gi rnam par shes pa las g.yo bar mi bya'o/ /de bzhin du rna ba dang / sgra dang / rna ba'i rnam par shes pa dang / sna dang / dri dang / sna'i rnam par shes pa dang / lce dang / ro dang / lce'i rnam par shes pa dang / lus dang / reg bya dang / lus kyi rnam par shes pa dang / yid dang / chos dang / yid kyi rnam par shes pa las g.yo bar mi bya'o/ /chos thams cad kyi 'du shes las g.yo bar mi bya'o| |chos thams cad kyi 'du shes la yang gnas par mi bya'o/ /de ci'i phyir zhe na/ gal te 'dod chags las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ stong pa nyid mi g.yo ba'i don gyis 'dod chags nyid kyi dbyings yin pa'i phyir ro/ /gal te zhe sdang las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ mtshan ma med pa mi g.yo ba'i don gyis zhe sdang nyid kyi chos kyi dbyings yin pa'i phyir ro/ /gal te gti mug las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ smon pa med pa mi g.yo ba'i don gyis gti mug nyid chos kyi dbyings yin pa'i phyir ro/ /gal te nyon mongs pa thams cad las g.yo bar gyur na chos kyi dbyings las g.yo bar </font><hr>276a<br><font size=+1>


@#/ /'gyur ro/ /de ci'i phyir zhe na/ nyon mongs pa thams cad kyi ngo bo nyid ji lta ba bzhin du rtogs pa mi g.yo ba'i don gyis nyon mongs pa thams cad nyid chos kyi dbyings yin pa'i phyir ro/ /gal te mig dang / gzugs dang / mig gi rnam par shes pa las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ rten cing 'brel bar 'byung ba mi g.yo ba'i don gyi mig dang / gzugs dang / mig gi rnam par shes pa nyid chos kyi dbyings yin pa'i phyir ro/ /de bzhin du gal te rna ba dang / sgra dang / rna ba'i rnam par shes pa dang / sna dang / dri dang / sna'i rnam par shes pa dang / lce dang / ro dang / lce'i rnam par shes pa dang / lus dang / reg bya dang / lus kyi rnam par shes pa dang / yid dang / chos dang / yid kyi rnam par shes pa las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ rten cing 'brel par 'byung ba mi g.yo ba'i don gyis yid dang / chos dang / yid kyi rnam par shes pa nyid chos kyi dbyings yin pa'i phyir ro/ /gal te chos thams cad kyi 'du shes las g.yo bar gyur na chos kyi dbyings las g.yo bar 'gyur ro/ /de ci'i phyir zhe na/ chos thams cad kyi 'du shes kyi ngo bo nyid ji lta ba bzhin du rtogs pa mi g.yo ba'i don gyis chos </font><hr>276b<br><font size=+1>


thams cad kyi 'du shes nyid kyis chos kyi dbyings yin pa'i phyir ro/ /ngas de las dgongs nas tshig 'di skad du log par lta ba log par lta ba yin par mthong na/ de de'i yang dag par lta ba yin no/ /zhes gsungs so/ /bsal ba med pa dang / gzhag pa med pa'i tshul gyis log par lta ba las kyang mi g.yo la/ log par lta ba med par gyur pa las gud na'ang yang dag par lta ba med de/ chos thams cad gnyis su med pa'i phyir log par lta ba yang dag pa ji lta ba bzhin du mthong ba nyid yang dag par lta ba yin gyi/ gnyis su 'du shes pa la ni| yang dag par lta ba med do/ /rigs kyi bu/ 'di lta ste/ dper na/ mi la la zhig nub mo mun pa mun nag gi nang na lam du zhugs te/ des 'brog khong khong zhig tu shing ljon pa phal po che stug po mthong la/ des der shing zhig gi drung na chom rkun yod pa'i 'du shes bskyed nas skrag ste lam der ma song na/ rigs kyi bu/ 'di ji snyam du sems/ ci mi de snang ba'ang ma byung / shing de'ang mngon sum du ma byas par shing stug po de las 'phags pa'am/ chom rkun gyi 'jigs pa med par 'gyur ram/ gsol pa/ bcom ldan 'das/ de ni/ ma lags so| |bcom ldan 'das kyis bka' stsal pa/ rigs kyi bu/ 'di ji snyam du sems/ ci mi de snang ba'ang yod la/ shing yang mngon sum du byas na/ shing stug po de las 'phags pa'am </font><hr>277a<br><font size=+1>


@#/ /chom rkun gyi 'jigs pa med par 'gyur ram/ gsol pa/ bcom ldan 'das/ de de lta lags so/ /de ci'i slad du zhe na/ bcom ldan 'das/ 'di ltar mi des 'jigs pa ma mchis pa la 'jigs pa'i 'du shes bskyed cing / yang dag pa ma lags pa kun brtags pa'i slad du'o/ /bcom ldan 'das kyis bka' stsal pa/ rigs kyi bu/ de bzhin du byis pa so so'i skye bo rtsod pas yang dag pa ma yin pa'i phyir ci log gis phyin ci log tu gyur pa/ ma rig pa'i mun pas mig kun nas g.yogs pa thams cad med bzhin du sgro btags pas 'khor ba'i 'jigs pas skrag nas 'khor ba las nges par 'byung ba yongs su tshol lo/ /de dag gis gang du 'jigs pa'i 'du shes bskyed pa'i 'khor ba de'ang don dam par mi dmigs na de dag mya ngan las 'das pa ni/ 'jigs pa med pa'o/ /zhes yongs su tshol bar byed do/ /dge ba'i bshes gnyen gyis yongs su zin pa yang dag par zhugs pa rnams ni/ 'khor ba de nyid mya ngan las 'das pa yin par yang dag pa ji lta ba bzhin du rab tu shes la/ chos thams cad kyi skye ba med pa'ang rab tu shes te/ de ltar yang dag par zhugs pa de dag ni/ chos gang yang len par mi byed/ 'dor bar mi byed/ sel bar mi byed/ 'jog par mi byed do/ /chos kyi dbyings la gnas te g.yo ba med do/ /mi g.yo bas na gnas sgom </font><hr>277b<br><font size=+1>


par mi byed/ mi sgom pas na gnas med do/ /gnas med pas na g.yo ba med de/ 'di ni/ de bzhin gshegs pa rnams kyi chos kyi tshul g.yo ba med pa ste/ de la ni/ g.yo bar bya zhing 'phags par bya ba'am/ dor bar bya'am/ blang bar bya ba'i chos ci'ang mi dmigs so/ /de ci'i phyir zhe na/ chos kyi tshul ni/ nam mkha'i tshul nyid yin la/ nam mkha' la ni/ g.yo ba'ang med/ 'phags pa'ang med pa'i phyir ro/ /rigs kyi bu/ de ltar yang dag par zhugs pa shes pa dang ldan pa ni/ sems can thams cad kyis kyang shes pa'i yongs su shes pa de las bskyod cing bskul bar mi nus so| |de ci'i phyir zhe na/ 'di ltar des mi g.yo ba'i ye shes thob pa'i phyir ro/ /de nas tshe dang ldan pa shA ri'i bu stan las langs te bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ shes rab dang ldan pa'i mchog tu bstan par bgyid pa lags so/ /de ci'i slad du zhe na/ bcom ldan 'das/ chos kyi rnam grangs 'di ni/ mi shes pa thams cad sel ba dang / shes pa thams cad dang ldan pa'i slad du'o/ /de nas bcom ldan 'das la tshe dang ldan pa maung+gal gyi </font><hr>278a<br><font size=+1>


@#/ /bu chen pos 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ rdzu 'phrul dang ldan pa mchog tu bstan par bgyi ba lags so/ /de ci'i slad du zhe na/ bcom ldan 'das/ mig gi rnam par shes par bgyi ba gang lags pa de ni/ rdzu 'phrul ma lags kyi/ bcom ldan 'das/ gang mig gi rnam par shes par bgyi ba'i chos thams cad la se gol gtogs pa tsam yang mos par mi bgyid pa de ni/ rdzu 'phrul gyi mchog lags pa'i slad du'o// de nas bcom ldan 'das la tshe dang ldan pa nam grub 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ bsam gtan pa'i mchog tu bstan par bgyi ba lags so/ /de ci'i slad du zhe na/ bcom ldan 'das/ chos kyi rnam grangs 'di ni/ nyon mongs pa thams cad nges par sreg pa lags pa'i slad du'o/ /de nas bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dang chos kyi rnam grangs 'di 'dzin pa'am/ kun chub par bgyid pa'am/ mos par bgyid </font><hr>278b<br><font size=+1>


ba de dag ni/ nyon mongs pa ma mchis par gnas pa'i mchog tu stan par bgyi ba lags so/ /de ci'i slad du zhe na/ bcom ldan 'das/ chos kyi rnam grangs 'di ni/ nyon mongs pa'i dgra thams cad dang bral ba dang / chos thams cad kyis ma gos pa lags pa'i slad du'o/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ sbyangs pa'i yon tan smra ba'i mchog tu bstan par bgyi ba lags so/ /de ci'i slad du zhe na/ bcom ldan 'das/ chos kyi rnam grangs 'di ni/ nyon mongs pa thams cad sbyangs pa dang / chos thams cad kyi kun nas nyon mongs pa can du mi 'gyur ba'i slad du'o/ /de nas bcom ldan 'das la tshe dang ldan pa sgra gcan zin gyis 'di skad ces gsol to/ /bcom ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ bslab pa la dga' ba'i mchog tu bstan par bgyi ba lags so/ /de ci'i slad du zhe na/ bcom ldan 'das/ chos kyi rnam grangs 'di ni/ bslab pa thams cad kyi pha rol tu phyin pa lags pa'i slad du'o/ /de nas bcom ldan 'das la tshe dang ldan pa nye bar 'khor gyis 'di skad ces gsol to/ /bcom </font><hr>279a<br><font size=+1>


@#/ /ldan 'das/ rigs kyi bu'am/ rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ mos par bgyid pa de dag ni/ 'dul ba 'dzin pa'i mchog tu bstan par bgyi ba lags so/ /de ci'i slad du zhe na/ bcom ldan 'das/ chos kyi rnam grangs 'di ni/ nyon mongs pa thams cad sel bar bgyid pa lags pa'i slad du'o/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ rigs kyi bu'am rigs kyi bu mo gang dag chos kyi rnam grangs 'di 'dzin pa'am/ kun chub par bgyid pa'am/ myos par bgyid pa de dag ni/ mang du thos pa'i mchog tu bstan par bgyi ba lags so/ /de ci'i slad du zhe na/ bcom ldan 'das| chos kyi rnam grangs 'di ni/ thos pa thams cad dang ldan pa lags pa'i slad du'o/ /de ltar nyan thos chen po de dag thams cad kyi rang rang gi mchog brjod pa dag gis chos kyi rnam grangs 'di mngon par bstod do/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ de lta bas na/ khyod kyis chos thams cad bsal ba med cing gzhag pa med pa la gnas pas sangs rgyas kyi byang chub 'di dag nyid kyis yang dag par ston cig /chos gang yang dor du med pa dang / thob par byar med par chos ston cig / </font><hr>279b<br><font size=+1>


yongs su shes par byar med pa dang / spang du med pa dang / bsgom du med pa dang / mngon sum du byar med pa dang / mngon par rtogs par byar med pa dang / 'khor ba las bskyod du med pa dang / mya ngan las 'das par 'gror med pa dang / rgyun du zhugs pa'i 'bras bu thob par byar med pa dang / lan gcig phyir 'ong bar 'gyur ba dang / phyir mi 'ong bar 'gyur ba dang / dgra bcom pa nyid kyi 'bras bu thob par byar med par chos ston cig /de ci'i phyir zhe na/ kun dga' bo/ chos thams cad ni/ rgyun du zhugs pa dang / lan gcig phyir 'ong ba dang / phyir mi 'ong ba dang / dgra bcom pa'i chos yin te/ chos kyi dbyings mnyam pa nyid kyi phyir ro/ /kun dga' bo/ de lta bas na/ khyod kyis byang chub sems dpa'i theg pa pa'i gang zag rnams la nyan thos dang / rang sangs rgyas kyi sa las bzlar med pa dang / sangs rgyas kyi chos rnams thob par byar med par chos ston cig /de ci'i phyir zhe na/ kun dga' bo/ chos thams cad ni/ sangs rgyas kyi chos yin te/ chos kyi dbyings mnyam pa nyid kyi phyir ro/ /kun dga' bo/ gzhan yang khyod kyis rnal 'byor spyod pa'i dge slong dgra bcom pa nyid mngon sum du bya bar 'dod pa rnams la 'dod chags dang / zhe sdang dang / gti mug spang du med par chos ston cig /de bzhin gshegs pa bltar med pa dang / chos mnyan du med pa dang / dge 'dun la bsnyen bkur byar med par chos ston cig / </font><hr>280a<br><font size=+1>


@#/ /kun dga' bo/ 'dod chags dang / zhe sdang dang / gti mug rnams ni/ spang du med pa kho na ste/ 'dod chags dang / zhe sdang dang / gti mug rnams ya ma brla yin pa'i phyir ro/ /kun dga' bo/ skad gcig pa rnams ni/ spang bar bya ba ma yin te/ med pa'i phyir ro/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ ji ltar de bzhin gshegs pa bltar ma mchis pa lags/ ji ltar chos mnyan du ma mchis pa lags/ ji ltar dge 'dun bsnyen bkur bgyir ma mchis pa lags/ bcom ldan 'das kyis bka' stsal pa/ kun dga' bo/ de bzhin gshegs pa ni/ bstan du med pa ste/ de ni/ mig gis blta bar mi nus so/ /kun dga' bo/ chos ni/ brjod du med pa ste/ de ni/ rna bas mnyan par mi nus so/ /kun dga' bo/ dge 'dun ni/ 'dus ma byas pa ste/ de ni/ lus sam/ ngag gam/ sems kyis bsnyen bkur byar mi nus so/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ sangs rgyas bcom ldan 'das rnams kyi chos nyid 'di ltar rtogs par dka' ba ni/ ngo mtshar lags so/ /bcom ldan 'das kyis bka' stsal pa/ kun dga' bo/ de ni/ khyod ji skad zer ba de bzhin te/ rnam grangs 'dis na sangs rgyas bcom ldan 'das </font><hr>280b<br><font size=+1>


rnams kyi chos nyid rtogs par dka'o/ /de ci'i phyir zhe na/ kun dga' bo/ nyon mongs pa thams cad las kyang sems yongs su sbyang dgos la/ chos gang las kyang bskyod par yang mi bya/ 'phags par yang mi bya ba'i phyir ro/ /kun dga' bo/ gang rnam grangs 'dis de bzhin gshegs pa rnams kyi chos kyi tshul la 'jug cing mos par byed pa'i sems can de dag ni/ ngo mtshar du gyur pa yin par rig par bya'o/ /kun dga' bo/ rigs kyi bu'am/ rigs kyi bu mo gang dag nga'i bstan pa 'di la rab tu byung ba chos kyi rnam grangs 'di 'dzin pa'am/ kun chub par byed pa'am| mos par byed pa de dag gis ni/ yul 'khor gyi zas lags par zos so/ /de dag ni/ de bzhin gshegs pa'i bstan pa la legs par rab tu byung ngo / /de dag gis ni/ mi'i lus thob pa legs par thob bo/ /de dag gis ni/ bdud sdig can btul lo/ /de dag gis ni/ nga'o snyam pa'i nga rgyal nges par bcom mo/ /de dag gis ni/ sbyin gnas sbyangs so/ /de dag gis ni| yon gnas su gzung bar bya'o/ /de dag gis ni/ bsod nams kyi zhing du blta bar bya'o/ /de ci'i phyir zhe na/ kun dga' bo/ chos kyi rnam grangs 'di ni/ mngon pa'i nga rgyal can rnams dang / 'bras bu la dmigs pa rnams dang / byang chub la dmigs pa rnams dang / sngon gyi rgyal ba rnams la bya ba ma byas pa rnams kyis bzod par mi nus pa'i phyir ro/ /chos kyi </font><hr>281a<br><font size=+1>


@#/ /rnam grangs 'di bstan pa na byang chub sems dpa' lhag pa'i bsam pa brtan bas mi skye ba'i chos la bzod pa thob par gyur to/ /de nas bcom ldan 'das kyis de'i tshe 'dzum pa mdzad do/ /'di ni/ sangs rgyas bcom ldan 'das rnams kyi chos nyid do/ gang gi tshe 'dzum pa mdzad pa de'i tshe bcom ldan 'das kyi zhal gyi sgo nas 'od zer kha dog du ma kha dog sna tshogs 'di lta ste/ sngon po dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung nas 'od zer de dag gis 'jig rten gyi khams mtha' yas mu med pa snang bas khyab par byas te/ tshangs pa'i 'jig rten gyi bar dag tu song nas phyir log ste bcom ldan 'das la lan gsum bskor ba byas nas bcom ldan 'das kyi spyi gtsug tu nub par gyur to/ /de nas sangs rgyas kyi byin gyi rlabs kyis tshe dang ldan pa kun dga' bo stan las langs te bla gos phrag pa gcig tu gzar nas pus mo g.yas pa'i lha nga la btsugs te bcom ldan 'das ga la de logs su thal mo sbyar ba btung nas bcom ldan 'das la 'di skad ces gsol to/ /bcom ldan 'das/ de bzhin gshegs pa rnams ni/ rgyu ma mchis/ rkyen ma mchis par 'dzum pa mi mdzad na/ bcom ldan 'das 'dzum pa mdzad pa'i rgyu ni/ gang lags/ rkyen ni/ gang lags/ de skad ces gsol pa </font><hr>281b<br><font size=+1>


dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo/ 'khor 'di'i nang nas dge slong mngon pa'i nga rgyal can du gyur pa nyis brgya po de dag gis mngon nga rgyal med pa'i chos 'di thos nas len pa med par zag pa rnams las sems rnam par grol lo/ /byang chub sems dpa' lhag pa'i bsam pa brtan pas ni/ mi skye ba'i chos le bzod pa thob bo/ /kun dga' bo/ byang chub sems dpa' lhag pa'i bsam pa brtan pa 'di ni/ bskal ba khrims bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ bskal ba rin po che thams cad kun tu snang ba la 'jig rten gyi khams me tog thams cad kyis rnam par bkra ba zhes bya bar de bzhin gshegs pa dgra bcom pa yang dag par rdzogs pa'i sangs rgyas rin po che'i pad+ma dpal gyi snying po can zhes bya bar 'gyur ro/ /de'i sangs rgyas kyi zhing yang yon tan bkod pa dpag tu med pa dang ldan par 'gyur te| sangs rgyas kyi zhing de'ang byang chub sems dpa' 'ba' zhig gis yongs su gang bar 'gyur ro/ /de nas bcom ldan 'das la tshe dang ldan pa kun dga' bos 'di skad ces gsol to/ / bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ de'i phyir kun dga' bo/ khyod kyis chos kyi rnam </font><hr>282a<br><font size=+1>


@#/ /grangs 'di chos thams cad g.yo ba med pa zhes bya bar zungs shig /lhag pa'i bsam pa brtan pa'i le'u zhes bya bar yang zungs shig /bcom ldan 'das kyis de skad ces bka' bstsal nas tshe dang ldan pa kun dga' bo dang / byang chub sems dpa' lhag pa'i bsam pa brtan pa dang / byang chub sems dpa' de dag dang / dge slong de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do| |'phags pa lhag pa'i bsam pa brtan pa'i le'u zhes bya ba theg pa chen po'i mdo rdzogs so// //rgya gar gyi mkhan po su ren+d+ra bod+hi dang / pradz+nyA wa rma dang / zhu chen gyi lo tsA ba ban+d+he ye shes sde la sogs pas bsgyur cing zhus te gtan la phab pa/ </font><hr>

</table>