rgya gar skad du/ ta thA ga ta saM gI ti nA ma ma hA yA na sU tra/ bod skad du/ de bzhin gshegs pa bgro ba zhes bya ba theg pa chen po'i mdo/ /bam po dang po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs so/ /de'i tshe de bzhin gshegs pa bsod snyoms gcig gis zla ba gsum nang du yang dag 'jog la zhugs nas bzhugs so/ /de nas 'jam dpal gzhon nur gyur pa zla ba gsum po de nyid 'das pa dang / bcom ldan 364b 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /tshe dang ldan pa shA ri'i bu'ang zla ba gsum po 'das nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /de nas tshe dang ldan pa maung+gal gyi bu chen po dang / tshe dang ldan pa 'od srung chen po dang / tshe dang ldan pa kA t+y+'+ai bu chen po dang / tshe dang ldan pa gsum po che chen po dang / tshe dang ldan pa ka pi na dang / tshe dang ldan pa don yod rgyal po dang / tshe dang ldan pa rab 'byor dang / tshe dang ldan pa byams ma'i bu gang po dang / tshe dang ldan pa nye bar 'khor dang / tshe dang ldan pa nam gru dang / tshe dang ldan pa 'char ka nag po dang / tshe dang ldan pa kun dga' bo dang / tshe dang ldan pa grags sbyin dang / tshe dang ldan pa yul 'khor skyong dang / tshe dang ldan pa gro bzhin skyes bye ba nyi shu pa dang / tshe dang ldan pa sgra gcan zin dang / gnas brtan de lta bu dag dang / de la sogs pa nyan thos stong nyis brgya lnga bcu'i bar dag bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /rigs kyi bu bzang skyong dang / rigs kyi bu rin chen 'byung gnas dang / yon tan sbed dang / ral gri'i tshogs can dang / mis byin dang / chu lha 365a @#/ /dang / dbang pos byin dang / gus byin dang / mis byin dang / de dag dang / gzhan yang de la sogs pa byang chub sems dpa' lnga stong tham pa bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /de nas lha'i dbang po brgyad byin sum cu rtsa gsum pa'i lha rnams dang lhan gcig bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /lha'i bu yongs su dga' ldan dang / lha'i bu dpal bzang dang / lha'i bu sprul pa dag kyang bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /mi mjed kyi bdag po tshangs pa'ang lha'i bu stong phrag du ma dag dang lhan cig bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /de zla ba'ang bcom ldan 'das ga la ba der dong ste phyin nas bcom dang / lha'i bu rab zhi dul ba'i dbang phyug rnams gnas gtsang ma'i ris kyi lha'i bu stong phrag du ma dag dang lhan cig bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs 365b gcig tu 'khod do/ /de nas lha'i bu nyi ma dang / lha'i bu zla ba'ang bcom ldan 'das ga la ba der dong ste phyin nas bcom ldan 'das kyi zhabs la mgo bos phyag btsal te phyogs gcig tu 'khod do/ /de nas 'jam dpal gzhon nur gyur pa stan las langs te bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das gnas pa gang gis dgun zla gsum bzhugs shing / bcom ldan 'das kyi dbang po rnams ni| yongs su dang / zhal mdog ni/ yongs su dag /sku mdog ni/ yongs su dkar lags/ de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ nga ni/ sangs rgyas bgro bas zla ba gsum gnas shing / 'jam dpal/ nga ni/ de bzhin gshegs pa bgro ba dang / chos bgro bas zla ba gsum gnas gnas so/ /'jam dpal gyis gsol pa/ bcom ldan 'das/ sangs rgyas bgro ba dang / de bzhin gshegs pa bgro ba dang / chos bgro ba de gang lags/ bcom ldan 'das/ sangs rgyas bgro ba dang / de bzhin gshegs pa bgro ba dang / chos kyi bgro ba de'i ngo bo ji lta bu lags/ bcom ldan 'das/ de bzhin gshegs pa rnams dang / 366a @#/ /de bzhin gshegs pa thabs cig tu mos pa mdzad pa ji lta bu lags pa'i bka' mchid de'i snod du bdag kyang gyur na legs lags so/ /de nas bcom ldan 'das kyis 'jam dpal gzhon nur gyur pa la legs so/ /zhes bya ba byin te/ 'jam dpal/ legs so/ /legs so/ /'jam dpal/ khyod de bzhin gshegs pa la de bzhin gshegs pa de bzhin gshegs pa de dag dang thabs cig tu bgro ba'i ngo bo gang yin pa'i don nyid 'dri bar sems pa ni/ 'jam dpal/ khyod yang legs so/ / 'jam dpal/ khyod sngon gyi rgyal ba la lhag par bya ba byas shing sangs rgyas 'bum phrag mang po la dge ba'i rtsa ba skyed/ sangs rgyas 'bum phrag mang po la bsnyen bkur byas su zin kyang 'jam dpal/ rigs kyi bu dang / rigs kyi bu mo de dag gi mthus na chos bgro ba la khyod spobs so/ /'jam dpal/ sangs rgyas bgro ba dang / de bzhin gshegs pa bgro ba dang / chos bgro ba'i chos kyi rnam grangs 'di gang dag gi lag tu 'gro ba de dag ni/ bdud sdig can gyi lag tu 'gro bar mi 'gyur ro/ /'jam dpal/ sangs rgyas bgro ba dang / de bzhin gshegs pa bgro ba dang / chos bgro ba'i chos kyi rnam grangs 'di gang dag gi lag tu 'gro ba'i rigs kyi bu'am/ rigs kyi bu mo de dag gi mdun du'ang de 366b bzhin gshegs pa mngon sum du gyur la/ de dag kyang ngas mthong bar rig par bya'o/ /'jam dpal/ sangs rgyas bgro ba dang / de bzhin gshegs pa bgro ba dang / chos bgro ba 'di rigs kyi bu'am/ rigs kyi bu mo gang dag gi lag tu 'gro ba dang / gnag dag spong bar byed pa dag kyang ngas mthong ngo / /'jam dpal/ rigs kyi bu dang / rigs kyi bu mo gang dag chos kyi rnam grangs 'di spong bar mi byed pa'i rigs kyi bu dang / rigs kyi bu mo de dag ni/ dad pa dang ldan par 'gyur/ dad par 'gyur/ drang ba dang / g.yo med pa dang / spyod lam phun sum tshogs pa dang / lhag pa'i bsam pa phun sum tshogs par 'gyur ro/ /'jam dpal/ yang rigs kyi bu dang / rigs kyi bu mo de dag tshul khrims dang ldan par 'gyur ro/ /le lo can dang / brnab sems can dang / gnod sems can gyi sems su mi 'gyur ro/ /dran pa nyams pa dang / ser sna can du mi 'gyur ro/ /'jam dpal/ rigs kyi bu dang / rigs kyi bu mo de dag tshul khrims dang ldan par 'gyur ro/ /de dag ni/ le lo med pa dang / brnab sems med pa dang / gnod sems kyi sems med pa dang / ser sna med pa dang / dran pa dang ldan pa dang / blo gros dang ldan pa dang / rtogs pa dang ldan pa dang / khrel yod pa phun sum tshogs pa dang / brtson 'grus brtsams pa dang / mos pa mang bar 'gyur ro/ /de skad ces bka' 367a @#/ /stsal pa dang / bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das/ 'di ltar bcom ldan 'das kyis lha dang / mi dang / lha ma yin dang bcas pa dang / lha dang bcas pa'i 'jig rten gyi mdun du sangs rgyas bgro ba dang / de bzhin gshegs pa bgro ba dang / chos bgro ba'i chos kyi rnam grangs kyi ting nge 'dzin 'di bka' stsal cing bshad pa de'i dus la bab lags so/ /bde bar gshegs pa/ de'i dus la bab lags te/ 'di ltar bcom ldan 'das las thos nas de bzhin nyid du 'dzin par 'gyur lags so/ /de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ khyod de'i phyir legs par rab tu nyon la yid la zungs shig dang bshad do/ /bcom ldan 'das/ legs so/ /zhes gsol te/ 'jam dpal gzhon nur gyur pa bcom ldan 'das kyi ltar nyan pa dang / bcom ldan 'das kyis de la 'di skad bka' stsal to/ /'jam dpal/ shar phyogs logs na sangs rgyas kyi zhing stong 'das pa na 'jig rten gyi khams mngon par dga' ba zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas mi 'khrugs pa zhes bya ba bzhugs te 'tsho zhing 367b bzhes la chos kyang ston to/ /'jam dpal/ de na ngas de bzhin gshegs pa dgra bcom pa yang dag par rdzogs pa'i sangs rgyas mi 'khrugs pa de la 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas mi 'khrugs pas gang la gnas te bla na med pa yang dag par rdzogs pa'i byang chub tu mngon par rdzogs par sangs rgyas/ de skad ces smras pa dang / 'jam dpal/ de bzhin gshegs pa mi 'khrugs pa des nga la 'di skad ces smras so/ /byis pa so so'i skye bo'i bdag tu 'du shes pa gang la gnas pa de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de skad ces smras pa dang / 'jam dpal/ ngas de bzhin gshegs pa mi 'khrugs pa de la 'di skad ces smras so/ /byis pa so so'i skye bo'i bdag tu 'du shes pa gang la gnas/ de skad ces smra pa dang / des nga la 'di skad ces smras so/ /mi shes pa la gnas nas byis pa so so'i skye bo'i bdag tu 'du shes pa byung ba ni/ mi gnas pa ste/ de lta bu la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so| |'jam dpal/ gzhan yang de bzhin gshegs pa mi 'khrugs pas pa la 'di skad ces smras so/ /shAkya'i rgyal po'i mchog shAkya thub pas ci la gnas te bdag bla na med pa yang 368a @#/ /dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ ngas de bzhin gshegs pa mi 'khrugs pa la 'di skad ces smras so/ /byis pa so so'i skye bo gang la gnas pa'i lta bar gyur pa drug cu rtsa gnyis kun tu 'byung ba de la gnas nas kho bo bla na med pa yang dag par rdzogs pa'i byang chub tu mngon par rdzogs par sangs rgyas so/ /de skad ces smras pa dang / 'jam dpal/ de bzhin gshegs pa mi 'khrugs pas nga la 'di skad ces smras so/ / byis pa so so'i skye bo'i lta bar gyur pa drug cu rtsa gnyis gang la gnas te kun tu 'byung bar 'gyur/ de skad ces smras pa dang / 'jam dpal/ ngas de bzhin gshegs pa mi 'khrugs pa la 'di skad ces smras so/ /sgyu ma'i skyes bu gang la gnas pa'i sems dang sems las byung ba'i chos rnams rab tu 'jug pa de la gnas nas byis pa so so'i skye bo'i lta bar gyur pa drug cu rtsa gnyis kun tu 'byung ba de lta bu la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas te/ de ni| yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas kun 368b tu srung zhes bya ba des nga la 'di skad ces smras so/ /de bzhin gshegs pa shAkya rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ ngas de bzhin gshegs pa de la 'di skad ces smras so/ /byis pa so so'i skye bo gang la gnas pa'i 'dod chags dang / zhe sdang dang / gti mug kun tu 'byung ba de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de skad ces smras pa dang / 'jam dpal/ de bzhin gshegs pa des nga la 'di skad ces smras so/ /byis pa so so'i skye bo'i 'dod chags dang / zhe sdang dang / gti mug gang la gnas te kun tu 'byung bar 'gyur/ de skad ces smras pa dang / 'jam dpal/ ngas de bzhin gshegs pa de la 'di skad ces smras so/ /bsam gyis mi khyab pa'i dbyings la gnas nas byis pa so so'i skye bo'i 'dod chags dang / zhe sdang dang / gti mug kun tu 'byung bar 'gyur/ de skad ces smras pa dang / 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das/ ci'i slad du bsam gyis mi khyab pa'i dbyings de bsam gyis mi khyab pa lags/ bka' stsal pa/ 'jam dpal/ gnas med pa zhes bya ba'i gnas 369a @#/ /med pa la gnas te byis pa so so'i skye bo rnams kyi 'dod chags dang / zhe sdang dang / gti mug kun tu 'byung ngo / /'jam dpal/ gzhan yang ngas de bzhin gshegs pa kun tu srung de la 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas kun tu srung gis gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / de bzhin gshegs pa des nga la 'di skad ces smras so/ /byis pa so so'i skye bo rnams kyi mtshams med pa'i las rnams gang la gnas te kun tu 'byung ba de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so| |de skad ces smras pa dang / 'jam dpal gzhon nur gyur pas bcom ldan 'das la 'di skad ces gsol to/ /byis pa so so'i skye bo rnams kyi mtshams ma mchis pa'i las rnams gang la gnas te kun tu 'byung lags/ bcom ldan 'das kyis bka' stsal pa/ 'jam dpal/ byis pa so so'i skye bo rnams kyi mtshams med pa'i las rnams ni| yod pa ma yin pa de la gnas te kun tu 'byung ngo / /'jam dpal/ 'di lta ste/ dper na/ mi zhig gnyid kyis log pa'i rmi lam na sbrul gdug pa zhig lag gis bzung ba 369b las| des de zin nas gzhi de las de 'chi bar 'gyur ba'am/ 'chi ba la thug pa tsam du sdug bsngal zhing de 'chi bar nye ba'i tshor bas reg pa las sad par gyur na/ sad ma thag tu de'i sdug bsngal gyi tshor ba nyams su myong ba de dang / de dag med pa nyid du shes pa na/ 'jam dpal/ de ji snyam du sems/ ci mi de sbrul gdug pa des zin tam/ gsol pa/ bcom ldan 'das/ de ni/ ma lags so/ /'jam dpal/ 'di ji snyam du sems/ mi de ma zin bzhin du sdug bsngal bar gyur tam/ gsol pa/ bcom ldan 'das/ de ni/ ma lags so| |de ci'i slad du zhe na/ bcom ldan 'das/ de na sbrul gdug pa'ang ma mchis la/ bcom ldan 'das/ gang zin pa de'ang ma mchis pa lags na/ de na tshor bar 'gyur zhing mngon pa lta ga la mchis/ bka' stsal pa/ 'jam dpal/ de bzhin du chos thams cad ni/ mi gnas pa ste/ chos thams cad mi gnas pa ci 'dra bar zin pa'ang de dang 'dra ste/ tshor ba'ang de dang 'dra'o/ /tshor ba ci 'dra bar sbrul gdug pa'ang de dang 'dra'o/ /sbrul gdug pa ci 'dra bar chos thams cad kyang de dang 'dra'o/ /chos thams cad ci 'dra bar mtshams med pa'ang de dang 'dra'o/ /mtshams med pa ci 'dra bar byang chub kyang de dang 'dra'o/ /byang chub ci 'dra bar gnas kyang de dang 'dra ste/ de lta bu la gnas nas kho bo bla na med pa yang dag par 370a @#/ /rdzogs pa'i byang chub tu mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas ri rab lta bu zhes bya ba de langs 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas ri rab lta bus ci la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ de bzhin gshegs pa ri rab lta bus nga la 'di skad ces smras so/ /sa'i khams dang / chu'i khams dang / me'i khams dang / rlung gi khams dang / nam mkha'i khams gang la gnas pa'i mtha' de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal| gzhan yang de bzhin gshegs pa ri rab lta bus nga la 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / ngas de la 'di 370b skad ces smras so/ /de bzhin gshegs pa ri rab lta bus gang la gnas te 'gro ba drug ston pa de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas kun tu me tog ces bya ba da ltar bzhugs te 'tsho zhing gzhes la chos kyang ston te/ de la ngas 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas kun tu me tog gis gang la gnas te bla na med pa yang dag par rdzogs pa'i byang chub mngon par rdzogs par sangs rgyas la/ sangs rgyas kyi zhing 'di'ang ji ltar mngon par bsgrubs/ de skad ces smras pa dang / 'jam dpal/ de bzhin gshegs pa dgra bcom pa yang dag par rdzogs pa'i sangs rgyas kun tu me tog gas nga la 'di skad ces smras so/ /kho bo dang po sems bskyed pa la gnas nas bla na med pa yang dag par rdzogs pa'i byang chub mngon par rdzogs par sangs rgyas la/ sgyu ma'i skyes bus rnam par thar pa brgyad ji ltar mngon par bsgrubs pa de ltar sangs rgyas kyi zhing 'di'ang mngon par bsgrubs so/ /de skad ces bka' stsal pa dang / 'jam dpal gzhon 371a @#/ /nur gyur pas bcom ldan 'das la 'di skad ces gsol to/ /bcom ldan 'das/ ji ltar na/ de bzhin gshegs pa kun tu me tog des dang po sems bskyed pa la gnas nas bla na med pa yang dag par rdzogs pa'i byang chub mngon par rdzogs par sangs rgyas lags/ de skad ces gsol pa dang / bcom ldan 'das kyis bka' stsal pa/ 'jam dpal/ dang po'i sems gang yin pa de'ang ma skyes pa yin la/ da ltar gyi de'ang ma skyes pa yin te/ dang po'i sems bskyed pa de lta bu la gnas nas de bzhin gshegs pa dgra bcom pa yang dag par rdzogs pa'i sangs rgyas kun tu me tog bla na med pa yang dag par rdzogs pa'i byang chub mngon par rdzogs par sangs rgyas so| |'jam dpal/ gzhan yang de bzhin gshegs pa kun tu me tog gis nga la 'di skad ces smras so/ /de bzhin gshegs pa shAkya'i rgyal po'i mchog shAkya thub pas ci la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ ngas de bzhin gshegs pa de la 'di skad ces smras so/ /gang la gnas nas chags pa thams cad shes pa de la gnas nas kho bo bla na med pa yang dag par rdzogs pa'i byang chub mngon par rdzogs par 371b sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas mya ngan thams cad las yang dag par 'das pa zhes bya ba bzhugs te 'tsho zhing gzhes la chos kyang ston te/ de la ngas 'di skad ces smras so/ /de bzhin gshegs pa mya ngan thams cad las yang dag par 'das pa ci la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal| de bzhin gshegs pa des nga la 'di skad ces smras so/ /byis pa so so'i skye bo'i srid pa mngon par 'grub pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal/ gzhan yang de bzhin gshegs pa mya ngan thams cad las yang dag par 'das pas ngal 'di skad ces smras so/ /de bzhin gshegs pa shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / ngas de la 'di skad ces smras so/ /'khor ba na 'khor ba'i tshe sems can thams cad kyi sngon gyi mtha' mi mngon pa gang la gnas pa de la gnas te kho bo 372a @#/ /bla na med pa yang dag par rdzogs pa'i byang chub mngon par rdzogs par sangs rgyas so/ /de skad ces bka' stsal pa dang / 'jam dpal gzhon nur gyur pas bcom ldan 'das la 'di skad ces gsol to/ /'khor ba na 'khor ba'i tshe gang la gnas te sems can thams cad kyi sngon gyi mtha' mi mngon lags/ de skad ces gsol pa dang / bcom ldan 'das kyis bka' stsal pa/ 'jam dpal/ ma rig pa la gnas nas byis pa so so'i skye bo thams cad kyi sngon gyi mtha' mi mngon no/ /'jam dpal gyis gsol pa/ bcom ldan 'das/ ci'i slad du sngon gyi mtha' mi mngon lags/ bcom ldan 'das kyis bka' stsal pa/ 'jam dpal/ 'di ltar chos thams cad ni/ dngos po med pa ste/ dngos po med pa la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal gyis gsol pa/ de bzhin gshegs pa ting nge 'dzin ji lta bu zhig la gnas nas chos 'di dag la yang dag par bgro ba mdzad/ bcom ldan 'das kyis bka' stsal pa/ 'jam dpal/ bsam gyis mi khyab cing dri ma med pa shin tu yongs su dkar ba'i phyag rgya'i ting nge 'dzin la gnas nas de bzhin gshegs pa rnams chos 'di dag la bgro ba mdzad do/ /'jam dpal/ sangs 372b rgyas kyi sku gcig kyang med mod kyi/ ting nge 'dzin de la gnas na sangs rgyas kyi sku tha dad pa'ang snang ngo / /'jam dpal/ sangs rgyas kyi zhing gcig kyang med mod kyi/ ting nge 'dzin de la gnas na sangs rgyas kyi zhing tha dad pa'ang snang ngo / /'jam dpal/ nyan thos gcig kyang med mod kyi/ ting nge 'dzin de la gnas na nyan thos tha dad pa'ang snang ngo / /'jam dpal/ sangs rgyas kyi gsung gcig kyang med mod kyi/ ting nge 'dzin de la gnas na sangs rgyas kyi gsung tha dad pa'ang grag go /'jam dpal/ rnam par rig pa gcig kyang med mod kyi/ ting nge 'dzin de la gnas na rnam par rig pa tha dad pa'ang byed do/ /'jam dpal/ sems can gcig kyang med mod kyi/ ting nge 'dzin de la gnas na sems can mang po de dag kyang rnam par grol bar 'gyur ro/ /'jam dpal gyis gsol pa/ bcom ldan 'das/ a la la ting nge 'dzin 'di ni/ rgya che ba lags so/ /bcom ldan 'das/ a la la ting nge 'dzin 'di ni/ bsam gyis mi khyab pa lags so/ /bcom ldan 'das/ a la la ting nge 'dzin 'di ni/ chags pa ma mchis pa lags so/ /bcom ldan 'das/ a la la ting nge 'dzin 'di ni/ rtogs par dka' ba lags so/ /bcom ldan 'das/ a la la ting nge 'dzin 'di ni/ zab pa lags so/ /bcom ldan 'das/ a la la ting nge 'dzin 'di ni/ shin tu 'das pa lags so/ / 373a @#/ /bcom ldan 'das kyis bka' stsal pa/ 'jam dpal/ de de bzhin no/ /ji skad smras pa bzhin te/ 'jam dpal/ ting nge 'dzin 'di ni/ bsam gyis mi khyab pa'o| |'jam dpal/ ting nge 'dzin 'di ni/ chags pa med pa'o/ /'jam dpal/ ting nge 'dzin 'di ni/ rtogs par dga' ba'o/ /'jam dpal/ ting nge 'dzin 'di ni/ zab pa'o/ /'jam dpal| ting nge 'dzin 'di ni/ shin tu 'das pa'o/ /'jam dpal/ ting nge 'dzin 'di la gnas nas sangs rgyas bcom ldan 'das de dag la dri ba'i phyir sangs rgyas kyi zhing 'di nas sangs rgyas kyi zhing gzhan du'ang mi 'gro'o/ /sangs rgyas bcom ldan 'das de dag kyang nga'i thad du mi 'ong ste/ nga'ang de dag la 'dri'o/ /de dag kyang nga la 'dri bar byed do/ /'on kyang 'jig rten gyi khams 'di nyid na gnas te 'jig rten gyi khams de dang de dag na gnas pa'i sangs rgyas bcom ldan 'das de dag la 'dri'o/ /'jig rten gyi khams de dang de dag na gnas pa'i sangs rgyas bcom ldan 'das de dag kyang nga 'di na gnas pa la 'dri bar byed do/ /'jam dpal/ nga ting nge 'dzin 'di la gnas te sangs rgyas kyi zhing thams cad du dbyangs kyis go bar byed de/ sangs rgyas bcom ldan 'das de dag gi thad du sgra de sgrib pa'i bya ba mi byed do/ /'jam dpal/ sangs rgyas bcom ldan 'das de dag kyang ting nge 'dzin 'di la 373b gnas te sangs rgyas kyi zhing thams cad du dbyangs kyis go bar byed de/ nga la'ang sgrib par mi byed do/ /'jam dpal/ ting nge 'dzin 'di la gnas te sangs rgyas bcom ldan 'das de dag la lan yang 'debs la/ sangs rgyas bcom ldan 'das de dag kyang ting nge 'dzin 'di la gnas nas nga la'ang lan 'debs so/ /'jam dpal/ 'di lta ste/ dper na/ mi zhig 'di nas song ste grong khyer chen po rgya che ba zhig tu phyin la/ de dag gcig la gcig smra ste/ de dag phan tshun smra ba'i tshe brag ca'i sgra zhig grag par gyur na/ 'jam dpal/ 'di ji snyam du sems/ de na brag ca gcig shos kyis brag ca gzhan la go bar byed dam/ ci brag ca snga ma shos kyi sgra brag ca phyi ma shos gzhan gyis shes sam/ 'on te phan tshun du thos sam kun tu shes/ 'jam dpal gyis gsol ba/ bcom ldan 'das/ brag ca snga ma shos de'i sgra de dag brag ca phyi ma shos kyis thos pa'am 'tshal ba ma mchis lags so/ /de ci'i slad du zhe na/ bcom ldan 'das| brag ca ni/ rnam par rig pa ma mchis pa'i slad du ste/ rnam par rig pa ma mchis pa de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas kun tu 'od ces bya ba de la ngas 'di skad ces smras so/ /de bzhin gshegs pa dgra bcom pa yang 374a @#/ /dag par rdzogs pa'i sangs rgyas kun tu 'od kyis gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / de bzhin gshegs pa kun tu 'od kyis nga la 'di skad ces smras so/ /'du shes la brten nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de la ngas 'di skad ces smras so/ /ji ltar 'du shes la brten te bla na med pa yang dag par rdzogs pa'i byang chub mngon par rdzogs par sangs rgyas des nga la 'di skad ces smras so/ /'du shes la gnas pa de ji lta bu/ de skad ces smras pa dang / 'jam dpal/ ngas de bzhin gshegs pa de la 'di skad ces smras so/ /'du shes la gnas pa med do/ /des smras pa/ de ltar na gnas pa med pas kho bo bla na med pa yang dag par rdzogs pa'i byang chub mngon par rdzogs par sangs rgyas so| |'jam dpal/ gzhan yang de bzhin gshegs pa kun tu 'od kyis nga la 'di skad ces smras so/ /de bzhin gshegs pa shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ ngas de bzhin gshegs pa de 374b 'di skad ces smras so/ /de bzhin gshegs pas byang chub sems dpa' rnams bla na med pa yang dag par rdzogs pa'i byang chub tu lung bstan pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas kun tu srung gi bdag po sprin gyi dbang phyug sgron ma zhes bya ba de la ngas 'di skad ces smras so| |de bzhin gshegs pa kun tu srung gi bdag po sprin gyi dbang phyug sgron mas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ des nga la 'di skad ces smras so/ /bsam gyis mi khyab pa'i dbyings gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal/ gzhan yang de bzhin gshegs pa des nga la 'di skad ces smras so/ /de bzhin gshegs pa shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sang rgyas/ de la ngas 'di skad ces smras so/ /sems can gyi khams gang la gnas 375a @#/ /pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de nas 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das/ sems can gyi khams zhes bgyi ba gang la gnas pa lags/ de skad ces gsol ba dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ de'i phyir khyod kyis don de nyid shes par bya ba'i phyir dpe bstan par bya'o/ / dpes bka' stsal pa'i don 'dir mi kha cig gis shes par yang 'gyur ro/ /'jam dpal/ 'di lta ste/ dper na/ sgyu ma mkhan nam sgyu ma mkhan gyi slob ma mkhas pa zhig gis stong gi bar snang la glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs dang / mi'i lus dag sprul te 'ong zhing 'gro ba'am/ yan lag bzhi ba'i dpung gi tshogs dag kun tu ston par byed na/ 'jam dpal/ de ji snyam du sems/ yan lag bzhi pa'i dpung gi tshogs de gang na gnas/ dpung gi tshogs bstan pa gang yin pa gang yang de na snang ngam/ 'jam dpal gyis gsol pa/ bcom ldan 'das/ de ni/ ma lags te/ de na dpung gi tshogs shin tu ma mchis na snang 375b bar 'gyur ba'am/ gang na gnas par 'gyur ba'am/ mngon par lta ga la zhig mchis/ 'jam dpal/ de bzhin du sems can nam/ sems can du btags pa'ang shin tu yod pa ma yin na de gnas par 'gyur ba dang / mngon pa lta ga la yod/ 'jam dpal/ gnas de lta bu la gnas te nga bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /bstan pa 'di bshad pa na 'dod pa na spyod pa dang / gzugs na spyod pa'i lha'i bu stong phrag drug khri chos rnams la chos kyi mig rdul med cing dri ma dang bral ba rnam par dag go /bram ze lhag pa'i nga rgyal can 'bum phrag sum cu rtsa gnyis ni/ lhag pa'i nga rgyal med pa'i shes pa skyes so/ /lha'i bu 'bum phrag bzhi ni/ mi skye ba'i chos la bzod pa skyes so/ /de nas bcom ldan 'das de'i tshe 'dzum pa mdzad de/ 'di ni/ sangs rgyas bcom ldan 'das rnams gang gi tshe 'dzum pa mdzad pa'i chos nyid de/ de'i tshe bcom ldan 'das kyi zhal gyi sgo nas 'od zer kha dog sna tshogs kha dog du ma 'di lta ste/ sngon po dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung nas de dag gis 'jig rten gyi khams mtha' yas su med pa dag 'od kyis khyab par byas te/ 376a @#/ /tshangs pa'i 'jig rten gyi bar du song nas slar log ste bcom ldan 'das la lan gsum bskor ba byas nas bcom ldan 'das kyi dbu'i gtsug tu mi snang bar gyur to/ /bcom ldan 'das kyis 'dzum pa mdzad ma thag tu stong gsum gyi 'jig rten gyi khams dag 'od kyis snang bar byas shing rab tu brgyan to/ /de nas 'jam dpal gzhon nur gyur pas bcom ldan 'das la 'di skad ces gsol to/ /sangs rgyas bcom ldan 'das rnams ni/ rgyu ma mchis rkyen ma mchis par 'dzum pa mi mdzad na/ bcom ldan 'das 'dzum pa mdzad pa'i rgyu ni/ gang lags/ rkyen ni/ gang lags/ bcom ldan 'das kyis bka' stsal pa/ bstan pa 'di bshad pa na 'dod pa na spyod pa dang / gzugs na spyod pa'i lha'i bu stong phrag drug khri chos rnams la chos kyi mig rdul med cing dri ma dang bral ba rnam par dag go /bram ze lhag pa'i nga rgyal can 'bum phrag sum cu rtsa gnyis ni/ lhag pa'i nga rgyal med pa'i shes pa skyes so/ /lha'i bu 'bum phrag bzhi ni/ mi skye ba'i chos la bzod pa skyes so/ /lha'i bu sum khri nyis stong po 'di dag lha'i ris 'di nas shi 'phos te/ de bzhin gshegs pa mi 'khrugs pa'i sangs rgyas kyi zhing du skye bar 'gyur la/ de dag sangs rgyas kyi zhing de nas sangs rgyas kyi zhing dag 376b tu'ang 'gro bar 'gyur ro/ /de dag gis bskal pa dpag tu med grangs med par bla na med pa yang dag par rdzogs pa'i byang chub bsgrubs nas byang chub mngon par rdzogs par 'tshang rgya ste| de bzhin gshegs pa dgra bcom pa yang dag par rdzogs pa'i sangs rgyas kun tu 'od ces bya bar 'gyur ro/ /byang chub mngon par rdzogs par sangs rgyas nga de dag gi sangs rgyas kyi zhing yang kun nas snang ba dang ldan par 'gyur ro/ /dper na/ sum cu rtsa gsum pa'i lha rnams kyi blta na sdug pa rtag tu brgyan pa de bzhin du/ de dag byang chub thob pa'i 'jig rten gyi khams kyang rtag tu brgyan par 'gyur te/ 'jam dpal/ 'dzum pa mdzad pa'i rgyu ni/ de yin no/ /rkyen ni/ de yin no/ /'jam dpal/ 'di lta ste/ shar phyogs logs na de bzhin gshegs pa shAkya thub pa zhes bya ba grangs med dpag tu med pa dag kyang sangs rgyas kyi bgro ba dang / de bzhin gshegs pa'i bgro ba dang / chos kyi bgro ba 'di nyid ston par mdzad do/ /de bzhin du lho phyogs dang / de bzhin du nub phyogs dang / de bzhin du byang phyogs dang / de bzhin du 'og gi phyogs dang / de bzhin du steng gi phyogs dang / de bzhin du phyogs bcu dag na de bzhin gshegs pa grangs med dpag tu med pa dag kyang sangs rgyas kyi bgro ba dang / chos kyi bgro ba dang / de bzhin gshegs pa'i bgro ba 'di nyid ston 377a @#/ /par mdzad de/ ngas yi ge gang gis bstan pa yi ge de nyid kyis de bzhin gshegs pa de dag kyang ston pa mdzad do/ /'jam dpal/ 'das pa'i sangs rgyas bcom ldan 'das rnams kyis kyang sangs rgyas kyi bgro ba dang / de bzhin gshegs pa'i bgro ba dang / chos kyi bgro ba chos kyi rnam grangs 'di nam mkhas yongs su zin pa'i sa phyogs 'di nyid du yang dag par bsgrags so/ /'jam dpal/ ma 'ongs pa'i dus na sangs rgyas bcom ldan 'das gang dag 'byung bar 'gyur ba de dag kyang de bzhin gshegs pa'i bgro ba dang / sangs rgyas kyi bgro ba dang / chos kyi bgro ba chos kyi rnam grangs 'di nam mkhas yongs su zin pa'i sa phyogs 'di nyid du 'chad par 'gyur ro/ / 'jam dpal/ de bzhin gshegs pa byams pas kyang sangs rgyas kyi bgro ba dang / de bzhin gshegs pa'i bgro ba dang / chos kyi bgro ba chos kyi rnam grangs 'di nam mkhas yongs su zin pa'i sa phyogs 'di nyid du yang dag par sgrog par 'gyur ro/ /'jam dpal/ sangs rgyas kyis gsungs pa'o/ /zhes smra ba gang yin pa de ni/ yang dag par smra ba ste/ 'jam dpal/ sangs rgyas kyi bgro ba dang / de bzhin gshegs pa'i bgro ba dang / chos kyi bgro ba'i chos kyi rnam grangs 'di ni/ de bzhin gshegs pas 377b gsungs pa'o/ /zhes smra ba gang yin pa de ni/ yang dag par smra ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas yan lag mchog ces bya ba des nga la 'di skad ces smras so/ /de bzhin gshegs pa shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / de la ngas 'di skad ces smras so/ /sgyu ma'i skyes bu rnam par thar pa brgyad mngon par sgrub pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal/ gzhan yang de bzhin gshegs pa dgra bcom pa yang dag par rdzogs pa'i sangs rgyas yan lag mchog ces bya ba de la ngas 'di skad ces smras so/ /de bzhin gshegs pa yan lag mchog gis gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /de bzhin gshegs pa shAkya thub pas gang la gnas te phung po'i lhag ma med pa'i mya ngan las 'das pa'i dbyings su yongs su mya ngan las 'da' bar 'gyur/ de nas 'jam dpal gzhon nur gyur 378a @#/ /pas bcom ldan 'das la 'di skad ces gsol to/ /bcom ldan 'das gang la gnas te phung po'i lhag ma mchis pa'i mya ngan las 'das pa'i dbyings su yongs su mya ngan las 'da' bar 'gyur lags/ bcom ldan 'das kyis bka' stsal pa/ 'jam dpal/ sangs rgyas bcom ldan 'das rnams ni/ bsam gyis mi khyab pa'i mtha'i yul la gnas te yongs su mya ngan las 'da'o/ /'jam dpal/ chos thams cad ni/ de lta bu la gnas pa ste/ de ni/ yid kyi yang dag par bgro ba'i dri ba'o// 'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas kun tu gzigs zhes bya ba des nga la 'di skad ces smras so/ /de bzhin gshegs pa shAkya'i rgyal po'i mchog shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / de la ngas 'di skad ces smras so/ /sangs rgyas kyi sprul pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal/ gzhan yang de bzhin gshegs pa kun tu gzigs zhes bya ba de la ngas 'di skad ces smras so/ /de 378b bzhin gshegs pa kun tu gzigs kyis gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /mtha' gang kho na la gnas nas/ kho bo la 'dri ba de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas nam mkha' rnam dag mngon 'phags dpal gyi rgyal po zhes bya ba des ngal 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas shAkya'i rgyal po'i gtso bo shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / ngas de bzhin gshegs pa de la 'di skad ces smras so/ /byis pa so so'i skye bo'i chos rnams gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ / 'jam dpal gyis gsol pa/ bcom ldan 'das kyis byis pa so so'i skye bo'i chos rnams gang na gnas lags/ bcom ldan 'das kyis bka' stsal pa/ 'jam dpal/ khyod 379a @#/ /kyis byis pa so so'i skye bo'i chos rnams yang dag par rdzogs par mthong ngam/ 'jam dpal gyis gsol pa/ bcom ldan 'das/ de ni/ ma lags so| |de ci'i slad du zhe na/ bcom ldan 'das/ byis pa so so'i skye bo'i chos rnams ni/ phyi dang nang na mi dmigs lags so/ /bcom ldan 'das kyis bka' stsal pa/ 'jam dpal/ 'di ltar phyi dang nang la mi gnas par ngas bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal/ gzhan yang de bzhin gshegs pa de la ngas 'di skad ces smras so/ /de bzhin gshegs pa dgra bcom pa yang dag par rdzogs pa'i sangs rgyas nam mkha' rnam dag mngon 'phags dpag gyi rgyal pos gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /sgyu ma'i skyes bu rnam par thar pa brgyad mngon par sgrub pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de skad ces smras pa dang / 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das/ 'di ltar 379b sgyu ma'i skyes bu nyid ma mchis shing mi dmigs pa lags na/ de'i rnam par thar pa brgyad kyi sgo mngon par sgrub pa lta ga la mchis/ bcom ldan 'das kyis bka' stsal pa/ 'jam dpal/ 'di ji snyam du sems/ chos gang med cing mi dmigs pa de sgyu ma'i skyes bu yin nam/ gsol pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ 'jam dpal/ 'di ji snyam du sems/ ci sgyu ma'i skyes bu yod dam/ 'jam dpal gyis gsol pa/ bcom ldan 'das/ de ni/ ma lags so/ / bcom ldan 'das kyis bka' stsal pa/ 'jam dpal/ de bzhin du rnam par thar pa brgyad po de lta bu la gnas te nga bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /'jam dpal/ gzhan yang shar phyogs logs na de bzhin gshegs pa 'od kyi dkyil 'khor mngon par 'phags pa'i me tog dpal gyi gzi brjid rgyal po zhes bya ba de la ngas 'di skad ces smras so/ /de bzhin gshegs pa 'od kyi dkyil 'khor mngon par 'phags pa'i me tog dpal gyi gzi brjid rgyal pos gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 380a @#/ /nges nga la 'di skad ces smras so/ /gzugs dang / tshor ba dang / 'du shes dang / 'du byed rnams gang la gnas pa dang / rnam par shes pa gang la gnas pa de la gnas te kho bo bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal gyis gsol pa/ bcom ldan 'das/ gzugs dang / tshor ba dang / 'du shes dang / 'du byed rnams dang / rnam par shes pa dag gang na gnas lags/ bcom ldan 'das kyis bka' stsal pa/ 'jam dpal| 'di ji snyam du sems/ phung po lnga ma gtogs par phung po lnga gang la gnas pa'i chos 'ga' zhig 'di na yod dam/ 'jam dpal gyis gsol pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ 'jam dpal/ 'di ji snyam du sems/ gzugs kyi ngo bo nyid gang yin pa de gzugs la gnas pa yin nam/ 'jam dpal gyis gsol pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ 'jam dpal/ 'di ji snyam du sems| tshor ba dang / 'du shes dang / 'du byed rnams gang dag yin pa dang / rnam par shes pa'i ngo bo nyid gang yin pa de rnam par shes pa la gnas pa yin nam/ gsol 380b pa| de ni/ ma lags so/ /bcom ldan 'das kyis bka' stsal pa/ 'jam dpal/ 'di ji snyam du sems/ gzugs dang / tshor ba dang / 'du shes dang / 'du byed rnams dang / rnam par shes pa mi gnas pa yin nam/ 'jam dpal gyis gsol pa/ bcom ldan 'das/ de lta lags te/ bcom ldan 'das/ gzugs dang / tshor ba dang / 'du shes dang / 'du byed rnams dang / rnam par shes pa ni/ mi gnas pa lags so/ /bcom ldan 'das kyis bka' stsal pa/ 'jam dpal/ de bzhin du rnam par rig pa'i ngo bo nyid gang yin pa de ni/ rnam par rig pa med pa yin la/ rnam par rig pa med pa gang yin pa de ni/ byang chub ste/ gzugs dang / tshor ba dang / 'du shes dang / 'du byed rnams dang / rnam par shes pa'ang de lta bu la gnas pa'o/ /'jam dpal/ gzhan yang de bzhin gshegs pa 'od kyi dkyil 'khor mngon par 'phags pa'i me tog dpal gyi gzi brjid rgyal po des nga la 'di skad ces smras so/ /de bzhin gshegs pa shAkya'i rgyal po'i gtso bo shAkya thub pas gang la gnas te bla na med pa yang dag par rdzogs pa'i byang chub tu mngon par rdzogs par sangs rgyas/ de skad ces smras pa dang / de la ngas 'di skad ces smras so/ /chos thams cad zad pa med pa/ nam mkha'i mtha' dang mnyam pa de ni/ byang chub ste/ de lta bu la 381a @#/ /gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /chos thams cad ni/ de lta bu la gnas pa ste/ de ni| yid kyi yang dag par bgro ba'i dri ba'o/ /bstan pa 'di bshad pa na stong gsum gyi stong chen po'i 'jig rten gyi khams 'di rnam pa dag pa rab tu g.yos so/ /'gul to/ / ldeg go /'khrugs so/ /'ur 'ur ro/ /chem chem mo/ /thams cad dang ldan pa'i stong gsum gyi stong chen po'i 'jig rten gyi khams snang ba chen pos khyab par gyur to/ /'jig rten gyi bar mun pa mun nag gang na nyi ma dang zla ba 'di gnyis 'di ltar rdzu 'phrul che ba/ 'di ltar mthu che ba/ 'di ltar gzi brjid che ba'i 'od kyis snang bar ma nus pa dang / gzi brjid kyis gzi byin can du ma nus pa dang / snang bas snang bar ma nus pa dang / gsal bas gsal zhing snang bar ma nus pa gang dag yin pa 'jig rten gyi bar de dag thams cad skad cig de nyid dang / thang gcig de nyid dang / yud tsam de nyid la snang bas khyab par gyur to/ /de nas de'i tshe bcom ldan 'das 'dzum pa mdzad de/ 'di ni/ sangs rgyas bcom ldan 'das rnams gang gi tshe 'dzum pa mdzad pa'i chos nyid de/ de'i tshe bcom ldan 'das kyi zhal gyi sgo nas 'od zer kha dog sna tshogs kha dog du ma 'di lta ste/ sngon po 381b dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung nas de dag gis 'jig rten gyi khams mtha' yas mu med pa dag 'od kyis khyab par byas te/ tshangs pa'i 'jig rten gyi bar du song nas slar log ste bcom ldan 'das la lan gsum bskor ba byas nas bcom ldan 'das kyi dbu'i gtsug tu mi snang bar gyur to/ /de nas bcom ldan 'das kyis de'i tshe g.yas phyogs logs su glang po che'i lta stangs kyis gzigs nas tshe dang ldan pa kun dga' bo la bka' stsal pa| kun dga' bo/ 'khor 'di ni/ dag pa ste/ gtsang ba/ snying po la gnas pa'o/ /kun dga' bo/ bstan pa 'di bshad pa na dge slong lnga brgya ni/ len pa med par zag pa rnams las sems rnam par grol lo/ /kun dga' bo/ rgyal bu rgyal byed kyi tshal 'di na dge slong ji snyed cig gnas pa kun dga' bo/ de dag gi nang nas chos 'di dag la gang the tshom za ba'am/ yid gnyis za ba'am/ som nyi za ba'i dge slong 'ga' yang ma byung ngo / /byang chub sems dpa' lnga stong gis mi skye ba'i chos la bzod pa thob par gyur to/ / srog chags stong phrag du mas ni/ bla na med pa yang dag par rdzogs pa'i byang chub tu sems bskyed de/ de dag thams cad kyang ma 'ongs pa'i dus na de bzhin gshegs pa 382a @#/ /dgra bcom pa yang dag par rdzogs pa'i sangs rgyas kun tu brjod ces bya bar ming mthun pa nyid du 'gyur ro/ /zhes bcom ldan 'das kyis lung bstan to/ /de dag gi tshe'i tshad ni/ bskal pa gcig thub par 'gyur ro/ /de dag gi dam pa'i chos ni/ bskal pa phyed kyi bar du gnas par 'gyur ro/ /de nas yul ko sa la'i rgyal po gsal rgyal 'di snyam du sems par gyur to/ /bdag gis ni/ bcom ldan 'das yun ring zhig tu ma mthong bas/ bdag gis bcom ldan 'das la phyag bya ba dang / blta ba dang / bsnyen bkur bya ba'i phyir bcom ldan 'das ga la ba der 'gro bar bya'o snyam mo/ /de nas yul ko sa la'i rgyal po gsal rgyal gyis de'i tshe sna chen po la gtogs pa dbyibs ring la smras pa/ bcom ldan 'das la phyag bya ba dang / blta ba dang / bsnyen bkur bya ba'i phyir 'dong dgos kyi/ nga'i shing rta bzhon pa bzang po dang ldan pa thog mar sbyor cig /yang yul ko sa la'i rgyal po gsal rgyal gyis de'i tshe sna chen po la gtogs pa dpal mchog la smras pa/ bcom ldan 'das la phyag bya ba dang / blta ba dang / bsnyen bkur bya ba'i phyir 'dong dgos kyi/ dpal mchog /khyod song la yan lag bzhi pa'i dpung gi tshogs dag shoms shig ces 382b sgos shig /yang yul ko sa la'i rgyal po gsal rgyal gyis btsun mo dam pa la smras pa/ bcom ldan 'das la phyag bya ba dang / blta ba dang / bsnyen bkur bya ba'i phyir khyod kyang 'dong ngo / /zhes smras so/ /yang yul ko sa la'i rgyal po gsal rgyal gyis gzhon nu sags byin la smras pa/ gzhon nu sa gas byin/ khyod song la ri dwags 'dzin gyi ma la rgyal po gsal rgyal na re/ bcom ldan 'das la phyag bya ba dang / blta ba dang / bsnyen bkur bya ba'i phyir 'dong dgos so/ /zhes spron cig /de nas yul ko sa la'i rgyal po gsal rgyal gyis sna chen po la gtogs pa rtsis pa sa ga bzang po la smras pa/ sa ga bzang po/ khyod song la grong khyer chen po mnyan yod kyi mi de dag thams cad kyang rgyar gzhug cing / ljongs kyi mi dang / grong rdal pa'i mi thams cad la'ang rkang thang pas kyang rkang thang pa dang / bzhi mdo pas kyang bzhi mdo pa dang / sum mdo bas kyang sum mdo pa dang / shing rta bas kyang shing rta ba la yul ko sa la'i rgyal po gsal rgyal na re/ bcom ldan 'das la phyag bya ba dang / blta ba dang / bsnyen bkur bya ba'i phyir 'dong dgos kyi| cha rdzas gyis shig ces spron cig /sna chen po la gtogs pa thams cad la'ang spron cig /khyim bdag mgon med zas sbyin la'ang spron cig /khyim bdag dang dpon bzang 383a @#/ /po la'ang sbron cig /khyim bdag sa ga la'ang sbron cig /khyim bdag klu dga' la'ang sbron cig /tshong ba dang khyim bdag thams cad la'ang sbron cig /khyim bdag bsod nams dpal 'byung la'ang sbron cig /khyim bdag bsod nams dpal la'ang sbron cig /khyim bdag bsod nams dpal gyi snying po dang / gcos min gyis byin dang / ri dwags 'dzin dang / 'phel byed dang / sa gas byin rnams la'ang sbron cig /khyim bdag dga' po dpal dang / dpa' bo'i 'gros kyis 'gro ba dang / dga' byed dang / dag pa'i sems dang / don grub dang / kun 'dzin rnams la'ang sbron cig /khyim bdag bkod pa'i mchog la'ang sbron cig /khyim bdag rna gtsug la'ang sbron cig /khyim bdag rna cha can la'ang sbron cig /khyim bdag me tog rna can la'ang sbron cig /bcom ldan 'das la phyag bya ba dang / blta ba dang / bsnyen bkur bya ba'i phyir 'dod dgos kyi/ yul ko sa la'i rgyal pos bka' stsal pa bzhin de ltar go ma thag tu grogs po dag dengs shig /grogs po dag dengs shig /de ltar sna chen po la gtogs pa rtsis pa sa ga bzang pos kyang rgyal po chen po ltar mnyan nas rgyal po gsal rgyal gyis ji skad bsgo ba bzhin bsgrags so/ /de nas btsun mo phreng thogs kyis bran mo 383b dpal bzang mo dang / bran mo me tog dpal dang / bran mo dpal dga' mo rnams la smras pa/ khyod deng la nga na re/ khyim bdag gi chung ma rab tu rtogs byed la/ bcom ldan 'das la phyag bya ba dang / blta ba dang / bsnyen bkur bya ba'i phyir 'dong dgos so/ /zhes sbron cig /nga'i tshig gis khyim bdag gi chung ma zla ba dang / dri med dang / bde dpal dang / 'phags ma dang / kun shes dang / dpe med dpal dang / bkod mchog ma dang / zla bzang ma dang / dri med ldan rnams la'ang sbron cig /gnang chen mo de dag gis jo mo legs so| |zhes jo mo'i ltar mnyan nas ji skad bsgo ba bzhin sbran to/ /de nas sna chen po la gtogs pa dbyibs ring gis rgyal po gsal rgyal gyi bzhon pa bzang po bshams so/ / bshams nas kyang yul ko sa la'i rgyal po gsal rgyal ga la ba der song ste phyin nas 'di skad ces smras so/ /lha'i chibs pa bzang po ni/ bshams lags so/ /de nas yul ko sa la'i rgyal po gsal rgyal gyis bcom ldan 'das la phyag bya ba dang / blta ba dang / bsnyen bkur bya ba'i phyir bzhon pa bzang po la zhon te rgyal po chen po'i mthu dang / rgyal po chen po'i rdzu 'phrul gyis btsun mo'i 'khor gyi nang na gnas shing / btsun mo'i 'khor gyis mdun gyis ni/ bltas/ ljongs kyi mi dang / grong rdal pas ni/ bskor/ yan lag 384a @#/ /bzhi pa'i dpung gi tshogs kyis ni/ mdun gyis bltas/ me tog dang / me tog phreng dang / bdug pa dang / dri dang / phreng ba dang / byug pa dang / phyi ma dang / gdugs dang / rgyal mtshan dang / bdan dang / gos dag ni/ thogs/ rin po che'i gos rin thang med pa dag ni/ khyer/ rin po che'i gos rgya che zhing yangs pa dag ni| bgos/ shing rta stong phrag drug khri dang / khyogs pa stong phrag drug khri dang / rkang thang ba stong phrag drug khris ni/ bskor/ ba dan stong phrag drug khris ni/ bsgreng / rol mo'i sgra stong phrag drug khri dang / rnga bo che dang sil snyan gyi sgra du ma dag ni/ sgrog cing / rgyal po chen po de'i mthus grong khyer chen po mnyan yod du dong ngo / /de nas yul ko sa la'i rgyal po gsal rgyal bzhon pa la ji srid bzhon du rung ba de srid du bzhon pas song ste/ bzhon pa las babs nas yul na mthu dang / brtson 'grus thob pa/ rgyal po rgyal rigs spyi bo nas dbang bskur bas rgyal po'i rtags lnga po gang dag yin pa 'di lta ste/ ral gri rin po che dang / gdugs rin po che dang / cod pan rin po che dang / bsil yab rin po che dang / mchil lham nor bu rin po che las byas pa ste/ de dag thams cad phud cing bzhag nas rkang pas rgyal bu rgyal byed kyi tshal du song ngo / /de nas ko sa la'i 384b rgyal po gsal rgyal gyis rgyal bu rgyal byed kyi tshal na sgra chung bar rig nas sna chen po la gtogs pa dbyibs ring la smras pa/ dbyibs ring / 'di ltar 'di ni/ bsam gtan pa gnas med pa rnams kyi gnas so/ /rnal 'byor pa dben pa la dga' ba rnams dang / stong pa nyid la gnas pa rnams dang / mtshan ma med pa la gnas pa rnams dang / smon pa med pa la gnas pa rnams kyi gnas so/ /bsam gtan pa mi gnas pa rnams kyi gnas te/ phas kyi rgol ba rnams kyis kyang stong la/ gnas pa rnam pa de lta bu de dag dang / sgra chung ba dang / dben pa 'dis gnas so/ /de nas yul ko sa la'i rgyal po gsal rgyal gyis sa ga gzhon nu dpal la smras pa/ sa ga gzhon nu dpal/ nga'i 'khor rnams gcom bskyungs shig /de nas yul ko sa la'i rgyal po gsal rgyal gyis bcom ldan 'das thams cad mkhyen pa/ thams cad gzigs pa/ rgyal bu rgyal byed kyi tshal na dge slong gi dge 'dun gyis bskor te/ dge slong gi dge 'dun gyis mdun gyis bltas shing / lha'i 'khor mang pos bskor nas mdun gyis bltas pa la chos ston cing bzhugs pa mthong ngo / /de nas yul ko sa la'i rgyal po gsal rgyal dga' ba dang / mchog tu dga' ba skyes nas de'i tshe tshigs su bcad pa 'di dag gsol to/ /snang zhing gsal bar mdzad pa 'od mdzad pa/ /phas kyi rgol ba kun gyis mi g.yos shing / 385a @#/ /'khor gyi nang na zla ba nya ba ltar/ /gang zag dam pa rnam par lam mer bzhugs/ /chos kyi dam pa ston pa mdzad pa na/ /phyogs bcu kun tu khyod ni tha le zhing / bdud kyi sde dpon ma lus rab bcom nas/ /gser gyi ri bo 'phags bzhin lam mer gda'/ /klu yi bdag po mi g.yos gnas pa ltar/ /gau ta mA yi nyan thos mi pha ma lags/ /zhi gnas dgyes kyi sras rnams zhi gnas dga'/ /de dag nang na rgyal ba gsung tshe mdzes/ /yon tan yang dag ston pa 'jig rten phags/ /de ltar rgyal ba shAka thub lam mer bzhugs/ /ji ltar ri rab rgya mtsho'i nang 'phags shing / /rin chen sna tshogs rnams kyis mdzes pa ltar/ /de bzhin shAkya khyu mchog 'jig rten 'phags/ /sems can kun yang khyod 'phags lam mer bzhugs/ /ji ltar pad+ma chus ni mi gos ltar/ /de bzhin 'jig rten dag na ma gos bzhugs/ /ji ltar rim ba rtag tu brtan pa ltar/ /khyod ni yang dag 'phags pas kun tu mdzad/ /de ltar rgyal ba mkhas pa rnams kyis bskor/ /lha dang bcas pa'i 'khor nang mngon par 'phags/ /sum cu rtsa gsum gnas na yongs 'du shing // me tog legs chad 'phags mdzes lhag ge ltar/ /de bzhin lha dang bcas pa'i 'khor nang na/ /shAkya khyu mchog mtshan gyis rnam par mdzes/ /'od gsal gyur brgyad nor bu 385b bai DUR+Ya| |du gul ka shi gos kyi steng bzhag na/ /kun gyis mi gos lta bur dgra bcom rnams/ /me long bzhin du sems dag dri ma med/ /khyod kyi nyan thos de dag ni/ /byams pa shin tu bsgoms nas gnas/ /nyan thos brtan rnams ye shes dga'/ /nyon mongs ma mchis gdams ngag ston/ /rgyal po 'dir ni mchis pa yang / /de dag rnams kyis mtshor lags/ /gang gi nyan thos de dag ni/ /zhi zhing chos kun mi gnas pa/ /cang mkhyen khyod la phyag 'tshal lo/ /skyes mchog khyod la phyag 'tshal lo/ /ye shes kyis ni sku bsgoms shing / /ye shes sku yis zhugs pa lags/ /ye shes sku yis rdzogs sangs rgyas/ /sku yis zla ba gsum du bzhugs/ /rdzogs sangs rgyas pa smra rnams mchog /ye shes ldan pa rtag tu mdzes/ /phyi ma'i dus na ye shes las| |nyams 'gyur dge slong rnams kyang 'byung / /rgod cing dbang po phal pa dang /rgod pa'i dge slong mkhyen nas ni/ /bsod snyoms gcig gis zla gsum du/ /rgyal ba ting nge 'dzin la bzhugs/ /phyi ma'i dus na zang zing la/ /brkam chags dge slong rnams 'byung bas/ /bsod snyoms gcig gis zla gsum du/ /rgyal ba ting nge 'dzin la bzhugs/ /phyi ma'i dus kyi dge slong phyir/ /khyod kyis de skad bka' stsal te/ /de tshe bdag dad pa rnams/ /bstan pa 'di la bslab pa 'byung / /sems can gang dag ma dad pa/ /chos 'di dag ni thos nas kyang / / 386a @#/ /de dag dga' bar mi 'gyur bas/ /de dag bskul phyir 'di mdzad do/ /bam po gnyis pa/ de nas yul ko sa la'i rgyal po gsal rgyal bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te/ bcom ldan 'das la dad pa'i sems kyis yang bcom ldan 'das kyi zhabs la mgo bos phyag btsal te dad pa'i sems kyis bcom ldan 'das mthong nas yang bcom ldan 'das kyi zhabs la mgo bos phyag btsal te bcom ldan 'das la 'di skad ces gsol to/ /bcom ldan 'das/ bdag ni/ yul ko sa la'i rgyal po lags so/ /bcom ldan 'das/ bdag ni/ yul ko sa la'i rgyal po lags te/ bcom ldan 'das kyi zhabs la mgo bos phyag 'tshal lags so/ /de nas bcom ldan 'das kyis yul ko sa la'i rgyal po gsal rgyal la bka' stsal pa/ rgyal po chen pos bkur sti byas pa dang / ri mo byas pa dang / mchod pa byas pas chog gi /longs shig /longs la rgyal po chen po rang gi stan la 'dug cig /de nas yul ko sa la'i rgyal po gsal rgyal spyan snga na 'dug cing bcom ldan 'das la mig mi 'dzum pas bltas so/ /bltas nas kyang rin po che'i gos rin thang med pa lag na thogs thogs pa dang / rang gi lus la gos gyon pa gang yin pa de lus 386b las phud de bcom ldan 'das la phul lo/ /phul nas kyang bcom ldan 'das la 'di skad ces gsol to/ /bcom ldan 'das/ bdag gi gos rin po che 'di ni/ sngon gyi las kyi rnam par smin pa las grub pa/ ma smad pa/ bzang ba/ kha na ma tho ba ma mchis pa/ rang gi lus la 'tshal 'tshal ba lags te/ 'di bdag gi dbang phyug gis su las 'phrog pa'ang ma mchis kyi/ sngon legs par spyad pa las mngon par grub pa lags na/ bcom ldan 'das kyi bzhes su gsol/ /de nas khyim bdag mgon med zas sbyin 'di snyam du sems par gyur te/ 'di ltar yul ko sa la'i rgyal po 'dis gos rin po che yongs su spyad spyad pa 'di bcom ldan 'das la phul lo snyam mo/ /de nas yul ko sa la'i rgyal po gsal rgyal bcom ldan 'das kyi mthus khyim bdag mgon med zas sbyin gyi sems kyi rtog pa sems kyis shes nas bcom ldan 'das la 'di skad ces gsol to/ /bcom ldan 'das/ bdag gi gos rin po che 'di snga nas bcom ldan 'das la dbul lo/ /snyam pa'i sems de lta bu ni/ ma skyes lags kyi/ bcom ldan 'das mthong nas ni/ sems skyes lags na thugs brtse ba'i slad du bcom ldan 'das kyis gos rin po che 'di bzhes su gsol/ bcom ldan 'das/ sems 'di ni/ myur du 'gyur ba lags la/ bcom ldan 'das/ de bzhin gshegs 387a @#/ /pa de dag ni/ rnyed par dka' ste/ u dum+ba ra'i me tog bzhin du mchog tu rnyed par dka' bas dbul lo snyam pa de skyes lags so/ /bdag gis bcom ldan 'das mnyes par bgyis nas de'i tshe tshigs su bcad pa 'di dag gsol to/ /khyod ni rkang gnyis gtso bo ste/ /bsod nams gzi brjid kun tu 'phags/ /nyon mongs can sems ma gtogs par/ /mthong na dga' ba su mi skyed/ /sems can ma rungs gang dag gis/ /thub dbang ma mchod de dag brlag /u dum+ba ra'i me tog ltar/ /gsal mdzad 'jig rten dag na dkon/ /shAkya seng+ge mi yi mchog /mgon po bdag gi deng gnyen gyi/ /ye shes la ni bdag smon pas/ /khyod la deng ni mchod pa bgyid/ /byang chub ye shes gang 'dod pa| |sangs rgyas rnams la mchod 'di lags/ /sangs rgyas ye shes ched kyi phyir/ /mi mchog la ni mchod bgyid na/ /mgon po bdag gi bzhes su gsol/ /rgyal ba bdag gi bzhes su gsol/ /sems can kun gyi don slad du/ /khyod la bdag ni na bza' 'bul/ /bdag gi sems ni tshar bcad cing / /bdag gis ser sna bcom pas na/ /chos rnams bskyed pa'i ched kyi phyir/ /bdag gi sems la gtong ba skyes/ /de nas bcom ldan 'das kyis yul ko sa la'i rgyal po gsal rgyal gyis na bza' phul ba bzhes nas rgyal po 387b gsal rgyal la bka' stsal pa/ rgyal po chen po/ khyod kyis sems bskyed pa rgya chen po skyes pa legs so/ /legs so/ /rgyal po chen po/ de'i phyir chos bzhi po dag la brtson par bya ste| bzhi gang zhe na/ rgyal po chen po/ 'di lta ste/ rgyal po rgyal rigs spyi bo nas dbang bskur ba yul na mthu dang brtson 'grus thob pas dge sbyong dang / bram ze tshul khrims dang ldan pa'i thang du 'gro bar bya zhing yongs su dri bar bya ba dang / de bzhin gshegs pa'i bstan pa bsrung ba dang bskyab pa'i phyir bsgrub par bya ba dang / zab mo la mos pas chos btsal bar bya ba'i phyir spro bar bya ba dang / log par lta ba dang bral bas yang dag pa nyid du nges par bya ba'i phyir spro bar bya ba ste/ rgyal po chen po/ chos bzhi po de dag la brtson par bya'o| |bcom ldan 'das kyis 'di skad ces bka' stsal nas bde bar gshegs pas de skad gsungs te/ ston pas gzhan yang 'di skad ces bka' stsal to/ /dge slong tshul khrims ldan rnams la/ /gus pa dag ni rtag byed cing / /dngos po kun gyis 'dri byed pa/ /des ni shes rab rnam par 'phel/ /dge slong rnams la gus pa dag /byas pa'i las ni dge ba yi/ /ji ltar dag pa de bzhin du/ /de yi sems ni dag par 'gyur/ /bstan pa srung ba byas pa ni/ /rtag tu kun nas srung ba yin/ /yan lag dang po 'di yis ni/ /lus ni nges 388a @#/ /par dag par 'gyur/ /rgyal rigs dag gis zab mo'i chos/ /rtag tu nyan cing 'dug byed cing / /phyir zhing thos par 'dod 'gyur zhing / /yang dang yang du tshol bar 'gyur/ /zab mo'i chos ni thos nas kyang / /log pa dag ni spyod mi byed/ /rgyal po log par lta bral zhing / /yang dag chos ni shes par 'gyur/ /zab mo'i chos ni shes nas kyang / /de ni log par mi spyod cing / /sdig pa kun dang bral bas na/ /des na rgyal po khyad par 'phags/ /chos kyi dam pa bzhi po la/ /rgyal rigs bzhi po rtag par ni/ /'gro ba ngan par de mi 'gro /de la bde 'gro rnyed mi dka'/ /sangs rgyas myur du mthong 'gyur zhing / /de las chos kyang nyan byed la/ /rdzogs sangs rgyas kyis bshad pa yi/ /zab mo'i chos ni shes par 'gyur/ /chos bzhi dag la ster byed cing / /sems kyis byang chub bsngo byed na/ /yar gyi ngo yi zla ba ltar/ /de yi ye shes 'phel bar 'gyur/ /sems kyis byang chub bsngo byed cing / /chos mchog dag ni tshol byed na/ /rkang gnyis dam pa rdzogs sangs rgyas/ 'jig rten dam par de 'os so/ /chos rnams kun gyi dam pa ste/ /chos mchog dag ni ston pa po/ /de la mchod pa byas nas ni/ /theg pa mchog tu nges par 'gyur/ /rgyal po rgyal rigs gang zhig ni/ /chos kyi dam pa tshol 'dod pa/ /yang dang yang du chos kyi 388b mchog /chos bzhi po la bstan par byos/ /rgyal po chen po/ gzhan yang mchog 'os ni/ sems can rnams kyi phyir chos kyi mchog rnam par 'byed do/ /rgyal po chen po/ chos kyi mchog gang zhe na/ rgyal po chen po/ chos kyi mchog ni/ chos thams cad gzung bar bya ba ma yin pa'o/ /sus gzung bar bya ba ma yin zhe na/ rgyal po chen po/ sus kyang mi 'dzin pa de'i phyir chos thams cad gzung bar bya ba ma yin no/ /zhes bya'o/ /rgyal po chen po/ chos thams cad chos thams cad ces bya ba ji lta bu zhe na/ rgyal po chen po/ chos de dag thams cad ni| chos ma yin te/ des na/ chos thams cad chos thams cad ces bya'o/ /de dag chos ma yin pa ji lta bu zhe na/ rgyal po chen po/ gang ji tsam du spyod pa de tsam du chos kyi 'du shes ma yin no/ /rgyal po chen po/ chos kyi 'du shes ma yin pa zhes bya ba ni/ mi shes pa 'byung ngo / /gal te 'du shes su dmigs na 'du shes ma yin par 'gyur ro/ /rgyal po chen po| 'du shes gzhan du gyur na 'du shes ma yin par 'gyur te/ rgyal po chen po/ 'du shes zhes bya ba 'di ni/ brda'o/ /rgyal po chen po/ 'du shes zhes bya ba 'di ni/ chags pa'o/ / rgyal po chen po/ 'du shes yod na byis pa zhes bya'o/ /rgyal po chen po/ byis pa zhes bya ba ni/ byis pa gnas par byed pa'o/ /ci'i phyir byis pa gnas par byed pa zhes bya zhe na/ byis pa 389a @#/ /gnas par byed pa'i phyir ro/ /ci nas gnas par byed ce na/ 'du shes gnas par byed do/ /'du shes de gang zhe na/ 'di lta ste/ bdag tu 'du shes pa dang srid par 'du shes pa dang / sems can du 'du shes pa dang / gzugs su 'du shes pa nas rnam par shes par 'du shes pa'i bar dang / mig tu 'du shes pa dang / rna bar 'du shes pa dang / snar 'du shes pa dang / lcer 'du shes pa dang / lus su 'du shes pa dang / yid du 'du shes pa nas 'du shes thams cad kyi bar du gnas par byed cing / tha na mya ngan las 'das par 'du shes par yang gnas par byed do/ /rgyal po chen po/ /mya ngan 'das pa zhes bya ba ci'i phyir mya ngan las 'das pa zhes bya zhe na/ mya ngan las 'das par 'du shes pa ste/ rgyal po chen po/ mya ngan 'das par 'du shes pa ni/ med pa'o/ /rgyal po chen po/ byis pa mya ngan 'das pa zhes bya ba ni/ 'khor lo'i tshul dang / chu klung 'khyil pa'i tshul gyis so/ /rgyal po chen po/ tshul zhes bya ba ci'i phyir tshul zhe na/ spyod yul ma yin pa ste/ gang na su'i spyod yul yang ma yin pa'o/ /su'i spyod yul yang ma yin pa ni/ 'du shes kyi spyod yul ma yin pa'o/ /rgyal po chen po/ spyod yul zhes bya ba ci'i phyir zhe spyod yul zhes bya zhe na/ sems de dang / spyod pa chen po de dang / yang dag pa ma yin pa'i spyod pa 389b sbed par byed pa'o/ /yang dag pa ma yin pa gang zhe na/ gang de kho na ma yin pa ni/ yang dag pa ma yin pa'o/ /de la yod pa ma yin pa zhes brjod pa ni/ thams cad yang dag pa ma yin pa ste| des na/ yod pa ma yin pa zhes bya'o/ /rgyal po chen po/ /yod pa ma yin pa zhes bya ba ci'i phyir yod pa ma yin pa zhes bya zhe na/ rgyal po chen po/ dngos po med do/ /yang dag pa ma yin pa ci'i phyir dngos po med ce na/ yang dag par ma yin pa ni/ mi rtag pa'o/ /yang dag pa ma yin pa ni/ mi sdug pa'o/ /yang dag pa ma yin pa ni/ bdag med pa'o/ /yang dag pa ma yin pa ni/ srid pa mi gtsang ba'o/ /gang mi dben pa de ni/ yang dag pa ma yin pa'o/ /rgyal po chen po/ de bzhin du de ni/ phyin ci log yin no/ /ci'i phyir phyin ci log ces bya zhe na/ rgyal po chen po/ phyin ci log ni/ tshu rol na'ang med/ pha rol na'ang med/ gnyi ga'i bar na'ang med na/ rgyal po chen po/ de ni/ 'du shes ltag la yod/ 'du shes de gang zhe na/ mi rtag par 'du shes pa dang / sdug bsngal bar 'du shes pa dang / bdag med par 'du shes pa dang / mi sdug par 'du shes pa'o/ /rgyal po chen po/ ci'i phyir 'du shes tshu rol ne'ang med| pha rol na'ang med/ gnyi ga'i bar na'ang med ce na/ mi rtag par 'du shes pa ni/ rtag pa kho nar 'du shes par ltos shig /rgyal po chen po/ ji skad du bstan par 'gyur 390a @#/ /zhe na| gnyi ga'i bar zhes bya ba ci'i phyir gnyi ga'i ngar zhes bya zhe na/ rgyal po chen po/ gang na bar med pa de na dbus kyang mi dmigs na/ de la mthar lta ga la 'gyur/ rgyal po chen po/ gang na dbus mi dmigs pa de na mtha' yang mi dmigs so/ /gang na mtha' mi dmigs pa de na 'gro ba'ang rnam par chad do/ /gang na 'gro bar rnam par chad pa de na su'ang song ba med do/ /gang na su'ang song ba med pa na 'gro ba'ang med do/ /gang na 'gro ba med pa de na nyid mtshams sbyor ba med do/ /gang nyid mtshams sbyor ba med pa de ni/ mtshams sbyor ba ste/ byang chub de ni/ gnas pa kho na'o/ byang chub gnas pa gang yin pa de ni/ 'dzin pa med pa'o/ /'dzin pa med pa gang yin pa de ni/ sems can zhes bya ste/ de'i phyir byang chub sems dpa' ni/ sems can gyi mchog ces brjod do/ /des na byang chub sems dpa' ni/ 'dzin pa med pa'o| |ci'i phyir 'dzin pa med ce na/ dmigs pa mi 'dzin pa de'i phyir 'dzin pa med pa zhes brjod de/ rgyal po chen po/ de dag ni/ chos kyi mchog go /de ltar na chos zab mo bstan cing de bzhin du de dag bshad de/ 'di ltar ma byas pa/ ma bsgyur ba/ ma bshig pa ste/ ngo bo nyid kyis stong ngo / /rgyal po chen po/ ngo bo nyid ces bya ba ci'i phyir ngo bo nyid 390b kyis stong zhe na/ gang bdag gi dngos po med pa de'i phyir chos thams cad ni/ ngo bo nyid kyis stong zhes bya'o/ /rgyal po chen po/ zab mo zhes bya ba ci'i phyir zab mo zhes bya zhe na/ rgyal po chen po/ /brtan pa rnams 'jug pa'o/ /rgyal po chen po/ brtan pa dag gang zhe na/ byang chub sems dpa' sems dpa' chen po rnams te/ de dag 'jug go /ci'i phyir 'jug ce na / chos thams cad stong pa la 'jug ste/ gang dag stong pa nyid la 'jug pa de dag 'jug ste/ de'i phyir chos thams cad ni/ stong pa nyid ces brjod do/ /gzung bar bya ba ma yin pa zhes bya ba ni/ chos thams cad mtshan ma med pa'o/ /rgyal po chen po/ ci'i phyir mtshan ma med ce na/ rgyal po chen po/ chos thams cad ni/ bdag med pa ste/ gang dag bdag med pa de dag ni/ bstan du med pa'o/ /gang dag bstan du med pa de dag ni/ mi 'khrugs pa'o/ /gang dag mi 'khrugs pa de dag ni/ gnas pa'o/ /gang dag gnas pa de dag ni/ ma bsgrubs pa'o/ /gang dag ma bsgrubs pa de dag ni/ chud zos pa med pa'o/ /gang chud zos pa med pa ni/ chos rnams kyi chos kyi dbyings gnas pa zhes bya'o/ /rgyal po chen po/ chos kyi dbyings gnas pa zhes bya ba ni/ ci'i phyir chos gnas pa zhes bya zhe na/ rgyal po chen po/ chos ni/ gnas med pa'o/ /gnas med pa zhes bya ba de ni/ dang po nyid nas mi dmigs 391a @#/ /la dang po nyid kyang mi dmigs so/ /gang dag gi gnas mi dmigs pa de dag gi 'gro ba'ang med do/ /'ong ba'ang med do/ /gang gi 'ong ba mi dmigs pa de thams cad ni/ stong pa'i dbyings zhes bya'o/ /rgyal po chen po/ ci'i phyir dbyings mi dmigs shes na/ gal te dbyings las dbyings shig dmigs na/ dbyings de nyid dbyings su 'gyur ro/ /rgyal po chen po/ de ltar na/ byis pa rnams ni/ rnam par thar pa la rgyug go /rgyal po chen po/ rnam par thar pa zhes bya ba ci'i phyir rnam par thar pa zhes bya zhe na| rnam par thar pa ni/ zad pa med pa'o/ /gang dag zad pa med pa la rgyug pa de dag ni/ zad par 'gyur ro/ /gang dag zad par 'gyur ba de dag ni/ yongs su bzad par 'gyur ro// gang dag yongs su zad par 'gyur ba de dag ni/ yongs su nyams par 'gyur ro/ /ji ltar yongs su nyams par 'gyur zhe na/ rang bzhin las yongs su nyams par 'gyur te| gang dag yongs su nyams par 'gyur ba de dag gi rnam par thar pa'i sgo ni/ thag ring ngo / /rgyal po chen po/ sgo zhes bya ba ci'i phyir sgo zhes brjod ce na/ gnyis la kun nas dga' ba de'i phyir sgo'o/ /rgyal po chen po/ rnam par thar pa'i sgo zhes bya ba 'di ni/ ldem po ngag go /rgyal po chen po/ ldem po ngag ces bya ba ci'i phyir ldem po dag 391b ces bya zhe na/ 'di la ngag cung zad kyang med la de la shes par bya ba'ang med do/ /gang la shes par bya ba med pa de ni/ rnam par shes par bya ba ma yin no/ /rgyal po chen po/ rigs pa ma yin pa mi rigs pa zhes bya ba ci'i phyir rigs pa ma yin pa zhe na/ len cing 'dor bar byed pa'i phyir ro/ /ci zhig len cing 'dor bar byed ce na/ gang na len pa med cing 'dor ba med pa'o/ /gang dag 'dor ba de dag ni/ rnam par rgyug pa'o/ /gang du rnam par rgyug ce na/ byang chub la rnam par rgyug go /stong pa nyid la rnam par rgyug go /rnam par rgyug pa de dag ni| bstan pa 'di dang / byang chub dang nye ba las de dag thag ring ngo / /rgyal po chen po/ nye ba zhes bya ba ci'i phyir nye ba zhes bya zhe na/ byang chub dang nye ba'ang ma yin/ mi nye ba'ang ma yin pa'o| |gang byang chub gang la bkod pa yod pa ma yin pa de'i phyir nye bar zhi ba dang / nye bar zhi ba ma yin pa zhes brjod par mi bya'o/ /rgyal po chen po/ nye bar zhi ba zhes bya ba dang / byang chub ces bya ba ci'i phyir byang chub ces bya zhe na/ seng+ge'i phyir ro/ /seng+ge gang zhe na/ bag tsha ba med pa'o/ /ci'i phyir bag tsha ba med pa zhes brjod ce na/ rgyal po chen po/ bag tsha ba ni/ 'das pa zhes brjod do/ /gang bag tsha ba med pa de dag la ci'i phyir de bzhin gshegs pa de bzhin gshegs pa zhes brjod ce na/ 'gro ba dang / 'ong ba ste/ de'i phyir de bzhin 392a @#/ /gshegs pa de bzhin gshegs pa zhes brjod do/ /rgyal po chen po/ gzhan yang ci'i phyir de bzhin gshegs pa zhes bya zhe na/ 'di ltar song ba'ang med/ ma song ba'ang med pa de'i phyir de bzhin gshegs pa zhes brjod do/ /rgyal po chen po/ sangs rgyas kyi bgro ba zhes brjod pa ci'i phyir sangs rgyas kyi bgro ba dang / de bzhin gshegs pa'i bgro ba zhes brjod ce na/ chos thams cad bgro ba med par des rtogs pa'i phyir ro/ /ji ltar rtogs she na/ 'gro ba dang 'ong ba med pa ji ltar rtogs pa de ltar rtogs pa'i phyir ro/ /de skad ces bka' stsal pa dang / yul ko sa la'i rgyal po gsal rgyal gyis bcom ldan 'das la 'di skad ces gsol to/ /bcom ldan 'das/ chos kyi rnam grangs zab mo 'di ni/ ngo mtshar lags so/ /bcom ldan 'das/ chos 'di bstan pas bla na med pa yang dag par rdzogs pa'i byang chub tu nges par 'byung ba'i sems can ni| ji snyed cig mchis lags/ nyan thos kyi gnas la gnas pa ni/ ji snyed cig mchis lags/ rang sangs rgyas kyi gnas la gnas pa ni/ ji snyed cig mchis lags| bcom ldan 'das kyis bka' stsal pa/ rgyal po chen po/ 'di ltar nga 'chad pa gang yin pa dang / 'chad par 'gyur ba gang yin pa dang / ngas chos bshad pa gang 392b yin pa dang / chos mngon par rdzogs par sangs rgyas pa gang yin pa'i chos bstan pa 'di la ni/ sems can nges par 'byung ba gang yang med do/ /nyan thos kyi phyir gnas pa ma yin no| |rang sangs rgyas kyi phyir gnas pa ma yin no/ /rgyal po chen po/ 'di lta ste/ dper na/ sgyu ma mkhan nam/ sgyu ma mkhan gyi slob ma mkhas pa zhig gis skye bo phal po che'i mdun du dpung gi tshogs yan lag bzhi pa mngon par sprul te shom zhing go cha bskon la/ rgyal po gnyis g.yul 'gyed par sdud pa las/ rgyal po chen po de la sgyu ma mkhan gyis sprul pa'i rgyal po gnyis las/ de la rgyal po gcig ni/ pham par gyur/ de la rgyal po gcig shos gang yin pa de ni/ sprul pa'i g.yul der g.yul bye ba las sdul pa'i rgyal po de rgyal nas de dpung gi tshogs yan lag bzhi po'i de'i mdun du tshig 'di skad ces ngas rgyal po chen po pham par byas so/ /ngas tshar ma phyung ngo / /zhes smra na/ rgyal po chen po/ 'di ji snyam du sems/ rgyal po pham pa de ci 'dra ba zhig yin/ gsol pa/ bcom ldan 'das/ sgyu ma mkhan gyis sprul pa'i rgyal pos sgyu ma mkhan gyis sprul pa pham par bgyis so/ /bka' stsal pa/ rgyal po chen po/ sprul pas sprul pa 'ga' zhig pham par byed dam/ gsol pa/ bcom ldan 'das/ de ni/ ma lags so/ /de ci'i slad 393a @#/ /du zhe na| sprul pa'i mthu gang lags pa de ni/ dngos po ma mchis pa lags te/ dngos po ma mchis pas dngos po ma mchis pa pham par bgyid pa ma mchis pa'i slad du'o/ /bcom ldan 'das/ rgyal po pham pa 'di dang / rgyal po 'di zhes bgyi ba de ni/ byis pa rnams kyi rmongs pa lags so/ /bka' stsal pa/ rgyal po chen po/ de bzhin du gang chos rnams kyi rang bzhin de la'ang pham pa dang / ma pham pa med de/ chos 'di ni/ gnas pa kho na ste/ chos kyi dbyings ni/ gnas pa nyid do/ /chos skyon med pa nyid do/ /de la de bzhin gshegs pa ni/ yang dag par smra ba/ de bzhin du smra ba/ phyin ci ma log par smra ba/ gzhan ma yin par smra ba ste/ chos thams cad skye ba med par rjes su tha snyad 'dogs so/ /rgyal po chen po/ byis pa rnams ji ltar 'dzin pa de ltar de bzhin gshegs pa ni/ bstan du med pa zhes bya bar ston to/ /rgyal po chen po/ de bzhin gshegs pa ni/ tha snyad thams cad yang dag par chad pa'o/ /ci'i phyir de bzhin gshegs pa tha snyad thams cad yang dag par chad pa zhes brjod ce na/ tha snyad thams cad mtshungs pa'i phyir ro/ /gang mtshungs pa de ni/ chad pa ste/ gang chad pa de la mtshungs pa zhes brjod do/ /tha snyad de thams cad yang dag par chad pa de ni/ chos rnams skye ba 393b med pa'o/ /rgyal po chen po/ 'di ltar rtsis kyi drung ji ltar bzhag pa de ltar bstan par bya ste/ rgyal po chen po/ 'di lta ste/ dper na/ 'bum phrag gcig las bye ba mang por ston pa ni| 'bum phrag de las bye ba dag byung ba'o/ /rgyal po chen po/ 'di lta ste/ dper na/ me long gi dkyil 'khor gcig gi nang na gzugs brnyan mang po snang yang me long gi dkyil 'khor de la gzugs brnyan de dag med do/ /rgyal po chen po/ 'di lta ste/ dper na/ yig 'bru gcig gi nang du yig 'bru mang po dag mngon par sgrub kyang yig 'bru de la yig 'bru de dag mi snang ngo / /rgyal po chen po/ 'di lta ste/ dper na/ dge slong rdzu 'phrul chen po dang ldan pa zhig gcig tu gyur nas mang por 'gyur zhing mang por gyur nas gcig tu'ang 'gyur ba de bzhin du/ rgyal po chen po/ de bzhin gshegs pas stobs dang / mi 'jigs pa dang / pha rol tu phyin pa thams cad thob nas sems can rnams la gdams pa'i phyir chos bstan par sems can 'di snyed cig dul lo zhes 'jig rten gyi tha snyad dang / bgrang ba'i tshul gyis de ltar ston to/ /rgyal po chen po/ ji ltar dul ba dang / gang dag dul ba dang / gang gis dul ba de dag ni/ rgyal po chen po/ de bzhin gshegs pa'i gnyis su med pa la gnas pa ste/ chos 'di bstan pas sems can 'di snyed cig dul lo/ /zhes bya ba de ni/ 394a @#/ /ma byas pa/ 'gyur ba med par seng+ge'i sgra sgrog pa'o/ /de bzhin gshegs pa dgra bcom pa yang dag par rdzogs pa'i sangs rgyas kyis bstan pa 'di bshad pa na stong gsum gyi stong chen po'i 'jig rten gyi khams 'di rnam pa drug tu 'gul/ rab tu 'gul/ kun tu rab tu 'gul to/ /g.yos/ rab tu g.yos/ kun tu rab tu g.yos so/ /ldeg /rab tu ldeg /kun tu rab tu ldeg go /de nas yul ko sa la'i rgyal po gsal rgyal gyis bcom ldan 'das la 'di skad ces gsol to/ /bcom ldan 'das| 'jig rten du dog sa cher g.yos par gyur pa'i rgyu ni/ gang lags/ rkyen ni/ gang lags/ bcom ldan 'das kyis bka' stsal pa/ rgyal po chen po/ de bzhin gshegs pas bstan pa 'di bshad pa na 'dod pa na spyod pa dang / gzugs na spyod pa'i lha ther 'bum phrag 'bum phrag brgyad cu po dag ni/ chos rnams la chos kyi mig rdul med cing dri ma dang bral ba rnam par dag go /lha ther 'bum phrag dgu bcu ni/ mi skye ba'i chos la bzod pa skyes so/ /bram ze stong phrag drug cu ni/ chos rnams la chos kyi mig rdul med cing dri ma dang bral ba rnam par dag go /srog chags lha dang mir bcas pa brgyad khri ni/ chos rnams la chos kyi mig rnam par dag go /srog chags mi'i 394b skye rgu stong phrag drug khri ni/ mi skye ba'i chos la bzod pa skyes so/ /srog chags stong phrag brgyad stong ni/ phyir mi 'ong ba'i 'bras bu mngon sum du byed do/ /rgyal po chen po/ 'jig rten du sa cher g.yos par gyur pa'i rgyu ni/ de yin no/ /rkyen ni/ de yin no/ /rgyal po chen po/ de bzhin gshegs pa bgro ba'i chos kyi rnam grangs 'di nam mkha' dang ldan pa'i sa phyogs 'di nyid du 'das pa'i sangs rgyas bcom ldan 'das rnams kyis kyang bshad do/ /nga'ang 'chad do/ /de bzhin gshegs pa dgra bcom pa yang dag par rdzogs pa'i sangs rgyas byams pa'ang sa phyogs 'di nyid du 'chad par 'gyur ro/ /de nas yul ko sa la'i rgyal po gsal rgyal gyis chos kyi rnam grangs 'di nyid la mchod pa bya ba'i phyir de bzhin gshegs pa la me tog dang / spos dang / phreng ba sna tshogs de dag gis mngon par gtor to/ /rab tu mngon par gtor nas tshig 'di skad du/ 'das pa dang / ma 'ongs pa dang / da ltar byung ba'i sangs rgyas bcom ldan 'das la mchod par 'dod pas ni/ de bzhin gshegs pa bgro ba'i chos kyi rnam grangs 'di la mchod par bya'o/ /zhes smras so| |de nas lha'i dbang po brgya byin gyis sum cu rtsa gsum pa'i lha rnams la smras pa/ lha'i bu dag tshur sheg /chos kyi rnam grangs 'di nyid la mchod pa bya ba'i phyir bcom ldan 395a @#/ /'das la lha'i me tog dang / bdug pa dang / spos dang / phreng ba dang / tsan+dan gyi phye ma dag gis gtor bar bya'o/ /mngon par gtor bar bya'o/ /mngon par rab tu gtor bar bya'o/ /de ci'i phyir zhe na/ grogs po dag /chos kyi rnam grangs 'di la mchod pa byas pas ni/ 'das pa dang / ma 'ongs pa dang / da ltar byung ba'i sangs rgyas bcom ldan 'das rnams la mchod pa byas par 'gyur ba'i phyir ro/ /de nas lha'i dbang po brgya byin gyis sum cu rtsa gsum pa'i lha rnams dang lhan cig tu bcom ldan 'das la me tog man+dA ra bas gtor to/ /rab tu gtor to/ /steng gi bar snang las kyang lha'i rol mo'i sgra bsgrags so/ /de bzhin gshegs pa nyid la mchod pa bya ba'i phyir thams cad dang ldan pa'i rgyal bu rgyal byed kyi tshal yang rin po che sna bdun las grub pa'i dar gyi lnga ldi dag gis rgyas par gyur la/ tshig 'di skad du/ rigs kyi bu'am/ rigs kyi bu mo gang la la zhig chos kyi rnam grangs 'di la mchod pa byed pa ni/ 'das pa dang / ma 'ongs pa dang / da ltar byung ba'i sangs rgyas bcom ldan 'das rnams la mchod pa byas par 'gyur ro/ /de nas khyim bdag de dag gis me tog dang / spos dang / phreng ba sna tshogs ji ltar thogs thogs pa de dag bcom ldan 'das la mngon par gtor te/ 395b tshig 'di skad du/ gang dag chos kyi rnam grangs 'di la mchod pa byed pa de dag gis ni/ 'das pa dang / ma 'ongs pa dang / da ltar byung ba'i sangs rgyas bcom ldan 'das rnams la mchod pa byas par 'gyur ro/ /de nas bcom ldan 'das kyis rgyal po gsal rgyal dang / lha'i dbang po brgya byin dang / khyim bdag de dag la bka' stsal pa/ lha'i bu dag /ji skad smras pa de de bzhin no/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ rigs kyi bu'am/ rigs kyi bu mo'am/ dge slong ngam/ dge slong ma'am/ dge bsnyen nam/ dge bsnyen ma gang la la zhig chos kyi rnam grangs 'di 'dzin pa dang / 'chang ba dang / kun chub par byed pa dang / klog pa dang / gzhan dag la'ang rgya cher ston par byed pa dang / de bzhin nyid du sgrub par byed pa dang / tha na glegs bam du byas te 'chang ba de ni/ 'das pa dang / ma 'ongs pa dang / da ltar byung ba'i sangs rgyas bcom ldan 'das rnams la mchod par byas par 'gyur ro/ /de ci'i phyir zhe na/ kun dga' bo/ 'das pa'i dus na de bzhin gshegs pa dgra bcom pa yang dag par rdzogs pa'i sangs rgyas bcom ldan 'das gang dag byung ba'i sangs rgyas bcom ldan 'das de dag thams cad kyis kyang de bzhin gshegs pa bgro ba dang / chos bgro ba chos kyi 396a @#/ /rnam grangs 'di nyid bstan to/ /kun dga' bo/ ma 'ongs pa'i dus na sangs rgyas bcom ldan 'das gang dag 'byung bar 'gyur ba de dag kyang de bzhin gshegs pa bgro ba dang / chos bgro ba chos kyi rnam grangs 'di nyid ston par 'gyur ro/ /kun dga' bo/ da ltar phyogs bcu na sangs rgyas bcom ldan 'das gang dag 'tsho zhing gshegs pa'i sangs rgyas bcom ldan 'das de dag kyang de bzhin gshegs pa bgro ba dang / chos bgro ba chos kyi rnam grangs 'di nyid ston to/ /bstan to/ /ston par 'gyur ro/ /kun dga' bo/ sangs rgyas bcom ldan 'das rnams kyi chos bstan pa ni/ yang dag phul lo/ /zhes yang dag par smra bas smra na/ kun dga' bo/ de bzhin gshegs pa bgro ba dang / chos bgro ba chos kyi rnam grangs 'di la yang dag par smra bas smra'o/ /kun dga' bo/ rigs kyi bu'am/ rigs kyi bu mo gang la la zhig sangs rgyas kyi ye shes dang / sangs rgyas kyi stobs rnams dang / sangs rgyas kyi mi 'jigs pa rnams tshol bar 'dod pa dang / sangs rgyas kyi gnas la gnas par 'dod pa dang / sangs rgyas kyi ye shes sgrub par 'dod pa dang / sangs rgyas kyi ye shes thob par 'dod pa des ni/ de bzhin gshegs pa bgro ba dang / chos bgro ba chos kyi rnam 396b grangs 'di zungs shig /kun chub par gyis shig /'jug par gyis shig /chongs shig /lhogs shig /de ci'i phyir zhe na/ kun dga' bo/ rigs kyi bu'am/ rigs kyi bu mo gang la la zhig gis de bzhin gshegs pa bgro ba dang / chos bgro ba chos kyi rnam grangs 'di tha na glegs bam du byas te 'chang ba dang / klog pa dang / zla ba phyed kyi bar du brjod cing 'don pa des rmi lam na nga chos ston pa mthong na de'i yon tan gyi phan yon du 'gyur ba ni/ kun dga' bo/ de bzhin gshegs pa bgro ba dang / chos bgro ba chos kyi rnam grangs 'di tha na rigs kyi bu'am/ rigs kyi bu mo gang la la'i rna lam du grag pa dang / tha na thos pa tsam du'ang 'gyur ba dang / thos nas kyang yi rang bar 'gyur na/ kun dga' bo/ des na| de'i mtha' ni/ kun dga' bo/ rigs kyi bu'am/ rigs kyi bu mo de dag gis sangs rgyas mang po la bsnyen bkur byas pa yin par rtogs par bya ste/ kun dga' bo| chos zab mo 'di bstan pas rigs kyi bu'am/ rigs kyi bu mo dag mi skrag cing mi dngang la dngang bar mi 'gyur ba'i rnam pa ni/ de yin no/ /mtshan ma ni/ de yin no/ /rtags ni| de yin no/ /dbyibs ni/ de yin no/ /kun dga' bo/ rigs kyi bu'am/ rigs kyi bu mo gang dag kha cig bla na med pa yang dag par rdzogs pa'i byang chub tu yang dag par 397a @#/ /zhugs| yang dag par 'jug /yang dag par 'jug par 'gyur ba de dag gis kyang de bzhin gshegs pa bgro ba dang / chos bgro ba chos kyi rnam grangs 'di tha na tshig bzhi pa'i tshigs su bcad pa tsam yang gzung bar bya/ kun chub par bya/ gdon par bya/ bcang bar bya/ gzhan dag la'ang bshad par bya/ bstan par bya ste/ kun dga' bo/ rigs kyi bu'am/ rigs kyi bu mo de dag gi bsod nams mang du 'phel bar 'gyur ro/ /de nas yul ko sa la'i rgyal po gsal rgyal gyis bcom ldan 'das la 'di skad ces gsol to/ /bcom ldan 'das/ sang gi gdugs la dge slong gi dge 'dun dang thabs cig tu bdag gi gdugs tshod gsol bar gnang bar mdzad du gsol| rgyal po gsal rgyal la thugs brtse bar mdzad pa'i slad du bcom ldan 'das kyis cang mi gsung bas gnang ngo / /de nas yul ko sa la'i rgyal po gsal rgyal gyis bcom ldan 'das la 'di skad ces gsol to/ /bcom ldan 'das/ bdag cag ni/ bgyi ba mang zhing bgyid pa mang bas mchi lags so/ /de skad ces gsol ba dang / bcom ldan 'das kyis rgyal po gsal rgyal la 'di skad ces bka' stsal to/ /rgyal po chen po/ de'i dus la dbab par shes na song zhig /de nas rgyal po gsal rgyal gyis bud 397b med gtso mo la smras pa/ bud med/ khyod bcom ldan 'das kyi spyan sngar 'dug la bcom ldan 'das kyis chos gang bshad pa de thams cad nga la'ang zlos shig /de nas rgyal po gsal rgyal gus pa dang bcas/ zhe sa dang bcas pas bcom ldan 'das kyis zhabs la mgo bos phyag 'tshal te bcom ldan 'das kyi thad nas song ngo / /de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal/ 'di nas shar phyogs logs na 'jig rten gyi khams kun nas yon tan ldan zhes bya ba de na de bzhin gshegs pa bkod pa mchog sgrub me tog mngon 'phags rgyal po zhes bya ba da ltar bzhugs te 'tsho zhing gzhes pa de la ngas 'di skad ces smras so/ /de bzhin gshegs pa bkod pa mchog sgrub me tog mngon 'phags rgyal pos gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /me tog 'di gang la gnas pa de la chos thams cad gnas te/ kho bo de lta bu gnas nas bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal gyis gsol pa/ bcom ldan 'das/ me tog de dag ci la gnas lags/ bcom ldan 'das kyis bka' stsal pa/ 'jam 398a @#/ /dpal| me tog de dag ni/ gnas pa med do/ /'jam dpal/ me tog de dag ni/ rang bzhin gyi gnas la gnas pa ste/ chos thams cad kyang de lta bu la gnas pas byang chub de'ang de dang 'dra ste/ de la bye brag cung zad kyang med do/ /'jam dpal/ gzhan yang de bzhin gshegs pa des nga la 'di skad ces smras so/ /de bzhin gshegs pa shAkya'i rgyal po'i gtso bo shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / 'jam dpal/ ngas de bzhin gshegs pa de la 'di skad ces smras so/ /kho bo yang dag pa'i mtha' la gnas nas bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /de nas 'jam dpal gzhon nur gyur pas bcom ldan 'das la 'di skad ces gsol to// bcom ldan 'das/ yang dag pa'i mtha' ci la gnas lags/ bka' stsal pa/ de'i phyir khyod nyid la 'dri'i/ khyod ji ltar bzod pa de ltar lan thob cig /'jam dpal/ 'di lta ste/ dper na/ sos ka'i zla ba tha ma dro zhing tsha ba'i dus la bab pa'i tshe mi nyam chung ba zhig gis smig rgyu g.yo ba mthong ba las de skom par gyur la/ de'i grogs 398b gang dag yin pa de dag kyang smig rgyu de la chur 'du shes par gyur te/ de dag shas cher 'gro zhing / 'di ltar smig rgyu de la chur 'du shes pa rnams ji lta ji ltar 'gro zhing gang du 'gro ba de lta de ltar de dag gi skom pa 'phel bar 'gyur na/ 'jam dpal/ 'di ji snyam du sems/ mi de dag gi 'du shes yang dag par yin nam/ gsol pa/ bcom ldan 'das| de ni/ ma lags so/ /bka' stsal pa/ 'jam dpal/ 'di ji snyam du sems/ ci smig rgyu la chu gnas sam/ gsol pa/ bcom ldan 'das/ de ni/ ma lags so/ /smig rgyu la chab kyang ma mchis lags na/ gnas pa lta ga la mchis te/ gnas pa ma mchis pas bcom ldan 'das/ de ni/ brjod par bgyi ba ma lags so/ /bcom ldan 'das kyis bka' stsal pa/ 'jam dpal/ de bzhin du chos thams cad kyang yang dag pa'i mtha' la gnas te/ byang chub de'ang de dang 'dra'o/ /'jam dpal/ gzhan yang shar phyogs logs na de bzhin gshegs pa dgra bcom pa yang dag par rdzogs pa'i sangs rgyas me tog sgrub bkod du ma mngon 'phags rgyal po khyu mchog rnam par rol pa zhes bya ba des nga la 'di skad ces smras so/ /de bzhin gshegs pa shAkya'i rgyal po'i gtso bo shAkya thub pas gang la gnas te bla na med pa yang dag par rdzogs pa'i byang chub mngon par rdzogs par sangs 399a @#/ /rgyas| de skad ces smras pa dang / ngas de la 'di skad ces smras so/ /chos thams cad la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas so/ /de skad ces smras pa dang / 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das/ chos thams cad ci la gnas lags/ bka' stsal pa/ 'jam dpal/ chos thams cad ni/ rang bzhin la'ang gnas la/ de dag rang bzhin la gnas pa'ang ma yin te| byang chub de'ang de dang 'dra'o/ /'jam dpal/ gzhan yang ngas de bzhin gshegs pa me tog sgrub bkod du ma mngon 'phags rgyal po khyu mchog rnam par rol pa de la 'di skad ces smras so/ /de bzhin gshegs pas gang la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /yang dag pa'i mtha' gang la gnas pa de la gnas nas kho bo bla na med pa yang dag par rdzogs pa'i byang chub mngon par rdzogs par sangs rgyas te/ de ni/ yid kyi yang dag par bgro ba'i dri ba'o/ /de skad ces smras pa dang / 'jam dpal gzhon nur gyur pas bcom ldan 'das la 'di skad 399b ces gsol to/ /bcom ldan 'das/ yang dag pa'i mtha' ci la gnas lags/ bka' stsal pa/ ma 'ongs pa'i mtha' dang / da ltar byung ba'i mtha' gang la gnas pa ltar 'das pa'i mtha' yang de ltar gnas so/ /gsol pa/ bcom ldan 'das/ da ltar byung ba'i mtha' zhes bgyi ba'i tshig gi don gang lags/ bka' stsal pa/ 'jam dpal/ chos thams cad ni| rang bzhin gyis 'chi 'pho med cing ma skyes pa ste/ de ni/ da ltar byung ba'i mtha' zhes bya'o/ /gsol pa/ bcom ldan 'das/ 'das pa'i mtha' zhes bgyi ba'i tshig gi don gang lags/ bka' stsal pa/ 'jam dpal/ chos thams cad ni/ bsam gyis mi khyab pa'i mtha' ste/ de'i phyir 'das pa'i mtha' zhes bya'o/ /gsol pa/ bcom ldan 'das/ ma 'ongs pa'i mtha' zhes bgyi ba'i tshig gi don gang lags/ bka' stsal pa/ 'jam dpal/ ma 'ongs pa'i mtha' ni/ ma skyes pa ste/ de'i phyir ma 'ongs pa'i mtha' zhes pa'o/ / 'jam dpal gyis gsol pa/ bcom ldan 'das/ sangs rgyas bcom ldan 'das rnams ji tsam du don shin tu rnam par nges pa ngo mtshar lags so/ /bka' stsal pa/ 'jam dpal| de bzhin du sangs rgyas bcom ldan 'das rnams don dang tshig shin tu rnam par nges pa yin no/ /gsol pa/ bcom ldan 'das/ tshig rnam par nges pa zhes bgyi ba'i 400a @#/ /tshig gi don gang lags/ bka' stsal pa/ 'jam dpal/ byas par nges pa'o/ /ci'i phyir des she na/ tshig lan med par nges pa'o/ /ci'i phyir tshig lan med par nges she na/ cir yang brjod par bya ba ma yin pa'i phyir ro/ /bcom ldan 'das/ brjod par bgyi ba ma lags pa'i tshig gi don gang lags/ bka' stsal pa/ smra ba ni| brjod par bya ba ste/ smra ba thams cad ni/ brjod par bya ba ma yin pa'o/ /smra ba gang zhe na/ 'jam dpal/ smra ba ni/ gnas tha dad pa zhes bya'o/ /gsol pa/ bcom ldan 'das/ gnas tha dad pa zhes bgyi ba'i tshig gi don gang lags/ bka' stsal pa/ 'jam dpal/ gnas tha dad pa zhes bya ba ni/ smra ba 'dzin pa'i 'dzin pa ste/ mtshan mar 'dzin pa'o/ /srog tu 'dzin pa'o/ /thams cad 'dzin pa'o/ /gsol pa/ bcom ldan 'das/ ci'i slad du thams cad 'dzin pa lags/ bka' stsal/ gnyi ga 'dzin pa yin pa'i phyir ro/ /gsol pa/ ci'i slad du gnyi ga 'dzin pa lags/ bka' stsal pa/ bdag tu 'dzin pa dang / gzhan du 'dzin pa ste/ tshig de ni/ bdag tu 'dzin pa dang ldan pa'ang ma yin/ gzhan du 'dzin pa dang ldan pa yin ste/ de'i phyir nges pa zhes bya'o/ /de nas byams ma'i bu gang po 'di snyam du sems par gyur te/ 400b sangs rgyas bcom ldan 'das rnams ni/ legs par gsungs pa'i tshig rab tu 'byed pa'o/ /sangs rgyas bcom ldan 'das rnams ni/ nges pa'i don gcig tu sgrub cing rnam par dbye ba la mkhas pa'o/ /sangs rgyas bcom ldan 'das rnams ni/ ye shes yongs su gtugs pa med pa thugs su chud pa'o/ /sangs rgyas bcom ldan 'das rnams ni/ tshig 'bru gsal ba'o/ /sangs rgyas bcom ldan 'das rnams ni/ chos kyi 'khor lo la ldem por dgongs pa'i bkod pa la mngon par dgyes pa ste/ ma la bdag gis bcom ldan 'das la chos thams cad yi ge sgrub pa'i rnam par dbye ba nges par rnam par 'byed pa zhu bar bya gor ma chag snyam mo/ /de nas bcom ldan 'das kyis byams ma'i bu gang po'i sems kyi rnam par rtog pa thugs kyis mkhyen nas byams ma'i bu gang po la bka' stsal pa/ gang po/ yi ge sgrub pa'i rnam par dbye ba nges par 'byed pa la nges pa zhes bya ba la| gcig ni/ gang yin/ sgrub pa ni/ gang yin zhe na/ gcig ni/ mngon par shes pa ste/ de ni/ sgrub pa'o/ /sgrub pa sgrub pa zhes bya ba ni/ gang gi yin/ thob par byed pa thob par byed pa ni/ gang gi yin zhe na/ thob par byed pa rtogs pa ni/ de bzhin gshegs pa yin te/ de bzhin gshegs pa 'jig pa dang / de bzhin gshegs pa'i 401a @#/ /'byung ba'o/ /gang po/ de bzhin gshegs pa de bzhin gshegs pa zhes ci'i phyir brjod par bya zhing su'i brjod par bya ba yin zhe na/ dngos pos kyang brjod par bya ba ma yin la/ dngos po med pas kyang brjod par bya ba ma yin no/ /dngos po yod pas brjod par bya ba ma yin la/ dngos po yod pa ma yin pas brjod par bya ba'ang ma yin no| |de bzhin gshegs pa ni/ tshig thams cad log pa ma yin no/ /de bzhin gshegs pa ni/ gnas las log pa ma yin te/ tshig thams cad kyis brjod par bya ba ma yin no| |gang po/ de bzhin gshegs pa zhes bya ba ni/ 'di'o zhes brjod par bya ba ma yin no/ /gang po/ de bzhin gshegs pa zhes bya ba ni/ brjod par bya ba ma yin te/ dper na| nam mkha' ni/ lus su gyur pa'ang med do/ /'gyur ba'ang med do/ de ni/ dngos po dang / dngos po med pas brjod par bya ba ma yin no/ /gang po/ de bzhin gshegs par mthong ngo / /zhes gang gis brjod pa dang / gang la'ang brjod pa'ang brjod par bya ba ma yin no/ /de skad ces bka' stsal pa dang / byams ma'i bu gang pos bcom ldan 'das la 'di skad ces gsol to/ /bcom ldan 'das/ chos bstan pa 'di'i ming ci lags/ bka' stsal pa/ 'di ni/ sangs rgyas bcom ldan 'das rnams kyi bgro ba'o// 401b gang po| de ni/ 'di yin zhes bya ba ci'i phyir de ni/ 'di yin zhe na/ grangs med pa 'di dag gis bgro bar bya ba dag ni/ bgro ba'o/ /gang po| ci'i phyir bgro ba zhes bya zhe na/ de ni/ bgro ba med pa dang / rnam par bgro ba med pa 'di yin no/ /gang po/ chos kyi rnam grangs chos kyi rnam grangs zhes bya ba ci'i phyir chos kyi rnam grangs zhes bya zhe na/ shes par bya ba ma yin pa'o/ /yongs su shes par bya ba ma yin pa'o/ /ma brjod pa'o/ /ma smras pa'o/ /sgra med pa'o/ /brjod du med cing brjod pa las 'das pa'o/ /rnam par rig pa med pa'o// gdags par bya ba ma yin pa'o/ /mi gnas pa'o/ /blang du med cing dor du med pa ste/ chos de dag ni/ chos kyi rnam grangs su bstan to/ /gang po/ rigs kyi bu'am/ rigs kyi bu mo gang la la zhig gis tshul gyi gnas 'di khong du chud par byed pa de dag gi ni/ don dang tshig 'brus yongs su gtugs par mi 'gyur te/ gang po/ rigs kyi bu'am/ rigs kyi bu mo de dag la ngas tshul gyi gnas 'di gzhag par bya'o/ /gang po/ tshul gyi gnas zhes bya ba ci'i phyir tshul gyi gnas zhes bya zhe na/ gang po/ 'di ni/ tshul gyi gnas zhes bya ba'am tshul ma yin pa'i gnas zhes bya ba med pa de'i phyir tshul gyi gnas zhes brjod do/ gang po/ tshig gtso bo de ni/ 'di yin no/ /gang po/ tshig gtso bo tshig gtso bo zhes bya ba 402a @#/ /ci'i phyir tshig gtso bo zhes bya/ de dag ci'i phyir tshig gtso bo zhes bya zhe na/ gang po/ dper na/ rnam par thar pa rnams kyi tshig gi don bzhin no/ /gang po/ gzhan yang tshig rab tu dbye ba zhes bya ba gang gi tshig rab tu dbye ba'i rang bzhin snang ba yin zhe na/ rang bzhin gyis dngos po med pa de ltar snang ngo / /snang ba de ni/ 'di ltar snang ste| chos thams cad snod ma yin pa de ltar snang ngo / /gang po/ snang ba dang bral ba de ltar snang ngo / /gang po/ las dang rnam par smin pa snang ba la/ las ni/ gang / rnam par smin pa ni/ gang zhe na/ gang po/ las ni/ dkar po dang / nag po dang / dkar po'ang ma yin nag po'ang ma yin pa'o/ /rnam par smin pa ni/ nges par spangs pa ste/ de ltar na snang ba yin no/ /chos thams cad dbyer med pa de'i phyir so so yang dag par rig pa zhes bya'o/ /ci'i phyir so so yang dag par rig pa zhes bya zhe na/ don so so yang dag par rig pa zhes bya'o/ /don so so yang dag par rig pa gang zhe na/ don ces bya ba ni/ rang bzhin gyis stong pa ste/ gang rang bzhin gyis dbyer med pa'o/ /rnam pa thams cad du rang bzhin gyis stong zhing dbyer med de/ de'i phyir don so so yang dag par rig pa zhes bya'o/ /nges pa'i tshig so so yang dag par rig pa dang / spobs pa so so yang 402b dag par rig pa dang / chos so so yang dag par rig pa ci'i phyir chos so so yang dag par rig pa zhes bya zhe na/ chos rnams kyi rang bzhin ni/ chos nyid de/ de ni/ ma byas pa'o/ / gang ma byas pa de ni/ rang bzhin te/ de ni/ dbyer med pas chos rnams kyi don so so yang dag par rig pa zhes bya'o/ /spobs pa'i rang bzhin ci'i phyir rang bzhin zhes bya zhe na/ chos thams cad dbyer med pa de ltar snang ba'o/ /chos thams cad rang bzhin gyis dngos po med pa de ltar snang ba'o/ /chos thams cad rang bzhin gyis 'gags pa de ltar snang ba'o/ /chos thams cad mig yor dang mtshungs pa de ltar snang ba'o/ /gang po/ gzhan yang las ni/ sna tshogs su snang ste/ las de'ang rnam par smin pas sna tshogs pa nyid do/ /gang po/ rnam par smin pa de'ang dbang pos sam/ dbang po bye ba phrag dgu bcu'am/ bye ba phrag brgya'i sgo nas las kyi rnam par phye bas tha dad pa ste/ de ltar snang ngo / /rnam par smin pa'i ched du las bskyed par snang ste/ 'dir bskyed pa ni/ skrun pa ste/ kun tu skyed pa'o/ /ci'i phyir kun tu skyed pa zhes bya zhe na/ sdug bsngal kun tu skyed pa'i phyir ro/ /sdug bsngal gang zhe na| sred pa dang / lta ba'o/ /de la lta ba la chags pa gang zhe na/ gang du 'gro ba'ang med cing gnas pa'ang med pa yin na/ byis pa rnams ni/ lta ba med bzhin du lta ba la chags 403a @#/ /nas kun tu rgyug go /gang dag kun tu rgyug pa de dag ni/ rnam par rgyug go /gang dag rnam par rgyug pa de dag ni/ rnam par nyams so/ /gang dag rnam par nyams pa de dag ni/ rnam par rgyug go /gang dag rnam par rgyug pa de dag ni/ rtsod par byed do/ /ci'i phyir rtsod par byed ce na/ yod pa ma yin pa dang / gsog dang / bltar med pa la rtsod par byed do/ /gzhan yang byis pa so so'i skye bo yang dag par sdom pa yin pa rnams ni/ gang skyed ces bya ba de ltar snang ste/ snang ba ni/ de'i nges pa'i tshig tu snang ba zhes bya'o/ /gang po/ sgrub pa zhes bya ba gang gi sgrub pa zhe na/ yi ge'i sgrub pa'o/ /gang po/ ci'i phyir yi ge zhes bya zhe na/ gang zag pa med pa'i phyir ro/ /gang po/ yi ge zhes bya ba ni/ gzod ma nas zad pa'o/ /gang po/ gzod ma nas zad ces bya ba ni/ zad pa med pa'o/ /gang po/ gzhan yang zad pa med pa dang / zad pa med pa'i sgo zhes bya ba ni/ chos thams cad do/ /zad pa med pa dang / zad pa med pa'i sgo chos thams cad ni/ chos kyi sgo ste/ gang po/ chos kyi sgo 'di ni/ nam mkha'i sgo yin te/ rigs kyi bu'am/ rigs kyi bu mo gang dag zhugs pa de ni/ nges pa'i tshig bstan pa la zad pa med par 'gyur ro/ /gad po/ ngas chos kyi sgo zad pa med pa 'di kun dga' bo la gtad par bya'o// 403b de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ khyod kyis chos kyi rnam grangs 'di zungs shig /chongs shig /lhogs shig /kun chub par gyis shig /de ci'i phyir zhe na/ kun dga' bo/ gang la la zhig chos kyi rnam grangs 'di 'dzin tam/ 'chang ngam/ klog gam/ kun chub par byed ngam/ tha na tshig bzhi ba'i tshigs su bcad pa tsam bzung nas gzhan dag la ston par byed pa de ni/ kun dga' bo/ sangs rgyas kyi mdzad pa byed pa yin te/ 'di gzhan la ston par byed pa'i rigs kyi bu'am/ rigs kyi bu mo gang yin pa de'i dge ba'i rtsa ba mang du skyed par 'gyur ro/ /kun dga' bo/ de'i phyir chos kyi rnam grangs 'di khyod la lan gnyis yongs su gtad pas yongs su gtad do/ /de nas bcom ldan 'das kyi phyag g.yas pas tshe dang ldan pa kun dga' bo la gzung nas bka' stsal pa/ kun dga' bo/ nga'i bla na med pa yang dag par rdzogs pa'i byang chub bskal pa grangs med pa bye ba phrag 'bum du yang dag par bsgrubs pa 'di khyod kyi lag tu yongs su gtad kyi/ ci nas kyang zungs la gzhan dag la'ang kun chub par gyis shig /zhugs nas kyang gzhan dag la rgya cher yang dag par sgrogs shig /kun dga' bo/ rigs kyi bu'am/ rigs kyi bu mo gang la la zhig de bzhin gshegs pa bgro 404a @#/ /ba'i chos kyi rnam grangs 'di 'dzin tam/ /kun chub par byed dam/ 'jug par byed pa de la ni/ tshe 'di la yon tan lnga brgya 'byung bar 'gyur ro/ /lnga brgya gang zhe na/ lus la yon tan brgya dang / ngag gi las kyi yon tan brgya dang / yid kyi las kyi yon tan brgya dang / kun tu srung ba'i yon tan brgya dang / chos kyi yon tan brgya po dag go /kun dga' bo/ de la lus la gnas pa'i srin bu'i rigs gang dag yin pa de dag de'i lus la 'byung bar mi 'gyur ro/ /kun dga' bo/ de ltar na de dag la mig nad mi 'byung zhing rna ba'i nad med/ sna'i nad med/ lce'i nang med cing lus kyi nad kyang mi 'byung ngo / /mig la sdug bsngal mi 'byung zhing rna ba dang / sna dang / lce dang / lus dang / yid la sdug bsngal mi 'byung ngo / /mig la kun nas gnod pa mi 'byung ngo / /mig mi gsal bar mi 'gyur ro/ /mig zum par mi 'gyur ro/ /mig 'khrul par mi 'gyur ro/ /mig 'jigs 'jigs lta bur mi 'gyur ro/ /mig long bar mi 'gyur ro/ /mig yon por mi 'gyur ro/ /mig ya gcig par mi 'gyur ro/ /mig zur gyis lta bar mi 'gyur ro/ /mig gsal bar 'gyur ro/ /mig kun tu lta bar 'gyur ro/ /mig ma nyams shing gzhon bag can du 'gyur ro/ /mig rma bya'i mgrin pa lta bu dang / mig glang po'i 404b rgyal po 'gying zhing 'gro ba lta bur 'gyur ro/ /gsang ba sba par 'gyur ro/ /yan lag bcu rnam par dag par 'gyur ro/ /nying lag bcu rnam par dag par 'gyur ro/ /nying lag med pa bcu rnam par dag par 'gyur ro/ /rna ba bcu rnam par dag par 'gyur ro/ /sna bcu rnam par dag par 'gyur ro/ /lce bcu rnam par dag par 'gyur ro/ /ba spu'i khung bu 'khor lnga pa rnam par dag par 'gyur ro/ /'bras chan la yod pa'i ro bro ba nyi shu rtsa gcig myang ba rnam par dag par 'gyur te/ lus kyi yon tan 'di dag thob par 'gyur ro/ /de la ngag gi las kyi yon tan brgya thob par 'gyur ba gang zhe na/ dbyangs kyis bsgyur ba'i ngag gi las kyi yon tan bcu dang / gzhan bsrungs pa'i ngag gi las kyi yon tan bcu dang / ma 'ongs pa'i skyon bsrungs pa'i ngag gi las kyi yon tan bcu dang / da ltar byung ba'i skyon bsrungs pa'i ngag gi las kyi yon tan bcu dang / sangs rgyas kyis gnad pa'i ngag gi las bkra shis pa bcu dang / las kyi rjes su 'brel ba'i ngag gi las bcu dang / lhas gnad pa'i ngag gi las dang zhing phan pa bcu dang / bslab pa yongs su bzung ba'i ngag gi las bcu dang / ngo bo nyid kyis yon tan dang ldan pa'i ngag gi las bcu ste/ ngag gi las kyi yon tan brgya po 'di dag thob par 'gyur ro/ /de la yid kyi las kyi yon 405a @#/ /tan brgya thob par 'gyur ba gang zhe na/ yid kyi las gcig po mi mthun pa de dang bral bar 'gyur ba ste/ gang zhe na/ des smra ba sngon du btang ste tshig brjod pa na gang yid kyi las mi mthun pa'i rjes su 'jug pa dang bral bar 'gyur ba yin no/ /sems g.yeng bar mi 'gyur ro/ /sems la gnod par mi 'gyur ro/ /sems 'du shes can du mi 'gyur ro/ /de'i sems la mi mthun pa med par 'gyur ro/ /blo dang ldan par 'gyur ro/ /rtogs pa dang ldan par 'gyur ro/ /nges par 'gyur ro/ /spyod pa dang ldan par 'gyur ro/ /cho ga la mkhas par 'gyur ro/ /brtag pa phun sum tshogs par 'gyur ro/ /g.yog phun sum tshogs par 'gyur ro/ /spyod lam phun sum tshogs par 'gyur ro/ /dran pa dang ldan zhing mi g.yo bar 'gyur ro/ /sems mi sgul zhing brtan par 'gyur ro/ /yon tan sgrub par 'gyur ro/ /sems 'jam par 'gyur ro| |phyir mi ldog par 'gyur ro/ /sems mi g.yo bar 'gyur ro/ /sems dang mthun par 'gyur te/ sems brtan pa de dang / phyir mi ldog pa de la ni/ sangs rgyas bcom ldan 'das rnams gzigs bzhed par 'gyur la/ lha rnams kyang lta 'dod par 'gyur zhing klu rnams dang / gnod sbyin rnams dang / dri za rnams dang / mi 'am ci 405b rnams dang / lto 'phye chen po rnams dang / mi rnams dang / mi ma yin pa rnams kyang lta 'dod par 'gyur ro/ /de la lha rnams kyang snyan par smra zhing klu rnams dang / dri za rnams dang / gnod sbyin rnams dang / mi 'am ci rnams dang / lto 'phye chen po rnams dang / mi rnams dang / mi ma yin pa rnams kyang snyan par smra la/ de la sangs rgyas bcom ldan 'das rnams kyang snyan pa gsung bar 'gyur ro/ /lha rnams dang / klu rnams dang / gnod sbyin rnams dang / dri za rnams dang / mi 'am ci rnams dang / lto 'phye chen po rnams dang / mi rnams dang / mi ma yin pa rnams kyis bsngags par bya zhing / sangs rgyas bcom ldan 'das rnams kyis kyang bsngags par bya ba ste/ de nyid 'ong ba la la'ang sangs rgyas bcom ldan 'das rnams chos nye bar sgrub par mdzad do/ /kun dga' bo/ gang la la dag mdo sde 'di 'chang ngam/ ston pa de dag gis ni/ yon tan brgya po mang po la re bar bya'o/ /kun dga' bo/ chos kyi rnam grangs 'dir ni/ sangs rgyas thams cad kyi byang chub bsdus so/ /kun dga' bo/ /de ci'i phyir zhe na/ 'dir ni/ chos thams cad bsdus pa'i phyir te/ de ni/ sangs rgyas bgro ba 'di yin no/ /kun dga' bo/ sangs rgyas bgro ba dang / de bzhin gshegs pa bgro ba dang / chos bgro ba 'di ni/ 406a @#/ /skyes bu dman pa rnams kyi lag tu 'ong bar mi 'gyur zhing le lo can rnams kyi lag tu 'ong bar mi 'gyur te/ sems can de dag ni/ dman par mi 'gyur ro/ /kun dga' bo/ gzhan yang sangs rgyas bgro ba 'di gang dag gi lag tu 'ong bar 'gyur ba'i sems can de dag ni/ brtson 'grus brtsams par 'gyur la/ sems zhum pa med pa rnams dang / sems tshar bcad pa rnams kyi lag tu 'ong bar 'gyur ro/ /kun dga' bo/ sangs rgyas bgro ba 'di sems can sems tshar ma bcad pa rnams kyi lag tu 'gro bar mi 'gyur ro/ /kun dga' bo/ gzhan yang 'di ni/ bdud rnam par 'joms par rig par bya'o/ kun dga' bo/ bdud sdig can ni/ mdo sde 'di nub par bya ba'i phyir brtson par byed de/ kun dga' bo/ de la bdud kyi las phra ba rnams dang / bdud kyi las shig shig po rnams dang / bdud kyi las thag ring ba rnams su blta zhing bdud kyi las rnams pham par yang blta bar bya'o/ /kun dga' bo/ gzhan yang mdo 'di las bdud kyi las mang po dag 'byung bar 'gyur te/ de la bdud kyi las thag ring ba rnams ji lta bur blta zhe na/ mdo 'di ni/ ha cang thag ring ba'o/ /mdo 'di ni/ ha cang rgya che ba'o/ /mdo 'di ni/ ha cang bar chad mang pa'o/ /mdo 406b 'di ni| ha cang g.yeng ba mang ba'o/ /mdo 'di ni/ ha cang nyon mongs mang ba'o/ /zhes te/ rigs kyi bu'am/ rigs kyi bu mo de dag gis mdo 'di'i yon tan de ltar ma shes nas de dag gis ma shes pa na bdud kyi lcags kyus zin cing bdud kyi zhags pas bcings na mdo 'di la brtson par mi byed/ 'dzin par mi byed/ 'chang bar mi byed/ kun chub par mi byed/ ston par mi byed do/ /kun dga' bo/ sems can rnams ji tsam gyis nyams par 'gyur ba ltos shig /la la zhig gis de bzhin gshegs pa bgro ba chos kyi rnam grangs 'di 'dzin par mi byed cing 'chang bar mi byed la/ gzhan dag la'ang rgya cher yang dag par mi ston pa ni/ kun dga' bo/ 'di ltar sangs rgyas kyi byang chub yang dag phul la brnyas pa yin te/ legs pa ma yin no/ /shin tu legs pa ma yin no/ /kun dga' bo/ gang dag gis mdo sde 'di la brnyas pa de dag gis ni/ chos la'ang brnyas pa yin no/ /kun dga' bo/ gzhan yang gang dag gis mdo sde 'di la brnyas par byed pa de dag la skul ba 'dis cir yang mi 'gyur ro/ /de ci'i phyir zhe na/ 'di ltar skyes bu rmongs pa de dag ni/ mngon par brtson pa ma yin te/ de dag la bskul ba na rang gi sems kyang mi shes shing rang gi gnas kyang mi shes la/ de dag mi shes pas 407a @#/ /bskul ba'ang 'dzin par mi byed do/ /kun dga' bo/ gzhan yang 'dir de bzhin gshegs pa la brnyas pa byas par 'gyur ba dang / chos la brnyas par byed pa ci zhig yod de/ sangs rgyas bcom ldan 'das de dag ni/ chos nyid kyis ma brnyas pa'o/ /kun dga' bo/ skyes bu rmongs pa de dag ni/ yang dag pa ma yin pa'i chos rnams las yongs su nyams pas bdag nyid la brnyas par 'gyur gyi/ gang dag de bzhin gshegs pa la brnyas par 'gyur ba'am/ chos la brnyas par 'gyur ba ni/ med do/ /kun dga' bo/ de bzhin gshegs pas ni/ brnyas pa med pa'i chos thugs su chung la/ sangs rgyas bcom ldan 'das rnams ni/ brnyas pa med pa'o/ /kun dga' bo/ de lta bas na/ sangs rgyas kyi chos rnams la brnyas par mi 'gyur ba dang / dpyas su mi 'gyur bar chos 'di dag khong du chud par bya'o/ /de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal/ 'di nas 'jig rten gyi khams 'bum phrag tshad med cing dpag tu med pa dag 'das pa'i pha rol na 'jig rten gyi khams zla 'phags 'od zer ces bya ba de na de bzhin gshegs pa dgra bcom pa yang dag par rdzogs pa'i sangs rgyas pad+ma 407b mngon 'phags 'od zer rol pa zhes bya ba bzhugs te 'tsho zhing gzhes so/ /'jam dpal/ de bzhin gshegs pa de'i 'jig rten gyi khams de rin po che sna bdun las grub pa'i pad+ma dag gis rgyas par 'gyur te/ pad+ma de dag gi dbus nas byang chub sems dpa' de dag skyil mo krung bcas bzhin du byung la/ pad+ma de dag las kyang 'od zer byung ngo / / byang chub sems dpa' de dag gis 'od zer de dag las sprul pa sprul par byed/ sprul pa dpag tu med pa dag sprul par byed cing sprul pas chos kyang ston to/ /'jam dpal/ 'od zer de dag gis 'jig rten gyi khams gang+gA klung gi bye ma drug cu snyed dag snang bas gsal bar byas so/ /'jam dpal/ dper na/ ston ka'i dus su nam mkha' dag cing dri ma med la char sprin med pa/ zla ba yar gyi tshes bco lnga'i nam gyi gung thun la zla ba'i dkyil 'khor smon med zla ba'i 'od zer gyis kun tu gsal bar snang ba de'i tshe dzam+bu'i gling khor yug tu snang bas shin tu khyab par 'gyur ro/ /'jam dpal/ de bzhin du 'jig rten gyi khams zla 'phags 'od zer de khor yug tu'ang snang bas shin tu khyab par 'gyur ro| |de bzhin du shar dang / lho dang / nub dang / byang dang / de bzhin du steng dang / de bzhin du 'og dang / de bzhin du phyogs l+m+tsham+sa dang / de bzhin du phyogs bcu'i 'jig 408a @#/ /rten dag tu'ang 'jig rten gyi khams gang+gA klung gi bye ma drug cu snyed dag snang bas gsal bar byas so/ /'jam dpal/ rgyu des na 'jig rten gyi khams de'i ming zla 'phags 'od zer ces bya'o/ /'jam dpal/ de bzhin gshegs pa de chos ston pa'i spyi bo nas pad+ma byung ste/ pad+ma de dag la 'od zer byung bas stong gsum gyi stong chen po'i 'jig rten gyi khams 'di snang bar byas so/ /'od zer de dag las kyang sangs rgyas kyi sku byung ste/ sangs rgyas kyi sku de dag gis kyang de bzhin gshegs pa de la pad+ma dag gis gtor to/ /mngon par gtor to/ /'jam dpal/ pad+ma gtor ba de dag nyid kyang de bzhin gshegs pa'i skur gnas so/ /'jam dpal/ 'di ltar bcom ldan 'das de'i smon lam gyi rgyus na/ bcom ldan 'das de pad+ma mngon 'phags zhes bya'o/ /'jam dpal/ de nas ngas de bzhin gshegs pa pad+ma mngon 'phags 'od zer rol pa de la 'di skad ces smras so/ /de bzhin gshegs pa pad+ma mngon 'phags 'od zer rol pas ci la gnas te bla na med pa yang dag par rdzogs pa'i byang chub mngon par rdzogs par sangs rgyas/ de skad ces smras pa dang / des nga la 'di skad ces smras so/ /'das pa dang / ma 'ongs pa'i sems gang la gnas nas de ltar 408b byang chub pa de lta bu la gnas te nga bla na med pa yang dag par rdzogs pa'i byang chub mngon par rdzogs par sangs rgyas so/ /'jam dpal gyis gsol pa/ bcom ldan 'das/ 'das pa dang / ma 'ongs pa'i sems ci la gnas lags/ bka' stsal pa/ 'jam dpal/ gang 'das pa'i sems de ni/ ma skyes pa'o/ /'jam dpal/ gang ma 'ongs pa'i sems de'ang ma skyes pa'o/ /gang da ltar byung ba'i sems de'ang ma skyes pa'o/ /gang mi skye ba ni/ de bzhin nyid byang chub par bya ba'i phyir te/ de ni/ byang chub bo/ /'jam dpal/ dper na| 'das pa'i sgyu ma'ang yod pa ma yin no/ /ma 'ongs pa'i yang yod pa ma yin la/ da ltar byung ba'i yang yod pa ma yin te/ rang gi ngo bos dben zhing rang gi ngo bo dang bral ba yin no/ / 'jam dpal/ de bzhin du gang 'das pa'i sems de ni/ ma skyes pa'o/ /gang ma 'ongs pa'i sems de'ang ma skyes pa'o/ /gang da ltar byung ba'i sems de'ang ma skyes pa ste/ byang chub de ni/ de lta bu yin no/ /'jam dpal/ byang chub ni/ 'das pa'ang ma yin/ ma 'ongs pa'ang ma yin/ da ltar byung ba'ang ma yin te/ 'jam dpal/ byang chub de ni/ de lta bu yin no/ /'jam dpal/ 'di ltar byang chub ni/ yod pa'ang ma yin/ 'jam dpal/ byang chub de ni/ med pa'ang ma yin no/ /'jam dpal/ de bzhin du chos thams cad ni/ byang 409a @#/ /chub kyang yin la/ chos thams cad byang chub ma yin pa'ang yin no/ /bam po gsum pa ste tha ma/ de nas khyim bdag ded dpon bzang po dang // khyim bdag rnam par dag spyod dang / khyim bdag klu dga' dang / khyim bdag 'dzin med dang / khyim bdag rna gtsug dang / khyim bdag gtsug na nor bu dang / khyim bdag rna ba gang po dang / khyim bdag don grub dang / khyim bdag rin chen gom pas 'gro dang / khyim bdag de dag thams cad kyis bcom ldan 'das la 'di skad ces gsol to/ /bcom ldan 'das/ sangs rgyas bcom ldan 'das rnams ni/ lus thogs pa ma mchis pa lags shing / sangs rgyas bcom ldan 'das rnams ni/ byams pa'i spyan dang ldan te ngo mtshar ba lags na/ dgung zla gsum po 'di la bcom ldan 'das de bzhin gshegs pa du tsam zhig dang thabs cig tu de bzhin gshegs pa bgro ba 'di la bgro ba mdzad lags/ de skad ces gsol pa dang / bcom ldan 'das kyis khyim bdag de dag la 'di skad ces bka' stsal to/ /khyim bdag rnams/ sangs rgyas kyi mtshan nyid ni gzhal bar bya ba ma yin gyi/ thong zhig /de nas khyim bdag de dag gis bcom ldan 'das la 'di skad ces gsol to/ /bcom ldan 'das/ de bzhin gshegs pa bgro ba'i 409b chos kyi rnam grangs 'di la bcom ldan 'das de bzhin gshegs pa du tsam zhig dang thabs cig tu bgro ba mdzad pa dpes bstan par spyod lags sam/ bka' stsal pa/ khyim bdag rnams/ sangs rgyas kyi ye shes la brtag pa dang / mngon par yid ches par bya ba dag dpe'i sgo nas ni/ mkhas pa rnams dang / mos pa mang ba rnams dang / nga rgyal bcom pa rnams dang / blo rgya che ba rnams dang / sangs rgyas kyi ye shes bsam gyis mi khyab pa mchog la gnas pa dag gis shes par nus kyi/ byis pa rnams dang / bdag tu 'du shes pa rnams dang / nga rgyal gyis nyams pa rnams dang / blo chung ba rnams kyis ni/ mi nus pas de'i phyir legs par nyon la yid la zungs shig dang / ngas khyed la bshad do| |khyim bdag rnams/ dpe yongs su brtag pa nye bar bzung ste gang dag stong gsum gyi stong chen po'i 'jig rten gyi khams 'di ni/ khor yug ther 'bum yod par nyi ma ther 'bum 'khor zhing gnas so/ /zla ba ther 'bum 'khor zhing gnas so/ /khyim bdag rnams/ stong gsum gyi stong chen po'i 'jig rten gyi khams de ri'i rgyal po khor yug chen po dag gis yongs su bskor la/ stong gsum gyi stong chen po'i 'jig rten gyi khams de'i khongs na gang dag sems can du gdags pas btags pa sems can thams cad 410a @#/ /snga phyi med par mi'i lus thob par gyur la/ gang dag 'jig rten gyi khams de na sa'i khams yod pa dang / rin po che dang 'dra ba'i rtswa dang / shing dang yal ga dang / lo ma dang / 'dab ma dag nye bar bzung ba dang / ri thams cad dang / de dag la gang dag sa'i khams yod pa dang / ji tsam du 'byung ba chen po bzhi gnas pa la sa'i khams su gdags pas btags/ de rdul phra rab kyi rdul du brlags na/ khyim bdag rnams/ de ji snyam du sems/ rdul phra rab de dag mang ba yin nam/ de skad ces bka' stsal pa dang / khyim bdag de dag gis bcom ldan 'das la 'di skad ces gsol to/ /bcom ldan 'das/ rdul phra rab de dag mang ba lags so/ /rdul phra rab rdul de dag shin tu mang ba lags so/ /bcom ldan 'das/ rdul phra rab kyi rdul de dag tshad ma mchis pa lags so/ /khyim bdag rnams/ gzhan yang yongs su brtag pa nye bar bzung ste sems can rnams rdul phra rab kyi rdul de dag snyed du gyur cing sems can de dag kyang snga phyi med par mi'i lus thob par gyur la/ de dag thams cad kyis mi'i lus thob nas kyang rab tu byung ngo / /de dag thams cad rab tu byung nas kyang dgra bcom pa nyid thob ste/ de dag mngon par shes pa dag mngon sum du byed cing / de dag mngon par shes pa drug po'i rdzu 410b 'phrul gyi stobs kyis nyan thos chen po de dag ji snyed pa de snyed kyi 'jig rten gyi khams kho na dag nyan thos gcig gis se gol 'ga' gtogs pa tsam gyis 'da' bar byed do/ / khyim bdag rnams/ rnam grangs 'dis na nyan thos chen po re res kyang 'da' bar byed la/ gal te gcig gis 'da' bar byed pas kyang 'jig rten gyi khams gzhan dang gzhan du 'gro bar byed de/ khyim bdag rnams/ rnam grangs 'dis na nyan thos chen po de dag lo brgya snyed du 'da' bar byed na/ khyim bdag rnams/ de ji snyam du sems/ nyan thos chen po de dag gis lo brgya snyed thal bar 'da' ba'i 'jig rten gyi khams ji snyed cig yod/ gsol pa/ bcom ldan 'das/ nyan thos chen po de dag gis 'da' ba'i 'jig rten gyi khams ji snyed pa de dag ni/ tshang ma mchis pa lags so/ /bcom ldan 'das/ 'jig rten gyi khams de dag grangs ma mchis pa lags so/ /bka' stsal pa/ yongs su brtag pa nye bar bzung ste nyan thos chen po de dag gis lo brgya snyed thal bar 'da' ba'i 'jig rten gyi khams ji snyed pa'i 'jig rten gyi khams de dag thams cad grong khyer chen po gcig tu gyur la| grong khyer chen po de'ang srid ji tsam pa de tsam kho nar rgya'ang yod la de'i 'phang du'ang de tsam yod na/ khyim bdag rnams/ de ji snyam du sems/ grong khyer gyi ra ba de'i ngos 411a @#/ /rgya che ba yin nam/ gsol pa/ bcom ldan 'das/ grong khyer de ni/ rgya che ba lags so/ /bde bar gshegs pa/ grong khyer de ni/ mtha' ma mchis pa lags so| |bcom ldan 'das/ ji tsam du 'di lta bu'i dpe dag legs par yongs su btsal pa ni/ ngo mtshar che ba lags so/ /khyim bdag rnams/ gal te grong khyer chen po yungs 'bru ma grugs pas byur bur bkang na/ yungs 'bru de dag mang ba yin nam/ gsol pa/ bcom ldan 'das/ yungs 'bru de dag mang ba lags so/ /bde bar gshegs pa/ shin tu mang ba lags so/ /bka' stsal pa/ khyim bdag rnams/ de bas ches mang zhing ches grangs med pa'i de bzhin gshegs pa dgra bcom pa yang dag par rdzogs pa'i sangs rgyas rnams kyis de bzhin gshegs pa bgro ba dang / chos bgro ba chos kyi rnam grangs 'di yang dag par bgro ba mdzad do/ /de skad ces bka' stsal nas khyim bdag de dag gis bcom ldan 'das la 'di skad ces gsol to/ /bcom ldan 'das/ de bzhin gshegs pas dpe cha phra zhing thag ring bar mchi ba 'di lta bu btsal pa ni/ ngo mtshar che lags so/ /bcom ldan 'das kyis bka' stsal pa/ khyim bdag rnams/ de bzhin gshegs pa dgra bcom pa yang dag par rdzogs pa'i sangs rgyas rnams kyi ye shes de ni/ 411b de lta bu yin par rig par bya ste/ ji ltar zhus pa bzhin kun nas yongs su btsal bar bya'o/ /de bzhin gshegs pa ni/ chags pa med pa'i ye shes dang ldan te/ chags pa med pa'i chos rtogs pas gang dang gang zhus pa de dang de la thogs pa med do/ /khyim bdag rnams/ dper na/ skyes bu la la zhig gis de'i stobs dang / mthu dang / brtson 'grus kyis nam mkha' mtha' yas shing mu med par phyogs bzhi gang dang gang du mda' 'phangs pa de srid du shugs kyis song ste sa la lhung na/ khyim bdag rnams/ de ji snyam du sems/ mda' de dag nges par sa la lhung ngam/ bcom ldan 'das/ skyes bu de'i stobs dang / mthu dang / brtson 'grus kyis ji srid pa de srid du shugs kyis mchis nas dog sa la lhung yang / bcom ldan 'das/ de dag ni/ nam mkha' la thogs pa ma mchis pa lags so/ /bka' stsal pa/ khyim bdag rnams/ de bzhin du de bzhin gshegs pa ni/ gting dpag dga' ba mtha' yas shing mu med pa ste/ mu med pa bzhi dag dang ldan no/ /bzhi gang zhe na/ tshul khrims mu med pa dang ldan pa dang / ting nge 'dzin mu me pa dang ldan pa dang / shes rab mu med pa dang ldan pa dang / rnam par grol ba mu med pa dang ldan pa'o/ /bcom ldan 'das kyis de skad ces bka' stsal nas bde bar gshegs pas de skad gsungs te/ ston 412a @#/ /pas gzhan yang 'di skad ces bka' stsal to/ /'jig rten sangs rgyas bsam mi khyab/ /sangs rgyas ye shes mtha' yas pas/ /sems kyi las dag rnam sbyangs te/ /phyi nas mya ngan las 'das pa ston/ /ji ltar nam mkha'i khams rnams la/ /mtha' dag dmigs med de yi phyir/ /de bzhin ye shes chen po yi/ /'jug pa la ni dmigs pa med| |ye shes chen po chags med pa/ /de la chags pa yod min zhing / /ye shes nam mkhar mtshungs nyid de/ /sangs rgyas ye shes bsam mi khyab/ /nam mkha'i khams su mda' mang po/ /'phen par byed cing 'phangs nas kyang / /de dag phyir ni sa la lhung / /de bzhin byis pa blo ngan rnams/ /ye shes bzang po 'di thos nas/ /de dag 'dir ni phyir yang lhung / /gang du mda' dag 'phags nas kyang / /de dag sa la slar lhung ste/ /nam mkha' yi ni dbyings de la/ /nam yang chags par mi 'gyur ro/ /de bzhin sangs rgyas ye shes ni| |chags pa dag tu mi dmigs so/ /gang du blo ni rab gnas par/ /byis pa de dag der lhung ste/ /byis pa'i mthu ni rtogs nas kyang / /sangs rgyas ye shes rab tu bsgrags/ /de phyir ye shes bsgrags pa ni/ /nga la mkhyud pa yod ma yin/ /ji ltar nam mkha' mu med cing / /tshad yod ma yin mtha' yas ltar/ /de bzhin ye shes chen po yi// 412b mtha' ni dmigs par mi 'gyur ro/ /nga yi ye shes 'di la ni/ /byis pa'i blo can the tshom za/ /gnas mi 'gyur te nam mkha' la/ /ji ltar mda' 'phangs lhung ba bzhin/ /lha dang bcas pa'i 'jig rten gyi/ /mdun du nga ni 'dug nas kyang / /seng+ge bzhin du sgra sgrog pa/ /nga la the tshom yod ma yin/ /de tshe shAkya seng+ge yi/ /nga ro 'di ni sgrog pa na/ /de yi mod la srog chags ni/ /bye ba brgyad cu byang chub zhugs/ /shAkya seng+ge'i nga ro 'di/ /bsgrags pa de yi mod la ni/ /sa 'di rnam pa drug dag tu/ /kun nas kyang ni g.yos par gyur/ /de tshe 'od zer byung gyur cing / /'od kyang rgya che byung bar gyur/ /sangs rgyas kyis mdzad cho 'phrul dag /bsam mi khyab pa ngo mtshar byung / /sangs rgyas zhal gyi sgo nas ni/ /de yi tshe na ljags phyung ste| |sangs rgyas zhing ni mtha' yas pa/ /'jig rten 'di ni khebs par mdzad/ /skyes bu khyu mchog ljags kyis ni/ /'jig rten 'di dag khebs mdzad nas/ /yan lag brgyad ldan tshig gis ni/ /kun dga' bo la 'di skad gsungs/ /kun dga' yang dag gsung ba ste/ /yang dag chos ni ston mdzad pa/ /skyes bu dam pa dkon gyur pa/ /sangs rgyas la ni mchod pa gyis/ /kun dga' sems can mchog ma kha cig gis/ /dpe dag thos nas byang chub skyed byed pa/ /byang chub don gnyer byang chub sems dpa' gang / /yon tan brgyan 413a @#/ /de dag ni sbyin par bya/ /kun dga' dge slong pho mo dang / /dge bsnyen pha dang dge bsnyen ma/ /gang zag mchog ma de dag ni/ /sangs rgyas nyid du lung bstan bya/ /kun dga' phyi dus dge slong gang / /ngas ni de dag mthong ba rnams/ /phyi ma'i dus kyi tshe dag na/ /'di 'dra'i mdo dag nyan byed la/ /mdo 'di dag ni thos nas kyang / /shAkya seng+ges bstan pa yi/ /mdo 'di kye ma'o legs gsungs zhes/ /gang rnams dag ni dga' bar 'gyur/ /gang gis mdo 'di thos nas kyang / /sems ni byang chub phyir bsngo ba/ /kun dga' mi de dag la ni/ /sangs rgyas 'gyur zhes ngas lung bstan/ /gang gis mdo 'di thos nas kyang / /sems ni byang chub phyir bsngo ba/ /'dren pa dag tu mi 'gyur zhes/ /des ni the tshom bskyed mi bya/ /kun dga' ngas ni ting 'dzin 'di/ /de dag la ni gzhag bya zhing / /lha dang bcas pa'i 'jig rten la/ /ngas ni byin gyis brlab par bya/ /ngas ni byin gyis brlabs nas kyang / /phyi dus 'jigs pa chen po'i tshe/ /mdo sde 'di ni 'dzam gling du/ /phyis ni 'bar ba dag tu 'gyur/ /de nas bcom ldan 'das kyis khyim pa bdag de dag la bka' stsal pa/ khyim bdag rnams/ gzhan yang rab tu shes par bya ba ni/ gang dag shar phyogs legs na rdul phra \?\ rab 413b kyi rdul de dag ji snyed pa de snyed pas ches mang ba'i de bzhin gshegs pa rnams dang lhan cig tu chos kyi rnam grangs 'di bgro ba mdzad do/ /de bzhin du lho dang / de bzhin du nub dang / de bzhin du byang dang / de bzhin du 'og dang / de bzhin du steng dang / de bzhin du phyogs bcu thams cad dang / phyogs mtshams bcu po mtha' yas shing tshad med pa'i rdul phra rab kyi rdul de dag ji snyed pa de snyed pas chos mang ba'i de bzhin gshegs pa rnams dang lhan cig tu chos kyi rnam grangs 'di bgro ba mdzad do/ /khyim bdag rnams/ gal te rdul phra rab kyi rdul phra mo de dag ji snyed pa de snyed kyi bskal pa grangs med pa'i yang grangs med pa'i bskal par gnas te/ sangs rgyas de dag gi mtshan rab tu brjod pa de snyed dang lhan cig tu de bzhin gshegs pa bgro ba'i chos kyi rnam grangs 'di bgro ba mdzad do/ /de bzhin gshegs pa de dag gis mtshan brjod pa ma byas pa'i bar skabs su yongs su mya ngan las 'da' bar bya'o/ /de nas ded dpon bzang pos bcom ldan 'das la 'di skad ces gsol to/ /bcom ldan 'das/ sangs rgyas bcom ldan 'das rnams ni| rdzu 'phrul che zhing mthu che ba lags so/ /sangs rgyas bcom ldan 'das rnams ni/ dbang che bar grags pa ste/ ngo mtshar che ba lags so/ /bcom ldan 'das/ phyogs 414a @#/ /bcu'i 'jig rten na da ltar sangs rgyas bcom ldan 'das ji snyed cig bzhugs te 'tsho zhing gzhes pa de dag thams cad dang / bcom ldan 'das thabs cig tu de bzhin gshegs pa'i chos kyi rnam grangs 'di bgro ba mdzad lags so/ /bka' stsal pa/ khyim bdag /ji skad smras pa de de bzhin no/ /khyim bdag /phyogs bcu'i 'jig rten na gang dag sangs rgyas bcom ldan 'das da ltar bzhugs te 'tsho zhing gzhes pa de dag thams cad dang / bcom ldan 'das lhan cig tu de bzhin gshegs pa bgro ba'i chos kyi rnam grangs 'di bgro ba mdzad do/ /de skad ces bka' stsal pa dang / khyim bdag /ded dpon bzang pos bcom ldan 'das la 'di skad ces gsol to/ / bcom ldan 'das/ ting nge 'dzin gang la gnas nas de bzhin gshegs pa dgra bcom pa yang dag par rdzogs pa'i sangs rgyas dang / de bzhin gshegs pa dgra bcom pa yang dag par rdzogs pa'i sangs rgyas de dag thabs cig tu de bzhin gshegs pa bgro ba'i chos kyi rnam grangs 'di bgro ba mdzad lags/ bka' stsal pa/ khyim bdag / chos kyi dbyings nges par byung ba zhes bya ba'i ting nge 'dzin yod pa gang la gnas nas sangs rgyas bcom ldan 'das de dag dang / chos kyi rnam grangs 'di bgro ba mdzad do/ / 414b gsol pa/ bcom ldan 'das/ ci'i slad du chos kyi dbyings nges par byung ba zhes bya ba'i ting nge 'dzin ces brjod lags/ bka' stsal pa/ khyim bdag /ji tsam du chos thams cad ni| chos kyi dbyings yin yang chos kyi dbyings su yang dag par rjes su mi mthong ngo / /khyim bdag /ting nge 'dzin 'di la gnas nas chos kyi dbyings yang dag par rjes su mi mthong ngo| |khyim bdag /nga ting nge 'dzin 'di la gnas nas chos kyi dbyings la ni/ chos 'ga' yang yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la gzugs yang dag par rjes su mi mthong ngo / /gzugs la'ang chos kyi dbyings yang dag par rjes su mi mthong ngo / /gzugs la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang gzugs yang dag par rjes su mi mthong ngo / /khyim bdag /nga ting nge 'dzin 'di la gnas nas de bzhin du chos kyi dbyings la tshor ba dang / 'du shes dang / 'du byed rnams dang / rnam par shes pa dag yang dag par rjes su mi mthong ngo / /rnam par shes pa la'ang chos kyi dbyings yang dag par rjes su mi mthong ngo / /rnam par shes pa la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang rnam 415a @#/ /par shes par yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la mig gi khams yang dag par rjes su mi mthong ngo / /mig gi khams la'ang chos kyi dbyings yang dag par rjes su mi mthong ngo / /mig gi khams la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang mig gi khams yang dag par rjes su mi mthong ngo / /de bzhin du gzugs kyi khams la ma yin zhing rna ba'i khams la sgra'i khams ma yin no/ /sna'i khams la dri'i khams ma yin no/ /lce'i khams la ro'i khams ma yin no/ /lus kyi khams la reg bya'i khams ma yin te/ yid kyi khams kyang ma yin no/ /khyim bdag /nga ting nge 'dzin 'di la gnas nas chos kyi dbyings la chos yang dag par rjes su mi mthong ngo / /chos rnams la chos kyi dbyings yang dag par rjes su mi mthong ngo / /chos kyi dbyings la'ang chos yang dag par rjes su mi mthong ngo / /chos la ma gtogs par yang chos kyi dbyings yang dag par rjes su mi mthong ngo / / chos kyi dbyings la ma gtogs par yang chos yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la sa'i khams yang dag 415b par rjes su mi mthong ngo / /sa'i khams la'ang chos kyi dbyings yang dag par rjes su mi mthong ngo / /sa'i khams la ma gtogs par chos kyi dbyings yang dag par rjes su mi mthong ngo / /chos kyi dbyings la ma gtogs par yang sa'i khams yang dag par rjes su mi mthong ngo / /de bzhin du chu dang / me dang / rlung la'ang sbyar bar bya'o/ /khyim bdag /nga ting nge 'dzin 'di la gnas nas 'das pa'i chos kyi dbyings la 'das pa'i chos kyi dbyings yang dag par rjes su mi mthong ngo / /chos la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang 'das pa yang dag par rjes su mi mthong ngo / /chos kyi dbyings la chos kyi dbyings yang dag par rjes su mi mthong ngo / /chos kyi dbyings la ma gtogs par yang chos kyi dbyings yang dag par rjes su mi mthong ngo / /ma 'ongs pa'i chos kyi dbyings la'ang ma 'ongs pa'i chos kyi dbyings yang dag par rjes su mi mthong ngo / /ma 'ongs pa la'ang chos kyi dbyings yang dag par rjes su mi mthong ngo / /ma 'ongs pa la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang ma 'ongs pa'i chos kyi dbyings yang dag par rjes su mi mthong ngo / /chos kyi dbyings la da ltar byung ba yang dag par rjes su 416a @#/ /mi mthong ngo / /da ltar byung ba la'ang chos kyi dbyings yang dag par rjes su mi mthong ngo / /da ltar byung ba la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang da ltar byung ba yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la so so'i skye bo'i chos yang dag par rjes su mi mthong ngo / /so so'i skye bo'i chos la'ang chos kyi dbyings yang dag par rjes su mi mthong ngo / /so so'i skye bo'i chos la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang so so'i skye bo'i chos yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la slob pa'i chos yang dag par rjes su mi mthong ngo / /slob pa'i chos la'ang chos kyi dbyings yang dag par rjes su mi mthong ngo / /slob pa'i chos la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang slob pa'i chos yang dag par rjes su mi mthong ngo / /chos kyi dbyings la ma gtogs par yang chos kyi dbyings yang dag par rjes su mi mthong ngo / /khyim bdag /nga ting nge 'dzin 'di 416b la gnas nas chos kyi dbyings la rang sangs rgyas kyi chos yang dag par rjes su mi mthong ngo / /rang sangs rgyas kyi chos la'ang chos kyi dbyings yang dag par rjes su mi mthong ngo / / rang sangs rgyas kyi chos la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang rang sangs rgyas kyi chos yang dag par rjes su mi mthong ngo / /khyim bdag /nga ting nge 'dzin 'di la gnas nas chos kyi dbyings la sangs rgyas kyi chos yang dag par rjes su mi mthong ngo / /sangs rgyas kyi chos la'ang chos kyi dbyings yang dag par rjes su mi mthong ngo / /chos kyi dbyings la ma gtogs par yang sangs rgyas kyi chos yang dag par rjes su mi mthong ngo / /sangs rgyas kyi chos la ma gtogs par yang chos kyi dbyings yang dag par rjes su mi mthong ngo / /chos kyi dbyings la ma gtogs par yang chos kyi dbyings yang dag par rjes su mi mthong ngo / /de skad ces bka' stsal nas 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das/ ci'i slad du chos kyi dbyings zhes bya lags/ bka' stsal pa/ 'jam dpal/ chos kyi dbyings ni/ dbyings med pa ste/ 'jam dpal/ ngas de las dgongs nas chos kyi dbyings zhes bstan to/ /'jam dpal/ chos thams cad 417a @#/ /las nges par byung ba zhes bya ba ni/ 'jam dpal/ chos thams cad khams las nges par byung ba de'i phyir ro/ /gsol pa/ bcom ldan 'das/ nges par byung ba zhes bgyi ba ci'i slad du nges par byung ba zhes bgyi lags/ bka' stsal pa/ 'gro ba'ang med/ 'ong ba'ang med pa de'i phyir nges par byung ba zhes bya ste/ 'jam dpal/ chos thams cad kyi tshul ni/ de lta bu ste/ 'jam dpal/ chos rnams kyi 'jug pa ni/ de yin no/ /gsol pa/ bcom ldan 'das/ 'jug pa zhes bgyi ba ci'i slad du 'jug pa zhes bgyi lags/ bka' stsal pa/ chos thams cad rang bzhin gyis ma skyes pa de'i phyir 'jug pa zhes bya'o/ /de'i tshe gzhon nu pad+ma dpal gyi snying po zhes bya ba 'dus shing 'dug par gyur to/ /de nas gzhon nu pad+ma'i dpal gyi snying pos bcom ldan 'das la 'di skad ces gsol to/ /bcom ldan 'das/ bcom ldan 'das kyis chos bka' stsal pa'i don bdag gis 'di ltar 'tshal te/ ting nge 'dzin 'di ni/ so so'i skye bo dang thun mong ma lags so/ /rang sangs rgyas dang thun mong ma lags so// bcom ldan 'das/ ting nge 'dzin 'di ni/ gang dag sangs rgyas kyi chos zhes brjod pa de dag dang yang thun mong ma lags so/ /bcom ldan 'das/ de ltar na/ ting nge 'dzin 417b 'di ni| ldan pa'ang ma lags/ mi ldan pa'ang ma lags so/ /de ci'i slad du zhe na/ bcom ldan 'das/ 'di ltar gang phrad par 'gyur ba'am/ phrad par 'gyur ba ma lags pa'i chos de dag ma mchis pa'i slad du'o/ /chos 'ga' zhig mchis na ni/ de ltar yang lags na/ 'ga' yang ma mchis pa de la ni/ phrad pa'ang ma mchis/ mi phrad pa'ang ma mchis lags so| |bcom ldan 'das/ de ltar na/ ting nge 'dzin 'di ni/ thun mong ma lags so/ /bcom ldan 'das/ gzhan yang ting nge 'dzin 'di la su'ang snyoms par mi 'jug ste/ de ci'i slad du zhe na| bcom ldan 'das/ sems can thams cad ting nge 'dzin la snyoms par zhugs pa'i slad du'o/ /bcom ldan 'das/ de ltar lags pas mnyam pa nyid la snyoms par 'jug pa'ang ma mchis/ zhugs pa'ang ma mchis lags te/ de ltar na/ ting nge 'dzin 'di ni/ brjod par bgyi ba ma lags so/ /bcom ldan 'das/ gzhan yang ting nge 'dzin 'di ni| sems can thams cad dang thun mong lags te/ de ci'i slad du zhe na/ bcom ldan 'das/ 'di ltar sems can thams cad kyis mnyam pa nyid thob lags te/ bcom ldan 'das/ de'i slad du ting nge 'dzin 'di ni/ sems can thams cad dang thun mong lags so/ /bcom ldan 'das/ gzhan yang ting nge 'dzin 'di ni/ sus kyang thob pa ma lags 418a @#/ /te| de ci'i slad du zhe na/ bcom ldan 'das/ mnyam pa nyid kyi tshogs ma mchis pa'i slad du ste/ bcom ldan 'das/ chos thams cad kyi mnyam pa nyid ni/ mi dmigs pa lags pa'i slad du'o/ /bcom ldan 'das/ gzhan yang sems can thams cad dang thun mong lags pa de ltar ting nge 'dzin 'di'ang thun mong lags te/ ji ltar sems can thams cad mi 'phrog pa de ltar ting nge 'dzin 'di'ang mi 'phrog pa'o/ /bcom ldan 'das/ gzhan yang gang sems can gyis rnam par dben pa'i ting nge 'dzin 'di ni/ sems can thams cad dang thun mong lags te/ de ci'i slad du zhe na/ bcom ldan 'das/ gang rnams par dben pa nyid de ni/ ting nge 'dzin lags so| |bcom ldan 'das/ gzhan yang ting nge 'dzin 'di ni/ bsam gyis mi khyab pa lags te/ de ci'i slad du zhe na/ sems kyi yul las yang dag par 'das pa'i slad du ting nge 'dzin 'di ni/ bsam gyis mi khyab pa lags so/ /bcom ldan 'das/ gzhan yang ting nge 'dzin 'di ni/ chos gang la'ang mi sems pas bsam gyis mi khyab pa nyid de| de ci'i slad du zhe na/ bcom ldan 'das/ bsam gyis mi khyab pas sems ma mchis pa lags te/ gang ma mchis pa de ni/ ting nge 'dzin lags so/ /bcom ldan 418b 'das| sems ni/ sems ma mchis pa lags te/ de'ang ting nge 'dzin lags so/ /bcom ldan 'das/ gzhan yang ting nge 'dzin 'di ni/ gang mtshan ma de dag la mi gnas pa ste/ gang mi gnas pa de ni/ ting nge 'dzin lags so/ /bcom ldan 'das/ gzhan yang ting nge 'dzin 'di ni/ nyams pa yongs su ma rdzogs pa'i tshul gyis thob pa med pa ste/ bcom ldan 'das/ gang yongs su ma rdzogs pa de ni/ ting nge 'dzin lags so/ /bcom ldan 'das/ gzhan yang ting nge 'dzin 'di ni/ nyams pa ste/ sangs rgyas kyi yul ji tsam pa de tsam du 'di ni/ ting nge 'dzin lags so/ /bcom ldan 'das/ sangs rgyas kyi yul zhes bgyi ba yul ma mchis pa ste/ gang yul ma mchis pa de ni/ ting nge 'dzin lags so/ /bcom ldan 'das/ gzhan yang ting nge 'dzin 'di ni/ ma bstan pa lags te/ de ci'i slad du zhe na/ bcom ldan 'das/ gang gzhan yang tha snyad brjod la/ tha snyad brjod pa'i chos de dang de dag ni/ chos de la ma mchis te/ gang ma mchis pa de ni/ ting nge 'dzin lags so/ /bcom ldan 'das/ gzhan yang ting nge 'dzin 'di ni/ yi ge ma mchis pa ste/ de ci'i slad du zhe na/ bcom ldan 'das/ 'di ltar yi ge de dag ni/ ma mchis pa lags so/ /gang ma mchis pa de ni/ ting nge 'dzin lags so/ /bcom ldan 419a @#/ /'das| gzhan yang ting nge 'dzin 'di ni/ brjod pa ma mchis pa ste/ gang brjod pa ma mchis pa de ni/ ma brjod pa ste/ de ltar na/ ting nge 'dzin 'di ni| brjod pa ma mchis pa lags so/ /bcom ldan 'das/ ting nge 'dzin 'di ni/ rnam par rig pa ma mchis pa ste/ gang rnam par rig pa ma mchis pa de ni/ ting nge 'dzin te| bcom ldan 'das/ de ltar na/ ting nge 'dzin 'di ni/ rnam par rig pa ma mchis pa lags so/ /bcom ldan 'das/ gzhan yang ting nge 'dzin gang dang gang bstan pa de dang de'i chos de dang de dag de na ma mchis la/ gang gzhan yang ma mchis pa de dag ni/ ngo bo nyid kyis stong ste/ gang dag ngo bo nyid kyis stong pa de ni/ ting nge 'dzin lags so| |gang ting nge 'dzin de ni/ mnyam pa nyid lags la chos de dag kyang mnyam pa nyid lags te/ chos de dag ni/ nges par byung ba ma lags pas/ bcom ldan 'das/ de ltar na/ ting nge 'dzin 'di ni/ brjod par bgyi ba ma lags so/ /de nas gnas brtan shA radwa ti'i bus gzhon nu pad+ma dpal gyi snying po la 'di skad ces smras so/ /pad+ma dpal gyi snying po/ khyod ting nge 'dzin 'di la 'dod pa med dam/ smras pa/ btsun pa shA ri'i bu/ kho bo ni/ ting nge 'dzin 'di la 'dod pa ma mchis so/ /de ci'i phyir zhe na/ btsun 419b pa shA ri'i bu/ gal te chos 'di dag la bdag cig kho bos yang dag par rjes su mthong na ni/ chos de dag la kho bo 'dod par yang 'gyur ro/ /smras pa/ pad+ma dpal gyi snying po/ khyod kyis sangs rgyas kyi chos rnams la de yang dag par rjes su ma mthong ngam/ smras pa/ btsun pa shA ri'i bu/ gal te sangs rgyas kyi chos rnams la bdag cig kho bos yang dag par rjes su mthong ba de ltar gyur na ni/ sangs rgyas kyi chos rnams bdag gis 'dus byas par yang 'gyur ro/ /smras pa/ pad+ma dpal gyi snying po/ khyod kyis ci sangs rgyas kyi chos rnams yang dag par rjes su mthong ngam/ smras pa/ btsun pa shA ri'i bu/ gal te sangs rgyas kyi chos rnams yang dag par rjes su mthong na ni/ sangs rgyas kyi chos de dag dngos por byas par yang 'gyur na/ btsun pa shA ri'i bu/ chos thams cad ni/ dngos po med pa'i phyir ro/ /btsun pa shA ri'i bu/ gal te sangs rgyas kyi chos rnams yod par gyur na sangs rgyas kyi chos las gzhan par yongs su rtogs par yang 'gyur la/ sangs rgyas kyi chos rnams sems dang bcas par yang 'gyur ro/ /de nas bcom ldan 'das kyis de'i tshe gzhon nu pad+ma dpal gyi snying po la legs so/ /zhes bya ba byin no/ /legs so/ /zhes bya ba byin nas kyang tshe dang ldan pa shA ri'i bu la bka' stsal pa/ shA ri'i bu/ gang dang gang dris pa de 420a @#/ /dang de la mi gnas pa'i chos yang dag par bsgrags pa de dag ni/ phyir mi ldog pa'i rtags yin no/ /de nas tshe dang ldan pa shA ri'i bus gzhon nu pad+ma dpal gyi snying po la 'di skad ces smras so/ /pad+ma dpal gyi snying po/ khyod bcom ldan 'das kyis bla na med pa yang dag par rdzogs pa'i byang chub las phyir mi ldog par lung bstan to/ / de skad ces smras pa dang / gzhon nu pad+ma dpal gyi snying pos tshe dang ldan pa shA ri'i bu la 'di skad ces smras so/ /btsun pa shA ri'i bu/ gal te bla na med pa yang dag par rdzogs pa'i byang chub las phyir mi ldog pa'i chos 'ga' zhig mchis na ni/ btsun pa shA ri'i bu/ 'di ltar kho bo de bzhin gshegs pas bla na med pa yang dag par rdzogs pa'i byang chub tu lung bstan par yang 'gyur ro/ /smras pa/ pad+ma dpal gyi snying po/ khyod bdag bla na med pa yang dag par rdzogs pa'i byang chub tu mngon par rdzogs par sangs rgyas so snyam du mi sems sam/ smras pa/ btsun pa shA ri'i bu/ de ma lags so/ /de ci'i phyir zhe na/ btsun pa shA ri'i bu/ de lta na ni/ byang chub de ni/ ngar 'dzin par 'gyur ro/ / btsun pa shA ri'i bu/ de ltar na bdag bla na med pa yang dag par rdzogs pa'i byang chub tu mngon par rdzogs par sangs rgyas so snyam pa ci zhig yod/ smras pa/ pad+ma dpal gyi 420b snying po| khyod shAkya thub pa 'di da ltar bla na med pa yang dag par rdzogs pa'i byang chub tu mngon par rdzogs par sangs rgyas so snyam du de ltar mi sems sam/ smras pa/ btsun pa shA ri'i bu/ shAkya thub pa nyid kyi chos kyang mi dmigs na/ byang chub lta ga la zhig dmigs/ de ltar na shAkya thub pa 'di bla na med pa yang dag par rdzogs pa'i byang chub tu mngon par rdzogs par sangs rgyas so snyam pa ci zhig yod/ smras pa/ pad+ma dpal gyi snying po/ khyod ci la spyod/ de nas gzhon nu pad+ma dpal gyi snying pos de'i tshe rdzu 'phrul mngon par 'du bya ba de lta bu dag mngon par 'dus byas so/ /rdzu 'phrul mngon par 'du bya ba de lta bu dag mngon par 'dus byas nas kyang thams cad dang ldan pa'i 'khor gyi dkyil 'khor dag 'od kyis khyab par byas nas bdag nyid mi snang bar byas so/ /mi snang bar byas nas kyang tshe dang ldan pa shA ri'i bu la smras pa/ shA ri'i bus kho bo mthong ngam/ pad+ma dpal gyi snying po/ khyod ma mthong ste/ khyod kyi sgra tsam zhig thos so/ /smras pa/ btsun pa shA ri'i bu/ ci sgra gang yin pa de pad+ma dpal gyi snying po yin nam/ smras pa/ gzhon nu/ ma yin no/ /smras pa/ btsun pa shA ri'i bu/ pad+ma dpal gyi snying po zhes bya ba rgyur byas nas ming du btags pa de ci zhig yin/ smras pa/ pad+ma dpal gyi snying po zhes bya ba'i ming de ni/ brdar btags pa'i tshig go / 421a @#/ /smras pa| btsun pa shA ri'i bu/ ci brdar btags pa'i tshig la spyod pa 'ga' lta mchis sam/ smras pa/ pad+ma dpal gyi snying po/ /med do/ /smras pa/ btsun pa shA ri'i bu/ gang brdar btags pa'i tshig de ni/ tshig ma yin pa ste/ gang tshig ma yin pa de'i spyod pa ni/ rnam par rig pa ma yin pa ste/ de ni/ theg pa 'di la'ang ma mchis| theg pa gzhan la'ang ma mchis/ de ni/ tshu rol na'ang ma mchis/ pha rol na'ang ma mchis/ gnyis ka'i bar na'ang ma mchis pas de ni/ nges par mya ngan las 'das pa ste/ btsun pa shA ri'i bu/ byang chub sems dpa' rnams kyi spyod pa ni/ de lta bu lags so/ /de nas bcom ldan 'das de'i tshe 'dzum pa mdzad de/ 'di ni/ sangs rgyas bcom ldan 'das rnams gang gi tshe 'dzum pa mdzad pa'i chos nyid de/ de'i tshe zhal gyi sgo nas 'od zer kha dog sna tshogs/ kha dog du ma 'di lta ste/ sngon po dang / ser po dang / dmar po dang / dkar po dang / le brgan dang / shel dang / dngul gyi kha dog lta bu dag byung nas de dag gis 'jig rten gyi khams mtha' yas mu med pa dag 'od kyis khyab par byas nas tshangs pa'i 'jig rten gyi bar du song ste slar log nas kyang 'jig rten gyi khams tshad med grangs med pa dag 'od kyis khyab par byas te bcom ldan 421b 'das la lan gsum bskor ba byas nas bcom ldan 'das kyi dbu'i gtsug tu mi snang bar gyur to/ /stong gsum gyi stong chen po'i 'jig rten gyi khams 'di'ang rnam pa drug tu g.yos te/ 'gul/ rab tu 'gul/ kun tu rab tu 'gul/ g.yos/ rab tu g.yos/ kun tu rab tu g.yos/ ldeg /rab tu ldeg /kun tu rab tu ldeg go /de nas tshe dang ldan pa kun dga' bo de'i tshe stan las langs nas bla gos phrag pa gcig tu gzar te bcom ldan 'das la tshigs su bcad pas bstod pa/ gang zag mchog ma rnam 'dren rgyal ba'i mchog /rgyu ma mchis par 'dzum pa mi mdzad na/ /mgon po bde gshegs 'dzum mdzad rgyu gang lags/ /rgyal ba'i 'jig rten 'dzum mdzad rkyen gang lags/ /rgyal ba'i zhing 'di 'od kyis snang mdzad cing / /phyogs bcu 'di kun 'od kyis gsal mdzad pas/ /thugs brtser ldan pa 'dzum mdzad rgyu rkyen gang / /'jig rten phan mdzad bdag la bka' stsal gsol/ /sangs rgyas zhing 'dir gnas pa'i sems can gang / /bde dang nad med dga' zhing rab tu rangs/ /'dod pa'i bde dang ting 'dzin bde ba dag /ri rab steng na gnas pa'i lha bzhin no/ /mgon po sems can dmus long kha cig dag /de tshe de dag mig gis gzugs rnams mthong / /sems can gang dag 'on par gyur pa rnams/ /de dag 422a @#/ /rna bas sgra yang thos par gyur/ /sems can rnams kyis 'phral du gter rnyed cing / /bcings pa thams cad de ring thar gyur la/ /sbrum pa rnams ni bde zhing shis par btsas/ /de ltar rmad byung gda' ba ngo mtshar to/ /bdag gi rkang ba la ni me tog reg /yid du 'ong ba'i spos ngad phyogs su langs/ /sangs rgyas zhing rnams brgyan pas lhang nger gda'/ /mgon po bde gshegs 'dzum mdzad rgyu gang lags/ /zla ba'i 'od dang nyi ma'i 'od kun dag /rgyal ba'i spyan snga na ni lha mer min/ /sangs rgyas zhing 'di thams cad gsal mdzad pa/ /ji ltar dbang phyug dbang sgyur ji bzhin no/ /'di na sems can kha cig nad kyis thebs/ /gang dag nad pa nyam chung mthu chung ba/ / sems can mang po de ring nad med gyur/ /su yi mthu lags 'dir ni lung bstan gsol/ /deng 'dzum mdzad pa ji 'drar gda' ba dag \?\ /de 'dra nam yang ma mthong ma thos pas// deng ni thams cad the tshom gyur lags na/ /skyes 'dul kha lo sgyur ba de lung ston/ /bdag ni khyod kyi 'dri bo rim gro 'tshal/ /'dzum pa mdzad pa'i rgyu rkyen gang ci lags/ / gang dag thos nas yi rang 'gyur ba yi/ /mgon po de ring bdag la de lung ston/ /deng su'i don cher rgya chen 'gyur ba dang / /chos kyi mdzod 'di su zhig 'dzin pa dang / /deng 422b bdud dpung bcas bzhon dang bcas pa dag /su 'joms de ni bdag la lung bstan gsol/ /chos rnams thams cad mthar ni phyin pa po/ /thub pa khyod 'dra ma mchis gong na ga la mchis/ /mi mchog chos dbyings khyod la zhu lags na/ /don dam mkhas pas de ni lung bstan gsol/ /de skad ces gsol pa dang / bcom ldan 'das kyis tshe dang ldan pa kun dga' bo la bka' stsal pa/ gzhon nu pad+ma dpal gyi snying pos bstan pa 'di bshad pa na srog chags sum khri byang chub kyi phyir yang dag par zhugs so/ /kun dga' bo/ deng bstan pa 'di'i dbang du byas nas nga'i thad nas byang chub kyi phyir zhugs pa dag khyod kyis mthong ngam/ khyim bdag 'di rnams ni/ 'di nas shi 'phos ma thag tu sum cu rtsa gsum pa'i lha rnams su skye bar 'gyur ro/ /de dag de nas shi 'phos nas kyang phyi ma'i dus lnga brgya ba tha ma la de dag dzam+bu'i gling du mi rnams dang skal pa mnyam par skye bar 'gyur ro// de dag dzam+bu'i gling du skyes pa'i mod la chos kyi rnam grangs 'di'ang nyan par 'gyur ro/ /de nas srog chags sum khri bo de dag gis bcom ldan 'das la 'di skad ces gsol to/ / bdag cag gis kyang slad ma'i tshe slad ma'i dus na chos kyi rnam grangs 'di bshad par bgyi'o/ /de'i tshe de'i dus na 'khor de nyid na dge slong lnga brgya tsam zhig 'dus shing 'dug par 423a @#/ /gyur pa de dag thams cad stan las langs te bcom ldan 'das la gsol pa/ bcom ldan 'das kyis chos kyi rnam grangs 'di byin gyis brlab tu gsol| bcom ldan 'das/ bdag cag gis kyang slad ma'i dus na chos kyi rnam grangs 'di rgyas par bgyi'o/ /de'i tshe de'i dus na lha'i dbang po brgya byin dang / mi mjed kyi bdag po tshangs pa dang / rgyal po chen po bzhi po dag 'dus shing 'dug par gyur te/ de dag gis kyang bcom ldan 'das la 'di skad ces gsol to/ /bcom ldan 'das kyis chos kyi rnam grangs 'di byin gyis brlab tu gsol/ bcom ldan 'das/ bdag cag gis ni/ chos smras pa de dag bsrung zhing bskyab par bgyi'o/ /brtson par bgyi'o/ /kun tu bsrung bar bgyi'o/ /de nas bcom ldan 'das kyi sku las 'od phyung ste/ 'od re re las kyang sprul pa dag sprul to/ /sprul pa re re pos kyang dge slong de dag la me tog dang / spos rnam pa sna tshogs kyis gtor to/ /mngon par gtor to/ /de nas bcom ldan 'das kyis yang rdzu 'phrul mngon par 'du mdzad pa 'di lta bu mngon par 'du mdzad de/ khyim bdag gi bu bzang skyong dang / ded dpon bzang po dang / phug sbas dang / sdong bus byin dang / chu lha dang / dbang pos byin dang / rigs kyi bu mis byin dang / skyes bu dam pa 423b brgyad po de dag thams cad kyis shar phyogs logs na gang+gA'i klung gi bye ma snyed dang mnyam pa'i sangs rgyas bcom ldan 'das rnams mthong bar 'gyur ba de lta bu'i rdzu 'phrul mngon par 'du mdzad pa dag mngon par 'du mdzad do/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ de bzhin gshegs pas gsungs pa'i chos kyi rnam grangs rgya chen po 'di bstan cing bshad pa na/ khyim bdag brgyad po de dag gis kun tu snang ba zhes bya ba'i ting nge 'dzin thob nas rab tu sgrog par 'gyur ro/ /de nas bcom ldan 'das kyis tshigs su bcad pa 'di dag bka' stsal to/ /kun dga' khyod kyis 'di dag na/ /dge slong brgyad po nga'i mdun na/ /ye shes chen po byin brlab gsol/ /thub pa chen po byin brlab gsol/ /mgon po bdag cag slad dus tshe/ /'di 'dra'i chos dag bshad bgyi zhes/ /thal mo sbyar nas chos kyi phyir/ /gsol pa 'debs pa mthong gyur tam/ /gang dang thabs cig bgro mdzad cing / /gang na sangs rgyas gang sgrog rnams/ /gang dag mdo 'di 'dzin byed pa/ /de la thams cad srung bar mdzad/ /gang dag blta dka' chos spyod pas/ / sangs rgyas de dag dang mi 'bral/ /gang zhig 'di ni lung nod pa/ /de bzhin nyid la gnas par 'gyur/ /nga yis bgro ba bshad pa 'di/ /gang dag lung nod 'gyur pa rnams/ /de dag 424a @#/ /gi ni mdun na yang / /sangs rgyas bzhugs shing zhal yang ston/ /sangs rgyas bgro ba gsungs 'di ni/ /gang dag lung nod 'gyur ba yi/ /dge slong de dang de dag rnams/ /nga yi chos srung skyong bar 'gyur/ /nga yis bgro ba bshad pa 'di/ /gang dag lung nod 'gyur ba rnams/ /de dag gis ni byang chub bzung / /sangs rgyas rnams kyi mtha' yas mdzad/ /sangs rgyas bgro ba dam pa 'di/ /gang dag lung nod 'gyur ba rnams/ /sangs rgyas ye shes bla med la/ /de dag thams cad nges bar gnas/ /sangs rgyas bgro ba dam pa 'di/ /gang dag lung nod 'gyur ba rnams/ /de dag gis ni bdud btul cing / /byang chub snying por gnas pa yin/ /sangs rgyas bgro ba de bzhin nyid/ /'di ni gang dag lung nod pa/ /de dag gis ni bdud btul cing / /byang chub snying por gnas pa yin/ /bstan pa de yang gzungs de yin/ /ting nge 'dzin kyang bstan pa yin/ /sems can de dag 'di dag bstan/ /sangs rgyas bden pa gzhan mi 'gyur/ /gang gis byang chub dag gi phyir/ /sangs rgyas 'di dag kun 'dod pa/ /des ni nga yis bshad pa yi/ / bgro ba 'di ni lung mnod bya/ /mi gang 'das pa'i rdzogs sangs rgyas/ /de dag lta bar 'dod pas ni/ /chos nyid ye shes chen po yi/ /bgro ba 'di dag lung mnod bya/ /kha cig mdo 424b 'di tshul la ni/ /spro bar byed pa de dag la/ /phyi dus tshe na nga yis ni/ /'di 'dra ba yi chos bshad bya/ /nga yi chos ni 'di 'dra dag /thos nas bzung ste mang du thos/ /de dag gis ni ting nge 'dzin/ /snang byed ces bya de ring thob/ /phyi ma'i dus na de dag gis/ /ting nge 'dzin la gnas nas ni/ /srog chags kun la phan pa'i phyir/ /nga yi chos ni 'dzin par 'gyur/ /de tshe gang dag kha cig gis/ /mdo 'di 'dzin 'gyur nga yis ni/ /de bzhin gshegs pa ma mthong zhes/ /the tshom dag ni bskyed mi bya/ /phyi dus ngan 'gro chen po ste/ /de tshe gang dag mi rnams kyis| |ting 'dzin ming ni nyan byed pa/ /thams cad nga yi mdun na 'khod/ /mdo 'di dag ni bsgrags pa yi/ /nga yi sras ni 'dir yod rnams/ /phyi dus dam chos 'jig pa'i tshe/ /de dag chos ni skyong bar 'gyur/ /gang dag kha cig mdo 'di ni/ /thob par bya phyir de tshe brtson/ /kun dga' de dag thams cad ni/ /sangs rgyas spyan gyis ngas mthong ngo / /kun dga' de phyir khyod la ni/ /byang chub mchog ma gtad bya ste/ /srog chags rnams la bshad pa ltar/ /khyod la 'di ni gzhag par bya/ /kha cig mdo 'di bsrung ba'i phyir/ /de tshe brtson par byed pa dag / de dag gis ni nga bsrungs pas/ /sangs rgyas bsrungs pa'ang mtha' yas so/ /de ltar chos srung byas pas ni/ /mi de dag ni srung bar 'gyur/ /mdo 'di phyogs bzhir de dag gis/ / 425a @#/ /btsal kyang rnyed par ma gyur la/ /ngas bstan pa yi sangs rgyas gang / /phyogs bcu dag na gang rnams dag /de ltar sangs rgyas de dag la/ /sbyin pa bsam mi khyab pa phul/ /rnam smin de dag ji snyed pa/ /ngas bshad pa ni mnyan par gyis/ /mdo 'di rnyed par ma gyur pa/ /rnyed par gyur na smos ci dgos/ /sangs rgyas zhing 'di thams cad dag /ma lus par ni mi zhig gis/ /ji ltar bye mas byur bur ni/ /rab tu bkang bar gyur pa dag /skyes bu la las de dag kun /shar phyogs logs su de dag 'dor/ /bye ma'i rdul ni re re nas/ /lag pa gcig gis blangs nas kyang / /'jig rten khams dag mtha' yas pa'i/ /'jig rten khams ni de dag tu/ /bye ma'i rdul de ji snyed nyid/ /ma lus par ni 'jog byed pa/ /de bzhin du ni sbyar byas pa/ /mkhas pa gang gis mi shes na/ /bye ma dag gi rdul gyur pa/ /'jig rten khams su bgrang bya ste/ / de bzhin lho phyogs dag tu yang / /mi dag gis ni 'dor bar byed/ /bye ma'i phung po ji snyed de/ /gang dag nga yis sngar bstan pa/ /de bzhin phyogs bzhi dag tu yang / /mi yis bye ma 'dor bar byed/ /sngar ni ji snyed bstan pa yi/ /de snyed bye mar gyur pa dang / /ji snyed bstan pa'i bye ma snyed/ /de snyed 'jig rten khams de dag /'dir ni de dag thams cad 425b kyang / /grong khyer gru bzhi gcig gyur la/ /skyes bu la la byung bas ni/ /grong khyer brtsigs \?\ bde dag tu/ /rin po che yis bkang byas te/ /skyob pa sangs rgyas rnams la phul/ / sbyin de de dag la phul bas/ /'jig rten mgon po bsam mi khyab/ /rkang gnyis gtso bor gyur cig ces/ /byang chub mchog tu smon par byed/ /de ni byang chub nyid tshol la/ /mdo 'di dag ni mi tshol te/ /ngas bshad pa yi bgro ba dag /mdo 'di dag ni rnyed mi 'gyur/ /gang zhig mdo 'di tshol byed pa/ /de steng bsod nams 'phel bar 'gyur/ /mang du thos pa kun dga' bo/ /'di las byang chub lhag par ni/ /bgro mdzad de bzhin dge slong dang / /dge slong ma dag ngas lung bstan/ /ngas bshad pa yi bgro ba 'di/ /gang dag tshol byed de dag gis/ /nga sngon bram ze khye'u de'i tshe/ /gang gis byang chub phyir lung bstan/ /de tshe thog mar byang chub phyir/ /gang la bsod nams ngas bstan pa/ /mar me zhes bya bsam mi khyab| |ye shes ldan chen mthong ba yin/ /gang dag 'di lung nod de dag /rdzogs pa'i sangs rgyas de mthong ngo / /rtag par sems can kun bde phyir/ /grangs med bdun brgya rdzogs pa ste| |gcig kyang ma tshang med par ni/ /byang chub ched du ngas btsal lo/ /mang thos nga dang lhan cig tu/ /de dag gis kyang bsod nams bskyed/ /gang dag 'di ni lung nod cing / /byang 426a @#/ /chub mchog mar smon byed pa/ /de dag byang chub mi nyams shing / /de dag byang chub dkon pa med/ /gang dag ngas bshad pa yi mdo/ /'di ni gang dag lung nod pa/ /de dag sangs rgyas byang chub rgyu/ /nga yin de ni the tshom med/ /gang dag phyi ma'i dus de tshe/ /mi rnams kyis ni tshul 'di mthong / /phyi ma'i dus na dge slong dag /sangs rgyas bya ba byed par 'gyur/ /ngas bstan pa yi bgro ba dag /'di ni gang dag 'dzin 'gyur ba/ /kun dga' de phyir de la ni/ /'di 'dra'i mdo dag ngas gtad bya/ /sangs rgyas kyis bshad bgro ba dag /yul phyogs gang du 'di gsungs pa/ /sa yi phyogs ni de dag tu/ /de tshe gnod sbyin mdangs 'phrog pas/ /sems can rnams kyi mdangs mi 'phrog/ mang thos de ltar shes par gyis/ /gang dag dug dang bcas pa'i lus/ /yul phyogs su ni bskur bya ste/ /de na de dag dug med par/ /'gyur ba la ni the tshom med/ /sangs rgyas kyis bshad bgro ba dag /mdo 'di gang du gsungs pa yi/ /sa phyogs de ni kun dga' bo/ /mchod rten gyur par shes par gyis/ /sngon gyi mgon po 'das pa ste/ /'jig rten snang byed gang dag gis/ /sa yi phyogs ni 'di nyid du/ /mdo 'di dag ni rab tu bshad/ /sems can mya ngan 'jigs byed pa/ /da ltar rdzogs sangs rgyas ngas kyang / /sa yi 426b phyogs ni 'di nyid du/ /mdo mchog dag ni bshad par bya/ /'jig rten mgon po bsam mi khyab/ /rdzogs pa'i sangs rgyas byams pas kyang / /sa yi phyogs ni 'di nyid du/ /mdo sde 'di ni 'chad par 'gyur/ /mang thos byams pa 'di yis ni/ /mdo 'di ston par byed pa na/ /ther 'bum brgyad cu tshang ba dag /byang chub tu yang lung ston 'gyur/ /bdag ni gang gis yongs smin byas/ /kye ma'o sangs rgyas shAkya thub ces/ /skad cig de la nga yi ming / /rdzogs sangs rgyas kyis brjod par 'gyur/ /byams pa yi ni thad dag nas/ /srog chags bye ba grangs med pas/ /nga yi ming ni thos nas kyang / /byang chub mchog tu smon par byed/ /skad cig de la sangs rgyas la/ /de bzhin gshegs pa byams pa yang / /'dzum pa dag ni mdzad 'gyur zhing / /de ni cho 'phrul bsam mi khyab/ /phyi ma'i dus na gang kha cig /tshul 'di dag ni tshol byed pa/ /kun dga' de ni de yi tshe/ /byams dang phrad par lung bstan bya/ /shAkya seng+ge de yis ni| |mdo 'di bshad pa de mod la/ /srog chags stong phrag brgyad cu gang / /byang chub la ni mngon par zhugs/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo/ dge slong chos bzhi dang ldan na sangs rgyas kyi byang chub spong bar byed de/ bzhi gang zhe na/ kun dga' bo/ 'di la dge slong lhag pa'i nga rgyal 427a @#/ /can yin te/ lhag pa'i nga rgyal can des lhag pa'i nga rgyal med pa'i chos thos na skrag cing dngang la rab tu dngang bar 'gyur ro/ /g.yang sa chen por yang ltung bar 'gyur ro/ /des gting dpag med pa'ang spong bar byed cing mi mthun par smra la kun nas khro bor byed do/ /kun dga' bo/ gzhan yang dge slong de ni/ bdag tu mngon par zhen cing mtshams bral ba yin/ /kun dga' bo/ chos gnyis po 'di dang ldan pa'i dge slong ni/ sangs rgyas kyi byang chub spong bar byed cing mi mthun par smra la kun nas khro bar byed do/ /kun dga' bo/ /gzhan yang dge slong tshul khrims 'chal pa cho ga la log par zhugs pa yin te/ de tshul khrims 'chal ba dang ldan pas tshul khrims kyi gtam thos na zhum par 'gyur te/ kun dga' bo/ chos gsum po 'di dang ldan pa'i dge slong ni/ sangs rgyas kyi byang chub spong bar byed cing mi mthun par smra la kun nas khro bar byed do/ /kun dga' bo/ gzhan yang dge slong dmigs par lta ba can bdag tu smra ba yin te/ des stong pa nyid kyi gtam thos na chags pa med pa la skrag cing dngang la rab tu dngang bar 'gyur te/ kun dga' bo/ chos bzhi po 'di dag dang ldan pa'i dge slong ni/ sangs rgyas kyi byang chub spong bar byed cing mi mthun par 427b smra la kun nas khro bar byed do/ /bcom ldan 'das kyis de skad ces bka' stsal nas bde bar gshegs pas de skad gsungs te/ ston pas gzhan yang 'di skad ces bka' stsal to| |dge slong lhag pa'i nga rgyal can/ /ma thob thob pa'i 'du shes can/ /de ni des na ngas bstan pa'i/ /zab pa'i chos ni spong bar byed/ /'jig rten rgyang pan 'dres pa yi/ /dge slong chos smra gang yin pas/ /ngas bstan pa yi mdo zab pa/ /'di ni rab tu spong bar byed/ /bdag tu smra ba'i dge slong gang / /dmigs pa la ni rab gnas pas/ /bdag med chos dag thos nas kyang / /nga yi bstan pa spong bar byed/ /dge slong tshul khrims 'chal pa gang / /sdig pa'i chos can mi sdom pas/ /yo byad bsnyungs pa'i chos thos na/ /nga yi bstan pa spong bar byed| |skyob pa shAkya seng+ge nga'i/ /bstan pa shes rab 'chal pa yis/ /spangs nas kyang ni lus zhig nas/ /ngan 'gro rnams su skye bar 'gyur/ /kun dga' bo/ chos bzhi dang ldan pa'i dge slong gis de bzhin gshegs pas thugs su chud pa'i chos 'dul ba dag thos na dga' ba dang / mchog tu dga' ba rgya chen po dag rab tu thob par 'gyur ro/ /kun dga' bo/ 'di la bzhi gang zhe na/ dge slong lhag pa'i nga rgyal med pa can yin no/ /'jig rten rgyang pan pa dang ma 'dres pa yin no/ /gzhan dag la chos dag pa ston pa yin no/ /dmigs pa 428a @#/ /dang ldan pa yin no/ /bdag tu mngon par zhen pa ma yin no/ /dge ba'i chos can tshul khrims dang ldan pa yin no/ /kun dga' bo/ chos bzhi po 'di dag dang ldan pa'i dge slong gis de bzhin gshegs pas thugs su chud pa'i chos 'dul ba dag thos na dga' ba dang / mchog tu dga' ba rgya chen po dag rab tu thob par 'gyur ro/ /bcom ldan 'das kyis de skad ces bka' stsal nas bde bar gshegs pas de skad gsungs te/ ston pas gzhan yang 'di skad ces bka' stsal to/ /dge slong nga rgyal med pa gang // yang dag chos la rab gnas des/ /zab pa'i chos dag thos nas ni/ /dga' ba mtshungs med des 'thob bo/ /chos nyid zab pa thos nas kyang / /yang dag chos la rab gnas pas| |dman pa 'di ni rab bsgrags te/ /'jig rten rgyang pan sten mi byed/ /bdag med chos dag thos nas kyang / /gcig tu myur bar zhu mi 'gyur/ /zla ba yar gyi ngo ltar ni/ / de yi ye shes rnam par 'phel/ /bdag med chos dag thos nas kyang / /gang gi the tshom yod min zhing / /zla ba yar gyi ngo ltar ni/ /de yi ye shes rnam par 'phel/ /bcom ldan 'das kyis de skad ces bka' stsal nas dge slong de dag dang / lha dang / mi dang / lha ma yin dang / dri zar bcas pa'i 'jig rten bcom ldan 'das kyis gsungs pa la 428b yi rang ste mngon par bstod do/ /de bzhin gshegs pa bgro ba zhes bya ba theg pa chen po'i mdo rdzogs so// //rgya gar gyi mkhan po dz+nya na gar+b+ha dang / lo tsA ba ban+d+he dpal gyi dbyangs kyis bsgyur cing / zhu chen gyi lo tsA ba ban+d+he dpal brtsegs kyis zhus te gtan la phab pa/ |