rgya gar skad du/ AR+Ya tri shra ra Na ga ma na nA ma ma hA yA na sU tra/ bod skad du/ 'phags pa gsum la skyabs su 'gro ba zhes bya ba theg pa chen po'i mdo/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' rla ba na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs so// 282b de nas de'i tshe tshe dang ldan pa shA ra dwa ti'i bu gcig pu dben par 'dug pa dang / sems kyis sems kyi yongs su rtog pa 'di lta bu skyes so/ /ston pa ni/ bdag gi mngon sum du gyur na/ bde bar gshegs pa chos kyi rje'i spyan sngar bdag song la rigs kyi bu'am/ rigs kyi bu mo dad pa dang ldan pa gang la la sangs rgyas dang / chos dang / dge slong gi dge 'dun la skyabs su song ba'i gang zag de'i bsod nams ji snyed cig /gsog par 'gyur ba'i don de zhu bar bya'o snyam du sems so/ /de nas tshe dang ldan pa shA ri'i bu phye ma red kyi dus kyi tshe nang du yang dag par 'jog las langs te bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /phyogs gcig tu 'dug nas bcom ldan 'das la tshe dang ldan pa shA ri'i bus 'di skad ces gsol to/ /btsun pa/ bdag gcig pu dben par mchis te/ nang du yang dag 'jog la mchis pa na sems kyis sems kyi yongs su rtog pa 'di lta bu skyes te/ rigs kyi bu'am/ rigs kyi bu mo dad pa dang ldan pa gang la la sangs rgyas dang / chos dang / dge slong gi dge 'dun la skyabs su mchis pa'i gang zag de'i bsod nams ji snyed cig gsog par 'gyur snyam bgyid lags so/ /de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to// 283a @#/ /shA ri'i bu/ khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo'i tshogs phal po che'i don dang / lha dang mi rnams la phan pa dang / bde ba'i phyir zhus pa legs so legs so/ /gang khyod de bzhin gshegs pa'i spyan sngar 'ongs te don 'di yongs su zhu bar sems pa de ni/ shA ri'i bu| don de nyid rnam par shes par bya ba'i phyir dpes bstan par bya ste/ skyes bu gang zag 'ga' zhig rdzu 'phrul gyi mthu 'di lta bu dang ldan par gyur pas gang 'di dzam+bu'i gling dang / nye ba'i gling zheng dang srid du dpag tshad bdun stong yod pa'i dzam+bu'i gling de na gang srog chags gnas pa de dag 'jig rten gyi khams gzhan du bkod de/ lag mthil ltar mnyam par byas pa rin po che sna bdun la 'di lta ste/ gser dang / dngul dang / baiDUR+Ya dang / shel dang / mu tig dmar po dang / rdo'i snying po dang / spug rnams la dzam+bu'i gling cam gyi mchod rten srid du tshangs pa'i 'jig rten gyi bar la thug par brtsigs te/ mchod rten de la lha'i spos dang / lha'i me tog dang / lha'i phreng ba dang / lha'i gdugs dang rgyal mtshan dang / ba dan rnams kyis mchod pa byas la/ de nas skyes bu de rdzu 'phrul gyi mthu 'di lta bu dang ldan par gyur pas gang rgya mtsho chen po bzhi'i chu de dag 'jig rten 283b gyi khams gzhan du byo ste/ ma ru ka'i til mar gyis rgya mtsho chen po bzhi ltar bkang ba'i nang du snying po ri rab tsam btsugs la/ bskal pa mang po'i mtha'i ji srid par mar me'i rgyun mi 'chad par bus na/ shA ri'i bu/ de ji snyam du sems/ skyes bu de gzhi de las bsod nams mang du gsog snyam mam/ gsol pa/ bcom ldan 'das/ mang lags so/ /bde bar gshegs pa/ mang lags so/ /nyan thos dang / rang sangs rgyas thams cad las 'das pa lags te/ bcom ldan 'das/ 'di ni/ de bzhin gshegs pa'i yul lo/ / bde bar gshegs pa/ 'di ni/ de bzhin gshegs pa'i yul lo/ /bka' stsal pa/ shA ri'i bu/ rigs kyi bu'am/ rigs kyi bu mo gang la la zhig sangs rgyas dang / chos dang / dge 'dun la skyabs su song ba'i bsod nams kyi phung po de la bsod nams kyi phung po snga ma des brgya'i char yang nye bar mi 'gro ste/ stong dang / brgya stong gi cha dang / grangs dang / rgyu dang / bgrang bar yang nye bar mi 'gro'o/ /de nas chos kyi rnam grangs 'di bshad pa'i tshe stong gsum gyi stong chen po'i 'jig rten gyi khams 'di g.yos/ rab tu g.yos/ kun tu rab tu g.yos/ 'gul/ rab tu 'gul/ kun tu rab tu 'gul/ ldeg /rab tu ldeg go /kun tu rab tu ldeg go /de'i tshe der klog gi rgyun chen po byung ngo / /lha rnams kyis kyang rnga sgra bsgrags 284a @#/ /so| |de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo/ khyod kyis 'di ltar chos kyi rnam grangs 'di sgo mtha' yas pa sgrub pa zhes bya bar zungs shig /de'i don ni/ de ltar blta bar bya ste/ de de bzhin du zungs shig /bcom ldan 'das kyis de skad ces bka' stsal nas tshe dang ldan pa shA ri'i bu dang / dge slong gzhan dag kyang bcom ldan 'das kyis bka' stsal pa la mngon par bstod do/ /'phags pa gsum la skyabs su 'gro ba zhes bya ba theg pa chen po'i mdo rdzogs so// //rgya gar gyi mkhan po sarba dz+nyA de ba dang / zhu chen gyi lo tsA ba ban+d+he dpal brtsegs kyis bsgyur cing zhus te gtan la phab pa/ |