@#/ /rgya gar skad du/ tri d+harma ka nA ma sU tra/ bod skad du/ chos gsum pa zhes bya ba'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong gi dge 'dun chen po dang thabs cig tu bzhugs te/ de nas bcom ldan 'das kyis dge slong rnams la bka' stsal pa/ dge slong dag /'di na mi blun po la dam pa'i chos ma yin pa gsum dang ldan na/ sbyin pa dag mi sbyin zhing bsod nams dag mi byed la/ tshul khrims yang dag par blangs nas gnas par mi byed do/ /gsum gang zhe na/ 'di lta ste/ 'dod chags dang / ser sna dang / bag med pa ste/ dge slong dag /'di na mi blun de la la dam pa'i chos ma yin pa gsum po de dag dang ldan pas sbyin pa dag ma byin zhing bsod nams dag ma byas la/ tshul khrims yang dag par blangs te gnas par ma byas pas/ lus zhig ste shi ba'i 'og tu ngan song ngan 'gro log par ltung ba sems can dmyal ba rnams su skye bar 'gyur ro/ /dge slong dag 107b skyes bu dam pa dam pa'i chos gsum dang ldan pa ni/ sbyin pa dag sbyin zhing / bsod nams dag byed la/ tshul khrims yang dag par blangs te gnas par byed do/ /gsum po gang zhe na/ 'di lta ste/ ma chags pa dang / ser sna med pa dang / bag yod pa'o/ /dge slong dag /dam pa'i chos gsum po de dag dang ldan na/ skyes bu dam pa sbyin pa dag sbyin zhing / bsod nams dag byed la/ tshul khrims yang dag par blangs te gnas par byas pas lus zhig ste shi ba'i 'og tu bde 'gro mtho ris kyi 'jig rten lha rnams kyi nang du skye bar 'gyur ro/ /bcom ldan 'das kyis de skad ces bka' stsal te/ bde bar gshegs pas de skad gsungs nas ston pas gzhan yang 'di skad ces bka' stsal to/ /gang phyir ser sna bag med pas/ /sbyin pa sbyin par mi byed de/ /de phyir bsod nams 'dod pa yi/ /mkhas pas sbyin pa sbyin par bya/ /ser sna can gyis 'jigs pa ni/ /bkres dang skom pa 'di yin na/ /gang gis 'jigs pas 'dir ma byin/ /de nyid mi yi 'jigs pa yin/ /gang gis ser sna'i dbang gis na| |yod ma byin pa 'jigs pa ste/ /'jig rten 'di dang pha rol tu/ /de yis byis pa bgos par 'gyur/ /gang dag ser sna spangs nas kyang / /dus su sbyin pa 108a @#/ /sbyin byed na/ /shi yang de ni shi ma yin/ /rgyags bzang po yi mgron po bzhin/ /gang dag shin tu gtang dka' ba/ /nyung du'am mang po gtong byed na/ /gtang dka' gtong ba de dag ni/ /dka' ba'i las dag byed pa yin/ /dam pa min pas mi rtogs te/ /dam pa chos las 'da' mi byed/ /de phyir dam pa dam pa min/ /'di nas shi bar 'gyur ba na/ /dam pa min pa dmyal bar 'gro/ /dam pa dag ni mtho ris 'gro/ /rga bas gtses pa la ni skyabs med de/ /tshe thung bas ni srog khyer dus kyang nye/ /'chi ba'i 'jigs pa 'di mthong rnams kyis ni/ /bsod nams bde sbyor dag ni bya ba'i rigs/ /bud med spangs 'dir sbyor bas 'tsho ba gang / /dka' bas byin pa nyung du byin na yang / /stong gi mchod sbyin brgya stong byed pa ni/ /de yi bcu drug char yang mi phod de/ /ci phyir mchod sbyin yangs shing rgya che ba/ /mchod sbyin mthun pa de yi lam mi 'gro/ /ji ltar stong gi mchod sbyin che rnams kyang / /de yi bcu drug char mi 'gyur zhe na/ /byis pa la la gsod cing 'chi byed 'dir/ /gzhan nor ma byin len byed brlag par 'gyur/ /mchi ma'i gdong bcas chad par bcas pa yi/ /yon de'i mchod sbyin mthun pa'i lam mi 'gro/ / 108b de ltar mchod sbyin yangs shing rgya che ba/ /mchod sbyin mthun pa'i lam du mi 'gro la/ /de ltar stong gi mchod sbyin stong rnams kyang / /de yi bcu drug char yang mi phod do/ /la la gang dag gzu lums ma yin pa/ /chos bzhin nor rnams thob pa gtong byed pa/ /de dag gtang dka' de rnams btang bas na/ /rang gi bsod nams kyis ni lha gnas 'gro /bcom ldan 'das kyis de skad ces bka' stsal nas dge slong de dag yi rang ste bcom ldan 'das kyis gsungs pa la mngon par bstod do/ /chos gsum pa zhes bya ba'i mdo rdzogs so// //rgya gar gyi mkhan po dzi na mi tra dang / zhu chen gyi lo tsA ba ban+d+he de ba tsan+d+ras bsgyur/ lo tsa ba dpal brtsegs kyis zhus te gtan la phab pa/ |